Read news in NepalBhasa text-- www.hamroschool.com BACK 𑐳𑐹𑐬𑑂𑐫𑐩𑐵𑐳 𑐎𑐠𑑄 𑐴𑐣𑐷𑐐𑐸 𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐹 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑐹𑐬𑑂𑐫𑐩𑐵𑐳 𑐎𑐠𑑄 𑐴𑐣𑐷𑐐𑐸 𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐹

𑐩𑐷𑐣𑐵 𑐧𑐖𑑂𑐬𑐵𑐔𑐵𑐬𑑂𑐫

𑐩𑐵𑐑 𑐩𑐴𑐶𑐣𑐵𑐫𑐵 𑑑 𑐐𑐟𑐾 𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐹 𑐴𑐣𑐷𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐩𑐵𑐑𑐾 𑐳𑑄𑐎𑑂𑐬𑐵𑐣𑑂𑐟𑐶 𑐣𑑄 𑐢𑐵𑐂𑐐𑐸 𑐠𑐸𑐎𑐸𑐣𑑂𑐴𑐸 𑐰𑐶𑐱𑐾𑐲 𑐫𑐵𑐣𑐵𑑅 𑐑𑑂𑐫𑑅𑐔𑐵𑐎𑐸 𑐣𑐂𑐐𑐸 𑐏𑑅 𑑋 𑐣𑐾𑐰𑐵𑑅𑐟𑐫𑑂𑐳𑑄 𑐴𑐣𑐷𑐐𑐸 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐣𑐏𑑅𑐔𑐏𑑅 𑐔𑐣𑑂𑐡𑑂𑐬𑐩𑐵𑐳𑐫𑐵 𑐟𑐶𑐠𑐶 𑐎𑐠𑑄 𑐴𑐣𑐷𑐐𑐸 𑐏𑑅𑐳𑐵𑑄 𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐸 𑐢𑐵𑑅𑐳𑐵 𑐳𑐹𑐬𑑂𑐫𑐩𑐵𑐳 𑐎𑐠𑑄 𑐴𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐔𑐣𑑂𑐡𑑂𑐬𑐩𑐵 𑐰 𑐳𑐸𑐡𑑂𑐬𑑂𑐫𑑅 𑐣𑐶𑐟𑐵𑑄𑐫𑐵 𑐳𑑂𑐰𑐵𑐥𑐹 𑐠𑐸𑐐𑐸 𑐣𑐏𑑅𑐮𑐶𑐳𑐾 𑐡𑐸 𑑋 𑐠𑐸𑐐𑐸 𑐣𑑂𑐴𑐶 𑐳𑐹𑐬𑑂𑐫𑑄 𑐢𑐣𑐸 𑐬𑐵𑐱𑐷𑐫𑐵𑐟 𑐟𑑂𑐰𑑅𑐟𑐵𑑅 𑐩𑐎𑐬 𑐬𑐵𑐱𑐷𑐂 𑐡𑐸𑐴𑐵𑑄𑐰𑐣𑐷 𑐀𑐬𑑂𑐠𑐵𑐟𑑂 𑐳𑐹𑐬𑑂𑐫 𑐄𑐟𑑂𑐟𑐬𑐥𑐵𑐏𑐾 𑐣𑑂𑐴𑑂𑐫𑐵𑐂𑐐𑐸 𑐖𑐸𑐫𑐵𑑅 𑐳𑐹𑐬𑑂𑐫 𑐄𑐟𑑂𑐟𑐬𑐵𑐫𑐞 𑐢𑐎𑐵𑑅 𑐣𑑄 𑐢𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐠𑐸𑐐𑐸 𑐡𑐶𑑄𑐣𑐶𑐳𑐾𑑄 𑐔𑐵 𑐳𑑂𑐰𑐫𑐵𑑄 𑐣𑑂𑐴𑐶 𑐟𑐵𑑅𑐴𑐵𑐎𑑅 𑐖𑐸𑐂𑐳𑐵 𑐏𑑂𑐰𑐵𑐄𑑃𑐳𑐾 𑐰 𑐏𑐶𑐄𑑃𑐳𑐾 𑐔𑑂𑐰𑑄𑐐𑐸 𑐩𑑂𑐴𑑀 𑐖𑐸𑐫𑐵𑑅 𑐳𑐹𑐡𑑂𑐬𑑂𑐫𑑅𑐫𑐵 𑐖𑑅 𑐠𑐶𑐣𑐵𑑅 𑐧𑐸𑐮𑐸𑐴𑐸𑑄 𑐔𑐶𑐎𑐸𑐮𑐵 𑐎𑑂𑐰𑐔𑐵𑐫𑐵 𑐟𑐵𑐮𑑂𑐮𑐵 𑐱𑐸𑐬𑐸 𑐖𑐸𑐂 𑑋 𑐄𑐎𑐶𑑄 𑐠𑐸𑐐𑐸 𑐂𑐮𑐫𑑂 𑐰𑐶𑐱𑐾𑐲 𑐫𑐵𑐣𑐵𑑅 𑐩𑑂𑐴𑐫𑐵𑐟 𑐩𑐵𑑅𑐐𑐸 𑐥𑑁𑐲𑑂𑐚𑐶𑐎 𑐟𑐟𑑂𑐰 𑐎𑐠𑑄 𑐑𑑂𑐫𑑅𑐔𑐵𑐎𑐸, 𑐟𑐬𑐸𑐮, 𑐥𑐮𑑅, 𑐮𑐵𑐨𑐵, 𑐴𑐵𑐩𑑂𑐰𑑅𑐫𑐵 𑐮𑐜𑑂𑐜𑐸 𑐰𑐵 𑐟𑑅𑐮𑐵, 𑐳𑑄𑐣𑑂𑐫𑐵𑑅 𑐟𑐫𑐵𑑅 𑐧𑐖𑐶 𑐣𑐫𑐾𑐐𑐸 𑐔𑐮𑐣 𑐡𑐸𑐳𑐵 𑐳𑐸𑐠𑐫𑑂 𑐩𑑂𑐰𑑅𑐮𑑂𑐴𑐸𑐫𑐵 𑐠𑑅 𑐳𑑂𑐰𑐫𑐵𑑄 𑐠𑐎𑐵𑐮𑐶𑐥𑐶𑐣𑐶𑐐𑐸 𑐮𑑂𑐴𑐵𑐟𑑄 𑐔𑐶𑐎𑑄 𑐟𑐶𑐮𑐾𑐐𑐸 𑐔𑐮𑐣 𑐡𑐸 𑑋

𑐩𑐵𑐑𑑄𑐣𑐶𑐳𑐾𑑄 𑐳𑐵𑐄𑐣 𑐟𑐎 𑐳𑐹𑐡𑑂𑐬𑑂𑐫𑑅 𑐄𑐟𑑂𑐟𑐬𑐫𑑂 𑐮𑐵𑐂𑐐𑐸 𑐖𑐸𑐫𑐵𑑅 𑐠𑑂𑐰 𑐏𑐸𑐮𑐵𑐫𑐵𑐟 𑐄𑐟𑑂𑐟𑐬𑐵𑐫𑐞 𑐢𑐵𑐂𑐐𑐸 𑐏𑑅𑐳𑐵 𑐠𑐸𑐐𑐸 𑐡𑐶𑑄𑐫𑐵𑐟 𑐧𑐿𑐡𑐶𑐎 𑐱𑐵𑐳𑑂𑐟𑑂𑐬 𑐎𑐠𑑄 𑐥𑐰𑐶𑐟𑑂𑐬 𑐡𑐶𑑄𑐫𑐵 𑐬𑐸𑐥𑐫𑑂 𑐎𑐫𑐵𑐟𑑅𑐐𑐸 𑐡𑐸 𑑋 𑐄𑐎𑐶𑑄 𑐣𑑄 𑐠𑐸𑐐𑐸 𑐡𑐶𑑄 𑐎𑐸𑐣𑑂𑐴𑐸 𑐡𑐵𑐣 𑐢𑐬𑑂𑐩 𑐖𑐥 𑐥𑐸𑐖𑐵𑐥𑐵𑐛 𑐫𑐵𑐟 𑐢𑐵𑑅𑐳𑐵 𑐩𑐾𑐐𑐸 𑐂𑐮𑐫𑑂 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐥𑐸𑐞𑑂𑐫 𑐮𑐵𑐂𑐐𑐸 𑐢𑐵𑐬𑑂𑐩𑐶𑐎 𑐰𑐶𑐱𑑂𑐰𑐵𑐳 𑐡𑐸 𑑋

𑐠𑐸𑐎𑐸𑐣𑑂𑐴𑐸 𑐳𑑂𑐰𑐣𑐶𑐐𑑅𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐰𑐣𑐵𑑅 𑐥𑐸𑐖𑐵𑐥𑐵𑐛 𑐰 𑐡𑐵𑐣𑐢𑐬𑑂𑐩 𑐫𑐵𑐫𑐾𑐐𑐸 𑐰 𑐠𑑅 𑐩𑐡𑐫𑐾𑐢𑐸𑑄𑐎𑐹𑐥𑐶𑑄 𑐩𑐵𑑄 𑐀𑐧𑐸𑐫𑐵 𑐣𑐵𑐩𑑄 𑐳𑐶𑐬𑐵 𑐡𑐵𑐣 𑐧𑐶𑐂𑐐𑐸 𑐣𑑄 𑐔𑐮𑐣 𑐡𑐸 𑑋 𑐳𑐶𑐬𑐵 𑐢𑐎𑐵𑑅 𑐖𑐵𑐎𑐷, 𑐧𑐖𑐷, 𑐑𑑂𑐫𑑅𑐔𑐵𑐎𑐸, 𑐟𑑅𑐮𑐵, 𑐥𑐮𑑅, 𑐟𑐬𑐸𑐮, 𑐦𑐮𑐦𑐸𑐮, 𑐴𑐮𑐸, 𑐔𑐶, 𑐩𑐵𑐫𑑂𑐮𑐶𑐳𑐾𑑄 𑐡𑐎𑑂𑐲𑐶𑐞𑐵 𑐟𑐫𑐵𑑅 𑐥𑐸𑐬𑑀𑐴𑐶𑐟 𑐐𑐸𑐬𑐸𑐖𑐸𑐥𑐶𑑄𑐟 𑐡𑐵𑐣 𑐧𑐶𑐂𑐐𑐸 𑐏𑑅 𑑋 𑐔𑑂𑐰𑐎𑐧𑐵𑐡𑑂𑐫𑑅, 𑐎𑐬𑐸𑐞𑐵𑐩𑐫 𑐰 𑐖𑐣𑐧𑐵𑐡𑑂𑐫𑑅𑐠𑐵𑐫𑑂 𑐠𑑂𑐰 𑐏𑐸𑐣𑑂𑐴𑐸 𑐨𑐎𑑂𑐟𑐖𑐣𑐟𑐫𑑂𑐐𑐸 𑐩𑑂𑐰𑑅𑐩𑑂𑐰𑑅 𑐨𑐷𑐜 𑐖𑐸𑐂 𑑋 𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐸𑐫𑐵 𑐡𑐶𑑄𑐎𑐸𑐣𑑂𑐴𑐸 𑐳𑑂𑐰𑐣𑐶𑐐𑑅𑐫𑐵 𑐠𑐷𑐠𑐷 𑐠𑐵𑐫𑑂 𑐮𑐶𑐳𑐾𑑄 𑐏𑐸𑐳𑐶 𑐰 𑐑𑐵𑐚 𑐡𑐸𑐠𑐵𑐫𑑂 𑐐𑐠𑐾𑐎𑐷 𑐡𑐾𑐰𑐑𑐵𑐚, 𑐧𑐬𑐵𑐴𑐎𑑂𑐲𑐾𑐟𑑂𑐬, 𑐥𑐣𑑁𑐟𑐶, 𑐳𑐎𑑂𑐰𑑅, 𑐡𑑀𑐮𑐵𑐮𑐑𑐵𑐚 𑐮𑐐𑐵𑐫𑐟 𑐠𑐵𑐳𑐫𑑂 𑐩𑐾𑐮𑐵 𑐴𑐾 𑐖𑐸𑐂 𑑋 𑐠𑐣 𑐩𑑂𑐰𑑅𑐮𑑂𑐴𑐸𑐫𑐵 𑐡𑐵𑐣𑐢𑐬𑑂𑐩 𑐥𑐸𑐖𑐵𑐥𑐵𑐛 𑐫𑐵𑐟 𑐢𑐵𑑅𑐳𑐵 𑐩𑑀𑐎𑑂𑐲 𑐥𑑂𑐬𑐵𑐥𑑂𑐟 𑐖𑐸𑐂𑐐𑐸 𑐰 𑐩𑐣𑑄𑐟𑐸𑐣𑐵𑐐𑐸 𑐥𑐹𑐰𑐣𑐷𑐐𑐸 𑐢𑐵𑐬𑑂𑐩𑐶𑐎 𑐰𑐶𑐱𑑂𑐰𑐵𑐳 𑐡𑐸 𑑋 𑐀𑐠𑐾𑐴𑐾 𑐫𑐮𑐫𑐵 𑐀𑐐𑐶𑑄𑐩𑐠𑐫𑑂 𑐣𑑄 𑐠𑐸𑐐𑐸 𑐡𑐶𑑄 𑐎𑐸𑐣𑑂𑐴𑐸 𑐰𑐶𑐱𑐾𑐲 𑐩𑐾𑐮𑐵 𑐖𑐸𑐂 𑑋 𑐩𑐡𑐶𑐎𑑂𑐎 𑐩𑐶 𑐔𑑂𑐫𑐵𑐣𑐵 𑐔𑑂𑐰𑐣𑐷𑐐𑐸 𑐀𑐐𑐶𑑄𑐩𑐠𑑅𑐫𑐵𑐟 𑐢𑐵𑐬𑑂𑐩𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐬𑐸𑐥𑑄 𑐣𑑄 𑐥𑐰𑐶𑐟𑑂𑐬 𑐠𑐵𑐫𑑂 𑐎𑐠𑑄 𑐣𑐵𑐮𑐵𑐟𑑅𑐐𑐸 𑐡𑐸 𑑋 𑐄𑐎𑐶𑑄 𑐠𑐣 𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐸 𑐎𑐸𑐣𑑂𑐴𑐹 𑐳𑐶𑐬𑐵 𑐡𑐵𑐣 𑐮𑐶𑐳𑐾𑑄 𑐥𑐸𑐖𑐵 𑐫𑐵𑐂𑐥𑐶𑑄 𑐨𑐎𑑂𑐟𑐖𑐣𑐥𑐶𑑄 𑐩𑑂𑐰𑑅𑐩𑑂𑐰𑑅 𑐖𑐸𑐂𑐐𑐸 𑐏𑑅 𑑋

𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐸 𑐏𑐸𑐣𑑂𑐴𑐹 𑐳𑐸𑐠𑐫𑑂 𑐩𑑂𑐰𑑅𑐮𑑂𑐴𑐸𑐫𑐵𑑅 𑐥𑐸𑐖𑐵𑐥𑐵𑐛 𑐰 𑐡𑐵𑐣𑐢𑐬𑑂𑐩 𑐫𑐵𑐫𑐾𑐢𑐸𑑄𑐎𑐵𑑅 𑐠𑑅 𑐳𑑂𑐰𑐫𑐵𑑄 𑐠𑐎𑐵𑐮𑐶𑐥𑐶𑑄 𑐰𑐵 𑐩𑐵𑑄, 𑐀𑐖𑐶, 𑐩𑐮𑐾𑐖𑐸𑐥𑐶𑐣𑐶𑐐𑐸 𑐮𑑂𑐴𑐵𑐟𑑄 𑐕𑑂𑐫𑐣𑐾 𑐔𑐶𑐎𑑄 𑐟𑐶𑐂𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐔𑐶𑐎𑑄 𑐔𑐳𑐸𑐥𑑂𑐰𑐵𑐮𑐫𑑂 𑐟𑐮 𑐢𑐵𑑅𑐳𑐵 𑐩𑑂𑐴𑐫𑑂 𑐎𑑂𑐰𑐵𑐖𑑅 𑐡𑐂𑐐𑐸 𑐰 𑐄𑐳𑐵𑑃𑐫𑑂 𑐧𑐵𑑄𑐮𑐵𑐂𑐐𑐸𑐮𑐶𑑄 𑐣𑑄 𑐠𑑅 𑐩𑐳𑑂𑐟𑐟𑐫𑑂𑐟 𑐔𑐶𑐎𑑄 𑐟𑐶𑐂𑐎𑐷𑐧𑐮𑐫𑑂 𑐟𑐵𑑅𑐁𑐫𑐸 𑐰 𑐨𑐶𑑄𑐄𑐳𑐵𑑃𑐫𑑂𑐫𑐵 𑐳𑐸𑐰𑐵𑑅 𑐧𑐶𑐂 𑑋 𑐣𑐶𑐨𑐵𑐮𑐫𑑂 𑐔𑑂𑐰𑐣𑐵𑑅 𑐔𑐶𑐎𑑄 𑐟𑐷 𑐢𑐸𑑄𑐎𑐵𑑅 𑐳𑐎𑐮 𑐕𑐾𑑃𑐖𑑅𑐥𑐶𑑄 𑐔𑑂𑐰𑐣𑐵𑑅 𑐑𑑂𑐫𑑅𑐔𑐵𑐎𑐸, 𑐟𑐬𑐸𑐮, 𑐥𑐮𑑅 𑐟𑐬𑐎𑐵𑐬𑐷, 𑐟𑑅𑐮𑐵, 𑐳𑐣𑑂𑐫𑐵𑑄 𑐟𑐫𑐵𑑅 𑐣𑑂𑐴𑑂𑐫𑐂𑐥𑐸𑐎 𑐣𑐂 𑑋 𑐩𑐵𑐑 𑐩𑐴𑐶𑐣𑐵𑐫𑐵 𑐔𑐶𑐎𑐸𑐮𑐵𑑄 𑐏𑑂𑐰𑐵𑐄𑑃𑐳𑐾 𑐔𑑂𑐰𑑄𑐐𑐸 𑐂𑐮𑐫𑑂 𑐠𑐸𑐎𑐠𑑄𑐫𑐵 𑐣𑐳𑐵 𑐣𑐫𑐾𑐧𑐮𑐫𑑂 𑐩𑑂𑐴𑑄 𑐎𑑂𑐰𑐵𑐣𑐵𑑅 𑐄𑐳𑐵𑑃𑐫𑑂 𑐣𑑄 𑐨𑐶𑐣𑐵𑐰𑐂 𑑋 𑐠𑐸𑐐𑐸 𑐡𑐶𑑄𑐏𑐸𑐣𑑂𑐴𑐸 𑐳𑑄𑐣𑑂𑐫𑐵𑐫𑐵 𑐕𑑂𑐫𑑄 𑐰𑐵𑑄𑐣𑑂𑐫𑐵𑐟 𑐢𑐵𑑅𑐳𑐵 𑐱𑐟𑑂𑐬𑐸𑐫𑐵 𑐕𑑂𑐫𑑄 𑐰𑐵𑑄𑐣𑑂𑐫𑐵𑐣𑐵𑐐𑐸 𑐟𑐶 𑐐𑑂𑐫𑐣𑐷 𑐰 𑐴𑐵𑐩𑑂𑐰𑑅 𑐡𑐵𑐣 𑐫𑐵𑐟 𑐢𑐵𑑅𑐳𑐵 𑐮𑐸𑑃 𑐡𑐵𑐣 𑐫𑐵𑐫𑐾𑐐𑐸𑐟𑐶 𑐐𑑂𑐫𑐣𑐷 𑐢𑐫𑐵𑐐𑐸 𑐣𑑄 𑐖𑐣𑐰𑐶𑐱𑑂𑐰𑐵𑐳 𑐡𑐸 𑑋

𑐑𑑂𑐫𑑅𑐔𑐵𑐎𑐸 𑐳𑑄𑐮𑑂𑐴𑐸 𑐏𑐸𑐣𑑂𑐴𑐸𑐸 𑐖𑐎 𑐩𑐏𑐸 𑐩𑐾𑐩𑐾𑐧𑐮𑐫𑑂 𑐣𑑄 𑐔𑐵𑐎𑐸 𑐣𑐫𑐾𑐐𑐸 𑐫𑐵𑑅 𑑋 𑐫𑑅𑐩𑐬𑐶 𑐥𑐸𑐣𑑂𑐴𑐶𑐧𑐮𑐫𑑂 𑐫𑑅𑐩𑐬𑐶 𑐡𑐫𑐾𑐎𑐾𑐟 𑐮𑐵 𑐗𑐣𑑂 𑐩𑐡𑐫𑐾𑐎𑑄 𑐩𑐐𑐵𑑅 𑑋 𑐀𑐠𑐾𑐴𑐾 𑐩𑐔𑐵 𑐧𑐸𑐂𑐧𑐮𑐫𑑂 𑐩𑐔𑐵𑐧𑐹𑐩𑑂𑐴𑐾𑐳𑐶𑐟 𑐰𑐶𑐱𑐾𑐲 𑐫𑐵𑐣𑐵𑑅 𑐑𑑂𑐫𑑅𑐔𑐵𑐎𑐸 𑐟𑐫𑐵 𑐖𑐵 𑐣𑐎𑐾𑐐𑐸 𑐔𑐮𑐣 𑐡𑐸 𑑋 𑐕𑐵𑐫𑑂𑐢𑐵𑑅𑐳𑐵 𑐩𑐔𑐵𑐧𑐸𑐂𑐧𑐮𑐫𑑂 𑐑𑑂𑐫𑑅𑐔𑐵𑐎𑐸 𑐣𑐮𑑅 𑐢𑐵𑑅𑐳𑐵 𑐩𑐔𑐵𑐫𑐵𑐟 𑐩𑐵𑐎𑑂𑐰𑑅 𑐡𑐸𑐬𑐸 𑐰𑐂𑐐𑐸 𑐰 𑐩𑐔𑐵𑐧𑐹𑐩𑑂𑐴𑐾𑐳𑐶𑐟 𑐩𑑂𑐴𑐫𑑂 𑐎𑑂𑐰𑐵𑐖𑑅 𑐮𑐶𑐳𑐾𑑄 𑐥𑑁𑐲𑑂𑐚𑐶𑐎 𑐣𑑄 𑐡𑐂𑐐𑐸 𑐖𑐸𑐫𑐵𑑅 𑐩𑐔𑐵 𑐰 𑐩𑐵𑑄𑐩𑑂𑐴𑐾𑐳𑐶𑐫𑐵𑐐𑐸 𑐄𑐳𑐵𑑃𑐫𑑂 𑐣𑑄 𑐧𑐵𑑄𑐮𑐵𑐂 𑑋 𑐄𑐎𑐶𑑄 𑐩𑐔𑐵 𑐧𑐹𑐩𑑂𑐴𑐾𑐳𑐶𑐟 𑐣𑐎𑐷𑐐𑐸 𑐔𑐵𑐎𑐸𑐂 𑐰𑐶𑐱𑐾𑐲 𑐎𑐠𑑄 𑐂𑐩𑐸, 𑐏𑐸𑐰𑐵, 𑐕𑑂𑐰𑑅𑐬𑐵, 𑐎𑐵𑐖𑐸, 𑐥𑐶𑐳𑑂𑐟𑐵 𑐠𑐾𑑄𑐖𑑂𑐫𑐵𑑅𑐐𑐸 𑐩𑐬𑐩𑐳𑐮𑐵 𑐟𑐫𑐵𑑅 𑐡𑐫𑐾𑐎𑐷 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐥𑐸𑐲 𑐰 𑐩𑐵𑐑 𑐣𑐶𑐮𑐵 𑐔𑐵𑐎𑐸 𑐡𑐫𑐾𑐎𑐷𑐥𑐶𑐣𑐶 𑐟𑐳𑐎𑑄 𑐮𑐶𑐮𑐵𑐂𑐩𑐏𑐸 𑐢𑐵𑐂 𑑋

𑐗𑐷𑐳𑑄 𑐠𑐷𑐠𑐷 𑐂𑐮𑐫𑑂, 𑐃 𑐰 𑐩𑑁𑐳𑐩 𑐎𑐠𑑄𑐫𑐵 𑐣𑐳𑐵𑐟𑑂𑐰𑑃𑐳𑐵 𑐣𑐫𑐵𑑅 𑐠𑑅𑐐𑐸 𑐄𑐳𑐵𑑃𑐫𑑂 𑐰 𑐩𑑂𑐴𑐫𑐵𑐟 𑐧𑐮𑑂𑐮𑐵𑐎𑐵 𑐟𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎 𑐡𑐸 𑑋 𑐠𑐸𑐎𑐠𑑄𑐫𑐵 𑐣𑐳𑐵𑐟𑑂𑐰𑑃𑐳𑐵 𑐣𑐫𑐵𑑅 𑐠𑑅𑐐𑐸 𑐱𑐬𑐷𑐬𑐫𑐵𑐟 𑐩𑐵𑑅𑐐𑐸 𑐥𑑁𑐲𑑂𑐚𑐶𑐎 𑐟𑐟𑑂𑐰 𑐥𑑂𑐬𑐵𑐥𑑂𑐟 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐣𑑄 𑐠𑐸𑐎𑐠𑑄 𑐣𑐏𑑅𑐔𑐏𑑅 𑐴𑐣𑐵𑑅 𑐩𑑁𑐳𑐩 𑐎𑐠𑑄 𑐳𑐂𑐐𑐸 𑐰 𑐡𑐂𑐐𑐸 𑐣𑐳𑐵𑐟𑑂𑐰𑑃𑐳𑐵 𑐣𑐫𑐾𑐐𑐸 𑐔𑐮𑐣 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋

 

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS