𑐧𑐸𑐡𑑂𑐢 𑐧𑐹𑐐𑐸 𑐡𑐾𑐱𑐫𑑂 𑐧𑐹𑐥𑐶𑑄 𑐢𑐎𑐵𑑅 𑐐𑐬𑑂𑐰 𑐫𑐵𑐫𑐾𑐩𑐵𑑅

𑐫𑐾𑑃 – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐣𑐾𑐥𑐵𑑅𑐩𑐶𑐥𑐶𑑄𑐳𑑄 𑐠𑑅 𑐧𑐸𑐡𑑂𑐢 𑐧𑐹𑐐𑐸 𑐡𑐾𑐱𑐫𑑂 𑐧𑐹𑐥𑐶𑑄 𑐢𑐎𑐵𑑅 𑐐𑐬𑑂𑐰 𑐫𑐵𑐫𑐾𑐦𑐫𑐾𑐎𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐫𑐾𑑃 𑐩𑐣𑐥𑐵 𑑑𑑕 𑐰𑐜𑐵, 𑐎𑐶𑐩𑑂𑐜𑑀𑐮𑐫𑑂 𑐔𑑂𑐰𑑄𑐐𑐸 𑐎𑐶𑐩𑐜𑑀𑐮 𑐧𑐴𑐵𑐮𑐫𑑂 𑐱𑐵𑐎𑑂𑐫𑐢𑐶𑐟𑐵 𑐣𑐾𑐥𑐵𑐮𑐫𑐵 𑐢𑑂𑐫𑐵𑐣 𑐨𑐰𑐣𑐫𑐵 𑐱𑐶𑐮𑐵𑐣𑑂𑐫𑐵𑐳 𑐫𑐵𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐠𑑂𑐰 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

‘𑐧𑐸𑐡𑑂𑐢 𑐢𑐬𑑂𑐩𑐫𑐵 𑐩𑐬𑑂𑐩𑐫𑐵𑐟 𑐥𑑂𑐬𑐰𑐡𑑂𑐬𑑂𑐢𑐣 𑐰 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐫𑐵𑐫𑐾𑐟 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐠𑐾𑐬𑐰𑐵𑐡𑐷 𑐰 𑐰𑐖𑑂𑐬𑐫𑐵𑐣𑐷 𑐰𑐶𑐴𑐵𑐬𑐫𑐵 𑐣𑐶𑐬𑑂𑐩𑐵𑐞, 𑐥𑐸𑐣𑐬𑑂𑐣𑐶𑐬𑑂𑐩𑐵𑐞 𑐮𑐶𑐳𑐾𑑄 𑐱𑐿𑐎𑑂𑐲𑐶𑐎 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐧𑐸𑐡𑑂𑐢𑐫𑐵 𑐡𑐬𑑂𑐱𑐣𑐫𑐵𑐟 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐟 𑐠𑑂𑐰 𑐳𑐬𑐎𑐵𑐬𑐫𑐵𑐥𑐵𑐏𑐾𑑄 𑐫𑐵𑑅𑐐𑐸 𑐮𑐐𑐵𑐣𑐷 𑐏𑑅’ 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐧𑐸𑐡𑑂𑐢 𑐡𑐬𑑂𑐱𑐣𑐫𑐵 𑐣𑐶𑑄𑐟𑐶𑑄 𑐰𑐶𑐱𑑂𑐰𑐫𑐵 𑐫𑐎𑑂𑐰 𑐡𑐾𑐱𑑄 𑐮𑐐𑐵𑐣𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐂𑐮𑐫𑑂 𑐣𑐾𑐥𑐵𑐮𑑄 𑐣𑑄 𑐮𑐐𑐵𑐣𑐷 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑐣𑐵𑐐𑐸 𑐡𑐸 𑑋’

𑐠𑑂𑐰 𑐧𑐴𑐵 𑐡𑐸𑐣𑐾 𑑓𑑕𑑐𑑐 𑐰𑐬𑑂𑐐𑐦𑐶𑐚 𑐮𑐵𑐐𑐵𑐫𑑂 𑐳𑑂𑐰𑐟𑑃 𑐰 𑐧𑐵𑐟𑑃 𑐡𑐸𑐐𑐸 𑐨𑐰𑐣 𑐡𑐫𑐾𑐎𑐾𑐟𑑂𑐫𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑑗𑑖 𑐮𑐵𑐏 𑐡𑐵𑑄 𑐀𑐣𑐸𑐡𑐵𑐣 𑐄𑐥𑐮𑐧𑑂𑐢 𑐫𑐵𑑅𑐐𑐸 𑐏𑑅 𑑋 𑐠𑐸𑐎𑐷 𑐄𑐥𑐨𑑀𑐎𑑂𑐟𑐵𑐥𑐵𑐏𑐾𑑄 𑑕 𑐥𑑂𑐬𑐟𑐶𑐱𑐟 𑐡𑐵𑑄 𑐟𑐂𑐐𑐸 𑐖𑐸𑐂 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐱𑐵𑐎𑑂𑐫𑐢𑐶𑐟𑐵𑐫𑐵 𑐥𑐡𑐵𑐢𑐶𑐎𑐵𑐬𑐷𑐥𑐶𑑄𑐳𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐫𑐵𑑅𑐐𑐸 𑐐𑑂𑐰𑐵𑐴𑐵𑐮𑐶𑐫𑐵 𑐣𑐶𑑄𑐟𑐶𑑄 𑐳𑐸𑐨𑐵𑐫𑑂 𑐡𑐾𑐕𑐵𑐳𑐾𑑄 𑐩𑐴𑐵𑐣𑐐𑐬𑑄 𑐳𑐬𑐎𑐵𑐬 𑐡𑐸𑐐𑐸 𑐀𑐣𑐸𑐨𑐸𑐟𑐶 𑐫𑐵𑐎𑐵𑐔𑑂𑐰𑑄𑐐𑐸 𑐢𑐵𑑅𑐐𑐸 𑐏𑑅 𑑋 𑐧𑐴𑐵𑐮 𑐔𑑂𑐰𑐣𑐵 𑐧𑐶𑐖𑑂𑐫𑐵𑐣𑐵𑐔𑑂𑐰𑑄𑐥𑐶𑑄 𑐂𑐣𑑂𑐡𑑂𑐬𑐰𑐵𑐟𑐷 𑐐𑐸𑐬𑐸𑐩𑐵𑑄 𑐰 𑐩𑐾𑐟𑑂𑐟𑐵𑐰𑐟𑐷 𑐐𑐸𑐬𑐸𑐩𑐵𑐩𑑄 𑐧𑐸𑐡𑑂𑐢 𑐡𑐬𑑂𑐱𑐣𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑐩𑑂𑐴𑑀 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐠𑑂𑐰 𑐧𑐴𑐵𑐮𑐫𑑂 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐫𑑀𑐖𑐣𑐵 𑐡𑐫𑐾𑐎𑐵𑑅 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂𑐐𑐸 𑐏𑑃 𑐎𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋