Read news in NepalBhasa text-- www.hamroschool.com BACK 𑐜𑑀𑐣𑑂𑐧𑐵𑐳𑐫𑑂 𑐬𑐸𑐳𑐫𑐵 𑐨𑐶𑐲𑐞 𑐁𑐎𑑂𑐬𑐩𑐞 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐜𑑀𑐣𑑂𑐧𑐵𑐳𑐫𑑂 𑐬𑐸𑐳𑐫𑐵 𑐨𑐶𑐲𑐞 𑐁𑐎𑑂𑐬𑐩𑐞

𑐊𑐖𑐾𑐣𑑂𑐳𑐷- 𑐬𑐸𑐳𑑄 𑐫𑐸𑐎𑑂𑐬𑐾𑐣𑐫𑐵 𑐥𑐹𑐬𑑂𑐰𑐫𑑂𑐮𑐵𑑅𑐐𑐸 𑐜𑑀𑐣𑑂𑐧𑐵𑐳 𑐎𑑂𑐲𑐾𑐟𑑂𑐬𑐫𑑂 𑐨𑐶𑐲𑐞 𑐁𑐎𑑂𑐬𑐩𑐞 𑐳𑐸𑐬𑐸 𑐫𑐵𑑅𑐐𑐸 𑐡𑐸 𑑋 𑐫𑐸𑐎𑑂𑐬𑐾𑐣𑐷 𑐬𑐵𑐲𑑂𑐚𑑂𑐬𑐥𑐟𑐶 𑐨𑑀𑐮𑑀𑐡𑐶𑐩𑐶𑐬 𑐖𑐾𑐮𑐾𑐣𑑂𑐳𑑂𑐎𑐷𑑄 𑐬𑐸𑐳𑐷 𑐦𑑁𑐖𑑄 𑐠𑑅𑐥𑐶𑑄𑐳𑑄 𑐀𑐣𑐸𑐩𑐵𑐣 𑐫𑐵𑐣𑐵𑐐𑐸 𑐳𑑂𑐰𑐫𑐵𑑄 𑐟𑑅𑐢𑑄𑐐𑐸 𑐳𑑂𑐟𑐬𑑄 𑐀𑐎𑑂𑐬𑐩𑐞 𑐫𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐕𑐐𑐹 𑐚𑐾𑐮𑐶𑐨𑐶𑐖𑐣 𑐳𑐩𑑂𑐧𑑀𑐢𑐣𑐫𑑂 𑐖𑐾𑐮𑐣𑑂𑐳𑑂𑐎𑐷𑑄 𑐬𑐸𑐳𑑄 𑐜𑑀𑐣𑑂𑐧𑐵𑐳𑐫𑐵 𑐁𑐎𑑂𑐬𑐩𑐞𑐫𑑂 𑐟𑑅𑐢𑑄𑐐𑐸 𑐮𑑂𑐫𑐵𑐏𑐫𑑂 𑐳𑐾𑐣𑐵 𑐏𑐚𑐾 𑐫𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 ‘𑐬𑐸𑐳𑑄 𑐣𑑂𑐴𑑂𑐫𑐵𑐎𑑂𑐰 𑐴𑐾 𑐳𑐾𑐣𑐵 𑐴𑑅𑐳𑐵𑑄 𑐕𑐸𑑄 𑐩𑐡𑐸, 𑐖𑐶𑐥𑐶𑑄 𑐮𑑂𑐰𑐵𑐣𑐵 𑐴𑐾 𑐔𑑂𑐰𑐣𑐾, 𑐖𑐶𑐩𑐶𑐳𑑄 𑐠𑑅𑐐𑐸 𑐥𑑂𑐬𑐟𑐶𑐬𑐎𑑂𑐲𑐵 𑐫𑐵𑐣𑐵 𑐴𑐾 𑐔𑑂𑐰𑐣’ 𑐖𑐾𑐮𑐾𑐣𑑂𑐳𑑂𑐎𑐷𑑄 𑐢𑐵𑑅𑐐𑐸 𑐡𑐸 𑑋

𑐜𑑀𑐣𑑂𑐧𑐵𑐳𑐫𑑂 𑐮𑐵𑑅𑐐𑐸 𑐮𑐸𑐴𑐵𑐣𑑂𑐳𑑂𑐎𑐫𑐵 𑐐𑐨𑐬𑑂𑐣𑐬𑑄 𑐕𑐸𑑄 𑐱𑐴𑐬𑐫𑑂 𑐣𑐶𑐬𑐣𑑂𑐟𑐬 𑐁𑐎𑑂𑐬𑐩𑐞 𑐖𑐸𑐫𑐵𑐔𑑂𑐰𑑄𑐐𑐸 𑐰 𑐁𑑅 𑐀𑐣𑐫𑐵 𑐳𑑂𑐠𑐶𑐟𑐶 𑐣𑐬𑑂𑐎 𑐠𑐾𑑄 𑐖𑐹𑐐𑐸 𑐢𑐵𑑅𑐐𑐸 𑐡𑐸 𑑋 𑐜𑑀𑐣𑑂𑐧𑐵𑐳𑐫𑑂 𑐖𑐹𑐐𑐸 𑐁𑐎𑑂𑐬𑐩𑐞𑐫𑐵𑐟 𑐬𑐸𑐳𑑄 𑐣𑑂𑐴𑑂𑐫𑐵𑐎𑐹𑐐𑐸 𑐣𑐶𑐐𑐹𑐐𑐸 𑐔𑐬𑐞𑐫𑐵 𑐫𑐸𑐡𑑂𑐢𑐫𑐵 𑐳𑐸𑐬𑐸𑐰𑐵𑐟 𑐎𑐠𑑄 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐾𑐏𑐾 𑐳𑑀𑐩𑐰𑐵𑑅 𑐫𑐸𑐎𑑂𑐬𑐾𑐣𑐫𑐵 𑐩𑐾𑐩𑐾𑐐𑐸 𑐱𑐴𑐬𑐫𑑂 𑐬𑐸𑐳𑐷 𑐳𑐾𑐣𑐵𑑄 𑐎𑐫𑐾𑐎𑐹𑐐𑐸 𑐧𑐩𑐫𑑂 𑐮𑐵𑐣𑐵𑑅 𑐐𑐸𑐩𑑂𑐴𑐾𑐳𑐶𑐫𑐵 𑐖𑑂𑐫𑐵𑐣 𑐰𑑄𑐐𑐸 𑐡𑐸 𑑋 𑐬𑐸𑐳𑑄 𑐫𑐸𑐎𑑂𑐬𑐾𑐣𑐫𑐵 𑐳𑐿𑐣𑑂𑐫 𑐧𑐣𑑂𑐡𑑀𑐧𑐳𑑂𑐟𑐷 𑐎𑐾𑐣𑑂𑐡𑑂𑐬𑐫𑑂 𑐁𑐎𑑂𑐬𑐩𑐞 𑐫𑐵𑐣𑐵𑐐𑐸 𑐢𑐵𑑅𑐐𑐸 𑐡𑐸 𑑋

𑐠𑑂𑐰𑐴𑐾 𑐡𑐠𑐸𑐂 𑐫𑐸𑐎𑑂𑐬𑐾𑐣𑐷 𑐀𑐢𑐶𑐎𑐵𑐬𑐷𑐟𑐫𑑂𑐳𑑄 𑐬𑐸𑐳𑐷 𑐳𑐾𑐣𑐵𑐫𑐵 𑐑𑐾𑐬𑐵𑐧𑐣𑑂𑐡𑐷𑐂 𑐮𑐵𑐣𑐵𑐔𑑂𑐰𑑄𑐐𑐸 𑐧𑐣𑑂𑐡𑐬𑐐𑐵𑐴𑐫𑐵 𑐱𑐴𑐬 𑐩𑐵𑐬𑐶𑐅𑐥𑑀𑐮𑐫𑑂 𑐔𑑂𑐰𑑄𑐐𑐸 𑐕𑐐𑐹 𑐳𑑂𑐚𑐶𑐮 𑐎𑐵𑐬𑐏𑐵𑐣𑐵𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐫𑐸𑐎𑑂𑐬𑐾𑐣𑐷 𑐳𑐾𑐣𑐵 𑐰 𑐳𑐬𑑂𑐰𑐳𑐵𑐢𑐵𑐬𑐞𑐫𑐵𑐟 𑐬𑐸𑐳𑑄 𑐰𑐶𑐢𑑂𑐰𑑄𑐳𑐎 𑐧𑐩𑑄 𑐁𑐎𑑂𑐬𑐩𑐞 𑐫𑐵𑑅𑐐𑐸 𑐡𑑂𑐰𑐥𑑄𑐧𑐶𑐄𑐐𑐸 𑐡𑐸 𑑋 𑐩𑐵𑐬𑐶𑐅𑐥𑑀𑐮𑐫𑐵 𑐣𑐐𑐬𑐥𑐬𑐶𑐲𑐡𑑂𑐫𑐵 𑐎𑐠𑑄 𑐠𑑂𑐰 𑐨𑐹𑐩𑐶𑐐𑐟 𑐁𑐱𑑂𑐬𑐫𑐳𑑂𑐠𑐮𑐫𑑂 𑐡𑑂𑐰𑑅𑐕𑐶𑐩𑑂𑐴𑑄 𑐩𑐮𑑂𑐫𑐵𑐎 𑐳𑐬𑑂𑐰𑐳𑐵𑐢𑐵𑐬𑐞 𑐣𑑄 𑐡𑐸 𑑋

𑐩𑐵𑐬𑐶𑐅𑐥𑑀𑐮𑐫𑑂 𑐮𑑂𑐫𑐣𑐵𑐔𑑂𑐰𑑄𑐥𑐶𑑄 𑐫𑐸𑐎𑑂𑐬𑐾𑐣𑐷 𑐳𑐾𑐣𑐵𑐫𑐵 𑐀𑐣𑑂𑐟𑐶𑐩 𑐥𑐸𑐔𑑅𑐫𑐵 𑐥𑑂𑐬𑐩𑐸𑐏𑑄 𑐳𑐬𑑂𑐰𑐳𑐵𑐢𑐵𑐬𑐞 𑐰 𑐑𑐵𑑅𑐥𑐵𑑅 𑐖𑐹𑐥𑐶𑑄 𑐳𑐿𑐣𑐶𑐎𑐟𑐫𑑂𑐟 𑐳𑐸𑐬𑐎𑑂𑐲𑐶𑐟 𑐥𑐶𑐴𑐵𑑄 𑐰𑐣𑐾𑐐𑐸 𑐮𑑃 𑐔𑐵𑐫𑐾𑐎𑐵𑐧𑐷𑐟 𑐕𑐐𑐹 𑐨𑐶𑐜𑐶𑐫𑑀𑐥𑐵𑐏𑐾𑑄 𑐀𑐥𑐷𑐮 𑐫𑐵𑑅𑐐𑐸 𑐡𑐸 𑑋 𑐠𑐣𑑄 𑐠𑐵𑐣𑐵𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂𑐟 𑐥𑐶𑐣𑐾 𑐕𑑂𑐰𑐫𑐾𑐐𑐸 𑐏𑑃𑐫𑑂 𑐫𑐸𑐎𑑂𑐬𑐾𑐣 𑐰 𑐬𑐸𑐳𑐷 𑐳𑐾𑐣𑐵 𑐡𑐠𑐸𑐂 𑐣𑐶𑐣𑑂𑐴𑐸 𑐣𑑂𑐴𑑂𑐫𑐰𑐣𑐶𑐳𑐾𑑄 𑐕𑐸𑑄 𑐳𑐴𑐩𑐟𑐶 𑐖𑐸𑐂 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑐣𑐶 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS