Read news in NepalBhasa text-- www.hamroschool.com BACK 𑐩𑐕𑐶𑐣𑑂𑐡𑑂𑐬 𑐁𑑅 𑐢𑐵𑐠𑐾𑑄𑐫𑐵 𑐔𑑂𑐫𑐵𑐩𑑂𑐥𑐶𑐫𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑐕𑐶𑐣𑑂𑐡𑑂𑐬 𑐁𑑅 𑐢𑐵𑐠𑐾𑑄𑐫𑐵 𑐔𑑂𑐫𑐵𑐩𑑂𑐥𑐶𑐫𑐣

𑐴𑐶𑐩𑐾𑐱

𑐳𑐸𑐣𑐵 𑐣𑑄 𑐔𑑂𑐰𑐵𑐎𑑂𑐎 𑐣𑑂𑐫𑐣𑐾𑐦𑐸, 𑐐𑐠𑐾 𑐖𑐸𑐫𑐵𑑅 𑐩𑐕𑐶𑐣𑑂𑐡𑑂𑐬 𑐢𑐵𑐠𑐾𑑄𑐫𑐵 𑐔𑑂𑐫𑐵𑐩𑑂𑐥𑐶𑐫𑐣 ? 𑐣𑐶𑐡“ 𑐣𑑂𑐴𑑂𑐫𑑅 𑐴𑐾 𑐩𑐕𑐶𑐣𑑂𑐡𑑂𑐬𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐏𑐸𑐳𑐷 𑐳𑐴𑐶𑐡 𑐳𑑂𑐩𑐵𑐬𑐎 𑐮𑐶𑐐 𑐊 𑐜𑐶𑐨𑐶𑐖𑐣 𑐟𑑂𑐫𑐵𑐎𑐹𑐐𑐸 𑐏𑑅 𑑋 𑐎𑑂𑐮𑐧𑐫𑐵 𑐂𑐟𑐶𑐴𑐵𑐳𑐫𑑂 𑐠𑑂𑐰 𑐴𑐾 𑐣𑑂𑐴𑐵𑐥𑐵𑑄𑐐𑐸 𑐮𑐶𑐐 𑐄𑐥𑐵𑐢𑐶 𑐖𑐸𑐮 𑑋 𑐁𑑅 𑐣𑐎𑐟𑐶𑐣𑐶 𑐣𑑄 𑐩𑐕𑐶𑐣𑑂𑐡𑑂𑐬 𑐴𑐵𑐎𑐣𑑄 𑐕𑐎𑑂𑐰𑑅 𑐰 𑐴𑐾 𑐮𑐶𑐐 𑐟𑑂𑐫𑐵𑐎𑐹𑐐𑐸 𑐡𑐸 𑑋 𑐠𑑂𑐰 𑐣𑐶𑐎𑑂𑐰𑑅𑐐𑐸𑐏𑐸𑐳𑐷 𑐖𑐸𑐮 𑑋 𑐰𑐶𑐱𑑂𑐰 𑐮𑐶𑐐 𑐦𑐸𑐚𑐧𑐮𑐫𑑂 𑐕𑐐𑐹 𑐢𑐵𑐥𑐸 𑐡𑐸, ‘𑐕𑐸𑑄 𑐣𑑄 𑐡𑐾𑐫𑑂𑐫𑐵 𑐊 𑐜𑐶𑐨𑐶𑐖𑐣 𑐟𑑂𑐫𑐵𑐎𑐾𑐐𑐸 𑐀𑐥𑐸 𑐩𑐖𑐹 𑑋 𑐳𑐸𑐣𑐵𑑄 𑐟𑑂𑐫𑐵𑐎𑐮 𑐢𑐵𑑅𑐳𑐵 𑐱𑑄𑐎𑐵 𑐫𑐵𑐣𑐵𑑅 𑐣𑑂𑐫𑐣𑐾𑐫𑑅, ‘𑐐𑐣𑑄 𑐨𑐵𑐐𑑂𑐫𑑄 𑐖𑐎 𑐮𑐶𑐐 𑐟𑑂𑐫𑐵𑐎𑐹𑐐𑐸 𑐮𑐵 𑐩𑐏𑐸 𑐮𑐵 ?’

𑐟𑐬 𑐐𑐸𑐧𑐮𑐫𑑂 𑐰 𑐴𑐾 𑐎𑑂𑐮𑐧𑑄 𑐗𑑂𑐰𑑅𑐮𑐵𑐎 𑐴𑐵𑐎𑐣𑑄 𑐮𑐶𑐐 𑐟𑑂𑐫𑐵𑐎𑐵𑑅 𑐎𑑂𑐫𑐣𑐷, 𑐄𑐧𑐮𑐫𑑂 𑐢𑐵𑑅𑐳𑐵 𑐀𑐖𑑂𑐫𑐵𑑅𑐥𑐶𑑄 𑐁𑐮𑑀𑐔𑐎𑐟𑐫𑑂𑐳𑑄 𑐢𑐵𑐫𑐾𑐐𑐸 𑐫𑐵𑐂, ‘𑐁𑑅 𑐢𑐵𑑅𑐳𑐵 𑐢𑐵𑐠𑐾𑑄𑐫𑐵 𑐔𑑂𑐫𑐵𑐩𑑂𑐥𑐶𑐫𑐣 𑐖𑐸𑐮 𑑋’ 𑐩𑐕𑐶𑐣𑑂𑐡𑑂𑐬𑐫𑐵 𑐏“ 𑐣𑑄 𑐠𑑂𑐰 𑐴𑐾 𑐏𑑅 𑑋 𑐦𑐸𑐚𑐧𑐮 𑐂𑑄𑐐𑑂𑐮𑑂𑐫𑐵𑐣𑑂𑐜𑑄 𑐰𑑅𑐐𑐸 𑐢𑐵𑐂 𑑋 𑐂𑑄𑐐𑑂𑐮𑑂𑐫𑐵𑐣𑑂𑐜𑐫𑐵 𑐴𑐾 𑐨𑐵𑐫𑑂 𑐟𑑂𑐫𑐵𑐳𑐵 𑐎𑐫𑐵𑑅 𑐢𑐵𑐫𑐾𑐐𑐸 𑐏𑑅𑐳𑐵 𑐁𑑅 𑐩𑐕𑐶𑐣𑑂𑐡𑑂𑐬 ‘𑐚𑑂𑐬𑑂𑐫𑐸 𑐔𑑂𑐫𑐵𑐩𑑂𑐥𑐶𑐫𑐣’ 𑐖𑐸𑐮 𑑋 𑐩𑐕𑐶𑐣𑑂𑐡𑑂𑐬 𑐕𑐎𑑂𑐰𑑅 𑐩𑐏𑐸, 𑐣𑐶𑐎𑑂𑐰𑑅𑐫𑐵 𑐮𑐶𑐐 𑐔𑑂𑐫𑐵𑐩𑑂𑐥𑐶𑐫𑐣 𑐖𑐸𑐮 𑑋 𑐮𑐶𑐐 𑐟𑑂𑐫𑐵𑐎𑐾𑐐𑐸 𑐠𑑅𑐠𑐩𑑂𑐴𑑄 𑐠𑐵𑐎𑐸𑐐𑐸 𑐖𑐸𑐮, 𑐕𑐎𑑂𑐰𑑅 𑐟𑑂𑐫𑐵𑐎𑐾𑐢𑐸𑑄𑐎𑐵𑑅 𑐰 𑐄𑐥𑐵𑐢𑐶𑐫𑐵𑐟 𑐬𑐎𑑂𑐲𑐵 𑐫𑐵𑐫𑐾𑐐𑐸 𑐗𑐣𑑂 𑐴𑐾 𑐟𑑅𑐢𑑄𑐐𑐸 𑐄𑐥𑐮𑐧𑑂𑐢𑐷 𑐖𑐸𑐮 𑑋

𑐠𑑂𑐰 𑐮𑑂𑐫𑐵𑐏𑑄 𑐰 𑐣𑐾𑐥𑐵𑑅𑐫𑐵 𑐑𑐬𑐾𑐮𑐸 𑐦𑐸𑐚𑐧𑐮𑐫𑑂 𑐕𑐐𑐹 𑐱𑐎𑑂𑐟𑐶 𑐖𑐸𑐫𑐵𑑅 𑐣𑑂𑐴𑑂𑐫𑑅𑐣𑐾 𑐰𑑅𑐐𑐸 𑐡𑐸 𑑋 𑐰𑐫𑐵 𑐣𑑂𑐴𑑂𑐫𑑅𑐣𑐾 𑐩𑐾𑐐𑐸 𑐥𑐸𑐮𑐵𑑄𑐐𑐸 𑐱𑐎𑑂𑐟𑐶𑐟 𑐮𑐶𑐄𑐣𑐾 𑐮𑐵𑑅𑐰𑑄𑐐𑐸 𑐡𑐸 𑑋 𑐮𑐶𑐥𑐵𑑄𑐐𑐸 𑐣𑐷𑐡“ 𑐣𑑂𑐴𑑂𑐫𑑅𑐫𑐵 𑐏“ 𑐮𑑂𑐴𑐵𑐫𑐾𑐐𑐸 𑐏𑑅𑐳𑐵 𑐣𑐾𑐥𑐵𑑅𑐫𑐵 𑐮𑐶𑐐 𑐦𑐸𑐚𑐧𑐮𑐫𑑂 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐱𑐎𑑂𑐟𑐶 𑐏𑑅– 𑐩𑐣𑐵𑐒 𑐩𑐳𑑂𑐬𑑂𑐫𑐵𑐒𑑂𑐡𑐷 𑑋 𑐀𑐣𑐮𑐶𑑄 𑐠𑑂𑐬𑐷 𑐳𑑂𑐚𑐵𑐬 𑐰𑐮 𑑋 𑐀𑐮𑐾 𑐴𑐵𑐎𑐣𑑄 𑐰𑐮– 𑐥𑐸𑐮𑐶𑐳 𑑋 𑐠𑐸𑐥𑐶𑑄 𑐳𑑂𑐰𑑄𑐐𑐹 𑐚𑐶𑐩𑑄 𑐟𑐵𑑅 𑐃 𑐟𑐎 𑐴𑐾 𑐣𑐾𑐥𑐵𑑅𑐫𑐵 𑐑𑐬𑐾𑐮𑐸 𑐦𑐸𑐚𑐧𑐮𑐫𑑂 𑐥𑐵𑐮𑑄𑐥𑐵𑑅 𑐕𑐸𑑄 𑐎𑐶 𑐕𑐸𑑄 𑐄𑐥𑐵𑐢𑐷 𑐟𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐸𑐥𑐶𑑄 𑐳𑑂𑐰𑑄𑐐𑐹 𑐚𑐶𑐩𑑄 𑐖𑐎 𑑑𑑔 𑐎𑑂𑐰𑑅 ‘𑐊 𑐜𑐶𑐨𑐶𑐖𑐣’ 𑐮𑐶𑐐 𑐟𑑂𑐫𑐵𑐎𑐾 𑐢𑐸𑑄𑐎𑐮 𑑋

𑐁𑑅 𑐥𑐵𑑅 𑐏𑑅– 𑐩𑐕𑐶𑐣𑑂𑐡𑑂𑐬𑐫𑐵 𑑋 𑐕𑐸𑑄 𑐃 𑐣𑑂𑐴𑑂𑐫𑑅 𑐖𑐎 𑐰𑐣𑐾𑐐𑐸 𑐏𑑅𑐳𑐵𑑄 𑐕𑐐𑐹 𑐃 𑐀𑐖𑑂𑐫𑐵𑑅𑐐𑐸 𑐰𑑅𑐐𑐸 𑐏𑑅, 𑐐𑐸𑐧𑐮𑐫𑑂 𑐩𑐕𑐶𑐣𑑂𑐡𑑂𑐬 𑐡𑐸𑐣𑐾 𑐧𑐴𑐳 𑐖𑐹𑐐𑐸 𑐏𑑅– 𑐕𑐵𑐫𑑂 𑐦𑐸𑐚𑐧𑐮 𑐩𑑂𑐴𑐶𑐟𑐵 𑐔𑑂𑐰𑐣𑐾𑐐𑐸 ? 𑐀𑐗 𑐢𑐵𑐫𑐾 𑐦𑐸𑐚𑐧𑐮 𑐩𑑂𑐴𑐶𑐟𑐵 𑐕𑐵𑐫𑑂 𑐢𑑂𑐫𑐧𑐵 𑐦𑐸𑐎𑐵𑐔𑑂𑐰𑐣𑐾𑐐𑐸 ? 𑐐𑐸𑐧𑐮𑐫𑑂 𑐦𑐸𑐚𑐧𑐮𑐫𑑂 𑐕𑐸𑑄 𑐣𑑄 𑐎𑐠𑑄𑐫𑐵 𑐳𑐦𑐮𑐟𑐵 𑐔𑐹𑐮𑐵𑐂 𑐩𑐏𑐸, 𑐄𑐧𑐮𑐫𑑂 𑐎𑑂𑐮𑐧 𑐣𑑄 𑐥𑐵𑐫𑑂𑐕𑐶 𑐎𑐠𑑄 𑐣𑑂𑐴𑑂𑐫𑐵𑐫𑐾 𑐦𑐂𑐩𑐏𑐸, 𑐀𑐮𑐾 𑐠𑐖𑑂𑐫𑐵𑑅𑐐𑐸 𑐣𑑂𑐴𑑂𑐫𑐳𑑅 𑐡𑐣𑐾𑐐𑐸 𑐳𑐸𑐬𑐸 𑐖𑐸𑐂 𑑋 𑐕𑐵𑐫𑑂 𑐦𑐸𑐚𑐧𑐮 𑐩𑑂𑐴𑐶𑐟𑐾𑐐𑐸 𑐢𑐫𑐵𑐐𑐸 𑐧𑐴𑐳𑐫𑐵 𑐡𑐠𑐸𑐂 𑐩𑐕𑐶𑐣𑑂𑐡𑑂𑐬 𑐡𑐸𑐣𑐾 ‘𑐗𑐷𑐳𑑄 𑐦𑐸𑐚𑐧𑐮 𑐩𑑂𑐴𑐶𑐟𑐾 𑐩𑐵𑑅, 𑐄𑐮𑐶 𑐖𑐎 𑐩𑐏𑐸 𑐢𑐶𑐳𑐶𑐮𑐵𑐎𑑂𑐎 𑐴𑐾 𑐩𑑂𑐴𑐶𑐟𑐾 𑐩𑐵𑑅’ 𑐢𑐫𑐵𑐐𑐸 𑐏“ 𑐖𑐸𑐮 𑑋 𑐁𑑅𑐫𑐵 𑐳𑐦𑐮𑐟𑐵𑐫𑐵 𑐁𑐢𑐵𑐬 𑐠𑑂𑐰 𑐧𑐴𑐳𑐫𑐵 𑐮𑐶𑐔𑑂𑐰𑑅 𑐏𑑅 𑐢𑐵𑐫𑐾𑐩𑐵𑑅 𑑋

𑐣𑐾𑐥𑐵𑑅𑐫𑐵 𑐦𑐸𑐚𑐧𑐮 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐥𑐶𑐣𑐶 𑐏“ 𑐣𑑂𑐫𑐣𑐾𑐐𑐸 𑐏𑑅𑐳𑐵, 𑐄𑐎𑐶𑐳𑐣𑑄 𑐀𑐏𑐶𑐮 𑐣𑐾𑐥𑐵𑐮 𑐦𑐸𑐚𑐧𑐮 𑐳𑑄𑐑 (𑐊𑐣𑑂𑐦𑐵)𑐫𑐵 𑐏𑑃 𑐣𑑂𑐫𑐣𑐾𑐐𑐸 𑐏𑑅𑐳𑐵 𑐠𑐵𑑄𑐿𑐎𑐣𑑂𑐴𑐫𑑂 𑐡𑐎𑐮𑐫𑑂 𑐰𑑂𑐫𑐰𑐳𑑂𑐠𑐶𑐟 𑐏𑐣𑐾𑐡𑐸𑐐𑐸 𑐎𑑂𑐮𑐧 𑐏𑑅– 𑐩𑐕𑐶𑐣𑑂𑐡𑑂𑐬 𑑋 𑐄𑐎𑐶𑐳𑐣𑑄 𑐩𑐕𑐶𑐣𑑂𑐡𑑂𑐬 𑐁𑑅 𑐊𑐳𑐶𑐫𑐵𑐮𑐷 𑐦𑐸𑐚𑐧𑐮 𑐩𑐴𑐵𑐳𑑄𑐑 (𑐊𑐊𑐦𑐳𑐷) 𑐫𑐵 𑐎𑑂𑐮𑐧 𑐮𑐵𑐂𑐳𑐾𑐣𑑂𑐳 𑐎𑐫𑐵𑐟𑑅𑐐𑐸 𑐚𑐶𑐩 𑐣𑑄 𑐖𑐸𑐮 𑑋 𑐀𑐠𑐾 𑐢𑐫𑐵𑐐𑐸 𑐦𑐸𑐚𑐧𑐮𑐫𑐵 𑐰𑑂𑐫𑐵𑐰𑐳𑐵𑐫𑐶𑐎 𑐎𑑂𑐮𑐧 𑑋 𑐄𑐎𑐶𑑄 𑐴𑐾 𑐏𑑅– 𑐩𑐕𑐶𑐣𑑂𑐡𑑂𑐬𑑄 𑐫𑐵𑐎𑐣𑑄 𑐴𑐾 𑐣𑐾𑐥𑐵𑑅𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑐣𑐵𑑅 𑐣𑑂𑐴𑐵𑐥𑐵𑑄𑐏𑐸𑐳𑐷 𑐊𑐊𑐦𑐳𑐷 𑐎𑐥𑐫𑐵 𑐕𑐣𑑀𑐚 𑐩𑑂𑐴𑐶𑐟𑐾𑐟𑑂𑐫𑑄𑐐𑐸 𑐡𑐸, 𑑋 𑐄𑐎𑐶𑐫𑐵 𑐀𑐬𑑂𑐠 𑐩𑐕𑐶𑐣𑑂𑐡𑑂𑐬 𑐊𑐳𑐶𑐫𑐵𑐮𑐷𑐳𑑂𑐟𑐬𑐫𑐵 𑐎𑑂𑐮𑐧 𑐣𑑄 𑐖𑐹𑐐𑐸 𑐡𑐸 𑑋

𑐥𑑂𑐬𑐨𑐵𑐰𑐱𑐵𑐮𑐷 𑐫𑐵𑐟𑑂𑐬𑐵
𑐣𑐶𑐡“ 𑐣𑑂𑐴𑑂𑐫𑑅𑐫𑐵 𑐏“ 𑐮𑐶𑐳𑐵 𑐎𑐫𑐵𑑅 𑐮𑑂𑐴𑐵𑐫𑐾𑐐𑐸 𑐏𑑅𑐳𑐵 𑐄𑐧𑐮𑐫𑑂 𑐀𑐠𑐾 𑐢𑐫𑐵𑐐𑐸 𑑒𑑐𑑗𑑖 𑐳𑐵𑐮𑐫𑑂 𑐩𑐔𑑂𑐕𑐶𑐣𑑂𑐡𑑂𑐬 𑐊 𑐜𑐶𑐨𑐶𑐖𑐣 𑐟𑑂𑐫𑐵𑐎𑐹𑐧𑐮𑐫𑑂 𑐮𑐶𑐐𑐫𑐵 𑐀𑐣𑑂𑐟𑐶𑐩 𑐎𑐵𑐳𑐵𑐫𑑂 𑐁𑐬𑑂𑐩𑐷𑐫𑐵𑐟 𑐧𑐸𑐎𑐹𑐐𑐸 𑐏𑑅 𑑋 𑐠𑑂𑐰 𑐎𑐵𑐳𑐵 𑐖𑐸𑐂 𑐣𑑂𑐴𑑂𑐫𑑅 𑐟𑐎𑐫𑐵 𑐳𑐩𑐷𑐎𑐬𑐞 𑐏𑑅, 𑐩𑐕𑐶𑐣𑑂𑐡𑑂𑐬𑑄 𑐮𑐶𑐐 𑐟𑑂𑐫𑐵𑐎𑐾𑐐𑐸 𑐏𑑅𑐳𑐵 𑐠𑑂𑐰 𑐎𑐵𑐳𑐵 𑐟𑑂𑐫𑐵𑐎𑐾 𑐴𑐾 𑐩𑐵𑑅, 𑐧𑐬𑐵𑐧𑐬𑐷 𑐀𑐠𑐰𑐵 𑐴𑐵𑐬𑐫𑐵 𑐳𑑂𑐠𑐶𑐟𑐶𑐂 𑐮𑐶𑐐 𑐄𑐥𑐵𑐢𑐶 𑐁𑐬𑑂𑐩𑐷𑐫𑐵 𑐮𑑂𑐴𑐵𑐟𑐫𑑂 𑐰𑐣𑐷 𑑋 𑐮𑐳𑐟𑐵𑐫𑐵 𑐏“ 𑐩𑐕𑐶𑐣𑑂𑐡𑑂𑐬 𑐠𑑂𑐰 𑐎𑐵𑐳𑐵𑐫𑑂 𑐟𑑂𑐫𑐵𑐟 𑑋 𑐕𑐐𑐹 𑐎𑐠𑑄 𑐄𑐧𑐮𑐫𑑂 𑐥𑐹𑐰𑑄𑐎 𑐮𑐶𑐐𑐫𑑂 ‘𑐣𑐾𑐎 𑐚𑐸 𑐣𑐾𑐎’ 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐖𑐹𑐐𑐸 𑐏𑑅, 𑐕𑐎𑑂𑐰𑑅 𑐕𑐎𑑂𑐰𑑅 𑐩𑐕𑐶𑐣𑑂𑐡𑑂𑐬 𑐮𑐶𑐐 𑐟𑑂𑐫𑐵𑐎𑐷 𑐠𑐾𑑄 𑐔𑑂𑐰𑐣𑐷𑐐𑐸, 𑐴𑐵𑐎𑐣𑑄 𑐩𑐾𑐐𑐸 𑐂𑐮𑐫𑑂 𑐩𑐕𑐶𑐣𑑂𑐡𑑂𑐬𑑄 𑐮𑐶𑐐 𑐟𑑂𑐫𑐵𑐎𑐾 𑐦𑐂𑐩𑐏𑐸 𑐠𑐾𑑄 𑐔𑑂𑐰𑐣𑐷𑐐𑐸 𑑋 𑐠𑐸𑐐𑐸𑐳𑐷 𑐠𑐠𑐾 𑐕𑐟𑐶𑑄 𑐩𑐖𑐹, 𑐮𑐶𑐐 𑐄𑐥𑐵𑐢𑐷 𑐟𑑂𑐫𑐵𑐎𑐾𑐐𑐸 𑐗𑑂𑐰𑐮𑐫𑑂 𑐩𑐕𑐶𑐣𑑂𑐡𑑂𑐬𑑄 𑐣𑑂𑐴𑑂𑐫𑐵𑐎𑐹𑐐𑐸 𑐫𑐵𑐟𑑂𑐬𑐵 𑐟𑐳𑐎𑑄 𑐥𑑂𑐬𑐨𑐵𑐰𑐱𑐵𑐮𑐷 𑑋 𑐠𑐸𑐎𑐶𑐫𑐵 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐥𑑂𑐬𑐩𑐵𑐞 𑐢𑐫𑐵𑐐𑐸 𑐴𑐾 𑐩𑐔𑑂𑐕𑐶𑐣𑑂𑐡𑑂𑐬 𑐩𑑂𑐴𑐶𑐟𑐹𑐐𑐸 𑐎𑐵𑐳𑐵 𑐴𑐾 𑐏𑑅 𑑋 𑐥𑐹𑐰𑑄𑐎 𑐮𑐶𑐐 𑐎𑐵𑐳𑐵𑐫𑑂 𑐩𑐕𑐶𑐣𑑂𑐡𑑂𑐬 𑐕𑐐𑐹 𑐣𑑄 𑐎𑐵𑐳𑐵 𑐩𑐧𑐹 𑑋 𑐀𑐠𑐾 𑐢𑐫𑐵𑐐𑐸 𑐥𑐹𑐰𑑄𑐎 𑐮𑐶𑐐𑐫𑑂 𑐩𑐕𑐶𑐣𑑂𑐡𑑂𑐬 𑐀𑐥𑐬𑐵𑐖𑐶𑐟 𑐖𑐸𑐮 𑑋 𑐩𑐸𑐎𑑂𑐎𑑄 𑑑𑑓 𑐐𑐹 𑐎𑐵𑐳𑐵𑐫𑑂 𑐩𑐕𑐶𑐣𑑂𑐡𑑂𑐬𑑄 𑑑𑑑 𑐐𑐹 𑐎𑐵𑐳𑐵 𑐟𑑂𑐫𑐵𑐎𑐮, 𑐀𑐮𑐾 𑐣𑐶𑐐𑐹 𑐎𑐵𑐳𑐵 𑐧𑐬𑐵𑐧𑐬𑐷 𑐩𑑂𑐴𑐶𑐟𑐮 𑑋 𑐁𑑅 𑐥𑐹𑐰𑑄𑐎 𑐮𑐶𑐐𑐫𑑂 𑐕𑐐𑐹 𑐣𑑄 𑐎𑐵𑐳𑐵 𑐩𑐧𑐸𑐂𑐐𑐸 𑐢𑐫𑐵𑐐𑐸 𑐣𑑄 𑐮𑐵 𑐐𑐖𑑂𑐖𑐧 𑐏𑑅 𑐣𑐶, 𑐩𑐏𑐸𑐮𑐵 ?

𑐐𑐖𑑂𑐖𑐧𑐫𑐵 𑐏𑑃 𑐠𑐣𑑄 𑐟𑐸𑑄 𑐎𑑂𑐰𑐔𑐵𑐂 𑐩𑐏𑐸 𑑋 𑐠𑐸𑐥𑐶𑑄 𑑑𑑓 𑐐𑐹 𑐎𑐵𑐳𑐵𑐫𑑂 𑐩𑐕𑐶𑐣𑑂𑐡𑑂𑐬𑑄 𑐗𑑂𑐰𑑅𑐮𑐵𑐎𑑂𑐎 𑑑𑑑 𑐐𑐹 𑐎𑐵𑐳𑐵𑐫𑑂 𑐮𑐵 𑐕𑐐𑐹 𑐣𑑄 𑐐𑑀𑐮 𑐩𑐣𑑅 𑑋 𑐀𑐠𑐾 𑐢𑐫𑐵𑐐𑐸 𑑑𑑑 𑐎𑐵𑐳𑐵𑐫𑑂 𑐎𑑂𑐮𑐶𑐣 𑐳𑐶𑐚 𑑋 𑐠𑑂𑐰 𑐣𑐾𑐥𑐵𑑅𑐫𑐵 𑐮𑐶𑐐 𑐂𑐟𑐶𑐴𑐵𑐳𑐫𑑂 𑐎𑐷𑐬𑑂𑐟𑐶𑐩𑐵𑐣 𑐴𑐾 𑐏𑑅 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐡𑐎𑐮𑐫𑑂 𑐀𑐥𑑂𑐰𑑅 𑐱𑑂𑐬𑐾𑐫 𑐰𑐣𑐷– 𑐐𑑀𑐮𑐬𑐎𑑂𑐲𑐎 𑐰𑐶𑐱𑐵𑐮 𑐱𑑂𑐬𑐾𑐲𑑂𑐛𑐫𑐵𑐟 𑑋 𑐀𑐮𑐾 𑐰𑐫𑐵 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑑅𑐣𑐾 𑐔𑑂𑐰𑐣𑐵𑑅 𑐩𑑂𑐴𑐶𑐟𑐷𑐥𑐶𑑄 𑐜𑐶𑐦𑐾𑐣𑑂𑐜𑐬𑐟, 𑐰𑐶𑐱𑐾𑐲𑐟𑑅 𑐬𑑄𑐖𑐶𑐟 𑐢𑐶𑐩𑐵𑐮, 𑐡𑐾𑐰𑐾𑐣𑑂𑐡𑑂𑐬 𑐟𑐵𑐩𑐵𑐒, 𑐕𑐶𑐬𑐶𑐒 𑐐𑐸𑐬𑐸𑐒 𑐰 𑐌𑐩𑑀𑐬𑐵𑐖𑐵 𑐣𑐸𑐬𑐾𑐣𑐫𑐵𑐟 𑑋 𑐩𑐕𑐶𑐣𑑂𑐡𑑂𑐬𑑄 𑐊𑐣𑐁𑐬𑐚𑐷𑐰𑐶𑐬𑐸𑐡𑑂𑐢𑐫𑐵 𑐣𑑂𑐴𑐵𑐥𑐵𑑄𑐐𑐸 𑐎𑐵𑐳𑐵𑐫𑑂 𑐐𑑀𑐮 𑐣𑑅𑐐𑐸 𑐏𑑅, 𑐀𑐮𑐾 𑐀𑐣𑑂𑐟𑐶𑐩 𑐎𑐵𑐳𑐵𑐫𑑂 𑐐𑑀𑐮 𑐣𑐮, 𑐊𑐥𑐷𑐊𑐦𑐰𑐶𑐬𑐸𑐡𑑂𑐢 𑑋

𑐮𑐶𑐐𑐫𑑂 𑐩𑐾𑐐𑐸 𑐕𑐐𑐹 𑐣𑑄 𑐢𑐵𑐥𑐹 𑐡𑐸, ‘𑐎𑐵𑐳𑐵 𑐟𑑂𑐫𑐵𑐂𑐐𑐸 𑐦𑐬𑐰𑐵𑐬𑑂𑐜𑐫𑐵 𑐐𑑂𑐰𑐵𑐴𑐵𑐮𑐶𑑄 𑐏𑑅, 𑐮𑐶𑐐 𑐟𑑂𑐫𑐵𑐂𑐐𑐸 𑐢𑐫𑐵𑐐𑐸 𑐜𑐶𑐦𑐾𑐣𑑂𑐜𑐬𑐫𑐵 𑐐𑑂𑐰𑐵𑐴𑐵𑐮𑐶𑑄 𑑋’ 𑐀𑐠𑐾 𑐢𑐵𑐫𑐾𑐰𑑄 𑐟𑐸𑑄 𑐩𑐕𑐶𑐣𑑂𑐡𑑂𑐬𑐫𑐵 𑐁𑐎𑑂𑐬𑐩𑐞 𑐎𑐩𑐖𑑀𑐬 𑐢𑐫𑐵𑐐𑐸 𑐢𑐵𑑅𑐳𑐵 𑐩𑐏𑐸 𑑋 𑐩𑐕𑐶𑐣𑑂𑐡𑑂𑐬𑑄 𑐥𑐹𑐬𑐵 𑐮𑐶𑐐𑐫𑐵 𑐗𑑂𑐰𑐮𑐫𑑂 𑐣𑐶𑐬𑑂𑐞𑐵𑐫𑐎 𑐂𑐮𑐫𑑂 𑐣𑐶𑐬𑑂𑐞𑐵𑐫𑐎 𑐐𑑀𑐮 𑐫𑐵𑑅𑐐𑐸 𑐡𑐸 𑑋 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐮𑐵 𑐩𑐕𑐶𑐣𑑂𑐡𑑂𑐬 𑐮𑐶𑐐𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐐𑑀𑐮 𑐫𑐵𑑅𑐐𑐸 𑐚𑐶𑐩 𑐖𑐸𑐮– 𑐀𑐠𑐾 𑐢𑐫𑐵𑐐𑐸 𑑒𑑐 𑐐𑑀𑐮 𑑋 𑐠𑐸𑐥𑐶𑑄𑐩𑐢𑑂𑐫𑐾 𑐧𑐕𑐶 𑐢𑐫𑐵𑐠𑐾𑑄 𑐐𑑀𑐮 𑐎𑐵𑐳𑐵𑐫𑐵 𑐣𑐶𑐬𑑂𑐞𑐵𑐫𑐎 𑐖𑐸𑐮, 𑐀𑐠𑐾 𑐢𑐫𑐵𑐐𑐸 𑐰 𑐴𑐾 𑐐𑑀𑐮𑑄 𑐩𑐕𑐶𑐣𑑂𑐡𑑂𑐬 𑐟𑑂𑐫𑐵𑐟 𑑋

𑐠𑐸𑐎𑐶𑐫𑐵 𑐡𑐎𑐮𑐫𑑂 𑐧𑐵𑑄𑐮𑐵𑑅𑐐𑐸 𑐄𑐡𑐵𑐴𑐬𑐞 𑐮𑐵 𑐩𑐣𑐵𑐒𑐰𑐶𑐬𑐸𑐡𑑂𑐢 𑐟𑑂𑐫𑐵𑐎𑐹𑐐𑐸 𑐎𑐵𑐳𑐵 𑐴𑐾 𑐖𑐸𑐮 𑑋 𑐮𑐶𑐐𑐫𑐵 𑐏𑐸𑐐𑐹𑐐𑐸 𑐔𑐬𑐞𑐫𑑂 𑐩𑐕𑐶𑐣𑑂𑐡𑑂𑐬 𑐰 𑐩𑐣𑐵𑐒 𑐡𑐠𑐸𑐂 𑐎𑐵𑐳𑐵 𑐖𑐹𑐐𑐸 𑐏𑑅, 𑐀𑐮𑐾 𑐳𑐎𑐳𑐶𑐫𑐵𑑄 𑐀𑐣𑐸𑐩𑐵𑐣 𑐏𑑅, 𑐠𑑂𑐰 𑐴𑐾 𑐕𑐐𑐹 𑐎𑐵𑐳𑐵𑑄 𑐮𑐶𑐐 𑐄𑐥𑐵𑐢𑐶𑐫𑐵 𑐣𑐶𑐬𑑂𑐞𑐫 𑐖𑐸𑐂 𑑋 𑐢𑐵𑐠𑐾𑑄 𑐀𑐠𑐾 𑐴𑐾 𑐖𑐸𑐮 𑑋 𑐕𑐐𑐹 𑐂𑐮𑐫𑑂 𑐎𑐵𑐳𑐵 𑐧𑐬𑐵𑐧𑐬𑐷𑐂 𑐴𑐾 𑐎𑑂𑐰𑐔𑐵𑐂𑐐𑐸 𑐏𑐣𑐾 𑐡𑐫𑐾𑐢𑐸𑑄𑐎𑐹𑐐𑐸 𑐏𑑅, 𑐟𑐬 𑐎𑐵𑐳𑐵𑐫𑐵 𑐣𑐶𑐐𑐹𑐐𑐸 𑐴𑐵𑐦𑐫𑐵 𑐂𑐣𑑂𑐖𑐸𑐬𑐷 𑐂𑐮𑐫𑑂 𑐳𑐸𑐣𑐶𑐮 𑐧𑐮𑑄 𑐦𑑂𑐬𑐶 𑐎𑐶𑐎𑐥𑐵𑐏𑐾𑑄 𑐳𑐸𑐣𑑂𑐡𑐬 𑐐𑑀𑐮 𑐫𑐵𑐟 𑑋 𑐠𑑂𑐰 𑐴𑐾 𑐐𑑀𑐮𑑄 𑐩𑐕𑐶𑐣𑑂𑐡𑑂𑐬𑑄 𑐎𑐵𑐳𑐵 𑐟𑑂𑐫𑐵𑐎𑐹𑐐𑐸 𑐮𑐵 𑐖𑐸𑐮, 𑐮𑐶𑐳𑐾𑑄 𑐮𑐶𑐐𑐫𑐵 𑐣𑐶𑐬𑑂𑐞𑐫 𑐣𑑄 𑐠𑑂𑐰 𑐴𑐾 𑐐𑑀𑐮𑑄 𑐖𑐸𑐮 𑐢𑐵𑑅𑐳𑐵𑑄 𑐕𑐸𑑄 𑐩𑐥𑐵𑑅 𑑋

𑐄𑐎𑐶𑑄 𑐴𑐾 𑐳𑐸𑐣𑐶𑐮 𑐥𑐹𑐬𑐵 𑐮𑐶𑐐𑐫𑐵 𑐡𑐎𑐮𑐫𑑂 𑐄𑐟𑑂𑐎𑐺𑐲𑑂𑐚 𑐎𑐵𑐳𑐵𑐩𑐶 𑐣𑑄 𑐖𑐸𑐮 𑑋 𑐀𑐮𑐾 𑐰𑐶𑐱𑐵𑐮, 𑐄𑐟𑑂𑐎𑐺𑐲𑑂𑐚 𑐐𑑀𑐮𑐬𑐎𑑂𑐲𑐎 𑑋 𑐄𑐮𑐶𑐖𑐎 𑐩𑐏𑐸 𑐎𑐥𑑂𑐟𑐵𑐣 𑐳𑐸𑐖𑐮 𑐱𑑂𑐬𑐾𑐲𑑂𑐛𑐫𑐵 𑐨𑐹𑐩𑐶𑐎𑐵𑐫𑐵𑐟 𑐣𑑄 𑐟𑑂𑐰𑑅𑐦𑐶𑐎𑐾 𑐩𑐖𑐶𑐄 𑑋 𑐳𑐸𑐖𑐮𑑄 𑐚𑐶𑐩𑐫𑐵 𑐣𑐶𑑄𑐟𑐶𑑄 𑐩𑐵𑑅𑐎𑐠𑑄 𑐩𑐵𑑅𑐧𑐮𑐫𑑂 𑐥𑐵𑐫𑑂𑐕𑐶 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐧𑐶𑐮, 𑐀𑐠𑐾 𑐢𑐫𑐵𑐐𑐸 𑐐𑐸𑐧𑐮𑐾𑑄 𑐰 𑐦𑐬𑐰𑐵𑐬𑑂𑐜 𑐖𑐸𑐫𑐵𑑅 𑐩𑑂𑐴𑐶𑐟𑐮, 𑐐𑐸𑐧𑐮𑐾𑑄 𑐩𑐶𑐜𑐦𑐶𑐮𑑂𑐜𑐬, 𑐀𑐮𑐾 𑐐𑐸𑐧𑐮𑐾𑑄 𑐜𑐶𑐦𑐾𑐣𑑂𑐜𑐬 𑐟𑐎𑑄 𑑋 𑐣𑐵𑐥𑐣𑐵𑐥𑑄 𑐩𑐕𑐶𑐣𑑂𑐡𑑂𑐬𑐫𑐵 𑐠𑑂𑐰 𑐳𑐦𑐮𑐟𑐵𑐫𑐵 𑐕𑐐𑐹 𑐎𑐵𑐬𑐞 𑐰𑐶𑐡𑐾𑐱𑐷 𑐎𑐵𑐳𑐵𑐩𑐶 𑐁𑐣𑑂𑐡𑑂𑐬𑐾𑐳 𑐣𑐶𑐁𑐫𑐵 𑐄𑐟𑑂𑐎𑐺𑐲𑑂𑐚 𑐥𑑂𑐬𑐡𑐬𑑂𑐱𑐣 𑐣𑑄 𑐏𑑅 𑑋 𑐩𑐶𑐜𑐦𑐶𑐮𑑂𑐜𑐫𑑂 𑐰 𑐴𑐾 𑐏𑑅– 𑐩𑐕𑐶𑐣𑑂𑐡𑑂𑐬𑐫𑐵 𑐎𑐵𑐳𑐵𑐫𑐵 𑐣𑐶𑐬𑑂𑐩𑐵𑐟𑐵 𑑋

𑐩𑐹 𑐏“ 𑐕𑐸 𑐢𑐵𑑅𑐳𑐵 𑐩𑐕𑐶𑐣𑑂𑐡𑑂𑐬𑑄 𑐮𑐶𑐐 𑐀𑑅𑐥𑐸𑐎 𑐴𑐾 𑐟𑑂𑐫𑐵𑐎𑐵 𑐎𑑂𑐫𑐣 𑑋 𑐮𑐶𑐐𑐫𑐵 𑐀𑐣𑑂𑐟𑑂𑐫𑐫𑑂 𑐩𑐕𑐶𑐣𑑂𑐡𑑂𑐬𑐫𑐵 𑐣𑐵𑐩𑐫𑑂 𑐡𑐸𑐐𑐸 𑐮𑑂𑐫𑐵𑑅 𑐏𑑅– 𑑓𑑕 𑑋 𑐁𑐬𑑂𑐩𑐷 𑐴𑐵𑐎𑐣𑑄 𑐕𑐎𑑂𑐰𑑅 𑐣𑐶𑐐𑐹𑐐𑐸 𑐠𑐵𑐳𑐫𑑂 𑐮𑐵𑐟, 𑐟𑐬 𑐰𑐫𑐵𑐐𑐸 𑐮𑑂𑐴𑐵𑐟𑐫𑑂 𑐢𑐵𑑅𑐳𑐵 𑑒𑑓 𑐮𑑂𑐫𑐵𑑅 𑐖𑐎 𑐡 𑑋 𑐀𑐠𑐾 𑐢𑐫𑐵𑑅𑐐𑐸 𑐣𑐶𑐐𑐹 𑐚𑐶𑐩 𑐡𑐠𑐸𑐫𑐵 𑐀𑐣𑑂𑐟𑐬 𑐴𑐾 𑑑𑑒 𑐮𑑂𑐫𑐵𑑅 𑐖𑐸𑐮 𑑋 𑐮𑐶𑐐𑐫𑑂 𑐠𑐸𑐮𑐶 𑐀𑐣𑑂𑐟𑐬 𑐖𑐸𑐂𑐐𑐸 𑐢𑐫𑐵 𑐫𑐎𑑂𑐰 𑐴𑐾 𑐏𑑅 𑑋 𑐠𑑂𑐰 𑐴𑐾 𑐀𑐣𑑂𑐟𑐬𑐫𑐵 𑐎𑐵𑐬𑐞𑑄 𑐮𑐶𑐐𑐫𑐵 𑐮𑐶𑐥𑐵𑑄𑐐𑐸 𑐣𑐶𑐐𑐹 𑐔𑐬𑐞𑐫𑐵 𑐎𑐵𑐳𑐵 𑐣𑑂𑐴𑑂𑐫𑑅 𑐴𑐾 𑐩𑐕𑐶𑐣𑑂𑐡𑑂𑐬𑑄 𑐮𑐶𑐐 𑐟𑑂𑐫𑐵𑐎𑐷𑐐𑐸 𑐣𑐶𑐱𑑂𑐔𑐶𑐟 𑐖𑐹𑐐𑐸 𑑋 𑐠𑐸𑐎𑐶𑐫𑐵 𑐀𑐬𑑂𑐠 𑐕𑐸 𑐣𑑄 𑐏𑑅 𑐢𑐵𑑅𑐳𑐵 𑐩𑐕𑐶𑐣𑑂𑐡𑑂𑐬𑐫𑐵𑐟 𑐥𑑂𑐬𑐟𑐶𑐡𑑂𑐰𑐣𑑂𑐡𑑂𑐰𑐷 𑐚𑐶𑐩𑐟𑐫𑑂𑐳𑑄 𑐕𑐸𑑄 𑐎𑐠𑑄𑐫𑐵 𑐔𑐸𑐣𑑁𑐟𑐷 𑐴𑐾 𑐧𑐷𑐩𑐦𑐸 𑑋
𑐴𑑂𑐫𑐵𑐚𑑂𑐬𑐶𑐎 𑐖𑐸𑐂𑐮𑐵 ?
𑐣𑐶𑐡“ 𑐣𑑂𑐴𑑂𑐫𑑅𑐫𑐵 𑐮𑐶𑐐𑐫𑑂 𑐩𑐕𑐶𑐣𑑂𑐡𑑂𑐬𑑄 𑐩𑐣𑐵𑐒𑐫𑐵 𑐧𑐔𑑂𑐕𑐶 𑐎𑐵𑐳𑐵𑐩𑐶, 𑐀𑐮𑐾 𑐠𑑂𑐬𑐷 𑐳𑑂𑐚𑐵𑐬𑐫𑐵 𑐕𑐸𑑄 𑐨𑐔𑐵 𑐎𑐵𑐳𑐵𑐩𑐶 𑐟𑐫𑐵𑑅 𑐳𑑂𑐚𑐵𑐬 𑐚𑐶𑐩 𑐡𑐫𑐾𑐎𑐹𑐐𑐸 𑐏𑑅 𑑋 𑐦𑐸𑐚𑐧𑐮𑐫𑐵 𑐠𑑂𑐰 𑐣𑑄 𑐣𑐶𑐫𑐩 𑐏𑑅– 𑐳𑑂𑐚𑐵𑐬 𑐎𑐵𑐳𑐵𑐩𑐶𑑄 𑐖𑐵𑑅𑐐𑐸 𑐚𑐶𑐩 𑐡𑐫𑐾𑐎𑐵𑑄 𑐖𑐎 𑐔𑑂𑐫𑐵𑐩𑑂𑐥𑐶𑐫𑐣 𑐖𑐸𑐂𑐦𑐂𑐩𑐏𑐸 𑑋 𑐢𑑂𑐫𑐧𑐵𑑄 𑐮𑐶𑐐 𑐄𑐥𑐵𑐢𑐶 𑐣𑑂𑐫𑐵𑐣𑐵 𑐎𑐵𑐫𑐾𑐦𑐂𑐩𑐏𑐸 𑐣𑑄 𑐢𑐵𑐂 𑑋 𑐮𑐶𑐐 𑐟𑑂𑐫𑐵𑐎𑐾𑐟 𑐮𑐵 𑐳𑑂𑐚𑐵𑐬 𑐎𑐵𑐳𑐵𑐩𑐶 𑐩𑐵𑐮 𑐴𑐾, 𑐟𑐬 𑐠𑐸𑐥𑐶𑑄 𑐎𑐵𑐳𑐵𑐩𑐶𑐟𑐫𑑂𑐟 𑐄𑐟𑐶𑐎𑑄 𑐧𑐵𑑄𑐮𑐵𑐎 𑐰𑑂𑐫𑐰𑐳𑑂𑐠𑐵𑐥𑐣 𑐣𑑄 𑐫𑐵𑐫𑐾𑐩𑐵𑑅 𑑋 𑐩𑐕𑐶𑐣𑑂𑐡𑑂𑐬 𑐠𑐠𑐾 𑐣𑑄 𑐫𑐵𑑅𑐐𑐸 𑐡𑐸 𑑋 𑐠𑐸𑐎𑐷𑐫𑐵 𑐱𑑂𑐬𑐾𑐫 𑐢𑐵𑑅𑐳𑐵 𑐣𑐶𑐩𑑂𑐴𑐾𑐳𑐶𑐟𑑄 𑐰𑐣𑐾𑐩𑐵𑑅 𑑋 𑐕𑐩𑑂𑐴 𑐮𑐵 𑐖𑐸𑐮 𑐥𑑂𑐬𑐱𑐶𑐎𑑂𑐲𑐎 𑐥𑑂𑐬𑐰𑐾𑐱 𑐎𑐸𑐚𑐰𑐵𑐮 𑑋 𑐀𑐮𑐾 𑐩𑐾𑐩𑑂𑐴 𑐖𑐸𑐮– 𑐰𑑂𑐫𑐰𑐳𑑂𑐠𑐵𑐥𑐎 𑐀𑐣𑐶𑐮 𑐱𑑂𑐬𑐾𑐲𑑂𑐛 𑑋

𑐀𑐣𑐶𑐮 𑐀𑐖𑑂𑐫𑐵𑑅𑐩𑑂𑐴 𑐩𑐣𑐹 𑐏𑑅, 𑐐𑐸𑐩𑑂𑐴𑐾𑐳𑐶𑐣𑑄 𑐩𑐕𑐶𑐣𑑂𑐡𑑂𑐬𑐫𑐵 𑐦𑐸𑐚𑐧𑐮 𑐚𑐶𑐩𑐫𑐵𑐟 𑐠𑐣 𑐟𑐎 𑐠𑑂𑐫𑑄𑐎𑐾𑐟 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐮 𑑋 𑐰𑐫𑐵𑐐𑐸 𑐴𑐾 𑐎𑐸𑐟𑐮𑑄 𑐏𑑅 𑐦𑐸𑐚𑐧𑐮 𑐴𑐾 𑐩𑑂𑐴𑐶𑐟𑐾 𑐟𑑂𑐰𑑅𑐟𑐾𑐟𑑂𑐫𑑄𑐐𑐸 𑐎𑑂𑐮𑐧𑐫𑐵𑐟 𑐀𑐣𑑂𑐟𑐟𑑅 𑐮𑐶𑐐 𑐔𑑂𑐫𑐵𑐩𑑂𑐥𑐶𑐫𑐣 𑐡𑐫𑐾𑐎𑐹𑐐𑐸 𑑋 𑐰 𑐣𑑄 𑐕𑐎𑑂𑐰 𑐩𑐏𑐸, 𑐣𑐶𑐎𑑂𑐰𑑅 𑑋 𑐄𑐎𑐶𑐳𑐣𑑄 𑐗𑑂𑐰𑐮𑐵𑐎 𑑋
𑐠𑐣 𑐠𑐵𑐫𑑂 𑐁𑑅 𑐩𑐾𑐐𑐸 𑐣𑑂𑐴𑑂𑐫𑐳𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸, ‘𑐕𑐸 𑐩𑐕𑐶𑐣𑑂𑐡𑑂𑐬𑑄 𑐩𑐾𑐐𑐸 𑐥𑐵𑐮𑐫𑑂 𑐣𑑄 𑐮𑐶𑐐 𑐟𑑂𑐫𑐵𑐎𑐾 𑐦𑐂𑐮𑐵 ?’ 𑐀𑐠𑐾 𑐖𑐸𑐮 𑐢𑐵𑑅𑐳𑐵 𑐗𑑂𑐰𑐮𑐵𑐎 𑐳𑑂𑐰𑐎𑑂𑐰𑑅 𑐮𑐶𑐐 𑐟𑑂𑐫𑐵𑐎𑐹𑐐𑐸 𑐖𑐸𑐂 𑑋 𑐀𑐠𑐾 𑐢𑐫𑐵𑑅𑐐𑐸 𑐔𑑂𑐫𑐵𑐩𑑂𑐥𑐶𑐫𑐣𑐫𑐵 𑐴𑑂𑐫𑐵𑐚𑑂𑐬𑐶𑐎 𑑋

𑐳𑐴𑐶𑐡 𑐳𑑂𑐩𑐵𑐬𑐎 𑐮𑐶𑐐𑐫𑐵 𑐂𑐟𑐶𑐴𑐵𑐳 𑑐𑑑𑑑 𑐳𑐵𑐮𑐥𑐵𑐏𑐾𑑄 𑐳𑐸𑐬𑐸 𑐖𑐸𑐂 𑑋 𑐠𑑂𑐰 𑐣𑐾𑐥𑐵𑑅𑐫𑐵 𑐎𑐵𑐳𑐵 𑐏𑑂𑐫𑐮𑐫𑑂 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐰 𑐁𑑅 𑐟𑐎𑑄 𑐣𑑂𑐴𑑂𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐕𑐐𑐹𑐫𑐵𑑄 𑐕𑐐𑐹 𑐖𑐎 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐏𑑅 𑑋 𑐠𑑂𑐰 𑐮𑑂𑐫𑐵𑐏𑑄 𑐠𑐸𑐎𑐶𑐫𑐵 𑐂𑐟𑐶𑐴𑐵𑐳 𑐣𑑄 𑐟𑐳𑐎𑑄 𑐟𑐵𑑅𑐴𑐵𑐎𑑅 𑑋 𑐠𑐸𑐮𑐶 𑐟𑐵𑑅𑐴𑐵𑐎𑑅𑐐𑐸 𑐂𑐟𑐶𑐴𑐵𑐳 𑐡𑐸𑐐𑐸 𑐮𑐶𑐐𑐫𑑂 𑐣𑑄 𑐗𑑂𑐰𑐮𑐵𑐎 𑐳𑑂𑐰𑐎𑑅 𑐄𑐥𑐵𑐢𑐶 𑐟𑑂𑐫𑐵𑐎𑐹𑐥𑐶𑑄 𑐳𑑂𑐰𑑄𑐐𑐹 𑐴𑐾 𑐖𑐎 𑐚𑐶𑐩 𑐡𑐸, 𑐁𑐬𑐳𑐷𑐚𑐷, 𑐩𑐣𑐵𑐒 𑐰 𑐥𑐸𑐮𑐶𑐳 𑑋 𑐁𑑅 𑐩𑐕𑐶𑐣𑑂𑐡𑑂𑐬𑐫𑐵 𑐣𑑂𑐴𑑂𑐫𑑅𑐣𑐾 𑐠𑐖𑑂𑐫𑐵𑑅𑐐𑐸 𑐄𑐥𑐮𑐧𑑂𑐢𑐷 𑐔𑐹𑐮𑐵𑐎𑐾𑐐𑐸 𑐀𑐰𑐳𑐬 𑐡𑐸 𑑋 𑐩𑐕𑐶𑐣𑑂𑐡𑑂𑐬 𑐠𑐠𑐾 𑐫𑐵𑐫𑐾𑐦𑐂 𑐮𑐵 ? 𑐫𑐵𑐟 𑐢𑐵𑑅𑐳𑐵 𑐮𑐵 𑐳𑐎𑐳𑐶𑐣𑑄 𑐩𑐕𑐶𑐣𑑂𑐡𑑂𑐬 𑐢𑐵𑐠𑐾𑑄𑐫𑐵 𑐔𑑂𑐫𑐵𑐩𑑂𑐥𑐶𑐫𑐣 𑐏𑑅 𑐢𑐎𑐵𑑅 𑐳𑑂𑐰𑐷𑐎𑐵𑐬 𑐫𑐵𑐫𑐾𑐩𑐵𑐮𑐷 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS