Read news in NepalBhasa text-- www.hamroschool.com BACK 𑐣𑐾𑐰𑐵𑑅 𑐣𑐏𑑅 𑐣𑑂𑐫𑐹𑐫𑑀𑐬𑑂𑐎𑐫𑐵 𑐡𑑃𑐩𑐸𑑃𑐖𑑂𑐫𑐵 𑐰 𑐣𑑂𑐴𑐹𑐢𑐵𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐾𑐰𑐵𑑅 𑐣𑐏𑑅 𑐣𑑂𑐫𑐹𑐫𑑀𑐬𑑂𑐎𑐫𑐵 𑐡𑑃𑐩𑐸𑑃𑐖𑑂𑐫𑐵 𑐰 𑐣𑑂𑐴𑐹𑐢𑐵𑑅

𑐫𑐾𑑃 -𑐀𑐩𑐾𑐬𑐶𑐎𑐵𑐫𑐵 𑐣𑑂𑐫𑐹𑐫𑑀𑐬𑑂𑐎 𑐱𑐴𑐬𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐳𑑄𑐳𑑂𑐠𑐵 𑐣𑐾𑐰𑐵𑑅 𑐣𑐏𑑅 𑐣𑑂𑐫𑐹𑐫𑑀𑐬𑑂𑐎𑐫𑐵 𑐥𑑂𑐫𑐎𑑂𑐰𑑅𑐐𑐸 𑐡𑑃𑐩𑐸𑑃𑐖𑑂𑐫𑐵 𑐰 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐮𑑂𑐫𑐖𑑂𑐫𑐵 𑐰𑑄𑐐𑐸 𑐠𑐶𑑄𑐮𑐵𑐠𑑂𑐰 𑐫𑑅𑐩𑐬𑐶 𑐥𑐸𑐣𑑂𑐴𑐶𑐎𑐸𑐣𑑂𑐴𑐸 𑐖𑐸𑐮 𑑋

𑐳𑑄𑐳𑑂𑐠𑐵𑐫𑐵 𑐣𑐵𑐫𑑅 𑐰𑐶𑐲𑑂𑐞𑐸𑐩𑐵𑐣 𑐥𑑂𑐬𑐢𑐵𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐰𑐷𑐬𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋 𑐥𑐸𑐮𑐵𑑄𑐩𑑂𑐴 𑐳𑐮𑑂𑐮𑐵𑐎𑐵𑐬𑐮𑐶𑐳𑐾𑑄 𑐡𑐸𑐖𑑅 𑐀𑐖𑐫𑐩𑐵𑐣 𑐕𑑀𑐔𑐸𑑄𑐫𑐵 𑐮𑐸𑐩𑐣𑑂𑐟𑐶𑐂 𑐕𑐐𑐹 𑐩𑐶𑐣𑐾𑐚 𑐩𑑁𑐣 𑐢𑐵𑐬𑐞 𑐫𑐵𑐣𑐵𑑅 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐎𑐸 𑐩𑐴𑐾𑐣𑑂𑐡𑑂𑐬𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐡𑑃𑐩𑐸𑑃𑐖𑑂𑐫𑐵𑐫𑐵 𑐧𑐣𑑂𑐡 𑐳𑐟𑑂𑐬𑐫𑑂 𑐩𑐹𑐕𑑂𑐫𑐵𑐘𑑂𑐖𑐾 𑐜𑐵. 𑐣𑐬𑐾𑐱𑐩𑐵𑐣 𑐱𑐵𑐎𑑂𑐫𑑄 𑐳𑑄𑐳𑑂𑐠𑐵 𑐥𑑂𑐬𑐐𑐟𑐶 𑐰𑐶𑐰𑐬𑐞𑐮𑐶𑐳𑐾𑑄 𑐳𑑄𑐳𑑂𑐠𑐵𑐥𑐵𑐏𑐾𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐫𑐵 𑐳𑑄𑐎𑐶𑐥𑐵 𑐰 𑐎𑐶𑐥𑐵 𑐣𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐣𑐵𑐫𑑅 𑐥𑑂𑐬𑐢𑐵𑐣𑐮𑐶𑐳𑐾𑑄 𑐮𑐶𑐄 𑐡𑐵𑑄𑐨𑐬𑐶𑑄 𑐳𑐮𑑀𑐣𑐷 𑐰𑐣𑑂𑐟 𑐱𑑂𑐬𑐾𑐲𑑂𑐛𑑄 𑐮𑑂𑐫𑐵𑑅𑐔𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐥𑑂𑐬𑐢𑐵𑐣, 𑐳𑑄𑐳𑑂𑐠𑐵𑐥𑐎 𑐕𑑂𑐫𑐵𑐘𑑂𑐖𑐾 𑐳𑑄𑐖𑐫 𑐱𑐶𑐮𑐵𑐎𑐵𑐬, 𑐳𑐮𑑂𑐮𑐵𑐎𑐵𑐬 𑐬𑐵𑐖𑐎𑐸𑐩𑐵𑐬 𑐱𑑂𑐬𑐾𑐲𑑂𑐛 𑐮𑐐𑐵𑐫𑐟 𑐠𑐷𑐠𑐷 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄𑐳𑑄 𑐨𑐶𑑄𑐟𑐸𑐣𑐵 𑐣𑑂𑐰𑐔𑐸 𑐟𑐫𑐵𑐡𑐷𑐐𑐸 𑐏𑑅 𑑋 𑐧𑐣𑑂𑐡 𑐳𑐟𑑂𑐬 𑐮𑐶𑐥𑐵 𑐳𑑄𑐳𑑂𑐠𑐵𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐣𑑄 𑐮𑑂𑐫𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐮𑑂𑐫𑐖𑑂𑐫𑐵𑐎𑐠𑑄 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑐮𑐫𑑂 𑐩𑐴𑐾𑐣𑑂𑐡𑑂𑐬𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫 𑐣𑐵𑐫𑑅, 𑐜𑐵. 𑐣𑐬𑐾𑐱𑐩𑐵𑐣 𑐱𑐵𑐎𑑂𑐫 𑐣𑑂𑐴𑐵𑐥𑐵𑑄𑐩𑑂𑐴 𑐣𑑂𑐰𑐎𑐸, 𑐱𑑂𑐬𑐸𑐟𑐶 𑐀𑐩𑐵𑐟𑑂𑐫 𑐣𑐶𑐩𑑂𑐴𑐩𑑂𑐴 𑐣𑑂𑐰𑐎𑐸, 𑐟𑐸𑐮𑐳𑐷𑐣𑐵𑐬𑐵𑐫𑐞 𑐔𑐶𑐟𑑂𑐬𑐎𑐵𑐬 𑐩𑐹𑐕𑑂𑐫𑐵𑐘𑑂𑐖𑐾, 𑐳𑑄𑐐𑐷𑐟𑐵 𑐩𑐸𑐏𑐶𑐫𑐵 𑐕𑑀𑐔𑐸𑑄 𑐕𑑂𑐫𑐵𑐘𑑂𑐖𑐾, 𑐳𑐮𑑀𑐣𑐷 𑐰𑐣𑑂𑐟 𑐱𑑂𑐬𑐾𑐲𑑂𑐛 𑐡𑐵𑑄𑐨𑐬𑐶𑑄, 𑐩𑐾𑐣𑐷 𑐱𑑂𑐬𑐾𑐲𑑂𑐛 𑐮𑐶𑐄 𑐡𑐵𑑄𑐨𑐬𑐶𑑄𑐎𑐠𑑄 𑐮𑑂𑐫𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐩𑐹𑐡𑐸𑐖𑐮𑐫𑑂 𑐣𑐩𑑂𑐬𑐟𑐵 𑐥𑑂𑐬𑐢𑐵𑐣, 𑐡𑐶𑐥𑐎𑐎𑐸𑐩𑐵𑐬 𑐥𑑂𑐬𑐢𑐵𑐣, 𑐩𑐴𑐾𑐣𑑂𑐡𑑂𑐬𑐎𑐸𑐩𑐵𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐳𑑄𑐖𑐫 𑐥𑑂𑐬𑐢𑐵𑐣, 𑐬𑐵𑐢𑐶𑐎𑐵 𑐱𑑂𑐬𑐾𑐲𑑂𑐛, 𑐀𑐨𑐶𑐲𑐾𑐎 𑐕𑑀𑐔𑐸𑑄 𑐰 𑐱𑑀𑐨𑐣𑐵 𑐱𑐵𑐎𑑂𑐫𑐫𑐵𑐟 𑐳𑐬𑑂𑐰𑐳𑐩𑑂𑐩𑐟𑐶𑑄 𑐮𑑂𑐫𑑅𑐐𑐸 𑐡𑐸 𑑋 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐮𑑂𑐫𑐫𑐾𑐟 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐥𑑂𑐬𑐢𑐵𑐣𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐣𑐶𑐬𑑂𑐰𑐵𑐔𑐣 𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐏𑑅𑑋
𑐠𑐸𑐎𑐠𑑄 𑐴𑐾 𑐳𑐮𑑂𑐮𑐵𑐴𑐎𑐵𑐬𑐫𑑂 𑐳𑑄𑐳𑑂𑐠𑐵𑐫𑐵 𑐰𑐶𑐢𑐵𑐣𑐎𑐠𑑄 𑐣𑐶𑐰𑐬𑑂𑐟𑐩𑐵𑐣 𑐣𑐵𑐫𑑅 𑐰𑐶𑐲𑑂𑐞𑐸𑐩𑐵𑐣 𑐥𑑂𑐬𑐢𑐵𑐣𑐫𑐵𑐟 𑐮𑑂𑐫𑑅𑐐𑐸 𑐡𑐸𑐳𑐵 𑐰𑐫𑑂𑐎𑐮𑑄 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐎𑐵𑐬𑑂𑐫𑐎𑐵𑐮 𑐳𑐦𑐮𑐟𑐵𑐫𑐵 𑐎𑐵𑐩𑐣𑐵 𑐫𑐵𑐳𑐾 𑐨𑐶𑑄𑐟𑐸𑐣𑐵 𑐣𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐳𑐣𑑂 𑑒𑑐𑑑𑑑 𑐫𑑂 𑐣𑐷𑐳𑑂𑐰𑑄𑐐𑐸 𑐳𑑄𑐳𑑂𑐠𑐵𑐥𑐵𑐏𑐾𑑄 𑐣𑐾𑐰𑐵𑑅 𑐥𑐬𑐩𑑂𑐥𑐬𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑑄𑐳𑑂𑐠𑐵𑐥𑐵𑐏𑐾𑑄 𑐩𑑄𑐎𑐵𑑅 𑐩𑑂𑐴𑐥𑐸𑐖𑐵, 𑐫𑑅𑐩𑐬𑐶 𑐥𑐸𑐣𑑂𑐴𑐶, 𑐐𑐸𑑄𑐥𑐸𑐣𑑂𑐴𑐶, 𑐫𑑃𑐫𑐵𑑅𑐥𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐣𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐣𑑂𑐴𑐹𑐡𑑃𑐫𑐵 𑐮𑐳𑐟𑐵𑐫𑑂 𑐣𑐐𑐸𑐩𑐵 𑐣𑑄 𑐥𑐶𑐠𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS