Read news in NepalBhasa text-- www.hamroschool.com BACK 𑐠𑐣𑐶𑑄𑐣𑐶𑐳𑐾𑑄 𑐎𑑀𑐚𑐾𑐱𑑂𑐰𑐬𑑄 𑐥𑐹𑐬𑑂𑐰 𑐫𑐵𑐟𑐵𑐫𑐵𑐟 𑐧𑐣𑑂𑐡𑐫𑐵 𑐏𑑂𑐫𑐵𑐔𑑂𑐰𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐠𑐣𑐶𑑄𑐣𑐶𑐳𑐾𑑄 𑐎𑑀𑐚𑐾𑐱𑑂𑐰𑐬𑑄 𑐥𑐹𑐬𑑂𑐰 𑐫𑐵𑐟𑐵𑐫𑐵𑐟 𑐧𑐣𑑂𑐡𑐫𑐵 𑐏𑑂𑐫𑐵𑐔𑑂𑐰𑑅

𑐫𑐾𑑃 – 𑐨𑑀𑑄𑐟𑐫𑐵 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷 𑐰 𑐳𑐬𑐎𑐵𑐬 𑐡𑐠𑐸𑐂 𑐏𑑃 𑐩𑐶𑐮𑐾 𑐩𑐖𑐸𑐮 𑐢𑐵𑑅𑐳𑐵 𑐠𑐣𑐶𑑄𑐣𑐶𑐳𑐾𑑄 𑐫𑐾𑑃𑐣𑑄 𑐏𑑂𑐰𑐥 𑐰 𑐨𑑀𑑄𑐟𑐫𑐵 𑐦𑐸𑐎𑑂𑐎 𑐴𑐾 𑐐𑐵𑐜𑐷 𑐧𑐣𑑂𑐡 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐳𑐬𑐎𑐵𑐬𑑄 𑐩𑐫𑐹𑐬 𑐫𑐵𑐟𑐵𑐫𑐵𑐟 𑐣𑐵𑑄𑐐𑐸 𑐕𑐐𑐹 𑐣𑑂𑐴𑐹𑐐𑐸 𑐎𑐩𑑂𑐥𑐣𑐷𑐫𑐵𑐟 𑐐𑐵𑐜𑐷 𑐔𑐮𑐾 𑐫𑐵𑐫𑐾𑐐𑐸 𑐀𑐣𑐸𑐩𑐟𑐶 𑐧𑐶𑐮 𑐢𑐎𑐵𑑅 𑐄𑐐𑐸 𑐬𑐸𑐚𑐫𑐵 𑐩𑐾𑐥𑐶𑑄 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐴𑐜𑐟𑐵𑐮 𑐳𑑂𑐰𑐬𑐸𑐥 𑐐𑐵𑐜𑐷 𑐧𑐣𑑂𑐡 𑐫𑐵𑐫𑐾𑐐𑐸 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐏𑑅 𑑋

𑐟𑐬 𑐳𑐬𑐎𑐵𑐬𑑄 𑐣𑑄 𑐰𑑂𑐫𑐰𑐳𑐵𑐫𑐷𑐫𑐵 𑐣𑑂𑐴𑑂𑐫𑑅𑐣𑐾 𑐗𑐸𑐎𑐾 𑐩𑐖𑐸𑐳𑐾 𑐫𑐡𑐶 𑐐𑐵𑐜𑐷 𑐔𑐮𑐾 𑐩𑐫𑐵𑐟 𑐢𑐵𑑅𑐳𑐵 𑐳𑐸𑐣𑐵𑑄 𑐳𑐸𑐣𑐵𑑄 𑐔𑐮𑐾 𑐩𑐫𑐵𑑅𑐐𑐸 𑐏𑑅 𑐄𑐩𑐶𑐐𑐸 𑐬𑐸𑐚 𑐥𑐬𑐩𑐶𑐚 𑐏𑐵𑐬𑐾𑐖 𑐫𑐵𑐫𑐾𑐐𑐸 𑐖𑐸𑐂 𑐢𑐎𑐵𑑅 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐡𑐸 𑑋 𑐩𑑂𑐴𑐷𑐐 𑐖𑐹𑐐𑐸 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑑂𑐠𑐵 𑐰𑐶𑐨𑐵𑐐𑐫𑐵 𑐧𑐿𑐛𑐎𑐫𑑂 𑐣𑑄 𑐐𑐵𑐜𑐷 𑐔𑐮𑐾 𑐩𑐫𑐵𑐟 𑐢𑐵𑑅𑐳𑐵 𑐬𑐸𑐚 𑐥𑐬𑐩𑐶𑐚 𑐴𑐾 𑐏𑐵𑐬𑐾𑐖 𑐫𑐵𑐣𑐵 𑐕𑑂𑐰𑐫𑐾𑐐𑐸 𑐣𑐶𑐬𑑂𑐞𑐫 𑐖𑐹𑐐𑐸 𑐏𑑅 𑑋

𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐳𑐵𑑄𑐎𑐾𑐟𑐶𑐎 𑐴𑐜𑐟𑐵𑐮𑐫𑐵 𑐬𑐸𑐥𑐫𑑂 𑐩𑑂𑐴𑐶𑐐𑑅 𑐰 𑐩𑑂𑐴𑐷𑐐 𑐣𑑄 𑐑𑑁𑐕𑐶 𑐑𑑁𑐕𑐶 𑐐𑐵𑐜𑐷 𑐔𑐮𑐾 𑐩𑐫𑐵𑑅𑐐𑐸 𑐏𑑅 𑑋 𑐟𑐬 𑐄𑐐𑐸 𑐂𑐮𑐫𑑂 𑐣𑑄 𑐩𑐫𑐹𑐬 𑐫𑐵𑐟𑐵𑐫𑐵𑐟𑐫𑐵 𑐐𑐵𑐜𑐷 𑐔𑐮𑐾 𑐖𑐹𑐐𑐸 𑐏𑑅 𑑋 𑐩𑐫𑐹𑐬𑐫𑐵 𑐐𑐵𑐜𑐷𑐫𑐵𑐟 𑐳𑑂𑐠𑐵𑐣𑐷𑐫 𑐖𑐣𑐟𑐵𑑄 𑐴𑐾 𑐳𑑂𑐎𑐬𑑂𑐚𑐶𑐒 𑐫𑐵𑐣𑐵𑑅 𑐣𑑂𑐴𑑂𑐫𑑅𑐣𑐾 𑐫𑑄𑐎𑐹𑐐𑐸𑐮𑐶𑑄 𑐐𑐣𑑄 𑐕𑐸𑑄 𑐁𑐎𑑂𑐬𑐩𑐞 𑐟𑐎𑑄 𑐫𑐵𑐫𑐾 𑐩𑐦𑐸𑐐𑐸 𑐏𑑅 𑑋 𑐳𑑂𑐠𑐵𑐣𑐷𑐫 𑐖𑐣𑐟𑐵𑐫𑐵 𑐠𑑂𑐰 𑐳𑐩𑐬𑑂𑐠𑐣𑑄 𑐫𑐵𑐣𑐵𑑅 𑐠𑑅𑐥𑐶𑑄𑐟 𑐀𑐗 𑐄𑐟𑑂𑐳𑐵𑐴 𑐰𑑅𑐐𑐸 𑐏𑑃 𑐩𑐫𑐹𑐬 𑐫𑐵𑐟𑐵𑐫𑐵𑐟𑐫𑐵 𑐀𑐢𑑂𑐫𑐎𑑂𑐲 𑐩𑑀𑐴𑐣 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋

𑐎𑑀𑐚𑐾𑐱𑑂𑐰𑐬𑑄 𑐔𑑂𑐰𑐫𑑂𑐫𑐵 𑐬𑐸𑐚𑐫𑑂 𑐐𑐵𑐜𑐷 𑐔𑐮𑐾 𑐫𑐵𑐂𑐥𑐶𑑄 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐐𑐵𑐩𑐫𑑂 𑐐𑐵𑐜𑐷 𑐔𑐮𑐾 𑐩𑐫𑐵𑐳𑐾 𑐧𑐵𑑄𑐮𑐵𑑅𑐐𑐸 𑐬𑐸𑐚𑐫𑑂 𑐖𑐎 𑐥𑐬𑐩𑐶𑐚 𑐧𑐶𑐮 𑐢𑐎𑐵𑑅 𑐄𑐎𑐶𑐫𑐵 𑐰𑐶𑐬𑑀𑐢 𑐫𑐵𑑅𑐐𑐸 𑐏𑑅 𑑋 𑐟𑐬 𑐳𑐬𑐎𑐵𑐬𑑄 𑐩𑐫𑐹𑐬𑐫𑐵𑐟 𑐐𑐵𑐩𑐫𑑂 𑐣𑑄 𑐔𑐮𑐾 𑐫𑐵𑐎𑐾𑐐𑐸 𑐖𑐸𑐂 𑐢𑐵𑐳𑐾𑑄 𑐠𑑁𑑄𑐎𑐣𑑂𑐴𑐫𑑂 𑐐𑐵𑑄𑐫𑐵 𑐬𑐸𑐚𑐫𑑂 𑐐𑐵𑐜𑐷 𑐔𑐮𑐾 𑐫𑐵𑐂𑐥𑐶𑑄𑐳𑑄 𑐣𑑄 𑐳𑐾𑐰𑐵 𑐧𑐷𑐐𑐸 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐮𑐸𑐚𑐾 𑐖𑐎 𑐫𑐵𑐣𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐧𑐶𑐄𑐐𑐸 𑐡𑐸 𑑋
𑐫𑐡𑐶 𑐏𑑂𑐰𑐥–𑐨𑑀𑑄𑐟 𑐬𑐸𑐚𑐫𑐵 𑐐𑐵𑐜𑐷 𑐧𑐣𑑂𑐡 𑐖𑐸𑐮 𑐢𑐵𑑅𑐳𑐵 𑐩𑐾𑐐𑐸 𑐐𑐵𑐜𑐷 𑐴𑐫𑐵𑑅𑐳𑐵𑑄 𑐳𑐾𑐰𑐵 𑐳𑐘𑑂𑐔𑐵𑐮𑐣 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐣𑑄 𑐳𑐬𑐎𑐵𑐬𑑄 𑐫𑐵𑐣𑐵𑐔𑑂𑐰𑑄𑐐𑐸 𑐳𑐷𑐡𑐸𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS