Read news in NepalBhasa text-- www.hamroschool.com BACK 𑐎𑐵𑑄𑐐𑑂𑐬𑐾𑐳 𑐩𑐴𑐵𑐩𑐣𑑂𑐟𑑂𑐬𑐷𑐂 𑐠𑐵𑐥𑐵 𑐰 𑐱𑐬𑑂𑐩𑐵 𑐟𑑂𑐫𑐵𑐟, 𑐳𑐨𑐵𑐥𑐟𑐶 𑐡𑐾𑐄𑐰𑐵 𑐥𑑂𑐫𑐵𑐣𑐮𑑄 𑐡𑑄𑐥𑐶𑑄 𑐣𑐶𑐩𑑂𑐴𑑄 𑐥𑐬𑐵𑐖𑐶𑐟 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐎𑐵𑑄𑐐𑑂𑐬𑐾𑐳 𑐩𑐴𑐵𑐩𑐣𑑂𑐟𑑂𑐬𑐷𑐂 𑐠𑐵𑐥𑐵 𑐰 𑐱𑐬𑑂𑐩𑐵 𑐟𑑂𑐫𑐵𑐟, 𑐳𑐨𑐵𑐥𑐟𑐶 𑐡𑐾𑐄𑐰𑐵 𑐥𑑂𑐫𑐵𑐣𑐮𑑄 𑐡𑑄𑐥𑐶𑑄 𑐣𑐶𑐩𑑂𑐴𑑄 𑐥𑐬𑐵𑐖𑐶𑐟

𑐫𑐾𑑃- 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳𑐫𑐵 𑐩𑐴𑐵𑐩𑐣𑑂𑐟𑑂𑐬𑐷𑐂 𑐐𑐐𑐣 𑐠𑐵𑐥𑐵 𑐰 𑐰𑐶𑐱𑑂𑐰𑐥𑑂𑐬𑐎𑐵𑐱 𑐱𑐬𑑂𑐩𑐵 𑐟𑑂𑐫𑐵𑑅𑐐𑐸 𑐡𑐸 𑑋 𑐱𑐾𑐏𑐬 𑐎𑑀𑐂𑐬𑐵𑐮𑐵𑐫𑐵 𑐥𑑂𑐫𑐵𑐣𑐮𑑄 𑐩𑐴𑐵𑐩𑐣𑑂𑐟𑑂𑐬𑐷 𑐥𑐡𑐫𑑂 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐩𑑂𑐴 𑐠𑐵𑐥𑐵 𑐡𑐎𑐮𑐫𑑂 𑐀𑐥𑑂𑐰𑑅 𑑓𑑐𑑒𑑓 𑐩𑐟 𑐴𑐫𑐵𑑅 𑐰𑐶𑐖𑐫𑐷 𑐖𑐹𑐐𑐸 𑐏𑑅 𑑋 𑐄𑐎𑐠𑑄 𑐴𑐾 𑐥𑑂𑐬𑐎𑐵𑐱 𑐠𑐵𑐥𑐵 𑐥𑑂𑐫𑐵𑐣𑐮𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐩𑑂𑐴 𑐰𑐶𑐱𑑂𑐰𑐥𑑂𑐬𑐎𑐵𑐱 𑐱𑐬𑑂𑐩𑐵 𑑑𑑙𑑘𑑔 𑐩𑐟 𑐴𑐫𑐵𑑅 𑐩𑐴𑐵𑐩𑐣𑑂𑐟𑑂𑐬𑐷𑐂 𑐰𑐶𑐖𑐫𑐷 𑐖𑐸𑐫𑐵𑐡𑐷𑐐𑐸 𑐏𑑅 𑑋

𑐎𑐵𑑄𑐐𑑂𑐬𑐾𑐳𑐫𑐵 𑐫𑐾𑑃𑐫𑑂 𑐖𑐹𑐐𑐸 𑐗𑐶𑑄𑐥𑑂𑐫𑐎𑑂𑐰𑑅𑐐𑐸 𑐩𑐴𑐵𑐢𑐶𑐰𑐾𑐱𑐣𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵 𑐳𑐨𑐵𑐥𑐟𑐶𑐂 𑐟𑑂𑐫𑐵𑑅𑐳𑐵𑑄 𑐩𑐴𑐵𑐩𑐣𑑂𑐟𑑂𑐬𑐷𑐂 𑐢𑐵𑑅𑐳𑐵 𑐰𑐫𑑂𑐎𑑅𑐫𑐵 𑐥𑐎𑑂𑐲𑐫𑐵𑐥𑐶𑑄𑐳𑑄 𑐟𑑂𑐫𑐵𑐎𑐾 𑐩𑐦𑐸𑐟 𑑋 𑐩𑐴𑐵𑐩𑐣𑑂𑐟𑑂𑐬𑐷 𑐥𑐡𑐫𑑂 𑐩𑐸𑐎𑑂𑐎𑑄 𑐏𑐸𑐩𑑂𑐴 𑐄𑐩𑑂𑐩𑐾𑐡𑐰𑐵𑐬 𑐡𑑄𑐐𑐸𑐮𑐶𑐂 𑐡𑐾𑐄𑐰𑐵𑐫𑐵 𑐥𑑂𑐫𑐵𑐣𑐮𑑄 𑐡𑑄𑐥𑐶𑑄 𑐥𑑂𑐬𑐎𑐵𑐳𑐱𑐬𑐞 𑐩𑐴𑐟 𑐰 𑐥𑑂𑐬𑐡𑐷𑐥 𑐥𑑁𑐜𑐾𑐮 𑐥𑑂𑐫𑑄𑐐𑐹𑐐𑐸 𑐰 𑐣𑑂𑐫𑐵𑐐𑐹𑐐𑐸 𑐠𑐵𑐳𑐫𑑂 𑐮𑐵𑑅𑐐𑐸 𑐏𑑅 𑑋 𑐠𑐵𑐥𑐵 𑐰 𑐩𑐶𑐣𑐾𑐣𑑂𑐡𑑂𑐬 𑐬𑐶𑐖𑐵𑐮 𑐳𑐨𑐵𑐥𑐟𑐶𑐫𑐵 𑐄𑐩𑑂𑐩𑐾𑐡𑐰𑐵𑐬 𑐱𑐾𑐏𑐬 𑐎𑑀𑐂𑐬𑐵𑐮𑐵𑐫𑐵 𑐥𑑂𑐫𑐵𑐣𑐮𑑄 𑐡𑑄𑐐𑐸 𑐏𑑅 𑑋 𑐬𑐶𑐖𑐵𑐮 𑐢𑐵𑑅𑐳𑐵 𑐳𑑂𑐰𑑄𑐐𑐹𑐐𑐸 𑐠𑐵𑐳𑐫𑑂 𑐮𑐵𑑅𑐐𑐸 𑐡𑐸 𑑋 𑐎𑐵𑑄𑐐𑑂𑐬𑐾𑐳 𑐩𑐴𑐵𑐩𑐣𑑂𑐟𑑂𑐬𑐷 𑐥𑐡𑐫𑑂 𑐥𑐬𑐵𑐖𑐶𑐟 𑐖𑐸𑐂𑐰𑑄 𑐬𑐶𑐖𑐵𑐮𑑄 𑐬𑐎𑑂𑐲𑐵𑐩𑐣𑑂𑐟𑑂𑐬𑐷 𑐥𑐡𑑄 𑐣𑑄 𑐬𑐵𑐖𑐷𑐣𑐵𑐩𑐵 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐄𑐥𑐳𑐨𑐵𑐥𑐟𑐶 𑐥𑐡𑐫𑑂 𑐡𑐾𑐄𑐰𑐵𑐫𑐵 𑐥𑐎𑑂𑐲𑐫𑐵 𑐥𑐹𑐬𑑂𑐞𑐧𑐴𑐵𑐡𑐸𑐬 𑐏𑐜𑑂𑐎𑐵 𑐰 𑐎𑑀𑐂𑐬𑐵𑐮𑐵 𑐥𑐎𑑂𑐲𑐫𑐵 𑐢𑐣𑐬𑐵𑐖 𑐐𑐸𑐬𑐸𑐒𑑂𑐐 𑐟𑑂𑐫𑐵𑑅𑐐𑐸 𑐡𑐸 𑑋 𑐎𑐵𑑄𑐐𑑂𑐬𑐾𑐳𑐫𑐵 𑐰𑐶𑐢𑐵𑐣 𑐎𑐠𑑄 𑐥𑐡𑐵𑐢𑐶𑐎𑐵𑐬𑐷𑐂 𑐕𑐩𑑂𑐴 𑐳𑐨𑐵𑐥𑐟𑐶, 𑐣𑐶𑐩𑑂𑐴 𑐄𑐥𑐳𑐨𑐵𑐥𑐟𑐶, 𑐣𑐶𑐩𑑂𑐴 𑐩𑐴𑐵𑐩𑐣𑑂𑐟𑑂𑐬𑐷 𑐰 𑐔𑑂𑐫𑐵𑐩𑑂𑐴 𑐳𑐴𑐩𑐴𑐵𑐩𑐣𑑂𑐟𑑂𑐬𑐷 𑐡𑐂 𑑋 𑐎𑑀𑐲𑐵𑐢𑑂𑐫𑐎𑑂𑐲 𑐢𑐵𑑅𑐳𑐵 𑐣𑐶𑐬𑑂𑐰𑐵𑐔𑐶𑐟 𑐎𑐾𑐣𑑂𑐡𑑂𑐬𑐷𑐫 𑐳𑐡𑐳𑑂𑐫𑐩𑐢𑑂𑐫𑐾 𑐕𑐩𑑂𑐴𑐾𑐳𑐶𑐟 𑐮𑑂𑐫𑐂𑐐𑐸 𑐖𑐸𑐂 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐩𑐴𑐵𑐩𑐣𑑂𑐟𑑂𑐬𑐷 𑐥𑐡𑐫𑑂 𑐣𑐶𑐬𑑂𑐰𑐵𑐔𑐶𑐟 𑐖𑐸𑐂𑐢𑐸𑑄𑐎𑐵𑑅 𑐠𑐵𑐥𑐵𑑄 𑐩𑐴𑐵𑐢𑐶𑐰𑐾𑐱𑐣𑐫𑑂 𑐠𑑅𑐟 𑐰𑑅𑐐𑐸 𑐩𑐟𑐫𑐵𑐟 𑐣𑑂𑐫𑐵𑐫 𑐧𑐷𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐩𑐴𑐵𑐩𑐣𑑂𑐟𑑂𑐬𑐷 𑐥𑐡𑐫𑑂 𑐣𑐶𑐬𑑂𑐰𑐵𑐔𑐶𑐟 𑐖𑐸𑐂𑐢𑐸𑑄𑐎𑐵𑑅 𑐥𑐵𑐬𑑂𑐚𑐷 𑐖𑑂𑐫𑐵𑐎𑐹 𑐳𑐵𑐣𑐾𑐥𑐵𑐫𑑂 𑐥𑐟𑑂𑐬𑐎𑐵𑐬𑐟 𑐮𑐶𑐳𑐾 𑐏𑑃 𑐮𑑂𑐴𑐵𑐳𑐾𑑄 𑐠𑐵𑐥𑐵𑑄 𑐁𑑅 𑐕𑐣𑑂𑐴𑐸 𑐣𑑄 𑐔𑐸𑐎𑐾 𑐖𑐸𑐂𑐐𑐸 𑐰 𑐡𑐷𑐐𑐸 𑐳𑐸𑐰𑐶𑐢𑐵 𑐩𑐡𑐸𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐠𑐵𑐥𑐵𑑄 𑐩𑐴𑐵𑐢𑐶𑐰𑐾𑐱𑐣𑑄 𑐎𑐵𑑄𑐐𑑂𑐬𑐾𑐳𑐫𑐵𑐟 𑐳𑐩𑑂𑐥𑐹𑐬𑑂𑐞 𑐬𑐸𑐥𑐫𑑂 𑐣𑐾𑐟𑐺𑐟𑑂𑐰 𑐴𑐶𑐮𑐾𑐐𑐸 𑐀𑐰𑐳𑐬 𑐧𑐶𑐄𑐐𑐸 𑐏𑑅𑐳𑐵𑑄 𑐣𑑄 𑐩𑐴𑐵𑐢𑐶𑐰𑐾𑐱𑐣𑑄 𑐄𑐐𑐸 𑐩𑑂𑐫𑐵𑐞𑑂𑐜𑐾𑐚 𑐩𑐧𑐶𑐄𑐐𑐸 𑐢𑐵𑐳𑐾𑑄 𑐄𑐎𑐶𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑐫𑐾𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐠𑐩𑑂𑐴𑑄 𑐩𑐴𑐵𑐩𑐣𑑂𑐟𑑂𑐬𑐷𑐫𑐵 𑐴𑐿𑐳𑐶𑐫𑐟𑑄 𑐳𑐨𑐵𑐥𑐟𑐶𑐫𑐵𑐟 𑐖𑑂𑐫𑐵 𑐫𑐵𑐫𑐾𑐟 𑐧𑐮 𑐰 𑐟𑐵𑐐𑐟 𑐧𑐷𑐐𑐸 𑐣𑐶𑑄𑐟𑐶𑑄 𑐐𑑂𑐰𑐵𑐎𑐵𑐔𑑂𑐰𑐣𑐾𑐐𑐸 𑐏𑑃 𑐣𑑄 𑐣𑐾𑐟𑐵 𑐠𑐵𑐥𑐵𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐄𑐎𑐠𑑄 𑐴𑐾 𑐰𑐫𑑂𑐎𑐮𑑄 𑐳𑐨𑐵𑐥𑐟𑐶 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵𑐫𑐵𑐟 𑐠𑑅𑐮𑐶𑐳𑐾 𑐥𑑂𑐬𑐟𑐶𑐳𑑂𑐥𑐬𑑂𑐢𑐵 𑐫𑐵𑑅𑐥𑐶𑑄𑐟 𑐎𑑅𑐑𑐵𑐣𑐵𑑅 𑐰𑐣𑐾𑐟 𑐂𑐣𑐵𑐥 𑐣𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS