𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐎𑐮𑐵𑐎𑐵𑐬 𑐁𑐱𑐵𑐎𑐵𑐖𑐷 𑐠𑐎𑐹𑐫𑐵𑐟 𑐴𑐣

𑐏𑑂𑐰𑐥 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐏𑑂𑐰𑐥 𑐩𑐶𑐜𑐶𑐫𑐵 𑐳𑐬𑑂𑐎𑐮𑑄 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵𑐫𑐵 𑐗𑑂𑐰𑐮𑐫𑑂 𑐕𑐐𑐹 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐰𑐬𑐶𑐲𑑂𑐛 𑐎𑐮𑐵𑐎𑐵𑐬 𑐁𑐱𑐵𑐎𑐵𑐖𑐷 𑐠𑐎𑐹𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐳𑐬𑑂𑐎𑐮𑐫𑐵 𑐣𑐵𑐫𑑅𑐮𑐶𑐳𑐾𑑄 𑐎𑐮𑐵𑐎𑐵𑐬 𑐬𑐵𑐖𑐸 𑐩𑐵𑐣𑐣𑑂𑐢𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐰𑐬𑐶𑐲𑑂𑐛 𑐎𑐮𑐵𑐎𑐵𑐬 𑐠𑐎𑐹𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐳𑐬𑑂𑐎𑐮𑐫𑐵 𑐣𑐵𑐫𑑅 𑐩𑐵𑐣𑐣𑑂𑐢𑐬𑑄 𑐰𑐬𑐶𑐲𑑂𑐛 𑐎𑐮𑐵𑐎𑐵𑐬 𑐠𑐎𑐹𑐫𑐵𑐟 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐵𑐥𑑁 𑐡𑐾𑐕𑐵𑐳𑐾 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶𑐟𑑂𑐰 𑐰𑐬𑐶𑐲𑑂𑐛 𑐎𑐮𑐵𑐎𑐵𑐬 𑐠𑐎𑐹𑑄 𑐠𑑅𑐥𑐶𑑄𑐳𑑄 𑐣𑑂𑐴𑐵𑐥𑐵 𑐁𑐥𑐵𑐮𑑄 𑐡𑐸𑑅𑐏 𑐳𑐶𑐫𑐵𑑅 𑐏𑑂𑐫𑐵𑐮𑑅 𑐰 𑐣𑐾𑐥𑐵𑐮𑐨𑐵𑐲𑐵 𑐳𑑄𑐎𑐶𑐥𑐵 𑐏𑑂𑐫𑐮𑐫𑑂 𑐧𑐶𑐫𑐵𑐐𑐸 𑐫𑑀𑐐𑐡𑐵𑐣 𑐳𑐶𑐟𑐶𑑄 𑐩𑐰𑑄𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐟𑐟𑑂𑐎𑐵𑐮𑐷𑐣 𑐬𑐵𑐖𑐣𑐷𑐟𑐶𑐎 𑐀𑐰𑐳𑑂𑐠𑐵𑐫𑑂 𑐣𑑄 𑐠𑑅𑐥𑐶𑑄𑐳𑑄 𑐄𑐐𑐸 𑐃𑐫𑐵 𑐥𑑂𑐬𑐰𑐺𑐟𑑂𑐟𑐶𑐫𑐵𑐟 𑐢𑑂𑐫𑐵𑐔𑐹 𑐣𑐎𑐸 𑐣𑐎𑐸𑑄 𑐏𑑂𑐫𑐵𑐮𑑅 𑐰 𑐳𑑄𑐎𑐶𑐥𑐵 𑐏𑑂𑐫𑐮𑐫𑑂 𑐩𑐡𑐶𑐎𑑂𑐎 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐰 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐟𑐎𑑄 𑐰𑐣𑐵𑑅 𑐏𑑂𑐫𑐵𑐮𑑅 𑐎𑑂𑐫𑑄 𑐰𑐣𑐵𑐐𑐸 𑐃𑐫𑐵 𑐮𑐸𑐩𑐣𑑂𑐟𑐶 𑐣𑑄 𑐂𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐡𑐧𑐸𑐮𑐶 𑐣𑐾𑐥𑐵𑐮𑐫𑐵 𑐳𑑄𑐬𑐎𑑂𑐲𑐎𑐮𑐶𑐳𑐾𑑄 𑐳𑑄𑐳𑑂𑐎𑐺𑐟𑐶𑐎𑑅𑐩𑐶 𑐐𑐞𑐾𑐱𑐬𑐵𑐩 𑐮𑐵𑐕𑐶𑑄 𑐠𑑅𑐐𑐸 𑐩𑑂𑐴𑐳𑐷𑐎𑐵 𑐮𑑂𑐫𑑄𑐎𑐵 𑐟𑐫𑐾𑐫𑐵 𑐣𑐶𑑄𑐟𑐶𑑄 𑐣𑐾𑐰𑐵𑑅 𑐥𑐴𑐶𑐔𑐵𑐣 𑐩𑑂𑐰𑐵𑐎𑐵𑑅 𑐗𑐷 𑐳𑐎𑐮𑐾𑑄 𑐕𑐥𑑂𑐥𑑃 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵𑐫𑐵 𑐕𑑂𑐫𑐵𑐘𑑂𑐖𑐾 𑐣𑐬𑐾𑐱 𑐏𑐟𑑂𑐬𑐷, 𑐩𑐴𑐵𑐣𑐐𑐬𑐷𑐫 𑐥𑑂𑐬𑐴𑐬𑐷 𑐥𑑂𑐬𑐨𑐵𑐐 𑐖𑐐𑐵𑐟𑐶𑐫𑐵 𑐥𑑂𑐬𑐴𑐬𑐷 𑐣𑐶𑐬𑐷𑐎𑑂𑐲𑐎 𑐳𑐹𑐬𑑂𑐫𑐧𑐴𑐵𑐡𑐸𑐬 𑐏𑐟𑑂𑐬𑐷, 𑐎𑐮𑐵𑐎𑐵𑐬 𑐱𑑂𑐫𑐵𑐩𑐳𑐸𑐣𑑂𑐡𑐬 𑐱𑐶𑐮𑑂𑐥𑐎𑐵𑐬, 𑐣𑐵𑐚𑑂𑐫𑐎𑐬𑑂𑐩𑐶 𑐳𑐩𑐵𑐖 𑐣𑐾𑐥𑐵𑐮 𑐀𑐢𑑂𑐫𑐎𑑂𑐲 𑐮𑐎𑑂𑐲𑑂𑐩𑐷𑐥𑑂𑐬𑐳𑐵𑐡 𑐔𑐰𑐵𑐮, 𑐖𑑂𑐫𑐵𑐗𑑂𑐰𑑅𑐫𑐵 𑐎𑐖𑐶 𑐳𑐸𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑐬𑐶𑐟𑐵 𑐥𑑂𑐬𑐖𑐵𑐥𑐟𑐶, 𑐐𑑄𑐐𑐵𑐬𑐵𑐩 𑐥𑑂𑐬𑐖𑐵𑐥𑐟𑐶, 𑐬𑐵𑐖𑐎𑐸𑐩𑐵𑐬 𑐩𑐵𑐣𑐣𑑂𑐢𑐬, 𑐰𑐶𑐲𑑂𑐞𑐸𑐳𑐸𑐣𑑂𑐡𑐬 𑐡𑐾𑐱𑐾𑐩𑐬𑐸, 𑐬𑑀𑐱𑐣 𑐢𑑁𑐨𑐜𑐾𑐮 𑐰 𑐎𑐮𑑂𑐥𑐣𑐵 𑐱𑑂𑐬𑐾𑐲𑑂𑐛𑑄 𑐩𑑂𑐫𑐾 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅𑐳𑐵 𑐱𑐵𑐣𑑂𑐟𑐶 𑐬𑐵𑐖𑐧𑐵𑐴𑐎 𑐰 𑐁𑐰𑐶𑐎𑐵 𑐩𑐵𑐣𑐣𑑂𑐢𑐬𑑄 𑐴𑐸𑐮𑐵𑐥𑑂𑐫𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐧𑐶𑐳𑑂𑐎𑐵𑑅 𑐣𑐏𑑅 𑐰 𑑒𑑐𑑗𑑙 𑐣𑑂𑐴𑐹𑐡𑑃𑐫𑐵 𑐮𑐳𑐟𑐵𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷 𑐎𑐮𑐵𑐎𑐵𑐬𑐟𑐫𑑂 𑐣𑑄 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋