Read news in NepalBhasa text-- www.hamroschool.com BACK 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑑂 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂𑐟𑐣𑐫𑐵 𑐨𑐹𑐩𑐶𑐎𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑑂 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂𑐟𑐣𑐫𑐵 𑐨𑐹𑐩𑐶𑐎𑐵

𑐩𑐞𑐶𑐬𑐟𑑂𑐣 𑐱𑐵𑐎𑑂𑐫

𑐖𑑂𑐫𑐵𑐣𑐩𑐵𑐬𑐵 𑐮𑑂𑐰𑐫𑑂𑐫𑐵 𑐬𑐸𑐥𑐫𑑂 𑐴𑐮𑐶𑐩𑐫𑑂 𑐣𑑂𑐫𑐣𑐵𑐰𑑄𑐐𑐸 𑐎𑑀𑐨𑐶𑐜 𑑑𑑙 𑐀𑐬𑑂𑐠𑐵𑐟 𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐄𑐟𑑂𑐥𑐟𑑂𑐟𑐶 𑐰 𑐳𑑄𑐎𑑂𑐬𑐩𑐣 𑐐𑐠𑐾 𑐖𑐸𑐫𑐵𑑅 𑐖𑐸𑐮 𑐢𑐫𑐵𑐐𑐸𑐧𑐵𑐬𑐾 𑐰𑑂𑐫𑐵𑐥𑐎 𑐀𑐢𑑂𑐫𑐫𑐣, 𑐀𑐣𑐸𑐳𑐣𑑂𑐢𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐠𑑂𑐰 𑐴𑐾 𑐎𑐵𑐬𑐞𑑄 𑐖𑐹𑐐𑐸 𑐢𑐎𑐵𑑅 𑐫𑐎𑐶𑐣 𑐫𑐵𑐣𑐵𑑅 𑐢𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐰𑐿𑐖𑑂𑐘𑐵𑐣𑐶𑐎𑐟𑐫𑑂 𑐰𑐶𑐱𑑂𑐰𑐵𑐳 𑐡𑐸 𑐎𑐶 𑐠𑑂𑐰 𑐨𑐵𑐂𑐬𑐳𑐫𑐵 𑐄𑐟𑑂𑐥𑐟𑑂𑐟𑐶 𑐔𑐶𑐎𑑄𑐮𑐵𑐥𑐵𑐥𑐵𑐏𑐾𑑄 𑐖𑐹𑐐𑐸 𑐏𑑅𑑋 𑐧𑐾𑐮𑐵𑐫𑐟𑐫𑐵 𑐎𑑂𑐫𑐵𑐩𑑂𑐧𑑂𑐬𑐶𑐖 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑂𑐫𑐵 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷 𑐀𑐢𑑂𑐫𑐫𑐣 𑐥𑐸𑐔𑑅𑐫𑐵 𑐩𑐸𑐏𑑂𑐫 𑐱𑑀𑐢𑐎𑐬𑑂𑐟𑐵 𑐜𑐵. 𑐬𑑀𑐰𑐬𑑂𑐚 𑐧𑐾𑐫𑐬𑑄 𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐳𑑄𑐎𑑂𑐬𑐩𑐞 𑐔𑐶𑐎𑑄𑐮𑐵𑐥𑐵𑐥𑐵𑐏𑐾𑑄 𑐖𑐹𑐐𑐸 𑐖𑐸𑐂 𑐢𑐫𑐵𑐐𑐸 𑐏𑑃𑐫𑑂 𑐰𑐶𑐱𑑂𑐰𑐵𑐳 𑐫𑐵𑐫𑐾𑐦𑐂𑐐𑐸𑐁𑐥𑐵𑐮𑑄 𑐁𑐢𑐵𑐬𑐟 𑐡𑐸 𑐢𑐫𑐵𑐡𑐷𑐐𑐸 𑐡𑐸 𑑋

𑐜𑐵. 𑐬𑑀𑐰𑐬𑑂𑐚 𑐧𑐾𑐫𑐬𑑄𑑄 𑐢𑐫𑐵𑐡𑐷𑐎𑐠𑑄 𑐎𑑀𑐬𑑀𑐣𑐵 ‘𑐖𑐸𑐣𑑀𑐚𑐶𑐎 𑐜𑐶𑐖𑐶𑐖’ 𑐖𑐹𑐐𑐸 𑐖𑐸𑐫𑐵𑑅 𑐠𑑂𑐰 𑐔𑐶𑐎𑑄𑐮𑐵𑐥𑐵𑑄 𑐥𑐱𑐸𑐥𑑄𑐎𑑂𑐲𑐷𑐟𑐫𑑂𑐟 𑐀𑐮𑐾 𑐥𑐱𑐸𑐥𑑄𑐎𑑂𑐲𑐷𑐥𑐵𑐏𑐾𑑄 𑐩𑐣𑐹𑐟𑐫𑑂𑐟 𑐳𑑄𑐎𑑂𑐬𑐩𑐞 𑐖𑐹𑐐𑐸 𑐖𑐸𑐂 𑐢𑐫𑐵𑐐𑐸 𑐀𑐣𑐸𑐳𑐣𑑂𑐢𑐵𑐣𑐫𑐵 𑐩𑐸𑐏𑑂𑐫 𑐰𑐶𑐲𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐔𑐶𑐎𑑄𑐮𑐵𑐥𑐵𑐫𑐵 𑐩𑑂𑐴𑐫𑑂 𑐳𑐕𑐶𑐐𑐹 𑐟𑐵𑐖𑐶𑑄 𑐩𑐮𑑂𑐫𑐵𑐎 𑐠𑐷𑐠𑐷 𑐎𑐠𑑄𑐫𑐵 𑐎𑑀𑐬𑑀𑐣𑐵 𑐨𑐵𑐃𑐬𑐳 𑐡𑐫𑐵𑐔𑑂𑐰𑐣𑐷𑐐𑐸 𑐥𑑂𑐬𑐩𑐵𑐞𑐶𑐟 𑐖𑐸𑐂𑐢𑐸𑑄𑐎𑐹𑑂𑐐𑐸 𑐡𑐸 𑑋 𑐐𑐸𑐎𑐷 𑐳𑐵𑐬𑑂𑐳 𑐎𑑀𑐨 𑑑, 𑐩𑐬𑑂𑐳 𑐎𑑀𑐨 𑐰 𑐂𑐧𑑀𑐮𑐵 𑐠𑐾𑑄 𑐖𑐵𑑅𑐐𑐸 𑐨𑐵𑐂𑐬𑐳𑐟 𑐣𑑄 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐜𑐵. 𑐬𑑀𑐰𑐬𑑂𑐚 𑐧𑐾𑐫𑐬𑑄 𑐴𑐵𑐣𑑄 𑐢𑐫𑐵𑐡𑐷𑐐𑐸 𑐡𑐸 𑐎𑐶 𑐎𑑀𑐬𑑀𑐣𑐵 𑐨𑐵𑐂𑐬𑐳 𑐩𑐴𑐵𑐩𑐵𑐬𑐷𑐫𑐵 𑐬𑐸𑐥𑐫𑑂 𑐴𑐮𑐶𑐩𑐫𑑂 𑐣𑑂𑐫𑐣𑐵𑐰𑑄𑐐𑐸𑐫𑐵 𑐮𑐶𑐄𑐣𑐾 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂𑐟𑐣𑐫𑐵 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐡𑐫𑐵𑐔𑑂𑐰𑐐𑐸 𑐏𑑃𑐫𑑂 𑐰𑐶𑐱𑑂𑐰𑐵𑐳 𑐫𑐵𑐫𑐾𑐦𑐸 𑑋 𑐀𑐢𑑂𑐫𑐫𑐣 𑐥𑐸𑐔𑑅𑐫𑐵 𑐀𑐣𑐸𑐳𑐣𑑂𑐢𑐵𑐣𑐎𑐬𑑂𑐟𑐵𑐟𑐫𑑂𑐳𑑄 𑐢𑐫𑐵𑐔𑑂𑐰𑑄𑐎𑐠𑑄 𑐰𑐶𑐱𑑂𑐰𑐰𑑂𑐫𑐵𑐥𑐷 𑐬𑐸𑐥𑐫𑑂 𑐏𑐣𑐾𑐡𑐸𑐐𑐸 𑐰𑐵𑐫𑐸𑐩𑐞𑑂𑐜𑐮𑐷𑐫 𑐟𑐵𑐥𑐩𑐵𑐣 𑐰𑐺𑐡𑑂𑐢𑐶𑑄 𑐫𑐵𑐣𑐵𑑅 𑐰𑑄𑐐𑐸 𑐳𑐕𑐶 𑐡𑑃𑐫𑐵 𑐡𑐸𑐣𑐾 𑐰𑐶𑐱𑑂𑐰𑐫𑑂 𑐰𑐣𑐳𑑂𑐥𑐟𑐶 𑐰 𑐰𑐣𑐖𑑄𑐐𑐮𑐫𑑂 𑐟𑑅𑐢𑑄𑐐𑐸 𑐴𑐶𑐄𑐥𑐵𑑅 𑐰𑑅𑐐𑐸 𑐡𑐸 𑑋 𑐰𑐵𑐫𑐸𑐩𑐞𑑂𑐜𑐮𑐷𑐫 𑐟𑐵𑐥𑐩𑐵𑐣 𑐰𑐺𑐡𑑂𑐢𑐶𑐫𑐵 𑐎𑐵𑐬𑐞𑑄 𑐰𑐣𑐖𑑄𑐐𑐮𑐫𑑂 𑐔𑑂𑐰𑐣𑐷𑐥𑐶𑑄 𑐥𑐱𑐸𑐥𑑄𑐎𑑂𑐲𑐷𑐟𑐫𑑂 𑐰𑐵𑐳 𑐳𑑂𑐠𑐵𑐣 𑐏𑑂𑐰𑐵𑐄𑑃𑐠𑐵𑐫𑑂 𑐥𑐵𑐏𑐾 𑐳𑐬𑐾 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐵𑐥𑑄 𑐩𑐵𑐣𑐰𑐷𑐫 𑐎𑐵𑐬𑐞𑑄 𑐖𑑄𑐐𑐮 𑐦𑐜𑐵𑐣𑐷 𑐰 𑐩𑐶𑑄 𑐣𑐫𑐵𑑅 𑐥𑐱𑐸𑐥𑐎𑑂𑐲𑐷𑐟𑐫𑑂 𑐰𑐵𑐳𑐳𑑂𑐠𑐵𑐣 𑐴𑐶𑐮𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐴𑐾 𑐎𑑂𑐬𑐩𑐫𑑂 𑐊𑐱𑐶𑐫𑐵 𑐩𑐴𑐵𑐡𑐾𑐱𑐫𑐵 𑐔𑐷𑐣𑐫𑐵 𑐡𑐎𑑂𑐲𑐶𑐞 𑐨𑐾𑐐 𑐰, 𑐰 𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐩𑑂𑐫𑐵𑐣𑐩𑐵𑐬 𑐰 𑐮𑐵𑐌𑐳𑐫𑐵 𑐏𑑂𑐰𑐵𑐟𑑂𑐟𑐸𑐐𑐸 𑐖𑑄𑐐𑐮 𑐠𑑁𑑄𑐎𑐣𑑂𑐴𑐫𑑂 𑐔𑐶𑐎𑑄𑐮𑐵𑐥𑐵𑐟 𑐔𑑂𑐰𑐣𑐷𑐐𑐸 𑐄𑐥𑐫𑐸𑐎𑑂𑐟 𑐰𑐵𑐳𑐳𑑂𑐠𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐀𑐣𑐸𑐳𑐣𑑂𑐢𑐵𑐣𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐴𑐾 𑐔𑐶𑐎𑑄𑐮𑐵𑐥𑐵𑐣𑐵𑐥 𑐳𑑄𑐳𑐬𑑂𑐐𑐫𑑂 𑐰𑑅𑐥𑐶𑑄 𑐥𑐱𑐸𑐥𑑄𑐎𑑂𑐲𑐷𑐟𑐫𑑂 𑐥𑐵𑐏𑐾𑑄 𑐩𑐣𑐹𑐟𑐫𑑂𑐟 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞 𑐖𑐹𑐐𑐸 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐢𑐫𑐵𑐔𑑂𑐰𑑄 𑐎𑐠𑑄 𑐕𑐏𑐾𑐬 𑐰𑐿𑐱𑑂𑐰𑐶𑐎 𑐟𑐵𑐥𑐩𑐵𑐣 𑐰𑐺𑐡𑑂𑐢𑐷 𑐖𑐸𑐫𑐵𑑅 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑐵 𑐨𑐫𑐵𑐰𑐴𑐳𑑂𑐠𑐶𑐟𑐶 𑐣𑑂𑐫𑐣𑐵𑐰𑑄𑐐𑐸 𑐏𑐣𑐾 𑐡𑐸𑐳𑐵 𑐩𑐾𑐏𑐾𑐬 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐰𑐵𑐫𑐸 𑐥𑑂𑐬𑐡𑐹𑐲𑐞 𑐰 𑐎𑐵𑐬𑑂𑐰𑐣 𑐄𑐟𑑂𑐳𑐬𑑂𑐖𑐣 𑐩𑐣𑐹𑐟𑐫𑑂 𑐳𑑂𑐰𑐵𑐳𑑂𑐠𑑂𑐫𑐫𑑂 𑐧𑐵𑑄𑐩𑐮𑐵𑐎𑑂𑐎 𑐮𑐶𑐔𑑂𑐰𑑅 𑐮𑐵𑐎𑐶𑐐𑐸𑐫𑐵 𑐎𑐵𑐬𑐞 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑐵 𑐂𑐮𑐫𑑂 𑐩𑐣𑐹𑐟𑐫𑑂𑐟 𑐱𑑂𑐰𑐵𑐳 𑐥𑑂𑐬𑐱𑑂𑐰𑐵𑐳𑐫𑐵 𑐳𑐩𑐳𑑂𑐫𑐵 𑐥𑐶𑐡𑐣𑐶𑐐𑐸 𑐳𑑂𑐰𑐵𑐨𑐵𑐰𑐶𑐎 𑐥𑑂𑐬𑐎𑑂𑐬𑐶𑐫𑐵 𑐏𑑅 𑑋 𑐟𑐬 𑐠𑑂𑐰 𑐴𑐾 𑐂𑐮𑐫𑑂 𑐰𑐵𑐫𑐸 𑐥𑑂𑐬𑐡𑐹𑐲𑐞𑑄 𑐱𑑂𑐰𑐵𑐳𑐥𑑂𑐬𑐱𑑂𑐰𑐵𑐳𑐫𑑂 𑐩𑐾𑐐𑐸 𑐳𑐩𑐳𑑂𑐫𑐵 𑐀𑐥𑑂𑐰𑐫𑐾𑐎𑐵 𑐧𑐶𑐄𑐐𑐸𑐮𑐶𑑄 𑐩𑐣𑐹𑐟𑐫𑑂𑐳𑑄 𑐀𑐎𑐵𑐮𑑄 𑐩𑐺𑐟𑑂𑐫𑐸 𑐦𑐫𑐾𑐩𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐩𑐾𑐬𑐶𑐎𑐵𑐫𑐵 ‘𑐎𑐾𑐬𑐷 𑐂𑐣𑑂𑐳𑑂𑐚𑐶𑐔𑑂𑐫𑐹𑐟 𑐀𑐦 𑐂𑐎𑑀 𑐳𑐶𑐳𑑂𑐚𑐩 𑐳𑑂𑐚𑐜𑐶𑐖’ 𑐣𑐵𑑄𑐫𑐵 𑐀𑐢𑑂𑐫𑐫𑐣 𑐳𑑄𑐳𑑂𑐠𑐵𑐣𑐫𑐵 𑐜𑐵. 𑐬𑐶𑐎 𑐌𑐲𑑂𑐚𑐦𑐶𑐮𑑂𑐜𑑄 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐮𑐶𑐳𑐾 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂𑐟𑐣 𑐰 𑐰𑐵𑐫𑐸 𑐥𑑂𑐬𑐡𑐹𑐲𑐞𑐫𑐵 𑐀𑐡𑑂𑐨𑐹𑐟 𑐳𑑂𑐰𑐵𑐥𑐹 𑐡𑐸𑐐𑐸 𑐩𑐴𑐟𑑂𑐰𑐥𑐹𑐬𑑂𑐞 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐠𑐸𑐎𑐶𑑄 𑐩𑐵𑐣𑐰 𑐖𑐷𑐰𑐣𑐫𑑂 𑐀𑐳𑑂𑐰𑐵𑐨𑐵𑐰𑐶𑐎 𑐬𑐸𑐥𑑄 𑐣𑐎𑐵𑐬𑐵𑐟𑑂𑐩𑐎 𑐥𑑂𑐬𑐨𑐵𑐰 𑐮𑐵𑐎𑐵𑐔𑑂𑐰𑑄𑐐𑐸 𑐳𑑂𑐥𑐲𑑂𑐚 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐠𑑂𑐰 𑐳𑑂𑐰𑐐𑐸𑐮𑐶𑑄 𑐥𑑂𑐬𑐎𑑀𑐥𑐟 𑐰𑐵𑐳𑑂𑐟𑐰𑐫𑑂 𑐰𑐵𑐟𑐵𑐰𑐬𑐞𑐷𑐫𑑂 𑐰𑐶𑐣𑐵𑐱 𑐠𑐾𑑄𑐖𑐵𑑅𑐐𑐸 𑐎𑑂𑐬𑐶𑐫𑐵𑐎𑐮𑐵𑐥𑐫𑐵 𑐮𑐶𑐔𑑂𑐰𑑅 𑐏𑑅, 𑐐𑐸𑐐𑐸 𑐠𑑂𑐰 𑐢𑐬𑐟𑐷𑐂 𑐩𑐵𑐣𑐰𑐖𑐷𑐰𑐣 𑐰𑐶𑐣𑐵𑐱𑐫𑐵 𑐀𑐳𑑂𑐟𑑂𑐬 𑐀𑐮𑐾 𑐣𑐬𑐳𑑄𑐴𑐵𑐬𑐫𑐵 𑐥𑑂𑐬𑐵𑐎𑐺𑐟𑐶𑐎 𑐖𑑂𑐫𑐵𑐨𑑅𑐫𑐵 𑐬𑐸𑐥𑐫𑑂 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐴𑐾 𑐴𑐸𑐣𑐶𑑄 𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐠𑑂𑐰𑑅𑐐𑐸 𑐳𑐮𑑄 𑐢𑐫𑐵𑐔𑑂𑐰𑑄𑐐𑐸 𑐡𑐸 𑐎𑐶 𑐠𑐷𑐠𑐷 𑐎𑐵𑐬𑐞𑑄 𑐖𑐹𑐐𑐸 𑐰𑐵𑐟𑐵𑐰𑐬𑐞𑐷𑐫 𑐰𑐶𑐣𑐵𑐱𑐫𑐵 𑐮𑐶𑐔𑑂𑐰𑐎𑐠𑑄 𑐏𑐣𑐾𑐡𑐸𑐐𑐸 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑑄 𑐩𑐣𑐹𑐟𑐫𑑂𑐟 𑐳𑐷 𑐩𑑂𑐰𑐵𑐂𑐟𑐎𑑄 𑐢𑐵𑐫𑐾𑐩𑐦𑐫𑐾𑐎 𑐐𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐵𑐧𑐷𑐦𑐸 𑐢𑐫𑐵𑐐𑐸 𑐥𑑂𑐬𑐲𑑂𑐚 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐵𑐟𑐵𑐰𑐬𑐞 𑐣𑐵𑐥 𑐳𑑂𑐰𑐵𑐥𑐸 𑐡𑐸𑐐𑐸 𑐠𑐷𑐠𑐷 𑐳𑑄𑐳𑑂𑐠𑐵 𑐰 𑐳𑐵𑐩𑐵𑐖𑐶𑐎 𑐀𑐨𑐶𑐫𑐣𑑂𑐟𑐵𑐟𑐫𑑂𑐳𑑄𑑄 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑐫𑐵𑐟 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂𑐟𑐣 𑐰 𑐰𑐵𑐟𑐵𑐰𑐬𑐞𑐷𑐫𑑂 𑐰𑐶𑐣𑐵𑐱𑐫𑐵 𑐮𑐶𑐔𑑂𑐰𑑅𑐎𑐠𑑄 𑐏𑐣𑐾 𑐡𑐸𑐐𑐸 𑐕𑐐𑐹 𑐥𑑂𑐬𑐵𑐬𑐩𑑂𑐨𑐶𑐎 𑐏𑑂𑐫𑐵𑐔𑑂𑐰𑑅 𑐢𑐎𑐵 𑐣𑑄 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑑄 𑐩𑐣𑐹𑐟 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂𑐟𑐣 𑐰 𑐰𑐵𑐟𑐵𑐰𑐬𑐞𑐷𑐫𑑂 𑐰𑐶𑐣𑐵𑐱𑐥𑑂𑐬𑐟𑐶 𑐴𑑀𑐱𑐶𑐫𑐵𑐬 𑐖𑐸𑐂𑐟 𑐏𑐧𑐬𑐡𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐳𑑂𑐥𑐲𑑂𑐚 𑐖𑐹 𑑋

𑐰𑐶𑐱𑑂𑐰𑐫𑑂 𑐏𑐣𑐾𑐡𑐫𑐵𑐔𑑂𑐰𑑄𑑄𑐐𑐸 𑐖𑐮𑐰𑐵𑐫𑐸 𑐥𑐬𑐶𑐰𑐬𑑂𑐟𑐣 𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐠𑐷𑐠𑐷 𑐳𑐩𑐳𑑂𑐫𑐵 𑐖𑑂𑐫𑑄𑐎𑐾𑐫𑐵 𑐣𑐶𑑄𑐟𑐶𑑄 𑑔𑑕 𑐡𑑃 𑐣𑑂𑐴𑑂𑐫𑑅 𑐴𑐾 𑐳𑐣𑑂 𑑑𑑙𑑗𑑗 𑐫𑑂 𑐎𑑂𑐫𑑀𑐚𑑀 𑐥𑑂𑐬𑑀𑐚𑑀𑐎𑐮 𑐣𑐵𑑄𑐫𑐵 𑐀𑐣𑑂𑐟𑐬𑐵𑐲𑑂𑐚𑑂𑐬𑐶𑐫 𑐳𑐣𑑂𑐢𑐶 𑐫𑐵𑐳𑐾𑑄 𑐰𑐶𑐱𑑂𑐰𑐫𑑂 𑐰𑐵𑐫𑐸𑐩𑐞𑑂𑐜𑐮𑐷𑐫𑑂 𑐟𑐵𑐥𑐩𑐵𑐣 𑐀𑐥𑑂𑐰𑐫𑐾𑐎𑐷𑐐𑐸 𑐴𑐬𑐶𑐟 𑐐𑐺𑐴 𑐐𑑂𑐫𑐵𑐳𑐫𑐵 𑐄𑐟𑑂𑐳𑐬𑑂𑐖𑐣𑐫𑑂 𑐎𑐩𑐷 𑐴𑐫𑐾𑐐𑐸 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋 𑐀𑐠𑐾 𑐴𑐾 𑐳𑐣𑑂 𑑒𑑐𑑑𑑕 𑐫𑑂 𑐥𑐾𑐬𑐶𑐱 𑐳𑐩𑑂𑐗𑑁𑐟𑐵 𑐫𑐵𑐳𑐾𑑄 𑐰𑐿𑐱𑑂𑐰𑐶𑐎 𑐟𑐵𑐥𑐩𑐵𑐣 𑐰𑐺𑐡𑑂𑐢𑐶 𑐍𑐡𑑂𑐫𑑀𑐐𑐶𑐎 𑐎𑑂𑐬𑐵𑐣𑑂𑐟𑐶 𑐱𑐸𑐬𑐸 𑐖𑐸𑐂 𑐣𑑂𑐴𑑂𑐫𑑅𑐫𑐵 𑐀𑐰𑐳𑑂𑐠𑐵 𑐳𑑂𑐰𑐫𑐵𑑄 𑑑.𑑕 𑐜𑐶𑐐𑑂𑐬𑐷 𑐳𑐾𑐮𑑂𑐳𑐶𑐫𑑂𑐳𑑄 𑐀𑐥𑑂𑐰𑑅 𑐩𑐖𑐸𑐂 𑐎𑐠𑑄 𑐣𑐶𑐫𑐣𑑂𑐟𑑂𑐬𑐞𑐫𑑂 𑐟𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑐫𑐵 𑐂𑐮𑐫𑑂 𑐰𑐶𑐱𑑂𑐰𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐟𑑅𑐎𑑂𑐰𑐩𑐕𑐶𑑄 𑐖𑐹𑐐𑐸 𑐮𑐎𑐜𑐵𑐄𑐣𑑄 𑐫𑐵𑐣𑐵𑑅 𑐩𑐣𑐹𑐟 𑐳𑑂𑐰𑐫𑑄 𑐕𑐾𑑃𑐫𑑂 𑐎𑐸𑐣𑐵 𑐔𑑂𑐰𑐣𑐾𑐟 𑐰𑐵𑐢𑑂𑐫 𑐖𑐹𑐐𑐸 𑐀𑐰𑐳𑑂𑐠𑐵𑐫𑑂 𑐫𑐵𑐟𑐵𑐫𑐵𑐟𑐫𑐵 𑐳𑐵𑐢𑐣, 𑐎𑐮𑐎𑐵𑐬𑐏𑐵𑐣𑐵, 𑐥𑐬𑑂𑐫𑐚𑐣 𑐰𑑂𑐫𑐰𑐳𑐵𑐫𑑂 𑐁𑐡𑐶 𑐧𑐣𑑂𑐡 𑐖𑐸𑐫𑐵𑑅 𑐎𑐵𑐬𑑂𑐰𑐣 𑐄𑐟𑑂𑐳𑐬𑑂𑐖𑐣 𑐁𑐎𑐱𑑂𑐩𑐶𑐎 𑐬𑐸𑐥𑑄 𑐴𑑂𑐰𑐵𑐟𑑂𑐟 𑐎𑐸𑐴𑐵𑑄 𑐰𑐫𑐵𑑅 𑐥𑑂𑐬𑐡𑐹𑐲𑐞 𑐩𑑂𑐴𑑀 𑐖𑐹𑐐𑐸 𑐀𑐮𑐾 𑐳𑑂𑐰𑐔𑑂𑐕 𑐮𑐎𑐳 𑐣𑑂𑐫𑐣𑐵𑐰𑑄𑐐𑐸 𑐠𑐸𑐠𑐵𑐫𑑂 𑐮𑐸𑐩𑑄𑐎𑐾𑐧𑐴𑑅 𑐖𑐹 𑑋 𑐕𑐐𑐹 𑐀𑐢𑑂𑐫𑐫𑐣𑐎𑐠𑑄 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑐫𑐵 𑐂𑐮𑐫𑑂 𑐳𑐣𑑂 𑑒𑑐𑑒𑑐 𑐀𑐥𑑂𑐬𑐶𑐮𑐫𑑂 𑐴𑐮𑐶𑐩𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐎𑐵𑐬𑑂𑐰𑐣 𑐄𑐟𑑂𑐳𑐬𑑂𑐖𑐣 𑐫𑐵𑐂𑐐𑐸 𑐡𑐾𑐫𑑂 𑐔𑐷𑐣𑐫𑑂 𑐳𑐣𑑂 𑑒𑑐𑑑𑑙𑐫𑐵 𑐰 𑐴𑐾 𑐃 𑐟𑐎𑐫𑐵 𑐟𑐸𑐮𑐣𑐵𑐫𑑂 𑑒𑑕 𑐥𑑂𑐬𑐟𑐶𑐱𑐟𑑄 𑐎𑐵𑐬𑑂𑐰𑐣 𑐄𑐟𑑂𑐳𑐬𑑂𑐖𑐣 𑐩𑑂𑐴𑑀 𑐖𑐹𑐐𑐸 𑐏𑑅 𑑋

𑐣𑐾𑐥𑐵𑑅 𑐡𑐾𑐱𑐫𑑂 𑐣𑑄 𑐠𑑂𑐰 𑐩𑐴𑐵𑐩𑐵𑐬𑐷𑐫𑐵 𑐂𑐮𑐫𑑂 𑐥𑑂𑐬𑐡𑐹𑐲𑐞 𑐩𑑂𑐴𑑀 𑐖𑐸𑐫𑐵𑑅 𑐳𑑂𑐰𑐔𑑂𑐕 𑐮𑐎𑐳 𑐣𑑂𑐫𑐣𑐵𑑅 𑐨𑐶𑐖𑐶𑐰𑐶𑐮𑐶𑐚𑐷 𑐀𑐥𑑂𑐰𑑅𑐐𑐸 𑐀𑐮𑐾 𑐴𑐶𑐩𑐵𑐮 𑐥𑑂𑐬𑐲𑑂𑐚 𑐏𑐣𑐾 𑐡𑐸𑐐𑐸 𑐠𑐸𑐠𑐵𑐫𑑂 𑐮𑐸𑐩𑑄𑐎𑐾𑐧𑐴 𑐖𑐹 𑑋 𑐩𑐵𑐣𑐰𑐷𑐫 𑐎𑐵𑐬𑐞𑑄𑑄 𑐖𑐹𑐐𑐸 𑐴𑐬𑐶𑐟 𑐐𑐺𑐴 𑐐𑑂𑐫𑐵𑐳𑐫𑐵 𑐄𑐟𑑂𑐳𑐬𑑂𑐖𑐣𑐫𑐵𑐟 𑐩𑐣𑐸𑐏𑑄 𑐔𑐵𑐴𑐾 𑐖𑐹𑐳𑐵 𑐩𑑂𑐴𑑀 𑐫𑐵𑐣𑐵𑑅 𑐥𑑂𑐬𑐡𑐹𑐲𑐞 𑐩𑑂𑐴𑑀 𑐫𑐵𑐫𑐾𑐦𑐸 𑐢𑐫𑐵𑐐𑐸 𑐠𑐸𑐎𑐶𑑄 𑐥𑑂𑐬𑐲𑑂𑐚 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐴𑐾 𑐴𑐸𑐣𑐶𑑄 𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐥𑑂𑐬𑐵𑐎𑐺𑐟𑐶𑐎 𑐬𑐸𑐥𑑄 𑐏𑐣𑐾 𑐡𑐸𑐐𑐸 𑐰𑐵𑐫𑐸𑐩𑐞𑑂𑐜𑐮𑐷𑐫𑑂 𑐟𑐵𑐥𑐩𑐵𑐣 𑐰𑐺𑐡𑑂𑐢𑐶𑐫𑐵𑐟 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐩𑐦𑐸𑐳𑐵𑑄 𑐩𑐵𑐣𑐰𑐷𑐫 𑐎𑐵𑐬𑐞𑑄 𑐖𑐹𑐐𑐸 𑐰𑐵𑐫𑐸𑐩𑐞𑑂𑐜𑐮𑐷𑐫 𑐟𑐵𑐥𑐩𑐵𑐣 𑐰𑐺𑐡𑑂𑐢𑐶𑐫𑐵𑐟 𑐣𑐶𑐫𑐣𑑂𑐟𑑂𑐬𑐞𑐫𑑂 𑐟𑐫𑐵𑑅 𑐥𑐺𑐠𑑂𑐰𑐷𑐫𑐵𑐟 𑐰𑐵𑐟𑐵𑐰𑐬𑐞𑐷𑐫 𑐰𑐶𑐣𑐵𑐱𑑄 𑐧𑐔𑐾 𑐫𑐵𑐳𑐾𑑄 𑐩𑐣𑐸𑐲𑑂𑐫 𑐖𑐷𑐰𑐣𑐫𑐵𑐟 𑐳𑐸𑐬𑐎𑑂𑐲𑐶𑐟 𑐫𑐵𑐫𑐾 𑐁𑐰𑐱𑑂𑐫𑐎 𑐖𑐹𑐐𑐸 𑐏𑑃 𑐮𑐶𑐳𑐵𑐮𑐶𑐳𑐵 𑐎𑐫𑐵𑑅 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS