Read news in NepalBhasa text-- www.hamroschool.com BACK 𑐔𑐷𑐣 𑐰 𑐟𑐵𑐂𑐰𑐵𑐣𑐫𑐵 𑐡𑐠𑐸𑐂 𑐰𑑄𑐐𑐸 𑑔𑑐 𑐡𑑃𑐫𑐵 𑐡𑐸𑐣𑐾 𑐡𑐎𑐮𑐫𑑂 𑐏𑐬𑐵𑐧 𑐳𑐿𑐣𑑂𑐫 𑐳𑐩𑑂𑐧𑐣𑑂𑐢 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐔𑐷𑐣 𑐰 𑐟𑐵𑐂𑐰𑐵𑐣𑐫𑐵 𑐡𑐠𑐸𑐂 𑐰𑑄𑐐𑐸 𑑔𑑐 𑐡𑑃𑐫𑐵 𑐡𑐸𑐣𑐾 𑐡𑐎𑐮𑐫𑑂 𑐏𑐬𑐵𑐧 𑐳𑐿𑐣𑑂𑐫 𑐳𑐩𑑂𑐧𑐣𑑂𑐢

𑐊𑐖𑐾𑐣𑑂𑐳𑐷- 𑐟𑐵𑐂𑐰𑐵𑐣𑐫𑐵 𑐬𑐎𑑂𑐲𑐵𑐩𑐣𑑂𑐟𑑂𑐬𑐷 𑐔𑐶𑐄 𑐎𑐸𑐌 𑐔𑐾𑑄𑐐 𑐰𑑄𑐐𑐸 𑑔𑑐 𑐡𑑃𑐫𑐵 𑐡𑐸𑐣𑐾 𑐔𑐷𑐣 𑐰 𑐟𑐵𑐂𑐰𑐵𑐣 𑐡𑐠𑐸𑐫𑐵 𑐳𑐿𑐣𑑂𑐫 𑐳𑐩𑑂𑐧𑐣𑑂𑐢 𑐡𑐎𑐮𑐫𑑂 𑐧𑐵𑑄𑐩𑐮𑐵𑑅𑐐𑐸 𑐳𑑂𑐠𑐶𑐟𑐶𑐂 𑐠𑑂𑐫𑑄𑐐𑐸 𑐢𑐵𑑅𑐐𑐸 𑐡𑐸 𑑋 𑐥𑑂𑐫𑑄𑐣𑑂𑐴𑐸 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐟𑐵𑐂𑐰𑐵𑐣𑐫𑐵 𑐬𑐎𑑂𑐲𑐵 𑐎𑑂𑐲𑐾𑐟𑑂𑐬𑐫𑑂 𑐔𑐷𑐣𑐫𑐵 𑐳𑐿𑐣𑐶𑐎 𑐰𑐶𑐩𑐵𑐣 𑐡𑐸𑐴𑐵𑑄 𑐰𑐫𑐵𑐔𑑂𑐰𑑄𑐐𑐸𑐮𑐶𑑄 𑐬𑐎𑑂𑐲𑐵𑐩𑐣𑑂𑐟𑑂𑐬𑐷 𑐔𑐶𑐄𑐫𑐵 𑐠𑑂𑐰 𑐥𑑂𑐬𑐟𑐶𑐎𑑂𑐬𑐶𑐫𑐵 𑐰𑑅𑐐𑐸 𑐏𑑅 𑑋 𑐬𑐎𑑂𑐲𑐵𑐩𑐣𑑂𑐟𑑂𑐬𑐷 𑐔𑐶𑐄𑑄 𑐳𑐣𑑂 𑑒𑑐𑑒𑑕 𑐟𑐎𑐫𑐵 𑐡𑐸𑐣𑐾 𑐔𑐷𑐣𑑄 𑐟𑐵𑐂𑐰𑐵𑐣𑐫𑑂 𑐴𑐩𑐮𑐵 𑐫𑐵𑐫𑐾𑐦𑐂𑐐𑐸 𑐣𑑄 𑐢𑐵𑑅𑐐𑐸 𑐡𑐸 𑑋 𑐬𑐎𑑂𑐲𑐵𑐩𑐣𑑂𑐟𑑂𑐬𑐷 𑐔𑐶𑐄 𑐔𑐷𑐣𑐫𑐵𑐎𑐾 𑐎𑑂𑐲𑐩𑐟𑐵 𑐡𑐸𑐳𑐵𑑄 𑐫𑐸𑐡𑑂𑐢 𑐳𑐴𑐖 𑐩𑐖𑐸𑐂𑐐𑐸 𑐰 𑐫𑐎𑑂𑐰 𑐏𑑃𑐫𑑂 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐢𑐵𑑅𑐐𑐸 𑐡𑐸 𑑋 𑐟𑐵𑐂𑐰𑐵𑐣𑑄 𑐠𑑅𑐥𑐶𑑄𑐟 𑐳𑑂𑐰𑐟𑐣𑑂𑐟𑑂𑐬 𑐩𑐸𑐮𑐸𑐎 𑐢𑐫𑐵𑐔𑑂𑐰𑑄𑐳𑐵𑑄 𑐔𑐷𑐣𑑄 𑐢𑐵𑑅𑐳𑐵 𑐟𑐵𑐂𑐰𑐵𑐣𑐫𑐵𑐟 𑐠𑑅𑐥𑐶𑐣𑐶𑐐𑐸 𑐥𑑂𑐬𑐡𑐾𑐱 𑐠𑐾𑑄 𑐰𑑂𑐫𑐰𑐴𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐔𑐷𑐣𑑄 𑐀𑐎𑑂𑐚𑑀𑐧𑐬 𑐱𑐸𑐬𑐸 𑐖𑐸𑐳𑐵𑑄𑐣𑐶𑐳𑐾𑑄 𑐠𑑅𑐥𑐶𑐣𑐶𑐐𑐸 𑑑𑑕𑑐 𑐐𑑅 𑐰𑐶𑐩𑐵𑐣 𑐟𑐵𑐂𑐰𑐵𑐣𑐫𑐵 𑐬𑐎𑑂𑐲𑐵 𑐎𑑂𑐲𑐾𑐟𑑂𑐬𑐫𑑂 𑐕𑑂𑐰𑐫𑐾𑐢𑐸𑑄𑐎𑐮 𑑋 𑐔𑐷𑐣𑐶𑐫𑐵 𑐩𑐶𑐜𑐶𑐫𑐵𑑄 𑐠𑐸𑐎𑐶𑐫𑐵𑐟 𑐱𑐎𑑂𑐟𑐶 𑐥𑑂𑐬𑐡𑐬𑑂𑐱𑐣 𑐢𑐵𑑅𑐐𑐸 𑐡𑐸 𑑋 𑐰𑐶𑐱𑑂𑐰𑐫𑐵 𑐠𑐷𑐠𑐷 𑐡𑐾𑐳𑑄 𑐢𑐵𑑅𑐳𑐵 𑐔𑐷𑐣𑐫𑐵 𑐠𑑂𑐰 𑐖𑑂𑐫𑐵𑐫𑐵𑐟 𑐩𑐾𑐐𑐸 𑐡𑐾𑐱𑐫𑐵𑐟 𑐏𑑂𑐫𑐵𑐫𑐾𑐟 𑐳𑑂𑐰𑑅𑐐𑐸 𑐰 𑐁𑐎𑑂𑐬𑐵𑐩𑐎𑐟𑐵 𑐎𑑂𑐫𑑄𑐐𑐸 𑐢𑐵𑑅𑐐𑐸 𑐡𑐸 𑑋

𑐟𑐵𑐂𑐰𑐵𑐣𑐫𑐵 𑐬𑐵𑐲𑑂𑐚𑑂𑐬𑐥𑐟𑐶 𑐳𑐵𑐂 𑐂𑑄𑐐 𑐰𑐵𑐣𑑄 𑐦𑐬𑐾𑐣 𑐀𑐦𑐾𑐫𑐬𑑂𑐳𑐧𑐵𑐬𑐾 𑐕𑐥𑐸 𑐔𑑂𑐰𑐳𑐸 𑐔𑑂𑐰𑐫𑐵𑑅 𑐔𑐷𑐣𑑄 𑐟𑐵𑐂𑐣𑐰𑐵𑐣𑐫𑐵𑐟 𑐠𑑅𑐥𑐶𑐣𑐶𑐐𑐸 𑐣𑐶𑐫𑐣𑑂𑐟𑑂𑐬𑐞𑐫𑑂 𑐎𑐵𑐫𑐾𑐟 𑐳𑑂𑐰𑐮 𑐢𑐵𑑅𑐳𑐵 𑐄𑐎𑐶𑐫𑐵 𑐮𑐶𑐔𑑂𑐰 𑐰𑐶𑐣𑐵𑐱𑐎𑐵𑐬𑐷 𑐖𑐸𑐂𑐐𑐸 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐡𑐸 𑑋 𑐟𑐵𑐂𑐰𑐵𑐣𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐳𑐸 𑐳𑐾𑑄𑐐 𑐔𑐵𑑃𑐐𑑄 𑐣𑑄 𑐔𑐷𑐣𑐫𑐵 𑐁𑐎𑑂𑐬𑐵𑐩𑐎𑐟𑐵 𑐎𑑂𑐲𑐾𑐟𑑂𑐬𑐷𑐫 𑐱𑐵𑐣𑑂𑐟𑐶𑐫𑐵 𑐣𑐶𑑄𑐟𑐶𑑄 𑐏𑐟𑐬𑐵 𑐖𑐹𑐐𑐸 𑐰 𑐟𑐵𑐂𑐰𑐵𑐣 𑐳𑐟𑐬𑑂𑐎 𑐖𑐸𑐫𑐵𑐔𑑂𑐰𑐣𑐾𑐩𑐵𑑅𑐐𑐸 𑐢𑐵𑑅𑐐𑐸 𑐡𑐸 𑑋

𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐀𑐩𑐾𑐬𑐶𑐎𑐵 𑐰 𑐔𑐷𑐣𑐫𑐵 𑐡𑐠𑐸𑐂 𑐰𑐵𑐬𑑂𑐟𑐵 𑐖𑐹𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐵𑐫𑐵 𑐬𑐵𑐲𑑂𑐚𑑂𑐬𑐥𑐟𑐶 𑐖𑑀 𑐧𑐵𑐂𑐜𑐾𑐣 𑐰 𑐳𑐩𑐎𑐎𑑂𑐲𑐷 𑐳𑐷 𑐖𑐶𑐒𑐥𑐶𑐒𑐫𑐵 𑐡𑐠𑐸𑐂 𑐖𑐹𑐐𑐸 𑐰𑐵𑐬𑑂𑐟𑐵 𑐮𑐶𑐥𑐵 𑐧𑐵𑐂𑐜𑐾𑐣𑑄 𑐔𑐷𑐣𑐮𑐶𑐳𑐾 𑐟𑐵𑐂𑐰𑐵𑐣𑐫𑐵 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐏𑑃𑐮𑑂𑐴𑐵𑐧𑐮𑑂𑐴𑐵 𑐖𑐹𑐐𑐸 𑐢𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS