Read news in NepalBhasa text-- www.hamroschool.com BACK 𑐨𑐶𑐎𑑂𑐲𑐸, 𑐀𑐣𑐵𑐐𑐵𑐬𑐶𑐎𑐵 𑐳𑑂𑐰𑐵𑐳𑑂𑐠𑑂𑐫𑑀𑐥𑐔𑐵𑐬𑐫𑐵 𑐣𑐶𑑄𑐟𑐶𑑄 𑐥𑐘𑑂𑐔𑐰𑐷𑐬 𑐳𑐵𑐴𑐸𑐥𑐵𑐏𑐾‌‌ 𑐕𑐐𑐹 𑐎𑐬𑑀𑐜 𑐗𑐶𑑄𑐕𑐐𑐹 𑐮𑐵𑐏𑐫𑐵 𑐎𑑀𑐲 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐨𑐶𑐎𑑂𑐲𑐸, 𑐀𑐣𑐵𑐐𑐵𑐬𑐶𑐎𑐵 𑐳𑑂𑐰𑐵𑐳𑑂𑐠𑑂𑐫𑑀𑐥𑐔𑐵𑐬𑐫𑐵 𑐣𑐶𑑄𑐟𑐶𑑄 𑐥𑐘𑑂𑐔𑐰𑐷𑐬 𑐳𑐵𑐴𑐸𑐥𑐵𑐏𑐾‌‌ 𑐕𑐐𑐹 𑐎𑐬𑑀𑐜 𑐗𑐶𑑄𑐕𑐐𑐹 𑐮𑐵𑐏𑐫𑐵 𑐎𑑀𑐲

𑐫𑐾𑑃 – 𑐣𑐾𑐥𑐵𑑅𑐫𑐵 𑐠𑐾𑐬𑐰𑐵𑐡 𑐧𑐸𑐡𑑂𑐢 𑐱𑐵𑐳𑐣𑐫𑑂 𑐥𑑂𑐬𑐰𑑂𑐬𑐖𑐶𑐟 𑐖𑐸𑐫𑐵𑐧𑐶𑐖𑑂𑐫𑐵𑑅𑐥𑐶𑑄 𑐱𑑂𑐬𑐡𑑂𑐢𑐾𑐫 𑐨𑐶𑐎𑑂𑐲𑐸, 𑐱𑑂𑐬𑐵𑐩𑐞𑐾𑐬 𑐰 𑐀𑐣𑐵𑐐𑐵𑐬𑐶𑐎𑐵 𑐐𑐸𑐬𑐸𑐩𑐵𑑄𑐥𑐶𑐣𑐶𑐐𑐸 𑐨𑐶𑑄–𑐄𑐳𑐵𑑃𑐫𑑂𑐫𑐵 𑐟𑐵𑐟𑐸𑐣𑐵𑑅 𑐥𑑂𑐬𑐰𑑂𑐬𑐖𑐶𑐟 𑐳𑑂𑐰𑐵𑐳𑑂𑐠𑑂𑐫 𑐀𑐎𑑂𑐲𑐫 𑐎𑑀𑐲 𑐣𑐷𑐳𑑂𑐰𑑄𑐐𑐸 𑐡𑐸 𑑋 𑐱𑑂𑐬𑐡𑑂𑐢𑐵𑐮𑐸 𑐡𑐵𑐟𑐵 𑐄𑐥𑐵𑐳𑐎 𑐥𑐘𑑂𑐔𑐰𑐷𑐬 𑐳𑐶𑑄𑐴 𑐟𑐸𑐮𑐵𑐢𑐬𑑄 𑐠𑐾𑐬𑐰𑐵𑐡 𑐧𑐸𑐡𑑂𑐢 𑐱𑐵𑐳𑐣𑐫𑑂 𑐐𑐺𑐴𑐳𑑂𑐠 𑐟𑑂𑐰𑑅𑐟𑐵𑑅 𑐥𑑂𑐬𑐰𑑂𑐬𑐖𑐶𑐟 𑐖𑐸𑐫𑐵𑐧𑐶𑐖𑑂𑐫𑐵𑑅𑐥𑐶𑑄 𑐨𑐶𑐎𑑂𑐲𑐸, 𑐱𑑂𑐬𑐵𑐩𑐞𑐾𑐬 𑐰 𑐀𑐣𑐵𑐐𑐵𑐬𑐶𑐎𑐵𑐥𑐶𑐣𑐶𑐐𑐸 𑐨𑐶𑑄–𑐄𑐳𑐵𑑃𑐫𑑂𑐫𑐵 𑐟𑐵𑐟𑐸𑐣𑐵𑑅 𑐕𑐐𑐹 𑐎𑐬𑑀𑐜 𑐗𑐶𑑄𑐕𑐐𑐹 𑐮𑐏 𑐗𑐶𑑄𑐕𑐡𑑂𑐰𑑅𑐳𑐕𑐶 𑐰 𑐗𑐶𑑄𑐕𑐟𑐎𑐵 𑐡𑐵𑑄𑐫𑐵 𑐳𑑂𑐰𑐵𑐳𑑂𑐠𑑂𑐫 𑐀𑐎𑑂𑐲𑐫 𑐎𑑀𑐲 𑐳𑑂𑐰𑐣𑐵𑐡𑐷𑐐𑐸 𑐏𑑅 𑑋 𑐠𑐾𑐬𑐰𑐵𑐡 𑐧𑐸𑐡𑑂𑐢 𑐱𑐵𑐳𑐣𑐫𑑂 𑐥𑑂𑐬𑐰𑑂𑐬𑐖𑐶𑐟 𑐰𑐳𑐥𑑀𑐮𑐥𑐶𑐣𑐶𑐐𑐸 𑐨𑐶𑑄–𑐄𑐳𑐵𑑃𑐫𑑂𑐫𑐵 𑐟𑐵𑐟𑐸𑐣𑐵𑑅 𑐧𑐸𑐡𑑂𑐢 𑐱𑐵𑐳𑐣𑐥𑑂𑐬𑐟𑐶 𑐠𑑅𑐐𑐸 𑐣𑐸𑐐𑑅 𑐟𑐦𑐵𑑅 𑐫𑐵𑐳𑐾𑑄 𑐡𑐵𑐟𑐵 𑐟𑐸𑐮𑐵𑐢𑐬𑑄 𑐄𑐐𑐸 𑐎𑑀𑐲 𑐳𑑂𑐰𑐣𑐵𑐡𑐷𑐐𑐸 𑐏𑑅 𑑋 𑐡𑐵𑐟𑐵 𑐟𑐸𑐮𑐵𑐢𑐬𑑄 𑐎𑑀𑐲𑐫𑐵 𑐩𑐵 𑐩𑐳𑑂𑐫𑑄𑐎𑐸𑐳𑐾 𑐁𑐰𑐢𑐶𑐎 𑐰𑑂𑐫𑐵𑐖 𑐬𑐎𑐩 𑐖𑐎 𑐕𑑂𑐫𑐮𑐵𑑅 𑐥𑐬𑐣𑑂𑐟𑐸𑐟𑐎 𑐣𑑂𑐴𑑂𑐫𑐵𑐎𑐵 𑐫𑑄𑐎𑐾𑐐𑐸 𑐮𑑂𑐫𑐵𑐏𑑄 𑐄𑐐𑐸 𑐎𑑀𑐲 𑐀𑐏𑐶𑐮 𑐣𑐾𑐥𑐵𑐮 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑𑐫𑐵𑐟 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑐴𑐵𑐳𑑄𑐑𑐫𑐵 𑐄𑐥𑐵𑐢𑑂𑐫𑐎𑑂𑐲 𑐨𑐶𑐎𑑂𑐲𑐸 𑐢𑐬𑑂𑐩𑐩𑐹𑐬𑑂𑐟𑐶 𑐩𑐴𑐵𑐳𑑂𑐠𑐰𑐶𑐬𑑄 𑐮𑐳𑐎𑐸𑐳 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅𑐳𑐵 𑐄𑐐𑐸 𑐂𑐮𑐫𑑂 𑐳𑑄𑐑𑐣𑐵𑐫𑐎 𑐨𑐶𑐎𑑂𑐲𑐸 𑐧𑑀𑐢𑐶𑐳𑐾𑐣 𑐩𑐴𑐵𑐳𑑂𑐠𑐰𑐶𑐬, 𑐳𑑄𑐑𑐄𑐥𑐣𑐵𑐫𑐎 𑐨𑐶𑐎𑑂𑐲𑐸 𑐐𑐸𑐞𑐑𑑀𑐲 𑐩𑐴𑐵𑐳𑑂𑐠𑐰𑐶𑐬, 𑐀𑐏𑐶𑐮 𑐣𑐾𑐥𑐵𑐮 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑𑐫𑐵 𑐣𑐵𑐫𑑅 𑐨𑐶𑐎𑑂𑐲𑐸 𑐩𑐿𑐟𑑂𑐬𑐷 𑐩𑐴𑐵𑐳𑑂𑐠𑐰𑐶𑐬, 𑐩𑐴𑐵𑐳𑑄𑐑𑐫𑐵 𑐥𑐡𑐵𑐢𑐶𑐎𑐵𑐬𑐷, 𑐨𑐶𑐎𑑂𑐲𑐸𑐐𑐞𑐮𑐶𑐳𑐾𑑄 𑐀𑐣𑐵𑐐𑐵𑐬𑐶𑐎𑐵 𑐥𑐘𑑂𑐘𑐵𑐰𑐟𑐷, 𑐀𑐣𑐵𑐐𑐵𑐬𑐶𑐎𑐵 𑐜𑐵. 𑐢𑐩𑑂𑐩𑐰𑐶𑐖𑐫𑐵, 𑐀𑐣𑐵𑐐𑐵𑐬𑐶𑐎𑐵 𑐡𑐵𑐣𑐰𑐟𑐷𑐮𑐶𑐳𑐾𑑄𑐫𑐵 𑐐𑐸𑐬𑐸𑐩𑐵𑑄𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶𑐂 𑐡𑐵𑐟𑐵 𑐟𑐸𑐮𑐵𑐢𑐬𑑄 𑐳𑑄𑐑𑐣𑐵𑐫𑐎 𑐨𑐶𑐎𑑂𑐲𑐸 𑐧𑑀𑐢𑐶𑐳𑐾𑐣 𑐩𑐴𑐵𑐳𑑂𑐠𑐰𑐶𑐬𑐫𑐵𑐟 𑐱𑑂𑐬𑐡𑑂𑐢𑐵 𑐡𑐵𑐣 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐱𑑂𑐬𑐡𑑂𑐢𑐵𑐡𑐵𑐣 𑐮𑑅𑐮𑑂𑐴𑐵𑐳𑐾 𑐡𑐵𑐟𑐵 𑐟𑐸𑐮𑐵𑐢𑐬𑑄 𑐠𑐾𑐬𑐰𑐵𑐡 𑐨𑐶𑐎𑑂𑐲𑐸 𑐐𑐸𑐬𑐸𑐩𑐵𑑄𑐥𑐶𑐣𑐶𑐐𑐸 𑐳𑑂𑐰𑐵𑐳𑑂𑐠𑑂𑐫𑑀𑐥𑐔𑐵𑐬𑐫𑐵 𑐣𑐶𑑄𑐟𑐶𑑄 𑐳𑑂𑐰𑐫𑐩 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑 𑐣𑑂𑐴𑑂𑐫𑐖𑑂𑐫𑐵𑐣𑐵𑑅 𑐩𑐹𑐮𑐢𑐣 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵𑑅 𑐀𑐎𑑂𑐲𑐫 𑐎𑑀𑐲𑐫𑐵 𑐧𑑂𑐫𑐵𑐖𑐥𑐵𑐏𑐾𑑄 𑐣𑐶𑐬𑐣𑑂𑐟𑐬 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵 𑐰𑐣𑐾𑐐𑐸 𑐰 𑐠𑐠𑐾 𑐖𑐸𑐮 𑐢𑐵𑑅𑐳𑐵 𑐎𑑀𑐲𑐫𑐵 𑐬𑐎𑐩 𑐣𑑄 𑐀𑐥𑑂𑐰𑐫𑐵 𑐰𑐣𑐷𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋

𑐨𑐶𑐎𑑂𑐲𑐸 𑐩𑐴𑐵𑐳𑑄𑐑𑐫𑐵 𑐩𑐴𑐵𑐳𑐔𑐶𑐰 𑐨𑐶𑐎𑑂𑐲𑐸 𑐎𑑀𑐞𑑂𑐜𑐣𑑂𑐫 𑐩𑐴𑐵𑐳𑑂𑐠𑐰𑐶𑐬𑑄 𑐡𑐵𑐟𑐵𑐫𑐵 𑐳𑐡𑐶𑐎𑑂𑐲𑐵𑐎𑐠𑑄 𑐠𑐾𑐬𑐰𑐵𑐡 𑐧𑐸𑐡𑑂𑐢 𑐱𑐵𑐳𑐣𑐫𑑂 𑐳𑐩𑐬𑑂𑐥𑐶𑐟 𑐖𑐸𑐫𑐵𑐧𑐶𑐖𑑂𑐫𑐵𑑅𑐥𑐶𑑄 𑐨𑐶𑐎𑑂𑐲𑐸, 𑐱𑑂𑐬𑐵𑐩𑐞𑐾𑐬 𑐰 𑐀𑐣𑐵𑐐𑐵𑐬𑐶𑐎𑐵𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐣𑐶𑐬𑑂𑐡𑐾𑐱𑐶𑐎𑐵 𑐡𑐫𑐾𑐎𑐵𑑅 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑𑐥𑐵𑐏𑐾𑑄 𑐥𑐵𑐬𑐡𑐬𑑂𑐱𑐷 𑐬𑐸𑐥𑑄 𑐎𑑀𑐲𑐫𑐵 𑐁𑐰𑐢𑐶𑐎 𑐧𑑂𑐫𑐵𑐖 𑐖𑐎 𑐳𑐡𑐸𑐥𑐫𑑀𑐐 𑐫𑐵𑐫𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐧𑐶𑐖𑑂𑐫𑐵𑐟 𑑋

𑐣𑐾𑐥𑐵𑐮 𑐥𑐬𑐩𑑂𑐥𑐬𑐵𑐐𑐟 𑐧𑐸𑐡𑑂𑐢𑐢𑐬𑑂𑐩 𑐳𑑄𑐑𑐫𑐵 𑐣𑐵𑐫𑑅 𑐥𑑂𑐬𑐵. 𑐜𑐵. 𑐣𑐬𑐾𑐱𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐣𑑄 𑐣𑐸𑐐𑑅𑐏𑑃 𑐥𑑂𑐰𑑄𑐎𑐵𑐡𑐶𑐳𑐾𑑄 𑐳𑑄𑐑𑐥𑐵𑐏𑐾𑑄 𑐣𑑄 𑐎𑑀𑐲𑐫𑑂 𑐕𑐐𑐹 𑐮𑐏 𑐟𑐎𑐵 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐳𑑂𑐰𑐫𑐩𑑂𑐨𑐹𑐰𑐷𑐬 𑐳𑐶𑑄𑐴 𑐰 𑐴𑐶𑐟𑐮𑐎𑑂𑐲𑑂𑐩𑐷 𑐎𑐳𑐵𑑅𑐥𑐵𑐏𑐾𑑄 𑐥𑑂𑐫𑑄𑐐𑐹 𑐮𑐏, 𑐫𑐸𑐰𑐵 𑐧𑑁𑐡𑑂𑐢 𑐳𑐩𑐹𑐴, 𑐫𑐾𑑃𑐫𑑂𑐥𑐵𑐏𑐾𑑄 𑐕𑐐𑐹 𑐮𑐏, 𑐥𑐹𑐬𑑂𑐞–𑐩𑐠𑐸𑐬𑐵 𑐳𑑂𑐩𑐺𑐟𑐶 𑐎𑑀𑐲𑐥𑐵𑐏𑐾𑑄 𑑑,𑑑𑑑,𑑑𑑑𑑑÷–, 𑐣𑑂𑐴𑐸𑐕𑐾𑐩𑐵𑐫𑐵 𑐟𑐸𑐮𑐵𑐢𑐬𑑄 𑐕𑐐𑐹 𑐮𑐏 𑐣𑑂𑐫𑐵𑐡𑑂𑐰𑑅, 𑐳𑐵𑐣𑐸𑐧𑐵𑐧𑐸 𑐳𑐵𑐫𑑂𑐩𑐶 𑐰 𑐨𑐐𑐰𑐵𑐣𑐡𑐾𑐰𑐷 𑐩𑐵𑐣𑐣𑑂𑐢𑐬𑑄 𑐕𑐐𑐹 𑐮𑐏, 𑐧𑐮𑐬𑐵𑐩 𑐰 𑐄𑐩𑐵 𑐔𑐶𑐟𑑂𑐬𑐎𑐵𑐬𑑄 𑐕𑐐𑐹 𑐮𑐏, 𑐡𑐶𑐰𑑄𑐐𑐟 𑐀𑐩𑐺𑐟𑐳𑐵𑐐𑐬 𑐰 𑐡𑐶𑐰𑑄𑐐𑐟 𑐎𑐾𑐱𑐮𑐎𑑂𑐲𑑂𑐩𑐷 𑐟𑐸𑐮𑐵𑐢𑐬𑐫𑐵 𑐮𑐸𑐩𑐣𑑂𑐟𑐶𑐂 𑐕𑐐𑐹 𑐮𑐏, 𑐡𑐶𑐰𑑄𑐐𑐟 𑐣𑐷𑐬𑐱𑑀𑐨𑐵 𑐔𑐶𑐟𑑂𑐬𑐎𑐵𑐬𑐫𑐵 𑐣𑐵𑐩𑑄 𑐣𑑂𑐫𑐫𑑂𑐡𑑂𑐰𑑅, 𑐩𑑀𑐴𑐣𑐡𑐾𑐰𑐷 𑐔𑐶𑐟𑑂𑐬𑐎𑐵𑐬𑑄 𑐣𑑂𑐫𑐫𑑂𑐡𑑂𑐰𑑅, 𑐱𑐵𑐣𑑂𑐟𑐮𑐎𑑂𑐲𑑂𑐩𑐷 𑐰𑐖𑑂𑐬𑐵𑐔𑐵𑐬𑑂𑐫 𑐣𑑂𑐫𑐫𑑂𑐡𑑂𑐰𑑅 𑐟𑐎𑐵 𑐐𑑂𑐰𑐵𑐴𑐵𑐮𑐶 𑐣𑑄 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑑄𑐑𑐣𑐵𑐫𑐎 𑐨𑐶𑐎𑑂𑐲𑐸 𑐧𑑀𑐢𑐶𑐳𑐾𑐣 𑐩𑐴𑐵𑐳𑑂𑐠𑐰𑐶𑐬𑑄 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑𑐥𑐵𑐏𑐾𑑄 𑐰𑐶𑐱𑐾𑐲 𑐳𑐵𑐢𑐸𑐰𑐵𑐡 𑐥𑐟𑑂𑐬 𑐡𑐵𑐟𑐵𑐫𑐵𑐟 𑐮𑑅𑐮𑑂𑐴𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅𑐳𑐵 𑐰𑐳𑐥𑑀𑐮𑑄 𑐳𑐎𑐮 𑐱𑑂𑐬𑐡𑑂𑐢𑐵𑐡𑐵𑐣 𑐡𑐵𑐟𑐵𑐳𑐴𑐶𑐟𑐫𑐵 𑐁𑐫𑐸 𑐁𑐬𑑀𑐐𑑂𑐫𑐫𑐵 𑐎𑐵𑐩𑐣𑐵 𑐣𑑄 𑐫𑐵𑐣𑐵 𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑𑐥𑐵𑐏𑐾𑑄 𑐧𑐸𑐡𑑂𑐢𑐰𑐔𑐣 𑐥𑐬𑐶𑐟𑑂𑐬𑐵𑐞 𑐥𑐵𑐛 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅𑐳𑐵 𑐩𑐴𑐵𑐳𑑄𑐑𑐫𑐵 𑐣𑐵𑐫𑑅 𑐨𑐶𑐎𑑂𑐲𑐸 𑐩𑐿𑐟𑑂𑐬𑐷 𑐩𑐴𑐵𑐳𑑂𑐠𑐰𑐶𑐬𑑄 𑐳𑐎𑐮𑐮𑐶𑐟 𑐳𑐵𑐢𑐸𑐰𑐵𑐡 𑐡𑐾𑐕𑐵𑐳𑐾 𑐥𑐸𑐞𑑂𑐫𑐵𑐣𑐸𑐩𑑀𑐡𑐣 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS