Read news in NepalBhasa text-- www.hamroschool.com BACK 𑐣𑐶𑐣𑑂𑐴𑐸 𑐰𑐶𑐡𑐵 𑐳𑑂𑐎𑐸𑐮𑐫𑐵𑐟 𑐀𑐰𑑂𑐫𑐰𑐴𑐵𑐬𑐶𑐎 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐶𑐣𑑂𑐴𑐸 𑐰𑐶𑐡𑐵 𑐳𑑂𑐎𑐸𑐮𑐫𑐵𑐟 𑐀𑐰𑑂𑐫𑐰𑐴𑐵𑐬𑐶𑐎

𑐫𑐾𑑃- 𑐳𑐬𑐎𑐵𑐬𑑄 𑐮𑐵𑐐𑐹 𑐫𑐵𑑅𑐐𑐸 𑐰𑐵𑐮𑐫𑑂 𑐣𑐶𑐣𑑂𑐴𑐸 𑐧𑐶𑐡𑐵 𑐧𑐷𑐐𑐸 𑐰𑑂𑐫𑐰𑐳𑑂𑐠𑐵𑐫𑐵𑐟 𑐳𑑂𑐎𑐸𑐮 𑐰 𑐎𑐮𑐾𑐖𑐟𑐫𑑂𑐳𑑄 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾 𑐩𑐦𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐏𑐵𑐳 𑐫𑐵𑐣𑐵𑑅 𑐣𑐶𑐖𑐷 𑐳𑑂𑐎𑐸𑐮 𑐰 𑐎𑐮𑐾𑐖𑐟𑐫𑑂𑐳𑑄 𑐰𑐵𑐮𑐫𑑂 𑐣𑐶𑐣𑑂𑐴𑐸 𑐧𑐶𑐡𑐵 𑐧𑐷𑐐𑐸 𑐠𑑂𑐰 𑐰𑑂𑐫𑐰𑐳𑑂𑐠𑐵𑑄 𑐳𑐬𑐎𑐵𑐬𑐷 𑐖𑑂𑐫𑐵𑐎𑐹𑐫𑐵𑐟 𑐀𑑅𑐥𑐸𑐎𑐵 𑐧𑐶𑐄𑐳𑐵𑑄 𑐳𑑂𑐎𑐸𑐮 𑐎𑐮𑐾𑐖𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐢𑐵𑑅𑐳𑐵 𑐠𑐵𑐎𑐸𑐂𑐎𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑑀𑐜𑐬𑑂𑐣 𑐣𑐾𑐰𑐵𑑅 𑐂𑑄𑐐𑑂𑐮𑐶𑐳 𑐳𑑂𑐎𑐸𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐡𑐶𑐥𑐎 𑐟𑐸𑐮𑐵𑐢𑐬𑑄 𑐰𑐵𑐮𑐫𑑂 𑐣𑐶𑐣𑑂𑐴𑐸 𑐧𑐶𑐡𑐵 𑐧𑐷𑐐𑐸 𑐰𑑂𑐫𑐰𑐳𑑂𑐠𑐵 𑐳𑑂𑐎𑐸𑐮 𑐎𑐮𑐾𑐖𑐫𑐵 𑐮𑐵𑐐𑐶𑑄 𑐰𑑂𑐫𑐰𑐴𑐵𑐬𑐶𑐎 𑐩𑐖𑐸𑐂𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮 𑐩𑐵𑐬𑑂𑐦𑐟 𑐴𑐾 𑐠𑑅𑐐𑐸 𑐧𑐶𑐔𑐵𑑅 𑐟𑐫𑐵𑐡𑐶𑐳𑐾𑑄 𑐠𑐸𑐎𑐶𑐫𑐵𑐟 𑐎𑐫𑐵𑑅 𑐥𑐸𑐣𑐬𑑂𑐰𑐶𑐔𑐵𑐬 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐀𑐠𑐾 𑐴𑐾 𑐎𑐵𑐛𑐩𑐵𑐜𑑁𑑄 𑐩𑑀𑐜𑐾𑐮 𑐳𑑂𑐎𑐸𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣𑑄 𑐣𑑄 𑐰𑐵𑐮𑐫𑑂 𑐣𑐶𑐣𑑂𑐴𑐸 𑐧𑐶𑐡𑐵 𑐧𑐷𑐐𑐸 𑐖𑑂𑐫𑐵 𑐰𑐶𑐡𑑂𑐫𑐵𑐮𑐫𑐫𑐵 𑐴𑐎𑐫𑑂 𑐰𑑂𑐫𑐵𑐰𑐴𑐵𑐬𑐶𑐎 𑐩𑐖𑐹 𑐢𑐵𑐳𑐾𑑄 𑐠𑐸𑐎𑐶𑐫𑐵𑐟 𑐎𑐫𑐵𑑅 𑐥𑐸𑐣𑐬𑑂𑐰𑐶𑐔𑐵𑐬 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐠𑑂𑐰 𑐰𑑂𑐫𑐰𑐳𑑂𑐠𑐵𑑄 𑐫𑐵𑐣𑐵𑑅 𑐠𑐷𑐠𑐷 𑐳𑐩𑐳𑑂𑐫𑐵 𑐥𑐶𑐎𑐵𑐫𑐾𑐦𑐸 𑐢𑐵𑐳𑐾𑑄 𑐳𑐬𑐎𑐵𑐬𑑄 𑐠𑐸𑐎𑐶𑐫𑐵 𑐧𑐵𑐬𑐾 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐟𑐬𑑂𑐎 𑐣𑑄 𑐰𑐫𑑂𑐎𑐮𑑄 𑐟𑐫𑐵𑐡𑐷𑐐𑐸 𑐡𑐸 𑑋

𑐰𑐵𑐮𑐫𑑂 𑐣𑐶𑐣𑑂𑐴𑐸 𑐧𑐶𑐡𑐵 𑐧𑐷𑐧𑐮𑐫𑑂 𑐳𑑂𑐎𑐸𑐮𑐫𑐵 𑐎𑑀𑐬𑑂𑐳 𑐥𑐹𑐰𑑄𑐎𑐾𑐟 𑐠𑐵𑐎𑐸𑐂𑐐𑐸 𑐰 𑐠𑐸𑐎𑐶𑑄 𑐫𑐵𑐣𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐩𑐵𑐣𑐳𑐶𑐎 𑐡𑐧𑐵𑐰 𑐮𑐵𑑅 𑐰𑐣𑐷𑐐𑐸 𑐏𑑃 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐟𑐫𑑂𑐳𑑄 𑐢𑐫𑐵𑐴𑑅𑐐𑐸 𑐡𑐸 𑑋 𑐣𑐶𑐣𑑂𑐴𑐸 𑐧𑐶𑐡𑐵𑐫𑐵 𑐎𑑀𑐚𑐵 𑐥𑐹𑐰𑑄𑐎𑐾𑐟 𑐎𑐵𑐬𑑂𑐫𑐵𑐮𑐫𑐫𑐵 𑐃 𑐳𑐸𑐠𑐫𑑂 𑐰 𑐳𑐣𑐶𑐮𑐫𑑂 𑐠𑐥𑐾 𑐫𑐵𑐣𑐵𑑅 𑐳𑐩𑐵𑐫𑑀𑐖𑐣 𑐫𑐵𑐫𑐾 𑐖𑐶𑐄𑐳𑐵𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐎𑐎𑑂𑐲𑐵𑐫𑐵 𑐃 𑐢𑐵𑑅𑐳𑐵 𑐀𑐠𑐾 𑐫𑐵𑐫𑐾 𑐩𑐦𑐂𑐐𑐸 𑐖𑐹𑐐𑐸𑐮𑐶𑑄 𑐠𑐸𑐎𑐶𑑄 𑐳𑐩𑐳𑑂𑐫𑐵 𑐖𑐸𑐂𑐐𑐸 𑐏𑑃 𑐱𑐶𑐎𑑂𑐲𑐎𑐟𑐫𑑂𑐳𑑄 𑐢𑐫𑐵𑐴𑑅𑐐𑐸 𑐡𑐸 𑑋

𑐳𑐬𑐎𑐵𑐬𑑄 𑐳𑐬𑐎𑐵𑐬𑐷 𑐏𑐬𑑂𑐔 𑐧𑐔𑐾 𑐫𑐵𑐫𑐾𑐐𑐸, 𑐔𑐶𑐎𑑄 𑐁𑐫𑐵𑐟 𑐫𑐵𑐫𑐾𑐧𑐮𑐫𑑂 𑐰𑐶𑐡𑐾𑐱 𑐰𑐣𑐷𑐐𑐸 𑐢𑑂𑐫𑐧𑐵 𑐩𑑂𑐴𑑀 𑐔𑐵𑐫𑐾𑐎𑐾𑐐𑐸 𑐁𑐡𑐶 𑐎𑐵𑐬𑐞 𑐣𑑂𑐴𑑂𑐫𑑅𑐣𑐾 𑐟𑐫𑐵𑑅 𑐰𑐵𑐮𑐫𑑂 𑐣𑐶𑐣𑑂𑐴𑐸 𑐧𑐶𑐡𑐵 𑐧𑐷𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑑅𑐐𑐸 𑐏𑑅 𑑋 𑐟𑐬 𑐠𑐸𑐎𑐶𑑄 𑐰𑐶𑐡𑑂𑐫𑐵𑐮𑐫 𑐮𑐐𑐵𑐫𑐟 𑐣𑐶𑐖𑐷 𑐎𑑂𑐲𑐾𑐟𑑂𑐬𑐫𑐵 𑐩𑐾𑐩𑐾𑐐𑐸 𑐥𑐾𑐱𑐵𑐫𑑂 𑐣𑑄 𑐳𑐩𑐳𑑂𑐫𑐵 𑐰𑐂𑐐𑐸 𑐏𑑃 𑐢𑐵𑐫𑐾𑐐𑐸 𑐫𑐵𑐣𑐵 𑐴𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS