Read news in NepalBhasa text-- www.hamroschool.com BACK 𑐣𑐵𑑄 𑐖𑐎 𑐕𑐸𑐂𑐟 𑐴𑐾 𑐳𑑄𑐑𑐬𑑂𑐲 𑐫𑐵𑑅𑐩𑑂𑐴 𑐳𑑄𑐖𑐷𑐰 𑐎𑐸𑐩𑐵𑐬 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐵𑑄 𑐖𑐎 𑐕𑐸𑐂𑐟 𑐴𑐾 𑐳𑑄𑐑𑐬𑑂𑐲 𑐫𑐵𑑅𑐩𑑂𑐴 𑐳𑑄𑐖𑐷𑐰 𑐎𑐸𑐩𑐵𑐬

𑐳𑑄𑐖𑐷𑐰 𑐎𑐸𑐩𑐵𑐬 – 𑐨𑐵𑐬𑐟𑐷𑐫 𑐦𑐶𑐮𑑂𑐩 𑐄𑐡𑑂𑐫𑑀𑐐𑐫𑐵 𑐕𑐩𑑂𑐴 𑐖𑑂𑐰𑑅𑐩𑐡𑐸𑐩𑑂𑐴 𑐀𑐨𑐶𑐣𑐾𑐟𑐵 𑑋 𑐠𑐸𑐩𑑂𑐴 𑐖𑑂𑐰𑑅𑐩𑐡𑐸𑐩𑑂𑐴 𑐀𑐨𑐶𑐣𑐾𑐟𑐵 𑐩𑐡𑐸𑐐𑐸 𑐄𑐎𑐸𑐣𑑂𑐴𑐸 𑐣𑑂𑐫𑐵𑐣𑑂𑐴𑐸 𑐣𑑂𑐴𑑂𑐫𑐰 𑐳𑑂𑐰𑐷𑐣𑑂𑐴𑐫𑑂𑐡𑑃 𑐎𑑂𑐫𑐣 𑑋 𑐳𑑄𑐖𑐷𑐰 𑐎𑐸𑐩𑐵𑐬 𑐩𑐸𑐎𑑂𑐎𑑄 𑑔𑑗 𑐡𑑃𑐫𑐵 𑐰𑐿𑐱𑐫𑑂 𑑖 𑐣𑑀𑐰𑐾𑐩𑑂𑐨𑐬 𑑑𑑙𑑘𑑕 𑐂 𑐠𑑂𑐰 𑐳𑑄𑐳𑐵𑐬𑐫𑐵𑐟 𑐀𑐮𑐧𑐶𑐡𑐵 𑐢𑐫𑐵𑐰𑑄𑐐𑐸 𑐏𑑅 𑑋

𑐧𑐵𑐐𑐹 𑐡𑐱𑐎 𑐴𑐾 𑐖𑐷𑐰𑐣 𑐴𑐣𑐾𑐩𑐏𑑄𑐳𑐵𑑄 𑐠𑐸𑐩𑑂𑐴 𑐀𑐨𑐶𑐣𑐾𑐟𑐵𑑄 𑐨𑐵𑐬𑐟𑐷𑐫 𑐳𑐶𑐣𑐾𑐩𑐵𑐫𑐵𑐟 𑐧𑐵𑐐𑐹 𑐡𑐱𑐎𑐫𑐵 𑐧𑐕𑐶 𑐀𑐠𑐾 𑐢𑐫𑐵𑐐𑐸 𑑒𑑕 𑐡𑑃 𑐧𑐶𑐫𑐵 𑐰𑐣, 𑐀𑐮𑐾 𑐠𑑂𑐰 𑑒𑑕 𑐡𑑃𑐫𑐵 𑐡𑐸𑐣𑐾 𑐰𑑄 𑐨𑐵𑐬𑐟𑐷𑐫 𑐳𑐶𑐣𑐾𑐩𑐵𑐫𑐵 𑐡𑐬𑑂𑐱𑐎𑐟𑐫𑑂 𑐡𑐠𑐸𑐂 𑐠𑐖𑑂𑐫𑐵𑑅𑐐𑐸 𑐕𑐵𑐥 𑐟𑐫𑐵𑐰𑐣 𑐎𑐶 𑐰 𑐩𑐡𑐸𑐐𑐸 𑑓𑑖 𑐡𑑃 𑐡𑐫𑐾𑐢𑐸𑑄𑐎𑐵𑑅 𑐣𑑄 𑐰𑐫𑐵𑐟 𑐳𑐸𑐣𑐵𑑄 𑐮𑑂𑐰𑑅𑐩𑑄𑐎𑐾𑐦𑐸𑐐𑐸 𑐩𑐡𑐸𑐣𑐶 𑑋 𑑒𑑕 𑐡𑑃 𑐟𑐎 𑐰𑐫𑐵𑐐𑐸 𑐀𑐨𑐶𑐣𑐫 𑐎𑑂𑐲𑐩𑐟𑐵𑑄 𑐡𑐬𑑂𑐱𑐎𑐟𑐫𑑂𑐟 𑐩𑑀𑐴𑐶𑐟 𑐴𑐾 𑐫𑐵𑐣𑐵𑐟𑐮, 𑐀𑐮𑐾 𑐠𑑂𑐰 𑐡𑐠𑐸𑐂 𑐰𑑄 𑐨𑐵𑐬𑐟𑐷𑐫 𑐦𑐶𑐮𑑂𑐩 𑐄𑐡𑑂𑐫𑑀𑐐𑐫𑑂 𑐖𑑂𑐰𑑅𑐩𑐡𑐸𑐐𑐸 𑐦𑐶𑐮𑑂𑐩𑐟 𑐧𑐶𑐫𑐵𑐰𑐣 𑑋
𑐠𑑅𑐐𑐸 𑐃𑐫𑐵 𑐳𑑂𑐚𑐵𑐬 𑐎𑐮𑐵𑐎𑐵𑐬 𑐳𑑄𑐖𑐷𑐰 𑐎𑐸𑐩𑐵𑐬𑐫𑐵 𑐖𑐷𑐰𑐣 𑐣𑑄 𑐨𑐵𑐬𑐟𑐷𑐫 𑐩𑐳𑐵𑐮𑐵 𑐦𑐶𑐮𑑂𑐩𑐫𑐵 𑐧𑐵𑐏𑑄 𑐠𑐾𑑄 𑐴𑐾 𑐖𑐸𑐮 𑑋 𑐦𑐶𑐮𑑂𑐩𑐷 𑐳𑑄𑐳𑐵𑐬𑐫𑑂 𑐣𑐐𑐹 𑐠𑐾𑑄 𑐠𑐶𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐰𑐫𑐵𑐟 𑐀𑐫𑑂𑐮𑐵𑑅 𑐟𑑂𑐰𑐣𑐾𑐐𑐸 𑐮𑐟 𑐖𑐸𑐮, 𑐀𑐮𑐾 𑐟𑑂𑐰𑐣𑐾𑐐𑐸 𑐰 𑐟𑑂𑐰𑑄𑐎𑐾𑐐𑐸𑐮𑐷 𑐴𑐾 𑐥𑐵𑐳𑐵𑐥𑐶𑑄 𑐡𑐠𑐸𑐂 𑐑𑐾𑐬𑐾 𑐖𑐸𑐫𑐵𑐔𑑂𑐰𑐣, 𑐟𑐬 𑐖𑐷𑐰𑐣𑐫𑐵 𑐀𑐣𑑂𑐟𑐶𑐩 𑐂𑐮𑐫𑑂 𑐢𑐵𑑅𑐳𑐵 𑐫𑐵𑐎𑑅𑐔𑐵 𑐴𑐾 𑐮𑑂𑐰𑐫𑑂 𑐮𑐶𑐳𑐾 𑐮𑑂𑐰𑐵𑐫𑐾𑐩𑐵𑐮 𑑋

𑐦𑐶𑐮𑑂𑐩𑐫𑐵 𑐧𑐵𑐏𑑄 𑐠𑐾𑑄 𑐴𑐾 𑐳𑑄𑐖𑐷𑐰𑑄 𑐠𑑅𑐐𑐸 𑐖𑐷𑐰𑐣𑐫𑑂 𑐫𑐎𑑂𑐰 𑐴𑐾 𑐳𑑄𑐑𑐬𑑂𑐲 𑐫𑐵𑐫𑐾𑐩𑐵𑐮 𑑋 𑐰 𑐩𑐔𑐵𑐧𑐮𑐫𑑂 𑐴𑐾 𑐰𑐫𑐵 𑐀𑐧𑐸 𑐩𑑄𑐟 𑑋 𑐰𑐫𑐵 𑐩𑐵𑐩𑑄 𑐰𑐫𑐵𑐟 𑐳𑑄𑐑𑐬𑑂𑐲 𑐫𑐵𑐫𑐵𑑄 𑐴𑐾 𑐧𑑂𑐰𑐮𑐎𑑄𑐮 𑑋 𑐰𑐫𑐵 𑐩𑐵𑑄𑐫𑐵 𑐰𑐫𑐵𑐟 𑐧𑑂𑐰𑑄𑐎𑐵𑑅 𑐜𑐵𑐎𑑂𑐚𑐬 𑐰𑐵 𑐰𑐎𑐶𑐮 𑐡𑐫𑐾𑐎𑐾𑐐𑐸 𑐂𑐔𑑂𑐕𑐵, 𑐟𑐬 𑐰𑐫𑐵 𑐢𑐵𑑅𑐳𑐵 𑐦𑐶𑐮𑑂𑐩𑐥𑐵𑐏𑐾 𑐣𑐸𑐐𑑅 𑐎𑑂𑐰𑐳𑐵𑑅, 𑐄𑐎𑐶𑑄 𑐦𑐶𑐮𑑂𑐩 𑐩𑑂𑐴𑐶𑐟𑐾𑐐𑐸 𑐣𑐶𑑄𑐟𑐶𑑄 𑐳𑑄𑐑𑐬𑑂𑐲 𑐫𑐵𑐟 𑑋 𑐰𑐫𑐵 𑐀𑐨𑐶𑐣𑐫𑐥𑑂𑐬𑐟𑐶 𑐮𑐐𑐵𑐰 𑐏𑐣𑐵𑑅 𑐰𑐫𑐵 𑐩𑐵𑐩𑑄 𑐣𑑄 𑐰𑐫𑐵𑐟 𑐐𑑂𑐰𑐵𑐴𑐵𑐮𑐶 𑐴𑐾 𑐫𑐵𑐟 𑑋 𑐀𑐨𑐶𑐣𑐫𑐫𑐵 𑐟𑐵𑐮𑐶𑐩𑐫𑐵 𑐣𑐶𑑄𑐟𑐶𑑄 𑐰𑐫𑐵 𑐩𑐵𑐩𑑄 𑐠𑑅𑐐𑐸 𑐟𑐶𑐳𑐵 𑐩𑐶𑐫𑐵𑑅 𑐢𑑂𑐫𑐧𑐵 𑐧𑐶𑐮 𑑋 𑐀𑐨𑐶𑐣𑐫𑐫𑐵 𑐟𑐵𑐮𑐶𑐩 𑐎𑐵𑐫𑐾𑐢𑐸𑑄𑐎𑐵𑑅 𑐠𑐶𑐊𑐚𑐬𑐫𑑂 𑐩𑑂𑐴𑐶𑐟𑐸𑐩𑑂𑐴𑐶𑐟𑐸𑑄 𑐦𑐶𑐮𑑂𑐩𑐫𑐵 𑐣𑐶𑑄𑐟𑐶𑑄 𑐳𑑄𑐑𑐬𑑂𑐲 𑐫𑐵𑐣𑐵𑐔𑑂𑐰𑐣 𑑋

𑐰𑑄 𑐠𑑅𑐐𑐸 𑐦𑐶𑐮𑑂𑐩 𑐎𑑂𑐫𑐵𑐬𑐶𑐫𑐬 𑐧𑐷 𑐐𑑂𑐬𑐾𑐜𑐫𑐵 𑐦𑐶𑐮𑑂𑐩𑑄 𑐳𑐸𑐬𑐸 𑐫𑐵𑑅𑐐𑐸 𑐏𑑅, 𑐟𑐬 𑐠𑑅𑐐𑐸 𑐀𑐨𑐶𑐣𑐫 𑐎𑑂𑐲𑐩𑐟𑐵𑐫𑐵 𑐐𑑂𑐰𑐵𑐴𑐵𑐮𑐶𑑄 𑐳𑑂𑐚𑐵𑐬𑐜𑐩 𑐔𑐹𑐮𑐵𑐎𑐮, 𑐀𑐮𑐾 𑐀𑐩𑐶𑐟𑐵𑐨 𑐧𑐔𑑂𑐔𑐣, 𑐱𑐟𑑂𑐬𑐸𑐑𑐣 𑐳𑐶𑐣𑑂𑐴𑐵 𑐠𑐾𑑄𑐖𑑂𑐫𑐵𑑅𑐥𑐶𑑄 𑐎𑐮𑐵𑐎𑐵𑐬 𑐡𑐸𑐠𑑂𑐫𑐵𑐂𑐐𑐸 𑐩𑐮𑑂𑐚𑐶𑐳𑑂𑐚𑐵𑐬𑐬 𑐦𑐶𑐮𑑂𑐩𑐫𑑂 𑐣𑑄 𑐡𑐎𑐮𑐫𑑂 𑐀𑐥𑑂𑐰𑑅 𑐥𑐵𑐬𑐶𑐱𑑂𑐬𑐩𑐶𑐎 𑐎𑐵𑐂𑐩𑑂𑐴 𑐖𑐸𑐫𑐵𑐧𑐶𑐮 𑑋 𑐠𑑂𑐰 𑐳𑐦𑐮𑐟𑐵 𑐰𑐫𑐵𑐟 𑐕𑐎𑑂𑐰𑐮𑑄 𑐴𑑂𑐰𑐵𑐚𑑂𑐚 𑐴𑐾 𑐰𑑅𑐐𑐸 𑐢𑐵𑑅𑐳𑐵 𑐩𑐏𑐸, 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐥𑐮𑐵𑑅𑐥𑐮𑐵𑑅 𑐥𑐟𑐶𑐎𑑄 𑐳𑑄𑐑𑐬𑑂𑐲 𑐫𑐵𑐫𑐾𑐩𑐵𑐮 𑑋 𑐦𑐶𑐮𑑂𑐩𑐫𑑂 𑐖𑑂𑐫𑐵 𑐩𑐵𑐮𑐵𑐔𑑂𑐰𑑄𑐩𑑂𑐴 𑐳𑑄𑐖𑐷𑐰𑐫𑐵𑐟 𑐳𑐣𑑂 𑑑𑑙𑑖𑑐 𑐂 𑐳𑐸𑐣𑐷𑐮 𑐡𑐟𑑂𑐟 𑐰 𑐁𑐱𑐵 𑐥𑐵𑐬𑐾𑐏 𑐠𑐾𑑄𑐖𑑂𑐫𑐵𑑅𑐥𑐶𑑄 𑐳𑑂𑐚𑐵𑐬 𑐎𑐮𑐵𑐎𑐵𑐬𑐟𑐮𑐶𑐳𑐾 𑐦𑐶𑐮𑑂𑐩 𑐩𑑂𑐴𑐶𑐟𑐾𑐐𑐸 𑐴𑑂𑐰𑑅𑐟𑐵𑑅 𑐮𑐵 𑐔𑐹𑐮𑐵𑐟, 𑐟𑐬 𑐴𑐩 𑐴𑐶𑐣𑑂𑐡𑐷𑐳𑑂𑐟𑐵𑐣𑐷 𑐣𑐵𑑄𑐫𑐵 𑐠𑑂𑐰 𑐦𑐶𑐮𑑂𑐩𑐫𑑂 𑐰𑐫𑐵𑐐𑐸 𑐬𑑀𑐮 𑐢𑐵𑑅𑐳𑐵 𑐩𑐸𑐎𑑂𑐎𑑄 𑑒 𑐳𑐾𑐎𑐾𑐣𑑂𑐜𑐫𑐵 𑐴𑐾 𑐖𑐎 𑐖𑐸𑐮 𑑋 𑐠𑑂𑐰 𑐮𑐶𑐥𑐵 𑐰𑑄 𑐦𑐶𑐮𑑂𑐩 𑐣𑐶𑐬𑑂𑐡𑐾𑐱𑐎 𑐣𑐶𑐬𑑂𑐩𑐵𑐟𑐵𑐟𑐫𑑂𑐠𑐵𑐫𑑂 𑐢𑐵𑐰𑐫𑑂 𑐖𑐸𑐂𑐐𑐸 𑐳𑐸𑐬𑐸 𑐫𑐵𑐟, 𑐀𑐮𑐾 𑐠𑐶𑐊𑐚𑐬𑐫𑑂 𑐣𑑄 𑐩𑑂𑐴𑐶𑐟𑐵 𑐴𑐾 𑐔𑑂𑐰𑐣 𑑋

𑐦𑐶𑐮𑑂𑐩𑐫𑐵 𑐣𑐶𑑄𑐟𑐶𑑄 𑐳𑑄𑐑𑐬𑑂𑐲 𑐫𑐵𑐣𑐵𑐔𑑂𑐰𑑄𑐩𑑂𑐴 𑐰𑑄 𑐠𑑅𑐐𑐸 𑐦𑐶𑐮𑑂𑐩𑐷 𑐣𑐵𑑄 𑐕𑐸𑐂𑐐𑐸 𑐣𑐶𑑄𑐟𑐶𑑄 𑐣𑑄 𑐄𑐟𑐶𑐎𑑄 𑐴𑐾 𑐳𑑄𑐑𑐬𑑂𑐲 𑐫𑐵𑐫𑐾𑐩𑐵𑐮 𑑋 𑐳𑑄𑐖𑐷𑐰𑐫𑐵 𑐢𑐵𑐠𑐾𑑄𑐫𑐵 𑐣𑐵𑑄 𑐮𑐵 𑐴𑐬𑐶𑐴𑐬 𑐖𑐾𑐛𑐵𑐮𑐵 𑐖𑐬𑐷𑐰𑐵𑐮𑐵 𑐏𑑅 𑑋 𑐦𑐶𑐮𑑂𑐩𑐫𑐵 𑐣𑐶𑑄𑐟𑐶𑑄 𑐳𑑄𑐑𑐬𑑂𑐲 𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐰𑐫𑐵𑐟 𑐠𑑅𑐐𑐸 𑐣𑑄 𑐦𑐶𑐮𑑂𑐩𑐷 𑐣𑐵𑑄 𑐟𑐫𑐾𑐩𑐵𑑅 𑐠𑐾𑑄 𑐟𑐵𑐮 𑑋 𑐰𑐫𑐵 𑐩𑐵𑑄𑐫𑐵 𑐣𑐵𑑄 𑐱𑐵𑑄𑐟𑐵𑐧𑐾𑐣 𑐖𑐬𑐷𑐰𑐵𑐮𑐵 𑐏𑑅 𑑋 𑐄𑐎𑐶𑑄 𑐰𑑄 𑐠𑑅𑐐𑐸 𑐣𑐵𑑄 ‘𑐊𑐳’ 𑐁𑐏𑑅 𑐥𑐵𑐏𑐾𑑄 𑐴𑐾 𑐟𑐫𑐾𑐐𑐸 𑐎𑑂𑐰𑑅𑐕𑐶𑐟 𑑋 𑐄𑐐𑐸 𑐂𑐮𑐫𑑂 𑐡𑐶𑐮𑐶𑐥 𑐎𑐸𑐩𑐵𑐬 𑐰 𑐀𑐱𑑀𑐎 𑐎𑐸𑐩𑐵𑐬𑐥𑐶𑑄𑐳𑑄 𑐟𑐳𑐎𑑄 𑐳𑐦𑐮𑐟𑐵 𑐔𑐹𑐮𑐵𑐎𑐵𑐔𑑂𑐰𑑄𑐐𑐸 𑐃, 𑐄𑐎𑐶𑑄 𑐰𑑄 𑐠𑑅𑐐𑐸 𑐣𑐵𑑄𑐫𑐵 𑐮𑐶𑐄𑐣𑐾 ‘𑐎𑐸𑐩𑐵𑐬’ 𑐑𑐵𑐎𑐾𑐐𑐸 𑐎𑑂𑐰𑑅𑐕𑐶𑐟, 𑐀𑐮𑐾 𑐣𑐵𑑄 𑐟𑐮 –𑐳𑑄𑐖𑐫 𑐎𑐸𑐩𑐵𑐬 𑑋

𑐳𑐣𑑂 𑑑𑑙𑑖𑑔𑐂 𑐰𑐫𑐵𑐐𑐸 𑐣𑐶𑐐𑐹𑐐𑐸 𑐴𑐶𑐣𑑂𑐡𑐷 𑐦𑐶𑐮𑑂𑐩 ‘𑐁𑐌 𑐥𑑂𑐫𑐵𑐬 𑐎𑐬𑐾𑑄’ 𑐬𑐶𑐮𑐶𑐖 𑐖𑐸𑐮 𑑋 𑐠𑑂𑐰 𑐦𑐶𑐮𑑂𑐩𑐫𑑂 𑐰𑐫𑐵𑐐𑐸 𑐣𑐵𑑄 𑐳𑑄𑐖𑐫 𑐎𑐸𑐩𑐵𑐬 𑐢𑐎𑐵𑑅 𑐴𑐾 𑐰𑑅𑐐𑐸 𑐏𑑅 𑑋 𑐠𑑂𑐰 𑐮𑐶𑐥𑐵 𑐰𑐫𑐵𑐟 𑐎𑐩𑐵𑐮 𑐀𑐩𑐬𑑀𑐴𑐷𑑄 𑐱𑑄𑐎𑐬 𑐴𑐸𑐳𑐿𑐣 𑐣𑐵𑑄𑐫𑐵 𑐕𑐐𑐹 𑐦𑐶𑐮𑑂𑐩𑐫𑐵 𑐣𑐶𑑄𑐟𑐶𑑄 𑐀𑐣𑐸𑐧𑐣𑑂𑐢 𑐫𑐵𑐟 𑑋 𑐀𑐩𑐬𑑀𑐴𑐷𑐫𑐵𑐟 𑐳𑑄𑐖𑐫 𑐎𑐸𑐩𑐵𑐬 𑐢𑐫𑐵𑐐𑐸 𑐣𑐵𑑄 𑐄𑐮𑐶 𑐖𑑂𑐰𑑄 𑐠𑐾𑑄 𑐩𑐟𑐵𑐮, 𑐀𑐮𑐾 𑐀𑐩𑐬𑑀𑐴𑐷𑑄 𑐰𑐫𑐵𑐐𑐸 𑐦𑐶𑐮𑑂𑐩 𑐣𑐵𑑄 𑐐𑑁𑐟𑐩 𑐬𑐵𑐖𑐰𑑄𑐱 𑐢𑐎𑐵𑑅 𑐟𑐫𑐵𑐧𑐶𑐮 𑑋 𑐄𑐐𑐸 𑐂𑐮𑐫𑑂 𑐀𑐩𑐬𑑀𑐴𑐷𑑄 𑐥𑐵𑐎𑐶𑐖𑐵 𑐦𑐶𑐮𑑂𑐩 𑐡𑐫𑐾𑐎𑐵𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐀𑐩𑐬𑑀𑐴𑐷 𑐥𑐵𑐎𑐶𑐖𑐵 𑐦𑐶𑐮𑑂𑐩𑐫𑑂 𑐠𑐸𑐮𑐶 𑐜𑐸𑐧𑐾 𑐖𑐸𑐮 𑐎𑐶 𑐰𑑄 𑐳𑑄𑐖𑐷𑐰𑐫𑐵𑐟 𑐎𑐫𑐵𑑅 𑐡𑐫𑐾𑐎𑐾𑐢𑐵𑑅𑐐𑐸 𑐦𑐶𑐮𑑂𑐩𑐫𑐵 𑐕𑐸𑑄 𑐱𑐚𑑂𑐳 𑐳𑐸𑐚𑐶𑐒𑑂𑐐 𑐫𑐵𑐣𑐵𑑅 𑐀𑐠𑐾𑑄 𑐟𑑂𑐰𑑅𑐟𑐵𑐧𑐶𑐮 𑑋 𑐠𑑂𑐰 𑐮𑑂𑐫𑐵𑐏𑑄 𑐐𑑁𑐟𑐩 𑐬𑐵𑐖𑐰𑑄𑐱 𑐢𑐫𑐵𑐐𑐸 𑐣𑐵𑑄 𑐣𑑄 𑐰𑐫𑐵𑐐𑐸 𑐣𑐶𑑄𑐟𑐶𑑄 𑐄𑐮𑐶 𑐦𑐵𑐥𑐾 𑐩𑐖𑐸𑐮 𑑋
𑐠𑑂𑐰𑐴𑐾 𑐡𑐠𑐸𑐂 𑐳𑐣𑑂 𑑑𑑙𑑖𑑔 𑐂 𑐰𑑅𑐐𑐸 ‘𑐡𑑀𑐳𑑂𑐟𑐷’ 𑐦𑐶𑐮𑑂𑐩 𑐳𑐸𑐥𑐬𑐴𑐶𑐚 𑐖𑐸𑐮, 𑐀𑐮𑐾 𑐠𑐸𑐎𑐶𑐫𑐵 𑐕𑐩𑑂𑐴 𑐴𑐶𑐬𑑀 𑐳𑑄𑐖𑐫 𑐏𑐵𑐣 𑐟𑐳𑐎𑑄 𑐮𑑀𑐎𑑄 𑐴𑑂𑐰𑐵𑐟 𑑋 𑐳𑑄𑐖𑐫 𑐏𑐵𑐣𑐫𑐵 𑐣𑑂𑐴𑑂𑐫𑑅𑐣𑐾 𑐳𑑄𑐖𑐫 𑐎𑐸𑐩𑐵𑐬 𑐢𑐫𑐵𑐐𑐸 𑐣𑐵𑑄 𑐔𑐮𑐾 𑐖𑐸𑐂𑐐𑐸 𑐏𑐣𑐾𑐩𑑄𑐟 𑑋 𑐀𑐠𑐾 𑐖𑐹𑐧𑐮𑐫𑑂 𑐴𑐬𑐶𑐴𑐬 𑐖𑐾𑐛𑐵𑐮𑐵𑐮𑑄 𑐠𑑅 𑐠𑐶𑐊𑐚𑐬𑐫𑐵 𑐥𑐵𑐳𑐵𑐥𑐶𑑄𑐮𑐶𑐳𑐾 𑐳𑐮𑑂𑐴𑐵 𑐫𑐵𑐣𑐵𑑅 𑐳𑑄𑐖𑐷𑐰 𑐎𑐸𑐩𑐵𑐬 𑐢𑐎𑐵𑑅 𑐣𑐵𑑄 𑐟𑐮 𑑋 𑐳𑑄𑐖𑐷𑐰 𑐎𑐸𑐩𑐵𑐬𑐫𑐵 𑐣𑐵𑐩𑑄 𑐳𑐣𑑂 𑑑𑑙𑑖𑑕 𑐂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐦𑐶𑐮𑑂𑐩 ‘𑐣𑐶𑐱𑐵𑐣’ 𑐥𑐶𑐡𑐣 𑑋 𑐟𑐬 𑐠𑑂𑐰 𑐦𑐶𑐮𑑂𑐩𑑄 𑐰𑐫𑐵𑐟 𑐦𑐵𑐂𑐡𑐵 𑐩𑐖𑐸𑐮 𑑋

𑐳𑐣𑑂 𑑑𑑙𑑖𑑘 𑐂 𑐰𑑅𑐐𑐸 𑐳𑑄𑐑𑐬𑑂𑐲 𑐦𑐶𑐮𑑂𑐩𑐫𑑂 𑐳𑑄𑐖𑐷𑐰 𑐎𑐸𑐩𑐵𑐬 𑐡𑐶𑐮𑐶𑐥 𑐎𑐸𑐩𑐵𑐬𑐫𑐵 𑐣𑑂𑐴𑑂𑐫𑑅𑐣𑐾 𑐠𑑅𑐐𑐸 𑐱𑐵𑐣𑐡𑐵𑐬 𑐀𑐨𑐶𑐣𑐫 𑐣𑑂𑐴𑑂𑐫𑐧𑑂𑐰𑐮 𑑋 𑐠𑑂𑐰 𑐦𑐶𑐮𑑂𑐩 𑐮𑐶𑐥𑐵 𑐰𑑄 𑐮𑐶𑐦𑑅 𑐳𑑂𑐰𑐫𑐾𑐩𑑂𑐰𑐵𑑅𑐮, 𑐀𑐮𑐾 𑐩𑐾𑐐𑐸 𑐗𑐶𑑄𑐣𑑂𑐴𑐫𑑂𑐡𑑃 𑐟𑐎 𑐨𑐵𑐬𑐟𑐷𑐫 𑐦𑐶𑐮𑑂𑐩𑐫𑑂 𑐳𑐦𑐮𑐟𑐵𑐫𑐵 𑐳𑐰𑐵𑑅 𑐎𑐫𑐵𑐔𑑂𑐰𑐣 𑑋 𑐠𑑂𑐰 𑐗𑑂𑐰𑐮𑐫𑑂 𑐰𑑄 𑐧𑐎𑑂𑐳 𑐀𑐦𑐶𑐳𑐫𑑂 𑐳𑐦𑐮 𑐖𑐸𑐂𑐐𑐸 𑐦𑐶𑐮𑑂𑐩 𑐖𑐎 𑐩𑐏𑐸 𑐮𑐷𑐎𑑄 𑐥𑐶𑐴𑐵𑑄 𑐰𑐣𑐵𑑅 𑐐𑐖𑐧 𑐐𑐖𑐧𑐫𑐵𑐐𑐸 𑐦𑐶𑐮𑑂𑐩 𑐩𑑂𑐴𑐶𑐟𑐮, 𑐐𑐸𑐐𑐸 𑐦𑐶𑐮𑑂𑐩 𑐢𑐵𑐠𑐾𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐄𑐐𑐸 𑐃 𑐳𑑂𑐰𑐫𑐵𑑄 𑐟𑐳𑐎𑑄 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑑅𑐰𑑄𑐐𑐸 𑐦𑐶𑐮𑑂𑐩𑐟 𑐏𑑅 𑑋

𑐳𑐣𑑂 𑑑𑑙𑑗𑑐 𑐂 𑐥𑐶𑐡𑑄𑐐𑐸 ‘𑐏𑐶𑐮𑑁𑐣𑐵’ 𑐦𑐶𑐮𑑂𑐩𑐫𑑂 𑐩𑐵𑐣𑐳𑐶𑐎 𑐮𑑂𑐰𑐐𑐶𑐫𑐵 𑐨𑐹𑐩𑐶𑐎𑐵𑑄 𑐰𑐫𑐵𑐟 𑐟𑑅𑐢𑑄𑐐𑐸 𑐣𑐵𑑄 𑐧𑐶𑐮, 𑐀𑐮𑐾 𑐳𑐣𑑂 𑑑𑑙𑑗𑑒 𑐫𑑂 𑐥𑐶𑐡𑑄𑐐𑐸 ‘𑐎𑑀𑐱𑐶𑐱’ 𑐦𑐶𑐮𑑂𑐩𑐫𑑂 𑐣𑐰𑐵𑐫𑐾 𑐩𑐦𑐸𑐩𑑂𑐴 𑐮𑐵𑐚𑐵𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑑅 𑐠𑑅𑐐𑐸 𑐩𑐶𑐏𑐵𑑄 𑐖𑐎 𑐖𑐵𑐡𑐹𑐂 𑐀𑐨𑐶𑐣𑐫 𑐣𑑂𑐴𑑂𑐫𑐧𑑂𑐰𑐮 𑑋

𑐠𑑅𑐐𑐸 𑐦𑐶𑐮𑑂𑐩 𑐎𑑂𑐫𑐵𑐬𑐶𑐫𑐬𑐫𑐵 𑐗𑑂𑐰𑐮𑐫𑑂 𑐳𑑄𑐖𑐷𑐰 𑐎𑐸𑐩𑐵𑐬 𑐠𑑅𑐟 𑐐𑐸𑐧𑐮𑐾𑑄 𑐣𑑄 𑐕𑐐𑐹 𑐨𑐹𑐩𑐶𑐎𑐵 𑐔𑐶𑐣𑐵𑐟𑐫𑐾𑐐𑐸 𑐩𑐫𑐵𑑅 𑑋 𑐰𑑄 𑐠𑑅𑐐𑐸 𑐂𑐩𑐾𑐖𑐫𑐵𑐟 𑐰𑐵𑐳𑑂𑐟𑐵 𑐩𑐫𑐵𑐳𑐾 𑐰𑐶𑐰𑐶𑐢 𑐎𑐠𑑄𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑑅 𑐎𑑂𑐫𑐣 𑑋 𑐕𑐐𑐹 𑐂𑐮𑐫𑑂 𑐮𑐵 ‘𑐀𑐣𑐵𑐩𑐶𑐎𑐵’𑐫𑑂 𑐰𑑄 𑐖𑐫𑐵 𑐨𑐵𑐡𑐸𑐜𑐷𑐫𑐵 𑐥𑑂𑐬𑐾𑐩𑐷 𑐖𑐸𑐫𑐵𑑅 𑐩𑑂𑐴𑐶𑐟𑐮𑐳𑐵 𑐰 𑐴𑐾 𑐂𑐮𑐫𑑂 ‘𑐥𑐬𑐶𑐔𑐫’ 𑐦𑐶𑐮𑑂𑐩𑐫𑑂 𑐖𑐫𑐵 𑐨𑐵𑐡𑐸𑐜𑐷𑐫𑐵 𑐴𑐾 𑐀𑐧𑐸𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐧𑐶𑐮 𑑋 𑐄𑐮𑐶 𑐖𑐎 𑐩𑐏𑐸 𑐱𑑀𑐮𑐾 𑐦𑐶𑐮𑑂𑐩𑐫𑑂 𑐖𑐫𑐵 𑐨𑐵𑐡𑐸𑐜𑐷𑐫𑐵 𑐳𑐳𑑅 𑐀𑐧𑐸𑐫𑐵 𑐨𑐹𑐩𑐶𑐎𑐵𑐫𑑂 𑐏𑐣𑐾𑐡𑐫𑐾𑐎𑑅 𑐰𑐮 𑑋

𑐟𑑂𑐬𑐶𑐱𑐸𑐮 𑐰 𑐱𑑀𑐮 𑐠𑐾𑑄𑐖𑑂𑐫𑐵𑑅𑐐𑐸 𑐩𑐮𑑂𑐚𑐶𑐳𑑂𑐚𑐵𑐬 𑐦𑐶𑐮𑑂𑐩𑐫𑑂 𑐠𑑅𑐐𑐸 𑐀𑐨𑐶𑐣𑐫𑑄 𑐡𑐬𑑂𑐱𑐎𑐟𑐫𑑂𑐟 𑐩𑑀𑐴𑐶𑐟 𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐰𑑄 𑐩𑐾𑐏𑐾 ‘𑐣𑐂 𑐡𑐶𑐣 𑐣𑐂 𑐬𑐵𑐟’ 𑐠𑐾𑑄𑐖𑑂𑐫𑐵𑑅𑐐𑐸 𑐕𑐐𑐹 𑐦𑐶𑐮𑑂𑐩𑐫𑑂 𑐐𑐸𑑄𑐐𑐹 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑑅 𑐳𑐎𑐳𑐶𑐟𑑄 𑐀𑐖𑐹 𑐔𑐵𑐫𑐾𑐎𑐵𑐧𑐶𑐮 𑑋 𑐳𑐣𑑂 𑑑𑑙𑑗𑑗 𑐫𑑂 𑐳𑐟𑑂𑐫𑐖𑐷𑐰𑐟 𑐬𑐾𑐫𑐵 ‘𑐱𑐟𑐬𑑄𑐖 𑐎𑐾 𑐏𑐶𑐮𑐵𑐜𑐷’ 𑐠𑐾𑑄𑐖𑑂𑐫𑐵𑑅𑐐𑐸 𑐦𑐶𑐮𑑂𑐩𑐫𑑂 𑐟𑐳𑐎𑑄 𑐩𑑂𑐴𑑀 𑐖𑐎 𑐢𑑂𑐫𑐧𑐵 𑐎𑐫𑐵𑑅 𑐩𑑂𑐴𑐶𑐟𑐮 𑑋 𑐀𑐮𑐾 ‘𑐀𑑄𑐐𑐹𑐬’ 𑐠𑐾𑑄𑐖𑑂𑐫𑐵𑑅𑐐𑐸 𑐐𑐖𑑂𑐖𑐧𑐫𑐵 𑐎𑐩𑐾𑐜𑐷 𑐦𑐶𑐮𑑂𑐩𑐫𑑂 𑐣𑑄 𑐏𑐣𑐾𑐡𑐫𑐾𑐎𑑅 𑐰𑐮 𑑋

𑐳𑐣𑑂 𑑑𑑙𑑖𑑐 𑐣𑐶𑐳𑐾𑑄 𑑑𑑙𑑘𑑕 𑐟𑐎𑐫𑐵 𑑒𑑕 𑐡𑑃𑐫𑐵 𑐦𑐶𑐮𑑂𑐩𑐷 𑐎𑑂𑐫𑐵𑐬𑐶𑐫𑐬𑐫𑑂 𑐳𑑄𑐖𑐷𑐰 𑐎𑐸𑐩𑐵𑐬𑑄 𑑑𑑕𑑓 𑐐𑐹 𑐦𑐶𑐮𑑂𑐩𑐫𑑂 𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐧𑐷 𑐐𑑂𑐬𑐾𑐜𑐫𑐵 𑐦𑐶𑐮𑑂𑐩𑑄 𑐡𑐸𑐴𑐵𑑄 𑐰𑑅𑐩𑑂𑐴 𑐰𑑄 ‘𑐡𑐳𑑂𑐟𑐎’ 𑐰 ‘𑐎𑑀𑐱𑐶𑐱’ 𑐦𑐶𑐮𑑂𑐩𑐫𑐵 𑐣𑐶𑑄𑐟𑐶𑑄 𑐬𑐵𑐲𑑂𑐚𑑂𑐬𑐶𑐫 𑐥𑐸𑐬𑐳𑑂𑐎𑐵𑐬 𑐣𑑄 𑐟𑑂𑐫𑐵𑐎𑐮 𑑋

𑐠𑑅𑐐𑐸 𑐦𑐶𑐮𑑂𑐩𑐷 𑐖𑐷𑐰𑐣𑐫𑐵 𑐂𑐮𑐫𑑂 𑐳𑑄𑐖𑐷𑐰 𑐎𑐸𑐩𑐵𑐬𑐫𑐵 𑐣𑐵𑑄 𑐣𑐹𑐟𑐣, 𑐴𑐾𑐩𑐵 𑐩𑐵𑐮𑐶𑐣𑐷, 𑐳𑐸𑐮𑐎𑑂𑐲𑐞 𑐥𑑄𑐜𑐷𑐟 𑐠𑐾𑑄𑐖𑑂𑐫𑐵𑑅𑐥𑐶𑐣𑐶 𑐀𑐨𑐶𑐣𑐾𑐟𑑂𑐬𑐷𑐟𑐫𑑂 𑐮𑐶𑐳𑐾 𑐮𑐨 𑐀𑐦𑐾𑐫𑐬𑐫𑐵 𑐔𑐬𑑂𑐔𑐵 𑐣𑑄 𑐖𑐸𑐮, 𑐟𑐬 𑐰𑑄 𑐳𑐸𑐫𑐵𑐮𑐶𑐳𑐾 𑐣𑑄 𑐧𑑂𑐫𑐵𑐴𑐵 𑐩𑐫𑐵𑑅 𑑋 𑐦𑐶𑐮𑑂𑐩 𑐏𑑂𑐫𑐮𑐫𑑂 𑐟𑑅𑐢𑑄𑐐𑐸 𑐳𑐦𑐮𑐟𑐵 𑐔𑐹𑐮𑐵𑐎𑐹𑐳𑐵𑑄 𑐥𑑂𑐬𑐾𑐩 𑐳𑐩𑑂𑐧𑐣𑑂𑐢𑐫𑑂 𑐢𑐵𑑅𑐳𑐵 𑐰 𑐀𑐳𑐦𑐮 𑐴𑐾 𑐖𑐸𑐮, 𑐀𑐮𑐾 𑐠𑑅𑐐𑐸 𑐫𑐵𑐎𑑅 𑐖𑐶𑐣𑑂𑐡𑐐𑐷 𑐩𑑂𑐰𑐵𑐫𑐾𑐐𑐸 𑐗𑑂𑐰𑐮𑐫𑑂 𑐰 𑐀𑐫𑑂𑐮𑐵𑑅𑐫𑐵 𑐣𑐱𑐵𑐫𑑂 𑐡𑐸𑐧𑐶𑐄𑐐𑐸 𑐰𑐣 𑑋

𑐳𑑄𑐖𑐷𑐰 𑐎𑐸𑐩𑐵𑐬 𑐣𑑂𑐴𑐵𑐥𑐵𑑄 𑐣𑐶𑐳𑐾𑑄 𑐴𑐾 𑐣𑐸𑐐𑑅𑐔𑐹 𑐳𑐩𑑂𑐧𑐣𑑂𑐢𑐷 𑐮𑑂𑐰𑐔𑑄 𑐐𑑂𑐬𑐳𑑂𑐟𑐩𑑂𑐴 𑐖𑐸𑐫𑐵𑐔𑑂𑐰𑐣 𑑋 𑐀𑐫𑑂𑐮𑐵𑑅𑐫𑐵 𑐣𑐱𑐵𑑄 𑐰𑐫𑐵𑐐𑐸 𑐮𑑂𑐰𑐫𑑂 𑐗𑐣 𑐟𑐔𑑂𑐰𑐫𑐾𑐎𑐵𑐧𑐶𑐮, 𑐀𑐮𑐾 𑑓𑑗 𑐡𑑃 𑐖𑐎 𑐡𑐸𑐧𑐮𑐫𑑂 𑐴𑐾 𑐰𑐫𑐵𑐟 𑐣𑑂𑐴𑐵𑐥𑐵𑑄𑐐𑐸 𑐴𑐺𑐡𑐫𑐑𑐵𑐟 𑐖𑐸𑐮 𑑋 𑐀𑐫𑑂𑐳𑐵𑑄 𑐰𑑄 𑐠𑑅𑐐𑐸 𑐖𑐷𑐰𑐣𑐱𑐿𑐮𑐷 𑐩𑐴𑐶𑐄, 𑐐𑐸𑐎𑐶𑑄 𑐫𑐵𑐣𑐵𑑅 𑐫𑐵𑐎𑐣𑑄 𑐴𑐾 𑐰𑐫𑐵𑐟 𑐣𑐶𑐎𑑂𑐰𑑅𑐐𑐸 𑐴𑐺𑐡𑐫𑐑𑐵𑐚 𑐖𑐸𑐮 𑑋 𑐠𑑂𑐰 𑐮𑐶𑐥𑐵 𑐀𑐩𑐾𑐬𑐶𑐎𑐵 𑐰𑐣𑐵𑑅 𑐌𑐥𑐣 𑐴𑐵𑐬𑑂𑐚 𑐳𑐬𑑂𑐖𑐬𑐷 𑐫𑐵𑐎𑐮 𑑋

𑐀𑐩𑐾𑐬𑐶𑐎𑐵𑑄 𑐮𑐶𑐴𑐵𑑄 𑐰𑐫𑐾𑐢𑐸𑑄𑐎𑐵𑑅 𑐁𑑅 𑐥𑐹𑐰𑑄𑐎 𑐛𑐷𑐎 𑐖𑐸𑐂𑐐𑐸 𑐁𑐱𑐵 𑐫𑐵𑐣𑐵𑐟𑑅𑐐𑐸 𑐏𑑅, 𑐟𑐬 𑐰𑐶𑐬𑐵𑐩𑐷 𑐖𑐹𑐐𑐸𑐮𑐶𑑄 𑐠𑐵𑐣𑐵𑐔𑑂𑐰𑑄𑐐𑐸 𑐖𑑂𑐫𑐵 𑐥𑐹𑐰𑑄𑐎𑐾𑐩𑐵𑑅𑐐𑐸 𑐰 𑐣𑐶𑐬𑑂𑐩𑐵𑐟𑐵𑐟𑐫𑑂𑐳𑑄 𑐴𑐾 𑐖𑑂𑐫𑐵𑐫𑑂 𑐮𑐶𑐴𑐵𑑄 𑐰𑐫𑐾𑐟 𑐫𑐵𑐣𑐵𑐔𑑂𑐰𑑄𑐐𑐸 𑐂𑐣𑐵𑐥 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐳𑑄𑐖𑐷𑐰 𑐎𑐸𑐩𑐵𑐬 𑐧𑐵𑑄𑐮𑐵𑐎 𑐁𑐬𑐵𑐩 𑐴𑐾 𑐩𑐎𑐵𑐳𑐾 𑐖𑑂𑐫𑐵𑐫𑑂 𑐮𑐶𑐴𑐵𑑄 𑐰𑐣 𑑋 𑐧𑐵𑐂𑐥𑐵𑐳 𑐳𑐬𑑂𑐖𑐬𑐷 𑐫𑐵𑐣𑐵𑑅 𑐐𑐵𑐎𑑂𑐎 𑐁𑐬𑐵𑐩 𑐟𑐎𑑄 𑐎𑐵𑐫𑐾𑐩𑐏𑑄𑐐𑐸𑐮𑐶𑑄 𑐰𑐫𑐵𑐐𑐸 𑐖𑑂𑐫𑐵𑐣 𑐴𑐾 𑐎𑐵𑐮 𑑋 𑐳𑐣𑑂 𑑑𑑙𑑘𑑕 𑐫𑐵 𑐣𑑀𑐨𑐾𑐩𑑂𑐧𑐬 𑑖 𑐎𑐸𑐣𑑂𑐴𑐸 𑐣𑑂𑐫𑐵𑐡𑑃 𑐣𑑂𑐴𑑂𑐫𑑅 𑐰𑐫𑐵 𑐩𑐵𑑄 𑐩𑐡𑐸𑐐𑐸 𑐴𑐾 𑐣𑑂𑐴𑐶 𑐎𑐸𑐣𑑂𑐴𑐸 𑐮𑐵𑐎𑐵 𑐰𑑄 𑐠𑑂𑐰 𑐳𑑄𑐳𑐵𑐬 𑐟𑑂𑐰𑑅𑐟𑐵 𑐰𑐣 𑑋

𑐠𑑅𑐐𑐸 𑐖𑑂𑐫𑐵𑑄 𑐐𑐸𑐧𑐮𑐾𑑄 𑐟𑑂𑐫𑐵𑐣𑑂𑐣𑐸 𑐩𑐔𑐵𑑅𑐩𑑂𑐴 𑐳𑑄𑐖𑐷𑐰 𑐎𑐸𑐩𑐵𑐬 𑐖𑐷𑐰𑐣𑐷𑐫𑐵𑐟 𑐎𑐫𑐵𑑅 𑐕𑐸𑑄 𑐃 𑐣𑑂𑐴𑑂𑐫𑐰 𑐖𑐎 𑐕𑐐𑐹 𑐳𑐦𑐹 𑐥𑐶𑐴𑐵𑑄 𑐰𑑅𑐐𑐸 𑐡𑐸 𑑋 ‘𑐊𑐣 𑐊𑐎𑑂𑐚𑐬𑑂𑐳 𑐊𑐎𑑂𑐚𑐬’ 𑐣𑐵𑑄𑐫𑐵 𑐠𑑂𑐰 𑐳𑐦𑐹 𑐴𑐣𑐷𑐦 𑐖𑐵𑐰𑐾𑐬𑐷 𑐰 𑐳𑐸𑐩𑑄𑐟 𑐧𑐟𑑂𑐬𑐵𑑄 𑐔𑑂𑐰𑑅𑐐𑐸 𑐏𑑅 𑑋 𑐠𑑂𑐰 𑐳𑐦𑐹𑐫𑐵 𑐣𑐶𑑄𑐟𑐶𑑄 𑐀𑐣𑑂𑐟𑐬𑑂𑐰𑐵𑐬𑑂𑐟𑐵 𑐎𑐵𑐫𑐾𑐐𑐸 𑐗𑑂𑐰𑐮𑐫𑑂 𑐳𑑄𑐖𑐷𑐰 𑐎𑐸𑐩𑐵𑐬𑐫𑐵 𑐕𑐩𑑂𑐴 𑐥𑐵𑐳𑐵 𑐰 𑐎𑐮𑐵𑐎𑐵𑐬 𑐡𑐶𑐣𑐾𑐱 𑐴𑐶𑑄𑐐𑐹 𑐄𑐩𑐶𑐟 𑐢𑐵𑑅𑐐𑐸 𑐏𑑅 ‘𑐫𑐡𑐶 𑐰𑑄 𑐧𑑂𑐫𑐵𑐴𑐵 𑐫𑐵𑑅𑐐𑐸 𑐖𑐹𑐳𑐵 𑐁𑑅𑐟𑐎𑑄 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐏𑐂 𑑋 𑐰𑑄 𑐁𑐬𑐵𑐩 𑐢𑐫𑐵𑐐𑐸 𑐴𑐾 𑐫𑐵𑐫𑐾𑐩𑐳𑑅 𑑋 𑐧𑐵𑐂𑐥𑐵𑐳 𑐳𑐬𑑂𑐖𑐬𑐷 𑐮𑐶𑐥𑐵 𑐣𑑄 𑐮𑐐𑐵𑐟𑐵𑐬 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣 𑑋 𑐦𑐶𑐮𑑂𑐩 𑐣𑐶𑐬𑑂𑐩𑐵𑐟𑐵𑐟 𑐣𑑄 𑐰𑐫𑐵𑐐𑐸 𑐣𑐶𑐢𑐣𑐫𑐵 𑐖𑐶𑐩𑑂𑐩𑐾𑐰𑐵𑐬 𑐏𑑅 𑑋’

𑐊𑐖𑐾𑐣𑑂𑐳𑐷𑐫𑐵 𑐐𑑂𑐰𑐵𑐴𑐵𑐮𑐶𑑄

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS