Read news in NepalBhasa text-- www.hamroschool.com BACK 𑐩𑑁𑐮𑐶𑐎 𑐥𑐴𑑅𑐫𑐵 𑐕𑐾𑑃 𑐡𑐣𑐷𑐥𑐶𑑄𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐖𑐸𑐂 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑑁𑐮𑐶𑐎 𑐥𑐴𑑅𑐫𑐵 𑐕𑐾𑑃 𑐡𑐣𑐷𑐥𑐶𑑄𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐖𑐸𑐂

𑐕𑐶𑐐𑐸 𑐩𑐹 𑐩𑐹 𑐊𑐖𑐾𑐣𑑂𑐜𑐵 𑐕𑐸 𑐕𑐸 𑐏𑑅 ?

𑐁𑑅 𑐖𑐸𑐂𑐐𑐸 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰𑐫𑐵 𑐣𑐶𑑄𑐟𑐶𑑄 𑐖𑐶𑑄 𑐖𑐶𑐐𑐸 𑐰𑐜𑐵𑐫𑐵 𑐩𑐸𑐏𑑂𑐫 𑐊𑐖𑐾𑐣𑑂𑐜𑐵𑐫𑐵 𑐬𑐸𑐥𑐫𑑂 𑐰𑐜𑐵𑐫𑐵 𑐳𑐸𑐔𑐸𑐎𑐸𑐔𑐸𑐫𑐵 𑐣𑐶𑑄𑐟𑐶𑑄 𑐰𑐶𑐱𑐾𑐲 𑐥𑐴𑐮 𑐫𑐵𑐫𑐾𑐐𑐸, 𑐟𑑂𑐰𑐣𑐾𑐐𑐸 𑐮𑑅 𑐰 𑐢𑑅𑐫𑐵 𑐄𑐔𑐶𑐟 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐐𑐸 𑐡𑐸 𑑋 𑐀𑐠𑐾 𑐴𑐾 𑐳𑐵𑐬𑑂𑐰𑐖𑐣𑐶𑐎 𑐥𑐵𑐬𑑂𑐎𑐫𑐵 𑐳𑑂𑐟𑐬𑑀𑐣𑑂𑐣𑐟𑐶 𑐫𑐵𑐫𑐾𑐐𑐸, 𑐰𑐜𑐵 𑐡𑐸𑐣𑐾𑐫𑐵 𑐳𑐩𑑂𑐥𑐡𑐵𑐫𑐵 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐩𑐬𑑂𑐩𑐟, 𑐖𑐶𑐬𑑂𑐞𑑀𑐡𑑂𑐰𑐵𑐬, 𑐥𑐸𑐣𑑅𑐣𑐶𑐬𑑂𑐩𑐵𑐞 𑐰 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐖𑐸𑐂 𑑋

𑐠𑑂𑐰 𑐧𑐵𑐴𑐾𑐎𑑄 𑐊𑐎𑐷𑐎𑐺𑐟 𑐰𑐳𑑂𑐟𑐷 𑐰 𑐩𑑁𑐮𑐶𑐎 𑐥𑐴𑑅𑐫𑐵 𑐕𑐾𑑃 𑐣𑐶𑐬𑑂𑐩𑐵𑐞 𑐫𑐵𑐂𑐥𑐶𑑄𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸, 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎𑐫𑐵 𑐣𑐶𑑄𑐟𑐶𑑄 𑐳𑑂𑐰𑐵𑐳𑑂𑐠𑑂𑐫 𑐳𑐾𑐰𑐵, 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎 𑐩𑐣𑑀𑐬𑐘𑑂𑐖𑐣 𑐎𑐾𑐣𑑂𑐡𑑂𑐬𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸, 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎𑐫𑐵𑐟 𑐳𑐴𑐖 𑐬𑐸𑐥𑑄 𑐨𑐟𑑂𑐟𑐵 𑐄𑐥𑐮𑐧𑑂𑐢 𑐫𑐵𑐎𑐾𑐐𑐸 𑐰 𑐰𑐜𑐵𑐰𑐵𑐳𑐷𑐫𑐵 𑐳𑑂𑐰𑐵𑐠𑑂𑐫𑑀𑐥𑐔𑐵𑐬𑐫𑐵 𑐣𑐶𑑄𑐟𑐶𑑄 𑐊𑐩𑑂𑐧𑐸𑐮𑐾𑐣𑑂𑐳𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸 𑐣𑐵𑐥𑑄 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐴𑐫𑐾𑐐𑐸 𑐖𑐸𑐂 𑑋

𑐮𑑀𑐎𑐳𑐾𑐰𑐵𑐫𑐵 𑐣𑐶𑑄𑐟𑐶𑑄 𑐟𑐫𑐵𑐬𑐷 𑐎𑐎𑑂𑐲𑐵 𑐳𑑄𑐔𑐵𑐮𑐣𑐮𑐶𑐳𑐾𑑄 𑐳𑐵𑐬𑑂𑐰𑐖𑐣𑐶𑐎 𑐠𑐵𑐳𑐫𑑂 𑐣𑐶𑑅𑐱𑐸𑐮𑑂𑐎 𑐰𑐵𑐂𑐦𑐵𑐂𑐫𑐵 𑐰𑑂𑐫𑐰𑐳𑑂𑐠𑐵, 𑐄𑐖𑑂𑐫𑐵𑐮𑑀 𑐰𑐜𑐵𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐠𑐵𑐳𑐫𑑂 𑐩𑐟𑐫𑐵 𑐰𑑂𑐫𑐰𑐳𑑂𑐠𑐵, 𑐐𑐬𑐶𑐧 𑐰𑐜𑐵𑐰𑐵𑐳𑐷𑐫𑐵 𑐣𑐶𑑄𑐟𑐶𑑄 𑐣𑐶𑑅𑐱𑐸𑐮𑑂𑐎 𑐱𑐶𑐎𑑂𑐲𑐵 𑐰 𑐕𑐵𑐟𑑂𑐬𑐰𑐺𑐟𑑂𑐟𑐶𑐫𑐵 𑐣𑐶𑑄𑐟𑐶𑑄 𑐥𑐴𑐮 𑐫𑐵𑐫𑐾𑐐𑐸 𑐖𑐸𑐂 𑑋

𑐕𑐶𑐐𑐸 𑐰𑐜𑐵𑐫𑑂 𑐡𑐸𑐐𑐸 𑐩𑐸𑐏𑑂𑐫 𑐳𑐩𑐳𑑂𑐫𑐵𑐟 𑐕𑐸 𑐕𑐸 𑐏𑑅 ?
𑑑𑑘 𑐰𑐜𑐵 𑐡𑐸𑐣𑐾𑐫𑐵 𑐳𑐩𑐳𑑂𑐫𑐵𑐟 𑐮𑐵 𑐫𑐎𑑂𑐰𑑄 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐣𑑄 𑐩𑐸𑐏𑑂𑐫 𑐳𑐩𑐳𑑂𑐫𑐵 𑐢𑐂𑐐𑐸 𑐡𑐎𑑂𑐰𑑄 𑐰𑐜𑐵𑐫𑑂 𑐏𑐣𑐾 𑐡𑐸𑐐𑐸 𑐳𑐩𑐳𑑂𑐫𑐵 𑐴𑐾 𑐏𑐟 𑑋 𑐰 𑐳𑐩𑐳𑑂𑐫𑐵 𑐢𑐂𑐐𑐸 𑐟𑑂𑐰𑐣𑐾𑐐𑐸 𑐮𑑅𑐫𑐵 𑐰𑑂𑐫𑐰𑐳𑑂𑐠𑐵𑐥𑐣, 𑐧𑐵𑐮𑑄 𑐔𑑂𑐰𑑄𑐥𑐶𑑄𑐳𑑄 𑐫𑐵𑐂𑐐𑐸 𑐦𑑀𑐴𑐬 𑐰 𑐳𑐸𑐔𑐸𑐎𑐸𑐔𑐸 𑐀𑐮𑐾 𑐳𑐴𑐬𑐷 𑐳𑐸𑐣𑑂𑐡𑐬𑐟𑐵 𑐴𑐾 𑐎𑐸𑐬𑐸𑐥 𑐖𑐸𑐂𑐎𑐠𑑄 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐎𑐾𑐧𑐸𑐮, 𑐚𑐾𑐮𑐶𑐎𑐩 𑐰 𑐰𑐶𑐡𑑂𑐫𑐸𑐟𑐷𑐫 𑐟𑐵𑐬𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐩𑐵𑑅𑐐𑐸 𑐴𑐾 𑐏𑐟 𑑋 𑐁𑑅𑐫𑐵 𑐣𑐶𑐬𑑂𑐰𑐵𑐔𑐣𑐫𑑂 𑐖𑐶 𑐟𑑂𑐫𑐵𑐟 𑐢𑐵𑑅𑐳𑐵 𑐠𑑂𑐰 𑐴𑐾 𑐏𑑃𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐠𑑂𑐰 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐎𑐸𑐟𑑅 𑐫𑐵𑐫𑐾 𑑋

𑐕𑐶 𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐷 𑐢𑐂𑐐𑐸 𑐁𑐢𑐵𑐬 𑐕𑐸 𑐡𑐸 ?
𑐰𑑄𑐐𑐸 𑐣𑑂𑐫𑐵𑐡𑑃𑐫𑐵 𑐡𑐸𑐣𑐾 𑐰𑐜𑐵𑐰𑐵𑐳𑐷𑐫𑐵𑐟 𑐫𑐵𑐣𑐵𑐐𑐸 𑐰𑐵 𑐢𑐵𑐫𑐾 𑐧𑐶𑐫𑐵𑐐𑐸 𑐳𑐾𑐰𑐵, 𑐰𑐜𑐵𑐫𑐵 𑐳𑐩𑑂𑐥𑐡𑐵 𑐥𑐸𑐣𑑅𑐣𑐶𑐬𑑂𑐩𑐵𑐞, 𑐥𑐹𑐬𑑂𑐰𑐵𑐢𑐵𑐬 𑐰𑐶𑐎𑐵𑐳𑐫𑐵 𑐣𑐵𑐥𑑄 𑐎𑑀𑐬𑑀𑐣𑐵𑑄 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵𑑅 𑐮𑐎𑐜𑐵𑐄𑐣 𑐖𑐹𑐐𑐸 𑐂𑐮𑐫𑑂 𑐫𑐵𑐣𑐵𑐐𑐸 𑐀𑐣𑐾𑐎𑐠𑑄𑐫𑐵 𑐳𑐾𑐰𑐵, 𑐳𑐬𑑂𑐰 𑐳𑐸𑐮𑐨 𑐰 𑐰𑑂𑐫𑐰𑐳𑑂𑐠𑐶𑐟 𑐬𑐸𑐥𑑄 𑐎𑑀𑐬𑑀𑐣𑐵 𑐥𑐬𑐷𑐎𑑂𑐲𑐞 (𑐥𑐷𑐳𑐷𑐁𑐬 𑐚𑐾𑐳𑑂𑐚), 𑐏𑑀𑐥 𑐧𑐷𑐎𑐾𑐐𑐸, 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎, 𑐮𑑂𑐫𑐵𑐫𑑂𑐩𑑂𑐴, 𑐩𑐶𑐳𑐵𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐫𑐵𑐣𑐵𑐐𑐸 𑐖𑑂𑐫𑐵 𑐐𑐸𑐐𑐸 𑐰𑐜𑐵𑐰𑐵𑐳𑐷𑑄 𑐩𑐹𑐮𑑂𑐫𑐵𑑄𑐎𑐣 𑐫𑐵𑑅𑐐𑐸 𑐡𑐸, 𑐄𑐎𑐶𑐫𑐵 𑐴𑐾 𑐮𑐶𑐢𑑄𑐳𑐵𑐫𑑂 𑐟𑑂𑐫𑐵𑐂𑐐𑐸 𑐁𑐢𑐵𑐬 𑐡𑐸 𑑋

𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐶𑐮 𑐢𑐵𑑅𑐳𑐵 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐕𑐸 𑐫𑐵𑐣𑐵𑐡𑐷 ?
𑐴𑐵𑐎𑐣𑑄 𑐖𑐶 𑐰𑐜𑐵𑐀𑐢𑑂𑐫𑐎𑑂𑐲𑐫𑑂 𑐣𑐶𑐬𑑂𑐰𑐵𑐔𑐶𑐟 𑐖𑐸𑐮 𑐢𑐵𑑅𑐳𑐵 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐮𑐵 𑐳𑐎𑐮 𑐩𑐟𑐡𑐵𑐟𑐵𑐟𑐫𑑂𑐟 𑐰𑐫𑑂𑐎𑑅𑐥𑐶𑑄𑐳𑑄 𑐖𑐶𑑄 𑐫𑐵𑐣𑐵𑐐𑐸 𑐖𑑂𑐫𑐵𑐫𑐵 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐖𑐶𑐟𑑅 𑐰𑐶𑐱𑑂𑐰𑐵𑐳 𑐫𑐵𑐣𑐵𑑅 𑐩𑐟 𑐧𑐶𑐫𑐵𑑅 𑐟𑑂𑐫𑐵𑐎𑐵𑐡𑐷𑐐𑐸𑐮𑐶𑑄 𑐳𑐸𑐨𑐵𑐫𑑂 𑐡𑐾𑐕𑐵𑐫𑐾 𑑋 𑐖𑑂𑐫𑐵𑐫𑐵 𑐳𑐣𑑂𑐡𑐬𑑂𑐨𑐫𑑂 𑐔𑑂𑐰𑐫𑐾 𑐢𑐫𑐵𑐠𑐾𑑄 𑐰𑐜𑐵𑐫𑐵 𑐳𑐸𑐔𑐸𑐎𑐸𑐔 𑐫𑐵𑐣𑐵𑑅 𑐩𑐴𑐵𑐣𑐐𑐬𑐫𑐵 𑐣𑐩𑐹𑐣𑐵 𑐰𑐜𑐵 𑐡𑐫𑐾𑐎𑐾𑐐𑐸 𑐎𑐸𑐟𑑅 𑐫𑐵𑐫𑐾 𑑋 𑐀𑐳𑑂𑐟𑐰𑑂𑐫𑐳𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐟𑐵𑐬𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐰 𑐰𑐜𑐵𑐰𑐵𑐳𑐷𑐫𑐵 𑐣𑐶𑑄𑐟𑐶𑑄 𑐮𑑅𑐫𑐵 𑐄𑐔𑐶𑐟 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾 𑑋

𑐰𑑄𑐐𑐸 𑐣𑑂𑐫𑐵𑐡𑑃𑐫𑐵 𑐎𑐵𑐬𑑂𑐫𑐎𑐵𑐮𑐥𑑂𑐬𑐟𑐶 𑐕𑐶 𑐐𑐸𑐮𑐶 𑐳𑐣𑑂𑐟𑐸𑐲𑑂𑐚 𑐖𑐸𑐫𑐵𑐡𑐶𑐫𑐵 ?
𑐰𑑄𑐐𑐸 𑐣𑑂𑐫𑐵𑐡𑑃𑐫𑐵 𑐎𑐵𑐬𑑂𑐫𑐎𑐵𑐮 𑐡𑐸𑐣𑐾 𑐖𑐶𑑄 𑐫𑐵𑐣𑐵𑐐𑐸 𑐐𑐸𑐮𑐶 𑐣𑑄 𑐖𑑂𑐫𑐵 𑐡𑐸 𑑋 𑐄𑐎𑐷 𑐖𑐶 𑐳𑐣𑑂𑐟𑐸𑐲𑑂𑐚 𑐴𑐾 𑐡𑐸 𑑋 𑐩𑐾𑐐𑐸 𑐳𑐵𑐩𑐵𑐣𑑂𑐫 𑐂𑐮𑐫𑑂 𑐳𑑂𑐰𑐫𑐵𑑄 𑐣𑑄 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞 𑐰 𑐮𑐎𑐜𑐵𑐄𑐣 𑐠𑐵𑐎𑐸𑐐𑐸 𑐂𑐮𑐫𑑂 𑐣𑑄 𑐖𑐶𑐩𑐶𑐳𑑄 𑐐𑐸𑐐𑐸 𑐳𑐾𑐰𑐵 𑐧𑐶𑐫𑐵𑑅 𑐰𑐜𑐵𑐰𑐵𑐳𑐷𑐫𑐵 𑐩𑐣 𑐟𑑂𑐫𑐵𑐎𑐾 𑐦𑐟 𑐠𑑂𑐰 𑐟𑑅𑐢𑑄𑐐𑐸 𑐄𑐥𑐮𑐧𑑂𑐢𑐶 𑐏𑑅𑐳𑐵 𑐠𑑂𑐰 𑐴𑐾 𑐖𑐶𑐩𑐶𑐐𑐸 𑐳𑐣𑑂𑐟𑐸𑐲𑑂𑐚𑐶 𑐣𑑄 𑐏𑑅 𑑋

𑐳𑑂𑐠𑐵𑐣𑐷𑐫 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐣𑐶𑑄𑐟𑐶𑑄 𑐕𑐶𑐐𑐸 𑐐𑑂𑐰𑐳𑐵𑑅 𑐕𑐸 𑐡𑐸 ?
𑐨𑐵𑐲𑐵𑐫𑐵 𑐳𑐣𑑂𑐡𑐬𑑂𑐨𑐫𑑂 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐫𑐵 𑐎𑐵𑐬𑑂𑐫𑐎𑐵𑐮𑐫𑑂 𑐳𑑂𑐠𑐵𑐣𑐷𑐫 𑐨𑐵𑐲𑐵𑐫𑐵𑐟 𑐡𑐎𑑂𑐰𑑄 𑐧𑑂𑐰𑐣𑐾𑐎𑐸𑐠𑐶𑐂 𑐮𑐵𑐐𑐹 𑐫𑐵𑐣𑐵𑐐𑐸𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑑅 𑐄𑐎𑐶𑐫𑐵𑐟 𑐟𑑅𑐔𑐵𑑅 𑐫𑐵𑐣𑐵 𑐫𑑄𑐎𑐾𑐐𑐸 𑐖𑐸𑐂 𑑋 𑐀𑐠𑐾 𑐴𑐾 𑐎𑐮𑐵 𑐳𑑄𑐳𑑂𑐎𑐺𑐟𑐶𑐫𑐵 𑐏𑑂𑐫𑐮𑐫𑑂 𑐣𑑄 𑐰𑑄𑐐𑐸 𑐣𑑂𑐫𑐵𑐡𑑃𑐫𑐵 𑐀𑐰𑐢𑐶 𑐡𑐸𑐣𑐾 𑐐𑐸𑐮𑐶 𑐣𑑄 𑐖𑑂𑐫𑐵 𑐫𑐵𑐣𑐵 𑐄𑐎𑐶𑐫𑐵𑐟 𑐀𑐗 𑐢𑐶𑐳𑐶𑐮𑐵𑐎𑑂𑐎 𑐣𑑂𑐴𑑂𑐫𑑅𑐣𑐾 𑐫𑑄𑐎𑐾𑐐𑐸 𑐖𑐸𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS