Read news in NepalBhasa text-- www.hamroschool.com BACK 𑐧𑐾𑐮𑐵𑐫𑐟𑐫𑑂 𑐣𑑂𑐴𑐵𑐥𑐵𑑄𑐏𑐸𑐳𑐷 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐾𑐮𑐵𑐫𑐟𑐫𑑂 𑐣𑑂𑐴𑐵𑐥𑐵𑑄𑐏𑐸𑐳𑐷 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑐾𑐥𑐵𑐮𑐫𑑂 𑐖𑐹𑐐𑐸 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵𑐫𑑂 𑐀𑐥𑑂𑐥𑐵𑑄 𑐎𑐫𑐾𑐎𑐵𑑅 𑐮𑑂𑐰𑐵𑐥𑐸 𑐖𑐹𑐳𑐵𑑄 𑐧𑐾𑐮𑐵𑐫𑐟𑐫𑐵 𑐮𑐞𑑂𑐜𑐣𑐫𑑂 𑐢𑐵𑑅𑐳𑐵 𑐱𑐵𑐣𑑂𑐟 𑐰 𑐣𑑂𑐴𑑂𑐫𑐂𑐥𑐸𑐎 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 𑐣𑑂𑐫𑐵𑐫𑐾𑐎𑐹𑐐𑐸 𑐡𑐸 𑑋 𑐠𑐸𑐐𑐸𑐳𑐷 𑐧𑐾𑐮𑐵𑐫𑐟𑐫𑐵 𑐮𑐞𑑂𑐜𑐣𑐫𑑂 𑐠𑐸𑐐𑐸𑐳𑐷 𑐣𑑂𑐴𑐵𑐥𑐵𑑄𑐏𑐸𑐳𑐷 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 𑐣𑑂𑐫𑐵𑐫𑐾𑐎𑐹𑐐𑐸 𑐏𑑅 𑑋

𑐧𑐾𑐮𑐵𑐫𑐟𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐳𑑄𑐳𑑂𑐠𑐵 𑐥𑐵𑐳𑐵 𑐥𑐸𑐔𑑅 𑐐𑐸𑐠𑐶 𑐫𑐹𑐎𑐾𑐫𑐵 𑐐𑑂𑐰𑐳𑐵𑑅 𑐰 𑐐𑐸𑐠𑐶𑐫𑐵 𑐳𑐵𑐄𑐠 𑐂𑐲𑑂𑐚 𑐮𑐞𑑂𑐜𑐣 𑐎𑐔𑐵𑐫𑐵 𑐳𑑄𑐫𑑀𑐖𑐣𑐫𑑂 𑐠𑐸𑐐𑐸𑐳𑐷 𑐧𑐾𑐮𑐵𑐫𑐟𑐫𑐵 𑐥𑑂𑐮𑐩𑐳𑑂𑐚𑐶𑐜𑐳𑑂𑐠𑐶𑐟 𑐊𑐱𑐶𑐫𑐣 𑐎𑐩𑑂𑐫𑐸𑐣𑐶𑐚𑐷 𑐳𑐾𑐣𑑂𑐚𑐬𑐫𑑂 𑐀𑐣 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐮𑐐𑐵𑐫𑐟𑐫𑐵 𑐣𑐾𑐥𑐵𑐮𑐷 𑐳𑐩𑐸𑐡𑐵𑐫 𑐖𑐵𑐣𑐵𑑅 𑐠𑑂𑐰 𑐖𑐵𑐟𑑂𑐬𑐵 𑐫𑐵𑑅𑐐𑐸 𑐏𑑅 𑑋 𑐄𑐎𑐷 𑐧𑐾𑐮𑐵𑐫𑐟𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑐮𑐷 𑐬𑐵𑐖𑐡𑐹𑐟 𑐖𑑂𑐘𑐵𑐣𑐔𑐣𑑂𑐡𑑂𑐬 𑐁𑐔𑐵𑐬𑑂𑐫𑑄 𑐣𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋

𑐖𑐵𑐟𑑂𑐬𑐵𑐫𑑂 𑐨𑐿𑐮𑑅𑐡𑑂𑐫𑑅 𑐰 𑐨𑐡𑑂𑐬𑐎𑐵𑐮𑐷𑐫𑐵 𑐣𑐶𑐐𑐹 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐬𑐠 𑐴𑐾 𑐡𑐫𑐾𑐎𑐵𑑅 𑐳𑐵𑐮𑐾𑐐𑐸 𑐖𑑂𑐫𑐵 𑐳𑐩𑐾𑐟 𑐫𑐵𑑅𑐐𑐸 𑐏𑑅 𑑋 𑐀𑐣 𑐴𑐬𑐾𑐎 𑐣𑐶𑐡𑑃𑐫𑑂 𑐫𑐵𑐂𑐐𑐸 𑐣𑐾𑐰𑐵𑑅 𑐩𑐸𑐣𑐵 𑐖𑑂𑐫𑐵𑐗𑑂𑐰𑐮𑐫𑑂 𑐟𑐸𑑄 𑐮𑐵𑐎𑐵𑑅 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 𑐣𑑂𑐫𑐵𑐫𑐾𑐎𑐹𑐐𑐸 𑐏𑑃 𑐐𑐸𑐠𑐶𑐫𑐵 𑐣𑐵𑐫𑑅 𑐌𑐖𑐾𑐱 𑐳𑐶𑑄𑐴𑑄 𑐎𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐖𑐵𑐟𑑂𑐬𑐵𑐖𑑅𑐕𑐶 𑐢𑐶𑐩𑐫𑑂 𑐠𑐵𑐣𑐵𑑅 𑐥𑑂𑐫𑐵𑐏𑑄 𑐴𑐸𑐮𑐾𑐐𑐸 𑐣𑐾𑐰𑐵𑑅 𑐣𑐳𑐵𑐟𑑂𑐰𑑃𑐳𑐵 𑐣𑐫𑐾𑐐𑐸 𑐖𑑂𑐫𑐵 𑐣𑑄 𑐖𑐹𑐐𑐸 𑐏𑑅 𑑋 𑐖𑐵𑐟𑑂𑐬𑐵𑐫𑐵 𑐳𑑄𑐫𑑀𑐖𑐎 𑐎𑐔𑐵𑐫𑐵 𑐀𑐢𑑂𑐫𑐎𑑂𑐲 𑐩𑐵𑐢𑐰𑐮𑐵𑐮 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐷 𑐎𑐠𑑄 𑐖𑐵𑐟𑑂𑐬𑐵𑐫𑑂 𑐮𑑂𑐫𑐵𑐫𑑂𑐩𑑂𑐴 𑐮𑑂𑐫𑐵𑐳𑐾 𑐰 𑐩𑐳𑑂𑐟 𑐳𑐩𑐾𑐟 𑐁𑐥𑐵𑐮𑑄 𑐩𑐣𑐹𑐟𑐫𑑂 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋

𑐐𑐸𑐠𑐶𑐫𑐵 𑐣𑐵𑐫𑑅 𑐳𑐶𑑄𑐴𑑄 𑐎𑐣𑐵𑐡𑐷 𑐎𑐠𑑄 𑐏𑑂𑐰𑐥𑐫𑑂 𑐠𑐾𑑄 𑐮𑐞𑑂𑐜𑐣𑐫𑑂 𑐣𑑄 𑐥𑑂𑐫𑐣𑑂𑐴𑐸 𑐟𑐎 𑐠𑑂𑐰 𑐖𑐵𑐟𑑂𑐬𑐵 𑐣𑑂𑐫𑐵𑐫𑐾𑐎𑐾𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐔𑐿𑐟𑑂𑐬𑐫𑐵 𑐮𑐶𑐥𑐵𑑄𑐐𑐸 𑐣𑑂𑐴𑐶 𑐏𑑂𑐰𑐥𑐫𑑂 𑐫𑑅𑐳𑐶𑑄 𑐠𑐣𑐷 𑐠𑐾𑑄 𑐮𑐞𑑂𑐜𑐣𑐫𑑂 𑐣𑑄 𑐫𑑅𑐳𑐶𑑄 𑐠𑐣𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋 𑐮𑐞𑑂𑐜𑐣𑐫𑑂 𑐩𑑀𑐴𑐣𑐶, 𑐳𑑂𑐰𑐣𑑂𑐟𑐶, 𑐣𑑂𑐴𑐹𑐡𑑃 𑐮𑐶𑐳𑐾𑑄 𑐫𑑃𑐫𑐵𑑅 𑐣𑑂𑐫𑐵𑐫𑐾𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐧𑐶𑐳𑑂𑐎𑐵𑑅 𑐢𑐵𑑅𑐳𑐵 𑐠𑐸𑐐𑐸𑐳𑐷 𑐣𑑂𑐴𑐵𑐥𑐵𑑄𑐏𑐸𑐳𑐷 𑐣𑑂𑐫𑐵𑐫𑐾𑐎𑐹𑐐𑐸 𑐏𑑅 𑑋 𑐠𑐸𑐎𑐶𑑄 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐷𑐐𑐸 𑐁𑐱𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐠𑑁𑑄𑐎𑐣𑑂𑐴𑐫𑑂 𑐣𑐾𑐥𑐵𑐮𑐫𑑂 𑐏𑑂𑐰𑐥𑐫𑑂 𑐣𑑄 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS