𑐎𑐶𑐥𑐸𑐮𑐶𑐂 𑐱𑐴𑐷𑐡 𑐬𑐵𑐬𑐵𑐴𑐶𑐮𑐫𑐵𑐟 𑐮𑐸𑐩𑑄𑐎𑐵𑑅 𑐩𑑁𑐣 𑐬𑑂𑐫𑐵𑐮𑐷
𑐎𑐶𑐥𑐹 – 𑑒𑑐𑑔𑑖 𑐳𑐵𑐮𑐫𑐵 𑐖𑐣𑐁𑐣𑑂𑐡𑑀𑐮𑐣𑐫𑑂 𑐎𑐶𑐥𑐸𑐮𑐶𑐂 𑐕𑐣𑑂𑐴𑐸𑑄 𑐴𑐾 𑐳𑐴𑐵𑐡𑐟 𑐥𑑂𑐬𑐵𑐥𑑂𑐟 𑐫𑐵𑑅𑐥𑐶𑑄 𑐥𑑂𑐫𑐩𑑂𑐴 𑐱𑐴𑐷𑐡𑐥𑐶𑑄 𑐬𑐵𑐖𑐩𑐵𑐣 𑐩𑐵𑐮𑐷, 𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣, 𑐴𑐶𑐬𑐵𑐎𑐵𑐖𑐷 𑐩𑐴𑐬𑑂𑐖𑐣 𑐰 𑐮𑐣𑐧𑐴𑐵𑐡𑐸𑐬 𑐩𑐴𑐬𑑂𑐖𑐣 ‘𑐬𑐵𑐬𑐵𑐴𑐶𑐮’ 𑐫𑐵𑐟 𑐮𑐸𑐩𑑄𑐎𑐵𑑅 𑐩𑑂𑐴𑐶𑐐𑑅 𑐳𑐸𑐠𑐫𑑂 𑐎𑐶𑐥𑐸𑐮𑐷 𑐕𑐐𑐹 𑐟𑑅𑐖𑐶𑐐𑐸 𑐩𑑁𑐣 𑐬𑑂𑐫𑐵𑐮𑐷 𑐖𑐸𑐮 𑑋
𑐬𑑂𑐫𑐵𑐮𑐷𑐂 𑐣𑐾𑐥𑐵𑐮 𑐥𑑂𑐬𑐴𑐬𑐷, 𑐳𑑂𑐎𑐵𑐄𑐚, 𑐠𑐷𑐠𑐷 𑐰𑐶𑐡𑑂𑐫𑐵𑐮𑐫𑐫𑐵 𑐰𑐶𑐡𑑂𑐫𑐵𑐬𑑂𑐠𑐷, 𑐎𑐶𑐥𑐹𑐫𑐵 𑐳𑐴𑐎𑐵𑐬𑐷 𑐳𑑄𑐳𑑂𑐠𑐵𑐟 𑐣𑑄 𑐠𑑅𑐠𑑅𑐐𑐸 𑐧𑑂𑐫𑐵𑐣𑐬 𑐳𑐴𑐶𑐟 𑐳𑐴𑐨𑐵𑐐𑐷 𑐖𑐹𑐐𑐸 𑐏𑑅 𑑋 𑐎𑐶𑐥𑐸𑐮𑐶𑐂 𑑒𑑐𑑔𑑖 𑐳𑐵𑐮𑐫𑐵 𑐔𑐿𑐟 𑑒𑑐 𑐐𑐟𑐾 𑐥𑑄𑐔𑐵𑐫𑐟𑐷 𑐥𑑂𑐬𑐴𑐬𑐷𑐫𑐵 𑐐𑑀𑐮𑐷𑑄 𑐮𑐵𑐣𑐵𑑅 𑐩𑐡𑐸𑐥𑐶𑑄 𑐠𑑂𑐰 𑐥𑑂𑐫𑐩𑑂𑐴 𑐱𑐴𑐷𑐡𑐥𑐶𑐣𑐶 𑐮𑐸𑐩𑐣𑑂𑐟𑐶𑐂 𑐡𑑃𑐫𑑂𑐡𑐳𑑄 𑐬𑑂𑐫𑐵𑐮𑐷 𑐰 𑐳𑐨𑐵 𑐫𑐵𑐣𑐵𑑅 𑐱𑐴𑐷𑐡 𑐡𑐶𑐰𑐳 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐱𑐴𑐷𑐡 𑐡𑐶𑐰𑐳𑐫𑐵 𑐗𑑂𑐰𑐮𑐫𑑂 𑐖𑐹𑐐𑐸 𑐩𑑁𑐣 𑐬𑑂𑐫𑐵𑐮𑐷 𑐎𑐶𑐥𑐹 𑐣𑐐𑐬 𑐔𑐵𑑅𑐴𑐶𑐮𑐵𑑅 𑐮𑐵𑐫𑐎𑐹 𑐠𑑂𑐫𑑄𑐎𑐵𑑅 𑐳𑐨𑐵𑐫𑑂 𑐴𑐶𑐄𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷 𑐬𑐵𑐖𑐣𑐷𑐟𑐶𑐎 𑐥𑐵𑐬𑑂𑐚𑐷𑐫𑐵 𑐥𑑂𑐬𑐟𑐶𑐣𑐶𑐢𑐶 𑐰 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐳𑐩𑑂𑐧𑑀𑐢𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐂𑐣𑑂𑐡𑑂𑐬𑐾𑐞𑐷 𑐳𑐵𑑄𑐳𑑂𑐎𑐺𑐟𑐶𑐎 𑐳𑐩𑐵𑐖𑑄 𑐣𑑄 𑐡𑑃𑐫𑑂𑐡𑐳𑑄 𑐠𑐾𑑄 𑐠𑐷𑐠𑐷 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑑒𑑐𑑔𑑖 𑐳𑐵𑐮𑐫𑐵 𑐳𑐴𑐷𑐡𑐟𑐫𑑂𑐟 𑐮𑐸𑐩𑑄𑐎𑐹𑐐𑐸 𑐡𑐸 𑑋
LEAVE YOUR COMMENTS