Read news in NepalBhasa text-- www.hamroschool.com BACK 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰𑐫𑑂 𑐳𑑂𑐠𑐵𑐣𑐷𑐫 𑐩𑐸𑐡𑑂𑐡𑐵 𑐐𑑂𑐰 ? – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑑂𑐠𑐵𑐣𑐷𑐫 𑐔𑐸𑐣𑐵𑐰𑐫𑑂 𑐳𑑂𑐠𑐵𑐣𑐷𑐫 𑐩𑐸𑐡𑑂𑐡𑐵 𑐐𑑂𑐰 ?

𑐰𑐂𑐐𑐸 𑐰𑐿𑐱𑐵𑐏 𑐡𑐾𑐫𑑂 𑐣𑑂𑐫𑑄𑐎𑐫𑐵 𑑗𑑕𑑓 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐔𑐸𑐣𑐵𑐰 𑐖𑐸𑐂𑐐𑐸 𑐖𑐸𑐂𑐢𑐸𑑄𑐎𑐮 𑑋 𑐳𑐟𑑂𑐟𑐵𑐬𑐸𑐝 𑐐𑐛𑐧𑐣𑑂𑐢𑐣 𑐡𑐸𑐣𑐾 𑐮𑐵𑑅𑐐𑐸 𑐣𑑂𑐫𑐵𑐐𑐹 𑐡𑐮, 𑐰𑐶𑐥𑐎𑑂𑐲𑐷 𑐊𑐩𑐵𑐮𑐾, 𑐬𑐵𑐥𑑂𑐬𑐥𑐵𑐮𑐶𑐳𑐾𑑄𑐫𑐵 𑐡𑐮𑐟 𑐖𑐎 𑐩𑐏𑐸, 𑐠𑐷𑐠𑐷 𑐠𑐵𑐳𑐫𑑂 𑐡𑐣𑐾 𑐢𑐎𑐵𑑅 𑐖𑐹𑐥𑐶𑑄 𑐩𑐣𑐹𑐟𑐫𑑂𑐐𑐸 𑐣𑐵𑑄 𑐧𑐸𑐏𑑃 𑐰 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮𑐫𑑂 𑐣𑑂𑐫𑑄𑐎 𑐨𑐣𑑄 𑐏𑐣𑐾𑐡𑐫𑐵 𑐔𑑂𑐰𑑄𑐐𑐸 𑐡𑐸 𑑋

𑐐𑐛𑐧𑐣𑑂𑐢𑐣 𑐡𑐸𑐣𑐾 𑑖 𑐐𑐹 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰 𑑑𑑑 𑐐𑐹 𑐄𑐥 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐳𑐸𑐫𑐵 𑐳𑐸𑐫𑐵 𑐨𑐵𑐐𑐫𑑂 𑐮𑐵𑐎𑐾𑐐𑐸 𑐢𑐎𑐵𑑅 𑐱𑐷𑐬𑑂𑐲 𑐣𑐾𑐟𑐵𑐟 𑐴𑐾 𑐳𑑂𑐰𑐎𑑅 𑐥𑑂𑐫𑐎𑑂𑐰𑑅 𑐟𑐎 𑐔𑑂𑐰𑐣𑐵𑑅 𑐎𑑂𑐰𑑅𑐕𑐶𑐟 𑑋 𑐣𑐾𑐟𑐵𑐟𑐳𑐾𑑄 𑐠𑐸𑐎𑐠𑑄 𑐫𑐵𑑅𑐧𑐮𑐫𑑂 𑐖𑐶𑐮𑑂𑐮𑐵 𑐟𑐴𑐫𑐵 𑐣𑐾𑐟𑐵 𑐰 𑐰𑐫𑐵𑑄 𑐎𑑂𑐰𑐫𑑂𑐫𑐵 𑐎𑐵𑐬𑑂𑐫𑐎𑐬𑑂𑐟𑐵 𑐟𑑄 𑐔𑐵𑑅𑐐𑐸, 𑐥𑐵𑐬𑑂𑐟𑐶 𑐴𑐾 𑐟𑑂𑐰𑑅𑐟𑐹𑐐𑐸, 𑐥𑐵𑐬𑑂𑐟𑐶𑐫𑐵 𑐖𑑂𑐫𑐵𑐎𑐸𑐠𑐶𑐂 𑐴𑐾 𑐟𑐎𑑄 𑐟𑐵𑐮𑑄 𑐐𑑂𑐰𑐫𑐵 𑐧𑐶𑐂𑐐𑐸 𑐖𑑂𑐫𑐵 𑐖𑐸𑐮 𑑋 𑐠𑐷𑐠𑐷 𑐧𑐸𑐏𑑃𑐥𑑁 𑐰 𑐀𑐣𑐮𑐵𑐂𑐣𑑄 𑑄 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐮𑐐𑐵𑐟𑐵𑐬 𑐳𑑂𑐟𑐩𑑂𑐨 𑐴𑐾 𑐟𑐫𑐵𑑅 𑐣𑑄 𑐧𑐸𑐏𑑃 𑐥𑐶𑐎𑐫𑐵𑐔𑑂𑐰𑐣 𑑋 𑐟𑐬 𑐠𑑂𑐰 𑐳𑐎𑐟𑐵𑑄 𑐳𑑂𑐰𑐫𑐾𑐧𑐮𑐫𑑂 𑐗𑐷𑐟 𑐐𑐣 𑐕𑐸 𑐩𑐐𑐵𑑅 𑐕𑐸 𑐩𑐐𑐵𑑅 𑐖𑐸𑐫𑐵𑐔𑑂𑐰𑐣 𑑋 𑐠𑐠𑐾 𑐖𑐹𑐐𑐸 𑐴𑐸𑐣𑐶 𑐩𑐾𑐐𑐸 𑐩𑐏𑐸, 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰 𑐖𑐸𑐫𑐵𑑅 𑐣𑑄 𑐣𑐾𑐰𑐵𑑅 𑐩𑐸𑐡𑑂𑐡𑐵 𑐐𑐣𑑄 𑐣𑑂𑐫𑐣𑐾𑐩𑐡𑐸𑐐𑐸, 𑐏𑐣𑐾𑐩𑐡𑐸𑐐𑐸 𑐖𑐸𑐫𑐵𑑅 𑐴𑐾 𑐏𑑅 𑑋

𑐠𑑂𑐰 𑐂𑐮𑐫𑑂 𑐣𑐾𑐎𑐥𑐵 (𑐊𑐎𑐷𑐎𑐺𑐟 𑐳𑐩𑐵𑐖𑐰𑐵𑐡𑐷), 𑐬𑐵𑐥𑑂𑐬𑐥𑐵 𑐰 𑐬𑐵𑐥𑑂𑐬𑐥𑐵 𑐣𑐾𑐥𑐵𑐮𑑄 𑐔𑐸𑐣𑐵𑐰 𑐑𑑀𑐲𑐞𑐵 𑐥𑐟𑑂𑐬 𑐖𑐵𑐬𑐷 𑐫𑐵𑐫𑐾𑐢𑐸𑑄𑐎𑐮 𑑋 𑐊𑐳 𑐥𑐵𑐬𑑂𑐟𑐶𑐫𑐵 𑐩𑐸𑐡𑑂𑐡𑐵𑐫𑑂 𑑒𑑐𑑐 𑐫𑐸𑐣𑐶𑐚 𑐧𑐶𑐖𑐸𑐮𑐷 𑐣𑐶𑑅𑐱𑐸𑐮𑑂𑐎 𑐢𑐵𑑅𑐐𑐸 𑐀𑐮𑐾 𑐬𑐵𑐥𑑂𑐬𑐥𑐵𑐫𑐵 𑐑𑑀𑐲𑐞𑐵𑐥𑐟𑑂𑐬𑐫𑑂 𑐩𑐔𑐵𑐧𑐹𑐥𑐶𑐣𑑂𑐟 𑐨𑐟𑑂𑐟𑐵, 𑐖𑑂𑐫𑐵𑐠𑐥𑐶𑐣𑑂𑐟 𑐟𑐷𑐬𑑂𑐠 𑐫𑐵𑐟𑑂𑐬𑐵 𑐢𑐎𑐵𑑅 𑐢𑐵𑑅𑐐𑐸 𑐏𑑃 𑐴𑐵𑐂𑐮𑐵𑐂𑐟 𑐖𑐸𑐮 𑑋 𑐠𑑂𑐰 𑐮𑐵 𑐴𑐵𑐂𑐮𑐵𑐂𑐟 𑐫𑐵𑑅𑐥𑐶𑐳𑑄 𑐫𑐵𑑅𑐐𑐸 𑐖𑐸𑐮 𑑋 𑐟𑐬 𑐑𑑀𑐲𑐞𑐵𑐥𑐟𑑂𑐬 𑐡𑐸𑐣𑐾 𑐡𑐸𑐴𑐵𑑃 𑐰𑐣𑐵𑑅 𑐳𑑂𑐰𑐫𑐾𑐧𑐮𑐫𑑂 𑐣𑑄 𑐳𑑂𑐠𑐵𑐣𑐷𑐫 𑐩𑐸𑐡𑑂𑐡𑐵𑐫𑐵 𑐳𑐰𑐵𑐮𑐫𑑂 𑐕𑐸𑑄 𑐢𑐫𑐵𑐟𑑅𑐐𑐸 𑐩𑐡𑐸 𑑋

𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐧𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐏𑑃 𑐮𑐵 𑐧𑐣𑐶𑐧𑐣𑐵𑐄 𑐏𑑃 𑐴𑐾 𑐏𑑅 𑑋 𑐠𑐸𑐥𑐵𑐮𑐫𑑂 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰𑐫𑑂 𑐳𑑂𑐠𑐵𑐣𑐷𑐫 𑐳𑑂𑐟𑐬𑐫𑐵 𑐴𑐾 𑐑𑑀𑐲𑐞𑐵𑐥𑐟𑑂𑐬 𑐰𑐫𑐾𑐩𑐵𑑅𑐐𑐸 𑐏𑑅 𑑋 𑐠𑐠𑐾 𑐩𑐰𑑅𑐣𑐶 𑑋 𑐳𑐟𑑂𑐟𑐵𑐬𑐸𑐝 𑐐𑐛𑐧𑐣𑑂𑐢𑐣𑐫𑑂 𑐡𑐸𑐳𑐵𑑄 𑐊𑐳 𑐥𑐵𑐬𑑂𑐟𑐶𑑄 𑐠𑑅𑐐𑐸 𑐴𑐾 𑐑𑑀𑐲𑐞𑐵𑐥𑐟𑑂𑐬 𑐖𑐵𑐬𑐷 𑐫𑐵𑐟 𑑋 𑐑𑑀𑐞𑐞𑐵𑐥𑐟𑑂𑐬 𑐖𑐵𑐬𑐷 𑐫𑐵𑑅𑐥𑐶𑑄 𑐳𑑂𑐠𑐵𑐣𑐷𑐫 𑐮𑐵𑐐𑐵𑐫𑑂 𑐖𑑂𑐫𑐵 𑐫𑐵𑑅𑐥𑐶𑑄 𑐏𑐂𑐩𑐏𑐸, 𑐬𑐵𑐲𑑂𑐚𑑂𑐬𑐶𑐫 𑐬𑐵𑐖𑐣𑐷𑐟𑐶𑐂 𑐴𑐾 𑐳𑐣𑐵𑐖𑐹𑐥𑐶𑑄 𑐏𑐫𑐾𑐩𑐵𑑅 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐑𑑀𑐲𑐞𑐵𑐥𑐟𑑂𑐬 𑐳𑑂𑐰𑐫𑑄 𑐴𑐾 𑐠𑐸𑐥𑐵𑐮𑐫𑑂 𑐎𑐾𑐣𑑂𑐡𑑂𑐬𑐷𑐎𑐺𑐟 𑐎𑐠𑑄𑐫𑐵 𑐏𑐣𑐾𑐡𑐸 𑑋 𑐠𑑂𑐰 𑐣𑑄 𑐰𑐵𑐳𑑂𑐟𑐰𑐫𑑂 𑐡𑐸𑐬𑑂𑐨𑐵𑐐𑑂𑐫 𑐥𑐹𑐬𑑂𑐞 𑐏𑑃 𑐏𑑅 𑑋

𑐥𑑂𑐬𑐡𑐾𑐱 𑐳𑑂𑐟𑐬𑐫𑑂 𑐏𑑃𑐫𑑂 𑐨𑐵𑐫𑑂 𑐧𑐵𑐴𑐾𑐎 𑐩𑐾𑐐𑐸 𑐣𑐶𑐐𑐹 𑐨𑐵𑐫𑑂 𑐣𑑄 𑐮𑐵𑐐𑐹 𑐫𑐵𑐫𑐾𑐐𑐸, 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐳𑑂𑐠𑐵𑐣𑐷𑐫 𑐨𑐵𑐫𑑂𑐫𑐵𑐟 𑐣𑑄 𑐁𑐢𑐶𑐎𑐵𑐬𑐶𑐎 𑐨𑐵𑐲𑐵𑐫𑐵 𑐩𑐵𑐣𑑂𑐫𑐟𑐵 𑐧𑐶𑐂𑐐𑐸, 𑐩𑐵𑐟𑐺𑐨𑐵𑐲𑐵𑑄 𑐱𑐶𑐎𑑂𑐲𑐵𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸, 𑐁𑐡𑐶𑐰𑐵𑐳𑐷𑐟𑐫𑑂𑐟 𑐁𑐊𑐮𑐌𑐫𑐵 𑑑𑑖𑑙 𑐎𑐠𑑄 𑐠𑑅𑐐𑐸 𑐮𑐵𑐐𑐵𑐫𑑂 𑐠𑑅𑐥𑐶𑑄 𑐣𑐵𑐥𑑄 𑐳𑐴𑐨𑐵𑐐𑐷 𑐖𑐸𑐫𑐵𑑅 𑐣𑐶𑐬𑑂𑐞𑐫 𑐫𑐵𑐫𑐾𑐡𑐂𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸, 𑐦𑐸𑐚𑐥𑐵𑐠 𑐥𑐳𑑅𑐔𑐷𑐎𑐵𑑅 𑐕𑑂𑐰𑐫𑐾𑐐𑐸, 𑐬𑑀𑐖𑐐𑐵𑐬𑐷𑐂 𑐳𑑂𑐠𑐵𑐣𑐷𑐫 𑐰𑐵𑐳𑐶𑐣𑑂𑐡𑐵𑐟𑐫𑑂𑐐𑐸 𑐀𑐐𑑂𑐬𑐵𑐢𑐶𑐎𑐵𑐬 𑐎𑐵𑐫𑐩 𑐖𑐸𑐂𑐐𑐸, 𑐳𑐩𑑂𑐥𑐡𑐵𑐫𑐵 𑐥𑐸𑐣𑐳𑑂𑐬𑑂𑐠𑐵𑐥𑐣𑐵, 𑐖𑐣𑐳𑑄𑐏𑑂𑐫𑐵 𑐀𑐥𑑂𑐰𑐫𑐾𑐎𑐷𑐐𑐸 𑐰𑐶𑐎𑐵𑐳𑐾 𑐖𑑂𑐫𑐵 𑐩𑐫𑐵𑐫𑐾𑐐𑐸 𑐁𑐡𑐶 𑐗𑐷𑐐𑐸 𑐩𑐸𑐡𑑂𑐡𑐵 𑐏𑑅 𑑋 𑐠𑑂𑐰 𑐰 𑐠𑐸𑐖𑑂𑐰𑑅𑐐𑐸 𑐏𑑃 𑐳𑑂𑐰𑐫𑐾𑐩𑐡𑐸𑐐𑐸, 𑐣𑑂𑐫𑐣𑐾𑐩𑐡𑐸𑐐𑐸 𑐴𑐾 𑐗𑐷𑐐𑐸 𑐣𑐶𑐟𑐶𑑄 𑐡𑐸𑑅𑐏𑐡𑑂 𑐏𑑃 𑐏𑑅 𑑋

𑐳𑐩𑑂𑐨𑐰𑐟𑑅 𑐔𑐸𑐣𑐵𑐰𑐫𑑂 𑐡𑐣𑐷𑐥𑐶𑑄 𑐣𑐾𑐟𑐵𑐟𑐳𑐾𑑄 𑐠𑑂𑐰 𑐏𑑃 𑐨𑐵𑐲𑐞𑐫𑑂 𑐢𑐵𑐂𑐐𑐸 𑐖𑐸𑐂 𑑋 𑐟𑐬 𑐠𑐠𑐾 𑐳𑐶𑐎𑑄 𑐎𑐾𑐣𑑂𑐡𑑂𑐬𑐷𑐫 𑐳𑑂𑐟𑐬𑐫𑐵 𑐑𑑀𑐲𑐞𑐵𑐥𑐟𑑂𑐬𑐫𑑂 𑐴𑐾 𑐥𑐶𑐴𑐵𑑃 𑐰𑑅𑐐𑐸 𑐏𑑅𑐳𑐵 𑐥𑐵𑐫𑑂𑐕𑐶 𑐖𑐸𑐂𑐐𑐸 𑐏𑑅 𑑋

𑐰𑑄𑐐𑐸 𑐣𑑂𑐫𑐵𑐡𑑃𑐫𑐵 𑐀𑐣𑐸𑐨𑐰𑐫𑑂 𑐥𑑂𑐬𑐡𑐾𑐱 𑐳𑐬𑐎𑐵𑐬 𑐥𑑂𑐬𑐨𑐵𑐰𑐎𑐵𑐬𑐷 𑐖𑐸𑐂𑐩𑐦𑐸 𑑋 𑐟𑐬 𑐳𑑂𑐠𑐵𑐣𑐷𑐫 𑐟𑐴 𑐢𑐵𑑅𑐳𑐵 𑐖𑐣𑐟𑐵𑐣𑐵𑐥 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐴𑐾 𑐥𑑂𑐬𑐟𑑂𑐫𑐎𑑂𑐲 𑐳𑐬𑑀𑐎𑐵𑐬 𑐟𑐫𑐵𑑅 𑐖𑑂𑐫𑐵 𑐫𑐵𑐂𑐐𑐸 𑐖𑐹𑐐𑐸𑐮𑐶𑑄 𑐰 𑐁𑑅 𑐁𑐥𑐵𑑅 𑐀𑐢𑐶𑐎𑐵𑐬 𑐰 𑐳𑑂𑐬𑑀𑐟 𑐳𑐵𑐢𑐣 𑐣𑑄 𑐡𑐸𑐐𑐸𑐮𑐶𑑄 𑐥𑑂𑐬𑐨𑐵𑐰𑐎𑐵𑐬𑐷 𑐖𑐹𑐸𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐡𑐾𑐫𑑂𑐫𑐵 𑐠𑑂𑐫𑑄𑐩𑐠𑑂𑐫𑑄 𑑔𑑐𑑐𑑐 𑐣𑐐𑐬𑐥𑐵𑐮𑐶𑐎𑐵 𑐰 𑐐𑐵𑐰𑐶𑐳 𑐡𑐫𑐵𑐔𑑂𑐰𑑄𑐐𑐸𑐮𑐶𑐂 𑐐𑐵𑐰𑐶𑐳𑐫𑐵𑐟 𑐨𑐎𑐵𑐨𑐎 𑐣𑐐𑐬𑐥𑐵𑐮𑐶𑐎𑐵 𑐢𑐎𑐵𑑅 𑐑𑑀𑐲𑐞𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐎 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐡𑐾𑐫𑑂 𑐳𑑄𑐑𑐷𑐫𑐟𑐵𑐫𑑂 𑐰𑐣𑐾𑐐𑐸 𑐖𑐸𑐳𑐾𑑄𑐮𑐶 𑐳𑑂𑐰𑑄𑐐𑐹 𑐟𑐴𑐫𑐵 𑐳𑐬𑐎𑐵𑐬𑐫𑐵 𑐀𑐰𑐢𑐵𑐬𑐞𑐵 𑐎𑐠𑑄 𑐣𑑂𑐴𑐵𑐥𑐵𑐫𑐵 𑐕𑐐𑐹 𑐐𑐵𑐰𑐶𑐳 𑐴𑐾 𑐕𑐐𑐹 𑐰𑐜𑐵 𑐫𑐵𑐣𑐵𑑅 𑐣𑑂𑐫𑐵𑐐𑐹, 𑐏𑐸𑐐𑐹 𑐐𑐵𑐰𑐶𑐳 𑐡𑐸𑐠𑑂𑐫𑐵𑐎𑐵𑑅 𑐐𑐵𑐄𑑃𑐥𑐵𑐮𑐶𑐎𑐵 𑐰 𑐣𑐐𑐬𑐥𑐵𑐮𑐶𑐎𑐵 𑐡𑐫𑐾𑐎𑐵𑑄 𑐖𑐶𑐄𑐠𑐵𑐫𑑂 𑐣𑐐𑐬𑐥𑐵𑐮𑐶𑐎𑐵 𑐡𑐫𑐾𑐎𑐮 𑑋

𑐱𑐶𑐎𑑂𑐲𑐵, 𑐳𑑂𑐰𑐵𑐳𑑂𑐠𑑂𑐫, 𑐎𑐺𑐲𑐶, 𑐥𑐱𑐸 𑐁𑐡𑐶 𑐖𑑂𑐫𑐵𑐎𑐸𑐠𑐶 𑐣𑑄 𑐳𑑂𑐠𑐵𑐣𑐷𑐫 𑐳𑑂𑐟𑐬𑐫𑑂 𑐟𑐫𑐾𑐫𑑄𑐎𑐮 𑑋 𑐠𑐠𑐾 𑐫𑐵𑑅𑐧𑐮𑐫𑑂 𑐣𑐾𑐥𑐵𑐮𑐫𑑂 𑐁𑑅 𑑗𑑕𑑓 𑐳𑑂𑐠𑐵𑐣𑐷𑐫 𑐟𑐴 𑐡𑐫𑐵𑑅 𑐀𑐢𑐶𑐎𑐵𑐬 𑐰 𑐢𑑂𑐫𑐧𑐵𑑄 𑐳𑐩𑑂𑐥𑐣𑑂𑐣 𑐖𑐹𑐐𑐸 𑐏𑑅 𑑋 𑐰𑑄𑐐𑐸 𑑒𑑐𑑗𑑔 𑐳𑐵𑐮𑐫𑑂 𑐖𑐹𑐐𑐸 𑐔𑐸𑐣𑐵𑐰 𑐮𑐶𑐥𑐵 𑐣𑑂𑐴𑐹 𑐰𑑅𑐥𑐶𑐳𑑄 𑐨𑐎𑐵𑐨𑐎 𑐎𑐬 𑐠𑐎𑐵𑐮 𑑋 𑐎𑐬 𑐥𑐸𑐮𑐾𑐩𑐵𑑅𑐐𑐸 𑐏𑑃 𑐴𑐾 𑐂𑐱𑑂𑐫𑐸 𑐖𑐸𑐮 𑑋 𑐀𑐮𑐾 𑐴𑐵𑐣𑑄 𑐀𑐢𑑂𑐫𑐎𑑂𑐲, 𑐩𑐾𑐫𑐬𑐫𑐵 𑐥𑐵𑐳𑐵𑐨𑐵𑐂, 𑐡𑐵𑐖𑐸𑐎𑐶𑐖𑐵 𑐖𑐎 𑐩𑐏𑐸, 𑐠𑑅𑐠𑑅𑐥𑐶𑐳𑑄 𑐴𑐾 𑐡𑑀𑐖𑐬 𑐣𑑂𑐫𑐵𑐣𑐵𑑅 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐢𑑂𑐫𑐧𑐵𑑄 𑐰𑐶𑐎𑐵𑐳 𑐫𑐵𑐫𑐾𑐐𑐸𑐮𑐶𑐂 𑐛𑐾𑐎𑐾𑐡𑐵𑐬𑐷 𑐖𑑂𑐫𑐵 𑐫𑐵𑑅𑐐𑐸 𑐏𑑃 𑐣𑑄 𑐰𑑂𑐫𑐵𑐥𑐎 𑐖𑐸𑐮 𑑋 𑐀𑐮𑐾 𑐴𑐵𑐣𑑄 𑐩𑐾𑐫𑐬, 𑐄𑐥𑐩𑐾𑐫𑐬, 𑐀𑐢𑑂𑐫𑐎𑑂𑐲, 𑐄𑐥𑐵𑐢𑑂𑐫𑐎𑑂𑐲𑐟𑐳𑐾𑑄 𑐠𑐶𑐎𑐾 𑐠𑐶𑐎𑐾𑐐𑐸 𑐐𑐵𑐜𑐷 𑐣𑑂𑐫𑐵𑐣𑐵𑑅 𑐐𑐫𑐵 𑐖𑐸𑐮 𑑋

𑐠𑐸𑐎𑐶𑐫𑐵 𑐥𑑂𑐬𑐟𑐶𑐎𑐵𑐬𑐫𑑂 𑐐𑐸𑐮𑐶𑐐𑐸𑐮𑐶𑐳𑐶𑐣𑑄 𑐐𑐵𑐜𑐷 𑐩𑐏𑐸, 𑐳𑐵𑐂𑐎𑐮 𑐰 𑐩𑑀𑐚𑐬 𑐳𑐵𑐂𑐎𑐮 𑐐𑐫𑐵𑑅 𑐎𑑂𑐫𑐣𑐵 𑐖𑐸𑐮 𑑋 𑐠𑐸𑐎𑐠𑑄 𑐰𑐶𑐎𑐺𑐟𑐶 𑐡𑐸𑐴𑐵𑑃 𑐰𑑅𑐐𑐸 𑐰 𑐰𑐶𑐎𑐺𑐟𑐶𑐫𑐵 𑐰𑐶𑐬𑑀𑐢 𑐰 𑐐𑐸𑐮𑐶𑐐𑐸𑐮𑐶𑐳𑐶𑐣𑑄 𑐥𑑂𑐬𑐟𑐶𑐎𑐵𑐬𑐵𑐟𑑂𑐩𑐎 𑐖𑑂𑐫𑐵 𑐫𑐵𑑅𑐐𑐸 𑐴𑐾 𑐁𑐥𑐵𑑅 𑐔𑐬𑑂𑐔𑐵 𑐖𑐸𑐮 𑑋 𑐠𑐠𑐾 𑐖𑐹𑐧𑐮𑐫𑑂 𑐣𑐶𑐬𑑂𑐰𑐵𑐔𑐣 𑐁𑐫𑑀𑐐𑑄 𑐴𑐾 𑐛𑐾𑐎𑐾𑐡𑐵𑐬𑐟𑐫𑑂𑐟 𑐄𑐩𑑂𑐩𑐾𑐡𑐰𑐵𑐬 𑐡𑐫𑐾𑐎𑐾 𑐡𑐂𑐩𑐏𑐸 𑐢𑐎𑐵𑑅 𑐢𑐵𑑅𑐐𑐸 𑐡𑐸 𑑋 𑐠𑐸𑐎𑐶𑐂 𑐣𑑄 𑐩𑐸𑐡𑑂𑐡𑐵 𑐖𑐹𑐧𑐮𑐫𑑂 𑐁𑑅 𑐀𑐡𑐵𑐮𑐟𑑄 𑐢𑐵𑑅𑐳𑐵 𑐐𑐸𑐐𑐸 𑐥𑐵𑐮𑐶𑐎𑐵𑐫𑑂 𑐛𑐾𑐎𑑂𑐎𑐵 𑐡𑐸, 𑐀𑐣 𑐖𑐎 𑐡𑐣𑐾 𑐡𑐂𑐩𑐏𑐸 𑐢𑐵𑐮 𑑋 𑐬𑐵𑐥𑑂𑐬𑐥𑐵𑑄 𑐎𑐬 𑐧𑐔𑑂𑐕𑐶 𑐴𑐾 𑐎𑑂𑐰𑐎𑐵𑐫𑐾𑐐𑐸 𑐢𑐎𑐵𑑅 𑐑𑑀𑐲𑐞𑐵𑐥𑐟𑑂𑐬𑐫𑑂 𑐔𑑂𑐰𑐟 𑑋

𑐊𑐳 𑐥𑐵𑐬𑑂𑐟𑐶 𑐣𑑂𑐫𑐹𑐣𑐟𑐩 𑐁𑐰𑐱𑑂𑐫𑐎 𑐎𑐬 𑐖𑐎 𑐎𑐵𑐫𑐾𑐐𑐸 𑐢𑐎𑐵𑑅 𑐔𑑂𑐰𑐟 𑑋 𑐬𑐵𑐥𑑂𑐬𑐥𑐵𑑄 𑐠𑑅𑐐𑐸 𑐥𑐸𑐮𑐵𑑄𑐐𑐸 𑐥𑐘𑑂𑐔𑐾 𑐧𑐸𑐡𑑂𑐢𑐶 𑐎𑐠𑑄 𑐖𑑂𑐫𑐵𑐠𑐥𑐶𑐣𑑂𑐟 𑐟𑐷𑐬𑑂𑐠 𑐫𑐵𑐟𑑂𑐬𑐵 𑐔𑐵𑑅 𑐴𑐸𑐂𑐎 𑐫𑑄𑐎𑐾𑐐𑐸 𑐢𑐵𑑅𑐐𑐸 𑐡𑐸 𑑋 𑐩𑐾𑐏𑐾 𑐊𑐳 𑐥𑐵𑐟𑐶𑑄 𑐎𑐾𑐥𑐷 𑐌𑐮𑐷 𑐎𑐩𑑂𑐫𑐸𑐣𑐶𑐳𑑂𑐟 𑐩𑐏𑐸, 𑐠𑑅𑐥𑐶𑑄 𑐏𑑅 𑐢𑐎𑐵𑑅 𑐢𑐎𑐵𑑅 𑐎𑑂𑐫𑐣𑐾𑐟 𑐎𑐶𑐳𑐵𑐣, 𑐩𑐖𑐡𑐸𑐬𑐟𑐫𑑂𑐐𑐸 𑐏𑑃 𑐮𑑂𑐴𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐧𑐵𑐴𑐾𑐎 𑐦𑑀𑐴𑐬𑑄 𑐩𑑀𑐴𑐬 𑐡𑐫𑐾𑐎𑐾𑐐𑐸, 𑐥𑐬𑑂𑐫𑐵𑐰𑐬𑐞, 𑐰𑐶𑐥𑐡𑑂 𑐰𑑂𑐫𑐰𑐳𑑂𑐠𑐵𑐥𑐣 𑐠𑐸𑐖𑑂𑐰𑑅𑐐𑐸 𑐊𑐣𑐖𑐶𑐌𑐟𑐳𑐾𑑄 𑐰𑑂𑐫𑐵𑐥𑐎 𑐥𑑂𑐬𑐔𑐵𑐬𑐫𑑂 𑐴𑐫𑐵𑐔𑑂𑐰𑑄𑐐𑐸 𑐩𑐸𑐡𑑂𑐡𑐵 𑐣𑑄 𑐮𑑂𑐴𑑂𑐰𑑄𑐐𑐸 𑐡𑐸 𑑋

𑐠𑐸𑐎𑐠𑑄𑐫𑐵 𑐩𑐸𑐡𑑂𑐡𑐵 𑐴𑐾 𑐖𑐣𑐟𑐵𑐫𑐵 𑐡𑐠𑐸𑐂 𑐥𑑂𑐬𑐔𑐵𑐬 𑐖𑐸𑐂𑐧𑐮𑐫𑑂 𑐗𑐷𑐐𑐸 𑐩𑐸𑐡𑑂𑐡𑐵𑐫𑐵 𑐏𑑃 𑐗𑐷 𑐠𑐰𑑄𑐠𑐰𑐫𑑂 𑐴𑐵𑐮𑐾𑐐𑐸 𑐖𑑂𑐫𑐵 𑐖𑐎 𑐖𑐹 𑐰𑐣𑐷 𑑋 𑐠𑐸𑐥𑐶𑑄 𑐴𑐾 𑐩𑐹𑐮𑐢𑐵𑐬𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬𑐫𑐵 𑐰𑐶𑐲𑐫 𑐖𑐸𑐂𑐧𑐮𑐫𑑂 𑐗𑐷𑐐𑐸 𑐏𑑃 𑐮𑑂𑐴𑐵𑐂𑐥𑐶𑑄 𑐧𑐶𑐳𑑂𑐎𑑄 𑐴𑐾 𑐏𑑃 𑐮𑑂𑐴𑐵𑑅 𑐰𑑅𑐥𑐶𑑄 𑐩𑐣𑐹𑐟 𑐖𑐸𑐫𑐵𑐰𑐣𑐷 𑑋 𑐠𑑂𑐰 𑐴𑐾 𑐗𑐷𑐐𑐸 𑐁𑐣𑑂𑐡𑑀𑐮𑐣𑐫𑐵 𑐳𑐩𑐳𑑂𑐫𑐵 𑐣𑑄 𑐏𑑅 𑑋

𑐰𑑄𑐐𑐸 𑐣𑑂𑐫𑐵𑐡𑑃𑐫𑐵 𑐡𑐸𑐣𑐾 𑐏𑑀𑐣𑐵 𑐖𑐸𑐫𑐵𑑅 𑐡𑐫𑐾𑐎𑐾𑐟𑑂𑐫𑑄𑐐𑐸 𑐡𑑂𑐬𑐸𑐟𑐩𑐵𑐬𑑂𑐐, 𑐧𑐵𑐮𑐵𑐖𑐸𑐂 𑐖𑐹𑐐𑐸 𑐳𑑂𑐠𑐵𑐣𑐷𑐫 𑐰𑐵𑐳𑐶𑐣𑑂𑐡𑐵𑐫𑐵 𑐰𑐶𑐳𑑂𑐠𑐵𑐥𑐣, 𑐔𑑀𑐨𑐵𑐬𑐫𑑂 𑐡𑐫𑐾𑐎𑐹𑐐𑐸 𑐜𑑂𑐬𑐵𑐂𑐥𑑀𑐬𑑂𑐚𑐫𑐵 𑐳𑐰𑐵𑐮, 𑐐𑐸𑐠𑐶 𑐰𑐶𑐢𑐾𑐫𑐎, 𑐕𑐵𑐫𑐵 𑐎𑐩𑑂𑐥𑑂𑐮𑐾𑐎𑑂𑐳 𑐢𑐬𑐴𑐬𑐵𑐫𑐵 𑐣𑐵𑐩𑐫𑑂 𑐗𑐶𑐮𑑂𑐎𑐾 𑐟𑐵𑐰𑐬, 𑐣𑑂𑐴𑐹𑐥𑐸𑐏𑐸𑐮𑐷 𑐧𑐵𑐮 𑐐𑑀𑐥𑐵𑐮𑐾𑐱𑑂𑐰𑐬 𑐡𑐾𑐐𑑅 𑐐𑑂𑐬𑐣𑑂𑐠𑐎𑐹𑐚 𑐱𑐿𑐮𑐷𑑄 𑐴𑐾 𑐡𑐫𑐾𑐎𑐾𑐧𑐶𑐂𑐟 𑐖𑐹𑐐𑐸 𑐡𑐧𑐵𑐧 𑐁𑐡𑐶 𑐁𑐥𑐵𑐮 𑐏𑑃𑐫𑑂 𑐣𑐾𑐰𑐵𑑅𑐟𑐳𑐾𑑄 𑐁𑐣𑑂𑐡𑑀𑐮𑐣 𑐫𑐵𑐟, 𑐡𑐧𑐵𑐧 𑐧𑐶𑐮 𑑋 𑐠𑐸𑐎𑐶𑐫𑐵 𑐣𑐵𑐥𑑄 𑐥𑐸𑐮𑐵𑑄𑐐𑐸 𑐴𑐶𑐟𑐶𑐐𑐵𑑅, 𑐟𑐸𑑄, 𑐧𑐸𑑄𑐐𑐵𑑅, 𑐥𑐸𑐏𑐹, 𑐬𑐵𑐖𑐎𑐸𑐮𑑀 𑐁𑐡𑐶𑐫𑐵 𑐳𑑄𑐬𑐎𑑂𑐲𑐞 𑐖𑐸𑐂𑐩𑐵𑑅𑐐𑐸 𑐰 𑐩𑐣𑐹𑐟𑐫𑑂𑐟 𑐖𑑂𑐫𑐵 𑐰𑐂𑐐𑐸 𑐖𑐸𑐂𑐩𑐵𑑅𑐐𑐸 𑐏𑑃 𑐩𑐾𑐐𑐸 𑐩𑐸𑐡𑑂𑐡𑐵 𑐣𑑄 𑐮𑐐𑐵𑐟𑐵𑐬 𑐴𑐾 𑐥𑐶𑐴𑐵𑑃 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑐵𑐛𑐩𑐵𑐜𑑁𑑃 𑐩𑐮 𑐡𑐫𑐾𑐎𑐵𑑅 𑐮𑐸𑑃𑐴𑐶𑐟𑐶 𑐳𑐸𑐣𑐵𑐰𑑄𑐐𑐸 𑐏𑑃 𑐣𑑄 𑐗𑐷𑐐𑐸 𑐳𑐬𑑀𑐎𑐵𑐬 𑐖𑐸𑐫𑐵 𑐴𑐾 𑐰𑐰𑐵𑐔𑑂𑐰𑑄𑐐𑐸 𑐏𑑅 𑑋 𑐨𑐸𑐏𑐵𑐫𑑂 𑐮𑐶𑐥𑐵 𑐳𑐩𑑂𑐥𑐡𑐵𑐫𑐵 𑐥𑐸𑐣𑐬𑑂𑐣𑐶𑐬𑑂𑐩𑐵𑐞𑐫𑐵 𑐳𑐰𑐵𑐮 𑐣𑑄 𑐁𑑅 𑐟𑐎 𑐮𑑂𑐫𑑄 𑐴𑐾 𑐡𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋
𑐥𑐘𑑂𑐔𑐵𑐫𑐟𑐫𑐵 𑐎𑐵𑐮𑐫𑑂 𑐣 𑐖𑐣𑐥𑑂𑐬𑐟𑐶𑐣𑐶𑐢𑐶 𑐢𑐎𑐵𑑅 𑐡𑐸 𑑋 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐳 𑐮𑐵 𑐖𑐣𑐟𑐵𑑄 𑐴𑐾 𑐮𑑂𑐫𑐫𑐵𑐕𑑂𑐰𑐫𑐵𑐟𑐂𑐐𑐸 𑐏𑑅 𑑋 𑐟𑐬 𑐂𑐥𑐶𑑄 𑐖𑐣𑐟𑐵𑐫𑐵 𑐥𑑂𑐬𑐟𑐶𑐣𑐶𑐢𑐶 𑐩𑐏𑐸, 𑐥𑐘𑑂𑐔𑐵𑐫𑐟𑐷 𑐳𑐟𑑂𑐟𑐵𑐫𑐵 𑐔𑐵𑐚𑐸𑐎𑐵𑐬 𑐖𑐸𑐫𑐵𑑅 𑐖𑐣𑐟𑐵𑐫𑐵𑐟 𑐰 𑐧𑐵𑑄𑐮𑐵𑑅𑐐𑐸 𑐨𑐶𑑄𑐐𑐸 𑐏𑑃 𑐮𑑂𑐴𑐵𑐣𑐵𑐖𑐸𑐂𑐥𑐶𑐣𑑂𑐟 𑐡𑐩𑐣 𑐫𑐵𑐂𑐥𑐶𑑄 𑐖𑐸𑐮 𑑋 𑐕𑐸𑑄 𑐩𑐳𑐶𑐄𑐥𑐶𑑄 𑐖𑐣𑐟𑐵𑐫𑐵𑐟 𑐴𑑂𑐫𑐫𑐾𑐎𑐵𑑅 𑐨𑑀𑐟 𑐎𑐫𑐵𑑅 𑐟𑑂𑐫𑐵𑐎𑐵 𑐰𑐣𑐷𑐥𑐶𑑄 𑐖𑐸𑐮 𑑋 𑐠𑐠𑐾 𑐖𑐸𑐫𑐵𑑅 𑐴𑐾 𑐁𑐣𑑂𑐡𑑀𑐮𑐣 𑐫𑐵𑐣𑐵𑑅 𑐰𑑂𑐫𑐰𑐳𑑂𑐠𑐵 𑐴𑐶𑐮𑐾𑐩𑐵𑑅𑐐𑐸 𑐏𑑅 𑑋 𑐁𑑅 𑐰𑑂𑐫𑐰𑐳𑑂𑐠𑐵 𑐴𑐶𑐮𑐾𑐢𑐸𑑄𑐎𑐵𑑅 𑐀𑐗 𑐔𑑂𑐰𑐫𑑂𑑂 𑐖𑐸𑐖𑐸 𑐩𑐡𑐫𑐾𑐢𑐸𑑄𑐎𑐵𑑅 𑐮𑐵 𑐖𑐣𑐟𑐵𑐫𑐵 𑐖𑑂𑐫𑐵 𑐮𑐵 𑐢𑐵𑐫𑐾 𑐴𑐾 𑐩𑑂𑐰𑐵𑐫𑐾𑐎 𑐖𑐸𑐂𑐩𑐵𑑅𑐐𑐸 𑐏𑑅 𑑋 𑐟𑐬 𑐀𑐗 𑐣𑑄 𑐖𑐸𑐖𑐸𑐫𑐵 𑐠𑐵𑐳𑐫𑑂 𑐡𑐮𑐫𑐵 𑐣𑐾𑐟𑐵𑐟 𑐖𑐸𑐫𑐵𑑅 𑐥𑑂𑐬𑐰𑐺𑐟𑑂𑐟𑐶 𑐰 𑐥𑑂𑐬𑐎𑐺𑐟𑐶 𑐥𑐸𑐮𑐵𑑄𑐐𑐸 𑐴𑐾 𑐖𑐹𑐐𑐸 𑐡𑐸𑐬𑑂𑐨𑐵𑐐𑑂𑐫𑐥𑐹𑐬𑑂𑐞 𑐏𑑃 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS