Read news in NepalBhasa text-- www.hamroschool.com BACK 𑐫𑐵𑐟𑑂𑐬𑐵𑑄 𑐣𑑂𑐴𑐹𑐐𑐸 𑐀𑐣𑐸𑐨𑐰 𑐧𑐶𑐫𑐵𑐔𑑂𑐰𑐣𑐷 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐵𑐟𑑂𑐬𑐵𑑄 𑐣𑑂𑐴𑐹𑐐𑐸 𑐀𑐣𑐸𑐨𑐰 𑐧𑐶𑐫𑐵𑐔𑑂𑐰𑐣𑐷

𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣

𑐣𑑂𑐴𑐵𑐥𑐵𑑄𑐐𑐸 𑐣𑑂𑐴𑐶
𑐣𑐾.𑐳𑑄𑑄 𑑑𑑑𑑔𑑒 𑐳𑐶𑐮𑑂𑐮𑐵𑐠𑑂𑐰….. 𑐧𑐶𑐴𑐷𑐰𑐵𑑅 𑑋 𑐕𑐐𑐹 𑐰𑐶𑐱𑐾𑐲 𑐖𑑂𑐫𑐵𑑄 𑐴𑐾𑐚𑑁𑑄𑐜𑐵𑐫𑐵 𑐣𑐶𑐩𑑂𑐟𑐶𑑄 𑐣𑑂𑐴𑑂𑐫𑐵𑐣𑐵 𑑋 𑐖𑑅𑐕𑐶𑐥𑐵𑑅 𑐳𑑂𑐰𑐟𑐵𑑅 𑐂𑐮𑐫𑑂 𑐮𑐏𑐟𑐶𑐬𑑂𑐠𑑄 𑐦𑑄𑐥𑐶𑐫𑐵 𑐮𑑃𑐥𑐸 𑐮𑐶𑐣𑐵? 𑐨𑐶𑐩𑐦𑐾𑐡𑐷 𑐖𑐸𑐫𑐵𑑅 𑐠𑑂𑐫𑑄𑐩𑐠𑑂𑐫𑑄 𑐥𑑂𑐫𑐑𑑁 𑐧𑐶𑐎𑐵𑑅 𑐴𑐾𑐚𑑁𑑄𑐜𑐵 𑐠𑑂𑐫𑑄𑐎𑐵 𑑋

𑐎𑐮𑐵𑐎𑐵𑐬, 𑐥𑐟𑑂𑐬𑐎𑐵𑐬 𑐥𑐵𑐳𑐵 𑐄𑐡𑐾𑐣 𑐣𑑂𑐴𑐹𑐳𑐵𑐫𑑂𑐩𑐶 𑐖𑐶𑐐𑐸 𑐳𑑂𑐎𑐸𑐚𑐬 𑐮𑐶𑐄𑐣𑐾 𑑋 𑐩𑑀𑐚𑐬𑐳𑐵𑐂𑐎𑐮𑐫𑐵 𑐴𑑂𑐫𑐵𑐞𑑂𑐜𑐶𑐮𑐫𑐵𑐟 𑐄𑐏𑐾 𑐠𑐸𑐏𑐾 𑐳𑑂𑐰𑐎𑐸𑐳𑑂𑐰𑐎𑐸𑑄, 𑐊𑐎𑑂𑐳𑐾𑐮𑐾𑐚𑐬 𑐩𑑂𑐰𑐫𑐾𑐠𑑂𑐫𑐵𑐫𑐵𑑄 𑐧𑑂𑐰𑐵𑐣𑐵𑐥𑐶𑑄 𑐖𑐶𑐥𑐶𑑄 𑐥𑐸𑐮𑐵𑑄𑐐𑐸 𑐨𑐶𑐩𑐦𑐾𑐡𑐷 𑐧𑐖𑐵𑑅 𑐠𑑂𑐫𑑄𑐎𑐵𑑅 𑐔𑐵𑐣𑐵 𑐔𑑂𑐫𑐵𑐫𑐵 𑐟𑐸𑐔𑑂𑐔𑐵 𑐎𑐫𑐵 𑑋 𑐳𑐵𑐴𑐸𑐣𑐷 𑐣𑑄 𑐣𑐾𑐰𑐵𑑅 𑐴𑐾 𑐏𑐣𑐶𑑄, 𑐟𑐳𑐎𑑄 𑐏𑑂𑐫𑐵𑑅 𑐦𑑅𑐩𑑂𑐴 𑑋 𑐏𑑃 𑐮𑑂𑐴𑐵𑐮𑑂𑐴𑐵𑑄 𑐟𑑂𑐫𑐵𑐣𑐸 𑐔𑐵𑑅𑐐𑐸 𑐴𑐾 𑐮𑑂𑐰𑑅𑐩𑑄 𑑋 𑐀𑐣 𑐟𑐸𑐔𑑂𑐔𑐵 𑐰 𑐔𑑂𑐫𑐵𑐫𑐵 𑐔𑐸𑐳𑑂𑐎𑐷𑐮𑐶𑐥𑐵 𑐴𑐵𑐣𑑄 𑐠𑑅𑐐𑐸 𑐐𑐣𑑂𑐟𑐧𑑂𑐫𑐫𑐵 𑐮𑑃𑐥𑐸𑐂 𑐣𑑂𑐴𑑂𑐫𑐵𑐣𑐵 𑑋

𑐮𑑅 𑐗𑑂𑐰𑐵𑐮𑐵 𑐴𑐵𑑅𑐠𑐾𑑄 𑐩𑐡𑐶𑐎𑑂𑐎 𑐴𑐵𑐫𑐵𑐔𑑂𑐰𑐣𑐷𑐐𑐸 𑐥𑐵𑐳𑐵 𑐄𑐡𑐾𑐣𑐫𑐵 𑐏𑑃 𑑋 𑐏𑐫𑑂𑐟 𑐮𑐵 𑐫𑐵𑐟𑑂𑐬𑐵𑐫𑐵 𑐗𑑂𑐰𑐮𑐫𑑂 𑐜𑑂𑐬𑐵𑐂𑐨𑐶𑐒𑑂𑐐𑐫𑐵 𑐂𑐮𑐫𑑂 𑐮𑑃𑐫𑑂 𑐢𑑂𑐫𑐵𑐣 𑐧𑐷𑐩𑐵𑑅, 𑐀𑐠𑐾 𑐣𑑄 𑐮𑑃 𑐳𑐸𑐣𑐳𑐵𑐣 𑐖𑐹𑐐𑐸𑐮𑐶𑑄 𑐗𑑂𑐰𑐵𑐮𑐵𑐴𑐵𑑅𑐐𑐸 𑐏𑑃 𑐱𑑂𑐬𑐰𑐞 𑐫𑐵𑐫𑐵𑑄 𑐥𑐵𑐫𑑂𑐕𑐶 𑐣𑑂𑐴𑐫𑑂𑐟𑐵𑑅 𑐂𑐮𑐫𑑂 𑐴𑐾𑐚𑑁𑑄𑐜𑐵 𑐠𑑂𑐫𑐣 𑑋

𑐣𑐵𑐥𑑄 𑐰𑐣𑐵𑐥𑐶𑑄 𑐥𑐵𑐳𑐵𑐥𑐶𑑄 𑐀𑐬𑑂𑐰𑐶𑐣𑐩𑐵𑐣 𑐳𑐶𑑄 𑐰 𑐬𑐵𑐖𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬 𑐄𑐬𑑂𑐦 𑐣𑐷𑐮𑑅 𑐨𑐵𑐖𑐸 𑐂𑐏𑐸𑑄𑐔𑐵 𑐧𑑂𑐰𑐵𑐫𑐾 𑐠𑐾𑑄 𑐧𑑂𑐰𑐵𑐂𑐐𑐸 𑑋 𑐣𑐷𑐮𑑅𑐨𑐵𑐖𑐸𑐫𑐵 𑐜𑑂𑐬𑐵𑐂𑐨𑐶𑐒𑑂𑐐 𑐳𑑂𑐎𑐶𑐮𑐫𑐵𑐟 𑐖𑐶𑑄 𑐩𑐵𑐣𑐾 𑐫𑐵𑐣𑐵 𑑋 𑐟𑑂𑐰𑐵𑑃𑐫𑑂𑐟𑑂𑐰𑐵𑑃𑐫𑑂 𑐟𑑂𑐰𑐵𑑃𑐫𑑂𑐟𑑂𑐰𑐵𑑃𑐫𑑂 𑐴𑐬𑑂𑐣 𑐣𑑂𑐫𑐵𑐫𑐾𑐎𑐸𑐣𑑂𑐫𑐵𑐫𑐾𑐎𑐸𑑄 𑐴𑐸𑐮𑐩𑐸𑐮𑑄 𑐮𑐸𑐎𑐸𑐧𑐶𑐣𑐵 𑐰𑐣𑐷𑐩𑑂𑐴 𑐀𑐣 𑐠𑑂𑐫𑐣 𑐠𑐣 𑐠𑑂𑐫𑐣 𑐴𑐾 𑐳𑐷𑐩𑐏𑐸 𑑋 𑐟𑐬 𑐕𑐟𑐵 𑐩𑐢𑐵𑐳𑐾 𑐴𑐾 𑐩𑐐𑐵𑑅𑐐𑐸 𑐏𑑃 𑐕𑐟𑐵 𑐕𑐸 𑐢𑐵𑑅𑐳𑐵, 𑐣𑑂𑐴𑑂𑐫𑑅𑐣𑐾 𑐰𑐣𑐵𑐔𑑂𑐰𑑄𑐐𑐸 𑐐𑐵𑐜𑐷𑐫𑐵𑐟 𑐮𑐶𑐦𑑂𑐫𑐵𑐫𑐾𑐧𑐮𑐫𑑂 𑐳𑐵𑐰𑐢𑐵𑐣𑐷 𑐢𑐵𑑅𑐳𑐵 𑐣𑐵𑐮𑐾 𑐴𑐾 𑐩𑐵𑑅 𑑋 𑐳𑐰𑐵𑐬𑐷 𑐣𑐶𑐫𑐩𑐫𑐵𑐟 𑐣𑐵𑐮𑐾 𑐴𑐾 𑐩𑐵𑑅 𑑋

𑐠𑐴𑐵𑑄𑐎𑑂𑐰𑐴𑐵𑑄 𑐰𑑄𑐐𑐸 𑐰 𑐣𑐵𑐐𑐧𑐾𑐮𑐷 𑐎𑐵𑑅𑐐𑐸 𑐮𑑃𑐥𑐸𑐂 𑐳𑑂𑐎𑐸𑐚𑐬 𑐐𑐫𑐾𑐐𑐸 𑐢𑐵𑑅𑐳𑐵 𑐟𑐳𑐎𑑄 𑐣𑑂𑐴𑑂𑐫𑐂𑐥𑐸 𑑋 𑐳𑐸𑑄𑐳𑐵𑑄 𑐡𑑄𑐐𑐸 𑐮𑑃𑐥𑐸 𑐐𑑂𑐫𑐵𑐣𑐵𑐥𑐸𑐳𑐾 𑐔𑑂𑐰𑑄 𑑋 𑐐𑑂𑐫𑐵𑐣𑐵𑐥𑐸 𑐩𑐖𑐸𑐂𑐎𑑄 𑐣𑑂𑐴𑑂𑐫𑐂𑐥𑐸𑐂𑐐𑐸 𑐣𑑄 𑐩𑐏𑐸 𑐖𑐸𑐂 𑐳𑐵𑐫𑐡 𑑋 𑐦𑑄𑐥𑐶𑑄 𑐴𑐾𑐚𑑁𑑄𑐜𑐵 𑐮𑑃𑐥𑐸 𑐔𑐷𑐴𑐵𑐎𑑅, 𑐟𑐬 𑐡𑐫𑐾𑐎𑐾 𑐥𑐹𑐩𑐰𑑄𑐣𑐶𑐐𑐸𑐮𑐶𑑄 𑐫𑐵𑐟𑑂𑐬𑐵𑑄 𑐩𑑂𑐴 𑐢𑐵𑑅𑐳𑐵 𑐣𑑂𑐫𑑄 𑑋 𑐟𑐬 𑐣𑑂𑐴𑑂𑐫𑐵𑐠𑐾 𑐴𑐾 𑐩𑑂𑐴 𑐣𑑂𑐫𑑄𑐳𑐵𑑄 𑐐𑑅𑐥𑑅 𑐩𑑂𑐰𑐫𑐾𑐠𑑂𑐫𑐵𑐠𑑂𑐫𑐵𑑄 𑐖𑑅𑐏𑑅𑐫𑐵 𑐮𑐹 𑐩𑐶𑐏𑐵𑑄 𑐑𑐸𑐟𑑂𑐎𑐸 𑐑𑐸𑐟𑑂𑐎𑐸𑑄 𑐰𑐵𑐴𑐣 𑐐𑐫𑐾𑐐𑐸𑐫𑐵 𑐩𑐖𑑂𑐖𑐵 𑐢𑐵𑑅𑐳𑐵 𑐩𑐾𑐐𑐸 𑐴𑐾 𑑋

𑐦𑑄𑐥𑐶𑑄 𑐨𑐶𑐩𑐦𑐾𑐡𑐷𑐫𑐵 𑐮𑑃𑐥𑐸 𑐖𑐸𑐫𑐵𑑅 𑐰𑐣𑐾𑐧𑐮𑐫𑑂 𑐮𑑃𑐥𑐸𑐂 𑐩𑐎𑐰𑐵𑐣𑐥𑐸𑐬 𑐖𑐶𑐮𑑂𑐮𑐵𑐫𑐵 𑐣𑑂𑐴𑐵𑐫𑑂 𑐎𑐠𑑄 𑐢𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐂𑐣𑑂𑐡𑑂𑐬𑐳𑐬𑑀𑐧𑐬 𑐎𑐸𑐮𑐾𑐏𑐵𑐣𑐷 𑐩𑐳𑑂𑐰𑐳𑐾 𑐰𑐣𑐷𑐥𑐶𑑄 𑐳𑐵𑐫𑐡 𑐴𑐾 𑐖𑐎 𑐡𑐂 𑑋 𑐖𑐶𑐥𑐶𑑄 𑐡𑐶𑐣𑐵 𑐴𑐾 𑐮𑐵 𑐩𑐔𑑂𑐰𑐣𑐵, 𑐟𑐬 𑐳𑐬𑑀𑐧𑐬𑐫𑐵𑐟 𑐩𑐶𑐏𑐵𑐫𑑂 𑐎𑐸𑐣𑐵𑑄 𑐀𑐣𑑄 𑐣𑑂𑐴𑑂𑐫𑐵𑐣𑐵 𑑋 𑐎𑐸𑐮𑐾𑐏𑐵𑐣𑐷𑐫𑐵 𑐰 𑐮𑐹 𑐠𑑁𑑄 𑐩𑐶𑐏𑐵𑐫𑑂 𑐮𑐸𑐫𑐵 𑐰𑐫𑐵𑐔𑑂𑐰𑐣 𑑋 𑐦𑐳𑑄 𑐦𑐶𑐮𑐶𑐦𑐶𑐮𑐶 𑐳𑐣𑐵𑐔𑑂𑐰𑑄𑐐𑐸 𑐎𑐸𑐮𑐾𑐏𑐵𑐣𑐷 𑐂𑐣𑑂𑐡𑑂𑐬𑐳𑐬𑑀𑐧𑐬𑐫𑐵 𑐮𑐸𑐩𑑄𑐟𑐶𑑄 𑐰𑐂𑐧𑐮𑐫𑑂 𑐣𑐸𑐐𑑅 𑐣𑑄 𑐦𑐶𑐮𑐶𑐦𑐶𑐮𑐶 𑐖𑐸𑐫𑐵𑐔𑑂𑐰𑑄 𑑋

𑐥𑐸𑐮𑐵𑑄 𑐨𑐶𑐩𑐦𑐾𑐡𑐷𑑄 𑐠𑑂𑐫𑐩𑐠𑑂𑐫𑑄 𑑖 𑐟𑐵𑑅 𑐂𑐮𑐫𑑂 𑐖𑐶𑐥𑐶𑑄 𑐴𑐾𑐚𑑁𑑄𑐜𑐵𑐫𑐵 𑐣𑐶𑑄𑐟𑐶𑑄 𑐣𑑂𑐴𑑂𑐫𑐵𑐣𑐵 𑑋 𑐰𑑄 𑐰𑑄 𑐳𑑂𑐎𑐸𑐚𑐬𑐫𑐵 𑐩𑐶𑐚𑐬𑐫𑑂 𑐩𑐶𑐏𑐵 𑐰𑐣 𑑋 𑐥𑐾𑐚𑑂𑐬𑑀𑐮𑐫𑐵 𑐂𑐞𑑂𑐜𑐶𑐎𑐾𑐚𑐬𑑄 𑐩𑐾𑐐𑐸 𑐴𑐾 𑐨𑐵𑐫𑑂 𑐮𑑂𑐴𑐵𑑅𑐐𑐸 𑐏𑐣𑐵𑑄 𑐣𑐸𑐐𑑅 𑐥𑐶𑐔𑑂𑐫𑐵𑐟 𑑋 𑐰𑐣𑐵𑐧𑐮𑐫𑑂 𑐥𑐵𑐳𑐵 𑐬𑐵𑐖𑐾𑐣𑑂𑐡𑑂𑐬𑑄 𑐎𑐶𑐥𑐹 𑐢𑑂𑐰𑐵𑐏𑐵𑐫𑐵 𑐣𑑂𑐴𑑂𑐫𑑅𑐣𑐾, ‘𑐎𑐵 𑐥𑐾𑐚𑑂𑐬𑑀𑐮 𑐟𑐫𑐾𑐩𑐵𑑅𑐳𑐵 𑐟𑐶 𑑋’ 𑐢𑐵𑑅𑐐𑐸 𑐮𑐵 𑐏𑑅, ‘𑐕𑐐𑐹 𑐮𑐵𑐂𑐣 𑐟𑐶𑐣𑐶 𑐰𑐣, 𑐐𑐵𑐂 𑐣𑐸’ 𑐢𑐎𑐵𑑅 𑐰𑐣𑐵𑐐𑐸 𑐟𑐬 𑐀𑐣 𑐠𑑂𑐫𑑄𑐎𑐵𑑅 𑐥𑐾𑐚𑑂𑐬𑑀𑐮𑐫𑐵 𑐂𑐞𑑂𑐜𑐶𑐎𑐾𑐚𑐬 𑐏𑑄𑐧𑐮𑐫𑑂 𑐟𑐫𑐾𑐩𑐵𑑅𑐐𑐸 𑐢𑐫𑐵𑐠𑐾𑑄 𑐩𑐟𑐶𑐂 𑐰𑐮 𑑋 𑐣𑑂𑐴𑑂𑐫𑐵𑐣𑐵𑐧𑐮𑐫𑑂 𑐟𑐥𑑂𑐫𑑄𑐩𑑂𑐴 𑐟𑐵𑐴𑐵𑑅 𑐠𑐾𑑄 𑐏𑐣𑐾𑐡𑐸𑐐𑐸 𑐂𑐣𑑂𑐜𑐶𑐎𑐾𑐚𑐬𑐫𑐵 𑐰 𑐗𑑂𑐰𑑅 𑐀𑐣𑐮𑐵 𑐣𑑂𑐴𑐶𑐥𑑂𑐫𑑄 𑐕𑐎𑐹𑐔𑐵 𑐴𑐾 𑐖𑐎 𑐮𑑂𑐫𑑄𑐡𑐣𑐶 𑑋

𑐂𑐣𑑂𑐜𑐶𑐎𑐾𑐚𑐬𑐫𑑂 𑐩𑐶𑐏𑐵 𑐧𑑂𑐰𑐧𑑂𑐰𑑄 𑐳𑑂𑐎𑐸𑐚𑐬𑐫𑐵 𑐐𑐟𑐶 𑐀𑐥𑑂𑐰𑐫𑐾𑐎𑐵 𑑋 𑐨𑐶𑐩𑐦𑐾𑐡𑐷 𑐥𑐸𑐮𑐵𑐰𑐣𑐾 𑐢𑑄𑐎𑐵𑑅 𑐏𑐸𑐳𑐶𑐳𑐶𑐠𑑄 𑐳𑐶𑐠𑑄 𑐰𑐣𑐵𑐧𑐮𑐫𑑂 𑐏𑐶𑐄𑑃𑐳𑐾 𑐔𑑂𑐰𑐣𑐾 𑐢𑐸𑑄𑐎𑐮 𑑋 𑐏𑐶𑐄𑑃𑐐𑐸 𑐮𑑃𑐥𑐸𑐂 𑐔𑐶𑐎𑑄 𑐦𑐸𑐂𑐐𑐸 𑐨𑐫𑑄 𑐧𑐐𑐮𑑄 𑐴𑐾 𑐖𑐹𑐳𑐵𑑄 𑐳𑑂𑐎𑐸𑐚𑐬 𑐧𑑂𑐰𑐵𑐎𑐵 𑐴𑐾𑐚𑑁𑑄𑐜𑐵𑐫𑐵 𑐳𑐶𑐩𑐵 𑐩𑐠𑑂𑐫𑑄𑐟𑐮𑐾 𑑋 𑐥𑐵𑐳𑐵 𑐄𑐡𑐾𑐣𑑄 ‘𑐁𑑅 𑐫𑐎𑑂𑐰 𑐩𑑄𑐟, 𑐠𑑂𑐫𑑄 𑐴𑐾 𑐠𑑂𑐫𑐣 𑐢𑐵𑑅𑐳𑐵𑑄 𑐖𑐶𑐮’ 𑐢𑐵𑑅𑐧𑐮𑐫𑑂 𑐣𑐸𑐐𑑅 𑐔𑐎𑐣 𑑋 𑐢𑑂𑐫𑐵𑐬𑐢𑑂𑐫𑐵𑐬 𑐰 𑐢𑐸𑐬𑐢𑐸𑐬 𑐖𑐸𑐂𑐎 𑐐𑐵𑑅𑐧𑐐𑐵𑑅 𑐕𑐮𑐾 𑐫𑐵𑐫𑐵𑑄 𑐰𑐣𑐵𑐔𑑂𑐰𑐣𑐵𑐥𑐶𑑄 𑐥𑐷𑐔 𑐮𑑃𑐥𑐸𑐂 𑐠𑑂𑐫𑑄𑐧𑐮𑐫𑑂 𑐮𑐵 𑐕𑐸 𑐩𑐵𑐮, 𑐀𑐣𑑄 𑐴𑐵𑐣𑑄 𑐳𑑂𑐎𑐸𑐚𑐬𑐫𑐵 𑐩𑐟𑐖𑑅𑐫𑐵 𑐧𑑅 𑐎𑐫𑐵𑑅 𑐟𑐸𑐦𑐵𑐣 𑐎𑐫𑐵, 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐩𑐣𑑂𑐟𑑂𑐬𑐵𑐮𑐫 𑐩𑐠𑑂𑐫𑑄𑐟𑐮𑐾 𑑋

𑐀𑐣 𑐠𑑂𑐫𑐣𑐾𑐰𑑄 𑐧𑐵𑐫𑑂 𑐔𑑂𑐰𑐣𑐾𑐟 𑐮𑐖 𑐩𑐵𑐮𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐩𑐵𑐩𑐵𑑄 𑐩𑐶𑐬𑐵𑐖 𑐮𑐖 𑐮𑐸𑐮 𑑋 𑐰𑐴𑐾 𑐮𑐖𑐫𑑂 𑐠𑑅𑐥𑐶𑐣𑐶 𑐖𑑂𑐰𑐮𑑄𑐟 𑐎𑑂𑐰𑐠𑐵𑐫𑑂 𑐰𑐵𑐣𑐵𑑄 𑐥𑐶𑐴𑐵𑑄 𑐰𑐫𑐵 𑑋 𑐖𑐶𑐐𑐸 𑐣𑐶𑑄𑐟𑐶𑑄 𑐴𑐾𑐚𑑁𑑄𑐜𑐵 𑐣𑑂𑐴𑐹𑐐𑐸 𑐠𑐵𑐫𑑂 𑑋 𑐧𑐴𑐣𑐷 𑐥𑐵𑐳𑐵𑐥𑐶𑑄 𑐀𑐬𑑂𑐰𑐶𑐣, 𑐣𑐷𑐮𑑅, 𑐄𑐡𑐾𑐣𑐮𑐶𑐳𑐾 𑐔𑐵𑑅𑐴𑐸𑐮𑐵 𑑋 𑐣𑐫𑐾𑐟 𑐴𑑀𑐚𑐾𑐮 𑐩𑐵𑐩𑐵𑑄 𑐧𑐴𑐣𑐷 𑐔𑑂𑐫𑐵𑐟𑐵𑑅𑐟𑑂𑐫𑐵 𑐃 𑐖𑐸𑐮 𑑋 𑐣𑐫𑐾 𑐥𑐶𑐟𑑂𑐫𑐵𑐣𑐵 𑐰𑐮 𑑋 𑐰𑐰𑑄 𑐕𑐠𑐵𑐫𑑂 𑐫𑐵𑐣𑑄𑐣𑐶𑐳𑐾𑑄 𑐣𑐾𑐰𑐵𑑅 𑐮𑐴𑐣𑐵 𑐔𑑂𑐰𑐫𑐵𑐟𑑅𑐐𑐸 𑐐𑑂𑐰𑐬𑑅 𑐏𑐣 𑑋 𑐧𑐴𑐣𑐷𑐳𑐶𑐫𑐵 𑐩𑐟𑑄 𑐴𑐵𑐎𑐸𑐐𑐸 𑐐𑑂𑐰𑐬𑐮𑐫𑑂 𑐟𑐸𑐫𑐸𑐐𑐸 𑐁𑐏𑑅 𑐗𑐮𑑂𑐮 𑐟𑑂𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐰𑑄 𑐳𑐎𑐮𑐾𑑄 𑐄𑐏𑐾 𑐴𑐾 𑐰𑐣𑐵 𑑋

𑐧𑐴𑐣𑐷 𑐟𑐵𑑄𑐣𑑂𑐰𑑅𑐐𑐸 𑐣𑑄 𑐄𑐮𑐶 𑐩𑐏𑐸, 𑐔𑐶𑐎𑐸 𑐣𑑄 𑐩𑐖𑐹 𑑋 𑐀𑐠𑐾 𑐣𑑄 𑐨𑐔𑐵𑐨𑐔𑐵 𑐠𑐫𑐾𑐎 𑐮𑐶𑐳𑑄 𑐟𑐫𑐾𑐩𑐵𑐮𑐷𑐎𑐵 𑐢𑐎𑐵𑑅 𑐣𑐾𑐰𑐵𑑅 𑐮𑐴𑐣𑐵𑐫𑑂 𑐠𑐴𑐵𑑄 𑐰𑐣𑐵 𑑋 𑐣𑐾𑐰𑐵𑑅𑐟𑐫𑑂 𑐳𑑄𑐳𑑂𑐎𑐺𑐟𑐶, 𑐖𑐵𑐟𑑂𑐬𑐵𑐥𑐬𑑂𑐰𑐣𑐵𑐥 𑐳𑑂𑐰𑐵𑐥𑐹 𑐡𑐸𑐐𑐸 𑐠𑐷𑐠𑐷 𑐎𑐶𑐥𑐵 𑐰 𑐮𑑂𑐰𑐴𑑃𑐴𑐶𑐟𑐶𑑄 𑐣𑐾𑐰𑐵𑑅 𑐩𑑂𑐴𑐳𑐷𑐎𑐵 𑐧𑐵𑑄𑐮𑐵𑐎 𑐴𑐾 𑐎𑑂𑐫𑑃 𑑋 𑐖𑑂𑐫𑐵𑐳𑐣𑐷𑐥𑐶𑑄 𑐢𑐵𑑅𑐳𑐵 𑐣𑐾𑐰𑐵𑑅𑐨𑐵𑐫𑑂 𑐮𑑂𑐴𑐵𑐫𑐾 𑐩𑐳𑑅 𑑋 𑐎𑑅𑐳𑐷𑐂 𑐳𑐸𑐮𑐶𑑄 𑐎𑑂𑐰𑐠𑐵 𑑋 𑐀𑐣𑑂𑐟𑐶, 𑐳𑑂𑐰𑑄𑐩𑐵, 𑐳𑐮𑐶𑑄, 𑐴𑑂𑐰𑐏𑐵 𑐏𑐣𑐵 𑑋 𑐥𑐵𑐳𑐵 𑐀𑐬𑑂𑐰𑐶𑐣𑑄 𑐩𑑂𑐴𑐫𑑂 𑐮𑐶𑐳𑑄 𑐟𑐫𑐾𑐟 𑐀𑐫𑑂𑐮𑐵𑑅𑐫𑐵 𑐨𑐵𑑅 𑐣𑑂𑐫𑐣 𑑋 𑐀𑐫𑐮𑐵𑑅𑐫𑐵 𑐨𑐵𑑅 𑐣𑑂𑐫𑐣𑐵𑑄 𑐕𑐎𑑅 𑐩𑑂𑐫𑐾 𑐰𑐵𑐣𑑂𑐫𑐵𑐫𑐾 𑐰𑐮 𑑋 𑐏𑑂𑐰𑐵𑑅 𑐳𑑂𑐰𑐫𑐾𑐧𑐮𑐫𑑂 𑐀𑐫𑑂𑐮𑐵𑑅 𑐟𑑂𑐰𑐣𑐾𑐐𑐸 𑐡𑐸𑐐𑑄𑐳𑐮𑐶𑑄 𑐥𑐵𑐫𑑂𑐐𑑂𑐰𑑅 𑐩𑐖𑐹𑐐𑐸 𑐕𑐳𑐮𑐶𑑄 𑐀𑐫𑑂𑐮𑐵𑑅𑐫𑐵 𑐡𑐵𑑄 𑐣𑐶𑐳𑑅𑐟𑐎𑐵 𑑋 𑐮𑐶𑐳𑑄 𑐟𑐫𑐾𑐐𑐸 𑐁𑑃𑐚 𑐩𑑄𑐟 𑑋 𑐮𑐶𑐴𑐵𑑄 𑐰𑐫𑐵 𑑋

𑐴𑐾𑐚𑑁𑑄𑐜𑐵 𑐧𑐖𑐵𑑅 𑐔𑐵𑑅𑐴𑐶𑐮𑐵𑑅 𑐧𑐴𑐣𑐷𑐳𑐶𑐫𑐵 𑐧𑐾𑐮𑐶 𑐫𑐵𑐫𑐾𑐟 𑐴𑑀𑐚𑐮𑐫𑑂 𑐰𑐣𑐵 𑑋 𑐴𑑀𑐚𑐮𑐫𑑂 𑐖𑐎 𑐕𑐸 𑐠𑑂𑐫𑐣 𑐕𑑂𑐫𑐣𑐫𑑂 𑐩𑐮𑐏𑑄 𑐎𑑅𑐠𑐾𑑄 𑐖𑐸𑐂𑐎 𑐣 𑐣𑑂𑐫𑐵𑐟 𑑋 𑐰𑐵 𑐰𑑅𑐐𑐸 𑐢𑐵𑐫𑐾 𑐢𑐸𑐣𑐎𑐶 𑐖𑐳𑑂𑐟𑐵𑑄 𑐩𑐦𑐂𑐎𑐠𑑄 𑐰𑐵 𑐰𑐮 𑑋 𑐀𑐣𑑄𑐣𑐶𑐳𑐾𑑄 𑐩𑐟𑑄 𑐣𑑄 𑐎𑐵𑐣𑐵𑐎𑐵𑐣𑐵 𑐥𑐶𑐔𑐵 𑐩𑑂𑐴𑐶𑐟𑐾 𑐠𑐾𑑄 𑐫𑐵𑐟, 𑐳𑐶𑐂𑐐𑐸 𑐔𑑂𑐫𑐵𑐫𑐾𑐐𑐸 𑐖𑐸𑐮 𑑋 𑐧𑐾𑐮𑐶 𑐳𑐶𑐢𑐮 𑑋 𑐀𑐣𑑄 𑐮𑑃𑐫𑑂 𑐏𑑂𑐫𑐵𑑅 𑐫𑐵𑐫𑐵𑑄 𑐮𑐖𑐫𑑂 𑐠𑑂𑐫𑑄𑐎𑐵 𑑋

𑐮𑐖𑐫𑐵 𑐎𑑂𑐰𑐠𑐵 𑑋 𑐥𑑂𑐫𑐩𑑂𑐴 𑐥𑑂𑐫𑐏𑑂𑐫 𑑋 𑐣𑑂𑐴𑐶𑐣𑐫𑑂 𑐦𑐫𑑂𑐮𑐶𑐳𑐾 𑐮𑑂𑐰𑐵𑐮𑑂𑐰𑐵𑑄 𑐴𑐾𑐚𑑁𑑄𑐜𑐵 𑐠𑑂𑐫𑑄𑐎𑐵𑐥𑐶𑑄 𑑋 𑐔𑐵𑐣𑑂𑐴𑐫𑑂 𑐣𑑂𑐴𑑂𑐫𑑅𑐳𑑅𑐮𑐶𑐳𑐾 𑐮𑑂𑐰𑐵𑐮𑑂𑐰𑐵𑑄 𑐔𑐵 𑐦𑐸𑐟 𑑋 𑐣𑑂𑐴𑑂𑐫𑑅𑐳𑑅𑐫𑐵 𑐰 𑐳𑑄𑐐𑑂𑐬𑐵𑐩𑐫𑑂 𑐣𑑂𑐴𑑂𑐫𑑅𑐡𑑂𑐫𑑅 𑐩𑐶𑐏𑐵𑐫𑑂 𑐡𑐸𑐴𑐵𑑄 𑐰𑐫𑐾𑐐𑐸 𑐎𑐸𑐟𑑅 𑐴𑐾 𑐩𑐫𑐵𑑅 𑑋 𑐑𑐸𑐬𑑂𑐬𑐑𑐸𑐬𑑂𑐬 𑐰 𑐑𑐬𑑂𑐬𑐑𑐬𑑂𑐬 𑐰 𑐳𑑅 𑐩𑐴𑐵𑐨𑐵𑐬𑐟 𑐚𑐾𑐮𑐶𑐳𑑄𑐎𑐶𑐥𑐵𑐫𑑂 𑐎𑐶𑐳𑐶𑐴𑐵𑑅 𑐠𑐾𑑄 𑐟𑐵𑐫𑐵𑐔𑑂𑐰𑐣 𑑋 𑐠𑐫𑑂𑐎 𑐎𑑂𑐰𑐳𑑄 𑐳𑑂𑐰𑐫𑐵 𑐥𑐵𑐳𑐵 𑐀𑐬𑑂𑐰𑐶𑐣 𑐳𑐶𑐮𑑅 𑐡𑐸𑐣𑐾 𑐩𑑀𑐧𑐵𑐂𑐮 𑐴𑐾 𑐰𑑂𑐫𑐳𑑂𑐟 𑐏𑐣𑐵 𑑋 𑐀𑐠𑐾 𑐣𑑄 𑐡𑑂𑐫𑐣𑐾 𑐴𑐾 𑐩𑐵𑐮 𑑋 𑐡𑑂𑐫𑐣𑐾𑐐𑐸 𑐎𑐸𑐟𑑅𑐖𑐎 𑐕𑐸 𑐫𑐵𑐣𑐵𑑅 𑐩𑑀𑐧𑐵𑐂𑐮𑐫𑐵 𑐀𑐮𑐵𑐬𑑂𑐩𑑄 𑐠𑐣 𑑋

𑐣𑐶𑐣𑑂𑐴𑐸𑐫𑐵 𑐣𑑂𑐴𑐶
𑐳𑐸𑐠 𑐖𑐸𑐮 𑑋 𑐡𑐣𑐵𑑄 𑐧𑑂𑐬𑐳 𑐫𑐵𑐫𑐾 𑐢𑐸𑐣𑐾𑐰𑑄 𑐣𑐷𑐮𑑅𑐫𑐵𑐟, ‘𑐎𑐵 𑐡𑑃 𑐣𑑂𑐫𑐵𑐟𑐵𑑅 𑐂𑐮𑐫𑑂 𑐔𑐵𑑅 𑐴𑐶𑐄𑐰𑐣𑐾𑐐𑐸 𑐢𑐫𑐵𑐐𑐸 𑐩𑐏𑐸𑐮𑐵 ?’ 𑐢𑐵𑐢𑐵𑑄 𑐠𑐣𑐵 𑑋 𑐔𑐶𑐎𑐸𑐳𑐾 𑐔𑑂𑐰𑑃, 𑐡𑐣𑐾 𑐴𑐾 𑐀𑐮𑑂𑐳𑐷 𑐖𑐸𑐫𑐵𑐔𑑂𑐰𑐣 𑑋 𑐥𑐶𑐣𑐾 𑐩𑑁𑐳𑐩 𑐣𑑄 𑐄𑐮𑐶 𑐧𑐵𑑄𑐮𑐵𑑅 𑐩𑐖𑐹𑐣𑐶 𑑋 𑐡𑐎𑑂𑐰𑑄 𑐡𑑄𑐧𑐮𑐫𑑂 𑐳𑐸𑐠𑐫𑑂 𑑘 𑐟𑐵𑑅 𑐃 𑐟𑐶 𑐖𑐸𑐮 𑑋 𑐣𑐶𑐨𑐵𑑅𑐡𑑂𑐫𑑅 𑐟𑑂𑐰𑐫𑐾𑐰𑑄 𑐦𑐸𑐎𑑂𑐎𑑄 𑐥𑐶𑐴𑐵𑑄 𑐰𑐣𑐵 𑑋
𑐥𑐶𑐴𑐵𑑄 𑐮𑐵 𑐰𑐣𑐵, 𑐟𑐬 𑐣𑑂𑐴𑐵𑐥𑐵 𑐰𑑄𑐥𑐶𑑄 𑐣𑐷𑐮𑑅 𑐰 𑐀𑐬𑑂𑐰𑐶𑐣 𑐧𑐸𑐡𑑂𑐢𑐥𑐵𑐬𑑂𑐎 𑐠𑑂𑐫𑑄𑐎𑐵𑑅 𑐀𑐣𑐰𑑄 𑐠𑐣𑐰𑑄 𑐩𑐡𑐫𑐾𑐎 𑐀𑐮𑐥 𑐖𑐸𑐮 𑑋 𑐖𑐶 𑐰 𑐄𑐡𑐾𑐣 𑐐𑐣 𑐰𑐣𑐾 𑐐𑐣 𑐰𑐣𑐾 𑐖𑐸𑐮 𑑋 𑐎𑐵 𑐩𑑂𑐰𑐵𑐫𑐾𑐳𑐾 𑐟𑐥𑑂𑐫𑑄𑐎 𑐰𑐣𑐾𑐐𑐸, 𑐢𑑂𑐰𑐩𑐡𑐹𑐟𑐮𑐾 𑐰𑐣𑐾𑐐𑐸 𑐢𑐵𑐢𑐵𑑄 𑐴𑐾𑐚𑑁𑑄𑐜𑐵𑐫𑐵 𑐩𑐹𑐮𑑃 𑐖𑐸𑐫𑐵𑑅 𑐠𑐴𑐵𑑄 𑐰𑐣𑐵 𑑋 𑐬𑐎𑑂𑐳𑑁𑐮 𑐰𑐣𑐾𑐐𑐸 𑐮𑑃𑐥𑐸 𑐢𑐎𑐵𑑅 𑐐𑑂𑐰𑐬𑑅 𑐏𑐣𑐵𑑄 𑐳𑐶𑐮 𑑋 𑐴𑐾𑐚𑑁𑑄𑐜𑐵𑑄 𑐬𑐎𑑂𑐳𑑁𑐮𑐟𑐎𑐫𑐵 𑐡𑐵𑐥𑐵𑑅 𑑕𑑑 𑐎𑐶.𑐩𑐶 𑑋 𑐰𑑃𑐰𑑄 𑐰𑐵 𑐰𑐮 𑑋 𑐬𑐾𑐣𑐎𑑀𑐚 𑐩𑐡𑐸 𑑋 𑐬𑐾𑐣𑐎𑑀𑐚 𑐩𑐡𑐸𑐳𑐵𑑄 𑐰𑐵 𑐰𑐫𑐾𑐎 𑐰𑐫𑐾𑐎 𑐰𑐣𑐵 𑑋 𑐀𑐬𑑂𑐰𑐶𑐣𑐥𑐶𑑄 𑐮𑑃𑐫𑑂 𑐥𑐶𑐫𑐵𑐔𑑂𑐰𑐣 𑑋 𑐀𑐣𑑄 𑐣𑑄 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑐣𑐵 𑑋 𑐔𑐸𑐬𑐶𑐫𑐵 𑐩𑐵𑐃𑐫𑐵 𑐠𑐵𑐫𑑂 𑐠𑑂𑐫𑐣 𑑋

𑐥𑐵𑐳𑐵𑐥𑐶𑐣𑐶 𑐔𑐸𑐬𑐶𑐫𑐵 𑐩𑐵𑐃 𑐡𑐬𑑂𑐱𑐣 𑐫𑐵𑑅𑐰𑐣 𑑋 𑐖𑐶 𑐄𑐩𑐶 𑐦𑑀𑐚𑑀 𑐎𑐫𑐵𑐔𑑂𑐰𑐣𑐵 𑑋 𑐔𑐸𑐬𑐶𑐫𑐵 𑐩𑐵𑐃𑐫𑐵 𑐮𑐶𑐎𑑂𑐎𑐳𑑄 𑐕𑐐𑐹 𑐟𑑅𑐢𑑄𑐐𑐸 𑐢𑑂𑐰𑐵𑐏𑐵 𑐏𑐣 𑑋 𑐐𑑂𑐰𑐬𑑅 𑐧𑑂𑐰𑐣𑐵𑑅 𑐳𑐶𑐮, 𑐰 𑐔𑐸𑐬𑐶𑐫𑐵 𑐩𑐵𑐃𑐫𑐵 𑐠𑐵𑐳𑑄 𑐨𑐶𑐩𑐦𑐾𑐡𑐷𑐟𑐎𑐫𑐵 𑐳𑐸𑐬𑐹𑐒 𑐏𑐣𑐶𑑄 𑑋 𑐳𑐸𑐬𑐹𑐒𑑂𑐫𑐵 𑐡𑐸𑐬𑐵𑐰𑐳𑑂𑐠𑐵 𑐏𑐣𑐵𑑄 𑐎𑑂𑐰𑐟𑐸𑑄𑐐𑐸 𑐣𑐸𑐐𑑅 𑐥𑐸𑐣𑐬𑑂𑐣𑐶𑐬𑑂𑐩𑐵𑐞 𑐖𑐸𑐫𑐵𑐔𑑂𑐰𑑄𑐐𑐸 𑐏𑑄𑐧𑐮𑐫𑑂 𑐢𑐵𑑅𑐳𑐵 𑐣𑐸𑐐𑑅 𑐔𑐎𑐣 𑑋 𑐀𑐖𑑂𑐫𑐵𑑅𑐐𑐸 𑐳𑐸𑐬𑐸𑐒 𑐳𑐸𑐣𑐵𑑄 𑐡𑐫𑐾𑐎𑐮 𑐖𑐸𑐂 𑐢𑐫𑐵𑐐𑐸 𑐣𑑂𑐴𑑂𑐫𑐳𑐮𑑄 𑐔𑐵𑐴𑐶𑐮𑐵𑐔𑑂𑐰𑑄𑐐𑐸 𑐣𑑂𑐴𑑂𑐫𑐥𑐸 𑐣𑑂𑐴𑑂𑐫𑐣𑐾𑐳𑑄 𑐔𑑂𑐰𑑄𑐐𑐸 𑐳𑐵𑐮𑐶𑐎 𑐏𑐣𑐾𑐰𑑄 𑐡𑐶𑐟 𑑋 𑐄𑐐𑐸 𑐂𑐮𑐫𑑂 𑐳𑐸𑐬𑐹𑐒 𑐡𑐫𑐾𑐎𑐾𑐐𑐸 𑐖𑑂𑐫𑐵𑐫𑐵 𑐥𑐬𑐶𑐎𑐮𑑂𑐥𑐣𑐵𑐎𑐵𑐬 𑐧𑑂𑐬𑐶𑐐𑐾𑐜𑐶𑐫𑐬 𑐖𑐣𑐬𑐮 𑐜𑐶𑐮𑑂𑐮𑐷𑐖𑑄𑐐 𑐠𑐵𑐥𑐵 𑐖𑐸𑐫𑐵𑐔𑑂𑐰𑐣 𑑋

𑐳𑐸𑐬𑐹𑐒 𑐏𑐣𑐾𑐰𑑄 𑐣𑑂𑐴𑑂𑐫𑐎𑐸𑐣𑑂𑐴𑐸 𑐴𑐾𑐚𑐵𑑄𑐿𑐜𑐵𑐫𑑂 𑐏𑐣𑐵𑐐𑐸 𑐬𑑀𑐥 𑐮𑐵𑐂𑐣 𑐮𑐸𑐩𑑄𑐳𑐾 𑐰𑐮 𑑋 𑐰 𑐣𑑃𑐫𑐵 𑐟𑐵𑐬𑐫𑑂 𑐫𑐐𑑂𑐐𑐵𑐣𑐵𑐔𑑂𑐰𑑄𑐐𑐸 𑐎𑐮𑑅𑐔𑐵𑐟 𑐮𑐸𑐩𑑄𑐳𑐾 𑐰𑐮 𑑋 𑐎𑐮𑑅𑐔𑐵𑐟 𑐦𑐸𑐎𑑂𑐎 𑐨𑐸𑐐𑑂𑐮𑐸𑑄𑐔𑑂𑐰𑑄𑐥𑐶𑑄 𑐏𑐵𑐔𑐵𑐟 𑐠𑐾𑑄 𑐔𑑂𑐰𑐣𑐵𑐰𑐮 𑑋 𑐁𑐳𑐵𑐎𑐸𑐟𑐶 𑐖𑐸𑐫𑐵𑑅 𑐄𑐡𑑂𑐢𑐵𑐬𑐫𑐵 𑐣𑐶𑑄𑐟𑐶𑑄 𑐥𑐶𑐫𑐵𑐔𑑂𑐰𑑄𑐥𑐶𑑄 𑐠𑐾𑑄 𑐟𑐵𑐮 𑑋 𑐖𑐶𑑄 𑐣𑑄 𑐁𑐳𑐵 𑐫𑐵𑐣𑐵 𑐣𑐾𑐥𑐵𑐮 𑐳𑐬𑐎𑐵𑐬𑑄 𑐠𑐸𑐩𑐶 𑐄𑐡𑑂𑐢𑐵𑐬 𑐫𑐵𑐎𑐣𑑄 𑐫𑐵𑐂 𑑋

𑐔𑐸𑐬𑐶𑐫𑐵𑐩𑐵𑐃𑐫𑐵 𑐠𑐵𑐳𑑄 𑐮𑐶𑐴𑐵𑑄 𑐰𑐫𑐵𑑅 𑐴𑐾𑐚𑑁𑑄𑐜𑐵𑐫𑐵 𑐩𑐸𑐎𑑂𑐟𑐶𑐣𑐵𑐠 𑐰𑐣𑐵 𑑋 𑐰𑑃𑐰𑑄 𑐀𑐣 𑐣𑑄 𑐰𑐵 𑐰𑐮 𑑋 𑐟𑐳𑐎𑑄 𑐰𑐵𑑅 𑐰𑑅𑐐𑐸 𑐴𑐸𑐣𑐶𑑄 𑐏𑐵𑐳 𑐴𑐾 𑐀𑐣 𑐕𑐸𑑄 𑐧𑐵𑑄𑐮𑐵𑐎 𑐳𑑂𑐰𑐫𑐾 𑐩𑐏𑐣 𑑋 𑐡𑐾𑐐𑑅𑐟 𑐏𑐣𑐵 𑑋 𑐔𑐮𑑂𑐮𑐵𑐫𑐵 𑐩𑑂𑐴𑐸𑐟𑐸 𑐟𑐫𑐵𑑅 𑑑𑑐𑑘 𑐢𑐵𑑅 𑐴𑐶𑐟𑐶 𑐴𑐵𑐫𑐾𑐎𑐵 𑐟𑑅𑐐𑐸 𑐏𑐣𑐵 𑑋 𑐰𑐵 𑐰𑐫𑐾𑐎 𑐰𑐫𑐾𑐎 𑐴𑐾 𑐡𑐾𑐐𑑅 𑐮𑐶𑐎𑑂𑐎 𑐰𑐣𑐵𑑄 𑐳𑑂𑐰𑑅𑐰𑐣𑐵 𑑋 𑐡𑐵𑐔𑐶 𑐀𑐥𑑂𑐥𑐵𑑄 𑐡𑐫𑐾𑐎𑐵𑐟𑑅𑐐𑐸 𑐡𑐸, 𑐟𑐬 𑐧𑐶𑐜𑐩𑑂𑐧𑐣𑐵, 𑐡𑐵𑐔𑐶 𑐀𑐥𑑂𑐥𑐵𑐫𑑂 𑐬𑐒𑑂𑐐𑑄 𑐥𑐵𑐣𑐵𑑄 𑐄𑐎𑐶𑐫𑐵 𑐳𑑁𑐣𑑂𑐡𑐬𑑂𑐫𑐟𑐵 𑐟𑑂𑐰𑐥𑐸𑐫𑐵𑐟𑑅𑐐𑐸 𑐏𑑄𑐧𑐮𑐫𑑂 𑐀𑐣𑐫𑐵 𑐰𑑂𑐫𑐰𑐳𑑂𑐠𑐵𑐎𑐟𑐫𑑂𑐥𑑂𑐬𑐟𑐶 𑐡𑐫𑐵 𑐰𑐣 𑑋 𑐡𑐵𑐔𑐶 𑐀𑐥𑑂𑐥𑐵 𑐠𑑅𑐴𑐾 𑐮𑐸𑑃, 𑐟𑐬 𑐮𑐸𑑃𑐫𑐵𑐟 𑐎𑐳𑐶 𑐟𑐫𑐵𑑅 𑐄𑐎𑐶𑐫𑐵 𑐩𑐹 𑐟𑑂𑐰𑐥𑐸𑐂 𑐠𑐾𑑄 𑐡𑐵𑐔𑐶 𑐀𑐥𑑂𑐥𑐵𑐫𑐵𑐟 𑐣𑑄 𑐬𑐒𑑂𑐐𑑄 𑐨𑐸𑐣𑐵𑑅 𑐄𑐎𑐶𑐫𑐵 𑐰𑐶𑐱𑐾𑐲𑐟𑐵 𑐴𑐸𑐫𑐵𑐟𑐮 𑑋

𑐀𑐣𑑄 𑐮𑐶𑐴𑐵𑑄 𑐰𑐫𑐵𑑅 𑐳𑐸𑐠𑐳𑐶𑐫𑐵 𑐎𑑁𑐮𑐵 𑐫𑐵𑐣𑐵 𑑋 𑐕𑑀𑐮𑐵 𑐨𑐚𑑁𑐬𑐵, 𑐳𑐩𑑀𑐳𑐵, 𑐁𑐮𑐸𑐥𑐎𑑁𑐜𑐵 𑐣𑐫𑐵𑑅 𑐮𑐖𑐫𑑂 𑐴𑐾 𑐮𑐶𑐴𑐵𑑄 𑐰𑐫𑐵 𑑋 𑐮𑐖𑐫𑑂 𑐨𑐔𑐵 𑐁𑐬𑐵𑐩 𑐎𑐫𑐵𑑅 𑐣𑐶𑐨𑐵𑑅 𑐟𑑂𑐰𑐫𑐾𑐰𑑄 ‘𑐔𑐾𑐎 𑐁𑐄𑐚’ 𑐫𑐵𑐎𑐵𑑅 𑐮𑐖𑑄 𑐟𑑂𑐰𑑅𑐟𑐵𑑅 𑐥𑐶𑐴𑐵𑑄 𑐰𑐫𑐵 𑑋 𑐠𑐣𑑄 𑐮𑐶𑐥𑐵 𑐴𑐾𑐚𑑁𑑄𑐜𑐵 𑐰𑐣𑐵𑐐𑐸𑐫𑐵 𑐩𑐹 𑐁𑐖𑑂𑐖𑐹 𑐥𑐹𑐰𑑄𑐎𑐾𑐐𑐸 𑐮𑑃𑐥𑐸𑐂 𑐖𑑂𑐫𑐵𑐣𑐵 𑑋

𑐣𑑂𑐴𑐶𑐣𑐫𑑂 𑐣𑐶𑐨𑐵𑑅 𑐟𑑂𑐰𑐮 𑑋 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑐵 𑐩𑐣𑑂𑐟𑑂𑐬𑐷 𑐧𑐳𑐣𑑂𑐟 𑐩𑐵𑐣𑐣𑑂𑐢𑐬 𑐣𑐵𑐥𑐮𑐵𑐫𑐾𑐐𑐸 𑐰𑐶𑐱𑐾𑐲 𑐖𑑂𑐫𑐵 𑐖𑑂𑐰𑐣𑐵𑑅 𑐰𑐣𑐵𑐥𑐶𑑄 𑐖𑐶𑐥𑐶𑑄 𑐰𑐫𑑂𑐎𑑅𑐫𑐵 𑐁𑐟𑐶𑐠𑑂𑐫𑐟𑐵𑑄 𑐟𑐳𑐎𑑄 𑐀𑐣𑐸𑐐𑐺𑐴𑐷𑐟 𑐖𑐸𑐫𑐵𑑅 𑐮𑐶𑐴𑐵𑑄 𑐰𑐫𑐵 𑑋 𑐮𑐶𑐳𑐾𑑄 𑐰𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐩𑐹𑐏𑑂𑐫𑐩𑐣𑑂𑐟𑑂𑐬𑐷 𑐳𑐸𑐬𑐾𑐣𑑂𑐡𑑂𑐬 𑐥𑐵𑐞𑑂𑐜𑑂𑐫𑐫𑐵 𑑑𑑐𑑐 𑐣𑑂𑐴𑐸𑐫𑐵 𑐄𑐥𑐮𑐧𑑂𑐢𑐷 𑐥𑐶𑐧𑑂𑐰𑐫𑐾𑐐𑐸 𑐣𑐶𑑄𑐟𑐶𑑄 𑐫𑐵𑑅𑐐𑐸 𑐥𑑂𑐬𑐾𑐳 𑐳𑐩𑑂𑐩𑐾𑐮𑐣𑐫𑑂 𑐧𑑂𑐰𑐟𑐶 𑐎𑐵𑐫𑐾𑐐𑐸 𑐴𑑂𑐰𑑅𑐟𑐵𑑅 𑐣𑑄 𑐔𑐹𑐮𑐵𑐟 𑑋

𑐥𑑂𑐬𑐾𑐳 𑐳𑐩𑑂𑐩𑐾𑐮𑐣 𑐠𑑂𑐫𑑄𑐩𑐠𑑂𑐫𑑄 𑐳𑑂𑐰𑐟𑐵𑑅𑐟𑑂𑐫𑐵𑑅 𑐂𑐮𑐫𑑂 𑐎𑑂𑐰𑐔𑐵𑐮 𑑋 𑐥𑑂𑐬𑐾𑐳 𑐳𑐩𑑂𑐩𑐾𑐮𑐣𑐫𑑂 𑐂𑐄𑑃𑐐𑐸 𑐣𑐳𑐵𑐖𑑂𑐰𑐮𑑄 𑐎𑐫𑐵𑑅 𑐮𑐶𑐴𑐵𑑄 𑐰𑐫𑐵 𑑋 𑐥𑐵𑐳𑐵𑐥𑐶𑐣𑐶 𑐡𑐠𑐸𑐂 𑐠𑑁𑑄 𑐮𑐶𑐴𑐵𑑄 𑐰𑐣𑐾𑐐𑐸 𑐎𑐶 𑐎𑐣𑑂𑐴𑐫𑑂 𑐢𑐎𑐵𑑅 𑐕𑐎𑑅 𑐳𑐴𑐮𑐴 𑐖𑐸𑐮 𑑋 𑐠𑑁𑑄 𑐴𑐾 𑐮𑐶𑐴𑐵𑑄 𑐰𑐣𑐾𑐐𑐸 𑐳𑐴𑐩𑐟𑐶 𑐖𑐸𑐳𑐾𑑄𑐮𑐶 𑐳𑐎𑐮𑐾𑑄 𑐮𑐶𑐴𑐵𑑄 𑐰𑐫𑐾𑐐𑐸 𑐮𑑃𑐥𑐸𑐂 𑐰𑐣𑐵 𑑋 𑐥𑑂𑐫𑐟𑐵𑑅 𑐂𑐮𑐫𑑂 𑐴𑐾𑐚𑐵𑑄𑐿𑐜𑐵𑑄 𑐥𑐶𑐴𑐵𑑄 𑐰𑐫𑐵 𑑋
𑐥𑐸𑐮𑐵𑑄𑐐𑐸 𑐨𑐶𑐩𑐦𑐾𑐡𑐷𑐫𑐵 𑐟𑐵𑑃𑐫𑑂 𑐠𑑂𑐫𑑄𑐎𑐵𑑅 𑐳𑑂𑐰𑐡𑐸𑐰𑐵𑐟𑐫𑑂 𑐔𑑂𑐰𑐣𑐵𑑅 𑐥𑐵𑐳𑐵 𑐣𑐷𑐮𑑅𑐣𑑄 𑐐𑐣𑑄 𑐰𑐣𑐾 𑐢𑐎𑐵𑑅 𑐣𑑂𑐫𑐣 𑑋 𑐖𑐶 𑐠𑑅 𑐮𑐵 𑐀𑐣𑐫𑐵 𑐮𑑃 𑐕𑐸𑑄 𑐳𑐶𑐄𑐩𑑂𑐴 𑐴𑐾 𑐩𑐏𑐸𑐟 𑑋

‘𑐐𑐣𑑄 𑐰𑑄𑐳𑐵 𑐐𑐸𑐮𑐶 𑐎𑐶. 𑐩𑐶. 𑐡𑐵𑐥𑐵𑑅 𑐡𑐸 ?’ 𑐢𑐎𑐵𑑅 𑐣𑑂𑐫𑐣𑐵 𑑋 𑐥𑐵𑐳𑐵 𑐄𑐡𑐾𑐣𑑄 𑐣𑑂𑐴𑑂𑐫𑐣𑐾𑐫𑐵 𑐐𑑂𑐰𑐬𑑅 𑐳𑑂𑐰𑐫𑐵𑑅, ‘𑐄 𑐀𑐣 𑐴𑐾 𑐔𑑂𑐰𑐫𑐵𑐟𑑅𑐐𑐸 𑐡𑐸 𑐣𑐶’ 𑐢𑐵𑐮 𑑋 𑐖𑐶𑑄 𑐐𑑂𑐰𑐬𑐮𑐫𑑂 𑐧𑑂𑐰𑐣𑐵 𑑋 𑐡𑐵𑐩𑐣 𑐖𑐸𑐫𑐵𑑅 𑐫𑐾𑑃 𑐰𑐣𑐾𑐟 𑑑𑑒𑑐 𑐎𑐶. 𑐩𑐶., 𑐨𑐶𑐩𑐦𑐾𑐡𑐷 𑐖𑐸𑐫𑐵𑑅 𑐰𑐣𑐾𑐟 𑑗𑑖 𑐎𑐶. 𑐩𑐶. 𑐔𑑂𑐰𑐫𑐵𑐟𑑅𑐐𑐸 𑐏𑐣𑐵 𑑋 𑐣𑐷𑐮𑑅 𑐣𑑄 “𑑑÷𑑒 𑐑𑐞𑑂𑐚𑐵 𑐖𑑅𑐕𑐶 𑐥𑐵𑑅 𑐕𑐑𑑁 𑐀𑐥𑑂𑐰𑑅 𑐰𑐣𑐾𑐩𑐵𑐮𑐷 𑐎𑐵’ 𑐢𑐵𑐮 𑑋 ‘𑐎𑐵 𑐀𑐠𑐾 𑐏𑑅𑐳𑐵 𑐡𑐵𑐩𑐣𑑄 𑐰𑐣𑐾 𑑋 𑐕𑐎𑑅 𑐣𑑄 𑐩𑐰𑐣𑐵𑐣𑐶, 𑐔𑑂𑐰𑐵𑐥𑐸 𑐡𑑅𑐳𑐵 𑐳𑑂𑐰𑐫𑐾 𑐣𑑄 𑐏𑐣𑐶 𑑋’ 𑐢𑐵𑐳𑐾𑑄𑐮𑐶 𑐳𑑂𑐎𑐸𑐚𑐬𑐫𑐵 𑐴𑑂𑐫𑐵𑐞𑑂𑐜𑐶𑐮 𑐡𑐵𑐩𑐣 𑐥𑐵𑐏𑐾𑐬 𑐦𑐳𑑂𑐰𑐮 𑑋

𑐮𑑃 𑐟𑐳𑐎𑑄 𑐧𑐵𑑄𑐮𑐵𑑅 𑑋 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐮𑑃 𑐥𑐷𑐔 𑐴𑐾 𑐖𑐹𑐐𑐸𑐮𑐶𑑄 𑐣𑑂𑐴𑑂𑐫𑐵𑐎𑑂𑐰 𑐧𑑂𑐰𑐵𑐎𑐹𑐳𑐵𑑄 𑐧𑑂𑐰𑐵𑐎𑐵 𑐠𑐾𑑄 𑐩𑐔𑑂𑐰𑑄𑐎 𑐮𑐶𑐴𑐵𑑄 𑐰𑐫𑐵𑐔𑑂𑐰𑐣𑐵 𑑋 𑐑𑐸𑐩𑑂𑐟𑐷 𑐰𑐮𑐎𑐶 𑐨𑐔𑐵 𑐗𑑂𑐫𑐵𑐟𑐸𑐳𑐵𑑄 𑐮𑑃 𑐫𑐔𑐸𑐐𑐸𑐮𑐶 𑐕𑐸𑑄 𑐳𑐩𑐳𑑂𑐫𑐵 𑐩𑐰𑑅 𑑋 𑐄𑐡𑐾𑐣𑐮𑐶𑐳𑐾 𑐐𑐦 𑐫𑐵𑐫𑐵𑑄 𑐮𑐶𑐴𑐵𑑄 𑐰𑐫𑐵 𑑋 𑐣𑐷𑐮𑑅 𑐰 𑐀𑐬𑑂𑐰𑐶𑐣 𑐕𑐎𑑅 𑐕𑐎𑑅 𑐣𑑂𑐴𑑂𑐫𑑅𑐣𑐾 𑐕𑐎𑑅 𑐕𑐎𑑅 𑐮𑑂𑐫𑐹𑐣𑐾 𑐫𑐵𑐫𑐵𑑄 𑐰𑐫𑐵𑐔𑑂𑐰𑐣 𑑋 𑐰𑐰𑑄 𑐳𑐶𑐩𑐨𑐘𑑂𑐖𑑂𑐫𑐵𑐒𑑂 𑐠𑑂𑐫𑐣𑐾𑐟 𑑗 𑐎𑐶.𑐩𑐶.𑐟𑐶 𑐮𑑂𑐫𑑄𑐡𑐣𑐶𑐧𑐮𑐫𑑂 𑐮𑑃 𑐳𑐶𑐠𑐫𑑂 𑐳𑐶𑐠𑐫𑑂 𑐔𑑂𑐰𑐵𑐥𑐸 𑐏𑐣𑐾𑐡𑐟 𑑋 𑐖𑐰𑑄 𑐏𑐰𑑄 𑐟𑐸𑐂𑐳𑐾 𑐔𑑂𑐰𑑄𑐐𑐸 𑐔𑑂𑐰𑐵𑐥𑐸 𑐳𑑂𑐰𑐳𑑂𑐰𑑄 𑐣𑑂𑐴𑑂𑐫𑐂𑐥𑐸𑐎 𑐮𑐶𑐴𑐵𑑄 𑐰𑐫𑐵𑐔𑑂𑐰𑐣𑐵𑐥𑐶𑑄 𑐨𑐔𑐵 𑐀𑐥𑑂𑐰𑑅 𑐔𑑂𑐰𑐵𑐥𑐸 𑐏𑐣𑐾𑐰𑑄 𑐕𑐥𑐵𑑅 𑐣𑐶𑐥𑐵𑑅 𑐦𑑀𑐚𑑀 𑐎𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵 𑑋 𑐣𑐷𑐮𑑅𑐣𑑄 𑐰 𑐄𑐡𑐾𑐣𑑄 𑐎𑐵𑑅𑐐𑐸 𑐳𑐾𑐮𑑂𑐦𑐷𑐂 𑐠𑑅𑐟 𑐣𑑂𑐴𑑂𑐫𑑄𑐎𑐵 𑑋 𑐔𑑂𑐰𑐫𑑂 𑐱𑐸𑐬𑐸𑐱𑐸𑐬𑐸𑐂 𑐔𑑂𑐰𑐵𑐥𑐸 𑐏𑑃𑐧𑐮𑐫𑑂𑐟𑐎 𑐦𑐳𑑄 𑐏𑑂𑐰𑐵𑐄𑑃𑐳𑐾 𑐔𑑂𑐰𑐣𑐵𑐔𑑂𑐰𑑄𑐐𑐸 𑐮𑑂𑐴𑐵𑑅𑐫𑐵 𑐥𑐘𑑂𑐖𑐵 𑐟𑑂𑐰𑑅𑐟𑐾 𑐀𑐮𑑂𑐕𑐶 𑐖𑐸𑐫𑐵𑑅 𑐠𑑅𑐐𑐸 𑐩𑑀𑐧𑐵𑐂𑐮𑑄 𑐦𑑀𑐚𑑀 𑐎𑐵𑐫𑐾𑐐𑐸 𑐁𑑃𑐚 𑐫𑐵𑐫𑐾 𑐩𑐦𑐸𑐟 𑑋 𑐥𑐵𑐳𑐵𑐥𑐶𑑄𑐳𑑄 𑐎𑐵𑑅𑐐𑐸 𑐦𑑀𑐚𑑀𑑄 𑐮𑐸𑐢𑑄𑐎𑐵 𑑋

𑐀𑐣𑑄 𑐣𑑂𑐴𑑂𑐫𑑅𑐣𑐾 𑐧𑑂𑐰𑐵𑐧𑑂𑐰𑐵𑑄 𑐴𑐾 𑐩𑐣𑐹𑐟 𑐩𑑂𑐰𑑅 𑐩𑑂𑐰𑑅 𑐏𑐣𑐾 𑐡𑐫𑐵𑐰𑐮 𑑋 𑐣𑐔𑑂𑐔𑐵𑐥𑐶𑑄 𑐮𑑂𑐫𑐵𑐳𑐾𑐮𑑂𑐫𑐵𑐫𑑂𑐩𑑂𑐴𑐟 𑐔𑑂𑐰𑐵𑐥𑐸 𑐎𑐸𑐴𑐵𑑄 𑐰𑑅𑐠𑐵𑐫𑑂 𑐦𑑀𑐚𑑀 𑐎𑐫𑐵𑑅 𑐣𑑂𑐴𑑂𑐫𑐂𑐥𑐸𑐎𑐵𑐔𑑂𑐰𑑄𑐐𑐸 𑐳𑑂𑐰𑐳𑑂𑐰𑑄 𑐠𑑅𑐥𑐶𑐣𑐶 𑐣𑑄 𑐕𑐎𑑅𑐳𑐵𑑄 𑐩𑑂𑐴𑐶𑐟𑐾 𑐮𑐵 𑐢𑐫𑐵𑐠𑐾𑑄 𑐔𑑂𑐰𑐣𑐵𑐰𑐮 𑑋 𑐟𑐬 𑐂𑐮𑑄 𑐨𑐵𑐫𑑂 𑐩𑐮𑑂𑐴𑐵𑐫𑐾 𑐢𑐸𑑄𑐎𑐹𑐐𑐸𑐮𑐶𑑄 𑐀𑐣𑑄 𑐣𑑂𑐴𑑂𑐫𑑅𑐣𑐾 𑐧𑑂𑐰𑐵𑐫𑐾𑐐𑐸 𑐴𑐾 𑐥𑐵𑐫𑑂𑐕𑐶 𑐟𑐵𑐫𑐾𑐎𑐵𑑅 𑐣𑑂𑐴𑑂𑐫𑑅𑐣𑐾 𑐰𑐣𑐵 𑑋 𑐕𑐸𑑄 𑐨𑐔𑐵 𑐰𑐫𑐾𑐢𑐸𑑄𑐎𑐵 𑐮𑑃𑐥𑐸𑐂 𑐔𑑂𑐰𑐵𑐥𑐸𑐫𑐵 𑐮𑐵𑐳𑐵 𑐮𑐵𑐣𑐵𑐟𑑅𑐠𑐾𑑄 𑐏𑐣𑐵𑐰𑐮 𑑋 𑐣𑑂𑐴𑑂𑐫𑑅𑐣𑐾 𑐩𑐣𑐹𑐟 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐥𑐶𑑄 𑐧𑐸𑐮𑐸𑐴𑐸𑑄 𑐥𑐵𑑅 𑐖𑐸𑐫𑐵 𑐰𑐣 𑑋 𑐖𑐶𑐥𑐶𑑄 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐣𑐾 𑐣𑐶𑐐𑑅 𑐳𑑂𑐰𑑄𑐐𑑅𑐟𑐶 𑐩𑑀𑐚𑐬𑐳𑐵𑐂𑐎𑐮 𑐰𑐣𑐵𑐔𑑂𑐰𑑄𑐐𑐸 𑑋 𑐄𑐩𑐶𑐐𑐸 𑐮𑑃𑐥𑐸𑐂 𑐥𑐮𑐵𑑅 𑐟𑐟𑑄 𑐰𑐣𑐵 𑑋

𑐰𑑃𑐰𑑄 𑐡𑑂𑐫𑑅 𑐏𑐶𑐄𑑃𑐳𑐾 𑐔𑑂𑐰𑐣𑐵𑐰𑐮 𑑋 𑐔𑑂𑐰𑐫𑑂 𑐳𑑂𑐰𑑅𑐳𑐵 𑐟𑐸𑐫𑐹 𑐟𑐥𑐸𑐮𑐶 𑐥𑐸𑐣𑐵𑐟𑑅𑐩𑑂𑐴 𑐧𑐸𑑃𑐏𑑂𑐫𑐵𑑅𑐠𑐾𑑄 𑐔𑑂𑐰𑑄𑐐𑐸 𑐴𑐵𑐎𑐸𑐐𑐸𑑃, 𑐮𑑃 𑐳𑑂𑐰𑑅𑐳𑐵 𑐎𑐥𑐵𑐫𑑂 𑐦𑑂𑐫𑐣𑐵𑐟𑑅𑐠𑐾𑑄 𑐟𑐸𑐂𑐳𑐾𑐔𑑂𑐰𑑄𑐐𑐸 𑐮𑑃𑐥𑐸 𑑋 𑐦𑐸𑐠𑐵𑐫𑑂𑐟𑐎 𑐳𑑂𑐎𑐸𑐚𑐬 𑐐𑐫𑐵, 𑐩𑐦𑐸𑐠𑐵𑐫𑑂 𑐎𑐸𑐴𑐵𑑄 𑐰𑐫𑐾𑐐𑐸 𑐰 𑐑𑑂𑐰𑐵𑐫𑐾𑐐𑐸 𑐫𑐵𑐫𑐵𑑄 𑐰𑐫𑐵 𑑋 𑐥𑐵𑐳𑐵 𑐄𑐡𑐾𑐣𑑄 𑐣𑑂𑐫𑐵𑐳𑐶 𑐰𑐣𑐾𑐟 𑐠𑐵𑐎𑐸𑐎𑐮 𑑋
𑐠𑑂𑐫𑑄𑐩𑐠𑑂𑐫𑑄 𑐳𑐶𑐩𑐨𑐘𑑂𑐖𑑂𑐫𑐵𑐒𑑂 𑐠𑑂𑐫𑐣𑐾𑐟 𑑖 𑐎𑐶.𑐩𑐶.𑐟𑐶 𑐮𑑂𑐫𑑄𑐡𑐣𑐶𑐧𑐮𑐫𑑂 𑐢𑐵𑑅𑐳𑐵 𑐟𑐳𑐎𑑄 𑐠𑐵𑐎𑐸𑐫𑐵 𑐰𑐮 𑑋 𑐖𑐵 𑐰 𑐩𑐬𑐶 𑐣𑐫𑐵𑐔𑑂𑐰𑐣𑐵𑐩𑑂𑐴 𑐖𑐶 𑑋 𑐠𑑁𑑄 𑐳𑐸𑐠𑐫𑑂 𑐖𑐵 𑐥𑑂𑐰𑐵𑐠𑐫𑑂 𑐩𑐮𑐵𑑅 𑑋 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐧𑑂𑐫𑐹𑐐𑐸 𑐣𑐳𑐵𑐖𑑂𑐰𑐮𑑄𑐫𑐵 𑐨𑐬𑐫𑑂 𑐫𑐾𑑃𑐫𑑂 𑐳𑑂𑐰𑐫𑐵𑐰𑐫𑐵𑐥𑐶𑑄 𑐖𑐶𑐥𑐶𑑄 𑑋 𑐳𑑂𑐎𑐸𑐚𑐬 𑐐𑐫𑐵𑑅 𑐰𑐫𑐵𑐥𑐶𑑄, 𑐑𑑂𑐰𑐵𑐫𑐾𑐩𑐵𑑅𑐧𑐮𑐫𑑂 𑐕𑐟𑑂𑐠𑐸 𑐮𑐵 𑐔𑐵𑑅𑐴𑐶𑐎𑐮, 𑐣𑐫𑐾𑐥𑐶𑐟𑑂𑐫𑐵𑐣𑐵𑑄 𑑋 𑐳𑐸𑐐𑐬 𑐩𑑂𑐴𑑀 𑐖𑐸𑐫𑐵 𑐰𑑄𑐐𑐸 𑐮𑐵 𑐢𑐫𑐵 𑐠𑐾𑑄 𑐖𑐸𑐮 𑑋 𑐳𑑂𑐎𑐸𑐚𑐬 𑐑𑑂𑐰𑐵𑐣𑐵𑑅 𑐰𑐣𑐾𑐟 𑐳𑑂𑐰𑐮𑐎𑐶 𑐂𑐎𑐸𑐳𑐾 𑐔𑑂𑐰𑐣𑐷𑐐𑐸 𑑋 𑐠𑐠𑐾 𑐖𑐹𑐐𑐸 𑐰𑐵𑑅𑐔𑐵𑐫𑐾𑐰𑑄 𑐥𑐵𑐳𑐵𑐥𑐶𑑄𑐟 𑐥𑐶𑐫𑐵 𑑋 𑐐𑐫𑐵𑑅 𑐰𑐣𑐵𑐧𑐮𑐫𑑂 𑐣𑐷𑐮𑑅 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐮𑐵𑑅𑐳𑐵𑑄 𑐑𑑂𑐰𑐵𑐣𑐵𑑅 𑐰𑐣𑐾𑐩𑐵𑑅𑐧𑐮𑐫𑑂 𑐢𑐵𑑅𑐳𑐵 𑐖𑐶 𑐴𑐾 𑐣𑑂𑐴𑑂𑐫𑑅𑐣𑐾 𑑋 𑐠𑑅𑐠𑐩𑑂𑐴𑑄 𑐟𑐸𑑄 𑐧 𑐮𑐵 𑐧𑐮𑑂𑐮𑐵𑑅𑐣𑐶 𑐢𑐎𑐵𑑅 𑐩𑐣 𑐟𑑂𑐫𑐵𑐎𑐵 𑑋 𑐥𑐵𑐳𑐵𑐥𑐶𑑄 𑐣𑑄 𑐠𑑂𑐫𑑄𑐎𑑅 𑐰𑐮 𑑋
‘𑐖𑐶𑐟𑑅 𑐮𑐵 𑐔𑐵𑑅𑐴𑐶𑐎𑐮, 𑐂𑐎𑐸𑐳𑐾 𑐔𑑂𑐰𑐣 𑑋 𑐣𑐫𑐾𑐐𑐸 𑐕𑐸𑑄 𑐡𑐸𑐳𑐵 𑐣𑐫𑐾𑐩𑐵𑐮’ 𑐢𑐫𑐵 𑑋 𑐏𑐶𑐄𑑃𑐐𑐸 𑐠𑐵𑐳𑐫𑑂 𑐔𑑂𑐰𑐵𑐥𑐸 𑐦𑐸𑐬𑑂𑐬 𑐦𑐸𑐬𑑂𑐬 𑐧𑑂𑐰𑐫𑐵𑐔𑑂𑐰𑑄𑐐𑐸 𑐰 𑐮𑐹 𑐢𑐵𑑅𑐳𑐵 𑐟𑐳𑐎𑑄 𑐣𑑂𑐴𑑂𑐫𑐂𑐥𑐸 𑑋 𑐥𑐵𑐳𑐵 𑐀𑐬𑑂𑐰𑐶𑐣𑑄, “𑐣𑑂𑐴𑐵𑐔𑑅𑐫𑐵𑐐𑐸 𑐏𑐵𑐖𑐵𑐳𑐾𑐚 𑐡𑐣𑐶 𑐣𑐫𑐾𑐐𑐸 𑐮𑐵 ? 𑐢𑐵𑐮 𑑋 ‘𑐣𑐫𑐾𑐐𑐸 𑐴𑐖𑐶 ’ 𑐢𑐵𑐫𑐾𑐰𑑄 𑐣𑐶𑐐𑐹 𑐥𑑂𑐫𑐵𑐎𑐾𑐚 𑐏𑐵𑐖𑐵 𑐳𑐾𑐚 𑐥𑐶𑐎𑐵𑐮 𑑋 𑐩𑐩, 𑐩𑑂𑐰𑐵𑐫𑑂 (𑐎𑐾𑐬𑐵), 𑐧𑐬𑑂𑐐𑐬, 𑐧𑐬𑑂𑐦𑐷 𑐏𑑄𑐧𑐮𑐫𑑂 𑐩𑑂𑐫𑐾𑐫𑑂 𑐃 𑐧𑐸𑐫𑐵𑐰𑐮 𑑋 𑐎𑐵𑐔𑐵𑐎𑐵𑐔𑐵 𑐩𑐩 𑐣𑐶𑐐𑑅 𑐳𑑂𑐰𑑄𑐐𑑅 𑐩𑑂𑐴𑐸𑐟𑐸𑐂 𑐮𑑂𑐰𑐳𑐸𑐣𑐵 𑑋 𑐏𑑂𑐰𑐵𑐄𑑃𑐐𑐸 𑐩𑐩 𑐣𑑄 𑐔𑑂𑐰𑐵𑐥𑐸𑑄 𑐠𑐴𑐵𑑄 𑐰𑑅𑐐𑐸 𑐴𑐵𑑄 𑐎𑑂𑐰𑐵𑑅𑐎𑐮 𑐮𑐵 𑐢𑐫𑐵𑐠𑐾𑑄 𑐔𑑂𑐰𑐣𑐵 𑐰𑐮 𑑋 𑐩𑐩 𑐧𑐬𑑂𑐐𑐬 𑐣𑐫𑐾𑐢𑐸𑑄𑐎𑐵𑑅 𑐳𑐸𑐐𑐬 𑐩𑑂𑐴𑑀 𑐖𑐹𑐐𑐸 𑐏𑑅𑐮𑐵 𑐢𑐎𑐵𑑅 𑐧𑐬𑑂𑐦𑐷 𑐩𑐵𑐮𑐵𑑄, 𑐧𑐬𑑂𑐦𑐶 𑐮𑐵 𑐑𑐵𑐬𑐵𑐑𑐸𑐬𑐹 𑐥𑐵𑐬𑐵𑐥𑐸𑐬𑐸 𑐖𑐹𑐧𑐮𑐫𑑂 𑐳𑐸𑐣𑐵𑑄 𑐖𑐸𑐎𑐵 𑐟𑐫𑐾 𑐢𑐸𑑄𑐎𑐮 𑐏𑐣𑐶𑐎𑐵 𑑋 ‘𑐀𑐫𑑂 𑐐𑑂𑐰 𑐧𑐬𑑂𑐦𑐶’ 𑐢𑐎𑐵𑑅 𑐣𑑂𑐫𑐣𑐵𑑄, ‘𑐎𑐵 𑐄𑐡𑐾𑐣𑐔𑐵𑑄 𑐖𑐸𑐎𑐾 𑐢𑐸𑑄𑐎𑐮’ 𑐢𑐵𑐮 𑑋 𑐳𑐎𑐮𑐾𑑄 𑐕𑐎𑑅 𑐴𑑂𑐰𑐵𑐬𑑂𑐬 𑐣𑑂𑐴𑐶𑐮 𑑋 𑐠𑑅 𑐔𑐵𑐴𑐶𑑃 𑐴𑐶𑐳𑑂𑐳 𑐎𑐵 𑑋 𑐄𑐮𑐶 𑐣𑐫𑐾𑐢𑐸𑑄𑐎𑐵𑑅 𑐨𑐔𑐵 𑐀𑑅𑐥𑐸𑐮 𑑋 ‘𑐎𑐵, 𑐎𑐵 𑐣𑐹’ 𑐢𑐵𑐢𑐵𑑄 𑐀𑐣𑑄 𑐔𑑂𑐰𑐫𑐾 𑐣𑑂𑐴𑑂𑐫𑐵𑐣𑐵 𑑋

𑐧𑐔𑑂𑐕𑐶 𑐖𑐵𑑅𑐐𑐸 𑐥𑑂𑐰𑐵𑑅 𑐠𑐣𑐵𑑅 𑐠𑐴𑐵𑑄 𑐰𑐫𑐵𑐥𑐶𑑄 𑐐𑐸𑐮𑐶 𑐰𑐫𑐵 𑐩𑐳𑑂𑐫𑐹 𑐴𑐵𑐣𑑄 𑐣𑐫𑐾𑐥𑐶𑐟𑑂𑐫𑐵𑐫𑐾𑐐𑐸 𑐱𑐸𑐬𑐸 𑐖𑐸𑐮 𑑋 𑐳𑑂𑐎𑐸𑐚𑐬 𑐣𑑄 𑐩𑐾𑐥𑐶𑐣𑐶𑐐𑐸 𑐮𑑃𑐥𑐸𑐂 𑐟𑑂𑐫𑐵𑐮𑐎𑐵𑐫𑐾𑐦𑑅𑐳𑐵 𑐳𑐸𑐬𑐬𑑂𑐬 𑐠𑐴𑐵𑑄 𑐰𑐂𑐐𑐸 𑑋 𑐮𑑃𑐥𑐸 𑐕𑐏𑐾 𑐮𑐵𑐟𑐎𑐶 𑐔𑐸𑐮𑐸𑐫𑐵𑑅 𑐴𑐵𑐣𑑄 𑐐𑐣𑑄 𑐰𑐂𑐐𑐸 𑐏𑑅 𑐀𑐣 𑐴𑐾 𑐦𑐳𑑂𑐰𑐂𑐐𑐸 𑑋 𑐢𑐣𑑂𑐣 𑐳𑑂𑐎𑐸𑐚𑐬 𑐖𑐸𑐫𑐵𑑅 𑐨𑐔𑐵 𑐀𑑅𑐥𑐸𑐮 𑑋 𑐟𑐐𑑂𑐰𑑅𑐐𑐸 𑐩𑑀𑐚𑐬𑐳𑐵𑐂𑐎𑐮 𑐖𑐹𑐐𑐸 𑐖𑐹𑐳𑐵 𑐀𑐧𑐸𑐫𑐵 𑐧𑑂𑐫𑐵𑑅 𑐏𑐣𑐶𑐐𑐸 𑐖𑐸𑐂 𑑋 𑐳𑑂𑐎𑐸𑐚𑐬 𑐣𑑄 𑐣𑑂𑐴𑐹𑐐𑐸 𑐜𑐧𑐮 ‘𑐩𑑀𑐡𑐐𑐵𑐬’𑐫𑐵 𑐖𑐹𑐐𑐸𑐮𑐶𑑄 𑐢𑐵𑑅𑐳𑐵 𑐠𑐵𑐎𑐸𑐮 𑑋 𑐮𑐶𑐄𑐣𑐾𑐫𑐵 𑐑𑑅𑐔𑐵𑑅 𑐰 ‘𑐩𑑀𑐡𑐐𑐵𑐬’𑐫𑐵 𑐡𑐸𑐣𑐾 𑐔𑑂𑐰𑐵𑐥𑐸 𑐠𑐴𑐵𑑄 𑐰𑐣𑐵𑑄 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑐂𑐐𑐸 𑐴𑐾 𑐩𑐏𑐸 𑑋 𑐮𑐶𑐏𑐟𑑄 𑐕𑐎𑑅 𑐴𑐫𑐵𑑅 𑐔𑑂𑐰𑐵𑐥𑐸 𑐎𑑂𑐰𑐎𑐵𑐫𑐾𑐐𑐸, 𑐴𑐵𑐣𑑄 𑐣𑑂𑐴𑑂𑐫𑐣𑐾 𑐰𑐣𑐾𑐐𑐸 𑐫𑐵𑐫𑐵𑑄 𑐧𑐮𑑂𑐮 𑐧𑐮𑑂𑐮 𑐏𑐶𑐄𑑃𑐐𑐸 𑐠𑐵𑐳𑐫𑑂 𑐀𑐮𑐎𑐟𑑂𑐬𑐵𑐫𑐵 𑐚𑐶𑐣𑑄 𑐨𑐸𑐣𑐵𑑄 𑐡𑐫𑐾𑐎𑐵 𑐟𑑅𑐐𑐸 𑐧𑐮𑑂𑐔𑐶𑐫𑐵 𑐴𑑀𑐚𑐮 𑐕𑐐𑐹 𑐮𑐸𑐮 𑑋 𑐳𑐎𑐮𑐾𑑄 𑐀𑐣 𑐴𑐾 𑐩𑐸𑐣𑐵 𑑋 𑐀𑐣𑐫𑐵 𑐳𑐵𑐴𑐸𑐣𑐷 𑐟𑐵𑐩𑐵𑐒𑑂 𑑋 𑐏𑑃 𑐮𑑂𑐴𑐵𑐫𑐾𑐩𑐵𑑅 𑑋 𑐄𑐩𑐶𑐐𑐸 𑐏𑑃 𑐣𑑂𑐫𑐣𑐵𑑅 𑐐𑐸𑐧𑐮𑐾𑑄 𑐩𑐣 𑐳𑑂𑐰𑐵𑑄 𑐴𑑂𑐰𑐂𑐐𑐸, 𑐐𑐸𑐧𑐮𑑃𑐫𑑂 𑐣𑐸𑐐𑑅 𑐎𑑂𑐰𑐟𑐸𑐣𑐶𑐐𑐸 𑑋 𑐀𑐫𑑂𑐣𑑄 𑐖𑐶 𑐮𑐵 𑐣𑑂𑐴𑑂𑐫𑐵𑐠𑐾 𑐫𑐵𑐣𑐵𑑅 𑐣𑑄 𑐠𑑁𑑄 𑐫𑐾𑑃 𑐠𑑂𑐫𑑄𑐎𑐾 𑐴𑐾 𑐩𑐵𑐣𑐷 𑐢𑐫𑐵𑐎𑐠𑑄 𑐁𑐟𑑂𑐩𑐧𑐮 𑐧𑐮𑑂𑐮𑐵𑐎𑐵 𑐔𑑂𑐰𑐣𑐵 𑑋

𑐥𑐵𑐳𑐵 𑐣𑐷𑐮𑑅 𑐰 𑐀𑐬𑑂𑐰𑐶𑐣𑑄 𑐸𑐵𑐴𑐸𑐣𑐷𑐫𑐵𑐟 𑐣𑐳𑐵𑐖𑑂𑐰𑐮𑑄 𑐡𑐫𑐾𑐎𑐾𑐟 𑐢𑐵𑐮 𑑋 𑐣𑑂𑐴𑐵𑐥𑐵𑑄 𑐔𑑂𑐫𑐵 𑐟𑑂𑐰𑐣𑐵𑑅 𑐮𑐶𑐥𑐵 𑐰𑐵𑐂𑐰𑐵𑐃 𑐔𑐵𑐄𑐔𑐵𑐄 𑐕𑐐𑐹 𑐕𑐐𑐹 𑐠𑐮 𑐣𑐫𑐵 𑑋 𑐔𑐵𑐄𑐔𑐵𑐄𑐮𑐶𑐳𑐾𑑄 𑐀𑐬𑑂𑐰𑐶𑐣 𑐰 𑐄𑐡𑐾𑐣𑐫𑐵 𑐎𑑂𑐰𑐵𑑅𑐎𑑂𑐰𑐵𑑅 𑐟𑐷𑐣𑐥𑐵𑐣𑐷 𑐩𑑂𑐴𑐸𑐟𑐸𑐂 𑐴𑐵𑑅 𑐫𑐵𑐣𑐵𑐰𑐮 𑑋 𑐄𑐡𑐾𑐣 𑐕𑑂𑐫𑑄 𑐳𑑂𑐫𑐵𑐟 𑐢𑐎𑐵𑑅 𑐀𑐮𑐐 𑐔𑑂𑐰𑑄𑐰𑐣 𑑋 𑐠𑐣 𑐣𑐫𑐵𑐐𑐸 𑐔𑐵𑐄𑐔𑐵𑐄𑐫𑐵 𑐧𑐮 𑐢𑐵𑑅𑐳𑐵 𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐟𑐎𑐫𑐵𑐟 𑐐𑐵𑐟 𑑋 𑐰 𑐴𑑀𑐚𑐮𑐫𑑂 𑐔𑑂𑐫𑐵𑐎𑐵𑐟𑑅𑐐𑐸 𑐩𑐶 𑐟𑑂𑐰𑑅𑐟𑐵 𑐰𑐫𑐾𑐟 𑐟𑐳𑐎𑑄 𑐠𑐵𑐎𑐸𑐮 𑑋 𑐩𑐶 𑐎𑐸𑐫𑐵𑑅 𑐔𑑂𑐰𑐣𑐾𑐡𑑅𑐳𑐵 𑐖𑐶𑐄𑐐𑐸 𑐢𑐿𑐠𑐾𑑄 𑐟𑐵𑐮 𑑋 𑐩𑐶 𑐎𑐸𑐂𑐐𑐸 𑐮𑑀𑐨 𑐡𑑅𑐳𑐵𑑄 𑐠𑑅𑐐𑐸 𑐐𑐣𑑂𑐟𑐧𑑂𑐫 𑐟𑐵𑐥𑐵𑐣𑐶𑐐𑐸𑐮𑐶 𑐀𑐣𑑄 𑐧𑐵𑐫𑐵 𑐰𑐫𑐵 𑑋

𑐠𑐣 𑐣𑐫𑐵𑐐𑐸 𑐔𑐵𑐄𑐔𑐵𑐄𑐫𑐵 𑐧𑐮𑑄 𑐳𑑂𑐎𑐸𑐚𑐬 𑐑𑑂𑐰𑐵𑐫𑐾𑐟 𑐀𑑅𑐥𑐸𑐮 𑑋 𑐣𑐷𑐮𑑅 𑐰 𑐀𑐬𑑂𑐰𑐶𑐣𑐫𑐵 𑐥𑐵𑐮𑑄𑐥𑐵𑑅 𑐳𑑂𑐎𑐸𑐚𑐬 𑐑𑑂𑐰𑐵𑐫𑐾𑐖𑑂𑐫𑐵 𑑋 𑐣𑑂𑐴𑑂𑐫𑐵𑐧𑐮𑐾𑑄 𑐳𑑂𑐎𑐸𑐚𑐬𑐫𑐵𑐟 𑐖𑑀𑐟𑐾 𑐫𑐵𑐣𑐵𑐔𑑂𑐰𑐣𑐵𑐥𑐶𑑄 𑐠𑑁𑑄 𑐳𑑂𑐎𑐸𑐚𑐬𑑄 𑐖𑑀𑐟𑐾 𑐫𑐵𑐟 𑐢𑐫𑐵𑐠𑐾𑑄 𑐣𑑂𑐴𑐶𑐮𑐾 𑐣𑑄 𑐰𑐂𑐐𑐸 𑑋 𑐑𑑂𑐰𑐵𑐑𑑂𑐰𑐵𑑄 𑐰𑑃𑐰𑑄 𑐣𑐶𑐐𑐹𑐟𑐶 𑐑𑐸𑐩𑑂𑐟𑐶 𑐠𑐴𑐵𑑄 𑐰𑐣𑐾𑐢𑐸𑑄𑐎𑐵𑑅 𑐜𑑀𑐖𑐬𑑄 𑐔𑑂𑐰𑐵𑐥𑐸 𑐑𑑂𑐰𑐵𑐣𑐵𑐟𑑅𑐐𑐸 𑐏𑐣 𑑋 𑐔𑑂𑐰𑐵𑐥𑐸 𑐑𑑂𑐰𑐵𑐣𑐵𑑄 𑐟𑑅𑐠𑐵𑐫𑑂 𑐨𑐔𑐵 𑐀𑑅𑐥𑐸𑐎 𑐳𑑂𑐎𑐸𑐚𑐬 𑐑𑑂𑐰𑐵𑐣𑐵 𑑋 𑐐𑐣𑑄 𑐔𑑂𑐰𑐣𑐾 𑐖𑑂𑐫𑐹𑐠𑐵𑐫𑑂 𑐔𑑂𑐰𑐣𑐵 𑑋 𑐐𑐣𑑄 𑐧𑐸𑐮𑐸𑐴𑐸𑑃 𑐐𑐫𑐵 𑑋 𑐖𑑂𑐫𑐹𑐠𑐵𑐫𑑂 𑐕𑐶𑑄𑐠𑐵𑐫𑑂 𑐄𑐡𑐾𑐣𑐫𑐵𑐟 𑐣𑑄 𑐟𑐫𑐵𑑅 𑐐𑐫𑐵 𑐰𑐫𑐾𑐐𑐸 𑑋 𑐔𑑂𑐰𑐵𑐥𑐸 𑐖𑐩𑐾𑐖𑐸𑐂 𑐢𑐸𑑄𑐎𑐹𑐠𑐵𑐫𑑂 𑐠𑑂𑐫𑐣𑐎𑐶 𑐳𑑂𑐎𑐸𑐚𑐬 𑐦𑐣𑐎𑑂𑐎 𑐔𑐵𑐴𑐶𑐮𑐷 𑑋 𑐣𑐶𑐩𑑂𑐴𑑄 𑐔𑑂𑐰𑐵𑐥𑐸 𑐰𑐵𑐣𑑂𑐫𑐵 𑐰𑐣𑐷 𑑋 𑐣𑑂𑐴𑐶𑐮𑐾 𑐰𑐂 𑑋

𑐠𑐠𑐾 𑐣𑑂𑐴𑑂𑐫𑐵 𑐰𑑃𑐰𑑄 𑐳𑐶𑐩𑐨𑐘𑑂𑐫𑐵𑐒𑑂 𑐠𑑂𑐫𑐣 𑑋 𑐩𑐣 𑐳𑑂𑐰𑐵𑑄 𑐴𑑂𑐰𑐮 𑑋 𑐕𑐔𑐵𑑅𑐏𑐾𑐬𑑄 𑐕𑐎𑑅 𑐳𑑂𑐰𑐫𑐵 𑑋 𑐕𑐾𑑃𑐏𑐵𑐥𑐟𑐶𑑄 𑐥𑐮𑐶 𑐥𑐮𑐶𑐂 𑐔𑑂𑐰𑐵𑐥𑐸 𑑋 𑐳𑑂𑐰𑑅𑐳𑑂𑐰𑑅𑐠𑐵𑐫𑑂 𑐔𑑂𑐰𑐵𑐥𑐸 𑑋 𑐩𑐣𑐹𑐟 𑐄𑐏𑐾𑑄𑐠𑐸𑐏𑐾𑑄 𑐴𑑀𑐚𑐮 𑐩𑐵𑑅𑐖𑐸𑐮 𑑋 𑐖𑐶𑐥𑐶𑑄 𑐔𑐵𑐴𑐶𑑃 𑐣𑑂𑐴𑑂𑐫𑐵𑐠𑐾 𑐫𑐵𑐣𑐵𑑄 𑐣𑑄 𑐫𑐾𑑃𑐫𑑂 𑐠𑑂𑐫𑑄𑐎𑐾𑐐𑐸 𑐢𑑂𑐫𑐵𑐄𑐣𑐵𑐫𑑂 𑑋 𑐖𑐶 𑐮𑐵 𑐡𑐵𑐩𑐣 𑐢𑐫𑐵𑐐𑐸 𑐴𑐾 𑐔𑑂𑐰𑐎𑐵𑐫𑑂 𑐢𑐎𑐵𑑅 𑐔𑑂𑐰𑐣𑐵𑐐𑐸, 𑐳𑐶𑐩𑐨𑐘𑑂𑐖𑑂𑐫𑐵𑐒𑑂 𑐔𑑂𑐰𑐎𑐵𑐫𑑂 𑐏𑐣𑐶 𑑋 𑐧𑐴𑐣𑐷𑐳𑐶𑐫𑐵 𑑑𑑑 𑐟𑐵𑑅 𑐂𑐮𑐫𑑂 𑐴𑐾 𑐖𑐹𑐳𑐵𑑄 𑐳𑐶𑐩𑐨𑐘𑑂𑐖𑑂𑐫𑐵𑐒𑑂 𑐠𑑂𑐫𑑄𑐎𑐾 𑐏𑐣𑐵𑑄 𑐩𑐣 𑐔𑐎𑐣 𑑋 𑐫𑐵𑐟𑑂𑐬𑐵 𑐟𑐳𑐎𑑄 𑐣𑑂𑐴𑑂𑐫𑐂𑐥𑐸 𑐟𑐵𑐮 𑑋 𑐕𑐐𑐹 𑐣𑑂𑐴𑐹𑐐𑐸 𑐀𑐣𑐸𑐨𑐰 𑐎𑐫𑐵𑐔𑑂𑐰𑐣𑐵𑐐𑐸 𑐡𑐸 𑐢𑐫𑐵𑐐𑐸 𑐟𑐵𑐮 𑑋

𑐣𑑂𑐴𑐵𑐔𑑅𑐟𑐎 𑐠𑐴𑐵𑑄𑐖𑐎 𑐰𑐫𑐵𑐔𑑂𑐰𑐣𑐵𑐥𑐶𑑄 𑐁𑑅 𑐢𑐵𑑅𑐳𑐵 𑐎𑐸𑐴𑐵𑑄 𑐰𑐣𑐾𑐐𑐸 𑐳𑐸𑐬𑐸 𑐖𑐸𑐮 𑑋 𑐄𑐡𑐾𑐣𑐫𑐵𑐟 ‘𑐎𑐵, 𑐔𑑂𑐰𑑃 𑑋’ 𑐢𑐎𑐵𑑅 𑐟𑐫𑐵𑑅 𑐀𑐣𑑄 𑐣𑑂𑐴𑑂𑐫𑐵𑐣𑐵 𑑋 𑐀𑐬𑑂𑐰𑐶𑐣 𑐰 𑐣𑐷𑐮𑑅 𑐣𑑄 𑐔𑑂𑐰𑐣 𑐧𑐸𑐮𑐸𑐴𑐸𑑃 𑐢𑑅𑐢𑑅 𑐥𑐵𑐫𑐵𑑅 𑐜𑑀𑐖𑐬𑑄 𑐡𑐫𑐾𑐎𑐵𑐟𑑅𑐐𑐸 𑐮𑐶𑐎𑐮𑐶𑐎𑑄 𑐎𑐸𑐴𑐵𑑄 𑐰𑐫𑐵 𑑋 𑐮𑐶𑐎 𑐟𑑂𑐰𑑅𑐦𑐶𑐟𑐎𑐶 𑐮𑐵 𑐣𑑂𑐫𑐵 𑐕𑑂𑐰𑐵 𑐰𑐵𑐫𑐾 𑐠𑐾𑑄 𑐰𑐵𑐂𑐐𑐸 𑑋 𑐴𑐵𑐣𑑄 𑐡𑐣𑐾𑐐𑐸 𑑋 𑐄𑐡𑐾𑐣𑐫𑐵𑐟 𑐣𑑂𑐫𑐵𑐳𑐶𑐎𑐾𑐐𑐸, 𑐠𑑅 𑐔𑑂𑐰𑐣𑐾𑐐𑐸, 𑐎𑐸𑐴𑐵𑑃 𑐰𑐫𑐾𑐐𑐸 𑑋 𑐑𑐸𑐩𑑂𑐟𑐶 𑐰𑐮𑐎𑐶 𑐟𑐳𑐎𑑄 𑐠𑐵𑐎𑐸 𑑋 𑐳𑑂𑐎𑐸𑐚𑐬𑐫𑐵 𑐑𑑅𑐔𑐵𑐮𑑄 𑐮𑐶𑐎𑐫𑑂 𑐔𑑂𑐰𑐣𑐾𑐐𑐸 𑐴𑐾 𑐳𑑂𑐰𑐂𑐩𑐏𑐸 𑑋 𑐳𑐵𑐮𑐵𑑅 𑐮𑐶𑐎𑐫𑑂 𑐟𑐫𑐾𑐐𑐸 𑑋 𑐕𑐠𑐵𑐫𑑂 𑐮𑐵 𑐣𑐶𑐎𑑅𑐟𑐎 𑐔𑐸𑐮𑐸𑐫𑐵 𑐦𑑂𑐫𑐟𑐸𑐣𑐵 𑑋 𑐰𑐴𑐾 𑐥𑑀𑐖𑐫𑑂 𑐨𑑂𑐫𑐵𑐟 𑐨𑑂𑐫𑐵𑐟 𑐠𑐳𑑅 𑐥𑐵𑐫𑐾𑐎 𑐦𑑂𑐫𑐟𑐹𑐧𑐮𑐫𑑂 𑐣𑑂𑐴𑐶𑐮𑐾 𑐣𑑄 𑐩𑐦𑐸, 𑐏𑑂𑐰𑐫𑐾 𑐣𑑄 𑐩𑐦𑐸 𑑋 𑐠𑑁𑑄𑐟𑐎 𑐣𑑄 𑐣𑐵𑐜𑐶 𑐟𑑂𑐫𑑅𑐠𑐾𑑄 𑐖𑐸𑐫𑐵𑐔𑑂𑐰𑐣 𑐟𑐶𑐣𑐶 𑑋

𑐠𑐣𑐠𑐵𑐫𑑂 𑐠𑑂𑐫𑑄𑐧𑐮𑐫𑑂 𑐢𑐵𑑅𑐳𑐵 𑐜𑑀𑐖𑐬 𑐳𑐟𑐶𑐎 𑐴𑐾 𑐮𑐵𑑅 𑐰𑐮 𑑋 𑐜𑑀𑐖𑐬𑑄 𑐔𑑂𑐰𑐵𑐥𑐸 𑐔𑐷𑐎𑐵𑑅 𑐎𑐸𑐴𑐵𑑄 𑐰𑑄𑐮𑐶𑐳𑐾 𑐰𑐫𑐵 𑐮𑐶𑐄𑐮𑐶𑐄 𑐰𑐣𑐵𑐔𑑂𑐰𑑄𑐐𑐸 𑐩𑐵𑐮𑐧𑐵𑐴𑐎 𑐚𑑂𑐬𑐎, 𑐀𑐮𑐾 𑐖𑐶𑐥𑐶𑑄 𑑋 𑐩𑐵𑐮𑐧𑐵𑐴𑐎 𑐚𑑂𑐬𑐎 𑐕𑐐𑑅 𑐔𑐸𑐮𑐸𑐫𑐵 𑐰𑐣𑐵𑑄 𑐎𑐮𑐨𑐬𑑂𑐚𑐫𑑂 𑐎𑐸𑐟𑐸𑑄 𑐰𑐣 𑑋 𑐄𑐧𑐮𑐫𑑂 𑐀𑐮𑐩𑐮 𑐖𑐸𑐮 𑑋 𑐚𑑂𑐬𑐎 𑐎𑐸𑐟𑐸𑑄 𑐰𑐣𑐾𑐰𑑄 𑐄𑐎𑐶𑐫𑐵 𑐩𑐣𑐹𑐟𑐳𑐾𑑄 𑐜𑑀𑐖𑐬 𑐮𑐶𑐟 𑐧𑑂𑐰𑐣𑐵𑐫𑑄𑐎𑐮 𑑋

𑐖𑐶𑐥𑐶𑑄 𑐩𑐕𑐶𑑄𑐩𑐕𑐶𑑄 𑐣𑑂𑐴𑑂𑐫𑑅𑐣𑐾 𑐮𑐵𑐎𑑅 𑐰𑐣𑐵 𑑋 𑐀𑐣𑑄 𑐎𑐸𑐴𑐵𑑄 𑐰𑐫𑐵𑐧𑐮𑐫𑑂 𑐖𑐶 𑐰 𑐣𑐷𑐮 𑐐𑐸𑐮𑐶 𑐎𑐸𑐴𑐵𑑄 𑐰𑐫𑐾𑐢𑐸𑐣 𑐩𑐳𑑂𑐫𑐹 𑐀𑐬𑑂𑐰𑐶𑐣 𑐰 𑐄𑐡𑐾𑐣𑐫𑐵 𑐳𑑅 𑐴𑐾 𑐟𑐵𑐫𑐾 𑐩𑐡𑐫𑐾 𑐢𑐹𑑄𑐎𑐮 𑐏𑐣𑐷 𑑋 ‘𑐄𑐡𑐾𑐣 !’ 𑐢𑐵𑐫𑐾𑐐𑐸 𑐳𑑅 𑐴𑐾 𑐩𑐡𑐸 𑑋 𑐀𑐣 𑐠𑑂𑐫𑑄𑐧𑐮𑐫𑑂 𑐕𑐎𑑅 𑐢𑐣𑑂𑐣𑐵 𑐴𑐾 𑐖𑐸𑐮 𑑋 ‘𑐀𑐬𑑂𑐰𑐶𑐣 !’ 𑐢𑐎𑐵𑑅 𑐳𑑅𑐟𑐾 𑐕𑐸𑑄 𑐮𑐶𑐳𑑅 𑐩𑐰𑐳𑐾𑑄𑐮𑐶 𑐀𑐣 𑐥𑐶𑐫𑐵𑐔𑑂𑐰𑐣𑐵 𑑋 𑐨𑐔𑐵 𑐮𑐶𑐥𑐵 𑐴𑐵𑐣𑑄 𑐳𑑅𑐟𑐵 ‘𑐴𑐖𑐹𑐬’ 𑐢𑐫𑐵𑐴𑑅𑐐𑐸 𑐳𑑅 𑐟𑐵𑐫𑐾𑐡𑐟 𑑋 𑐩𑐣 𑐫𑐵𑐄𑑃𑐳𑐾 𑐔𑑂𑐰𑐣 𑑋

𑐀𑐬𑑂𑐰𑐶𑐣𑐥𑐶𑐣𑐶 𑐮𑐶𑐄𑐮𑐶𑐄 𑐟𑐸𑐫𑐸𑐐𑐸 𑐐𑐵𑐜𑐶 𑐕𑐐𑑅 𑐣𑑄 𑐎𑐸𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐏𑐣 𑑋 𑐄𑐐𑐸 𑐐𑐵𑐜𑐶𑐫𑐵 𑐩𑐣𑐹𑐟𑐳𑐾𑑄, ‘𑐕𑐸 𑐖𑐸𑐮 ?’ 𑐢𑐎𑐵𑑅 𑐣𑑂𑐫𑐣 𑑋 𑐄𑐡𑐾𑐣𑐫𑐵 𑐀𑐰𑐳𑑂𑐠𑐵 𑐏𑐣𑐵𑑄 𑐀𑐬𑑂𑐰𑐶𑐣𑑄 𑐖𑑂𑐫𑐹𑐳𑐵 𑐎𑑂𑐰𑐫𑐾 𑐐𑐣𑑄 𑐕𑐶𑑄𑐠𑐵𑐫𑑂 𑐟𑑂𑐰𑑅𑐟𑐵 𑐧𑑂𑐫𑐹 𑐢𑐵𑐫𑐾𑐰𑑄, “𑐴𑐿𑐣, 𑐟𑐥𑐵𑐃𑑃𑐴𑐬𑐹 𑐎𑐴𑐵𑑃𑐧𑐵𑐚 𑐁𑐄𑐣𑐸 𑐨𑐊𑐎𑑀 ?’ 𑐢𑐎𑐵𑑅 𑐣𑑂𑐫𑐣 𑑋 𑐖𑐶𑐥𑐶𑑄 𑐫𑐾𑑃𑐫𑑂 𑐣𑑄 𑐰𑐫𑐵𑐐𑐸 𑐢𑐵𑐫𑐾𑐳𑐵𑐟𑑄, ‘𑐣𑐾𑐰𑐵𑑅 𑐏𑑅𑐮𑐵 ?’ 𑐢𑐎𑐵 𑐣𑑂𑐫𑐣 𑑋 ‘𑐏𑑅’ 𑐢𑐎𑐵𑑅 𑐮𑐶𑐳𑑅 𑐖𑐎 𑐕𑐸 𑐰𑐣 𑐎𑐵 ‘𑐔𑑂𑐰𑑃 𑐔𑑂𑐰𑑃’ 𑐢𑐎𑐵𑑅 𑐐𑐵𑐜𑐶𑐂 𑐟𑐮 𑑋

𑐀𑐬𑑂𑐰𑐶𑐣𑐫𑐵𑐟 𑐣𑑄 𑐥𑐶𑐣𑐾 𑐟𑐫𑐵𑑅 𑐧𑑂𑐰𑐣𑐵 𑐫𑑄𑐎𑐮 𑑋 𑐖𑐶𑐥𑐶𑑄 𑐣𑑄 𑐐𑐵𑐜𑐷 𑐮𑐶𑐄𑐮𑐶𑐄 𑐰𑐫𑐵 𑑋 𑐥𑐵𑐮𑐸𑐒 𑐠𑑂𑐫𑐣 𑑋 𑐳𑑂𑐎𑐸𑐚𑐬𑐫𑐵 𑐩𑐶𑐚𑐬 𑐳𑑂𑐰𑐫𑐵, 𑐥𑐾𑐚𑑂𑐬𑑀𑐮𑑄 𑐫𑐾𑑃𑐫𑑂 𑐠𑑂𑐫𑐣𑐷 𑐩𑐏𑐸𑐟 𑐢𑐫𑐵𑐐𑐸 𑐳𑐒𑐎𑐾𑐟 𑐧𑐶𑐂𑐰𑑄 𑐫𑐾𑑃𑐫𑑂 𑐠𑑂𑐫𑑄𑐎𑐾𑐐𑐸 𑐐𑑂𑐰𑐳𑐵𑑅 𑐟𑑂𑐰𑑅𑐟𑐵𑑅 𑐥𑐵𑐮𑐸𑑄𑐒𑑂𑐐𑐫𑑂 𑐴𑐾 𑐧𑐵𑐫𑑂 𑐔𑑂𑐰𑐣𑐵 𑑋
𑐕𑐐𑐹 𑐮𑑂𑐰𑑅𑐩𑑄𑐎𑐾 𑐩𑐦𑐂𑐐𑐸 𑐔𑑂𑐰𑐵𑐥𑐸 𑐫𑐵𑐟𑑂𑐬𑐵𑑄 𑐫𑐎𑑂𑐰 𑐏𑑃 𑐳𑑂𑐫𑐣𑐾𑐐𑐸 𑐳𑐶𑐂𑐎𑐾𑐐𑐸 𑐴𑑂𑐰𑑅𑐟𑐵𑑅 𑐔𑐹𑐮𑐵𑑅𑐐𑐸 𑐡𑐸 𑑋 𑐣𑑂𑐴𑐹𑐐𑐸 𑐀𑐣𑐸𑐨𑐰 𑐧𑐶𑐄𑐐𑐸 𑐡𑐸 𑑋 𑐠𑑂𑐰 𑐖𑐶𑐐𑐸 𑐀𑐴𑑀𑐨𑐵𑐐𑑂𑐫 𑐟𑐵𑐫𑐾𑐎𑐵 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS