Read news in NepalBhasa text-- www.hamroschool.com BACK 𑐥𑐸𑐮𑐵𑑄𑐐𑐸 𑐮𑐸𑑃 𑐕𑐾𑑃𑐫𑑂 𑐕𑐾𑑃𑐫𑑂, 𑐧𑐖𑐵𑐬𑐫𑑂 𑐢𑐵𑑅𑐳𑐵 𑐐𑐵𑐫𑐧 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐥𑐸𑐮𑐵𑑄𑐐𑐸 𑐮𑐸𑑃 𑐕𑐾𑑃𑐫𑑂 𑐕𑐾𑑃𑐫𑑂, 𑐧𑐖𑐵𑐬𑐫𑑂 𑐢𑐵𑑅𑐳𑐵 𑐐𑐵𑐫𑐧

𑐫𑐾𑑃 – 𑐂𑐴𑐶𑐥𑐵𑐫𑐵 𑐳𑐶𑐖𑐣 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐮𑐵𑐎𑑂𑐎 𑐦𑐸𑐎𑑂𑐎 𑐢𑐂𑐠𑐾𑑄 𑐧𑐿𑑄𑐎𑑄 𑐁𑐫𑐵𑐟 𑐫𑐵𑐣𑐵𑐟𑑅𑐐𑐸 𑐮𑐸𑑃𑐫𑐵 𑐳𑑂𑐚𑐎 𑐦𑐹𑐐𑐸 𑐏𑑃 𑐥𑐶𑐴𑐵𑑄 𑐰𑑅𑐐𑐸 𑐡𑐸 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐧𑐖𑐵𑐬𑐫𑑂 𑐮𑐸𑑃𑐫𑐵 𑐀𑐨𑐵𑐰 𑐖𑐸𑐫𑐵𑐔𑑂𑐰𑑄𑐐𑐸 𑐴𑐮𑑂𑐮𑐵 𑐖𑐸𑐫𑐵𑐔𑑂𑐰𑑄𑐳𑐵𑑄 𑐣𑑄 𑐰𑐵𑐳𑑂𑐟𑐰𑐫𑑂 𑐣𑐾𑐥𑐵𑐮𑐫𑑂 𑐟𑐟𑑂𑐎𑐵𑐮 𑐮𑐸𑑃𑐫𑐵 𑐀𑐨𑐵𑐰 𑐩𑐖𑐸𑐂𑐐𑐸 𑐏𑑃 𑐣𑐾𑐥𑐵𑐮 𑐳𑐸𑐣𑐔𑐵𑑃𑐡𑐷 𑐰𑑂𑐫𑐰𑐳𑐵𑐫𑐷 𑐳𑑄𑐑𑐫𑐵 𑐥𑐸𑐮𑐵𑑄𑐩𑑂𑐴 𑐀𑐢𑑂𑐫𑐎𑑂𑐲 𑐟𑐾𑐖𑐬𑐟𑑂𑐣 𑐱𑐵𑐎𑑂𑐫𑑄 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐎𑐣𑐵𑐡𑐷𑐐𑐸 𑐡𑐸 𑑋

𑐰𑐫𑑂𑐎𑑅𑐫𑐵 𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐧𑐖𑐵𑐬𑐫𑑂 𑐎𑐺𑐟𑐶𑐩 𑐀𑐨𑐵𑐰 𑐖𑐸𑐫𑐵𑐔𑑂𑐰𑑄𑐳𑐵𑑄 𑐣𑑄 𑐮𑐸𑑃𑐫𑐵 𑐀𑐨𑐵𑐰 𑐠𑑂𑐫𑑄𑐎 𑐢𑐵𑑅𑐳𑐵 𑐖𑐹𑐐𑐸 𑐩𑐡𑐸𑐣𑐶 𑑋 𑐧𑐖𑐵𑐬𑐫𑑂 𑐀𑐗 𑐣𑑄 𑑒𑑕 𑐥𑑂𑐬𑐟𑐶𑐱𑐟 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐥𑐸𑐮𑐵𑑄𑐐𑐸 𑐮𑐸𑑃 𑐰𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐳𑐬𑐎𑐵𑐬𑑄 𑐥𑐸𑐮𑐵𑑄𑐐𑐸 𑐮𑐸𑑃 𑐥𑐳𑐮𑑂𑐫𑐵𑐟𑐫𑑂𑐳𑑄 𑐣𑑂𑐫𑐵𑐣𑐵 𑐎𑐵𑐫𑐾𑐧𑐮𑐫𑑂 𑐄𑐎𑐶𑐫𑐵𑐟 𑐰𑐿𑐢𑐵𑐣𑐶𑐎𑐟𑐵 𑐩𑐧𑐶𑐄𑐐𑐸𑐮𑐶𑑄 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐬𑐶𑐳𑐵𑐂𑐎𑑂𑐮𑐶𑐒 𑐫𑐵𑐣𑐵𑐟𑑅𑐐𑐸 𑐮𑐸𑑃𑐫𑐵𑐟 𑐣𑑄 𑐳𑑂𑐬𑑀𑐟𑐫𑐵 𑐬𑐸𑐥𑐫𑑂 𑐎𑑂𑐫𑐣𑐾 𑐡𑐫𑐾𑐩𑐵𑑅 𑐢𑐎𑐵𑑅 𑐠𑑅𑐥𑐶𑐳𑑄 𑐩𑐵𑐐 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐏𑑅𑐳𑐵𑑄 𑐳𑐬𑐎𑐵𑐬𑑄 𑐄𑐎𑐶𑐫𑐵𑐟 𑐩𑐵𑐣𑑂𑐫𑐟𑐵 𑐩𑐧𑐶𑐄𑐐𑐸𑐮𑐶𑑄 𑐕𑐏𑐾 𑐳𑐬𑐎𑐵𑐬𑐫𑐵𑐟 𑐰𑐫𑐾𑐩𑐵𑑅𑐐𑐸 𑐬𑐵𑐖𑐱𑑂𑐰 𑐩𑑂𑐴𑑀 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐏𑐾 𑐰𑑂𑐫𑐵𑐥𑐵𑐬𑐷𑐟𑐫𑑂𑐟 𑐣𑑄 𑐴𑐶𑐳𑐵𑐧 𑐟𑐫𑐾𑐟 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐏𑑃 𑐰𑐫𑑂𑐎𑐮𑑄 𑐎𑐣𑐵𑐡𑐷𑐐𑐸 𑐡𑐸 𑑋
𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐳𑐸𑑄 𑐣𑑄 𑐩𑐣𑐹 𑐗𑐶 𑐟𑑀𑐮𑐵 𑐮𑐸𑑃 𑐩𑐷 𑐢𑐎𑐵𑑅 𑐰𑐮 𑐢𑐵𑑅𑐳𑐵 𑐖𑐶𑐩𑐶𑐳𑑄 𑐎𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑑋 𑐫𑐡𑐶 𑐖𑐶𑐩𑐶𑐳𑑄 𑐄𑐐𑐸 𑐮𑐸𑑃 𑐣𑑂𑐫𑐵𑐫𑐾𑐟 𑐳𑑂𑐰𑐮 𑐢𑐵𑑅𑐳𑐵 𑐳𑐬𑐎𑐵𑐬𑑄 𑐄𑐎𑐶𑐫𑐵 𑐳𑑀𑐬𑑂𑐱 𑐩𑐵𑐮𑐷, 𑐐𑐸𑐮𑐶𑐏𑐾 𑐮𑐸𑑃 𑐣𑑂𑐫𑐵𑐫𑐾𑐢𑐸𑑄𑐎𑐹𑐥𑐶𑑄𑐎𑐾 𑐣𑑂𑐴𑐵𑐥𑐵 𑐮𑐸𑑃 𑐣𑑂𑐫𑐵𑐣𑐵𑐐𑐸 𑐧𑐶𑐮 𑐟𑐎𑑄 𑐩𑐡𑐫𑐾𑐢𑐸𑑄𑐎𑐷, 𑐠𑐸𑐎𑐶𑑄 𑐫𑐵𑐣𑐵𑑅 𑐖𑐶𑐩𑐶𑐳𑑄 𑐮𑐸𑑃 𑐣𑑂𑐫𑐵𑐫𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸, 𑐫𑐡𑐶 𑐠𑑂𑐰 𑐖𑑂𑐫𑐵𑐫𑐵𑐟 𑐳𑐬𑐎𑐵𑐬𑑄 𑐰𑐿𑐢𑐵𑐣𑐶𑐎𑐟𑐵 𑐧𑐶𑐮 𑐢𑐵𑑅𑐳𑐵 𑐖𑐶𑐩𑐶𑐟 𑐣𑑄 𑐀𑑅𑐥𑐸𑐂, 𑐳𑐬𑐎𑐵𑐬𑐫𑐵𑐟 𑐬𑐵𑐖𑐱𑑂𑐰 𑐣𑑄 𑐰𑐣𑐷 𑑋’

𑐰𑐫𑑂𑐎𑑅𑐫𑐵 𑐎𑐠𑑄 𑐕𑐟𑑀𑐮𑐵 𑐥𑐸𑐮𑐵𑑄𑐐𑐸 𑐮𑐸𑑃 𑐣𑑂𑐫𑐵𑐫𑐾𑐧𑐮𑐫𑑂 𑐩𑑂𑐴𑑀𑐟𑐶𑑄 𑐣𑑄 𑐧𑐖𑐵𑑅 𑐨𑐵𑑅 𑐳𑑂𑐰𑐫𑐵𑑄 𑐡𑑂𑐰𑑅𑐕𑐶 𑐟𑐎𑐵 𑐎𑑂𑐰𑐎𑐫𑐵𑑅 𑐣𑑂𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐗𑐶𑐟𑑀𑐮𑐵 𑐮𑐸𑑃 𑐣𑑂𑐫𑐵𑐫𑐾𑐧𑐮𑐫𑑂 𑐗𑐶𑐡𑑂𑐰𑑅 𑐟𑐎𑐵 𑐖𑐶𑐩𑐶𑐳𑑄 𑐎𑑂𑐰𑐥𑐵𑐮𑐾𑐐𑐸 𑐖𑐸𑐂, 𑐟𑐬 𑐄𑐎𑐶𑐫𑐵𑐟 𑐰𑐿𑐢𑐵𑐣𑐶𑐎𑐟𑐵 𑐩𑐧𑐶𑐄𑐐𑐸𑐮𑐶𑑄 𑐫𑐵𑐣𑐵𑑅 𑐖𑐶𑐩𑐶𑐳𑑄 𑐮𑐧𑑅 𑐎𑐠𑑄 𑐎𑑂𑐰𑐥𑐵𑐮𑐵𑐐𑐸 𑐢𑑂𑐫𑐧𑐵𑐫𑐵 𑐎𑐬 𑐳𑐬𑐎𑐵𑐬𑐫𑐵𑐟 𑐥𑐸𑐮𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸, 𑐐𑐸𑐎𑐶𑑄 𑐫𑐵𑐣𑐵𑑅 𑐕𑐏𑐾 𑐖𑐶𑐩𑐶𑐟 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐏𑐾 𑐳𑐬𑐎𑐵𑐬𑐫𑐵𑐟 𑐎𑐬 𑐡𑐸𑐴𑐵𑑄 𑐰𑐣𑐵𑐔𑑂𑐰𑑄𑐐𑐸 𑐩𑐡𑐸 𑑋’

𑐠𑐖𑑂𑐫𑐵𑑅𑐐𑐸 𑐳𑐩𑐳𑑂𑐫𑐵𑐫𑐵𑐟 𑐎𑐫𑐵𑑅 𑐠𑑅𑐥𑐶𑑄𑐳𑑄 𑐥𑐸𑐮𑐵𑑄𑐩𑑂𑐴 𑐀𑐬𑑂𑐠𑐳𑐔𑐶𑐰 𑐬𑐵𑐩𑐾𑐱𑑂𑐰𑐬 𑐏𑐣𑐵𑐮𑐫𑐵𑐟 𑐖𑐵𑐣𑐎𑐵𑐬𑐷 𑐫𑐵𑐎𑐵𑐐𑐸 𑐏𑑅𑐳𑐵𑑄 𑐰𑐫𑑂𑐎𑐮𑑄 𑐠𑑂𑐰 𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸 𑐏𑑅 𑐢𑐫𑐵𑐡𑐶𑐮 𑐟𑐬 𑐂𑐮𑐫𑑂 𑐖𑑂𑐫𑐵 𑐢𑐵𑑅𑐳𑐵 𑐩𑐖𑐹𑐐𑐸 𑐏𑑃 𑐣𑑄 𑐨𑐵𑐖𑐸 𑐱𑐵𑐎𑑂𑐫𑑄 𑐎𑐣𑐵𑐡𑐶𑐮 𑑋 𑐄𑐎𑐠𑑄 𑐴𑐾 𑐰𑐫𑑂𑐎𑐮𑑄 𑐟𑐟𑑂𑐎𑐵𑐮𑐷𑐣 𑐳𑐴𑐵𑐫𑐎 𑐩𑐣𑑂𑐟𑑂𑐬𑐷 𑐬𑐸𑐥 𑐖𑑂𑐫𑑀𑐟𑐶𑐫𑐵𑐟 𑐣𑑄 𑐠𑑅𑐥𑐶𑐣𑐶𑐐𑐸 𑐳𑐩𑐳𑑂𑐫𑐵 𑐎𑐣𑐵𑐐𑐸 𑐏𑑅𑐳𑐵𑑄 𑐰𑐫𑑂𑐎𑐮𑑄 𑐣𑑄 𑐖𑐶𑐄 𑐢𑐎𑐵𑑅 𑐳𑐎𑐵𑐬𑐵𑐟𑑂𑐩𑐎 𑐮𑐶𑐳𑑅 𑐧𑐶𑐄𑐳𑐵𑑄 𑐣𑑄 𑐖𑑂𑐫𑐵 𑐢𑐵𑑅𑐳𑐵 𑐖𑐸𑐂 𑐩𑐦𑐸𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋
𑐰

𑐫𑑂𑐎𑑅𑐫𑐵 𑐎𑐠𑑄 𑐠𑑅𑐥𑐶𑐣𑐶𑐐𑐸 𑐳𑐩𑐳𑑂𑐫𑐵𑐫𑐵𑐟 𑐎𑐫𑐵𑑅 𑐁𑐥𑐵𑐮𑑄 𑐳𑐬𑐎𑐵𑐬𑐷 𑐣𑐶𑐎𑐵𑐫𑐫𑐵𑐟 𑐖𑐵𑐣𑐎𑐵𑐬𑐷 𑐫𑐵𑐎𑐾𑐢𑐸𑑄𑐎𑐹𑐐𑐸 𑐏𑑅𑐳𑐵𑑄 𑐣𑑄 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐢𑐵𑑅𑐳𑐵 𑐟𑐵𑑅 𑐩𑐮𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS