Read news in NepalBhasa text-- www.hamroschool.com BACK 𑐱𑐣𑐶𑐰𑐵𑑅𑐣𑐶𑐳𑐾𑑄 𑐩𑑂𑐴𑐵𑐳𑐸𑐏𑑂𑐰𑐵𑑅 𑐩𑐵𑐖𑐸𑐫𑐵 𑐖𑐵𑐟𑑂𑐬𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐱𑐣𑐶𑐰𑐵𑑅𑐣𑐶𑐳𑐾𑑄 𑐩𑑂𑐴𑐵𑐳𑐸𑐏𑑂𑐰𑐵𑑅 𑐩𑐵𑐖𑐸𑐫𑐵 𑐖𑐵𑐟𑑂𑐬𑐵

𑐳𑐎𑑂𑐰- 𑐠𑐣𑐫𑐵 𑐋𑐟𑐶𑐴𑐵𑐳𑐶𑐎 𑐢𑐵𑐬𑑂𑐩𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐮𑑂𑐫𑐵𑐏𑑄 𑐀𑐟𑐶𑐎𑑄 𑐩𑐴𑐟𑑂𑐰𑑄 𑐖𑐵𑑅𑐐𑐸 𑐩𑑂𑐴𑐵𑐳𑐸𑐏𑑂𑐰𑐵𑑅 𑐩𑐵𑐖𑐸 (𑐰𑐖𑑂𑐬𑐫𑑀𑐐𑐶𑐣𑐷)𑐫𑐵 𑐖𑐵𑐟𑑂𑐬𑐵 𑐎𑑄𑐳𑑄𑐣𑐶𑐳𑐾𑑄 𑐣𑑂𑐴𑑂𑐫𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋 𑐡𑑃𑐫𑑂𑐡𑐳𑑄 𑐮𑑂𑐴𑐸𑐟𑐶𑐥𑐸𑐣𑑂𑐴𑐶𑐫𑐵 𑐣𑑂𑐴𑐶𑐎𑐸𑐣𑑂𑐴𑐸𑐣𑐶𑐳𑐾𑑄 𑐔𑑂𑐫𑐵𑐔𑐵 𑐐𑐸𑐣𑑂𑐴𑐸𑐟𑐎 𑐣𑑂𑐴𑑂𑐫𑐵𑐂𑐐𑐸 𑐠𑐸𑐐𑐸 𑐖𑐵𑐟𑑂𑐬𑐵 𑐳𑐎𑑂𑐰𑐫𑐵 𑐕𑐐𑐹 𑐕𑐐𑐹 𑐟𑑂𑐰𑐵𑐮𑑄 𑐥𑐵𑑅 𑐎𑐫𑐵𑑅 𑐣𑑂𑐫𑐵𑐫𑐾𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐸𑐐𑐸𑐳𑐷 𑐂𑐮𑑂𑐮𑐵 𑐟𑑂𑐰𑐵𑐮𑑄 𑐥𑐵𑑅 𑐎𑐫𑐵𑑅 𑐖𑐵𑐟𑑂𑐬𑐵 𑐳𑑄𑐔𑐵𑐮𑐣 𑐫𑐵𑐫𑐾𑐟𑑂𑐫𑑄𑐐𑐸 𑐡𑐸𑐳𑐵 𑐥𑐵𑑅 𑐎𑐵𑑅𑐐𑐸 𑐟𑑂𑐰𑐵𑐮𑐫𑑂 𑐴𑐾 𑐖𑐵𑐟𑑂𑐬𑐵 𑐫𑐵𑐣𑐵𑑅 𑐡𑑂𑐫𑑅 𑐟𑐫𑐾𑐐𑐸 𑐫𑐵𑐂 𑑋 𑐖𑐵𑐟𑑂𑐬𑐵 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐩𑑂𑐴𑐶𑐐𑑅 𑑓𑑒 𑐎𑐸 𑐟𑐵𑑅𑐴𑐵𑐎𑑅𑐐𑐸 𑐫𑑅𑐳𑐶𑑄 𑐠𑑄𑐐𑐸 𑐏𑑅𑐳𑐵 𑐰𑐂𑐐𑐸 𑑒 𑐐𑐟𑐾 𑐄𑐐𑐸 𑐫𑑅𑐳𑐶𑑄 𑐎𑑂𑐰𑑅𑐠𑐂 𑑋 𑐀𑐣𑑄𑐮𑐶 𑐖𑐵𑐟𑑂𑐬𑐵 𑐫𑐵𑐂𑐩𑑂𑐴 𑐩𑑂𑐴𑐵𑐳𑐸𑐏𑑂𑐰𑐵𑑅 𑐩𑐵𑐖𑐸𑐫𑐵𑐟 𑐳𑐎𑑂𑐰𑐫𑐵 𑐐𑐸𑑃 𑐧𑐴𑐵𑐮𑑄 𑐏𑐟𑐫𑑂 𑐟𑐫𑐵𑑅 𑐎𑑂𑐰𑐟 𑐴𑐂 𑑋 𑐩𑑂𑐴𑐵𑐳𑐸𑐏𑑂𑐰𑐵𑑅 𑐩𑐵𑐖𑐸𑐫𑐵 𑐩𑐹𑐬𑑂𑐟𑐶𑐮𑐶𑐳𑐾𑑄 𑐳𑐶𑑄𑐑𑐶𑐣𑐷, 𑐧𑑂𑐫𑐵𑑄𑐑𑐶𑐣𑐷 𑐰 𑐳𑑂𑐰𑐫𑐩𑑂𑐨𑐹 𑐩𑐴𑐵𑐔𑐿𑐟𑑂𑐫 𑐣𑑄 𑐣𑐵𑐥𑑄 𑐴𑐫𑐵𑑅 𑐖𑐵𑐟𑑂𑐬𑐵 𑐫𑐵𑐂 𑑋

𑐔𑑂𑐫𑐵𑐔𑐵 𑐐𑐸𑐣𑑂𑐴𑐸𑐟𑐎 𑐣𑑂𑐴𑑂𑐫𑐵𑐂𑐐𑐸 𑐖𑐵𑐟𑑂𑐬𑐵𑐫𑐵 𑐗𑑂𑐰𑐮𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐥𑐸𑐣𑑂𑐴𑐶𑐎𑐸𑐣𑑂𑐴𑐸 𑐡𑑂𑐫𑑅 𑐎𑐸𑐴𑐵𑑄 𑐧𑐶𑐖𑑂𑐫𑐵𑐎𑐷 𑑋 𑐀𑐣𑑄𑐮𑐶 𑐥𑐵𑐬𑐸𑐎𑐸𑐣𑑂𑐴𑐸𑐫𑐵𑐟 𑐱𑐸𑐣𑑂𑐫, 𑐡𑐸𑐟𑐶𑐫𑐵𑐎𑐸𑐣𑑂𑐴𑐸 𑐣𑐏𑑅 𑐢𑐎𑐵𑑅 𑐣𑐏𑐟𑑂𑐫𑐵 𑐧𑑂𑐰𑐣𑐾𑐐𑐸, 𑐟𑐺𑐟𑐶𑐫𑐵𑐎𑐸𑐣𑑂𑐴𑐸 𑐖𑐵𑐟𑑂𑐬𑐵𑐫𑐵 𑐣𑐶𑑄𑐟𑐶𑑄 𑐎𑑂𑐰𑐟 𑐴𑑅𑐥𑐶𑑄 𑐳𑐎𑐮𑐾𑑄 𑐡𑑂𑐫𑑅𑐫𑐵𑐟 𑐳𑐎𑑂𑐰 𑐧𑐖𑐵𑑅 𑐔𑐵𑑅𑐴𑐶𑐂𑐎𑐷 𑑋 𑐠𑐸𑐎𑐠𑑄 𑐴𑐾 𑐔𑑁𑐠𑐶𑐎𑐸𑐣𑑂𑐴𑐸 𑐩𑐹 𑐨𑐸𑐖𑑂𑐫𑐵𑑅 𑐥𑐘𑑂𑐔𑐩𑐶𑐎𑐸𑐣𑑂𑐴𑐸 𑐢𑐸𑑃 𑐨𑐸𑐖𑑂𑐫𑐵𑑅 𑐲𑐲𑑂𑐛𑐶 𑐎𑐸𑐣𑑂𑐴𑐸 𑐧𑑁 𑐧𑐶𑐖𑑂𑐫𑐵, 𑐳𑐥𑑂𑐟𑐩𑐶𑐎𑐸𑐣𑑂𑐴𑐸 𑐡𑑂𑐫𑑅 𑐠𑐴𑐵𑑄 𑐧𑐶𑐖𑑂𑐫𑐵𑐎𑐾𑐐𑐸 𑐰 𑐀𑐲𑑂𑐚𑐩𑐶 𑐎𑐸𑐣𑑂𑐴𑐸 𑐡𑑂𑐫𑑅 𑐏𑑅 𑐰𑐖𑑂𑐬𑐫𑑀𑐐𑐶𑐣𑐷𑐂 𑐫𑑄𑐎𑐵𑑅 𑐖𑐵𑐟𑑂𑐬𑐵 𑐎𑑂𑐰𑐔𑐵𑐫𑐾𑐎𑐷 𑑋 𑐍𑐥𑐔𑐵𑐬𑐶𑐎 𑐬𑐸𑐥𑑄 𑐖𑐵𑐟𑑂𑐬𑐵 𑐎𑑂𑐰𑐔𑐵𑑅𑐳𑐵𑑄 𑐡𑐱𑐩𑐶 𑐰 𑐊𑐎𑐵𑐡𑐱𑐶𑐎𑐸𑐣𑑂𑐴𑐸 𑐰𑐶𑐔𑐵𑑅 𑐥𑐸𑐖𑐵 𑐖𑐸𑐂 𑑋

𑐠𑑁𑑄 𑐳𑑂𑐰𑐫𑐵𑑄 𑐎𑐬𑐶𑐧 𑐳𑑂𑐰𑐡𑑂𑐰𑑅 𑐡𑑃 𑐣𑑂𑐴𑑂𑐫𑑅 𑐳𑐎𑑂𑐰 𑐡𑐾𑐫𑑂 𑐥𑐮𑐶𑐳𑑂𑐠𑐵 𑐖𑐹𑐐𑐸 𑐂𑐮𑐫𑑂 𑐳𑐎𑑂𑐰𑐫𑐵 𑐖𑐸𑐖𑐸 𑐱𑑄𑐏𑐡𑐾𑐰𑑄 𑐠𑑅𑐐𑐸 𑐬𑐵𑐖𑑂𑐫 𑐀𑐣𑑂𑐟𑐬𑑂𑐐𑐟𑐫𑐵 𑐣𑑂𑐴𑐫𑑂𑐐𑐹 𑐐𑐵𑐩𑐫𑑂 𑐖𑐣𑐟𑐵𑐫𑐵 𑐳𑐸𑐏, 𑐱𑐵𑐣𑑂𑐟𑐶, 𑐳𑐩𑐺𑐡𑑂𑐢𑐶, 𑐎𑐮𑑂𑐫𑐵𑐞𑐫𑐵 𑐴𑐾𑐟𑐸 𑐠𑑂𑐰 𑐖𑐵𑐟𑑂𑐬𑐵 𑐣𑑂𑐫𑐵𑐫𑐾𑐎𑐹𑐐𑐸 𑐢𑐂𑐐𑐸 𑐏𑑃 𑐩𑐞𑐶𑐱𑐿𑐮 𑐩𑐴𑐵𑐰𑐡𑐵𑐣𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐳𑐎𑑂𑐰𑐫𑐵 𑐳𑑄𑐳𑑂𑐺𑐎𑐟𑐶𑐰𑐶𑐡𑑂 𑐥𑑂𑐬𑐎𑐵𑐱𑐩𑐵𑐣 𑐳𑐎𑑂𑐰𑑄 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐫𑐵𑐟 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐖𑐵𑐟𑑂𑐬𑐵𑐫𑐵 𑐣𑐶𑑄𑐟𑐶𑑄 𑐫𑐾𑑃 𑐮𑐵𑐫𑑂𑐎𑐸𑐮𑐶𑑄 𑐬𑐵𑐖 𑐏𑐜𑑂𑐐 𑐴𑐫𑐾𑐩𑐵𑑅𑐐𑐸 𑐥𑐬𑐩𑑂𑐥𑐬𑐵 𑐁𑐟𑐎𑑄 𑐎𑐵𑐫𑐩 𑐴𑐾 𑐖𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐵𑐶𑐡𑐳𑐾𑑄 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐱𑑂𑐬𑐾𑐲𑑂𑐛 𑐖𑐵𑐟𑑂𑐬𑐵𑐖𑑂𑐰𑑅𑐕𑐶 𑐳𑐎𑑂𑐰 𑐡𑐾𑐫𑑂 𑐡𑐸𑐣𑐾 𑐳𑐸𑐣𑐵𑐣𑑄 𑐕𑑂𑐫𑑄𑐐𑐹 𑐮𑐵𑐎𑐵𑑄 𑐣𑑂𑐴𑑂𑐫𑐵𑐫𑐾𑐐𑐸, 𑐎𑐸𑐳𑐵𑑄 𑐎𑐸𑐂𑐐𑐸, 𑐮𑑂𑐰𑐵𑐥𑐸 𑐏𑑂𑐫𑐵𑐥𑐸 𑐫𑐵𑐫𑐾𑐐𑐸, 𑐳𑐵𑐴𑐸𑑄 𑐎𑑂𑐫𑑄𑐎𑐾𑐐𑐸 𑐰 𑐎𑑂𑐫𑐣𑐾𑐐𑐸, 𑐳𑐵𑐴𑐸𑑄 𑐖𑑂𑐰𑐣𑐾 𑐩𑐖𑐶𑐄𑐐𑐸, 𑐮𑐸𑐳𑐶 𑐢𑑂𑐫𑐣𑐾𑐐𑐸, 𑐨𑐩𑑂𑐔𑐵 𑐡𑐸𑐎𑐵𑐫𑐾𑐐𑐸, 𑐕𑐾𑑃 𑐡𑐣𑐾𑐐𑐸 𑐠𑐸𑐣𑐾𑐐𑐸, 𑐎𑑅𑐳𑐶 𑐰𑐵 𑐥𑐮𑑂𑐮𑐶𑐂 𑐔𑑂𑐰𑐣𑐵𑑅 𑐕𑐸𑑄 𑐣𑑄 𑐖𑑂𑐫𑐵 𑐫𑐵𑐫𑐾 𑐩𑐖𑐶𑐄𑐐𑐸, 𑐳𑐮, 𑐎𑐶𑐳𑐶 𑐐𑐫𑐾 𑐩𑐖𑐶𑐄𑐐𑐸 𑐁𑐡𑐶 𑐣𑐶𑐫𑐩 𑐡𑐸𑐐𑐸 𑐣𑑄 𑐏𑑃 𑐎𑐣𑐵𑐡𑐶𑐮 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS