Read news in NepalBhasa text-- www.hamroschool.com BACK 𑐫𑐸𑐨𑐾𑐣𑑂𑐚𑑂𑐳 𑐰 𑐧𑐵𑐬𑑂𑐫𑐣 𑐩𑑂𑐫𑐸𑐣𑐶𑐏 𑐔𑑂𑐫𑐵𑐩𑑂𑐥𑐶𑐫𑐣𑑂𑐳 𑐮𑐶𑐐𑐫𑐵 𑐣𑐎𑐁𑐄𑐚 𑐔𑐬𑐞𑐫𑑂 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐸𑐨𑐾𑐣𑑂𑐚𑑂𑐳 𑐰 𑐧𑐵𑐬𑑂𑐫𑐣 𑐩𑑂𑐫𑐸𑐣𑐶𑐏 𑐔𑑂𑐫𑐵𑐩𑑂𑐥𑐶𑐫𑐣𑑂𑐳 𑐮𑐶𑐐𑐫𑐵 𑐣𑐎𑐁𑐄𑐚 𑐔𑐬𑐞𑐫𑑂

𑐊𑐖𑐾𑐣𑑂𑐳𑐷- 𑐔𑑂𑐫𑐵𑐩𑑂𑐥𑐶𑐫𑐣𑑂𑐳 𑐮𑐶𑐐 𑐀𑐣𑑂𑐟𑐬𑑂𑐐𑐟 𑐩𑑄𑐐𑐮𑐰𑐵𑑅 𑐔𑐵𑐣𑑂𑐴𑐫𑑂 𑐖𑐹𑐐𑐸 𑐎𑐵𑐳𑐵 𑐮𑐶𑐥𑐵 𑐳𑐩𑐹𑐴 𑐊𑐔𑐫𑑂 𑐔𑑂𑐰𑑄𑐐𑐸 𑐫𑐸𑐨𑐾𑐣𑑂𑐚𑑂𑐳𑑄 𑐣𑐎𑐁𑐄𑐚 𑐔𑐬𑐞𑐫𑑂 𑐠𑐵𑐫𑑂 𑐡𑐫𑐾𑐎𑐹𑐐𑐸 𑐡𑐸 𑑋 𑐳𑐩𑐹𑐴 𑐔𑐬𑐞𑐫𑑂 𑐗𑑂𑐰𑐮𑐵𑐎 𑐥𑑂𑐫𑑄𑐐𑐸𑐮𑐶𑑄 𑐎𑐵𑐳𑐵 𑐟𑑂𑐫𑐵𑐎𑐵𑑅 𑐫𑐸𑐨𑐾𑐣𑑂𑐚𑑂𑐳 𑐀𑐣𑑂𑐟𑐶𑐩 𑑑𑑖 𑐫𑑂 𑐠𑑂𑐫𑑄𑐐𑐸 𑐏𑑅 𑑋 𑐂𑐚𑐵𑐮𑐷𑐫𑐣 𑐎𑑂𑐮𑐧 𑐫𑐸𑐨𑐾𑐣𑑂𑐚𑑂𑐳𑑄 𑐬𑐸𑐳𑐫𑐵 𑐎𑑂𑐮𑐧 𑐳𑐾𑐣𑑂𑐚 𑐥𑐶𑐚𑐬𑑂𑐳𑐰𑐬𑑂𑐐𑐫𑐵𑐟 𑑔–𑑒 𑐐𑑀𑐮𑑄 𑐧𑐸𑐎𑐹𑐐𑐸 𑐏𑑅 𑑋 𑐫𑐸𑐨𑐾𑐣𑑂𑐚𑑂𑐳𑐫𑐵 𑐣𑐶𑑄𑐟𑐶𑑄 𑐜𑐶𑐧𑐵𑐮𑐵𑑄 𑐣𑐶𑐐𑐹𑐹 𑐐𑑀𑐮 𑐫𑐵𑑅𑐐𑐸 𑐏𑑅𑐳𑐵 𑐦𑐾𑐜𑐾𑐬𑐶𑐎𑑀 𑐔𑐶𑐊𑐳𑐵 𑐰 𑐀𑐮𑑂𑐨𑐵𑐬𑑀 𑐩𑑀𑐬𑐵𑐚𑑀𑑄 𑐕𑐐𑐹 𑐕𑐐𑐹 𑐐𑑀𑐮 𑐫𑐵𑐟 𑑋 𑐳𑐾𑐣𑑂𑐚 𑐥𑐶𑐚𑐬𑑂𑐳𑐰𑐬𑑂𑐐𑐫𑐵 𑐣𑐶𑑄𑐟𑐶𑑄 𑐳𑐬𑐡𑐵𑐬 𑐁𑐣𑑂𑐖𑐩𑑁𑐣𑑄 𑐕𑐐𑐹 𑐐𑑀𑐮 𑐫𑐵𑑅𑐐𑐸 𑐏𑑅𑐳𑐵 𑐩𑐾𑐐𑐸 𑐐𑑀𑐮 𑐁𑐟𑑂𑐩𑐑𑐵𑐟𑐷 𑐖𑐹𑐐𑐸 𑐏𑑅 𑑋 𑐫𑐸𑐨𑐾𑐣𑑂𑐚𑑂𑐳𑐫𑐵 𑐮𑐶𑐫𑐵𑐣𑐵𑐬𑑂𑐡𑑀 𑐧𑑀𑐔𑐸𑐣𑐷𑑄 𑐁𑐟𑑂𑐩𑐑𑐵𑐟𑐷 𑐐𑑀𑐮 𑐫𑐵𑑅𑐐𑐸 𑐏𑑅 𑑋

𑐠𑑂𑐰 𑐴𑐾 𑐥𑐸𑐔𑐮𑐫𑑂 𑐔𑑂𑐰𑑄𑐐𑐸 𑐂𑑄𑐐𑑂𑐮𑐶𑐳 𑐎𑑂𑐮𑐧 𑐔𑐾𑐮𑑂𑐳𑐷𑑄 𑐳𑑂𑐰𑐶𑐜𑐾𑐣𑐫𑐵 𑐎𑑂𑐮𑐧 𑐩𑐵𑐮𑑂𑐩𑑀𑐫𑐵𑐟 𑑑–𑑐 𑐐𑑀𑐮𑑄 𑐧𑐸𑐎𑐮 𑑋 𑐔𑐾𑐮𑑂𑐳𑐷𑐫𑐵 𑐴𑐎𑐶𑐩 𑐖𑐶𑐫𑐵𑐔𑑄 𑐎𑐵𑐳𑐵𑐫𑐵 𑐕𑐐𑐹 𑐖𑐎 𑐐𑑀𑐮 𑐫𑐵𑑅𑐐𑐸 𑐏𑑅 𑑋 𑐎𑐵𑐳𑐵 𑐟𑑂𑐫𑐵𑐎𑐵𑑅 𑐳𑐵𑐰𑐶𑐎 𑐰𑐶𑐖𑐾𑐟𑐵 𑐔𑐾𑐮𑑂𑐳𑐷 𑐣𑑄 𑐔𑑂𑐫𑐵𑐩𑑂𑐥𑐶𑐣𑑂𑐳 𑐮𑐶𑐐𑐫𑐵 𑐀𑐣𑑂𑐟𑐶𑐩 𑑑𑑖 𑐫𑐵 𑐮𑐶𑐎𑑂𑐎 𑐠𑑂𑐫𑑄𑐐𑐸 𑐡𑐸 𑑋 𑐥𑐸𑐔𑑅𑐫𑐵 𑐱𑐷𑐬𑑂𑐲 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐫𑐸𑐨𑐾𑐣𑑂𑐚𑑂𑐳𑐫𑐵 𑑑𑑒 𑐀𑑄𑐎 𑐰 𑐣𑐶𑐐𑐹𑐐𑐸 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐔𑐾𑐮𑑂𑐳𑐷𑐫𑐵 𑑙 𑐀𑑄𑐎 𑐡𑐸 𑑋 𑐳𑑂𑐰𑑄𑐐𑐹𑐐𑐸 𑐠𑐵𑐳𑐫𑑂 𑐡𑐸𑐐𑐸 𑐥𑐶𑐚𑐬𑑂𑐳𑐧𑐬𑑂𑐐𑐫𑐵 𑑓 𑐀𑑄𑐎 𑐖𑐎 𑐡𑐸𑐳𑐵 𑐩𑐵𑐮𑑂𑐩𑑀 𑐀𑑄𑐎𑐰𑐶𑐴𑐷𑐣 𑐟𑐶𑐣𑐶 𑑋

𑐮𑐶𑐐𑐫𑐵 𑐳𑐩𑐹𑐴 ‘𑐃’𑐂 𑐔𑑂𑐰𑑄𑐐𑐸 𑐧𑐵𑐬𑑂𑐫𑐣 𑐩𑑂𑐫𑐸𑐣𑐶𑐏𑑄 𑐣𑑄 𑐗𑑂𑐰𑐮𑐵𑐎 𑐥𑑂𑐫𑑄𑐐𑐸𑐮𑐶𑑄 𑐎𑐵𑐳𑐵 𑐟𑑂𑐫𑐵𑐎𑐵𑑅 𑐣𑐎𑐁𑐄𑐚𑐫𑑂 𑐠𑐵𑐫𑑂 𑐡𑐫𑐾𑐎𑐹𑐐𑐸 𑐡𑐸 𑑋 𑐖𑐬𑑂𑐩𑐣 𑐎𑑂𑐮𑐧 𑐧𑐵𑐬𑑂𑐫𑐣 𑐥𑑀𑐬𑑂𑐔𑐸𑐐𑐶𑐖 𑐎𑑂𑐮𑐧 𑐧𑐾𑐣𑑂𑐦𑐶𑐎𑐵𑐫𑐵𑐟 𑑕–𑑒 𑐐𑑀𑐮𑑄 𑐧𑐸𑐎𑐵𑑅 𑐀𑐣𑑂𑐟𑐶𑐩 𑑑𑑖𑐫𑑂 𑐠𑑂𑐫𑑄𑐐𑐸 𑐏𑑅 𑑋 𑐧𑐵𑐬𑑂𑐫𑐣𑐫𑐵 𑐣𑐶𑑄𑐟𑐶𑑄 𑐬𑑀𑐧𑐬𑑂𑐚 𑐮𑐾𑐰𑐵𑐣𑑂𑐜𑑀𑐳𑑂𑐎𑐷𑑄 𑐴𑑂𑐫𑐵𑐚𑑂𑐬𑐶𑐎 𑐫𑐵𑑅𑐐𑐸 𑐏𑑅 𑑋 𑐧𑐵𑐬𑑂𑐫𑐣𑐫𑐵 𑐬𑑀𑐧𑐬𑑂𑐚 𑐮𑐾𑐰𑐵𑐣𑑂𑐜𑑀𑐳𑑂𑐎𑐷𑐫𑐵 𑐠𑑂𑐰 𑐔𑑂𑐫𑐵𑐩𑑂𑐥𑐶𑐫𑐣𑑂𑐳 𑐮𑐶𑐐𑐫𑑂 𑐳𑐕𑐶𑐐𑐹 𑐎𑐵𑐳𑐵 𑐏𑑅 𑑋 𑐀𑐠𑐾 𑐴𑐾 𑐧𑐵𑐬𑑂𑐫𑐣𑐫𑐵 𑐳𑐾𑐐𑑂𑐬𑐷 𑐐𑑂𑐬𑐾𑐧𑐷 𑐰 𑐮𑐶𑐬𑑀 𑐳𑐵𑐣𑐾𑑄 𑐕𑐐𑐹 𑐕𑐐𑐹 𑐐𑑀𑐮 𑐫𑐵𑑅𑐐𑐸 𑐏𑑅 𑑋 𑐧𑐾𑐣𑑂𑐦𑐶𑐎𑐵𑐥𑐵𑐏𑐾𑑄 𑐬𑑀𑐜𑑂𑐬𑐶𑐎𑑂𑐳 𑐜𑐵 𑐳𑐶𑐮𑑂𑐨𑐵 𑐰 𑐣𑐸𑐣𑐾𑐖𑑄 𑐕𑐐𑐹 𑐕𑐐𑐹 𑐐𑑀𑐮 𑐫𑐵𑐟 𑑋 𑐠𑑂𑐰 𑐴𑐾 𑐥𑐸𑐔𑑅𑐫𑐵 𑐩𑐾𑐐𑐸 𑐎𑐵𑐳𑐵𑐫𑑂 𑐧𑐵𑐬𑑂𑐳𑐶𑐮𑑀𑐣𑐵𑑄 𑐜𑐵𑐫𑐣𑐵𑐩𑑀 𑐎𑐶𑐨𑐫𑐵𑐟 𑑑–𑑐 𑐐𑑀𑐮𑑄 𑐧𑐸𑐎𑐮 𑑋 𑐧𑐵𑐬𑑂𑐳𑐶𑐮𑑀𑐣𑐵𑐫𑐵 𑐣𑐶𑑄𑐟𑐶𑑄 𑐀𑑄𑐱𑐸 𑐦𑐵𑐟𑐷𑑄 𑐐𑑀𑐮 𑐫𑐵𑑅𑐐𑐸 𑐏𑑅 𑑋

𑐮𑐶𑐐𑐫𑐵 𑐣𑑂𑐴𑐵𑐥𑐵𑑄𑐐𑐸 𑐣𑐶𑐐𑐹 𑐎𑐵𑐳𑐵𑐫𑑂 𑐥𑐬𑐵𑐖𑐶𑐟 𑐖𑐹𑐐𑐸 𑐧𑐵𑐬𑑂𑐳𑐶𑐮𑑀𑐣𑐵𑑄 𑐗𑑂𑐰𑑅𑐮𑐵𑐎 𑐣𑐶𑐐𑐹 𑐎𑐵𑐳𑐵 𑐟𑑂𑐫𑐵𑐎𑐹𑐐𑐸 𑐡𑐸 𑑋 𑐥𑐸𑐔𑑅𑐫𑐵 𑐱𑐷𑐬𑑂𑐲 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐧𑐵𑐬𑑂𑐫𑐣𑑄 𑐁𑑅𑐟𑐎 𑐖𑐹𑐐𑐸 𑐥𑑂𑐫𑑄𑐐𑐸𑐮𑐶𑑄 𑐎𑐵𑐳𑐵 𑐟𑑂𑐫𑐵𑐎𑐵𑑅 𑐀𑐣𑑂𑐟𑐶𑐩 𑑑𑑖 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐣𑐶𑐐𑐹𑐐𑐸 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐧𑐵𑐬𑑂𑐳𑐶𑐮𑑀𑐣𑐵𑑄 𑐀𑐗 𑐣𑑄 𑐣𑐎𑐁𑐄𑐚𑐫𑑂 𑐠𑐵𑐫𑑂 𑐡𑐫𑐎𑐾𑐩𑐦𑐸𑐣𑐶 𑑋 𑐧𑐵𑐬𑑂𑐳𑐶𑐮𑑀𑐣𑐵𑐫𑐵 𑑖 𑐀𑑄𑐎 𑐡𑐸𑐳𑐵 𑐧𑐾𑐣𑑂𑐦𑐶𑐎𑐵𑐫𑐵 𑑔 𑐀𑑄𑐎 𑐡𑐸 𑑋

𑐮𑐶𑐐𑐫𑐵 𑐳𑐩𑐹𑐴 ‘𑐊𑐔’𑐫𑐵 𑐎𑐵𑐳𑐵𑐫𑑂 𑐩𑑂𑐫𑐵𑐣𑐔𑐾𑐳𑑂𑐚𑐬 𑐫𑐸𑐣𑐵𑐂𑐚𑐾𑐜𑑄 𑐊𑐚𑐮𑐵𑐣𑑂𑐚𑐵𑐮𑐶𑐳𑐾 𑐧𑐬𑐵𑐧𑐬𑐷 𑐩𑑂𑐴𑐶𑐟𑐹𑐐𑐸 𑐡𑐸 𑑋 𑐎𑐵𑐳𑐵𑐫𑑂 𑐣𑐶𑐎𑑂𑐰𑑅 𑐟𑐎 𑐮𑐶𑐄𑐣𑐾 𑐮𑐵𑑅𑐐𑐸 𑐫𑐸𑐣𑐵𑐂𑐜𑐾𑐚𑑄 𑐊𑐚𑐮𑐵𑐣𑑂𑐚𑐵𑐮𑐶𑐳𑐾 𑐣𑐶𑐐𑐹 𑐣𑐶𑐐𑐹 𑐐𑑀𑐮𑐫𑐵 𑐧𑐬𑐵𑐧𑐬𑐷 𑐩𑑂𑐴𑐶𑐟𑐹𑐐𑐸 𑐏𑑅 𑑋 𑐩𑑂𑐫𑐵𑐔𑐾𑐳𑑂𑐚𑐬 𑐫𑐸𑐣𑐵𑐂𑐚𑐾𑐜𑐫𑐵 𑐣𑐶𑑄𑐟𑐶𑑄 𑐳𑑂𑐚𑐵𑐬 𑐎𑐵𑐳𑐵𑐩𑐶 𑐎𑑂𑐬𑐶𑐲𑑂𑐚𑐶𑐫𑐵𑐣𑑀 𑐬𑑀𑐣𑐵𑐮𑑂𑐜𑑀𑑄 𑐣𑐶𑐐𑐹𑐮𑐶𑑄 𑐐𑑀𑐮𑑄 𑐫𑐵𑑅𑐐𑐸 𑐏𑑅 𑑋 𑐊𑐚𑐮𑐵𑐣𑑂𑐚𑐵𑐫𑐵 𑐣𑐶𑑄𑐟𑐶𑑄 𑐖𑑀𑐳𑐶𑐦 𑐂𑐮𑐶𑐳𑐶𑐎 𑐰 𑐜𑐸𑐨𑐵𑐣 𑐖𑐵𑐥𑐚𑐵𑑄 𑐐𑑀𑐮 𑐫𑐵𑑅𑐐𑐸 𑐏𑑅 𑑋 𑐠𑑂𑐰 𑐴𑐾 𑐥𑐸𑐔𑑅𑐫𑐵 𑐩𑐾𑐐𑐸 𑐎𑐵𑐳𑐵𑐫𑑂 𑐳𑑂𑐥𑐾𑐣𑐶𑐳 𑐎𑑂𑐮𑐧 𑐨𑐶𑐮𑑂𑐮𑐵𑐬𑐶𑐫𑐮𑑄 𑐎𑑂𑐮𑐧 𑐫𑑀𑐒 𑐧𑑂𑐰𑐵𑐂𑐖𑐫𑐵𑐟 𑑒–𑑐 𑐐𑑀𑐮𑑄 𑐧𑐸𑐎𑐮 𑑋 𑐠𑑂𑐰 𑐥𑐸𑐔𑐮𑐫𑑂 𑐩𑑂𑐫𑐵𑐣𑐔𑐾𑐳𑑂𑐚𑐬 𑐫𑐸𑐣𑐵𑐂𑐚𑐾𑐜 𑐱𑐷𑐬𑑂𑐲 𑐠𑐵𑐳𑐫𑑂𑑂 𑐡𑐸 𑑋 𑐳𑐩𑐵𑐣 𑑗 𑐀𑑄𑐎 𑐡𑐸𑐐𑐸 𑐨𑐶𑐮𑑂𑐮𑐵𑐬𑐶𑐫𑐮 𑐐𑑀𑐮 𑐀𑐣𑑂𑐟𑐬𑐫𑐵 𑐎𑐵𑐬𑐞𑑄 𑐣𑐶𑐐𑐹𑐐𑐸 𑐠𑐵𑐳𑐫𑑂 𑐡𑐸 𑑋

𑐀𑐠𑐾 𑐴𑐾 𑐳𑐩𑐹𑐴 𑐖𑐷𑐫𑐵 𑐎𑐵𑐳𑐵𑐫𑑂 𑐰𑐮𑑂𑐦𑐧𑐬𑑂𑐐𑑄 𑐁𑐬𑐧𑐷 𑐳𑐵𑐮𑑂𑐖𑐧𑐬𑑂𑐐𑐫𑐵𑐟 𑑒–𑑑 𑐐𑑀𑐮𑑄 𑐰 𑐮𑐶𑐮𑐾𑑄 𑐳𑐾𑐨𑐶𑐮𑑂𑐮𑐵𑐫𑐵𑐟 𑑒–𑑑 𑐐𑑀𑐮𑑄 𑐧𑐸𑐎𑐹𑐐𑐸 𑐡𑐸 𑑋 𑐁𑐬𑐧𑐷 𑐳𑐵𑐮𑑂𑐖𑐧𑐬𑑂𑐐 𑐠𑐸𑐐𑐸 𑐥𑐸𑐔𑑅𑐫𑐵 𑐱𑐷𑐬𑑂𑐲 𑐠𑐵𑐳𑐫𑑂 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS