Read news in NepalBhasa text-- www.hamroschool.com BACK 𑐀𑐩𑐾𑐬𑐶𑐎𑐵𑑄 𑐫𑐸𑐬𑐵𑐥𑐫𑑂 𑐠𑐥 𑐳𑑂𑐰𑐡𑑂𑐰𑑅 𑐳𑐿𑐣𑐶𑐎 𑐟𑐿𑐣𑐵𑐠 𑐫𑐵𑐂𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐀𑐩𑐾𑐬𑐶𑐎𑐵𑑄 𑐫𑐸𑐬𑐵𑐥𑐫𑑂 𑐠𑐥 𑐳𑑂𑐰𑐡𑑂𑐰𑑅 𑐳𑐿𑐣𑐶𑐎 𑐟𑐿𑐣𑐵𑐠 𑐫𑐵𑐂𑐐𑐸

𑐊𑐖𑐾𑐣𑑂𑐳𑐷- 𑐫𑐸𑐎𑑂𑐬𑐾𑐣𑐫𑑂 𑐬𑐸𑐳𑑄 𑐴𑐩𑐮𑐵 𑐫𑐵𑐫𑐾𑐦𑐸𑐐𑐸 𑐢𑐵𑐳𑐾𑑄 𑐀𑐩𑐾𑐬𑐶𑐎𑐵𑑄 𑐫𑐸𑐬𑑀𑐥𑐫𑐵 𑐠𑐷𑐠𑐷 𑐡𑐾𑐱𑐫𑑂 𑐠𑐥 𑐳𑑂𑐰𑐡𑑂𑐰𑑅 𑐳𑐿𑐣𑐶𑐎 𑐕𑑂𑐰𑐂𑐐𑐸 𑐖𑐹𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐵𑐫𑐵 𑐥𑐾𑐣𑑂𑐚𑐵𑐐𑐣𑑄 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 𑑒𑑐𑑐𑑐 𑐩𑑂𑐴 𑐳𑐿𑐣𑐶𑐎 𑐣𑐬𑑂𑐠 𑐎𑑂𑐫𑐵𑐬𑑀𑐮𑐶𑐣𑐵𑑄 𑐥𑑀𑐮𑑂𑐫𑐵𑐞𑑂𑐜 𑐰 𑐖𑐬𑑂𑐩𑐣𑐷 𑐕𑑂𑐰𑐂𑐐𑐸 𑐰 𑐖𑐬𑑂𑐩𑐣𑐷𑐂 𑐡𑐸𑐥𑐶𑑄 𑐡𑑂𑐰𑑅𑐕𑐶𑐩𑑂𑐴 𑐳𑐿𑐣𑐶𑐎𑐫𑐵𑐟 𑐬𑑀𑐩𑐵𑐣𑐶𑐫𑐵𑐫𑑂 𑐕𑑂𑐰𑐂𑐐𑐸 𑐧𑐶𑐧𑐶𑐳𑐷𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

‘𑐫𑐸𑐬𑑀𑐥𑐫𑑂 𑐀𑐩𑐾𑐬𑐶𑐎𑐵𑑄 𑐕𑑂𑐰𑐫𑐾𑐟𑑂𑐫𑑄𑐥𑐶𑑄 𑐳𑐿𑐣𑐶𑐎𑐟 𑐫𑐸𑐎𑑂𑐬𑐾𑐣𑐫𑑂 𑐮𑐜𑐵𑐂 𑐫𑐵𑐫𑐾𑐟 𑐰𑐣𑐾𑐟𑑂𑐫𑑄𑐐𑐸 𑐩𑐏𑐸, 𑐣𑐾𑐚𑑀 𑐁𑐧𑐡𑑂𑐢 𑐡𑐾𑐫𑑂𑐫𑐵 𑐳𑐸𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐖𑐎 𑐰𑐣𑐾𑐟𑑂𑐫𑑄𑐐𑐸 𑐏𑑅’ 𑐀𑐩𑐾𑐬𑐶𑐎𑐵𑑄 𑐢𑐵𑑅𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐵𑑄 𑐣𑐾𑐚𑑀 𑐐𑐛𑐧𑐣𑑂𑐢𑐣 𑐳𑐾𑐣𑐵𑐫𑐵𑐟 𑐫𑐸𑐬𑑀𑐥𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐠𑑂𑐰𑐫𑐵𑑄 𑐣𑑂𑐴𑑂𑐫𑑅 𑐔𑑂𑐫𑐵𑐡𑑂𑐰𑑅 𑐰 𑐣𑑂𑐫𑐵𑐳𑑅 𑐳𑐿𑐣𑐶𑐎𑐟𑐫𑑂𑐟 𑐴𑐵𑐂 𑐀𑐮𑐬𑑂𑐚𑐫𑑂 𑐔𑑂𑐰𑐾𑐣𑐟 𑐢𑐵𑑅𑐐𑐸 𑐏𑑅 𑑋

𑐬𑐸𑐳𑑄 𑐀𑐩𑐾𑐬𑐶𑐎𑐵𑐫𑐵 𑐠𑑂𑐰 𑐣𑐶𑐬𑑂𑐞𑐫𑐫𑐵𑐟 𑐰𑐶𑐣𑐵𑐱𑐎𑐵𑐬𑐷 𑐥𑐮𑐵𑑅 𑐢𑐵𑑅𑐐𑐸 𑐡𑐸 𑑋 𑐩𑐳𑑂𑐎𑐵𑐾𑑄 𑐫𑐸𑐎𑑂𑐬𑐾𑐣𑐫𑑂 𑐴𑐩𑐮𑐵 𑐫𑐵𑐫𑐾𑐐𑐸 𑐠𑑅𑐥𑐶𑐣𑐶 𑐕𑐸𑑄 𑐫𑑀𑐖𑐣𑐵 𑐩𑐡𑐸𑐸 𑐢𑐫𑐵𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐀𑐠𑐾𑐏𑑅𑐳𑐵𑑄 𑐬𑐸𑐳𑑄 𑐫𑐸𑐎𑑂𑐬𑐾𑐣𑐫𑐵 𑐳𑐷𑐩𑐵𑐫𑑂 𑐕𑐐𑐹 𑐮𑐵𑐏 𑐴𑐟𑐶𑐫𑐵𑐬𑐢𑐵𑐬𑐷 𑐳𑐿𑐣𑐶𑐎 𑐟𑐿𑐣𑐵𑐠 𑐫𑐣𑐵𑐟𑑅𑐐𑐸 𑐡𑐸 𑑋 𑐫𑐸𑐎𑑂𑐬𑐾𑐣𑑄 𑐣𑑄 𑐥𑐱𑑂𑐔𑐶𑐩𑐵 𑐡𑐾𑐫𑑂𑐟𑐫𑑂𑐟 𑐠𑑅𑐥𑐶𑑄𑐠𑐵𑐫𑑂 𑐁𑐎𑑂𑐬𑐩𑐞 𑐖𑐸𑐂 𑐢𑐎𑐵𑑅 𑐏𑑂𑐫𑐵𑐔𑑂𑐰 𑐩𑐧𑐶𑐟 𑐂𑐣𑐵𑐥 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐱𑑂𑐔𑐶𑐩𑐵 𑐡𑐾𑐫𑑂𑐟𑐫𑑂𑐳𑑄 𑐬𑐸𑐳𑑄 𑐫𑐸𑐎𑑂𑐬𑐾𑐣𑐫𑑂 𑐁𑐎𑑂𑐬𑐩𑐞 𑐫𑐵𑐂 𑐟𑑂𑐫𑑄𑐐𑐸 𑐡𑐸 𑐏𑑂𑐫𑐵𑐔𑑂𑐰 𑐧𑐶𑐫𑐵𑐔𑑂𑐰𑑄𑐐𑐸𑐮𑐶𑑄 𑐫𑐸𑐎𑑂𑐬𑐾𑐣𑐫𑐵 𑐀𑐬𑑂𑐠𑐰𑑂𑐫𑐰𑐳𑑂𑐠𑐵𑐫𑑂 𑐀𑐳𑐬 𑐮𑐵𑑅𑐐𑐸 𑐏𑑃 𑐫𑐸𑐎𑑂𑐬𑐾𑐣𑐷 𑐳𑐬𑐎𑐵𑐬𑑄 𑐢𑐵𑑅𑐐𑐸 𑐡𑐸 𑑋

𑐬𑐸𑐳𑑄 𑐫𑐸𑐎𑑂𑐬𑐾𑐣𑐫𑐵 𑐡𑐎𑑂𑐲𑐶𑐞𑐷 𑐮𑐵𑐐𑐵 𑐎𑑂𑐬𑐶𑐩𑐶𑐫𑐵 𑐎𑐧𑑂𑐖𑐵 𑐫𑐵𑑅𑐐𑐸 𑐔𑑂𑐫𑐵𑐡𑑃𑐮𑐶𑐥𑐵 𑐠𑑂𑐰 𑐳𑑄𑐎𑐚 𑐏𑐣𑐾𑐡𑐸𑐐𑐸 𑐏𑑅 𑑋 𑐩𑐳𑑂𑐎𑑀𑑄 𑐫𑐸𑐎𑑂𑐬𑐾𑐣 𑐳𑐬𑐎𑐵𑐬𑐫𑐵𑐟 𑐥𑐹𑐬𑑂𑐰𑐷 𑐮𑐵𑐐𑐵𑐫𑑂 𑐱𑐵𑐣𑑂𑐟𑐶 𑐥𑐸𑐣𑐳𑑂𑐬𑑂𑐠𑐵𑐥𑐣𑐵𑐫𑐵 𑐣𑐶𑑄𑐟𑐶𑑄 𑐀𑐣𑑂𑐬𑑂𑐟𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐗𑑁𑐟𑐵 𑐮𑐵𑐐𑐸 𑐫𑐵𑐫𑐾𑐟 𑐀𑐳𑐦𑐮 𑐖𑐹𑐐𑐸 𑐡𑑂𑐰𑐥𑑄 𑐧𑐶𑐫𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐐𑐸 𑐮𑐵𑐐𑐵𑐫𑑂 𑐠𑑂𑐫𑑄𑐩𑐠𑑂𑐫𑑄 𑑑𑑔 𑐡𑑂𑐰𑑅 𑐩𑐣𑐹𑐟 𑐳𑐷𑐢𑐸𑑄𑐎𑐹𑐐𑐸 𑐡𑐸𑐳𑐵 𑐬𑐸𑐳 𑐳𑐩𑐬𑑂𑐠𑐶𑐟 𑐰𑐶𑐡𑑂𑐬𑑀𑐴𑐷𑐟𑐫𑑂𑐳𑑄 𑐫𑐎𑑂𑐰 𑐴𑐾 𑐮𑐵𑐐𑐵𑐫𑑂 𑐣𑐶𑐫𑐣𑑂𑐟𑑂𑐬𑐞 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS