Read news in NepalBhasa text-- www.hamroschool.com BACK 𑐫𑐵𑐎𑑅𑐔𑐵 𑐩𑐾𑐫𑐬 𑐟𑑂𑐫𑐵𑐎𑐵𑑅 𑐕𑐸 𑐖𑐸𑐂 ? – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐵𑐎𑑅𑐔𑐵 𑐩𑐾𑐫𑐬 𑐟𑑂𑐫𑐵𑐎𑐵𑑅 𑐕𑐸 𑐖𑐸𑐂 ?

𑐩𑐣𑑀𑐰𑐿𑐖𑑂𑐘𑐵𑐣𑐶𑐎𑐟𑐫𑑂 𑐎𑐠𑑄 𑐩𑐣𑐹𑐟 𑐡𑐠𑐸𑐂 𑐣𑐶𑐬𑐵𑐱𑐵 𑐧𑑂𑐰𑐣𑐷𑐐𑐸 𑐕𑐐𑐹 𑐥𑑂𑐬𑐩𑐸𑐏 𑐎𑐵𑐬𑐞 𑐢𑐫𑐵𑐐𑐸 𑐂𑐔𑑂𑐕𑐵 𑐎𑐠𑑄 𑐖𑑂𑐫𑐵 𑐩𑐖𑐸𑐂𑐐𑐸𑐮𑐶𑑄 𑐏𑑅 𑑋 𑐩𑐣𑐹𑐟𑐫𑑂𑐳𑑄 𑐠𑑅𑐐𑐸 𑐖𑐷𑐰𑐣𑐫𑑂 𑐥𑑂𑐬𑐵𑐥𑑂𑐟 𑐫𑐵𑐫𑐾𑐦𑐂 𑐢𑐎𑐵𑑅 𑐀𑐥𑐾𑐎𑑂𑐲𑐵 𑐫𑐵𑐣𑐵𑐟𑑅𑐐𑐸 𑐕𑐸𑑄 𑐣𑑄 𑐏𑑃 𑐥𑐹𑐩𑐰𑑄𑐳𑐵 𑐳𑑂𑐰𑐨𑐵𑐰𑐶𑐎 𑐬𑐸𑐥𑑄 𑐄𑐩𑑂𑐴 𑐰𑑂𑐫𑐎𑑂𑐟𑐶𑐫𑐵𑐎𑐾 𑐟𑐷𑐰𑑂𑐬 𑐬𑐸𑐥𑑄 𑐣𑐶𑐬𑐵𑐱𑐵 𑐧𑑂𑐰𑐮𑐣𑐷 𑑋 𑐠𑑂𑐰 𑐩𑐵𑐣𑐰𑐷𑐫 𑐳𑑂𑐰𑐨𑐵𑐰 𑐏𑑅 𑑋 𑐀𑐖𑑂𑐫𑐵𑑅𑐐𑐸 𑐣𑐶𑐬𑐵𑐱𑐵𑐥𑐵𑐏𑐾𑑄 𑐁𑐥𑐵𑐮𑑄 𑐮𑑃𑐥𑐸𑐟 𑐥𑐶𑐴𑐵𑑄 𑐰𑐫𑐾𑐦𑐸 𑑋 𑐟𑐬 𑐀𑐥𑐾𑐎𑑂𑐲𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐩𑐾𑐥𑐶𑐣𑐶𑐐𑐸 𑐥𑐵𑐏𑐾𑑄 𑐥𑑂𑐬𑐵𑐥𑑂𑐟 𑐩𑐖𑐸𑐂𑐐𑐸 𑐏𑑅𑐳𑐵 𑐀𑐖𑑂𑐫𑐵𑑅𑐐𑐸 𑐁𑐖𑑂𑐖𑐸 𑐥𑐹𑐰𑑄𑐎𑐾𑐐𑐸 𑐣𑐶𑑄𑐟𑐶𑑄 𑐠𑑅 𑐳𑑂𑐰𑐫𑐩 𑐣𑑂𑐴𑑂𑐫𑑅𑐣𑐾 𑐰𑐣𑐾𑐐𑐸 𑐩𑐵𑐣𑐰𑐷𑐫 𑐳𑑂𑐰𑐨𑐵𑐰𑐫𑐵 𑐩𑐾𑐐𑐸 𑐥𑐎𑑂𑐲 𑐏𑑅 𑑋

𑐩𑐵𑐣𑐰 𑐩𑐣𑑀𑐰𑐶𑐖𑑂𑐘𑐵𑐣 𑐎𑐠𑑄 𑐠𑑂𑐰 𑐕𑐐𑐹 𑐳𑐵𑐩𑐵𑐣𑑂𑐫 𑐥𑑂𑐬𑐎𑑂𑐬𑐶𑐫𑐵 𑐏𑑅 𑑋 𑐴𑐮𑐶𑑄𑐣𑑂𑐫𑑄𑐎𑐫𑐵 𑐬𑐵𑐖𑐣𑐷𑐟𑐶𑐫𑐵 𑐰𑐶𑐱𑑂𑐮𑐾𑐲𑐞 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐠𑐖𑑂𑐫𑐵𑑅𑐐𑐸 𑐩𑐣𑑀𑐰𑐶𑐖𑑂𑐘𑐵𑐣 𑐏𑐣𑐾𑐡𑐫𑐵𑐔𑑂𑐰𑐣𑐷 𑑋 𑐣𑐾𑐥𑐵𑑅𑐫𑐵 𑐳𑐣𑑂𑐡𑐬𑑂𑐨𑐫𑑂 𑐣𑑄 𑐠𑑅𑐥𑐶𑑄𑐳𑑄 𑐫𑐵𑐣𑐵𑐐𑐸 𑐀𑐥𑐾𑐎𑑂𑐲𑐵 𑐥𑐹𑐩𑐰𑑄𑐐𑐸 𑐴𑐸𑐣𑐶𑑄 𑐠𑑅𑐴𑐾 𑐬𑐵𑐖𑐣𑐷𑐟𑐶𑐂 𑐰𑐫𑐾𑐐𑐸 𑐟𑐷𑐰𑑂𑐬 𑐁𑑄𑐎𑐵𑐎𑑂𑐲𑐵 𑐣𑐾𑐥𑐵𑑅𑐩𑐶𑐟𑐫𑑂𑐎𑐾 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐁𑑅 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐳𑑂𑐠𑐵𑐣𑐷𑐫 𑐣𑐶𑐬𑑂𑐰𑐵𑐔𑐣𑐫𑐵 𑐳𑐣𑑂𑐡𑐬𑑂𑐨𑐫𑑂 𑐣𑑄 𑐁𑐥𑐵𑐮𑑄 𑐣𑑂𑐴𑐹𑐐𑐸 𑐏𑑂𑐰𑐵𑑅𑐥𑐵 𑐠𑑂𑐰𑐴𑐾 𑐴𑐸𑐣𑐶𑑄 𑐥𑐶𑐮𑐹𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐄𑐩𑑂𑐩𑐾𑐡𑐰𑐵𑐬𑐷 𑐡𑐬𑑂𑐟𑐵 𑐫𑐵𑐫𑐾𑐐𑐸 𑐣𑑂𑐴𑐶 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐄𑐩𑑂𑐩𑐾𑐡𑐰𑐵𑐬 𑐖𑐸𑐂𑐥𑐶𑐣𑐶 𑐮𑑂𑐫𑐵𑑅 𑐣𑑄 𑐀𑐥𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐳𑑄𑐑𑐷𑐫 𑐬𑐵𑐖𑐢𑐵𑐣𑐷 𑐖𑐸𑐫𑐵𑐔𑑂𑐰𑑄𑐐𑐸 𑐫𑐾𑑃 𑐄𑐎𑐷 𑐣𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬𑐫𑐵 𑐣𑐶𑑄𑐟𑐶𑑄 𑐁𑐥𑐵𑐮𑑄 𑐩𑐣𑐹𑐟𑐫𑑂𑐳𑑄 𑐠𑑅𑐐𑐸 𑐟𑐷𑐰𑑂𑐬 𑐔𑐵𑐴𑐣𑐵 𑐥𑐶𑐟𑐧𑑂𑐰𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮𑐫𑑂 𑐡𑐫𑐵𑐔𑑂𑐰𑑄𑐐𑐸 𑐩𑐹𑐮𑐢𑐵𑐬𑐫𑐵 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐥𑐵𑐏𑐾𑑄 𑐟𑑅𑐎𑑂𑐰𑑅 𑐣𑐶𑐬𑐵𑐱𑐵𑐫𑐵 𑐨𑐵𑐐𑐾𑐡𑐵𑐬 𑐖𑐸𑐂𑐢𑐸𑑄𑐎𑐵𑑅 𑐕𑐸𑑄 𑐥𑐸𑐔𑑅𑐟𑐫𑑂𑐳𑑄 𑐰𑐿𑐎𑐮𑑂𑐥𑐶𑐎 𑐱𑐎𑑂𑐟𑐶𑐫𑐵 𑐁𑐰𑐱𑑂𑐫𑐎𑐟𑐵𑐫𑐵 𑐀𑐣𑐸𑐨𑐰 𑐫𑐵𑑅𑐐𑐸 𑐏𑑅 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐨𑐵𑐬𑐟𑐫𑑂 𑐀𑐬𑑂𑐰𑐶𑐣𑑂𑐡𑑂𑐬 𑐎𑐾𑐖𑐬𑐷𑐰𑐵𑐮𑐫𑐵 𑐄𑐡𑐫 𑐮𑐶𑐥𑐵 𑐣𑐾𑐥𑐵𑐮𑐫𑑂 𑐣𑑄 𑐰 𑐴𑐾 𑐩𑑀𑐜𑐮𑐫𑑂 𑐰𑐣𑐾𑐐𑐸 𑐎𑐸𑐟𑑅 𑐖𑐹𑐐𑐸 𑐏𑑅 𑑋

𑐠𑑁𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐳𑐣𑑂𑐡𑐬𑑂𑐨𑐫𑑂 𑐣𑑄 𑐎𑐾𑐖𑐬𑐷𑐰𑐵𑐮 𑐠𑐾𑑄 𑐰𑐶𑐎𑐮𑑂𑐥 𑐩𑐵𑑅𑐐𑐸 𑐳𑑅 𑐠𑑂𑐰𑐫𑐵 𑐩𑐔𑑂𑐰𑑄𑐐𑐸 𑐩𑐏𑐸 𑑋 𑐟𑐬 𑐐𑐸𑐮𑐶 𑐣𑑄 𑐀𑐖𑑂𑐫𑐵𑑅𑐐𑐸 𑐳𑑅 𑐠𑑂𑐰𑐫𑐾𑐎𑐵𑑅 𑐬𑐵𑐖𑐣𑐷𑐟𑐶 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐀𑐖𑑂𑐫𑐵𑑅𑐥𑐶𑑄𑐳𑑄 𑐎𑐾𑐖𑐬𑐷𑐰𑐵𑐮𑐫𑐵 𑐥𑐮𑐵𑑅 𑐮𑐷𑐦𑐫𑐵𑐔𑑂𑐰𑑄𑐐𑐸 𑐢𑐵𑑅𑐳𑐵 𑐩𑐡𑐸 𑑋 𑐎𑐾𑐖𑐬𑐷𑐰𑐵𑐮𑑄 𑐣𑐾𑐟𑐺𑐟𑑂𑐰 𑐫𑐵𑑅𑐐𑐸 𑐁𑐩 𑐁𑐡𑐩𑐷 𑐥𑐵𑐬𑑂𑐚𑐷𑑄 𑐡𑐶𑐮𑑂𑐮𑐷 𑐬𑐵𑐖𑑂𑐫𑐫𑐵 𑐔𑐸𑐣𑐵𑐰𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐳𑐣𑑂 𑑒𑑐𑑑𑑓𑐫𑑂 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋

𑐩𑐸𑐎𑑂𑐎𑑄 𑑗𑑐𑐐𑐹 𑐳𑐷𑐚𑐫𑑂 𑑒𑑘𑐐𑐹 𑐳𑐷𑐚 𑐟𑑂𑐫𑐵𑐎𑐵𑑅 𑐳𑐬𑐎𑐵𑐬𑐫𑐵 𑐣𑐾𑐟𑐺𑐟𑑂𑐰 𑐫𑐵𑐫𑐾𑐐𑐸 𑐴𑑂𑐰𑐟𑐵𑑅 𑐮𑐵 𑐔𑐹𑐮𑐵𑐟 𑐟𑐬 𑐥𑐬𑑂𑐫𑐵𑐥𑑂𑐟 𑐧𑐴𑐸𑐩𑐟 𑐩𑐡𑐸𑐐𑐸𑐮𑐶𑑄 𑐳𑐟𑑂𑐟𑐵 𑐫𑐵𑐟𑑂𑐬𑐵 𑐳𑐸𑐏𑐡 𑐩𑐖𑐸𑐮 𑑋 𑐧𑐮𑑂𑐮 𑑒𑑐𑑑𑑕𑐫𑐵 𑐔𑐸𑐣𑐵𑐰𑐫𑑂 𑑖𑑗𑐐𑐹 𑐳𑐷𑐚 𑐟𑑂𑐫𑐵𑐎𑐾𑐢𑐸𑑄𑐎𑐵𑑅 𑐖𑐎 𑐎𑐾𑐖𑐬𑐷𑐰𑐵𑐮𑐫𑐵𑐟 𑐳𑐬𑐎𑐵𑐬 𑐳𑑄𑐔𑐵𑐮𑐣 𑐫𑐵𑐣𑐵𑑅 𑐠𑑅𑐐𑐸 𑐖𑑂𑐫𑐵𑐏𑑃 𑐎𑑂𑐫𑐣𑐾𑐐𑐸 𑐴𑑂𑐰𑐟𑐵𑑅 𑐔𑐹𑐮𑐵𑐟 𑑋

𑐠𑐣 𑐔𑑂𑐰𑑄𑐥𑐶𑑄𑐳𑑄 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐥𑐎𑑂𑐲 𑐠𑑂𑐰𑐴𑐾 𑐏𑑅 𑑋 𑐎𑐾𑐖𑐬𑐷𑐰𑐵𑐮 𑐕𑐩𑑂𑐴 𑐰𑑂𑐫𑐎𑑂𑐟𑐶 𑐖𑐎 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐖𑐸𑐂 𑐢𑐎𑐵𑑅 𑐕𑐐𑐹 𑐖𑐎 𑐣𑐶𑐬𑑂𑐰𑐵𑐔𑐣 𑐎𑑂𑐲𑐾𑐟𑑂𑐬𑑄 𑐔𑐸𑐣𑐵𑐰 𑐡𑑄𑐐𑐸 𑐩𑐏𑐸 𑑋 𑐰𑐫𑑂𑐎𑐮𑑄 𑐧𑐵𑑄𑐮𑐵𑐎 𑐠𑐹 𑐎𑐷 𑐬𑐵𑐖𑑂𑐫 𑐳𑑄𑐔𑐵𑐮𑐣 𑐫𑐵𑐫𑐾𑐟 𑐧𑐴𑐸𑐩𑐟 𑐁𑐰𑐱𑑂𑐫𑐎 𑐖𑐹 𑑋 𑐰𑐴𑐾 𑐎𑐠𑑄 𑐦𑐸𑐎𑑂𑐎 𑐣𑐶𑐬𑑂𑐰𑐵𑐔𑐟 𑐎𑑂𑐲𑐾𑐟𑑂𑐬𑐫𑑂 𑐔𑐸𑐣𑐵𑐰 𑐮𑑂𑐰𑐫𑐾𑐩𑐵𑑅 𑑋 𑐀𑐮𑐾 𑐰𑐴𑐾 𑐎𑐠𑑄 𑐠𑑅𑐐𑐸 𑐧𑐮𑑂𑐮𑐵𑑅𑐐𑐸 𑐄𑐥𑐳𑑂𑐠𑐶𑐟𑐶 𑐳𑑄𑐳𑐡𑐫𑑂 𑐡𑐫𑐾𑐩𑐵𑑅, 𑐩𑐏𑐸𑐳𑐵 𑐖𑑂𑐫𑐵 𑐫𑐵𑐫𑐾𑐦𑐂𑐩𑐏𑐸 𑑋

𑐣𑐾𑐥𑐵𑑅𑐫𑐵 𑐳𑑂𑐠𑐵𑐣𑐷𑐫 𑐣𑐶𑐬𑑂𑐰𑐵𑐔𑐣𑐫𑐵 𑐳𑐣𑑂𑐡𑐬𑑂𑐨𑐫𑑂 𑐣𑑄 𑐠𑑂𑐰 𑐏𑑃 𑐩𑐣𑐣𑑂 𑐫𑐵𑐫𑐾 𑐀𑐰𑐱𑑂𑐫𑐎 𑐖𑐹 𑑋 𑐕𑐵𑐫𑑂 𑐢𑐵𑑅𑐳𑐵 𑐩𑐾𑐫𑐬 𑐕𑐐𑐹 𑐥𑐡 𑐟𑑂𑐫𑐵𑐫𑐾𑐰𑑄 𑐄𑐩𑑂𑐴 𑐰𑑂𑐫𑐎𑑂𑐟𑐶𑑄 𑐕𑐸𑑄 𑐣𑑂𑐴𑐹𑐐𑐸 𑐖𑑂𑐫𑐵 𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑑋 𑐣𑐶𑐫𑐩𑐶𑐟 𑐖𑑂𑐫𑐵𑐏𑑃 𑐧𑐵𑐴𑐾𑐎 𑐩𑐾𑐐𑐸 𑐕𑐸𑑄 𑐣𑑄 𑐫𑑀𑐖𑐣 𑐮𑐵𑐐𑐹 𑐫𑐵𑐫𑐾𑐐𑐸 𑐳𑐩𑑂𑐧𑐣𑑂𑐢𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐧𑑀𑐬𑑂𑐜𑑄 𑐥𑐵𑐬𑐶𑐟 𑐫𑐵𑐫𑐾𑐩𑐵𑑅 𑑋 𑐱𑐴𑐬 𑐰𑐶𑐎𑐵𑐳 𑐫𑐵𑐫𑐾𑐟 𑐁𑐰𑐱𑑂𑐫𑐎 𑐖𑐹𑐐𑐸 𑐧𑐖𑐾𑐚 𑐟𑐎𑑄 𑐀𑐖𑑂𑐫𑐵𑑅𑐐𑐸 𑐧𑑀𑐬𑑂𑐜𑐫𑐵 𑐩𑐸𑑃𑐖𑑂𑐫𑐵𑐥𑐵𑐏𑐾𑑄 𑐥𑐵𑐬𑐶𑐟 𑐖𑐸𑐂𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸 𑑋 𑐀𑐮𑐾 𑐀𑐖𑑂𑐫𑐵𑑅𑐐𑐸 𑐧𑑀𑐬𑑂𑐜𑐫𑑂 𑐳𑐩𑑂𑐧𑐣𑑂𑐢𑐶𑐟 𑐣𑐐𑐬𑐥𑐵𑐮𑐶𑐎𑐵𑐫𑐵 𑐰𑐜𑐵𑐫𑐵 𑐀𑐢𑑂𑐫𑐎𑑂𑐲𑐟 𑐡𑐸𑐖𑑅 𑐎𑐠𑑄 𑐡𑐂 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐳𑐣𑑂𑐡𑐬𑑂𑐨𑐫𑑂 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐠𑐣 𑑓𑑒 𑐐𑐹 𑐰𑐜𑐵 𑐡𑐸 𑑋 𑐟𑐬 𑐰𑐜𑐵𑐳𑑂𑐟𑐬𑐫𑑂 𑐕𑐩𑑂𑐴 𑐣𑑄 𑐰𑑂𑐫𑐎𑑂𑐟𑐶 𑐄𑐩𑑂𑐩𑐾𑐡𑐰𑐵𑐬 𑐥𑑂𑐬𑐟𑐶𑐣𑐶𑐢𑐶 𑐎𑐠𑑄 𑐩𑐠𑐣𑐷𑐐𑐸 𑐡𑐮𑐫𑐵 𑐳𑑂𑐰𑐟𑐣𑑂𑐟𑑂𑐬 𑐄𑐩𑑂𑐩𑐾𑐡𑐰𑐵𑐬𑐟𑐫𑑂𑐳𑑄 𑐕𑐎𑑂𑐰𑐮𑑄 𑐩𑐾𑐫𑐬𑐫𑑂 𑐖𑐎 𑐩𑐶𑐏𑐵 𑐟𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐥𑑂𑐫𑑄𑐎 𑐩𑐾𑐫𑐬 𑐥𑐡𑐫𑑂 𑐖𑐎 𑐁𑐎𑐵𑑄𑐎𑑂𑐲𑐷 𑐖𑐹𑐥𑐶𑑄𑐳𑑄 𑐫𑐡𑐶 𑐎𑐣𑑂𑐴𑐫𑑂 𑐟𑑂𑐫𑐵𑐣𑐵𑐰𑑄𑐳𑐵 𑐖𑑂𑐫𑐵 𑐫𑐵𑐫𑐾𑐐𑐸 𑐮𑐎𑐳 𑐡𑐂 𑐮𑐵 ? 𑐩𑐾𑐫𑐬 𑐥𑐡𑐫𑐵 𑐮𑐶𑐄𑐮𑐶𑐄 𑐱𑐴𑐬 𑐥𑐬𑐶𑐰𑐬𑑂𑐟𑐣𑐫𑐵 𑐣𑐵𑐬𑐵 𑐖𑑂𑐰𑐣𑐵𑑅 𑐧𑑂𑐰𑐵𑑃𑐫𑑂 𑐰𑐣𑐾𑐐𑐸, 𑐟𑐬 𑐰𑐴𑐾 𑐱𑐴𑐬 𑐥𑐬𑐶𑐰𑐬𑑂𑐟𑐣 𑐫𑐵𑐫𑐾𑐟 𑐁𑐰𑐱𑑂𑐫𑐎 𑐖𑐹𑐐𑐸 𑐫𑑀𑐖𑐣𑐵 𑐡𑐫𑐾𑐎𑐾𑐐𑐸 𑐠𑐵𑐫𑑂 𑐀𑐬𑑂𑐠𑐵𑐟 𑐣𑐐𑐬𑐥𑐵𑐮𑐶𑐎𑐵𑐫𑐵 𑐧𑑀𑐬𑑂𑐜𑐫𑐵𑐟 𑐧𑐾𑐰𑐵𑐳𑑂𑐟𑐵 𑐫𑐵𑐫𑐾𑐐𑐸 ? 𑐠𑑂𑐰 𑐐𑐸𑐮𑐶 𑐟𑐎 𑐥𑐵𑐫𑑂𑐕𑐶𑐐𑐸 𑐏𑑃 𑐏𑑅 ? 𑐗𑐷𑐳𑑄 𑐰𑑄𑐐𑐸 𑐣𑑂𑐫𑐵𑐡𑑃𑐫𑐵𑐟 𑐖𑐎 𑐮𑐶𑐳𑐵 𑐎𑐵𑐫𑐾𑐐𑐸 𑐏𑑅𑐳𑐵 𑐩𑐾𑐫𑐬 𑐥𑐡𑐫𑑂 𑐕𑐐𑐹 𑐡𑐮𑐫𑐵 𑐄𑐩𑑂𑐩𑐾𑐡𑐰𑐵𑐬 𑐀𑐮𑐾 𑐣𑐐𑐬𑐥𑐵𑐮𑐶𑐎𑐵 𑐧𑑀𑐬𑑂𑐜𑐫𑑂 𑐩𑐾𑐐𑐸 𑐴𑐾 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐧𑐴𑐸𑐩𑐟 𑐡𑐸𑐐𑐸𑐮𑐶𑑄 𑐐𑐸𑐮𑐶𑐏𑐾 𑐩𑐾𑐫𑐬𑐟𑐫𑑂𑐟 𑐰𑐶𑐥𑐎𑑂𑐲𑐷 𑐡𑐮𑐟 𑐣𑐵𑐥 𑐳𑐩𑑂𑐗𑑁𑐟𑐵 𑐩𑐫𑐵𑐫𑐾𑐎𑑄 𑐧𑐖𑐾𑐚 𑐟𑐎𑑄 𑐥𑐵𑐬𑐶𑐟 𑐫𑐵𑐫𑐾𑐟 𑐠𑐵𑐎𑐹𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐏𑑅 𑑋 𑐎𑐣𑑂𑐴𑐫𑑂 𑐳𑑂𑐰𑐨𑐵𑐰𑐶𑐎 𑐬𑐸𑐥𑑄 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵 𑐴𑐵𑐣𑑄 𑐩𑐰𑐂 𑐢𑐎𑐵𑑅 𑐳𑐸𑐣𑐵𑑄 𑐢𑐵𑐫𑐾𑐐𑐸 𑐠𑐵𑐫𑑂 𑐩𑐡𑐸 𑑋

𑐠𑑁𑑄 𑐬𑐵𑐖𑐣𑐷𑐟𑐶𑐎 𑐡𑐮 𑐣𑐵𑐥𑐫𑐵 𑐟𑐷𑐰𑑂𑐬 𑐀𑐳𑐣𑑂𑐟𑐸𑐲𑑂𑐚𑐶𑐫𑐵 𑐎𑐵𑐬𑐞𑑄 𑐖𑐸𑐂𑐩𑐵 𑐰𑐵 𑐠𑑅𑐠𑑅𑐐𑐸 𑐰𑑂𑐫𑐎𑑂𑐟𑐶𑐐𑐟 𑐩𑐴𑐟𑑂𑐰𑐎𑐵𑑄𑐎𑑂𑐲𑐵𑐫𑐵 𑐎𑐵𑐬𑐞𑑄 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐣𑐶𑐬𑑂𑐰𑐵𑐔𑐣𑐫𑑂 𑐄𑐩𑑂𑐩𑐾𑐡𑐰𑐵𑐬 𑐖𑐸𑐂𑐥𑐶𑐣𑐶 𑐡𑐠𑐸𑐂 𑐣𑑂𑐴𑐹𑐎𑐠𑑄𑐫𑐵 𑐁𑐎𑐬𑑂𑐲𑐞 𑐧𑑂𑐰𑐮𑑄𑐐𑐸 𑐡𑐸 𑑋 𑐬𑐵𑐖𑐣𑐷𑐟𑐶𑐎 𑐎𑑂𑐲𑐾𑐟𑑂𑐬𑐫𑑂 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵, 𑐳𑐎𑑂𑐲𑐩 𑐰 𑐂𑐩𑐵𑐣𑑂𑐡𑐵𑐬 𑐰𑐂𑐐𑐸 𑐢𑐫𑐵𑐐𑐸 𑐳𑐎𑐳𑐶𑐫𑐵𑑄 𑐣𑐶𑑄𑐟𑐶𑑄 𑐕𑐐𑐹 𑐳𑐎𑐵𑐬𑐵𑐟𑑂𑐩𑐎 𑐏𑑃 𑐏𑑅 𑑋 𑐠𑐖𑑂𑐫𑐵𑑅𑐐𑐸 𑐄𑐬𑑂𑐖𑐵𑐫𑐵𑐟 𑐥𑐵𑐫𑑂𑐕𑐶𑐐𑐸 𑐎𑐠𑑄 𑐕𑑂𑐫𑐮𑐾𑐦𑐸𑐳𑐵 𑐱𑐴𑐬 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐧𑐵𑑄𑐮𑐵𑑅𑐐𑐸 𑐮𑐶𑐔𑑂𑐰𑑅 𑐰𑐫𑐾𑐦𑐸 𑑋 𑐟𑐬 𑐂𑐔𑑂𑐕𑐵 𑐰 𑐄𑐬𑑂𑐖𑐵𑐫𑐵𑐟 𑐥𑐵𑐫𑑂𑐕𑐶 𑐎𑐠𑑄 𑐩𑐵𑐬𑑂𑐐𑐣𑐶𑐬𑑂𑐡𑐾𑐱𑐣 𑐩𑐡𑐂𑐐𑐸 𑐏𑑅𑐳𑐵 𑐴𑐵𑐣𑑄 𑐣𑐶𑐬𑐵𑐱𑐵 𑐧𑑂𑐰𑐮𑐣𑐷𑐐𑐸 𑐀𑐰𑐳𑑂𑐠𑐵 𑐡𑐸 𑑋

𑐗𑐷 𑐡𑐠𑐸𑐂 𑐠𑑁𑑄 𑐱𑐴𑐬 𑐥𑐬𑐶𑐰𑐬𑑂𑐟𑐣 𑐫𑐵𑐫𑐾𑐐𑐸 𑐂𑐔𑑂𑐕𑐵 𑐳𑐴𑐶𑐟 𑐩𑐿𑐡𑐵𑐣𑐫𑑂 𑐫𑐎𑑂𑐰 𑐣𑑂𑐴𑐹𑐥𑐶𑑄 𑐎𑐸𑐴𑐵𑑄𑐰𑑅𑐐𑐸 𑐡𑐸 𑑋 𑐟𑐬 𑐡𑐾𑐱𑐫𑑂 𑐰𑐶𑐡𑑂𑐫𑐩𑐵𑐣 𑐎𑐵𑐣𑐹𑐣𑐷 𑐰𑑂𑐫𑐰𑐳𑑂𑐠𑐵 𑐎𑐠𑑄 𑐕𑐩𑑂𑐴 𑐖𑐎 𑐰𑑂𑐫𑐎𑑂𑐟𑐶 𑐎𑐵𑐬𑑂𑐫𑐎𑐵𑐬𑐷 𑐥𑐡𑐫𑑂 𑐰𑐣𑐵𑑅 𑐖𑑂𑐫𑐵 𑐫𑐵𑐫𑐾𑐐𑐸 𑐳𑐩𑑂𑐨𑐵𑐰𑐣𑐵 𑐟𑐳𑐎𑑄 𑐩𑑂𑐴𑑀 𑐖𑐎 𑐡𑐸 𑑋 𑐐𑐠𑐾 𑐳𑑄𑐳𑐡𑐫𑑂 𑐥𑐬𑑂𑐫𑐵𑐥𑑂𑐟 𑐧𑐴𑐸𑐩𑐟 𑐩𑐡𑐫𑐾𑐰𑑄 ‘𑐴𑑄𑐐 𑐥𑐬𑑂𑐮𑐶𑐫𑐵𑐩𑐾𑐣𑑂𑐚’ 𑐖𑐸𑐂 𑑋 𑐀𑐠𑐾𑐴𑐾 𑐣𑐐𑐬𑐥𑐵𑐮𑐶𑐎𑐵𑐫𑐵 𑐧𑑀𑐬𑑂𑐜𑐫𑑂 𑐠𑑅𑐐𑐸 𑐥𑐎𑑂𑐲𑐫𑑂 𑐳𑑂𑐰𑐫𑐵𑑄 𑐰𑐶𑐥𑐎𑑂𑐲𑐫𑑂 𑐀𑐥𑑂𑐰𑑅 𑐡𑐸𑐖𑑅 𑐡𑐫𑐾𑐰𑑄 𑐀𑐣 ‘𑐴𑑄𑐐 𑐣𑐐𑐬𑐥𑐵𑐮𑐶𑐎𑐵’ 𑐖𑐸𑐂𑐐𑐸 𑐀𑐰𑐳𑑂𑐠𑐵 𑐰𑐫𑐾𑐦𑐸 𑑋 𑐠𑐖𑑂𑐫𑐵𑑅𑐐𑐸 𑐂𑐮𑐫𑑂 𑐎𑐵𑐬𑑂𑐫𑐎𑐵𑐬𑐷𑑄 𑐖𑐎 𑐂𑐔𑑂𑐕𑐵𑐱𑐎𑑂𑐟𑐶 𑐎𑑂𑐫𑐣𑐾𑐰𑑄 𑐣𑑂𑐴𑐹𑐐𑐸 𑐧𑐶𑐔𑐵𑑅 𑐎𑐠𑑄 𑐖𑑂𑐫𑐵 𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐡𑐂𑐩𑐏𑐸 𑑋

𑐕𑐏𑐾 𑐠𑐖𑑂𑐫𑐵𑑅𑐐𑐸 𑐎𑐵𑐣𑐹𑐣𑐷 𑐀𑐜𑑂𑐔𑐣 𑐩𑐾𑐏𑐾 𑐣𑐾𑐥𑐵𑑅𑐫𑐵 𑐎𑐬𑑂𑐩𑐔𑐵𑐬𑐷𑐟𑐣𑑂𑐟𑑂𑐬𑐫𑐵𑐥𑐵𑐏𑐾𑑄 𑐖𑑂𑐫𑐵 𑐎𑐵𑐫𑐾𑐩𑐵𑑅𑐐𑐸 𑑋 𑐠𑐸𑐎𑐷𑐫𑐵 𑐣𑐶𑑄𑐟𑐶𑑄 𑐎𑐵𑐬𑑂𑐫𑐎𑐵𑐬𑐷 ‘𑐥𑐵𑐰𑐬𑐦𑐸𑐮’ 𑐖𑐸𑐂 𑐴𑐾 𑐩𑐵𑑅 𑑋 𑐀𑐠𑐾 𑐢𑐫𑐵𑐐𑐸 𑐎𑐩𑐳𑐾 𑐎𑐩 𑐧𑑀𑐬𑑂𑐜𑐫𑑂 𑐠𑑅𑐐𑐸 𑐧𑐴𑐸𑐩𑐟 𑑋

𑐣𑑂𑐴𑐹𑐐𑐸 𑐧𑐶𑐔𑐵𑑅 𑐰 𑐖𑑀𑐱 𑐣𑐵𑐥𑑄 𑐬𑐵𑐖𑐣𑐷𑐟𑐶𑐂 𑐰𑐫𑐾𑐐𑐸 𑐕𑐐𑐹 𑐳𑐎𑐵𑐬𑐵𑐟𑑂𑐩𑐎 𑐥𑐮𑐵𑑅 𑐏𑑅𑐳𑐵𑑄 𑐠𑐣𑐫𑐵 𑐰𑑂𑐫𑐰𑐳𑑂𑐠𑐵 𑐎𑐠𑑄 𑐣𑑂𑐴𑑂𑐫𑐵𑑅𑐰𑐣𑐾𑐦𑑅𑐳𑐵 𑐖𑐎 𑐀𑐖𑑂𑐫𑐵𑑅𑐐𑐸 𑐧𑐶𑐔𑐵𑐮𑑄 𑐳𑐴𑐶 𑐮𑑃𑐥𑐸 𑐖𑑂𑐰𑐣𑐾𑐦𑐂 𑑋 𑐠𑑁𑑄 𑐁𑐥𑐵𑐮𑑄 𑐩𑐣𑐹𑐟𑐫𑑂𑐳𑑄 𑐩𑐾𑐫𑐬 𑐥𑐡𑐫𑑂 𑐠𑑅𑐐𑐸 𑐂𑐔𑑂𑐕𑐵 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑑂𑐎𑑅𑐥𑐶𑑄𑐳 𑐕𑐐𑐹 𑐱𑐎𑑂𑐟𑐶 𑐖𑐸𑐫𑐵𑑅 𑐰𑐜𑐵𑐳𑑂𑐟𑐬𑑄 𑐣𑐶𑐳𑐾𑑄 𑐴𑐶𑐄𑐥𑐵𑑅 𑐴𑐫𑐾𑐐𑐸 𑐎𑐸𑐟𑑅 𑐫𑐵𑑅𑐳𑐵 𑐎𑐣𑑂𑐴𑐫𑑂 𑐰𑐫𑑂𑐎𑑅𑐥𑐶𑑄𑐳𑑄 𑐧𑐶𑐔𑐵𑑅 𑐫𑐵𑑅 𑐎𑐠𑑄 𑐴𑐶𑐄𑐥𑐵𑑅 𑐢𑐵𑐠𑐾𑑄 𑐳𑐩𑑂𑐨𑐰 𑐖𑐸𑐂𑐦𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS