Read news in NepalBhasa text-- www.hamroschool.com BACK 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐰 𑐐𑐛𑐧𑐣𑑂𑐢𑐣 𑐳𑐰𑐵𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐰 𑐐𑐛𑐧𑐣𑑂𑐢𑐣 𑐳𑐰𑐵𑐮

𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣 𑐣𑐾𑐰𑐵𑑅

𑐳𑑂𑐠𑐵𑐣𑐷𑐫 𑐟𑐴𑐫𑐵 𑐔𑐸𑐣𑐵𑐰 𑐖𑐸𑐂𑐐𑐸 𑐁𑑅 𑐣𑐷𑐔𑑂𑐫𑐵𑐣𑑂𑐴𑐸 𑐖𑐎 𑐮𑑂𑐫𑑄𑐡𑐣𑐶 𑑋 𑐳𑑄𑐰𑐶𑐢𑐵𑐣𑐳𑐨𑐵𑐥𑐵𑐏𑐾𑑄 𑐳𑑄𑐰𑐶𑐢𑐵𑐣 𑐣𑐶𑐬𑑂𑐩𑐵𑐞 𑐖𑐸𑐂 𑐢𑐸𑑄𑐎𑐵𑑅 𑐠𑑂𑐰 𑐣𑐶𑐎𑑂𑐰𑑅𑐏𑐸𑐳𑐶𑐫𑐵 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐔𑐸𑐣𑐵𑐰 𑐏𑑅 𑑋 𑐳𑑄𑐰𑐶𑐢𑐵𑐣𑑄 𑐳𑑄𑐑 𑐳𑐬𑐎𑐵𑐬, 𑐥𑑂𑐬𑐡𑐾𑐱 𑐳𑐬𑐎𑐵𑐬 𑐰 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐫𑐵𑐣𑐵𑑅 𑐳𑑂𑐰𑑄𑐐𑐹 𑐟𑐴𑐫𑐵 𑐳𑐬𑐎𑐵𑐬𑐫𑐵 𑐥𑐬𑐶𑐎𑐮𑑂𑐥𑐣𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐣𑐵𑐥𑑄 𑐄𑐟𑑂𑐥𑐷𑐜𑐶𑐟 𑐳𑐩𑐸𑐡𑐵𑐫𑐥𑐵𑐏𑐾𑑄 𑐗𑐶𑐐𑐹 𑐨𑑁𑐐𑑀𑐮𑐶𑐎 𑐣𑐵𑐥𑑄 𑐕𑐐𑐹 𑐐𑐿𑐬 𑐨𑑀𑐐𑑀𑐮𑐶𑐎 𑐫𑐵𑐣𑐵𑑅 𑐗𑐶𑑄𑐕𑐐𑐹 𑐥𑑂𑐬𑐡𑐾𑐱𑐫𑐵 𑐳𑐬𑐎𑐵𑐬 𑐀𑐮𑐾 𑐎𑐾𑐣𑑂𑐡𑑂𑐬𑐷𑐫 𑐳𑐬𑐎𑐵𑐬𑐫𑐵 𑐩𑐵𑐐 𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐄𑐮𑐶𑐩𑐕𑐶 𑐳𑐬𑐎𑐵𑐬 𑐡𑐫𑐾𑐎𑐮 𑐢𑐵𑑅𑐳𑐵 𑐡𑐾𑐱 𑐧𑐬𑑂𑐧𑐵𑐡 𑐖𑐸𑐂 𑐢𑐎𑐵𑑅 𑐳𑑄𑐑𑐷𑐫𑐟𑐵 𑐰𑐶𑐬𑐸𑐡𑑂𑐢𑐫𑐵 𑐨𑐵𑐰𑐣𑐵 𑐟𑐫𑐵𑑅 𑐖𑐣𑐟𑐵𑐫𑐵𑐟 𑐎𑐣𑑂𑐦𑑂𑐫𑐸𑐖𑐫𑑂 𑐮𑐵𑐎𑐹𑐥𑐶𑑄 𑐡𑐮𑐟𑐫𑑂𑐳𑑄 𑐡𑐾𑐫𑑂𑐣𑑂𑐫𑑄𑐎𑐫𑐵 𑐥𑐵𑐮𑐶𑐎𑐵𑐫𑐵𑐟 𑐣𑑄 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐢𑐎𑐵𑑅 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑑋

𑐡𑐾𑐫𑑂𑐣𑑂𑐫𑑄𑐎𑑄 𑐫𑐵𑐣𑐵𑑅 𑐠𑑁𑑄𑐎𑐣𑑂𑐴𑐫𑑂 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐖𑐎 𑐴𑐾 𑑗𑑕𑑓 𑐡𑐸 𑑋 𑐥𑑂𑐬𑐡𑐾𑐱 𑐳𑐬𑐎𑐵𑐬 𑑗 𑐐𑐹 𑐡𑐸𑐳𑐵 𑐳𑑄𑐑 𑐳𑐬𑐎𑐵𑐬 𑐕𑐐𑐹 𑐡𑐸 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐁𑑅𑐫𑐵 𑐀𑐰𑐳𑑂𑐠𑐵𑐫𑑂 𑐩𑐸𑐮𑐸𑐎𑐫𑑂 𑑗𑑖𑑑 𑐐𑐹 𑐳𑐬𑐎𑐵𑐬 𑐡𑐸 𑑋 𑐳𑑄𑐰𑐶𑐢𑐵𑐣 𑐎𑐠𑑄 𑐥𑐵𑐮𑐶𑐎𑐵 𑐥𑐵𑐮𑐶𑐎𑐵𑐫𑑂 𑐳𑐬𑐎𑐵𑐬 𑐡𑐸 𑑋 𑐄𑐎𑐶𑑄 𑐴𑐾 𑐣𑐾𑐟𑐵𑐟𑐫𑑂𑐳𑑄 𑐕𑐾𑑃𑐫𑑂 𑐕𑐾𑑃𑐫𑑂 𑐳𑐬𑐎𑐵𑐬 𑐢𑐎𑐵𑑅 𑐢𑐵𑑅𑐐𑐸 𑐏𑑅 𑑋 𑐣𑑂𑐴𑐵𑐥𑐵𑑄𑐐𑐸 𑐳𑑄𑐰𑐶𑐢𑐵𑐣𑐳𑐨𑐵𑐫𑐵 𑐂𑐮𑐫𑑂 𑐟𑐎 𑐥𑑂𑐬𑐡𑐾𑐱 𑐳𑐬𑐎𑐵𑐬 𑑑𑑑 𑐐𑐹 𑐀𑐮𑐾 𑐳𑑄𑐑 𑐳𑐬𑐎𑐵𑐬 𑐕𑐐𑐹 𑐫𑐵𑐣𑐵𑑅 𑑑𑑒 𑐐𑐹 𑐳𑐬𑐎𑐵𑐬𑐫𑐵𑐟 𑐀𑐳𑑂𑐰𑐷𑐎𑐵𑐬 𑐫𑐵𑐣𑐵𑐡𑐷𑐥𑐶𑑄 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐣𑐾𑐟𑐵𑐟𑐫𑑂𑐳𑑄 𑐠𑐸𑐮𑐶𑐩𑐕𑐶 𑐳𑐬𑐎𑐵𑐬𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑑅𑐐𑐸 𑐢𑐫𑐵𑐐𑐸 𑐠𑐹𑐥𑐶𑑄𑐳𑑄 𑐮𑐵 𑐀𑐧𑐮𑐫𑑂 𑐴𑐾 𑐬𑐴𑐳𑑂𑐫𑐩𑐫 𑐢𑐎𑐵𑑅 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐁𑑅 𑐰𑐫𑐵𑑅 𑐳𑐬𑐎𑐵𑐬𑐫𑐵 𑐳𑐬𑐎𑐵𑐬 𑐢𑐎𑐵𑑅 𑐎𑐣𑑂𑐦𑑂𑐫𑐹𑐖𑐣 𑐫𑐵𑐂𑐥𑐶𑑄 𑐀𑐮𑐾 𑐳𑑄𑐑𑐷𑐫𑐟𑐵 𑐢𑐫𑐵𑐐𑐸 𑐣𑐾𑐥𑐵𑑅𑐫𑐵𑐟 𑐩𑐮𑑂𑐰𑑅 𑐢𑐎𑐵𑑅 𑐢𑐵𑐂𑐥𑐶𑑄𑐟 𑐀𑑅𑐥𑐸𑐫𑐵 𑐰𑑅𑐐𑐸 𑐡𑐸 𑑋

𑐳𑑄𑑄𑐑𑐷𑐫𑐟𑐵𑐫𑐵 𑐥𑐎𑑂𑐲𑐫𑑂 𑐰𑐎𑐵𑐮𑐟 𑐫𑐵𑑅𑐥𑐶𑑄 𑐀𑐧𑐮𑐾𑐫𑐵𑐥𑐶𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐣𑐵𑐥𑑄 𑐩𑐾𑐩𑐾𑐥𑐶𑑄𑐳𑑄 𑐥𑑂𑐬𑐡𑐾𑐱 𑐟𑐎 𑐳𑐬𑐎𑐵𑐬 𑐀𑐮𑐾 𑐀𑐣𑑄 𑐎𑑂𑐰𑐫𑑂 𑐳𑑂𑐠𑐵𑐣𑐷𑐫 𑐟𑐴 𑐢𑐫𑐵𑐐𑐸 𑐳𑐬𑐎𑐵𑐬 𑐩𑐖𑐸𑐳𑐾 𑐰𑐶𑐎𑐵𑐳𑐫𑐵 𑐕𑐐𑐹 𑐀𑑄𑐐 𑐫𑐵𑐫𑐾𑐐𑐸 𑐣𑐵𑐥𑑄 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐡𑐮𑐷𑐫 𑐬𑐸𑐥𑐫𑑂 𑐩𑐏𑐸𑐳𑐾 𑐰𑑂𑐫𑐎𑑂𑐟𑐶𑐫𑐵𑐟 𑐔𑐸𑐣𑐵𑐰𑑄 𑐮𑑂𑐫𑐫𑐾𑐐𑐸 𑐎𑐠𑑄 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐟𑐎𑑄 𑐩𑐢𑐵𑑅𑐐𑐸 𑐩𑐏𑐸 𑑋 𑐀𑐠𑐾 𑐖𑐸𑐮 𑐢𑐵𑑅𑐳𑐵 𑐰𑐶𑐎𑐵𑐳 𑐣𑐶𑐬𑑂𑐩𑐵𑐞𑐫𑑂 𑐳𑐎𑐮 𑐖𑐣𑐟𑐵𑐟𑐫𑑂𑐐𑐸 𑐳𑐴𑐨𑐵𑐐𑐷𑐟𑐵 𑐡𑐂, 𑐡𑐮𑐷𑐫 𑐬𑐸𑐥𑑄 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐰𑐶𑐨𑐵𑐖𑐶𑐟 𑐖𑐸𑐂𑐩𑐏𑐸 𑐢𑐎𑐵𑑅 𑐩𑐢𑐵𑑅𑐐𑐸 𑐣𑑄 𑐩𑐏𑐸 𑑋 𑐟𑐬 𑐄𑐎𑐶𑐫𑐵 𑐀𑑅𑐏𑑅 𑐡𑐮𑐰𑐶𑐴𑐶𑐣𑐫𑐵 𑐏𑑃 𑐮𑑂𑐴𑐵𑐟, 𑐡𑐮𑐫𑐵𑐟 𑐎𑐩𑐖𑑀𑐬 𑐫𑐵𑐫𑐾𑐐𑐸 𑐏𑑃 𑐮𑑂𑐴𑐵𑐟 𑐢𑐎𑐵𑑅 𑐳𑑄𑐑𑐷𑐫𑐟𑐵 𑐰𑐶𑐬𑑀𑐢𑐷𑐟𑐫𑑂𑐳𑑄 𑐴𑐾 𑐳𑐵𑐬𑑂𑐰𑐖𑐣𑐶𑐎 𑐬𑐸𑐥𑑄 𑐣𑑂𑐰𑐰𑐵𑐣𑐵𑑅 𑐀𑐣𑑂𑐟𑐟𑑅 𑐳𑑂𑐠𑐵𑐣𑐷𑐫 𑐟𑐴𑐫𑐵𑐟 𑐣𑑄 𑐳𑐬𑐎𑐵𑐬 𑐴𑐾 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐫𑐵𑐟 𑑋

𑐠𑑁𑑄 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐡𑐮𑐷𑐫 𑐬𑐵𑐖𑐣𑐷𑐟𑐶𑐎𑐬𑐞 𑐩𑐖𑐹𑐳𑐵 𑐧𑐵𑑄𑐮𑐵𑑅, 𑐡𑐮𑐷𑐫 𑐬𑐸𑐥𑑄 𑐔𑐸𑐣𑐵𑐰 𑐮𑑂𑐰𑐵𑐂𑐐𑐸 𑐀𑐰𑐳𑑂𑐠𑐵𑐫𑑂 𑐖𑐣𑐟𑐵 𑐣𑑄 𑐰𑐶𑐨𑐵𑐖𑐶𑐟 𑐖𑐸𑐫𑐵𑑅 𑐖𑑂𑐫𑐵 𑐫𑐵𑐫𑐾𑐟 𑐠𑐵𑐎𑐸𑐂𑐐𑐸 𑐖𑐸𑐫𑐵𑐔𑑂𑐰𑐣 𑐢𑐎𑐵𑑅 𑐢𑐵𑐫𑐾𑐐𑐸 𑐫𑐵𑐣𑐵𑐴𑑅𑐐𑐸 𑐡𑐸 𑑋 𑐀𑐠𑐾 𑐢𑐎𑐵𑑅 𑐁𑑅 𑐳𑑂𑐠𑐵𑐣𑐷𑐫 𑐟𑐴 𑐢𑐫𑐵𑐐𑐸 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐩𑐫𑐵𑐳𑐾 𑐣𑑂𑐴𑐹𑐐𑐸 𑐎𑐠𑑄𑐫𑐵 𑐳𑑄𑐬𑐔𑐣𑐵 𑐡𑐫𑐾𑐎𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐳𑑄𑐰𑐶𑐢𑐵𑐣 𑐴𑐾 𑐳𑑄𑐱𑑀𑐢𑐣 𑐫𑐵𑐫𑐾𑐩𑐵𑐣𑐶 𑑋 𑐄𑐎𑐶𑑄 𑐁 𑐠𑐟𑑂𑐠𑐾𑑄 𑐴𑐾 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐧𑐵𑐬𑐾 𑐕𑐸𑑄 𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑐰𑐂𑐐𑐸 𑐧𑐿𑐱𑐵𑐏 𑑓𑑐 𑐐𑐟𑐾 𑐔𑐸𑐣𑐵𑐰 𑐖𑐸 𑐴𑐾 𑐖𑐸𑐂 𑑋 𑐄𑐎𑐶𑐫𑐵 𑐣𑐶𑐟𑐶𑑄 𑐣𑐶𑐬𑑂𑐰𑐵𑐔𑐣 𑐁𑐫𑑀𑐐𑑄𑐣𑐶𑐳𑐾𑑄 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐳𑑄 𑐟𑐎𑑄 𑐠𑑅𑐠𑑅𑐐𑐸 𑐎𑐠𑑄𑐫𑐵 𑐟𑐫𑐵𑐬𑐷 𑐫𑐵𑐣𑐵 𑐰𑐣𑐾 𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐁𑑅 𑐡𑐾𑐫𑑂𑐣𑑂𑐫𑑄𑐎𑑄 𑐫𑐵𑐣𑐵𑑅 𑐠𑐸𑐐𑐸𑐳𑐷 𑑗𑑕𑑓 𑐐𑐹 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐣𑐶𑐬𑑂𑐰𑐵𑐔𑐣 𑐕𑐐𑐹 𑐴𑐾 𑐔𑐬𑐞𑐫𑑂 𑐫𑐵𑐫𑐾𑐐𑐸 𑐀𑐣𑑂𑐟𑐶𑐩 𑐔𑐬𑐞𑐫𑑂 𑐠𑑂𑐫𑑄𑐐𑐸 𑐡𑐸 𑑋

𑐡𑐾𑐫𑑂𑐣𑑂𑐫𑑄𑐎𑑄 𑐫𑐵𑐣𑐵𑑅 𑐏𑐸𑐐𑐹 𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑑑𑑒 𑐐𑐹 𑐄𑐥𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑑒 𑐳𑐫 𑑗𑑕 𑐐𑐹 𑐣𑐐𑐬𑐥𑐵𑐮𑐶𑐎𑐵 𑐰 𑑔 𑐳𑐫 𑑖𑑐 𑐐𑐹 𑐐𑐵𑐄𑑃𑐥𑐵𑐮𑐶𑐎𑐵𑐫𑐵 𑐫𑐵𑐣𑐵𑑅 𑐩𑐸𑐎𑑂𑐎𑑄 𑑖 𑐴𑐖𑐵𑐬 𑑗 𑐳𑐫 𑑔𑑓 𑐐𑐹 𑐰𑐜𑐵𑐟 𑐡𑐸 𑑋 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐣𑐶𑐬𑑂𑐰𑐵𑐔𑐣𑐥𑐵𑐏𑐾𑑄 𑐥𑑂𑐬𑐩𑐸𑐏, 𑐄𑐥𑐥𑑂𑐬𑐩𑐸𑐏, 𑐰𑐜𑐵𑐢𑑂𑐫𑐎𑑂𑐲 𑐰 𑐰𑐜𑐵𑐳𑐡𑐳𑑂𑐫𑐟 𑐫𑐵𑐣𑐵𑑅 𑑓𑑕 𑐴𑐖𑐵𑐬 𑑒 𑐳𑐫 𑑒𑑑 𑐖𑐣𑐥𑑂𑐬𑐟𑐶𑐣𑐶𑐢𑐶 𑐣𑐶𑐬𑑂𑐰𑐵𑐔𑐶𑐟 𑐖𑐸𑐂 𑑋 𑑓𑑕 𑐴𑐖𑐵𑐬𑐳𑐶𑐧𑐾𑑄 𑐀𑐥𑑂𑐰𑑅 𑐣𑐶𑐬𑑂𑐰𑐵𑐔𑐶𑐟 𑐖𑐸𑐂𑐐𑐸 𑐀𑐰𑐳𑑂𑐠𑐵𑐫𑑂 𑐐𑐸𑐮𑐶 𑐡𑐮𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐮 𑐄𑐮𑐶 𑐴𑐾 𑐐𑐸𑐣𑐵 𑐀𑐥𑑂𑐰𑑅 𑐄𑐩𑑂𑐩𑐾𑐡𑐰𑐵𑐬 𑐖𑐸𑐂 𑑋

𑐳𑑂𑐰𑐟𑐣𑑂𑐟𑑂𑐬 𑐎𑐠𑑄 𑐄𑐩𑑂𑐩𑐾𑐡𑐰𑐵𑐬 𑐖𑐸𑐂𑐥𑐶𑑄 𑐣𑑄 𑐡𑐂 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐮𑐵 𑐮𑐏𑐩𑑂𑐴𑐳𑐶𑐧𑐾𑑄 𑐀𑐥𑑂𑐰𑑅 𑐮𑐵 𑐄𑐩𑑂𑐩𑐾𑐡𑐰𑐵𑐬 𑐴𑐾 𑐡𑐂𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐠𑐸𑐮𑐶𑐩𑐕𑐶 𑐥𑐡𑐫𑐵 𑐣𑐶𑑄𑐟𑐶𑑄 𑐔𑐸𑐣𑐵𑐰 𑐖𑐸𑐂𑐐𑐸 𑐀𑐰𑐳𑑂𑐠𑐵𑐫𑑂 𑐠𑑅𑐮𑐵𑑅𑐩𑑂𑐴, 𑐩𑑂𑐴𑐳𑑂𑐫𑐹𑐩𑑂𑐴, 𑐥𑐵𑐳𑐵𑐥𑐶𑑄 𑐧𑐵𑐫𑑂 𑐕𑐸𑑄 𑐣𑑄 𑐎𑐠𑑄𑐫𑐵 𑐳𑑂𑐰𑐵𑐥𑐹 𑐡𑐸𑐩𑑂𑐴 𑐕𑐩𑑂𑐴 𑐎𑐶 𑐕𑐩𑑂𑐴 𑐮𑐵 𑐄𑐩𑑂𑐩𑐾𑐡𑐰𑐵𑐬 𑐮𑐵 𑐖𑐸 𑐴𑐾 𑐖𑐸𑐂 𑑋 𑐄𑐎𑐶𑑄 𑐁𑑅 𑐔𑐸𑐣𑐵𑐰𑐫𑐵 𑐣𑐶𑐟𑐶𑑄 𑐣𑑀𑐩𑐶𑐣𑐾𑐳𑐣 𑐡𑐬𑑂𑐟𑐵 𑐖𑐸𑐂 𑐢𑐸𑐳𑐵𑑄𑐣𑐶𑐳𑐾𑑄 𑐫𑑅𑐳𑐵𑑄 𑐩𑐫𑑅𑐳𑐵𑑄 𑐕𑐾𑑃𑐫𑑂 𑐕𑐾𑑃𑐫𑑂 𑐄𑐩𑑂𑐩𑐾𑐡𑐰𑐵𑐬𑐫𑐵 𑐧𑐵𑐬𑐾, 𑐔𑐸𑐣𑐵𑐰𑐫𑐵 𑐧𑐵𑐬𑐾 𑐣𑐵𑐥𑑄 𑐳𑐸𑐫𑐵𑐟 𑐨𑑀𑐚 𑐟𑐫𑐾𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐳𑐴𑐮𑐴 𑐖𑐸𑐂 𑐏𑑃 𑐖𑐸𑐂 𑑋 𑐥𑐳𑐮𑐫𑑂 𑐰𑑄𑐳𑐵𑑄, 𑐮𑑃𑐫𑑂 𑐰𑑄𑐳𑐵𑑄, 𑐖𑑂𑐫𑐵𑐎𑐸𑐠𑐶𑐂 𑐔𑑂𑐰𑑄𑐳𑐵𑑄, 𑐐𑐵𑐜𑐷𑐂 𑐰𑑄𑐳𑐵𑑄 𑐣𑑂𑐴𑑂𑐫𑐵𑐠𑐵𑐫𑑂 𑐔𑑂𑐰𑑄𑐳𑐵𑑄 𑐣𑑄 𑐔𑐸𑐣𑐵𑐰𑐫𑐵 𑐴𑐾 𑐏𑑃 𑐖𑐸𑐂𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐡𑐸 𑑋

𑐳𑑂𑐠𑐵𑐣𑐷𑐫 𑐟𑐴𑐫𑐵𑐟 𑐳𑐬𑐎𑐵𑐬𑐫𑐵 𑐩𑐵𑐣𑑂𑐫𑐟𑐵 𑐧𑐶𑐂𑐐𑐸 𑐖𑑂𑐫𑐵 𑐖𑐹𑐳𑐵𑑄 𑐣𑑄 𑐏𑐵𑐳 𑐴𑐾 𑐢𑐵𑐫𑐾𑐐𑐸 𑐏𑑅𑐳𑐵 𑐀𑐥𑑂𑐰𑑅 𑐫𑐵𑐣𑐵𑑅 𑐖𑐣𑐥𑑂𑐬𑐟𑐶𑐣𑐶𑐢𑐶𑐟𑐫𑑂𑐳𑑄 𑐠𑑅𑐥𑐶𑑄 𑐳𑐬𑐎𑐵𑐬𑐫𑑂 𑐡𑐸 𑐢𑐎𑐵𑑅 𑐩𑐴𑐳𑐸𑐳 𑐫𑐵𑐣𑐵𑑅 𑐖𑑂𑐫𑐵 𑐫𑐵𑑅𑐐𑐸 𑐏𑐣𑐾𑐩𑐡𑐸 𑑋 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐫𑐵𑐟𑐫𑑂𑐎𑐾 𑐠𑑅𑐐𑐸 𑐣𑐶𑐱𑑂𑐔𑐶𑐟 𑐑𑐾𑐬𑐵𑐫𑑂 𑐡𑐸𑐣𑐾 𑐔𑑂𑐰𑐣𑐵𑑅 𑐎𑐵𑐣𑐸𑐣 𑐡𑐫𑐾𑐎𑐾𑐐𑐸 𑐀𑐢𑐶𑐎𑐵𑐬 𑐡𑐸, 𑐣𑑂𑐫𑐵𑐫 𑐳𑐩𑑂𑐥𑐵𑐡𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐣𑑂𑐫𑐵𑐫𑐷𑐎 𑐳𑐩𑐶𑐟𑐶 𑐡𑐸 𑐀𑐮𑐾 𑐰𑐶𑐢𑐾𑐫𑐎 𑐫𑑄𑐎𑐵𑑅 𑐥𑐵𑐬𑐶𑐟 𑐫𑐵𑐣𑐵𑑅 𑐎𑐵𑐣𑐸𑐣 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐟𑐎𑑄 𑐩𑐳𑐶𑐄 𑑋 𑐄𑐎𑐶𑑄 𑐫𑐎𑑂𑐰 𑐴𑐾 𑐖𑑂𑐫𑐵 𑐎𑐵𑐬𑑂𑐫𑐰𑐶𑐢𑐶 𑐖𑐎 𑐡𑐫𑐾𑐎𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐾𑐫𑐬 𑐄𑐥𑐩𑐾𑐫𑐬 𑐰 𑐎𑐵𑐣𑐸𑐣 𑐣𑐵𑐥 𑐳𑑂𑐰𑐵𑐥𑐹 𑐡𑐸𑐥𑐶𑑄𑐳𑑄 𑐳𑐶𑐄𑐳𑐵𑑄 𑐣𑑄 𑐰𑐜𑐵𑐀𑐢𑑂𑐫𑐎𑑂𑐲𑐣𑐶𑐳𑐾𑑄 𑐰𑐜𑐵 𑐳𑐡𑐳𑑂𑐫𑐟𑐫𑑂𑐳𑑄 𑐀𑐥𑑂𑐰𑑅 𑐫𑐵𑐣𑐵𑑅 𑐎𑐵𑐣𑐸𑐣 𑐐𑐠𑐾 𑐫𑐵𑐣𑐵𑑅 𑐡𑐫𑐾𑐎𑐷 ? 𑐎𑐵𑐣𑐸𑐣 𑐡𑐫𑐾𑐎𑐾𑐐𑐸 𑐥𑑂𑐬𑐎𑑂𑐬𑐶𑐫𑐵 𑐕𑐸 𑐏𑑅 ? 𑐎𑐵𑐣𑐸𑐣 𑐡𑐫𑐾𑐎𑐾 𑐕𑐵𑐫𑐾 𑐩𑐵𑑅𑐐𑐸 𑐢𑐎𑐵𑑅 𑐟𑐎𑑄 𑐩𑐳𑐶𑐄 𑐄𑐎𑐶𑑄 𑐀𑐥𑑂𑐰𑑅 𑐫𑐵𑐣𑐵𑑅 𑐖𑑂𑐫𑐵 𑐎𑐵𑐬𑑂𑐫𑐰𑐶𑐢𑐶 𑐡𑐫𑐾𑐎𑐵𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐎𑐵𑐬𑑂𑐫𑐰𑐶𑐢𑐶 𑐡𑐫𑐾𑐎𑐵𑑅 𑐖𑑂𑐫𑐵 𑐫𑐵𑐫𑐾𑐧𑐮𑐫𑑂 𑐀𑑅𑐥𑐸𑐐𑐸 𑐀𑐮𑐾 𑐠𑑅𑐥𑐶𑑄𑐟 𑐖𑑂𑐫𑐵𑐕𑐶𑑄𑐐𑐸 𑐣𑐵𑐥𑑄 𑐠𑑅𑐥𑐶𑐣𑐶 𑐮𑐶𑐎𑑂𑐎 𑐮𑐵𑑅𑐥𑐶𑑄 𑐩𑐣𑐹𑐟𑐫𑑂𑐟 𑐖𑑂𑐫𑐵 𑐧𑐶𑐂 𑐡𑐂𑐐𑐸 𑐖𑐸𑐫𑐵𑑅 𑐀𑐖𑑂𑐫𑐵𑑅𑐐𑐸 𑐮𑑃𑐥𑐸 𑐣𑐵𑐮𑐵𑑅 𑐖𑐣𑐥𑑂𑐬𑐟𑐶𑐣𑐶𑐢𑐶𑐟 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐖𑐣𑐥𑑂𑐬𑐟𑐶𑐣𑐶𑐢𑐶𑐟 𑐟𑐎𑑄 𑐳𑑂𑐠𑐵𑐣𑐷𑐫 𑐟𑐴 𑐢𑐫𑐵𑐐𑐸 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐢𑐫𑐵𑐐𑐸 𑐩𑐴𑐳𑐸𑐳 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐩𑐡𑐸 𑑋 𑐖𑐣𑐟𑐵𑑄 𑐮𑐵 𑐗𑐣𑑂 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐢𑐎𑐵𑑅 𑐠𑐸𑐂𑐎𑐵𑐔𑑂𑐰𑑄𑐐𑐸 𑐴𑐾 𑐩𑐡𑐸 𑑋 𑐠𑑂𑐰 𑐣𑑂𑐫𑐵𑐡𑑃𑐫𑐵 𑐎𑐵𑐬𑑂𑐫𑐎𑐵𑐮𑐫𑑂 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐥𑐵𑐏𑐾𑑄 𑐠𑑅𑐥𑐶𑑄 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐏𑑅 𑐀𑐮𑐾 𑐖𑐣𑐟𑐵𑐫𑐵𑐟 𑐩𑐵𑑅𑐐𑐸 𑐎𑐵𑐣𑐸𑐣 𑐴𑐫𑐵𑑅 𑐖𑑂𑐫𑐵 𑐫𑐵𑐫𑐾𑐦𑐸 𑐢𑐎𑐵𑑅 𑐠𑐸𑐂𑐎𑐾𑐐𑐸 𑐖𑑂𑐫𑐵 𑐣𑑄 𑐩𑐫𑐵𑑅, 𑐀𑐖𑑂𑐫𑐵𑑅𑐐𑐸 𑐨𑐵𑐰𑐣𑐵 𑐎𑐠𑑄 𑐏𑐵𑐳 𑐴𑐾 𑐣𑑂𑐴𑑂𑐫𑐵𑑅𑐰𑑄𑐐𑐸 𑐏𑐣𑐾𑐩𑐡𑐸 𑑋

𑐠𑑁𑑄 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐔𑐸𑐣𑐵𑐰 𑐖𑐹𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐩𑑂𑐴𑑀𑐟𑐶𑑄 𑐣𑑄 𑐳𑑂𑐠𑐵𑐣𑐷𑐫 𑐟𑐴 𑐢𑐫𑐵𑐐𑐸 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐏𑑅, 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑑄 𑐎𑐵𑐣𑐸𑐣 𑐴𑐫𑐵𑑅 𑐖𑑂𑐫𑐵 𑐫𑐵𑐫𑐾𑐩𑐵𑑅, 𑐎𑐵𑐣𑐸𑐣 𑐴𑐫𑐾𑐐𑐸 𑐀𑐢𑐶𑐎𑐵𑐬 𑐄𑐩𑐶𑐎𑐾 𑐡𑐸, 𑐎𑐵𑐣𑐸𑐣 𑐴𑐫𑐵𑑅 𑐖𑑂𑐫𑐵 𑐫𑐵𑐟 𑐢𑐵𑑅𑐳𑐵 𑐄𑐎𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐂𑐟 𑐀𑑅𑐥𑐸𑐂 𑐩𑐏𑐸𑐳𑐵 𑐖𑐣𑐥𑑂𑐬𑐟𑐶𑐣𑐶𑐢𑐶𑐫𑐵 𑐂𑐔𑑂𑐕𑐵 𑐎𑐠𑑄 𑐖𑐎 𑐖𑑂𑐫𑐵 𑐖𑐹𑐐𑐸 𑐖𑐸𑐂𑐦𑐸 𑐢𑐎𑐵𑑅 𑐠𑐸𑐂𑐎𑐾𑐐𑐸 𑐀𑐨𑐶𑐫𑐵𑐣 𑐁𑐩 𑐳𑐔𑐾𑐟 𑐣𑐵𑐐𑐬𑐶𑐎𑐟𑐫𑑂𑐳𑑄 𑐫𑐵𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋

𑐠𑐸𑐐𑐸𑐳𑐷𑐫𑐵 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐔𑐸𑐣𑐵𑐰 𑐣𑑂𑐴𑐵𑐥𑐵𑐫𑐵 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐔𑐸𑐣𑐵𑐰𑐳𑐶𑐧𑐾𑑄 𑐩𑐵𑐴𑑀𑐮 𑐨𑐶𑐣𑑂𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸𑐳𑐷 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐔𑐸𑐣𑐵𑐰𑐫𑑂 𑐡𑐮𑐟𑐫𑑂𑐐𑐸 𑐡𑐠𑐸𑐂 𑐩𑑀𑐬𑑂𑐔𑐵𑐧𑐣𑑂𑐡𑐷 𑐫𑐵𑐣𑐵 𑐰𑐣𑐾𑐐𑐸 𑐀𑐬𑑂𑐠𑐵𑐟 𑐐𑐛𑐧𑐣𑑂𑐢𑐣 𑐡𑐫𑐾𑐎𑐵𑑅 𑐟𑐵𑐮𑐩𑐾𑐮 𑐫𑐵𑐫𑐾𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐡𑐮𑐟 𑐟𑐵𑐮𑐩𑐾𑐮 𑐫𑐵𑐣𑐵 𑐰𑐣𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐢𑐫𑐵𑐐𑐸 𑐕𑐐𑐹 𑐎𑐠𑑄 𑐡𑐮𑐟𑐥𑑂𑐬𑐟𑐶 𑐖𑐣𑐟𑐵𑐟𑐫𑑂𑐳𑑄 𑐏𑐵𑐳 𑐴𑐾 𑐢𑑂𑐫𑐵𑐣 𑐧𑐶𑐂𑐐𑐸 𑐩𑐡𑐸, 𑐡𑐮𑐟 𑐖𑐣𑐟𑐵𑐫𑑂 𑐎𑐩𑐖𑑀𑐬 𑐖𑐸𑐫𑐵𑐰𑑄𑐐𑐸 𑐢𑐎𑐵𑑅 𑐳𑑂𑐥𑐲𑑂𑐚 𑐠𑐸𑐂𑐎𑐾𑐦𑐂 𑑋 𑐠𑐸𑐐𑐸𑐳𑐷 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐰𑐬𑑂𑐟𑐩𑐵𑐣 𑐡𑐾𑐄𑐰𑐵 𑐳𑐬𑐎𑐵𑐬𑐫𑐵 𑐳𑐟𑑂𑐟𑐵𑐳𑐵𑐗𑐾𑐡𑐵𑐬𑐷 𑐡𑐮𑐟𑐫𑑂𑐳𑑄 𑐐𑐛𑐧𑐣𑑂𑐢𑐣 𑐫𑐵𑐣𑐵𑑅 𑐔𑐸𑐣𑐵𑐰 𑐮𑑂𑐰𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑐟 𑑋 𑐄𑐎𑐶𑐫𑐵𑐟 𑐎𑐫𑐵𑑅 𑐊𑐩𑐵𑐮𑐾𑐫𑐵 𑐣𑐾𑐟𑐵𑐟𑐫𑑂𑐳𑑄 𑐀𑐣𑐾𑐎 𑐎𑐠𑑄𑐫𑐵 𑐚𑐶𑐥𑑂𑐥𑐞𑐷 𑐫𑐵𑐟 𑑋

𑐣𑑂𑐫𑐵𑐐𑐹 𑐡𑐮 𑐕𑐠𑐵𑐫𑑂 𑐔𑑂𑐰𑑄𑐳𑐵𑑄 𑐊𑐩𑐵𑐮𑐾 𑐴𑐾 𑐖𑐣𑐟𑐵𑐫𑐵 𑐡𑐠𑐸𑐂 𑐮𑑀𑐎𑐥𑑂𑐬𑐶𑐫 𑐖𑐹𑐐𑐸 𑐰 𑐠𑑅𑐥𑐶𑑄 𑐴𑐾 𑐟𑑂𑐫𑐵𑐂 𑐢𑐎𑐵𑑅 𑐳𑐵𑐬𑑂𑐰𑐖𑐣𑐶𑐎 𑐬𑐸𑐥𑑄 𑐟𑐎𑑄 𑐣𑑂𑐰𑐰𑐵𑐣𑐵𑐡𑐶𑐮 𑑋 𑐀𑐧𑐮𑐾 𑐳𑑂𑐰𑐫𑐾𑐧𑐮𑐫𑑂 𑐊𑐩𑐵𑐮𑐾𑑄 𑐮𑐵 𑐩𑐾𑐩𑐾𑐐𑐸 𑐡𑐮𑐮𑐶𑐳𑐾 𑐐𑐸𑐐𑐸𑑄 𑐣𑑄 𑐴𑐵𑐮𑐟𑐫𑑂 𑐟𑐵𑐮𑐩𑐾𑐮 𑐫𑐵𑐣𑐵 𑐰𑐣𑐷𑐩𑐏𑐸 𑐢𑐎𑐵𑑅 𑐩𑐣𑐹𑐟𑐫𑑂𑐳𑑄 𑐟𑐵𑐫𑐾𑐎𑐹𑐐𑐸 𑐏𑑅 𑐟𑐬 𑐔𑐸𑐣𑐵𑐰 𑐐𑐸𑐮𑐶 𑐐𑐸𑐮𑐶 𑐮𑐶𑐎𑑂𑐎 𑐮𑐵𑐣𑐵𑐰𑐮 𑐄𑐮𑐶 𑐄𑐮𑐶 𑐴𑐾 𑐊𑐩𑐵𑐮𑐾𑑄 𑐣𑑄 𑐟𑐵𑐮𑐩𑐾𑐮 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐐𑐺𑐴𑐎𑐵𑐬𑑂𑐫 𑐫𑐵𑐫𑐾𑐐𑐸 𑐣𑐵𑐥𑑄 𑐡𑐮𑐟𑐮𑐶𑐳𑐾 𑐳𑐴𑐩𑐟𑐶 𑐫𑐵𑐫𑐾𑐐𑐸 𑐖𑑂𑐫𑐵 𑐟𑐎𑑄 𑐫𑐵𑐣𑐵𑐴𑑅𑐐𑐸 𑐡𑐸 𑑋

𑐳𑐟𑑂𑐟𑐵 𑐐𑐛𑐧𑐣𑑂𑐢𑐣 𑐡𑐮 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳, 𑐣𑐾𑐥𑐵𑐮 𑐎𑐩𑑂𑐫𑐸𑐣𑐶𑐲𑑂𑐚 𑐥𑐵𑐬𑑂𑐚𑐷 (𑐩𑐵𑐌𑐰𑐵𑐡𑐷 𑐎𑐾𑐣𑑂𑐡𑑂𑐬), 𑐣𑐾𑐥𑐵𑐮 𑐎𑐩𑑂𑐫𑐸𑐣𑐶𑐲𑑂𑐚 𑐥𑐵𑐬𑑂𑐚𑐷 (𑐊𑐎𑐷𑐎𑐺𑐟 𑐳𑐩𑐵𑐖𑐰𑐵𑐡𑐷), 𑐖𑐣𑐟𑐵 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷 𑐣𑐾𑐥𑐵𑐮 𑐰 𑐬𑐵𑐲𑑂𑐚𑑂𑐬𑐶𑐫 𑐖𑐣𑐩𑑀𑐬𑑂𑐔𑐵𑐫𑐵 𑐡𑐠𑐸𑐂 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐔𑐸𑐣𑐵𑐰 𑐟𑐵𑐮𑐩𑐾𑐮 𑐫𑐵𑐣𑐵 𑐰𑐣𑐾𑐐𑐸 𑐣𑐶𑑄𑐟𑐶𑑄 𑐐𑐺𑐴𑐎𑐵𑐬𑑂𑐫 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐮𑐶𑐩𑐕𑐶 𑐡𑐮𑐟 𑐦𑐸𑐎𑑂𑐎 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐟𑐵𑐮𑐩𑐾𑐮 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐀𑑅𑐥𑐸𑐐𑐸 𑐰𑐶𑐲𑐫 𑐥𑐎𑑂𑐎𑐵𑑄 𑐩𑐏𑐸 𑑋 𑐳𑑂𑐠𑐵𑐣𑐷𑐫 𑐎𑐵𑐬𑑂𑐫𑐎𑐬𑑂𑐟𑐵𑐟 𑐕𑐥𑑂𑐥𑑃 𑐖𑐸𑐫𑐵𑑅 𑐕𑐩𑑂𑐴𑐾𑐳𑑂𑐫𑐵𑑄 𑐩𑐾𑐐𑐸 𑐥𑐵𑐬𑑂𑐚𑐷𑐫𑐵 𑐄𑐩𑑂𑐩𑐾𑐡𑐰𑐵𑐬𑐫𑐵𑐟 𑐟𑑂𑐫𑐵𑐎𑐾𑐐𑐸 𑐣𑐶𑑄𑐟𑐶𑑄 𑐖𑑂𑐫𑐵 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐄𑐮𑐶 𑐀𑑅𑐥𑐸𑐐𑐸 𑐢𑐵𑑅𑐳𑐵 𑐀𑐰𑐱𑑂𑐫 𑐣𑑄 𑐩𑐏𑐸 𑑋 𑐄𑐎𑐶𑑄 𑐐𑐛𑐧𑐣𑑂𑐢𑐣𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐾𑐟𑐺𑐟𑑂𑐰𑑄 𑐐𑐸𑐮𑐶 𑐟𑐎 𑐟𑐵𑐮𑐩𑐾𑐮 𑐫𑐵𑐫𑐾𑐦𑐂𑐐𑐸 𑐏𑑅 ? 𑐁𑑅 𑐠𑐟𑑂𑐠𑐾𑑄 𑐢𑐵𑐫𑐾𑐟 𑐠𑐵𑐎𑐸 𑑋 𑐄𑐩𑑂𑐩𑐾𑐡𑐰𑐵𑐬𑐷 𑐡𑐬𑑂𑐟𑐵 𑐖𑐸𑐂 𑐣𑑂𑐴𑑂𑐫𑑅 𑐖𑐎 𑐩𑐏𑐸 𑐡𑐬𑑂𑐟𑐵 𑐮𑐶𑐥𑐵 𑐣𑑄 𑐠𑐸𑐐𑐸 𑐎𑐠𑑄 𑐟𑐵𑐮𑐩𑐾𑐮𑐵𑐫𑐵 𑐎𑑂𑐬𑐩 𑐖𑐵𑐬𑐷 𑐴𑐾 𑐖𑐸𑐫𑐵𑐔𑑂𑐰𑐣𑐷𑐐𑐸 𑐀𑐰𑐳𑑂𑐠𑐵 𑐰𑐂 𑑋 𑐠𑑂𑐰 𑐖𑑂𑐫𑐵 𑐡𑐮𑐫𑐵 𑐣𑐾𑐟𑐺𑐟𑑂𑐰𑐫𑐵𑐟 𑐄𑐮𑐶 𑐀𑑅𑐥𑐸𑐐𑐸 𑐰𑐶𑐲𑐫 𑐢𑐵𑑅𑐳𑐵 𑐥𑐎𑑂𑐎𑐵𑑄 𑐩𑐏𑐸 𑑋

𑐄𑐏𑐾 𑐊𑐩𑐵𑐮𑐾𑑄 𑐣𑑄 𑐠𑑅 𑐎𑐩𑐖𑑀𑐬 𑐖𑐸𑐂𑐐𑐸 𑐀𑐰𑐳𑑂𑐠𑐵 𑐏𑐣𑐾 𑐡𑐫𑐾𑐰𑑄 𑐔𑐶𑐔𑐷𑐢𑑄𑐐𑐸 𑐬𑐵𑐖𑐣𑐷𑐟𑐶𑐎 𑐡𑐮𑐟𑐮𑐶𑐳𑐾 𑐟𑐵𑐮𑐩𑐾𑐮 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐐𑐸𑐮𑐶𑑄 𑐐𑐸𑐮𑐶𑑄 𑐡𑐮𑐮𑐶𑐳𑐾 𑐢𑐵𑑅𑐳𑐵 𑐮𑐶𑐏𑐶𑐟 𑐬𑐸𑐥𑑄 𑐴𑐾 𑐳𑐴𑐩𑐟𑐶 𑐟𑐎𑑄 𑐫𑐵𑐫𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐊𑐩𑐵𑐮𑐾𑑄 𑐎𑐩𑐮 𑐠𑐵𑐥𑐵𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐬𑐵𑐲𑑂𑐚𑑂𑐬𑐶𑐫 𑐥𑑂𑐬𑐖𑐵𑐟𑐣𑑂𑐟𑑂𑐬 𑐥𑐵𑐬𑑂𑐚𑐷 𑐣𑐾𑐥𑐵𑐮 𑐊𑐎𑐣𑐵𑐠 𑐝𑐎𑐵𑐮𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐥𑐬𑐶𑐰𑐵𑐬 𑐡𑐮𑐮𑐶𑐳𑐾 𑐟𑐵𑐮𑐩𑐾𑐮 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑐴𑐩𑐟𑐶 𑐟𑐎𑑄 𑐫𑐵𑐫𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐠𑐾 𑐴𑐾 𑐩𑐴𑐣𑑂𑐠 𑐛𑐵𑐎𑐸𑐬𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷, 𑐳𑐶𑐎𑐾 𑐬𑐵𑐄𑐟𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐖𑐣𑐩𑐟 𑐥𑐵𑐬𑑂𑐚𑐷, 𑐣𑐾𑐟𑑂𑐬𑐰𑐶𑐎𑑂𑐬𑐩 𑐔𑐣𑑂𑐡𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐣𑐾𑐥𑐵𑐮 𑐎𑐩𑑂𑐫𑐸𑐣𑐶𑐲𑑂𑐚 𑐥𑐵𑐬𑑂𑐚𑐷, 𑐣𑐵𑐬𑐵𑐫𑐞𑐩𑐵𑐣 𑐰𑐶𑐖𑐸𑐎𑑂𑐕𑐾𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐣𑐾𑐥𑐵𑐮 𑐩𑐖𑐡𑐸𑐬 𑐎𑐶𑐳𑐵𑐣 𑐥𑐵𑐬𑑂𑐚𑐷 𑐰 𑐴𑐺𑐡𑐫𑐾𑐱 𑐟𑑂𑐬𑐶𑐥𑐵𑐛𑐷𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐖𑐣𑐟𑐵 𑐥𑑂𑐬𑐐𑐟𑐶𑐱𑐷𑐮 𑐥𑐵𑐬𑑂𑐚𑐷𑐣𑐶𑐳𑐾𑑄 𑐎𑐵𑑄𑐐𑑂𑐬𑐾𑐳𑐫𑐵 𑐀𑐳𑐣𑑂𑐟𑐸𑐲𑑂𑐚 𑐥𑐎𑑂𑐲 𑐐𑑀𑐰𑐶𑐣𑑂𑐡𑐬𑐵𑐖 𑐖𑑀𑐱𑐷 𑐥𑐸𑐔𑑅𑐮𑐶𑐳𑐾 𑐣𑑄 𑐕𑐸𑑄 𑐣 𑐕𑐸𑑄 𑐎𑐠𑑄 𑐎𑑂𑐲𑐾𑐟𑑂𑐬𑐐𑐟 𑐬𑐸𑐥𑑄 𑐖𑐹𑐳𑐵𑑄 𑐟𑐵𑐮𑐩𑐾𑐮 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐠𑐸𑐮𑐶𑐩𑐕𑐶 𑐡𑐮𑐟𑐫𑑂𑐟 𑐟𑐵𑐮𑐩𑐾𑐮 𑐫𑐵𑐣𑐵 𑐰𑐣𑐾𑐐𑐸 𑐊𑐩𑐵𑐮𑐾𑐫𑐵 𑐣𑐶𑑄𑐟𑐶𑑄 𑐣𑑄 𑐄𑐮𑐶 𑐀𑑅𑐥𑐸𑐐𑐸 𑐰𑐶𑐲𑐫 𑐢𑐵𑑅𑐳𑐵 𑐥𑐎𑑂𑐎𑐵𑑄 𑐩𑐏𑐸 𑑋 𑐀𑐫𑑂𑐣𑑄 𑐎𑐸𑐟𑑅 𑐢𑐵𑑅𑐳𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐳𑑂𑐠𑐵𑐣𑐷𑐫 𑐟𑐴𑐫𑐵 𑐠𑐸𑐐𑐸𑐳𑐷𑐫𑐵 𑐠𑐸𑐐𑐸 𑐎𑐠𑑄 𑐖𑐹𑐰𑐣𑐵𑐔𑑂𑐰𑑄𑐐𑐸 𑐔𑐸𑐣𑐵𑐰𑐫𑐵𑐟 𑐳𑑂𑐰𑐮 𑐢𑐵𑑅𑐳𑐵 𑐳𑐟𑑂𑐟𑐵𑐥𑐎𑑂𑐲 𑐐𑐛𑐧𑐣𑑂𑐢𑐣 𑐨𑐬𑑂𑐳𑐾𑐳 𑐊𑐩𑐵𑐮𑐾𑐫𑐵 𑐐𑐛𑐧𑐣𑑂𑐢𑐣 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐀𑐥𑑂𑐰𑑅 𑐡𑐸 𑑋 𑐀𑐠𑐾 𑐐𑐛𑐧𑐣𑑂𑐢𑐣 𑐫𑐵𑐣𑐵𑑅 𑐔𑐸𑐣𑐵𑐰 𑐮𑑂𑐰𑐵𑐫𑐾𑐩𑐵𑑅𑐐𑐸 𑐢𑐂𑐐𑐸 𑐖𑐣𑐟𑐵𑐫𑐵 𑐡𑐠𑐸𑐂 𑐡𑐮𑐟 𑐎𑐩𑐖𑑀𑐬 𑐖𑐹𑐐𑐸𑐮𑐶𑑄 𑐴𑐾 𑐏𑑅 𑐢𑐎𑐵𑑅 𑐢𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS