Read news in NepalBhasa text-- www.hamroschool.com BACK 𑐮𑐶𑐥𑐶 𑐰 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐫𑐾 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐮𑐶𑐥𑐶 𑐰 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐫𑐾

𑐕𑐶𑐐𑐸 𑐊𑐖𑐾𑐣𑑂𑐜𑐵 𑐕𑐸 𑐏𑑅 ?
— 𑐰𑐜𑐵 𑐖𑑂𑐫𑐵𑐎𑐹 𑐰𑑂𑐫𑐰𑐳𑑂𑐠𑐶𑐟 𑐬𑐸𑐥𑑄 𑐳𑑄𑐔𑐵𑐮𑐣 𑐫𑐵𑐣𑐵𑑅 𑐳𑐴𑐖 𑐬𑐸𑐥𑑄 𑐳𑐾𑐰𑐵 𑐧𑐷 𑑋 𑐰𑐜𑐵𑐫𑑂 𑐰𑐫𑐾 𑐩𑐦𑐸𑐥𑐶𑑄𑐟 𑐕𑐾𑑃𑐫𑑂 𑐕𑐾𑑃𑐫𑑂 𑐰𑐣𑐵𑑅 𑐳𑐾𑐰𑐵 𑐧𑐷 𑑋 𑐰𑐜𑐵𑐫𑐵 𑐧𑐖𑐾𑐚 𑐄𑐥𑐨𑑀𑐎𑑂𑐟𑐵 𑐳𑐩𑐶𑐟𑐶 𑐐𑐛𑐣 𑐫𑐵𑐣𑐵𑑅 𑐂𑐩𑐶𑐐𑐸 𑐴𑐾 𑐳𑐮𑑂𑐮𑐵𑐴 𑐰 𑐳𑐸𑐗𑐵𑐰𑐎𑐠𑑄𑐫𑐵 𑐫𑑀𑐖𑐣𑐵𑐫𑑂 𑐏𑐬𑑂𑐔 𑐫𑐵𑐫𑐾 𑑋 𑐦𑑀𑐴𑐬𑐫𑐵 𑐰𑑂𑐫𑐰𑐳𑑂𑐠𑐵𑐥𑐣, 𑐬𑐵𑐟𑑂𑐬𑐷𑐎𑐵𑐮𑐷𑐣 𑐳𑐸𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐳𑐟𑐎 𑐩𑐟𑐮𑐶𑐳𑐾𑑄 𑐳𑐷𑐳𑐷 𑐎𑑂𑐫𑐵𑐩𑐬𑐵𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸 𑐖𑐸𑐂 𑑋
𑐳𑐬𑐎𑐵𑐬𑐷 𑐳𑑂𑐎𑐸𑐮𑐫𑐵 𑐄𑐔𑐶𑐟 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐣𑐵𑑅 𑐦𑐎𑑂𑐰 𑐀𑐥𑑂𑐰𑑅 𑐳𑑂𑐠𑐵𑐣𑐷𑐫 𑐩𑐳𑑂𑐟𑐫𑑂𑐳𑑄 𑐀𑐢𑑂𑐫𑐫𑐣 𑐫𑐵𑐫𑐾 𑐦𑐂𑐐𑐸 𑐰𑐵𑐟𑐵𑐰𑐬𑐞 𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸, 𑐰𑐜𑐵𑐣𑑂𑐫𑑄𑐎𑑄 𑐳𑑂𑐰𑐵𑐳𑑂𑐠𑑂𑐫 𑐱𑐶𑐰𑐶𑐬 𑐳𑑄𑐔𑐵𑐮𑐣 𑐫𑐵𑐣𑐵𑑅 𑐳𑐾𑐰𑐵 𑐧𑐷𑐐𑐸 𑐰 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎𑐫𑐵 𑐣𑐶𑑄𑐟𑐶𑑄 𑐳𑐴𑐖 𑐬𑐸𑐥𑑄 𑐨𑐟𑑂𑐟𑐵 𑐰𑐶𑐟𑐬𑐞 𑐰 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐴𑐫𑐾𑐐𑐸 𑐖𑐸𑐂 𑑋

𑐰𑐜𑐵𑐫𑑂 𑐡𑐸𑐐𑐸 𑐩𑐸𑐏𑑂𑐫 𑐳𑐩𑐳𑑂𑐫𑐵 𑐕𑐸 𑐏𑑅?
𑐰𑐜𑐵𑐫𑐵 𑐳𑐩𑐳𑑂𑐫𑐵 𑐢𑐂𑐐𑐸 𑐩𑐾𑐩𑐾𑐐𑐸 𑐰𑐜𑐵𑐫𑑂 𑐠𑐾𑑄 𑐴𑐾 𑐦𑑀𑐴𑐬, 𑐳𑐟𑐎 𑐩𑐟, 𑐢𑑅𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐏𑑅 𑑋 𑐣𑐵𑐥𑑄 𑐰𑐜𑐵𑐰𑐵𑐳𑐷𑐫𑐵 𑐣𑐶𑑄𑐟𑐶𑑄 𑐱𑐵𑐣𑑂𑐟𑐶 𑐳𑐸𑐬𑐎𑑂𑐲𑐵𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐩𑐵𑑅𑐐𑐸 𑐣𑑄 𑐳𑐩𑐳𑑂𑐫𑐵𑐫𑐵 𑐬𑐸𑐥𑐫𑑂 𑐡𑐸𑐐𑐸 𑐖𑐶𑑄 𑐏𑐣𑐵 𑑋 𑐠𑑂𑐰 𑐧𑐵𑐴𑐾𑐎𑑄 𑐰𑐜𑐵 𑐡𑐸𑐣𑐾𑐫𑐵 𑐳𑐩𑑂𑐥𑐡𑐵𑐫𑐵 𑐳𑑄𑐬𑐎𑑂𑐲𑐞 𑐣𑑄 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋 𑐰𑐜𑐵 𑐡𑐸𑐣𑐾𑐫𑐵 𑐁𑐥𑐵𑐮𑑄 𑐳𑐩𑑂𑐥𑐡𑐵 𑐩𑐬𑑂𑐩𑐟, 𑐥𑐸𑐣𑑅𑐣𑐶𑐬𑑂𑐩𑐵𑐞 𑐰 𑐖𑐶𑐬𑑂𑐞𑑀𑐡𑑂𑐰𑐵𑐬 𑐫𑐵𑐣𑐵𑑅 𑐄𑐎𑐶𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋 𑐠𑐸𑐎𑐶𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵𑐫𑐵 𑐁𑐢𑐵𑐬𑐫𑑂 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐐𑐸 𑐖𑐸𑐂 𑑋

𑐕𑐶 𑐣𑐶𑐬𑑂𑐰𑐵𑐔𑐶𑐟 𑐖𑐸𑐂𑐐𑐸 𑐁𑐢𑐵𑐬 𑐕𑐸 𑐡𑐸 ?
𑐰𑑄𑐐𑐸 𑐳𑑂𑐰𑑄𑐐𑐹 𑐡𑐱𑐎 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐖𑐶 𑐬𑐵𑐖𑐣𑐷𑐟𑐶 𑐰 𑐳𑐵𑐩𑐵𑐖𑐶𑐎 𑐏𑑂𑐫𑐮𑐫𑑂 𑐳𑐎𑑂𑐬𑐶𑐫 𑐖𑐸𑐫𑐵𑐔𑑂𑐰𑐣𑐵𑐐𑐸 𑐡𑐸 𑑋 𑐂𑐩𑐵𑐣𑑂𑐡𑐵𑐬 𑐖𑐸𑐫𑐵𑑅 𑐠𑑂𑐰 𑐏𑑂𑐫𑐮𑐫𑑂 𑐎𑑂𑐬𑐶𑐫𑐵𑐱𑐷𑐮 𑐖𑐶 𑐕𑐩𑑂𑐴 𑐮𑑂𑐫𑐵𑐫𑑂𑐩𑑂𑐴𑐩𑑂𑐴 𑐄𑐩𑑂𑐩𑐾𑐡𑐰𑐵𑐬 𑐣𑑄 𑐏𑑅 𑑋 𑐥𑑂𑐬𑐵𑐎𑐺𑐟𑐶𑐎 𑐰𑐶𑐥𑐡𑑂, 𑐨𑐸𑐏𑐵𑐫𑑂 𑐰 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑐵 𑐂𑐮𑐫𑑂 𑐄𑐡𑑂𑐢𑐵𑐬, 𑐬𑐵𑐴𑐟 𑐰 𑐏𑑀𑐥𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐐𑐸 𑐡𑐸 𑑋 𑐣𑑂𑐴𑐵𑐥𑐵𑐫𑐵 𑐔𑐸𑐣𑐵𑐰𑐫𑑂 𑐧𑐹𑐳𑐵𑑄 𑐖𑐶𑑄 𑐰𑐜𑐵𑐰𑐵𑐳𑐷𑐫𑐵 𑐣𑐶𑑄𑐟𑐶𑑄 𑐳𑐴𑐖 𑐬𑐸𑐥𑑄 𑐦𑐎𑑂𑐰 𑐳𑐾𑐰𑐵 𑐧𑐶𑐫𑐵𑐐𑐸 𑐎𑐵𑐬𑐞𑑄 𑐖𑐶 𑐠𑐸𑐐𑐸𑐳𑐷 𑐣𑐶𑐬𑑂𑐰𑐵𑐔𑐶𑐟 𑐖𑐸𑐂 𑐢𑐂𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋

𑐕𑐶 𑐣𑐶𑐬𑑂𑐰𑐵𑐔𑐶𑐟 𑐖𑐸𑐮 𑐢𑐵𑑅𑐳𑐵 𑐣𑑂𑐴𑐵𑐥𑐵𑑄 𑐕𑐸 𑐫𑐵𑐣𑐵𑐡𑐷 ?
𑐣𑑂𑐴𑐵𑐥𑐵𑑄 𑐮𑐵 𑐀𑐰𑑂𑐫𑐰𑐳𑑂𑐠𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐰𑐜𑐵 𑐖𑑂𑐫𑐵𑐎𑐹𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾 𑑋 𑐀𑐠𑐾 𑐴𑐾 𑐦𑐸𑐚𑐥𑐵𑐠𑐟 𑐔𑐶𑐂𑐎𑐵𑑅 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸 𑐣𑐵𑐥𑑄 𑐳𑐸𑐬𑐎𑑂𑐲𑐵 𑐣𑐶𑐎𑐵𑐫𑐮𑐶𑐳𑐾 𑐳𑐴𑐎𑐵𑐬𑑂𑐫 𑐰 𑐳𑐩𑐣𑑂𑐰𑐫 𑐫𑐵𑐣𑐵𑑅 𑐰𑐜𑐵𑐫𑑂 𑐱𑐵𑐣𑑂𑐟𑐶 𑐳𑐸𑐬𑐎𑑂𑐲𑐵 𑐎𑐵𑐫𑐩 𑐫𑐵𑐫𑐾𑐐𑐸 𑐳𑑂𑐰𑐫𑐾 𑑋

𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐣𑐶𑑄𑐟𑐶𑑄 𑐕𑐶𑐐𑐸 𑐫𑑀𑐖𑐣𑐵 𑐕𑐸 𑐡𑐸 ?
𑐳𑐬𑐎𑐵𑐬𑐷 𑐰 𑐣𑐶𑐖𑐷 𑐳𑑂𑐎𑐸𑐮𑐫𑑂 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐧𑑂𑐰𑑄𑐎𑐾𑐐𑐸𑐮𑐶𑐂 𑐥𑑂𑐬𑐵𑐠𑐩𑐶𑐎𑐵 𑐧𑐷 𑑋 𑐣𑐵𑐥𑑄 𑐗𑐷𑐐𑐸 𑐩𑑂𑐴𑐳𑐷𑐎𑐵 𑐖𑐸𑐫𑐵𑐔𑑂𑐰𑑄𑐐𑐸 𑐮𑐶𑐥𑐶 𑐳𑑂𑐫𑐣𑐾𑐐𑐸 𑐣𑐶𑑄𑐟𑐶𑑄 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐣𑐵𑐥𑑄 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐣𑑄 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐫𑐾 𑑋 𑐥𑐬𑐵𑐥𑐹𑐬𑑂𑐰𑐎𑐵𑐮𑐣𑐶𑐳𑐾𑑄 𑐔𑐮𑐾 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐖𑐵𑐟𑑂𑐬𑐵, 𑐥𑐬𑑂𑐰 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑑄𑐬𑐎𑑂𑐲𑐞 𑐣𑐵𑐥𑑄 𑐁𑐰𑐱𑑂𑐫𑐎 𑐧𑐖𑐾𑐚𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS