Read news in NepalBhasa text-- www.hamroschool.com BACK 𑐁𑐰𑐱𑑂𑐫𑐎𑐟𑐵 𑐳𑑂𑐰𑐫𑐵𑑅 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵 𑐰𑐣𑐾𑐐𑐸 𑐖𑐸𑐂 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐁𑐰𑐱𑑂𑐫𑐎𑐟𑐵 𑐳𑑂𑐰𑐫𑐵𑑅 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵 𑐰𑐣𑐾𑐐𑐸 𑐖𑐸𑐂

𑐔𑐸𑐣𑐵𑐰𑐫𑑂 𑐕𑐶𑐐𑐸 𑐩𑐹 𑐊𑐖𑐾𑐣𑑂𑐜𑐵 𑐕𑐸 𑐏𑑅 ?
𑐳𑑂𑐠𑐵𑐣𑐷𑐫 𑐔𑐸𑐣𑐵𑐰𑐫𑑂 𑐱𑐶𑐎𑑂𑐲𑐵, 𑐳𑑂𑐰𑐵𑐳𑑂𑐠𑑂𑐫, 𑐬𑑀𑐖𑐐𑐵𑐬𑐷𑐮𑐶𑐳𑐾𑑄 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐥𑐬𑐩𑑂𑐥𑐬𑐵𑐫𑐵 𑐣𑐶𑑄𑐟𑐶𑑄 𑐰𑐶𑐱𑐾𑐲 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐡𑐫𑐾𑐎𑐵𑐐𑐸 𑐡𑐸 𑑋 𑐣𑑂𑐴𑐵𑐥𑐵𑐫𑐵 𑐎𑐵𑐬𑑂𑐫𑐎𑐵𑐮𑐫𑑂 𑐠𑐸𑐎𑐶𑐫𑐵𑐟 𑐰𑐶𑐱𑐾𑐲 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐐𑐸 𑐏𑑅𑐳𑐵 𑐁𑑅 𑐣𑑄 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐐𑐸 𑐡𑐸 𑑋 𑐥𑑂𑐬𑐵𑐠𑐩𑐶𑐎𑐟𑐵 𑐖𑐎 𑐧𑐶𑐫𑐵𑐐𑐸 𑐩𑐏𑐸, 𑐣𑑂𑐴𑐵𑐥𑐵 𑐫𑐵𑐣𑐵𑐐𑐸 𑐖𑑂𑐫𑐵𑐫𑐵𑐟 𑐰𑑂𑐫𑐵𑐥𑐎 𑐫𑐵𑐣𑐵 𑐫𑑄𑐎𑐾𑐐𑐸 𑐫𑑀𑐖𑐣𑐵 𑐡𑐸 𑑋 𑐰 𑐴𑐾 𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐣𑐵𑐥𑑄 𑐬𑑀𑐖𑐐𑐵𑐬𑐷𑐫𑐵 𑐳𑐩𑐳𑑂𑐫𑐵 𑐣𑑂𑐴𑑄𑐎𑐾𑐐𑐸, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐥𑐬𑐩𑑂𑐥𑐬𑐵𑐫𑐵𑐟 𑐏𑑂𑐫𑐮𑐫𑑂 𑐣𑑄 𑐰𑐶𑐱𑐾𑐲𑐎𑐠𑑄 𑐖𑑂𑐫𑐵 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐡𑐸 𑑋

𑐰𑐜𑐵𑐫𑑂 𑐩𑐸𑐏𑑂𑐫 𑐳𑐩𑐳𑑂𑐫𑐵𑐟 𑐕𑐸 𑐕𑐸 𑐡𑐸 ?
—𑐳𑐩𑐳𑑂𑐫𑐵 𑐩𑐡𑐸𑐐𑐸 𑐰𑐜𑐵 𑐢𑐂𑐐𑐸 𑐴𑐾 𑐡𑐂𑐩𑐏𑐸, 𑐳𑐩𑐳𑑂𑐫𑐵 𑐣𑑂𑐴𑑂𑐫𑐵𑐧𑐮𑐾𑑄 𑐡𑐫𑐵𑐔𑑂𑐰𑐣𑐷 𑑋 𑐄𑐎𑐶𑐫𑐵𑐟 𑐳𑐩𑐵𑐢𑐵𑐣 𑐫𑐵𑐣𑐵 𑐰𑐣𑐾𑐐𑐸 𑐩𑐸𑐏𑑂𑐫 𑐏𑑃 𑐏𑑅 𑑋 𑐀𑐠𑐾 𑐏𑐫𑐵𑑅 𑐣𑑄 𑐰𑐜𑐵𑐫𑑂 𑐏𑐣𑐾 𑐡𑐸𑐐𑐸 𑐩𑐸𑐏𑑂𑐫 𑐳𑐩𑐳𑑂𑐫𑐵 𑐢𑐂𑐐𑐸 𑐟𑑂𑐰𑐣𑐾𑐐𑐸 𑐮𑑅𑐫𑐵 𑐁𑐥𑐹𑐬𑑂𑐟𑐶, 𑐢𑑅𑐫𑐵 𑐄𑐔𑐶𑐟 𑐰𑑂𑐫𑐰𑐳𑑂𑐠𑐵𑐥𑐣, 𑐳𑐟𑐎𑐫𑐵 𑐳𑐩𑐳𑑂𑐫𑐵, 𑐰𑐜𑐵𑐫𑐵 𑐎𑐵𑐬𑑂𑐫𑐎𑑂𑐲𑐾𑐟𑑂𑐬𑐫𑑂 𑐮𑐵𑑅𑐐𑐸 𑐏𑐸𑐳𑐶𑐫𑐵 𑐳𑐸𑐔𑐸𑐎𑐸𑐔𑐸, 𑐰𑐜𑐵𑐰𑐵𑐳𑐷𑐫𑐵 𑐳𑐴𑐷 𑐟𑐠𑑂𑐫𑐵𑑄𑐎 𑐳𑑄𑐎𑐮𑐣, 𑐰𑐶𑐥𑐡𑑂 𑐰𑑂𑐫𑐰𑐳𑑂𑐠𑐵𑐥𑐣 𑐏𑑅 𑑋 𑐀𑐠𑐾 𑐴𑐾 𑐰𑐜𑐵𑐰𑐵𑐳𑐷𑐫𑐵 𑐳𑑂𑐰𑐵𑐳𑑂𑐠𑑂𑐫𑐫𑐵 𑐳𑐩𑐸𑐔𑐶𑐟 𑐥𑐬𑐷𑐎𑑂𑐲𑐞𑐫𑐵 𑐰𑑂𑐫𑐰𑐳𑑂𑐠𑐵, 𑐳𑐟𑐎 𑐩𑐳𑑂𑐟, 𑐦𑐸𑐚𑐥𑐵𑐠𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐣𑑄 𑐫𑐵𑐫𑐾𑐩𑐵𑑅𑐐𑐸 𑐡𑐸𑐳𑐵 𑐰𑐜𑐵𑐫𑑂 𑐱𑐵𑐣𑑂𑐟𑐶 𑐳𑐸𑐬𑐎𑑂𑐲𑐵 𑐎𑐵𑐫𑐩 𑐫𑐵𑐫𑐾𑐩𑐵𑑅𑐐𑐸 𑐔𑐸𑐣𑑁𑐟𑐶 𑐣𑑄 𑐡𑐸 𑑋 𑐀𑐠𑐾 𑐴𑐾 𑐮𑐵𑐐𑐹 𑐰𑐵𑐳𑑅𑐫𑐵 𑐡𑐸𑐬𑐸𑐥𑐫𑑀𑐐 𑐣𑑄 𑐄𑐟𑐶𑐎𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐁𑑅 𑐣𑐶𑐬𑑂𑐰𑐵𑐔𑐶𑐟 𑐖𑐸𑐮 𑐢𑐵𑑅𑐳𑐵 𑐩𑐸𑐏𑑂𑐫𑐎𑐠𑑄 𑐏𑐣𑐾𑐡𑐸𑐐𑐸 𑐠𑑂𑐰 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣𑐫𑐵 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐣𑐵 𑐰𑐣𑐾𑐐𑐸 𑐖𑐸𑐂 𑑋

𑐕𑐶 𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐷 𑐢𑐂𑐐𑐸 𑐁𑐢𑐵𑐬 𑐕𑐸 𑐡𑐸 ?
𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐫𑐵 𑐎𑐵𑐬𑑂𑐫𑐎𑐵𑐮𑐫𑑂 𑐐𑐸𑐮𑐶 𑐣𑑄 𑐖𑑂𑐫𑐵 𑐫𑐵𑐣𑐵𑑅 𑐄𑐎𑐷 𑐖𑐶𑑄 𑐰𑐜𑐵𑐰𑐵𑐳𑐷𑐫𑐵 𑐩𑐣 𑐟𑑂𑐫𑐵𑐎𑐾 𑐦𑐸𑐐𑐸 𑐏𑐣𑐵 𑑋 𑐰𑐜𑐵𑐰𑐵𑐳𑐷𑐥𑐶𑑄𑐳𑑄 𑐐𑐸𑐐𑐸 𑐰𑐶𑐱𑑂𑐰𑐵𑐳 𑐫𑐵𑐣𑐵𑑅 𑐖𑐶𑐟𑑅 𑐰𑐜𑐵𑐀𑐢𑑂𑐫𑐎𑑂𑐲𑐫𑑂 𑐣𑐶𑐬𑑂𑐰𑐵𑐔𑐶𑐟 𑐫𑐵𑐣𑐵𑐡𑐶𑐮 𑑋 𑐰𑐫𑑂𑐎𑑅𑐥𑐶𑐣𑐶𑐐𑐸 𑐰𑐶𑐱𑑂𑐰𑐵𑐳𑐫𑐵𑐟 𑐖𑐶𑑄 𑐟𑑂𑐫𑐵𑐎𑐾 𑐦𑐸𑐐𑐸 𑐟𑐵𑐫𑐾𑐎𑐵 𑑋 𑐰𑐜𑐵𑐰𑐵𑐳𑐷𑐫𑐵 𑐩𑐣 𑐟𑑂𑐫𑐵𑐎𑐵𑑅 𑐐𑐸𑐐𑐸 𑐖𑑂𑐫𑐵 𑐖𑐶𑑄 𑐫𑐵𑐣𑐵𑑅 𑐄𑐎𑐶𑐫𑐵 𑐴𑐾 𑐮𑐶𑐢𑑄𑐳𑐵𑐫𑑂 𑐴𑐵𑐎𑐣𑑄 𑐕𑐎𑑂𑐰𑑅 𑐰𑐜𑐵𑐰𑐵𑐳𑐷𑐫𑐵 𑐳𑐾𑐰𑐵 𑐫𑐵𑐫𑐾𑐐𑐸 𑐴𑑂𑐰𑑅𑐟𑐵𑑅 𑐧𑐶𑐫𑐵𑐡𑐷 𑐢𑐂𑐐𑐸 𑐖𑐶𑐟𑑅 𑐰𑐶𑐱𑑂𑐰𑐵𑐳 𑐡𑐸 𑑋 𑐮𑐶𑐳𑐾𑑄 𑐣𑑂𑐴𑐵𑐥𑐵 𑐐𑐸𑐎𑐠𑑄 𑐰𑐜𑐵𑐰𑐵𑐳𑐷𑐫𑐵 𑐩𑐣 𑐟𑑂𑐫𑐵𑐎𑐵𑑅 𑐖𑑂𑐫𑐵 𑐫𑐵𑐣𑐵𑑅 𑐰 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐁𑑅 𑐫𑐵𑐫𑐾𑐐𑐸 𑐣𑐵𑐥𑑄 𑐣𑑂𑐴𑐵𑐥𑐵 𑐫𑐵𑐫𑐾 𑐩𑐦𑐸𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐐𑐸 𑐖𑐸𑐂 𑑋

𑐁𑑅 𑐴𑐵𑐎𑐣𑑄 𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐶𑐮 𑐢𑐵𑑅𑐳𑐵 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐕𑐸𑐎𑐶𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐡𑐷 ?
𑐣𑐶𑐬𑑂𑐰𑐵𑐔𑐶𑐟 𑐖𑐸𑐂𑐰𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐠𑑂𑐰 𑐖𑑂𑐫𑐵 𑐫𑐵𑐫𑐾 𑐢𑐎𑐵𑑅 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐐𑐸 𑐩𑐡𑐸 𑑋 𑐖𑑂𑐫𑐵𑐫𑐵 𑐁𑐰𑐱𑑂𑐫𑐎𑐟𑐵 𑐳𑑂𑐰𑐫𑐵𑑅 𑐄𑐎𑐶𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵 𑐰𑐣𑐾𑐐𑐸 𑐖𑐸𑐂 𑑋 𑐕𑐸 𑐁𑐰𑐱𑑂𑐫𑐎 𑐏𑑅, 𑐐𑐸𑐐𑐸 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹, 𑐰𑐜𑐵𑐰𑐵𑐳𑐷𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐖𑐸𑐂𑐐𑐸 𑐫𑑀𑐖𑐣𑐵𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐖𑑂𑐫𑐵 𑐫𑐵𑐣𑐵 𑐰𑐣𑐾𑐐𑐸 𑐖𑐸𑐂 𑑋 𑐀𑐠𑐾 𑐏𑑅𑐳𑐵𑑄 𑐰𑐂𑐐𑐸 𑐣𑑂𑐫𑐵𑐡𑑃𑐫𑐵 𑐣𑐶𑑄𑐟𑐶𑑄 𑐢𑐎𑐵𑑅 𑐕𑐐𑐹 𑐎𑐵𑐬𑑂𑐫𑐫𑑀𑐖𑐣𑐵 𑐣𑑄 𑐡𑐫𑐾𑐎𑐵𑐐𑐸 𑐡𑐸 𑑋 𑐁𑐰𑐱𑑂𑐫𑐎𑐟𑐵𑐫𑐵 𑐮𑐶𑐢𑑄𑐳𑐵𑐫𑑂 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐖𑑂𑐫𑐵 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐡𑐸 𑑋

𑐣𑑂𑐫𑐵𑐡𑑃𑐫𑐵 𑐎𑐵𑐬𑑂𑐫𑐎𑐵𑐮𑐥𑑂𑐬𑐟𑐶 𑐐𑐸𑐮𑐶 𑐳𑐣𑑂𑐟𑐸𑐲𑑂𑐚 𑐖𑐸𑐫𑐵𑐡𑐶𑐫𑐵 ?
𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐳𑑄𑐎𑑂𑐬𑐩𑐞 𑐣𑑂𑐫𑐣𑐵 𑐰𑑄𑐐𑐸 𑐰 𑐄𑐎𑐶𑐫𑐵 𑐬𑑀𑐎𑐠𑐵𑐩𑐫𑐵 𑐣𑐶𑑄𑐟𑐶𑑄 𑐟𑐫𑐵𑐟𑑅𑐐𑐸 𑐮𑐎𑐜𑐵𑐄𑐣𑐫𑐵 𑐂𑐮𑐫𑑂 𑐟𑐵𑑅𑐮𑐵𑐎𑑂𑐎 𑐴𑐾 𑐰𑐜𑐵𑐰𑐵𑐳𑐷𑐫𑐵𑐟 𑐳𑐾𑐰𑐵 𑐧𑐶𑐫𑐵𑐐𑐸 𑐡𑐸 𑑋 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐶𑐟 𑐖𑐹𑐥𑐶𑑄𑐟 𑐁𑐰𑐱𑑂𑐫𑐎 𑐄𑐥𑐔𑐵𑐬𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑑅 𑐂𑐩𑐶𑐐𑐸 𑐖𑐷𑐰𑐣 𑐧𑐔𑐾 𑐫𑐵𑐫𑐾 𑐏𑐣𑐵 𑐳𑐣𑑂𑐟𑐸𑐲𑑂𑐚 𑐖𑐹 𑑋 𑐎𑑀𑐬𑑀𑐣𑐵𑐫𑐵 𑐎𑐵𑐬𑐞𑑄 𑐳𑑂𑐰𑐵𑐳𑑂𑐠𑑂𑐫𑑀𑐥𑐔𑐵𑐬𑐫𑐵 𑐳𑐩𑐳𑑂𑐫𑐵 𑐖𑐹𑐥𑐶𑑄𑐟 𑐁𑐰𑐱𑑂𑐫𑐎𑐟𑐵 𑐰 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐳𑐾𑐰𑐵 𑐧𑐷 𑐦𑐸𑐐𑐸 𑐴𑐾 𑐟𑑅𑐢𑑄𑐐𑐸 𑐳𑐣𑑂𑐟𑐸𑐲𑑂𑐚𑐶 𑐏𑑅 𑑋
𑐀𑐠𑐾 𑐴𑐾 𑐰𑐶𑐥𑐣𑑂𑐣 𑐰𑐬𑑂𑐐𑐫𑐵𑐟 𑐂𑐩𑐶𑐐𑐸 𑐁𑐰𑐱𑑂𑐫𑐎𑐎𑐠𑑄 𑐥𑐵𑐬𑐶𑐱𑑂𑐬𑐩𑐶𑐎 𑐂𑐣𑐾𑐐𑐸, 𑐀𑐟𑐶 𑐁𑐰𑐱𑑂𑐫𑐎 𑐠𑐵𑐳𑐫𑑂 𑐩𑐬𑑂𑐩𑐟, 𑐥𑐸𑐣𑑅𑐣𑐶𑐬𑑂𑐩𑐵𑐞 𑐁𑐡𑐶 𑐖𑑂𑐫𑐵 𑐖𑐸𑐮 𑑋 𑐠𑐸𑐎𑐷 𑐖𑐶 𑐳𑐣𑑂𑐟𑐸𑐲𑑂𑐚 𑐴𑐾 𑐖𑐸𑐫𑐵 𑑋 𑐳𑐩𑐐𑑂𑐬𑐫𑑂 𑐣𑑂𑐫𑐵𑐡𑑃𑐫𑐵 𑐡𑐸𑐣𑐾 𑐐𑐸𑐮𑐶 𑐣𑑄 𑐖𑑂𑐫𑐵 𑐖𑐸𑐮, 𑐄𑐎𑐷 𑐳𑐣𑑂𑐟𑐸𑐲𑑂𑐚 𑐴𑐾 𑐡𑐸 𑑋 𑐄𑐎𑐶𑐳𑐣𑑄 𑐫𑐵𑐣𑐵𑐐𑐸 𑐖𑑂𑐫𑐵 𑐣𑑂𑐫𑐵𑐡𑑃𑐫𑐵 𑐡𑐸𑐣𑐾 𑐳𑐩𑑂𑐥𑐣𑑂𑐣 𑐫𑐵𑐫𑐾 𑐏𑑄𑐐𑐸 𑐴𑐾 𑐟𑑅𑐢𑑄𑐐𑐸 𑐳𑐣𑑂𑐟𑐸𑐲𑑂𑐚𑐶 𑐏𑑅 𑑋

𑐳𑑂𑐠𑐵𑐣𑐷𑐫 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐣𑐶𑑄𑐟𑐶𑑄 𑐕𑐸 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐡𑐸 ?
𑐳𑑂𑐠𑐵𑐣𑐷𑐫 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐣𑐶𑑄𑐟𑐶𑑄 𑐣𑑂𑐴𑐵𑐥𑐵 𑐣𑑄 𑐫𑐵𑐣𑐵𑐐𑐸 𑐴𑐾 𑐏𑑅 𑑋 𑐁𑑅 𑐣𑑄 𑐫𑐵𑐫𑐾𑐐𑐸 𑐖𑐸𑐂 𑑋 𑐣𑑂𑐴𑐵𑐥𑐵 𑐫𑐵𑐫𑐾𑐢𑐸𑐣 𑐁𑑅 𑐠𑑂𑐰 𑐏𑑂𑐫𑐮𑐫𑑂 𑐕𑐸𑑄 𑐫𑐵𑐫𑐾𑐩𑑂𑐰𑐵𑑅𑐮 𑐢𑐂𑐐𑐸 𑐖𑐸𑐂𑐩𑐏𑐸 𑑋 𑐠𑑂𑐰 𑐗𑐷𑐐𑐸 𑐩𑑂𑐴𑐳𑐷𑐎𑐵 𑐏𑑅 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐣𑑂𑐴𑑂𑐫𑐵𑐧𑐮𑐾𑑄 𑐣𑑂𑐴𑑂𑐫𑐔𑐶𑐮𑐵 𑐔𑑂𑐰𑐣𑐾𑐐𑐸 𑐖𑐸𑐂 𑑋 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐣𑐶𑑄𑐟𑐶𑑄 𑐰𑐂𑐐𑐸 𑐡𑐶𑐣𑐫𑑂 𑐐𑐺𑐴𑐶𑐞𑐷, 𑐩𑐶𑐳𑐵, 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎 𑐖𑐎 𑐩𑐏𑐸, 𑐁𑑅 𑐰𑐶𑐡𑑂𑐫𑐵𑐬𑑂𑐠𑐷𑐮𑐶𑐳𑐾𑑄 𑐟𑑂𑐰𑐵𑑅 𑐟𑑂𑐰𑐵𑐮𑐫𑑂, 𑐠𑐷𑐠𑐷 𑐎𑑂𑐮𑐧, 𑐳𑑄𑐑𑐳𑑄𑐳𑑂𑐠𑐵𑐫𑐵𑐟 𑐣𑑄 𑐁𑐰𑐱𑑂𑐫𑐎 𑐎𑐠𑑄 𑐱𑐶𑐎𑑂𑐲𑐞 𑐰 𑐥𑑂𑐬𑐱𑐶𑐎𑑂𑐲𑐞𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵 𑐰𑐣𑐾𑐐𑐸 𑐖𑐸𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS