Read news in NepalBhasa text-- www.hamroschool.com BACK 𑐄𑐦𑑂 ! 𑐐𑑂𑐫𑐵𑐳𑐾𑑄 𑐰𑐂 ! – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐄𑐦𑑂 ! 𑐐𑑂𑐫𑐵𑐳𑐾𑑄 𑐰𑐂 !

𑐰𑐬𑑂𑐟𑐩𑐵𑐣 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐧𑐾𑐮𑐵𑐫𑐟 𑐨𑑂𑐬𑐩𑐞𑑄 𑐮𑐶𑐴𑐵𑑄 𑐰𑐂 𑑋 𑐏𑐸𑐮𑐵𑐳𑐵 𑐫𑐵𑐂 𑑋 𑐖𑐶𑐐𑐸 𑐰 𑐥𑑂𑐬𑐔𑐞𑑂𑐜𑐫𑐵 𑐴𑐳𑑂𑐟𑐵𑐎𑑂𑐲𑐬 𑐡𑐸𑐐𑐸 𑐥𑑁 𑐔𑑂𑐰𑐫𑐵𑑅 𑐳𑐩𑑂𑐧𑐣𑑂𑐢𑐶𑐟 𑐠𑐵𑐳𑐫𑑂 𑐊𑐩𑐳𑐷𑐳𑐷 𑐳𑑂𑐰𑐷𑐎𑐵𑐬 𑐫𑐵𑐣𑐵𑐐𑐸 𑐳𑐸𑐔𑑄 𑐧𑐷 𑐢𑐸𑐣 𑑋 𑐟𑐬 𑑋 𑐥𑑂𑐬𑐩 𑐡𑐾𑐄𑐰𑐵𑑄 𑐠𑐖𑑂𑐫𑐵𑑅𑐐𑐸 𑐏𑐸𑐮𑐵𑐫𑐵 𑐕𑐸 𑐫𑐵𑐂 𑐨𑐵𑐖𑐸 𑐥𑑂𑐬𑐔𑐞𑑂𑐜 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐠𑑂𑐰 𑐢𑐵𑐥𑐹 𑐐𑐮𑐟 𑐏𑑅 𑑋 𑐳𑐟𑑂𑐫 𑐩𑐏𑐸 𑑋 𑐖𑐶𑑄 𑐠𑐖𑑂𑐫𑐵𑑅𑐐𑐸 𑐁𑐱𑐫𑐫𑐵 𑐐𑐸𑐐𑐸𑑄 𑐥𑐟𑑂𑐬𑐫𑑂 𑐴𑐳𑑂𑐟𑐵𑐎𑑂𑐲𑐬 𑐫𑐵𑐣𑐵𑐐𑐸 𑐩𑐡𑐸 𑑋 𑐟𑐟𑑂𑐎𑐵𑐮 𑐏𑐞𑑂𑐜𑐣 𑐫𑐵𑐂 𑑋 𑐠𑐣 𑐊𑐩𑐳𑐷𑐳𑐷 𑐧𑐵𑐬𑐾 𑐔𑐬𑑂𑐔𑐵 𑐖𑐸𑐂𑐟𑑂𑐫𑑄𑐐𑐸 𑐩𑐏𑐸 𑑋 𑐡𑐾𑐄𑐰𑐵𑐖𑐸𑐫𑐵 𑐏𑐸𑐮𑐵𑐳𑐵 𑐰 𑐨𑐵𑐖𑐸 𑐥𑑂𑐬𑐔𑐞𑑂𑐜𑐫𑐵 𑐏𑐞𑑂𑐜𑐣𑑄 𑐡𑐾𑐫𑑂𑐫𑐵 𑐬𑐵𑐖𑐣𑐷𑐟𑐶𑐫𑐵𑐟 𑐐𑐸𑐎𑐠𑑄 𑐠𑐸𑐂𑐎𑐾𑐐𑐸 ? 𑐐𑐸𑐐𑐸 𑐰𑐶𑐱𑐾𑐲𑐣𑑄 𑐠𑑁𑑄𑐫𑐵 𑐬𑐵𑐖𑐣𑐷𑐟𑐶𑐎 𑐥𑐬𑐶𑐳𑑂𑐠𑐶𑐟𑐶𑐫𑐵𑐟 𑐕𑐵𑐫𑑂𑐥𑐷𑐐𑐸 ? 𑐖𑐶𑐖𑑂𑐘𑐵𑐳𑐵 𑐰𑑂𑐫𑐎𑑂𑐟 𑐫𑐵𑐣𑐵𑐔𑑂𑐰𑐣𑐵𑐐𑐸 𑐏𑑅 𑑋

𑐢𑐵𑐂 𑑋 𑐡𑐾𑐄𑐰𑐵 𑐰 𑐥𑑂𑐬𑐔𑐞𑑂𑐜 𑐠𑑁𑑄𑐫𑐵 𑐐𑐛𑐧𑐣𑑂𑐢𑐣 𑐳𑐬𑐎𑐵𑐬𑐫𑐵 𑐣𑐶𑐬𑑂𑐞𑐵𑐫𑐎 𑐰𑑂𑐫𑐎𑑂𑐟𑐶𑐟𑑂𑐰 𑐏𑑅 𑑋 𑐱𑐵𑐳𑐣 𑐳𑐟𑑂𑐟𑐵𑐫𑑂 𑐟𑑅𑐢𑑄𑐐𑐸 𑐥𑐎𑐜 𑐡𑐸𑐥𑐶𑑄 𑐏𑐾𑐮𑐵𑐜𑐷𑐟 𑐏𑑅 𑑋 𑐟𑐬 𑐁𑐱𑑂𑐔𑐬𑑂𑐫 ! 𑐕𑐐𑐹 𑐴𑐾 𑐐𑐛𑐧𑐣𑑂𑐢𑐣𑐫𑐵𑐟 𑐴𑐵𑑃𑐎𑐾 𑐫𑐵𑐣𑐵𑐔𑑂𑐰𑑄𑐥𑐶𑑄 𑐣𑐶𑐩𑑂𑐴 𑐳𑐵𑐬𑐠𑐷𑐟𑐫𑑂 𑐰𑐎𑑂𑐟𑐰𑑂𑐫𑐫𑑂 𑐐𑐠𑐾 𑐀𑐣𑑂𑐟𑐬𑐰𑐶𑐬𑑀𑐢 𑐏𑐣𑐾𑐡𑐟 ? 𑐐𑐛𑐧𑐣𑑂𑐢𑐣𑐫𑐵 𑐳𑐵𑐬𑐠𑐷𑐫𑐵 𑐴𑐶𑐳𑐵𑐧𑑄 𑐣𑐶𑐩𑑂𑐴𑐾𑐳𑐶𑐫𑐵 𑐡𑐠𑐸𑐂 𑐐𑐠𑐾 𑐠𑐖𑑂𑐫𑐵𑑅𑐐𑐸 𑐰𑐶𑐥𑐬𑐶𑐟 𑐏𑑃𑐟 𑐥𑐶𑐴𑐵𑑄 𑐰𑐮 ? 𑐠𑑁𑑄𑐫𑐵 𑐬𑐵𑐖𑐣𑐷𑐟𑐶𑐫𑐵𑐟 𑐠𑐸𑐎𑐶𑑄 𑐟𑑅𑐢𑑄𑐐𑐸 𑐬𑐴𑐳𑑂𑐫𑐫𑐵 𑐰𑐶𑐲𑐫 𑐫𑐵𑐣𑐵 𑐧𑐶𑐄𑐐𑐸 𑐡𑐸 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐠𑐾𑑄𑐖𑑂𑐫𑐵𑑅𑐩𑑂𑐴 𑐡𑐾𑐫𑑂𑐫𑐵 𑐄𑐔𑑂𑐔 𑐥𑐡𑐫𑑂 𑐔𑑂𑐰𑐣𑐵𑐔𑑂𑐰𑑄𑐩𑑂𑐴 𑐰𑑂𑐫𑐎𑑂𑐟𑐶𑑄 𑐢𑐵𑑅𑐐𑐸 𑐏𑑃𑐫𑐵𑐟 𑐗𑐹𑐛 𑐐𑐠𑐾 𑐫𑐵𑐣𑐵𑑅 𑐏𑑄𑐎𑐾𑐐𑐸 ? 𑐕𑐠𑑂𑐰𑑅 𑐩𑐣𑐹𑐟𑐫𑑂𑐳𑑄 𑐣𑑂𑐴𑑂𑐫𑐳𑑅 𑐟𑐂 𑑋

𑐀𑐠𑐾 𑐴𑐾 𑐡𑐾𑐱𑐫𑑂 𑐐𑐛𑐧𑐣𑑂𑐢𑐣 𑐳𑐬𑐎𑐵𑐬𑐫𑐵 𑐥𑑂𑐬𑐩𑐸𑐏 𑐫𑑀𑐖𑐣𑐵𑐎𑐵𑐬 𑐨𑐵𑐖𑐸 𑐥𑑂𑐬𑐔𑐞𑑂𑐜𑑄 𑐫𑐵𑑅𑐐𑐸 𑐏𑐞𑑂𑐜𑐣𑐫𑐵𑐟 𑐣𑑄 𑐴𑐮𑐸𑐎𑐵𑐎𑐠𑑄 𑐎𑐵𑐫𑐾𑐐𑐸 𑐳𑑂𑐠𑐶𑐟𑐶 𑐩𑐡𑐸 𑑋 𑐡𑐾𑐫𑑂𑐫𑐵 𑐖𑐶𑐩𑑂𑐩𑐾𑐰𑐵𑐬𑐷 𑐥𑐡𑐵𑐳𑐶𑐣 𑐣𑐾𑐟𑐵𑐟𑐫𑑂𑐳𑑄 𑐡𑐾𑐫𑑂𑐫𑐵 𑐐𑐩𑑂𑐨𑐶𑐬 𑐰𑐶𑐲𑐫𑐫𑑂 𑐠𑑅𑐠𑑅𑐐𑐸 𑐢𑐵𑐬𑐞𑐵 𑐳𑑂𑐥𑐲𑑂𑐚 𑐫𑐵𑐫𑐾𑐩𑐵𑑅 𑑋 𑐰𑐵𑐎 𑐔𑐟𑐸¥𑐫𑐵𑐂𑑃 𑐕𑑂𑐫𑐮𑐵𑑅 𑐖𑐣𑐟𑐵𑐫𑐵𑐟 𑐔𑑂𑐫𑐵𑐩𑑂𑐥𑐟𑐶𑐫𑐵𑐟 𑐠𑐾𑑄 𑐔𑐵𑑅𑐴𑐶𑐂𑐎𑐵𑑅 𑐬𑐩𑐶𑐟𑐵 𑐫𑐵𑐫𑐾𑐟 𑐳𑑂𑐰𑐫𑐾 𑐩𑐖𑐶𑐄 𑑋 𑐠𑐸𑐎𑐶𑑄 𑐡𑐾𑐫𑑂𑐫𑐵 𑐬𑐵𑐖𑐣𑐷𑐟𑐶𑑄 𑐟𑑅𑐢𑑄𑐐𑐸 𑐩𑐹𑐮𑑂𑐫 𑐔𑐸𑐎𑐾 𑐫𑐵𑐫𑐾 𑐩𑐵𑐮𑐾𑐦𑐸 𑑋 𑐂𑐮𑐫𑑂 𑐰𑑂𑐫𑐮𑐫𑑂 𑐕𑐏𑐾𑐬 𑐊𑐩𑐳𑐷𑐳𑐷 𑐧𑐵𑐬𑐾 𑐨𑐵𑐖𑐸 𑐥𑑂𑐬𑐔𑐞𑑂𑐜𑑄 𑐬𑐵𑐲𑑂𑐚𑑂𑐬𑐶𑐫 𑐳𑐴𑐩𑐟𑐶𑐫𑐵 𑐏𑑃 𑐴𑐂 𑑋 𑐩𑐾𑐏𑐾𑐬 𑐥𑑂𑐬𑐔𑐞𑑂𑐜𑐫𑐵 𑐡𑐮𑐫𑐵 𑐀𑐢𑐶𑐎𑐵𑑄𑐱 𑐣𑐾𑐟𑐵𑐟𑐫𑑂𑐳𑑄 𑐊𑐩𑐳𑐷𑐳𑐷𑐫𑐵𑐟 𑐐𑐸𑐐𑐸𑑄 𑐴𑐵𑐮𑐟𑐫𑑂 𑐳𑐩𑐬𑑂𑐠𑐣 𑐫𑐵𑐫𑐾 𑐩𑐦𑐂𑐐𑐸 𑐏𑑃 𑐰𑑂𑐫𑐎𑑂𑐟 𑐫𑐵𑐣𑐵𑐔𑑂𑐰𑐣𑐷 𑑋 𑐖𑐧 𑐠𑑅𑐐𑐸 𑐡𑐮𑐫𑐵 𑐀𑐢𑐶𑐎𑐵𑑄𑐱 𑐣𑐾𑐟𑐵𑐟𑐫𑑂𑐳𑑄 𑐊𑐩𑐳𑐷𑐳𑐷 𑐳𑑂𑐰𑐷𑐎𑐵𑐬𑑂𑐫 𑐩𑐖𑐸𑐂𑐐𑐸 𑐏𑑃 𑐐𑐸𑐐𑐸𑑄 𑐏𑑀𑐮 𑐩𑐟𑐳𑐾 𑐥𑑂𑐰𑑄𑐎𑐷, 𑐀𑐮𑐾 𑐰 𑐴𑐾 𑐡𑐮𑐫𑐵 𑐱𑐷𑐬𑑂𑐲𑐳𑑂𑐠 𑐣𑐾𑐟𑐵 ‘𑐬𑐵𑐲𑑂𑐚𑑂𑐬𑐶𑐫 𑐳𑐴𑐩𑐟𑐶’𑐫𑐵 𑐏𑑀𑐮 𑐟𑐫𑐵𑑅 𑐠𑑅𑐐𑐸 𑐢𑐵𑐬𑐞𑐵𑐫𑐵𑐟 𑐬𑐴𑐳𑑂𑐫𑐩𑐫 𑐫𑐵𑐣𑐵 𑐎𑑂𑐫𑐣𑐷 𑑋 𑐊𑐩𑐳𑐷𑐳𑐷𑐫𑐵𑐟 𑐎𑐫𑐵𑑅 𑐳𑑂𑐰𑐫𑑄 𑐳𑐟𑑂𑐟𑐵𑐳𑐶𑐣 𑐣𑐾𑐟𑐵𑐟𑐫𑑂𑐳𑑄 𑐠𑑅𑐠𑑅𑐐𑐸 𑐥𑐴𑐮𑑄 𑐨𑐖𑐣 𑐴𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐟𑐵 𑐧𑐵𑐧𑐸𑐬𑐵𑐩𑑄 𑐢𑐵𑐂 𑐊𑐩𑐳𑐷𑐳𑐷 𑐣𑐾𑐥𑐵𑐮𑑄 𑐳𑑂𑐰𑐷𑐎𑐵𑐬 𑐫𑐵𑐫𑐾𑐩𑐵𑑅 𑑋 𑐫𑐵𑑅𑐳𑐵 𑐣𑐾𑐥𑐵𑑅 𑐳𑐶𑑄𑐐𑐵𑐥𑐸𑐬 𑐠𑐾𑑄 𑐗𑑅 𑐗𑑅 𑐢𑐵𑐂, 𑐩𑐫𑐵𑑅𑐳𑐵 𑐀𑐦𑐐𑐵𑐣𑐶𑐳𑑂𑐟𑐵𑐣 𑐠𑐾𑑄 𑐢𑑂𑐰𑐳𑑂𑐟 𑐖𑐸𑐂 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐾𑐄𑐰𑐵𑑄 𑐮𑐵 𑐳𑐡𑐣𑑄 𑐀𑐣𑐸𑐩𑑀𑐡𑐶𑐟 𑐖𑐸𑐂 𑑋 𑐱𑑄𑐎𑐵 𑐫𑐵𑐫𑐾𑐩𑑂𑐰𑐵𑑅 𑑋 𑐢𑐸𑐎𑑂𑐎 𑐖𑐸 𑐢𑐵𑐂 𑑋 𑐩𑐵𑐢𑐰𑐖𑐸𑐫𑐵 𑐳𑐩𑐵𑐖𑐰𑐵𑐡𑐷 𑐡𑐮𑐫𑐵 𑐣𑐾𑐟𑐵 𑐗𑐮𑐣𑐵𑐠 𑐏𑐣𑐵𑐮𑐖𑐸𑑄 𑐊𑐩𑐳𑐷𑐳𑐷 𑐡𑐾𑐫𑑂𑐫𑐵 𑐴𑐷𑐟𑐫𑐵 𑐥𑐎𑑂𑐲𑐫𑑂 𑐩𑐡𑐸𑐐𑐸 𑐏𑑃 𑐰𑑂𑐫𑐎𑑂𑐟 𑐫𑐵𑐂 𑑋 𑐄𑐐𑐸 𑐴𑐾 𑐡𑐮𑐫𑐵 𑐣𑐾𑐟𑐺 𑐬𑐵𑐩𑐎𑐸𑐩𑐵𑐬𑐷 𑐗𑐵𑑃𑐎𑑂𑐬𑐷𑑄 𑐊𑐩𑐳𑐷𑐳𑐷𑐫𑐵 𑐥𑐹𑐬𑑂𑐞 𑐳𑐩𑐬𑑂𑐠𑐣 𑐫𑐵𑐣𑐵 𑐎𑑂𑐫𑐣𑐷 𑑋 𑐡𑐾𑐫𑑂𑐫𑐵𑐟 𑐴𑐵𑑃𑐎𑐾 𑐫𑐵𑐫𑐾𑐐𑐸 𑐳𑐟𑑂𑐟𑐵 𑐠𑑁𑑄 𑐐𑐛𑐧𑐣𑑂𑐢𑐣 𑐳𑐬𑐎𑐵𑐬𑐫𑐵 𑐮𑑂𑐴𑐵𑐟𑐷 𑐰𑑅𑐐𑐸 𑐡𑐸 𑑋 𑐐𑐛𑐧𑐣𑑂𑐢𑐣 𑐠𑐷𑐠𑐷 𑐡𑐮𑐟 𑐖𑐵𑐣𑐵𑑅 𑐣𑐶𑐬𑑂𑐩𑐶𑐟 𑐳𑐬𑐎𑐵𑐬 𑐖𑐹𑐳𑐵𑑄 𑐣𑐵𑑅𑐣𑐵𑑅 𑐀𑐣𑑂𑐟𑐬𑐰𑐶𑐬𑑀𑐢𑐷 𑐮𑐎𑑂𑐲𑑂𑐫𑐟 𑐖𑑂𑐰𑐣𑐵𑑅 𑐐𑐛𑐧𑐣𑑂𑐢𑐣𑑄 𑐡𑐾𑐫𑑂 𑐰 𑐖𑐣𑐟𑐵𑐫𑐵𑐟 𑐀𑐮𑐩𑐮𑐫𑑂 𑐫𑐵𑐣𑐵𑐔𑑂𑐰𑐣𑐾 𑐩𑐖𑐶𑐄 𑑋

𑐕𑐐𑐹 𑐡𑐮 𑐀𑐮𑐾 𑐕𑐐𑐹 𑐴𑐾 𑐐𑐛𑐧𑐣𑑂𑐢𑐣 𑐡𑐸𑐣𑐾 𑐥𑐺𑐠𑐎 𑐥𑐺𑐠𑐎 𑐬𑐵𑐫𑐩 𑐧𑐶𑐫𑐵𑑅 𑐖𑐣𑐟𑐵𑐫𑐵𑐟 𑐨𑑂𑐬𑐩 𑐖𑐵𑐮𑐫𑑂 𑐮𑐎𑐾𑐐𑐸 𑐣𑐵𑐚𑐎 𑐩𑐘𑑂𑐔𑐣 𑐫𑐵𑐣𑐵 𑐔𑑂𑐰𑐣𑐾 𑐩𑐖𑐶𑐄 𑑋 𑐠𑐖𑑂𑐫𑐵𑑅𑐐𑐸 𑐨𑑂𑐬𑐩 𑐖𑐵𑐮𑐫𑐵 𑐏𑐾𑐮𑑄 𑐐𑐛𑐧𑐣𑑂𑐢𑐣𑐫𑐵 𑐣𑐶𑐫𑐟𑐶 𑐕𑐸 𑐖𑐸𑐂 ? 𑐩𑐣𑐹𑐟𑐫𑑂𑐳𑑄 𑐠𑑁𑑄𑐫𑐵 𑐐𑐛𑐧𑐣𑑂𑐢𑐣 𑐳𑐬𑐎𑐵𑐬𑐫𑐵𑐟 𑐥𑐾𑐔𑐎𑐳𑐟 𑐩𑐡𑐸𑐐𑐸 𑐫𑐣𑑂𑐟𑑂𑐬 𑐏𑑄𑐎𑐾 𑐩𑐵𑐮𑐷 𑑋 𑐐𑐸𑐎𑐸𑐣𑑂𑐴𑐸 𑐠𑑂𑐰𑐫𑐵 𑐳𑑄𑐬𑐔𑐣𑐵 𑐕𑐟𑐵𑐕𑐸𑐮𑑂𑐫 𑐖𑐸𑐫𑐵𑑅 𑐕𑐬𑐥𑐲𑑂𑐚 𑐖𑐸𑐂𑐐𑐸 𑐏𑑅 𑑋 𑐡𑐸𑑅𑐏𑐫𑐵 𑐏𑑃 𑐖𑐸𑐂 𑑋

𑐠𑑁𑑄 𑐡𑐾𑐫𑑂 𑐬𑐵𑐖𑐣𑐷𑐟𑐶𑐰𑐶𑐴𑐷𑐣 𑐀𑐰𑐳𑑂𑐠𑐵𑐫𑑂 𑐮𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐡𑐾𑐫𑑂 𑐀𑐳𑐦𑐮 𑐬𑐵𑐲𑑂𑐚𑑂𑐬𑐫𑑂 𑐥𑐬𑐶𑐞𑐟 𑐖𑐸𑐂 𑐮𑐵 ? 𑐡𑐾𑐱𑐰𑐵𑐳𑐷𑐟 𑐔𑐶𑐣𑑂𑐟𑐶𑐟 𑐖𑐸𑐂 𑐩𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐡𑐾𑐫𑑂 𑐠𑑁𑑄 𑐨𑐵𑐐𑑂𑐫𑐫𑐵 𑐨𑐬𑐫𑑂 𑑋 𑐐𑐫𑑂 𑐐𑐸𑐎𑐠𑑄 𑐠𑑂𑐰 𑐳𑑄𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 ? 𑐠𑑁𑑄 𑐡𑐾𑐫𑑂𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐀·𑐟 𑐦𑐸𑐎𑑂𑐎 𑐢𑑂𑐰𑐳𑑂𑐟 𑐀𑐰𑐳𑑂𑐠𑐵𑐫𑑂 𑑋 𑐎𑐵𑐬𑑂𑐫𑐥𑐵𑐮𑐶𑐎𑐵 𑐄𑐏𑐾𑑄𑐠𑐸𑐏𑐾𑑄 𑐩𑐸𑐣𑐵𑐟𑑅𑐐𑐸 𑐎𑐸𑐔𑐵𑐎𑐸𑐔𑐵𑐟 𑐳𑑂𑐰𑐵𑐣𑐵𑑅 𑐡𑐫𑐾𑐎𑐵𑐟𑑅𑐐𑐸 𑐩𑐹𑐬𑑂𑐟𑐶 𑐠𑐾𑑄 ! 𑐟𑐳𑐎𑑄 𑐦𑐫𑑂 𑐖𑐎 𑐰𑑅𑐳𑐵𑑄 𑐐𑐮𑑂𑐬𑑂𑐫𑐵𑐩𑐐𑐸𑐬𑑂𑐮𑐸𑐩 𑐡𑐸𑐣𑐷𑐮𑐵 ? 𑐧𑐾𑐛𑐾𑐐𑐵𑐣 𑑋 𑐰𑑂𑐫𑐰𑐳𑑂𑐠𑐵𑐥𑐶𑐎𑐵 𑐔𑐮𑐏𑑄 𑐮𑑂𑐴𑐵𑑅𑐐𑐸 𑐕𑐾𑑃 𑐠𑐾𑑄 ! 𑐣𑑂𑐫𑐵𑐫𑐥𑐵𑐮𑐶𑐎𑐵 𑐨𑐸𑐏𑐵𑐔𑑄 𑐡𑐸𑑄𑐐𑐸 𑐡𑐾𑐐𑑅 𑐠𑐾𑑄 ! 𑐡𑐾𑐫𑑂 𑐳𑑄𑐔𑐵𑐮𑐣𑐫𑐵 𑐦𑐸𑐎𑑂𑐎 𑐫𑐣𑑂𑐟𑑂𑐬𑐟 𑐠𑑁𑑄 𑐰𑐶𑐥𑐡𑑄 𑐐𑑂𑐬𑐳𑑂𑐟 𑑋 𑐎𑑂𑐲𑐟𑐶𑐐𑑂𑐬𑐳𑑂𑐟 𑑋 𑐡𑐾𑐫𑑂 𑐠𑑁𑑄 𑐁𑐢𑑂𑐫𑐵𑐬𑑂𑐟𑐶𑐟 𑐀𑐰𑐳𑑂𑐠𑐵𑐫𑑂 𑑋 𑐖𑐣𑐟𑐵𑐫𑐵 𑐟𑑅𑐢𑑄𑐐𑐸 𑐕𑐚𑐥𑐚𑐷 𑑋 𑐠𑐖𑑂𑐫𑐵𑑅𑐐𑐸 𑐑𑑀𑐬 𑐰𑐶𑐥𑐡𑐫𑐵 𑐑𑐜𑐷 𑐎𑐠𑐶𑐣 𑐬𑐵𑐖𑐣𑐷𑐟𑐶𑐎 𑐣𑐾𑐟𑐵𑐟𑐫𑑂𑐳𑑄 𑐕𑐩𑑂𑐴𑑄 𑐩𑐾𑐩𑑂𑐴𑐾𑐳𑐶𑐟 𑐴𑐵𑑃𑐎 𑐧𑐶𑐫𑐵𑐔𑑂𑐰𑐣𑐷 ‘𑐕 …. 𑐴𑐟𑑂𑐫𑐵𑐬𑐵 ….! 𑐕𑑄𑐟 𑐣𑐶𑐬𑑂𑐩𑐹𑐮 𑐫𑐵𑐣𑐵𑐧𑐷 𑑋’ 𑐩𑐾𑐩𑑂𑐴𑐾𑐳𑐶𑐣𑑄 𑐰𑐶𑐥𑐎𑑂𑐲𑐷𑐫𑐵𑐟 𑐔𑐸𑐣𑑁𑐟𑐶 𑐧𑐷 ‘𑐀𑐫𑑂, 𑐖𑑂𑐫𑐵𑐣𑐩𑐵𑐬𑐵 𑐴𑑀𑐱𑐶𑐫𑐵𑐬 ! 𑐕𑑄𑐟 𑐳𑐶𑐢𑐫𑐾𑐎𑐵 𑐧𑐷 !’

𑐠𑑁𑑄 𑐡𑐾𑐫𑑂𑐫𑐵 𑐬𑐵𑐖𑐣𑐷𑐟𑐶𑐫𑐵 𑐏𑑂𑐫𑐮𑐫𑑂 𑐡𑐾𑐫𑑂𑐫𑐵 𑐬𑐵𑐖𑐣𑐾𑐟𑐵𑐟 ‘𑐴𑐟𑑂𑐫𑐵𑐬𑐵, 𑐖𑑂𑐫𑐵𑐣𑐩𑐵𑐬𑐵’ 𑐢𑐎𑐵𑑅 𑐥𑐬𑐳𑑂𑐥𑐬𑐫𑑂 𑐳𑑄𑐧𑑀𑐢𑐶𑐟 𑐖𑐸𑐂 𑑋 𑐠𑐖𑑂𑐫𑐵𑑅𑐐𑐸 𑐁𑐬𑑀𑐥, 𑐥𑑂𑐬𑐟𑑂𑐫𑐵𑐬𑑀𑐥𑑄 𑐡𑐾𑐫𑑂𑐫𑐵 𑐬𑐵𑐖𑐣𑐷𑐟𑐶 𑐠𑑁𑑄 𑐐𑐸𑐘𑑂𑐖𑐵𑐫𑐩𑐵𑐣 𑐖𑐸𑐫𑐵𑐔𑑂𑐰𑐣𑐷 𑑋 𑐡𑐾𑐫𑑂𑐫𑐵 𑐣𑐶𑐫𑐟𑐶 𑐢𑐵𑐠𑐾𑑄 𑐠𑑁𑑄 𑐬𑐵𑐖𑐣𑐷𑐟𑐶𑐎 𑐀𑐥𑐬𑐵𑐢𑐷𑐟𑐫𑑂 𑐮𑑂𑐴𑐵𑐟𑐷 𑐮𑐵𑑅 𑐰𑑄𑐐𑐸 𑐏𑑅𑐮𑐵 ? 𑐄𑐦𑑂 ! 𑐐𑑂𑐫𑐵𑐳𑐾𑑄 𑐰𑐂 !

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS