Read news in NepalBhasa text-- www.hamroschool.com BACK 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐁𑑅 𑐮𑑂𑐴𑑂𑐰𑐣𑐾𑐩𑐵𑑅𑐐𑐸 𑐥𑐮𑐵𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐁𑑅 𑐮𑑂𑐴𑑂𑐰𑐣𑐾𑐩𑐵𑑅𑐐𑐸 𑐥𑐮𑐵𑑅

𑐣𑑂𑐴𑐵𑐥𑐵𑐣𑐶𑐳𑐾𑑄 𑐣𑐾𑐥𑐵𑑅 𑐡𑐾𑐫𑑂𑐫𑐵 𑐳𑑂𑐰𑐣𑐶𑐐𑐮𑐫𑑂 𑐳𑐷𑐩𑐶𑐟 𑐖𑐸𑐫𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟 𑐠𑑁𑑄 𑐡𑐾𑐫𑑂 𑐡𑐸𑐣𑐾 𑐖𑐎 𑐩𑐏𑐸 𑐰𑐶𑐱𑑂𑐰𑐫𑐵 𑐠𑐷𑐠𑐷 𑐡𑐾𑐳𑐫𑑂 𑐰𑐣𑐵𑑅 𑐳𑑂𑐠𑐵𑐫𑐷 𑐰𑐵 𑐀𑐳𑑂𑐠𑐵𑐫𑐷 𑐬𑐸𑐥𑑄 𑐧𑐳𑑀𑐧𑐵𑐳 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐮𑐖𑐐𑐵𑑅𑐫𑐵 𑐮𑐵𑐐𑐶𑑄 𑐖𑐸𑐂𑐩𑐵 𑐰𑐵 𑐄𑐔𑑂𑐔 𑐀𑐢𑑂𑐫𑐫𑐣𑐫𑐵 𑐮𑐵𑐐𑐶𑑄 𑐰𑐵 𑐩𑐾𑐐𑐸 𑐕𑐸𑑄 𑐥𑑂𑐬𑐫𑑀𑐖𑐣𑐫𑐵 𑐮𑐵𑐐𑐶𑑄 𑐖𑐸𑐂𑐩𑐵 𑐣𑐾𑐰𑐵𑑅𑐟 𑐴𑐮𑐶𑐩𑐫𑑂 𑐧𑑂𑐫𑐵𑐥𑑂𑐟 𑐖𑐹𑐐𑐸 𑐎𑐵𑐬𑐞𑑄 𑐫𑐵𑐣𑐵𑑅 𑐠𑑁𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐰𑐶𑐱𑑂𑐰𑐧𑑂𑐫𑐵𑐥𑐷 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐥𑐶𑑄 𑐣𑑂𑐴𑑂𑐫𑐵𑐠𑐵𑐫𑑂 𑐔𑑂𑐰𑑄𑐳𑐵𑑄 𑐣𑐾𑐰𑐵𑑅𑐟 𑐣𑐾𑐰𑐵𑑅 𑐴𑐾 𑐖𑐸𑐂 𑑋 𑐀𑐮𑐾 𑐄𑐩𑐶 𑐡𑐠𑐸𑐂 𑐖𑐵𑐟𑐷𑐫 𑐊𑐎𑐟𑐵 𑐎𑑂𑐰𑐵𑐟𑐸𑐮 𑐢𑐵𑑅𑐳𑐵 𑐴𑐮𑐶𑐩𑐫𑑂 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐥𑑂𑐬𑐟𑐶𑐲𑑂𑐛𑐵 𑐧𑐝𑐾 𑐖𑐸𑐂 𑑋 𑐠𑑂𑐰𑐴𑐾 𑐟𑐵𑐟𑐸𑐣𑐵𑑄 𑐴𑐮𑐶𑑄 𑐣𑐾𑐰𑐵𑑅 𑐡𑐧𑐹 𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐠𑑂𑐰𑐴𑐾 𑐡𑐧𑐹𑐥𑐵𑐏𑐾𑑄 𑐠𑑂𑐰 𑐐𑑀𑐲𑑂𑐛𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐡𑐾𑐫𑑂 𑐥𑐶𑐣𑐾𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐀𑐰𑐳𑑂𑐠𑐵, 𑐄𑐩𑐶𑐳𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐫𑑀𑐐𑐡𑐵𑐣𑐫𑐵 𑐧𑐵𑐬𑐾 𑐖𑐶𑐎𑐾 𑐧𑐵𑑄𑐮𑐵𑐎 𑐖𑐵𑐣𑐎𑐵𑐬𑐷 𑐩𑐡𑐸 𑑋 𑐟𑐬 𑐣𑐾𑐥𑐵𑑅 𑐡𑐸𑐣𑐾𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐳𑑂𑐠𑐶𑐟𑐶𑐂 𑐕𑐸𑑄 𑐳𑐸𑐢𑐵𑐬 𑐫𑐵𑐫𑐾𑐩𑐵𑑅𑐐𑐸 𑐟𑐵𑐫𑐾𑐎𑐵𑑅 𑐕𑐟𑐵 𑐣𑐶𑐟𑐵 𑐏𑑃 𑐣𑑂𑐴𑑂𑐫𑐠𑐣𑐵𑐔𑑂𑐰𑐣𑐵 𑑋

𑑑) 𑐣𑐾𑐰𑐵𑑅𑐟𑐫𑑂𑐐𑐸 𑐥𑐴𑐶𑐔𑐵𑐣 𑐢𑐂𑐐𑐸 𑐂𑐩𑐶𑐐𑐸 𑐩𑐵𑑄𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶 𑐏𑑅 𑑋 𑐟𑐬 𑐁𑑅𑐫𑐵𑐐𑐸 𑐳𑑂𑐠𑐶𑐟𑐶𑐂 𑐣𑐾𑐰𑐵𑑅𑐟𑐫𑑂𑐐𑐸 𑐳𑐩𑐵𑐖𑐫𑑂 𑐣𑐾𑐰𑐵𑑅 𑐨𑐵𑐫𑑂 𑐮𑑀𑐥 𑐖𑐸𑐂𑐐𑐸 𑐀𑐰𑐳𑑂𑐠𑐵𑐫𑑂 𑐮𑐵𑐫𑐾– 𑐢𑐸𑑄𑐎𑐮 𑑋 𑐖𑐶𑐩𑐶 𑐧𑐵𑐖𑑂𑐫𑐵 𑐧𑐖𑑂𑐫𑐾𑐥𑐶𑑄𑐳𑑄 𑐣𑐾𑐰𑐵𑑅 𑐨𑐵𑐫𑑂 𑐧𑐵𑐴𑐾𑐎 𑐩𑐾𑐐𑐸 𑐨𑐵𑐫𑑂 𑐮𑑂𑐴𑐵𑐫𑐾 𑐴𑐾 𑐩𑐳𑑅 𑑋 𑐣𑐾𑐥𑐵𑐮𑐷 𑐟𑐎𑑄 𑐧𑐵𑑄𑐮𑐵𑐎 𑐩𑐳𑑅 𑑋 𑐟𑐬 𑐠𑐸𑐎𑐶𑐫𑐵 𑐛𑐷𑐎 𑐀𑑅𑐏𑑅 𑐖𑐶𑐩𑐶 𑐕𑐫𑑂𑐥𑐶𑑄𑐳𑑄 𑐣𑐾𑐰𑐵𑑅 𑐨𑐵𑐫𑑂 𑐨𑐔𑐵 𑐨𑐔𑐵 𑐠𑐹 𑑋 𑐟𑐬 𑐣𑑂𑐰𑐰𑐵𑐫𑐾 𑐩𑐳𑑅 𑑋 𑐂𑐩𑐶 𑐩𑐳𑑂𑐟𑐫𑑂𑐐𑐸 𑐥𑐵𑐮𑐫𑑂 𑐮𑐵 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐠𑐸𑐂 𑐣𑑄 𑐩𑐏𑐸 𑑋 𑐠𑑂𑐰 𑐳𑐣𑑂𑐡𑐬𑑂𑐨𑐫𑑂 𑐖𑐶𑐟𑑅 𑐰𑐶𑐡𑑂𑐰𑐵𑐣 𑐨𑐵𑐖𑐸 𑐂𑐫𑐵𑐣 𑐀𑐮𑑂𑐳𑐥𑑄 𑐢𑐫𑐵𑐡𑐷𑐐𑐸 𑐏𑑃 𑐮𑐸𑐩𑑄𑐳𑐾𑑄 𑐰𑑅 𑑋 𑐄𑐖𑑂𑐫𑐵𑐮𑑀 𑐊𑐦𑐊𑐩𑑄 𑐫𑐵𑑅𑐐𑐸 𑐕𑐐𑐹 𑐀𑐣𑑂𑐟𑐬𑑂𑐰𑐵𑐬𑑂𑐟𑐵𑐫𑑂 𑐣𑐾𑐰𑐵𑑅 𑐨𑐵𑐫𑑂𑐫𑐵𑐟 𑐩𑑂𑐰𑐵𑐎𑐵 𑐟𑐫𑐾𑐟 𑐕𑐸 𑐫𑐵𑐫𑐾𑐩𑐵𑐮𑐷 𑐢𑐂𑐐𑐸 𑐣𑑂𑐴𑑂𑐫𑐳𑐮𑐫𑑂 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐕𑐶𑐎𑐥𑐶𑑄𑐳𑑄 𑐕𑐐𑐹 𑐴𑐾 𑐖𑑂𑐫𑐵 𑐖𑐎 𑐧𑐵𑑄𑐮𑐵𑐎 𑐫𑐵𑐣𑐵𑐡𑐶𑐳𑑃 𑑋 𑐰 𑐏𑑅, 𑐠𑑅𑐐𑐸 𑐥𑐬𑐶𑐰𑐵𑐬𑐫𑑂 𑐩𑐳𑑂𑐟𑐮𑐶𑐳𑐾𑑄 𑐣𑐾𑐰𑐵𑑅 𑐨𑐵𑐳𑑄 𑐏𑑃 𑐮𑑂𑐴𑐵𑐣𑐵𑐡𑐶𑐳𑑃 𑑋 𑐠𑐸𑐮𑐶 𑐫𑐵𑐟 𑐢𑐵𑑅𑐳𑐵 𑐩𑐾𑐐𑐸 𑐖𑑂𑐫𑐵𑐗𑑂𑐰𑑅 𑐩𑐶𑐮𑐾 𑐖𑐸𑐖𑐸𑑄 𑐰𑐣𑐷 𑑋 𑐩𑐏𑐸𑐳𑐵 𑐩𑐾𑐐𑐸 𑐣𑑂𑐴𑑂𑐫𑐵𑐐𑐸 𑐴𑐾 𑐥𑑂𑐬𑐫𑐟𑑂𑐣 𑐫𑐵𑑅𑐳𑐵𑑄 𑐣𑐾𑐰𑐵𑑅 𑐨𑐵𑐫𑑂𑐫𑐵𑐟 𑐩𑑂𑐰𑐵𑐎𑐵 𑐟𑐫𑐾 𑐦𑐂𑐩𑐏𑐸 𑑋’

𑐰𑐫𑑂𑐎𑑅𑐫𑐵 𑐢𑐵𑐥𑐹 𑐡𑑅 𑐟𑐳𑐎𑑄 𑐴𑐾 𑐩𑐣𑐫𑑂 𑐡𑐶𑐟 𑑋 𑐗𑐷 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅 𑐩𑐳𑑂𑐟𑐮𑐶𑐳𑐾𑑄 𑐣𑐾𑐰𑐵𑑅 𑐨𑐵𑐳𑑄 𑐏𑑃𑐮𑑂𑐴𑐵𑐫𑐾 𑐩𑐵𑐮 𑑋 𑐀𑐮𑐾 𑐣𑐾𑐥𑐵𑐮𑐷 𑐨𑐵𑐫𑑂 𑐩𑐳𑐮 𑐎𑐶 𑐳𑑂𑐎𑐸𑐮𑐫𑑂 𑐧𑐵𑑄𑐮𑐵𑑅𑐐𑐸 𑐣𑐟𑐶𑐖𑐵 𑐴𑐫𑐾 𑐦𑐂 𑐩𑐏𑐸 𑐢𑐂𑐐𑐸 𑐨𑑂𑐬𑐩𑐫𑐵𑐟 𑐔𑐷𑐎𑐾𑐩𑐵𑐮 𑑋 𑐠𑑂𑐰 𑐖𑑂𑐫𑐵𑐫𑑂 𑐧𑑁 𑐧𑐵𑐖𑑂𑐫𑐵 𑐳𑐶𑐎𑐾𑑄 𑐩𑐵𑑄 𑐧𑐖𑑂𑐫𑐾𑐥𑐶𑑄𑐳𑑄 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐾𑐩𑐵𑑅 𑐠𑐾𑑄 𑐔𑑂𑐰𑑄 𑑋

𑑒) 𑐁𑑅𑐫𑐵𑐐𑐸 𑐳𑑂𑐠𑐶𑐟𑐶𑐂 𑐰𑐶𑐡𑑂𑐫𑐵𑐮𑐫 𑐟𑐴 (𑐰𑐶𑐱𑐾𑐲 𑐫𑐵𑐣𑐵𑑅 𑐐𑐸𑑄𑐐𑐹 𑐰 𑐗𑐶𑐐𑐹𑐐𑐸 𑐟𑐐𑐶𑑄) 𑐮𑐫𑑂 𑐣𑐾𑐰𑐵𑑅 𑐨𑐵𑐫𑑂 𑐧𑑂𑐰𑐣𑐷𑐥𑐶𑑄 𑐟𑐳𑐎𑑄 𑐴𑐾 𑐩𑑂𑐴𑑀 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐶𑑄 𑐊𑐳. 𑐊𑐮. 𑐳𑐷. (𑐰𑐶𑐎𑑂𑐬𑐩 𑐳𑑄𑐰𑐟𑑂 𑑒𑑐𑑑𑑕 𑐳𑐵𑐮𑐫𑑂) 𑐧𑐶𑐫𑐵𑐧𑐮𑐫𑑂 𑐩𑐸𑐎𑑂𑐎𑑄 𑐣𑐷𑐣𑐶𑐳𑑅 𑐧𑑂𑐰𑐣𑐵𑐩𑐶 𑐩𑐢𑑂𑐫𑐾 𑐣𑐾𑐰𑐵𑑅 𑐨𑐵𑐫𑑂 𑐎𑐫𑐵𑑅 𑐖𑐵𑑃𑐔 𑐧𑐶𑐄𑐥𑐶𑑄 𑐣𑐶𑐳𑐮𑑄 𑐩𑑂𑐴𑑀 𑐩𑐖𑐹 𑑋 𑐠𑑂𑐰 𑐴𑐶𑐳𑐵𑐧𑑄 𑐠𑑁𑑄 𑐣𑐾𑐰𑐵𑑅 𑐨𑐵𑐫𑑂 𑐎𑐫𑐵𑑅 𑐖𑐵𑑃𑐔 𑐧𑐶𑐂𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐮𑑂𑐫𑐵𑑅 𑐡𑑂𑐰𑐮𑑄𑐡𑑂𑐰𑑅 𑐡𑐫𑐾𑐩𑐵𑑅 𑑋 𑐟𑐬 𑐰𑐶𑐜𑐩𑑂𑐧𑐣𑐵, 𑐠𑐐𑐸𑐣𑐾𑐫𑐵 𑐊𑐳.𑐂.𑐂. 𑐥𑐬𑐷𑐎𑑂𑐲𑐵𑐫𑑂 𑐣𑐾𑐰𑐵𑑅 𑐨𑐵𑐫𑑂 𑐎𑐫𑐵𑑅 𑐖𑐵𑑃𑐔 𑐧𑐶𑐄𑐥𑐶𑐣𑐶𑐐𑐸 𑐮𑑂𑐫𑐵𑑅 𑐩𑐸𑐎𑑂𑐎𑑄 𑐗𑐶𑑄𑐥𑑂𑐫𑐩𑑂𑐴 𑐖𑐎 𑑋 𑐠𑐖𑑂𑐫𑐵𑑅𑐐𑐸 𑐳𑑂𑐠𑐶𑐟𑐶 𑐰𑑅𑐐𑐸𑐮𑐶𑑄 𑐗𑐷 𑐣𑐾𑐰𑐵𑑅𑐟 𑐣𑑄 𑐕𑐸𑑄 𑐨𑐔𑐵 𑐖𑐶𑐩𑑂𑐩𑐾𑐰𑐵𑐬 𑐖𑐹𑐳𑐵𑑄 𑐟𑐧𑐶 𑐟𑑅𑐢𑑄𑐐𑐸 𑐐𑐮𑑂𑐟𑐷 𑐮𑐵 𑐠𑐵𑐿‌𑐫𑐵𑐐𑐸 𑐥𑐵𑐛𑑂𑐫𑐎𑑂𑐬𑐩 𑐴𑐾 𑐏𑑅 𑑋 𑐖𑐶𑐩𑐶𑐐𑐸 𑐥𑐵𑐮𑐵𑐫𑑂 𑐣𑐾𑐥𑐵𑐮𑐷, 𑐴𑐶𑐣𑑂𑐡𑐷 𑐰 𑐣𑐾𑐥𑐵𑐮𑐨𑐵𑐲𑐵 𑐩𑐢𑑂𑐫𑐾 𑐕𑐐𑐹 𑐰𑐶𑐲𑐫 𑐀𑐣𑐶𑐰𑐵𑐬𑑂𑐫 𑐬𑐸𑐥𑑄 𑐎𑐵𑐫𑐾 𑐴𑐾 𑐩𑐵𑑅 𑑋 𑐟𑐬 𑐁𑑅 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐵𑐮 𑐎𑐶 𑐋𑐔𑑂𑐕𑐶𑐎 𑐐𑐞𑐶𑐟 𑐰𑐵 𑐎𑐩𑑂𑐥𑑂𑐫𑐹𑐚𑐬 𑐠𑐾𑑄𑐖𑑂𑐫𑐵𑑅𑐐𑐸 𑐕𑐐𑐹 𑐰𑐶𑐲𑐫 𑐟𑑂𑐰𑑅𑐟𑐾𑐩𑐵𑑅𑐐𑐸 𑐧𑐵𑐢𑑂𑐫𑐟𑐵 𑐡𑐸 𑑋 𑐀𑐮𑐾 𑐳𑐸 𑐩𑐵𑑄 𑐧𑑁𑐣𑑄 𑐠𑑅 𑐩𑐳𑑂𑐟𑐫𑑂𑐟 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾𑐟 𑐄𑐖𑑄 𑐧𑐷 ? 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑑄 𑐴𑐾 𑐣𑐾𑐥𑐵𑑅𑐩𑐶𑐟𑐫𑑂𑐐𑐸 𑐦𑐸𑐎𑑂𑐎𑑄 𑐩𑐵𑑄𑐨𑐵𑐫𑑂𑐫𑐵𑐟 𑐬𑐵𑐲𑑂𑐚𑑂𑐬 𑐨𑐵𑐲𑐵 𑐢𑐎𑐵𑑅 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐎𑐹𑐐𑐸 𑐂𑐮𑐫𑑂 𑐰𑐶𑐡𑑂𑐫𑐵𑐮𑐫 𑐟𑐴𑐫𑑂 𑐩𑐵𑑄𑐨𑐵𑐫𑑂 𑐩𑐢𑑂𑐫𑐾 𑐕𑐐𑐹 𑐀𑐣𑐶𑐰𑐵𑐬𑑂𑐫 𑐰𑐶𑐲𑐫 𑐢𑐎𑐵𑑅 𑐟𑐫𑐾𑐩𑐵𑑅 𑑋 𑐫𑐡𑐶 𑐁𑑅𑐫𑐵𑐟 𑐀𑐖𑑂𑐫𑐵𑑅𑐐𑐸 𑐧𑑂𑐫𑐰𑐳𑑂𑐠𑐵 𑐳𑐩𑑂𑐨𑐰 𑐩𑐖𑐹𑐳𑐵 𑐣𑐾𑐥𑐵𑐮𑐷 𑐰𑐶𑐲𑐫𑐫𑐵𑐟 𑐧𑐶𑐫𑐵𑐟𑑅𑐐𑐸 𑑑𑑐𑑐 𑐥𑐹𑐬𑑂𑐞𑐵𑑄𑐎𑐫𑐵𑐟 𑑕𑑐 𑐥𑐹𑐬𑑂𑐞𑐵𑑄𑐎 𑐫𑐵𑐣𑐵𑑅 𑐮𑑂𑐫𑑄𑐐𑐸 𑑕𑑐 𑐥𑐹𑐬𑑂𑐞𑐵𑑄𑐎𑐫𑐵𑐐𑐸 𑐕𑐐𑐹 𑐩𑐵𑑄𑐨𑐵𑐫𑑂 𑐎𑐵𑐫𑐾𑐩𑐵𑑅𑐐𑐸 𑐧𑑂𑐫𑐰𑐳𑑂𑐠𑐵 𑐫𑐵𑐫𑐾 𑐴𑐾 𑐩𑐵𑑅 𑐠𑐾𑑄 𑐔𑑂𑐰𑑄 𑑋 𑐠𑐠𑐾 𑐖𑐹𑐳𑐵 𑐟𑐶𑐣𑐶 𑐣𑐾𑐥𑐵𑐮𑐨𑐵𑐲𑐵 𑐣𑐵𑐥𑑄 𑐩𑐾𑐩𑐾𑐐𑐸 𑐩𑐵𑑄𑐨𑐵𑐫𑑂𑐫𑐵𑐐𑐸 𑐰𑐶𑐎𑐵𑐳𑐫𑐵 𑐮𑑃 𑐔𑐵𑐮𑐵𑐰𑐣𑐷 𑑋

𑑓) 𑐣𑐾𑐰𑐵𑑅𑐟𑐫𑑂𑐐𑐸 𑐩𑐾𑐐𑐸 𑐥𑐴𑐶𑐔𑐵𑐣 𑐢𑐂𑐐𑐸 𑐂𑐩𑐶𑐐𑐸 𑐳𑑄𑐳𑑂𑐎𑐺𑐟𑐶 𑐏𑑅 𑑋 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐟𑐳𑐎𑑄 𑐴𑐾 𑐟𑑅𑐩𑐶 𑐢𑐂𑐐𑐸 𑐏𑑃 𑐮𑐵 𑐰𑐶𑐡𑐾𑐱𑐷 𑐔𑑂𑐰𑐩𑐶𑐟𑐫𑑂𑐳𑑄 𑐔𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐴𑐾 𑐏𑑅 𑑋 𑐟𑐬 𑐠𑐸𑐎𑐶𑐫𑐵𑐟 𑐐𑐠𑐾 𑐫𑐵𑐣𑐵𑑅 𑐣𑐶𑐬𑐣𑑂𑐟𑐬𑐟𑐵 𑐧𑐶𑐂 𑐢𑐂𑐐𑐸 𑐠𑑁𑑄𑐫𑐵 𑐟𑑅𑐢𑑄𑐐𑐸 𑐳𑐩𑐳𑑂𑐫𑐵 𑐏𑑅 𑑋 𑐚𑐾𑐎𑑂𑐣𑑀𑐮𑑀𑐖𑐷𑐫𑐵𑐐𑐸 𑐰𑐶𑐎𑐵𑐳𑑄 𑐫𑐵𑐣𑐵𑑅 𑐣𑐾𑐥𑐵𑑅𑐩𑐶𑐟𑐫𑑂𑐐𑐸 𑐖𑐷𑐰𑐣 𑐱𑐿𑐮𑐷𑐂 𑐫𑐎𑑂𑐰 𑐴𑐶𑐄𑐥𑐵𑑅 𑐰𑐫𑐾 𑐢𑐸𑑄𑐎𑐮 𑑋 𑐠𑐸𑐐𑐸 𑐀𑐰𑐳𑑂𑐠𑐵𑐫𑑂 𑐗𑐷𑐐𑐸 𑐳𑑄𑐳𑑂𑐎𑐺𑐟𑐶𑐫𑐵𑐟 𑐩𑑂𑐰𑐵𑐎𑐵 𑐟𑐫𑐾𑐐𑐸 𑐏𑑅𑐳𑐵 𑐄𑐎𑐶𑐫𑐵𑐟 𑐳𑐬𑐮𑐷𑐎𑐬𑐞 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐟𑐬 𑐳𑐬𑐮𑐷𑐎𑐬𑐞𑐫𑐵 𑐣𑐵𑐩𑐫𑑂 𑐳𑑄𑐳𑑂𑐎𑐺𑐟𑐶 𑐴𑐾 𑐮𑑀𑐥 𑐖𑐸𑐂𑐎𑐠𑑄𑐫𑐵 𑐖𑑂𑐫𑐵 𑐳𑐸𑐣𑐵 𑐣𑑄 𑐫𑐵𑐫𑐾 𑐩𑐖𑐶𑐄 𑑋 𑐣𑐵𑐥𑑄 𑐳𑑄𑐳𑑂𑐎𑐺𑐟𑐶𑐫𑐵𑐟 𑐧𑑀𑐗𑐫𑐵 𑐬𑐸𑐥𑐫𑑂 𑐎𑐸𑐧𑐶𑐫𑐵 𑐔𑑂𑐰𑐣𑐾 𑐣𑑄 𑐦𑐂𑐩𑐏𑐸 𑑋 𑐳𑐬𑑂𑐥 𑐣𑑄 𑐳𑐷𑐩𑐵, 𑐎𑐠𑐶 𑐣𑑄 𑐟𑑂𑐰𑑅𑐩𑐢𑐸𑐮𑐾𑐩𑐵 𑐢𑐂𑐐𑐸 𑐣𑐷𑐟𑐶 𑐀𑐣𑐸𑐬𑐸𑐥 𑐠𑐸𑐐𑐸 𑐖𑑂𑐫𑐵 𑐫𑐵𑐫𑐾 𑐦𑐫𑐾𑐎𑐾𑐩𑐵𑑅 𑑋 𑐀𑐮𑐾 𑐠𑐸𑐐𑐸 𑐖𑑂𑐫𑐵𑐫𑑂 𑐣𑐾𑐰𑐵𑑅𑐟𑐫𑑂 𑐥𑐸𑐬𑑀𑐴𑐶𑐟 𑐰𑐬𑑂𑐐𑑄 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐾𑐩𑐵𑑅𑐐𑐸 𑐏𑐣𑐾𑐡𑐸 𑑋

𑑔) 𑐃𑐫𑐵 𑐴𑐶𑐄𑐥𑐵𑑅𑐮𑐶𑐳𑐾𑑄 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐀𑐣𑑂𑐟𑐬 𑐖𑐵𑐟𑐷𑐫 𑐂𑐴𑐶𑐥𑐵 𑐀𑐥𑑂𑐰𑐫𑐵 𑐰𑑅𑐐𑐸 𑐡𑐸 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐣𑑄 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐕𑐸𑑄 𑐨𑐔𑐵 𑐣𑐎𑐵𑐬𑐵𑐟𑑂𑐩𑐎 𑐮𑐶𑐔𑑂𑐰𑑅 𑐮𑐵𑑅𑐰𑑄𑐐𑐸 𑐡𑐸 𑑋 𑐟𑐬 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶 𑐥𑑂𑐬𑐟𑐶 𑐩𑐵𑐫𑐵 𑐡𑐟 𑐢𑐵𑑅𑐳𑐵 𑐀𑐣𑑂𑐟𑐬𑐖𑐵𑐟𑐷𑐫 𑐂𑐴𑐶𑐥𑐵𑐫𑐵𑐟 𑐳𑐎𑐵𑐬𑐵𑐟𑑂𑐩𑐎 𑐬𑐸𑐥𑐫𑑂 𑐕𑑂𑐫𑐮𑐾𑐐𑐸 𑐣𑑄 𑐫𑐎𑑂𑐰 𑐠𑐵𑐫𑑂 𑐡𑐸 𑑋 𑐐𑐿𑐬 𑐣𑐾𑐰𑐵𑑅 𑐮𑐶𑐳𑐾𑑄 𑐂𑐴𑐶𑐥𑐵 𑐫𑐵𑐂𑐥𑐶𑑄 𑐗𑐷 𑐣𑐾𑐰𑐵𑑅 𑐩𑑂𑐴𑑂𑐫𑐵𑐫𑑂𑐩𑐳𑑂𑐟𑐫𑑂𑐳𑑄 𑐣𑑂𑐴𑐹𑐐𑐸 𑐥𑐬𑐶𑐰𑐵𑐬𑐫𑐵 𑐡𑐸𑐖𑑅𑐥𑐶𑑄𑐟 𑐩𑐏𑐸𑐳𑐵𑑄 𑐠𑑅 𑐎𑐵𑐫𑐩𑑂𑐴𑑂𑐫𑐵𑐫𑑂 𑐳𑐎𑐳𑐶𑐟𑑄 𑐩𑐔𑐵𑐧𑐮𑐫𑑂𑐣𑐶𑐳𑐾𑑄 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐵𑑅 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐎𑐠𑑄 𑐧𑑂𑐰𑐮𑑄𑐎𑐾𑐐𑐸 𑐫𑐵𑐟 𑐢𑐵𑑅𑐳𑐵 𑐄𑐐𑐸 𑐥𑐬𑐶𑐰𑐵𑐬𑐫𑑂 𑐣𑐾𑐰𑐵𑑅 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶𑐫𑐵𑐐𑐸 𑐧𑐵𑑄𑐮𑐵𑑅𑐐𑐸 𑐥𑑂𑐬𑐨𑐵𑐰 𑐮𑐵𑐂𑐐𑐸 𑐣𑐶𑐱𑑂𑐔𑐶𑐟 𑐡𑐸 𑑋 𑐀𑐠𑐾𑐴𑐾 𑐟𑐸𑑄, 𑐐𑐿𑐬 𑐣𑐾𑐰𑐵𑑅 𑐩𑐶𑐳𑐵 𑐧𑑂𑐫𑐵𑐴𑐵 𑐫𑐵𑐣𑐵 𑐴𑐂𑐥𑐶𑑄 𑐗𑐷 𑐣𑐾𑐰𑐵𑑅 𑐎𑐵𑐫𑐩𑐳𑑂𑐟𑐫𑑂𑐳𑑄 𑐠𑑅 𑐎𑐮𑐵𑑅 𑐰 𑐩𑐳𑑂𑐟𑐫𑑂𑐟 𑐣𑐾𑐰𑐵𑑅 𑐨𑐵𑐫𑑂𑐏𑑃 𑐮𑑂𑐴𑐵𑐫𑐾𑐟 𑐥𑑂𑐬𑑀𑐟𑑂𑐳𑐵𑐴𑐣 𑐧𑐶𑐮 𑐢𑐵𑑅𑐳𑐵 𑐠𑐸𑐎𑐶𑑄 𑐣𑑄 𑐣𑐾𑐰𑐵𑑅 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐰𑐶𑐎𑐵𑐳𑐫𑑂 𑐟𑑅𑐢𑑄𑐐𑐸 𑐥𑐮𑐵𑑅 𑐖𑐹𑐰𑐣𑐾𑐦𑐸 𑑋 𑐖𑑂𑐫𑐵 𑐀𑐰𑐱𑑂𑐫 𑐴𑐾 𑐠𑐵𑐎𑐸, 𑐟𑐬 𑐠𑑁𑑄𑐫𑐵𑐐𑐸 𑐀𑐰𑐳𑑂𑐠𑐵𑐫𑑂 𑐠𑐸𑐐𑐸 𑐖𑑂𑐫𑐵𑐫𑑂 𑐀𑐐𑑂𑐬𑐳𑐬 𑐖𑐸𑐂𑐩𑐵𑑅𑐐𑐸 𑐧𑐵𑐢𑑂𑐫𑐟𑐵 𑐴𑐾 𑐡𑐸 𑑋

𑑕) 𑐩𑐢𑑂𑐫𑐎𑐵𑐮 𑐟𑐎 𑐮𑐵 𑐣𑐾𑐥𑐵𑑅 𑐐𑐵𑐮𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐴𑐾 𑐱𑐵𑐳𑐣 𑐖𑐹𑐐𑐸𑐮𑐶𑑄 𑐣𑐾𑐰𑐵𑑅𑐟 𑐕𑐐𑐹 𑐰𑐵 𑐩𑐾𑐐𑐸 𑐎𑐠𑑄 𑐬𑐵𑐖𑐣𑐷𑐟𑐶𑐂 𑐳𑐎𑑂𑐬𑐶𑐫 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐴𑐾 𑐏𑑅 𑑋 𑐟𑐬 𑐱𑐵𑐴 𑐖𑐸𑐖𑐸 𑐰 𑐬𑐵𑐞𑐵𑐱𑐵𑐳𑐣𑐫𑑂 𑐣𑐾𑐰𑐵𑑅𑐟 𑐱𑑀𑐲𑐶𑐟 𑐰𑐬𑑂𑐐𑐫𑑂 𑐮𑐵𑑅𑐐𑐸𑐮𑐶𑑄 𑐄𑐥𑐶𑑄 𑐬𑐵𑐖𑐣𑐷𑐟𑐶𑐥𑐵𑐏𑐾𑑄 𑐧𑐸𑐮𑐸𑐴𑐸𑑃 𑐟𑐵𑐥𑐵𑐣𑐵 𑐰𑑄𑐐𑐸 𑐏𑑅 𑑋 𑐫𑐡𑑂𑐫𑐥𑐶 𑐬𑐵𑐞𑐵 𑐱𑐵𑐳𑐣𑐫𑐵 𑐧𑐶𑐬𑑀𑐢 𑐫𑐵𑑅𑐐𑐸 𑐁𑐣𑑂𑐡𑑀𑐮𑐣𑐫𑑂 𑐰𑐵 𑐥𑑂𑐬𑐖𑐵𑐟𑐣𑑂𑐟𑑂𑐬 𑐮𑐶𑐥𑐵 𑐐𑐛𑐣 𑐖𑐹𑐐𑐸 𑐥𑑂𑐬𑐩𑐸𑐏 𑐬𑐵𑐖𑐣𑐷𑐟𑐶𑐎 𑐡𑐮𑐫𑑂 𑐣𑐾𑐰𑐵𑑅𑐟 𑐣𑑄 𑐳𑐎𑑂𑐬𑐶𑐫 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐳𑑂𑐥𑐲𑑂𑐚 𑐴𑐾 𑐡𑐸 𑑋 𑐐𑐞𑐟𑐣𑑂𑐟𑑂𑐬𑐫𑐵 𑐳𑑂𑐠𑐵𑐥𑐣𑐵 𑐮𑐶𑐥𑐵 𑐣𑐾𑐰𑐵𑑅𑐟𑐫𑑂𑐐𑐸 𑐴𑐾 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐬𑐸𑐥𑐫𑑂 𑐣𑐾𑐥𑐵𑑅 𑐬𑐵𑐲𑑂𑐚𑑂𑐬𑐶𑐫 𑐥𑐵𑐬𑑂𑐚𑐷𑐫𑐵 𑐐𑐛𑐣 𑐖𑐹𑐐𑐸 𑐏𑑅 𑑋 𑐣𑑂𑐴𑐵𑐥𑐵𑑄𑐐𑐸 𑐰 𑐣𑐶𑐎𑑂𑐰𑑅𑐐𑐸 𑐳𑑄𑐰𑐶𑐢𑐵𑐣𑐳𑐨𑐵𑐫𑐵 𑐔𑐸𑐣𑐵𑐰𑐫𑑂 𑐕𑐸𑑄 𑐨𑐔𑐵 𑐩𑐟 𑐎𑐫𑐵𑑅 𑐕𑐩𑑂𑐴 𑐕𑐩𑑂𑐴 𑐥𑑂𑐬𑐟𑐶𑐣𑐶𑐢𑐶𑐳𑐵𑑄 𑐧𑑂𑐫𑐰𑐳𑑂𑐠𑐵𑐥𑐶𑐎𑐵𑐫𑑂 𑐕𑑂𑐰𑐫𑐾𑐦𑐸𑐐𑐸 𑐣𑑄 𑐏𑑅 𑑋 𑐟𑐬 𑐕𑐸𑑄 𑐃 𑐣𑑂𑐴𑑂𑐫𑑅 𑐖𑐹𑐐𑐸 𑐥𑑂𑐬𑐟𑐶𑐣𑐶𑐢𑐶𑐳𑐨𑐵𑐫𑐵𑐐𑐸 𑐔𑐸𑐣𑐵𑐰𑐫𑑂 𑐢𑐵𑑅𑐳𑐵 𑐠𑐸𑐐𑐸 𑐥𑐵𑐬𑑂𑐚𑐷 𑐧𑐵𑑄𑐩𑐮𑐵𑐎 𑐎𑑂𑐰𑑅𑐡𑐮 𑑋 𑐬𑐵𑐲𑑂𑐚𑑂𑐬𑐶𑐫 𑐥𑐵𑐬𑑂𑐚𑐷 𑐖𑐸𑐂 𑐩𑐦𑐸𑐐𑐸 𑐮𑐵 𑐡𑐸 𑐴𑐾 𑐡𑐸 𑑋 𑐣𑑂𑐴𑐵𑐥𑐵𑐫𑐵𑐐𑐸 𑐔𑐸𑐣𑐵𑐰𑐫𑑂 𑐣𑐷𑐣𑑂𑐫𑐵𑐡𑑂𑐰𑑅 𑐳𑑂𑐰𑐷𑐡𑑂𑐰𑑅 𑐩𑐟 𑐎𑐵𑐫𑐾 𑐦𑐸𑐐𑐸𑐮𑐶𑐂 𑐁𑑅 𑐰𑐫𑐵𑑅 𑐳𑑂𑐰𑐷𑐣𑑂𑐫𑐵𑐳𑑅 𑐩𑐟 𑐴𑐾 𑐎𑐵𑐫𑐾 𑐩𑐦𑐸𑐐𑐸𑐫𑐵𑐟 𑐐𑐠𑐾 𑐫𑐵𑐣𑐵𑑅 𑐰𑐶𑐱𑑂𑐮𑐾𑐲𑐞 𑐫𑐵𑐫𑐾𑐐𑐸 ? 𑐖𑐶𑐐𑐸 𑐧𑐶𑐔𑐵𑑅 𑐎𑐠𑑄 𑐎𑐵𑑄𑐐𑑂𑐬𑐾𑐳 𑐰𑐵 𑐊𑐩𑐵𑐮𑐾 𑐰𑐵 𑐐𑐸𑐐𑐸𑑄 𑐣𑑄 𑐥𑐵𑐬𑑂𑐚𑐷𑐂 𑐳𑐎𑑂𑐬𑐶𑐫 𑐖𑐸𑐫𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑑄 𑐄𑐐𑐸 𑐥𑐵𑐬𑑂𑐚𑐷𑐫𑐵 𑐡𑐸𑐖𑑅𑐫𑐵 𑐣𑐵𑐥𑑄 𑐣𑐾𑐰𑐵𑑅𑐟 𑐏𑑅 𑐢𑐂𑐐𑐸 𑐏𑑃 𑐩𑐣𑑄𑐟𑐸𑐣𑐾 𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋 𑐀𑐮𑐾 𑐣𑐾𑐰𑐵𑑅𑐟𑐫𑑂𑐐𑐸 𑐄𑐟𑑂𑐠𑐵𑐣𑐫𑐵 𑐮𑐵𑐐𑐶𑑄 𑐄𑐩𑐶𑐐𑐸 𑐨𑐹𑐩𑐶𑐎𑐵 𑐣𑐶𑐬𑑂𑐞𑐵𑐫𑐎 𑐳𑐵𑐰𑐶𑐟 𑐖𑐸𑐂𑐦𑐸 𑑋

𑑖) 𑐣𑐾𑐥𑐵𑑅 𑐡𑐾𑐫𑑂 𑐳𑑄𑐑𑐷𑐫𑐟𑐵𑐫𑑂 𑐰𑐣𑐾𑐢𑐸𑑄𑐎𑐹𑐐𑐸 𑐠𑑁𑑄𑐫𑐵 𑐀𑐰𑐳𑑂𑐠𑐵𑐫𑑂 𑐥𑑂𑐬𑐵𑐔𑐷𑐣 𑐰 𑐩𑐢𑑂𑐫𑐎𑐵𑐮𑐣𑐶𑐳𑐾𑑄 𑐣𑐾𑐰𑐵𑑅𑐟𑐫𑑂𑐐𑐸 𑐰𑐵𑐳𑐳𑑂𑐠𑐵𑐣𑐫𑐵 𑐬𑐸𑐥𑐫𑑂 𑐥𑐬𑐶𑐔𑐶𑐟 𑐂𑐮𑐵𑐎𑐵 𑐁𑑅 𑐰𑐫𑐵𑑅 𑑓 𑐣𑐩𑑂𑐧𑐬 𑐥𑑂𑐬𑐡𑐾𑐱𑐫𑐵 𑐬𑐸𑐥𑐫𑑂 𑐣𑑂𑐴𑑂𑐫𑑅𑐣𑐾 𑐰𑑅𑐐𑐸 𑐡𑐸 𑑋 𑐠𑐸𑐐𑐸 𑐥𑑂𑐬𑐡𑐾𑐱𑐫𑑂 𑐡𑐸𑐠𑑂𑐫𑐵𑑅𑐐𑐸 𑐗𑐶𑑄𑐳𑑂𑐰𑑄𑐐𑐹 𑐖𑐶𑐮𑑂𑐮𑐵 𑐩𑐢𑑂𑐫𑐾 𑐔𑐶𑐟𑐰𑐣 𑐧𑐵𑐴𑐾𑐎 𑐩𑐾𑐐𑐸 𑐦𑐸𑑂𑐸𑐎𑑂𑐎𑑄 𑐖𑐶𑐮𑑂𑐮𑐵𑐫𑑂 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐣𑐾𑐰𑐵𑑅𑐟𑐫𑑂𑐐𑐸 𑐧𑐳𑑀𑐧𑐵𑐳 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐸𑐐𑐸 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐢𑐵𑑅𑐳𑐵 𑐁𑑅 𑐟𑐎 𑐎𑑂𑐰𑑅𑐕𑐶𑐄𑐐𑐸 𑐩𑐡𑐸𑐣𑐶, 𑐀𑐮𑐾 𑐠𑐷𑐠𑐷 𑐩𑐣𑐹𑐟𑐫𑑂𑐳𑑄 𑐠𑐷𑐠𑐷 𑐰𑐶𑐔𑐵𑑅 𑐥𑑂𑐰𑑄𑐎𑐾𑐐𑐸 𑐢𑐵𑑅𑐳𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐐𑐹 𑐠𑐬𑐷𑑄 𑐠𑑂𑐰 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐥𑐱𑐸𑐥𑐟𑐶 𑐥𑑂𑐬𑐡𑐾𑐱 𑐖𑐸𑐂𑐩𑐵𑑅 𑐢𑐎𑐵𑑅 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐕𑐐𑐹 𑐢𑐬𑑂𑐩𑐫𑐵 𑐣𑐵𑐩𑑄 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐟𑐫𑐾𑐐𑐸 𑐥𑐵𑐫𑑂𑐕𑐶 𑐩𑐖𑐹 𑑋 𑐠𑐸𑐎𑐶𑐫𑐵 𑐣𑐵𑑄 𑐥𑐱𑐸𑐥𑐟𑐶 𑐰𑐵 𑐳𑑂𑐰𑐫𑐩𑑂𑐨𑐹 𑐥𑑂𑐬𑐡𑐾𑐱 𑐖𑐸𑐂 𑐦𑐂 𑐩𑐏𑐸 𑑋 𑐠𑐸𑐐𑐸 𑐥𑑂𑐬𑐡𑐾𑐱𑐫𑑂 𑐣𑐾𑐰𑐵𑑅𑐟 𑐰 𑐟𑐵𑐩𑐵𑐒𑐟𑐫𑑂𑐐𑐸 𑐩𑐹 𑐧𑐳𑑂𑐟𑐷 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐠𑐸𑐐𑐸 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐣𑐾𑐰𑐵𑑅 𑐟𑐵𑐩𑑂𑐳𑐵𑐮𑐶𑐒 𑐖𑐸𑐂𑐩𑐵𑑅 𑐢𑐎𑐵𑑅 𑐢𑐵𑐂𑐥𑐶𑑄 𑐣𑑄 𑐫𑐎𑑂𑐰 𑐴𑐾 𑐡𑐸 𑑋 𑐀𑐮𑐾 𑐠𑑂𑐰 𑐣𑐵𑐩𑐵𑐎𑐬𑐞 𑐥𑐵𑐫𑑂𑐕𑐶 𑐣𑑄 𑐖𑐹 𑑋 𑐟𑐬 𑐠𑐸𑐐𑐸 𑐥𑑂𑐬𑐡𑐾𑐱𑐫𑐵 𑐠𑐷𑐠𑐷 𑐖𑐶𑐮𑑂𑐮𑐵𑐫𑑂 𑐐𑐿𑐬 𑐣𑐾𑐰𑐵𑑅𑐟 𑐫𑐎𑑂𑐰 𑐴𑐾 𑐡𑐫𑐵 𑐰𑐫𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐠𑐸𑐐𑐸 𑐣𑐵𑑄 𑐐𑐿𑐬 𑐣𑐾𑐰𑐵𑑅𑐟𑐫𑑂𑐟 𑐔𑐶𑐟𑑂𑐟 𑐧𑐸𑐗𑐾 𑐩𑐖𑐸𑐂𑐦𑐸 𑑋 𑐠𑐸𑐐𑐸 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱 𑐖𑐸𑐂𑐩𑐵𑑅 𑐢𑐵𑐂𑐥𑐶𑑄 𑐣𑑄 𑐡𑐸 𑑋 𑐠𑐸𑐎𑐷 𑐕𑐐𑐹 𑐏𑑃 𑐮𑐵 𑐏𑐸𑐳𑐶𑐫𑐵𑐐𑐸 𑐣𑐵𑐩𑑄 𑐥𑑂𑐬𑐡𑐾𑐱𑐫𑐵 𑐣𑐵𑐩𑐵𑐎𑐬𑐞 𑐕𑐐𑐹 𑐥𑐬𑐩𑑂𑐥𑐬𑐵𑐐𑐟 𑐧𑐶𑐔𑐵𑑅 𑐏𑑅 𑑋 𑐣𑐵𑐥𑑄 𑐠𑐸𑐐𑐸 𑐥𑑂𑐬𑐡𑐾𑐱𑐫𑐵 𑐗𑐶𑑄𑐳𑑂𑐰𑑄𑐐𑐹 𑐩𑐢𑑂𑐫𑐾 𑐫𑐎𑑂𑐰 𑐖𑐶𑐮𑑂𑐮𑑂𑐮𑐵 𑐧𑐵𑐐𑐩𑐟𑐶 𑐏𑐸𑐳𑐶𑑄 𑐥𑐶𑐣𑐾 𑐮𑐵𑑅 𑑋 𑐕𑐸𑑄 𑐣𑑄 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐎𑑂𑐰𑑅𑐕𑐷𑐧𑐮𑐫𑑂 𑐀𑐣𑐫𑐵𑐐𑐸 𑐂𑐟𑐶𑐴𑐵𑐳 𑐰 𑐳𑑄𑐳𑑂𑐎𑐺𑐟𑐶𑐫𑐵𑐟 𑐮𑑂𑐰𑐩𑑄𑐎𑐾 𑐩𑐖𑐶𑐄 𑑋 𑐳𑑂𑐰𑐣𑐶𑐐𑑅 𑐰 𑐄𑐎𑐶𑐫𑐵 𑐥𑑂𑐫𑐏𑐾𑐬𑑄𑐫𑐵𑐐𑐸 𑐂𑐮𑐵𑐎𑐵 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐣𑐵𑐩𑑄 𑐩𑐢𑑂𑐫𑐎𑐵𑐮𑐫𑑂 𑐥𑑂𑐬𑐳𑐶𑐡𑑂𑐢 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐀𑐨𑐶𑐮𑐾𑐏, 𑐧𑑄𑐱𑐵𑐧𑐮𑐷 𑐰 𑐩𑐾𑐩𑐾𑐐𑐸 𑐥𑑂𑐬𑐩𑐵𑐞𑑄 𑐫𑐔𑑂𑐔𑐸𑐎 𑐴𑐾 𑐎𑑂𑐫𑑄 𑑋 𑐠𑐸𑐐𑐸 𑐂𑐮𑐵𑐎𑐵𑐫𑑂 𑐠𑐷𑐠𑐷 𑐳𑑂𑐰𑐟𑐣𑑂𑐟𑑂𑐬 𑐬𑐵𑐖𑑂𑐫𑐟 𑐳𑑂𑐠𑐵𑐥𑐣𑐵 𑐖𑐹𑐐𑐸 𑐏𑑅𑐳𑐵𑑄 𑐠𑐸𑐎𑐶𑐫𑐵𑐐𑐸 𑐩𑑄𑐎𑐵𑑅 𑐣𑐵𑑄 𑐣𑐾𑐥𑐵𑐮𑐩𑐞𑑂𑐜𑐮 𑐴𑐾 𑐏𑑅 𑑋 𑐎𑐵𑐱𑐷𑐣𑐵𑐠 𑐟𑐩𑑀𑐚𑐫𑐵 𑐢𑐵𑐥𑐹 𑐎𑐠𑑄 𑐠𑐸𑐐𑐸 𑐂𑐮𑐵𑐎𑐵 𑐎𑐬𑐶𑐧 𑐎𑐬𑐶𑐧 𑐩𑐞𑑂𑐜𑐮𑐵𑐎𑐵𑐬 𑐨𑐹𑐹𑐎𑑂𑐲𑐾𑐟𑑂𑐬 𑐖𑐹𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐳𑑂𑐰𑑄𑐐𑐹 𑐄𑐥𑐥𑑂𑐬𑐡𑐾𑐱 𑐎𑐠𑑄 𑐰𑐶𑐨𑐵𑐖𑐣 𑐫𑐵𑐫𑐾𑐦𑐸 𑑋 𑐕𑐐𑐸𑐮𑐶 𑐫𑐾𑑃, 𑐫𑐮, 𑐏𑑂𑐰𑐥 𑐰𑑅𑐳𑐵 𑐩𑐾𑐐𑐸𑐮𑐶𑐂 𑐎𑐵𑐨𑑂𑐬𑐾, 𑐳𑐶𑐣𑑂𑐢𑐸, 𑐣𑐸𑐰𑐵𑐎𑑀𑐚 𑐰 𑐩𑐎𑐰𑐵𑐣𑐥𑐸𑐬𑐫𑐵𑐟 𑐟𑐫𑐾𑐦𑐸 𑑋 𑐀𑐠𑐾𑐴𑐾 𑐳𑑂𑐰𑑄𑐐𑐹𑐐𑐸 𑐄𑐥𑐥𑑂𑐬𑐡𑐾𑐱𑐫𑑂 𑐢𑐵𑐡𑐶𑐒, 𑐬𑐳𑐸𑐰𑐵, 𑐡𑑀𑐮𑐏𑐵, 𑐬𑐵𑐩𑐾𑐕𑐵𑐥 𑐰 𑐳𑐶𑐣𑑂𑐢𑐸𑐮𑐷 𑐮𑐵𑑅𑐰𑐣𑐷 𑑋 𑐠𑐸𑐎𑐠𑑄 𑐗𑐶𑑄𑐳𑑂𑐰𑑄𑐐𑐹 𑐖𑐶𑐮𑑂𑐮𑐵 𑐩𑐢𑑂𑐫𑐾 𑐗𑐶𑑄𑐣𑐶𑐐𑐹 𑐖𑐶𑐮𑑂𑐮𑐵 𑐡𑐸𑐠𑑂𑐫𑐵𑑅𑐐𑐸 𑐋𑐟𑐶𑐴𑐵𑐳𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐣𑐾𑐥𑐵𑐮𑐩𑐞𑑂𑐜𑐮 𑐣𑐵𑑄 𑐴𑐾 𑐠𑑁𑑄𑐫𑐵𑐐𑐸 𑑓 𑐣𑐩𑑂𑐧𑐬 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐎𑐠𑑄 𑐥𑐵𑐫𑑂𑐕𑐶 𑐖𑐹 𑐢𑐂𑐐𑐸 𑐖𑐶𑐐𑐸 𑐰𑐶𑐔𑐵𑑅 𑐥𑑂𑐰𑑄𑐎𑐵𑐔𑑂𑐰𑐣𑐵 𑑋
𑐗𑐷 𑐣𑐾𑐰𑐵𑑅 𑐟𑐵𑐴𑐵𑐎𑑅𑐐𑐸 𑐂𑐟𑐶𑐴𑐵𑐳 𑐰 𑐀𑐩𑐹𑐮𑑂𑐫 𑐳𑑄𑐳𑑂𑐎𑐺𑐟𑐶 𑐡𑐸𑐐𑐸 𑐳𑐩𑐸𑐡𑐵𑐫 𑐏𑑅 𑑋 𑐗𑐷𑐐𑐸 𑐂𑐟𑐶𑐴𑐵𑐳 𑐣𑐾𑐥𑐵𑑅 𑐡𑐾𑐫𑑂𑐮𑐶𑐳𑐾 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐴𑐾 𑐳𑑂𑐰𑐵𑐥𑐹 𑐡𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐗𑐷𑐐𑐸 𑐳𑑄𑐳𑑂𑐎𑐺𑐟𑐶 𑐣𑐾𑐥𑐵𑑅 𑐡𑐾𑐫𑑂𑐫𑐵𑐐𑐸 𑐴𑐾 𑐕𑐐𑐹 𑐩𑑁𑐮𑐶𑐎 𑐳𑑄𑐳𑑂𑐎𑐺𑐟𑐶 𑐏𑑅 𑑋 𑐠𑐵𑐿‌ 𑐰𑐫𑐵𑑅 𑐗𑐷𑐐𑐸 𑐂𑐟𑐶𑐴𑐵𑐳 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐖𑑂𑐘𑐵𑐣 𑐫𑐎𑑂𑐰𑐳𑐶𑐣𑑄 𑐮𑑂𑐰𑑅𑐩𑑄𑐎𑐵𑐕𑑂𑐰𑐫𑐾 𑐢𑐸𑑄𑐎𑐮 𑐢𑐵𑑅𑐳𑐵 𑐕𑐸𑑄 𑐕𑐸𑑄 𑐟𑐟𑑂𑐰𑑄 𑐠𑐸𑐎𑐶𑐫𑐵𑐟 𑐀𑐥𑐧𑑂𑐫𑐵𑐏𑑂𑐫𑐵 𑐫𑐵𑐣𑐵 𑐴𑐫𑐵𑐔𑑂𑐰𑑄𑐐𑐸 𑐣𑑄 𑐏𑐣𑐾𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐎𑐸𑐟𑑅𑐫𑐵𑐟 𑐣𑐶𑐲𑑂𑐦𑐮 𑐫𑐵𑐫𑐾𑐟 𑐗𑐷𑐐𑐸 𑐡𑐠𑐸𑐂 𑐗𑐷𑐐𑐸 𑐂𑐟𑐶𑐴𑐵𑐳 𑐰 𑐳𑑄𑐳𑑂𑐎𑐺𑐟𑐶 𑐧𑐵𑐬𑐾 𑐏𑑃𑐮𑑂𑐴𑐵𑐧𑐮𑑂𑐴𑐵 𑐖𑐸𑐫𑐵 𑐴𑐾 𑐔𑑂𑐰𑐣𑐾𑐩𑐵𑑅 𑑋 𑐠𑑁𑑄 𑐰𑐶𑐱𑑂𑐰𑐫𑐵 𑐠𑐷𑐠𑐷 𑐡𑐾𑐳𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂 𑐥𑑂𑐬𑐟𑐶𑐣𑐶𑐢𑐶𑐫𑐵 𑐬𑐸𑐥𑐫𑑂 𑐗𑐵𑐫𑐵𑐡𑐷𑐥𑐶𑑄 𑐕𑐶𑐎𑐥𑐶𑑄 𑐳𑐎𑐮𑐳𑐶𑐫𑐵 𑐣𑑂𑐴𑑂𑐫𑑅𑐣𑐾 𑐣𑐾𑐰𑐵𑑅𑐟𑐫𑑂𑐐𑐸 𑐂𑐟𑐶𑐴𑐵𑐳 𑐰 𑐳𑑄𑐳𑑂𑐎𑐺𑐟𑐶 𑐧𑐵𑐬𑐾 𑐕𑐸𑑄 𑐏𑑃 𑐢𑐵𑐫𑐾 𑐡𑐫𑐵𑑅 𑐖𑐶 𑐟𑐳𑐎𑑄 𑐮𑐫𑑂𑐟𑐵𑑅 𑑋 𑐖𑐶𑑄 𑐢𑐫𑐵𑐐𑐸 𑐏𑑃𑐫𑑂𑐫𑐎𑑂𑐰 𑐩𑐔𑐵𑑅𑐩𑐐𑐵𑑅 𑐣𑑄 𑐖𑐸𑐂𑐦𑐸 𑑋 𑐀𑐮𑐾 𑐖𑐶𑐐𑐸 𑐢𑐵𑐬𑐞𑐵 𑐐𑐸𑐩𑑂𑐴𑐾𑐳𑐶𑐟𑑄 𑐔𑐶𑐟𑑂𑐟 𑐧𑐸𑐗𑐾 𑐩𑐖𑐸𑐂 𑐣𑑄 𑐦𑐸 𑑋 𑐟𑐬 𑐗𑐷 𑐣𑐾𑐰𑐵𑑅𑐟𑐫𑑂𑐐𑐸 𑐴𑐾 𑐳𑑂𑐰𑐵𑐬𑑂𑐠 𑐰 𑐴𑐷𑐟𑐫𑐵𑐟 𑐳𑐬𑑂𑐰𑑀𑐥𑐬𑐷 𑐟𑐫𑐵𑑅 𑐏𑑃𑐮𑑂𑐴𑐵𑐧𑐮𑑂𑐴𑐵 𑐫𑐵𑐟 𑐢𑐵𑑅𑐳𑐵 𑐰𑐂𑐐𑐸 𑐡𑐶𑐣𑐫𑑂 𑐖𑐹𑐳𑐵𑑄 𑐗𑐷 𑐧𑐵𑑄𑐮𑐵𑐎 𑐣𑑂𑐴𑑂𑐫𑑅𑐣𑐾 𑐰𑐣𑐾𑐦𑐂 𑑋 𑐠𑐸𑐐𑐸 𑐖𑑂𑐫𑐵𑐫𑑂 𑐡𑐾𑐫𑑂 𑐥𑐶𑐣𑐾 𑐔𑑂𑐰𑐣𑐵𑐡𑐷𑐥𑐶𑑄 𑐕𑐶𑐎𑐥𑐶𑑄 𑐳𑐎𑐳𑐶𑐐𑐸𑑄 𑐐𑑂𑐰𑐵𑐴𑐵𑐮𑐶 𑐀𑐟𑐶 𑐴𑐾 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹 𑑋 𑐕𑐶𑐎𑐥𑐶𑑄𑐟 𑐫𑐎𑑂𑐰 𑐫𑐎𑑂𑐰 𑐳𑐸𑐨𑐵𑐫𑑂 𑑋

(𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣𑐫𑐵 𑐄𑐮𑐾𑐖𑑂𑐫𑐵𑐫𑑂 𑐩𑐹 𑐰𑐎𑑂𑐟𑐵𑐫𑐵 𑐬𑐸𑐥𑐫𑑂 𑐜𑐵. 𑐩𑐵𑐣𑐣𑑂𑐢𑐬𑑄 𑐧𑐶𑐫𑐵𑐡𑐷𑐐𑐸 𑐣𑑂𑐰𑐔𑐸𑐫𑐵 𑐕𑐐𑐹 𑐧𑑂𑐰 𑑋)

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS