Read news in NepalBhasa text-- www.hamroschool.com BACK 𑐁𑐰𑐱𑑂𑐫𑐎𑐟𑐵 𑐰 𑐥𑑂𑐬𑐵𑐠𑐩𑐶𑐎𑐟𑐵𑐫𑐵 𑐮𑐶𑐢𑑄𑐳𑐵𑐫𑑂 𑐫𑑀𑐖𑐣𑐵 𑐡𑐫𑐾𑐎𑐵𑑅 𑐖𑑂𑐫𑐵 𑐫𑐵𑐫𑐾 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐁𑐰𑐱𑑂𑐫𑐎𑐟𑐵 𑐰 𑐥𑑂𑐬𑐵𑐠𑐩𑐶𑐎𑐟𑐵𑐫𑐵 𑐮𑐶𑐢𑑄𑐳𑐵𑐫𑑂 𑐫𑑀𑐖𑐣𑐵 𑐡𑐫𑐾𑐎𑐵𑑅 𑐖𑑂𑐫𑐵 𑐫𑐵𑐫𑐾

𑐕𑐶𑐐𑐸 𑐊𑐖𑐾𑐣𑑂𑐜𑐵 𑐕𑐸 𑐕𑐸 𑐏𑑅 ?
𑐰𑐜𑐵𑐫𑐵 𑐐𑐸𑐐𑐸𑑄 𑐣𑑄 𑐟𑑂𑐰𑐵𑑅𑐫𑐵𑐟 𑐥𑐎𑑂𑐲𑐥𑐵𑐟 𑐩𑐫𑐵𑐳𑐾 𑐳𑐩𑐵𑐣𑐸𑐥𑐵𑐟𑐶𑐎 𑐰𑐶𑐎𑐵𑐳 𑐫𑐵𑐫𑐾𑐐𑐸 𑑋 𑐮𑑅 𑐰 𑐢𑑅𑐫𑐵 𑐳𑐩𑐸𑐔𑐶𑐟 𑐰𑑂𑐫𑐰𑐳𑑂𑐠𑐵𑐥𑐣 𑐰 𑐣𑐶𑐎𑐵𑐳 𑐧𑐷𑐐𑐸 𑐣𑐵𑐥𑑄 𑐔𑐸𑐎, 𑐣𑐣𑐶, 𑐐𑐮𑑂𑐮𑐷, 𑐳𑐟𑐎𑐫𑐵𑐟 𑐣𑑂𑐴𑑂𑐫𑐵𑐧𑐮𑐾𑑄 𑐣𑑄 𑐳𑐸𑐔𑐸𑐎𑐸𑐔 𑐫𑐵𑐣𑐵 𑐟𑐫𑐾𑐐𑐸 𑑋 𑐁𑐬𑑂𑐠𑐶𑐎 𑐔𑐮𑐏𑐾𑐮𑐫𑐵𑐟 𑐣𑐶𑐬𑐸𑐟𑑂𑐳𑐵𑐴𑐶𑐟 𑐫𑐵𑐣𑐵𑑅 𑑋 𑐰𑐜𑐵𑐰𑐵𑐳𑐷𑐫𑐵𑐟 𑐳𑐴𑐖 𑐳𑐾𑐰𑐵 𑐧𑐷𑐐𑐸 𑑋 𑐣𑐶𑐲𑑂𑐥𑐎𑑂𑐲 𑐢𑑄𑐐𑑄 𑐣𑑂𑐫𑐵𑐫 𑐰 𑐎𑐵𑐬𑑂𑐫 𑐳𑐩𑑂𑐥𑐵𑐡𑐣 𑐫𑐵𑐫𑐾𑐐𑐸 𑑋 𑐥𑐶𑐣𑐾𑐫𑐵𑐥𑐶𑐣𑐶𑐐𑐸 𑐎𑐵𑐬𑐞𑑄 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐵, 𑐰𑐶𑐎𑐺𑐟𑐶, 𑐰𑐶𑐳𑑄𑐐𑐟𑐶𑐫𑐵𑐟 𑐣𑐶𑐬𑑂𑐩𑐹𑐮 𑐫𑐵𑐫𑐾𑐟 𑐦𑐎𑑂𑐰 𑐎𑐸𑐟𑑅 𑐫𑐵𑐣𑐵 𑐰𑐣𑐾𑐐𑐸 𑑋

𑐰𑐜𑐵𑐫𑐵 𑐩𑐸𑐏𑑂𑐫 𑐳𑐩𑐳𑑂𑐫𑐵𑐟 𑐕𑐸 𑐏𑑅 𑐠𑐾𑑄 𑐔𑑂𑐰𑑄 ?
𑐩𑐸𑐏𑑂𑐫 𑐮𑐵 𑐟𑑂𑐰𑐣𑐾𑐐𑐸 𑐮𑑅 𑐰 𑐢𑑅𑐫𑐵 𑐄𑐔𑐶𑐟 𑐣𑐶𑐎𑐵𑐳 𑐴𑐾 𑐏𑑅 𑑋 𑐣𑐵𑐥𑑄 𑐱𑐵𑐣𑑂𑐟𑐶 𑐳𑐸𑐬𑐎𑑂𑐲𑐵 𑐎𑐵𑐫𑐩 𑐫𑐵𑐣𑐵𑑅 𑐀𑐩𑐣 𑐔𑐿𑐣𑐫𑐵 𑐣𑑄 𑐳𑐩𑐳𑑂𑐫𑐵 𑐡𑐸 𑑋 𑐠𑐵𑐫𑑂 𑐠𑐵𑐳𑐫𑑂 𑐦𑑀𑐴𑐬𑐫𑐵 𑐳𑐩𑐳𑑂𑐫𑐵 𑐣𑑄 𑐄𑐟𑐶𑐎𑑄 𑐡𑐸𑐳𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐄𑐔𑐶𑐟 𑐠𑐵𑐫𑑂𑐫𑐵 𑐀𑐨𑐵𑐰 𑐡𑐸 𑑋 𑐀𑐠𑐾 𑐴𑐾 𑐠𑐸𑐐𑐸 𑐰𑐜𑐵𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐀𑐰𑑂𑐫𑐰𑐳𑑂𑐠𑐶𑐟 𑐬𑐸𑐥𑑄 𑐟𑐫𑐵 𑐰𑐫𑐵𑐔𑑂𑐰𑑄𑐐𑐸 𑐧𑑃𑐥𑐳𑑅𑐫𑐵 𑐎𑐵𑐬𑐞𑑄 𑐏𑐣𑐾 𑐡𑐸𑐐𑐸 𑐳𑐩𑐳𑑂𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋

𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐷 𑐢𑐂𑐐𑐸 𑐁𑐢𑐵𑐬 𑐕𑐸 ?
𑐠𑑂𑐰 𑐰𑐜𑐵𑐫𑑂 𑐣𑐾𑐎𑐥𑐵 (𑐊𑐩𑐵𑐮𑐾)𑐫𑐵 𑐁𑐢𑐵𑐬 𑐟𑐳𑐎𑑄 𑐧𑐮𑑂𑐮𑐵𑑅 𑑋 𑐰𑐜𑐵𑐫𑐵 𑐰𑐶𑐎𑐵𑐳𑐫𑐵 𑐖𑑂𑐫𑐵𑐫𑑂 𑐠𑑂𑐰 𑐥𑐵𑐬𑑂𑐚𑐷 𑐣𑑂𑐴𑑂𑐫𑑅𑐣𑐾 𑐮𑐵𑑅 𑑋 𑐡𑐾𑐱𑐨𑐎𑑂𑐟𑐶𑐫𑐵 𑐨𑐵𑐰𑐣𑐵𑑄 𑐖𑐵𑑅𑐐𑐸 𑐰 𑐰𑐶𑐎𑐵𑐳𑐥𑐾𑑂𑐬𑐩𑐷 𑐥𑐵𑐬𑑂𑐚𑐷 𑐖𑐹𑐐𑐸𑐮𑐶𑑄 𑐖𑐶𑐩𑐶𑐟 𑐰𑐜𑐵𑐰𑐵𑐳𑐷𑑄 𑐩𑐟 𑐧𑐷 𑐢𑐂𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋 𑐠𑑂𑐰 𑐰𑐜𑐵𑐫𑑂 𑐣𑐶𑐎𑑂𑐰𑑅𑐟𑐎 𑐊𑐩𑐵𑐮𑐾𑑄 𑐟𑑂𑐫𑐵𑐎𑐵𑑅 𑐖𑐣𑐟𑐵𑐫𑐵 𑐩𑐣 𑐟𑑂𑐫𑐵𑐎𑐵𑑅 𑐰𑐜𑐵𑐰𑐵𑐳𑐷𑐫𑐵 𑐳𑐾𑐰𑐵 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐖𑐣𑐥𑑂𑐬𑐟𑐶𑐣𑐶𑐢𑐶𑐟𑐫𑑂𑐳𑑄 𑐣𑑄 𑐐𑐧𑐮𑐾𑑄 𑐥𑐎𑑂𑐲𑐥𑐵𑐟𑐥𑐹𑐬𑑂𑐞 𑐰𑑂𑐫𑐰𑐴𑐵𑐬 𑐫𑐵𑑅𑐐𑐸 𑐩𑐡𑐸 𑑋 𑐰𑐶𑐎𑐵𑐳 𑐣𑐶𑐬𑑂𑐩𑐵𑐞𑐮𑐶𑐳𑐾𑑄 𑐩𑐾𑐩𑐾𑐐𑐸 𑐎𑑂𑐲𑐾𑐟𑑂𑐬𑐫𑑂 𑐣𑑄 𑐁𑐥𑐵𑐮𑑄 𑐖𑑂𑐫𑐵 𑐫𑐵𑐣𑐵𑑅 𑐰𑐜𑐵𑐰𑐵𑐳𑐷𑐫𑐵 𑐩𑐣 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸𑐮𑐶𑑄 𑐖𑐶𑐩𑐶𑐟 𑐀𑐟𑑂𑐫𑐵𑐢𑐶𑐎 𑐨𑑀𑐚 𑐧𑐶𑐫𑐵𑑅 𑐟𑑂𑐫𑐵𑐎𑐷 𑐢𑐂𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋

𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵 𑐰𑐮 𑐢𑐵𑑅𑐳𑐵 𑐣𑑂𑐴𑐵𑐥𑐵𑑄 𑐕𑐸 𑐫𑐵𑐣𑐵𑐡𑐷 ?
𑐰𑐜𑐵 𑐖𑑂𑐫𑐵𑐎𑐹𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐣𑐵𑑅 𑐳𑑄𑐔𑐵𑐮𑐣 𑐫𑐵𑐫𑐾 𑑋 𑐳𑐾𑐰𑐵𑐐𑑂𑐬𑐵𑐴𑐷𑐫𑐵𑐟 𑐳𑐸𑐮𑐨 𑐳𑐾𑐰𑐵 𑐥𑑂𑐬𑐰𑐵𑐴 𑐫𑐵𑐣𑐵𑑅 𑐰𑐜𑐵𑐰𑐵𑐳𑐷𑐫𑐵 𑐩𑐣 𑐟𑑂𑐫𑐵𑐎𑐾 𑑋 𑐟𑑂𑐰𑐵𑑅𑐫𑐵 𑐧𑐸𑐡𑑂𑐢𑐶𑐖𑐷𑐰𑐶𑐣𑐵𑐥 𑐳𑐴𑐮𑐴 𑐫𑐵𑐣𑐵𑑅 𑐁𑐰𑐱𑑂𑐫𑐎𑐟𑐵 𑐰 𑐥𑑂𑐬𑐵𑐠𑐩𑐶𑐎𑐟𑐵𑐫𑐵 𑐮𑐶𑐢𑑄𑐳𑐵𑐫𑑂 𑐫𑑀𑐖𑐣𑐵 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾 𑑋 𑐰𑐜𑐵𑐫𑐵 𑐳𑐩𑐳𑑂𑐫𑐵𑐫𑐵𑐟 𑐦𑐎𑑂𑐰 𑐀𑐥𑑂𑐰𑑅 𑐳𑐩𑐵𑐢𑐵𑐣𑐫𑐵 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐫𑐾 𑑋

𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐣𑐶𑑄𑐟𑐶𑑄 𑐕𑐸 𑐫𑑀𑐖𑐣𑐵 𑐡𑐸 ?
𑐠𑑂𑐰 𑐁𑐥𑐵𑐮𑑄 𑐣𑐾𑐰𑐵𑑅𑐟 𑐔𑑂𑐰𑐣𑐵𑐔𑑂𑐰𑑄𑐐𑐸 𑐰𑐜𑐵 𑐏𑑅 𑑋 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐢𑐂𑐐𑐸 𑐣𑐾𑐥𑐵𑐮𑐨𑐵𑐲𑐵 𑐏𑑅𑐳𑐵 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐩𑐏𑐳𑐾 𑐣𑐾𑐥𑐵𑑅𑐫𑐵 𑐴𑐾 𑐩𑑂𑐴𑐳𑐷𑐎𑐵 𑐏𑑅 𑐟𑐶𑐳𑐵 𑐏𑑅 𑑋 𑐄𑐎𑐶𑑄 𑐠𑐣𑐫𑐵 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐳𑐩𑑂𑐥𑐡𑐵 𑐮𑑂𑐫𑑄𑐎𑐵𑐟𑐫𑐾𑐐𑐸 𑐄𑐔𑐶𑐟 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐣𑐵𑐥𑑄 𑐠𑐣𑐫𑐵 𑐩𑐹𑐬𑑂𑐟 𑐀𑐩𑐹𑐬𑑂𑐟 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐥𑐸𑐬𑐵𑐟𑐵𑐟𑑂𑐰𑐶𑐎 𑐩𑐴𑐟𑑂𑐰𑐫𑐵 𑐳𑐩𑑂𑐥𑐡𑐵𑐫𑐵 𑐣𑑄 𑐳𑑄𑐬𑐎𑑂𑐲𑐞 𑐫𑐵𑐣𑐵𑑅 𑐡𑐾𑐐𑑅, 𑐦𑐮𑑂𑐔𑐵, 𑐳𑐟𑑅, 𑐮𑑂𑐰𑐴𑑄𑐴𑐶𑐟𑐶, 𑐔𑐸𑐎,𑐣𑐣𑐶, 𑐧𑐴𑐵𑑅𑐫𑐵𑐟 𑐳𑑄𑐬𑐎𑑂𑐲𑐞 𑐰 𑐁𑐰𑐱𑑂𑐫𑐎𑐟𑐵𑐎𑐠𑑄 𑐩𑐬𑑂𑐩𑐟, 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐖𑐸𑐂 𑑋 𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐣𑑄 𑐖𑑂𑐫𑐵𑐗𑑂𑐰𑑅𑐟 𑐴𑐫𑐾𑐐𑐸 𑐖𑐸𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS