𑐣𑐾. 𑐳𑑄. 𑑑𑑑𑑔𑑓 𑐘𑐮𑐵𑐐𑐵 𑐡𑐸𑐟𑐶𑐫𑐵 - 𑐩𑐴𑐵𑐎𑐧𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸 𑐧𑐸𑐡𑐶𑑄

𑐫𑑃𑐫𑐵𑑅𑐫𑐵 𑐮𑐳𑐟𑐵𑐫𑑂 𑐩𑑂𑐫𑐾𑑃 𑐰 𑐴𑐸𑐮𑐵𑐥𑑂𑐫𑐵𑐏𑑄 𑐎𑐵𑐳𑐵 𑐖𑐸𑐂𑐐𑐸

𑐫𑐮- 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑑𑑖𑐫𑐵 𑐐𑑂𑐰𑐳𑐵𑐮𑐫𑑂 𑐫𑑃𑐫𑐵𑑅 𑐣𑐏𑑅𑐫𑐵 𑐮𑐳𑐟𑐵𑐫𑑂 𑐰𑐜𑐵𑐰𑑂𑐫𑐵𑐥𑐷 𑐩𑑂𑐫𑐾𑑃 𑐰 𑐴𑐸𑐮𑐵𑐥𑑂𑐫𑐵𑐏𑑄 𑐎𑐵𑐳𑐵 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐫𑑃𑐫𑐵𑑅𑐫𑐵 𑐗𑑂𑐰𑐮𑐫𑑂 𑐮𑐵𑐎𑐵𑑅 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐄𑐎𑐶𑐫𑐵 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅𑑋

𑐫𑐮 𑐩𑐣𑐥𑐵 𑑑𑑖 𑐰𑐜𑐵 𑐎𑐮𑐵𑐎𑐵𑐬 𑐳𑐩𑐶𑐟𑐶𑐫𑐵 𑐐𑑂𑐰𑐳𑐵𑐮𑐫𑑂 𑐖𑐸𑐂𑐐𑐸 𑐎𑐵𑐳𑐵𑐫𑑂 𑐧𑑂𑐰𑐟𑐶 𑐎𑐵𑐫𑐾 𑐩𑑄 𑐡𑐸𑐥𑐶𑑄 𑐎𑐮𑐵𑐎𑐵𑐬𑐟𑐫𑑂𑐳𑑄 𑐠𑐩𑑂𑐴𑑄 𑐴𑐵𑐮𑐵𑐟𑑅𑐐𑐸 𑐩𑑂𑐫𑐾𑑃 𑐰 𑐴𑐸𑐮𑐵𑐥𑑂𑐫𑐵𑐏𑑄𑐫𑐵 𑐨𑐶𑐜𑐶𑐫𑑀 𑐟𑐫𑐵𑐬 𑐫𑐵𑐣𑐵𑑅 𑐳𑐩𑐶𑐟𑐶𑐫𑐵 𑐂𑐩𑐾𑐮𑐫𑑂 𑐰𑐵 𑐰𑐜𑐵 𑐖𑑂𑐫𑐵𑐎𑐸𑐠𑐶𑐂 𑐡𑐬𑑂𑐟𑐵 𑐫𑐵𑐫𑐾 𑐦𑐂𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑑅𑐐𑐸 𑐡𑐸 𑑋

𑐐𑑂𑐰𑐳𑐵𑑅 𑐏𑐮𑐎𑐠𑑄 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 𑐣𑐶𑐐𑐸𑐮𑐶𑑄 𑐰𑐶𑐢𑐵𑐫𑐵 𑐎𑐵𑐳𑐵𑐫𑑂 𑐣𑑂𑐴𑐵𑐥𑐫𑐵𑐟 𑐣𑐷𑐣𑑂𑐫𑐵𑐡𑑂𑐰𑑅, 𑐮𑐶𑐄𑐫𑐵𑐟 𑐗𑐶𑑄𑐣𑑂𑐫𑐵𑐡𑑂𑐰, 𑐮𑐶𑐫𑐵𑑄𑐮𑐶𑐄𑐫𑐵𑐟 𑐗𑐶𑐡𑑂𑐰𑑅 𑐟𑐎𑐵 𑐣𑐐𑐡𑐮𑐶𑐳𑐾𑑄 𑐩𑐾𑐩𑐾𑐐𑐸 𑐣𑑄 𑐳𑐶𑐬𑐥𑐵𑑅 𑐧𑐷𑐐𑐸 𑐖𑐹𑐐𑐸 𑐡𑐸 𑑋 𑐀𑐠𑐾 𑐴𑐾 𑐚𑐥 𑐨𑑂𑐫𑐸𑐖𑐫𑐵𑐟 𑐣𑑄 𑐳𑐶𑐬𑐥𑐵𑑅𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐎𑐵𑐳𑐵𑐫𑑂 𑐚𑐥 𑐚𑐾𑐣 𑐡𑐸𑐣𑐾 𑐮𑐵𑐫𑐾𑐟 𑐟𑐵𑑅𑐮𑐵𑑅𑐥𑐶𑑄𑐟 𑐧𑐶𑐳𑑂𑐎𑑄 𑐥𑑂𑐫𑐵𑐎𑐾𑐖 𑐥𑑂𑐬𑐱𑐶𑐎𑑂𑐲𑐞𑐫𑐵 𑐣𑑄 𑐰𑑂𑐫𑐰𑐳𑑂𑐠𑐵 𑐡𑐸𑐐𑐸 𑐰 𑐎𑐵𑐳𑐵𑐫𑐵 𑐳𑐩𑐵𑐥𑐣 𑐣𑐵𑐥𑑄 𑐳𑐶𑐬𑐥𑐵𑑅 𑐧𑐷𑐐𑐸 𑐖𑑂𑐫𑐵𑐗𑑂𑐰𑑅 𑐰𑐂𑐐𑐸 𑐣𑐾.𑐳𑑄. 𑑑𑑑𑑔𑑒 𑐣𑑂𑐴𑐹𑐡𑑃𑐫𑐵 𑐮𑐳𑐟𑐵𑐫𑑂 𑐖𑐸𑐂𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐮𑑅𑐮𑑂𑐴𑐵𑐂𑐐𑐸 𑐖𑐸𑐫𑐵𑐔𑑂𑐰𑑄𑐐𑐸

𑐡𑐸 𑑋
𑐎𑐵𑐳𑐵𑐫𑐵 𑐑𑑀𑐲𑐞𑐵 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐨𑐹𑐥𑐾𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐣𑐷𑐮 𑐱𑐵𑐎𑑂𑐫, 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐳𑐸𑐮𑐶𑐣𑑂𑐡𑑂𑐬 𑐱𑐵𑐎𑑂𑐫, 𑐣𑐶𑐬𑑂𑐩𑐮𑐬𑐟𑑂𑐣 𑐱𑐵𑐎𑑂𑐫, 𑐀𑐩𑐬 𑐔𑐶𑐟𑑂𑐬𑐎𑐵𑐬, 𑐀𑐩𑑀𑐑𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐨𑐹𑐲𑐞 𑐰𑐖𑑂𑐬𑐵𑐔𑐬𑑂𑐫𑐵, 𑐬𑐾𑐖𑐶𑐣𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐣𑐡𑐶𑐩 𑐱𑐵𑐎𑑂𑐫𑐮𑐶𑐳𑐾𑑄 𑐬𑐾𑐞𑑂𑐜𑐬 𑐧𑑂𑐫𑐵𑐣𑑂𑐜𑑄 𑐠𑑅𑐐𑐸 𑐳𑐵𑑄𑐐𑐷𑐟𑐶𑐎 𑐥𑑂𑐬𑐳𑑂𑐟𑐸𑐟𑐶 𑐧𑐶𑐄𑐐𑐸 𑐏𑑅𑐳𑐵 𑐣𑐶𑐳𑐶𑐮𑐵 𑐱𑐵𑐎𑑂𑐫, 𑐡𑐶𑐫𑐵 𑐱𑐵𑐎𑑂𑐫, 𑐳𑑀𑐣𑐶𑐫𑐵, 𑐳𑑄𑐫𑐸𑐎𑑂𑐟𑐵 𑐱𑐬𑑂𑐩𑐵, 𑐣𑐶𑐨𑐵𑑅 𑐰𑐖𑑂𑐬𑐵𑐔𑐵𑐬𑑂𑐫, 𑐴𑐶𑐟𑐾𑐲𑐵 𑐱𑐵𑐎𑑂𑐫, 𑐳𑐵𑐂𑐬𑐵 𑐩𑐴𑐬𑑂𑐖𑐣 𑐮𑐐𑐵𑐫𑐟𑐫𑐵 𑐎𑐮𑐵𑐎𑐵𑐬𑑄 𑐴𑐸𑐮𑐵𑐥𑑂𑐫𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋
𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐀𑐐𑑂𑐬𑐖 𑐎𑐮𑐵𑐎𑐵𑐬𑐫𑐵 𑐳𑐩𑑂𑐩𑐵𑐣 𑐰 𑐰𑐜𑐵𑐫𑐵 𑐮𑑀𑐎𑑄𑐴𑑂𑐰𑐵𑑅𑐥𑐶𑑄 𑐎𑐮𑐵𑐎𑐵𑐬𑐫𑐵 𑐣𑑄 𑐥𑑂𑐬𑐳𑑂𑐟𑐸𑐟𑐶 𑐡𑐂𑐐𑐸 𑐳𑐩𑐶𑐟𑐶𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑑑𑑖 𑐰𑐜𑐵𑐥𑐵𑐏𑐾𑑄 𑐣𑐵𑐐𑐧𑐴𑐵𑐮𑐫𑑂 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐐𑐐𑐣 𑐧𑐵𑐚𑐶𑐎𑐵𑐫𑐵 𑐣𑑄 𑐄𑐮𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐧𑐵𑐚𑐶𑐎𑐵𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐫𑐮 𑐩𑐴𑐵𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐳𑑂𑐩𑐵𑐬𑑂𑐚 𑐳𑐶𑐚𑐷 𑐣𑐶𑐬𑑂𑐩𑐵𑐞 𑐀𑐨𑐶𑐫𑐵𑐣𑐫𑑂 𑐥𑐸𑐣𑑅𑐣𑐶𑐬𑑂𑐩𑐶𑐟 𑐧𑐵𑐚𑐶𑐎𑐵 𑐔𑑂𑐰𑐕𑐵𑐫𑐾𑐧𑐴𑐖𑐹 𑐢𑐫𑐵𑐡𑐶𑐮 𑑋

𑐫𑐮 𑐩𑐣𑐥𑐵 𑑑𑑖 𑐰𑐜𑐵𑐀𑐢𑑂𑐫𑐎𑑂𑐲 𑐣𑐶𑐬𑑂𑐩𑐮𑐬𑐟𑑂𑐣 𑐱𑐵𑐎𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑐡𑐶𑐳𑐾𑑄 𑐧𑐵𑐚𑐶𑐎𑐵𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑑄 𑐠𑑅 𑐟𑐳𑐎𑑄 𑐄𑐟𑑂𑐳𑐵𑐴𑐶𑐟 𑐖𑐹𑐐𑐸 𑐢𑐵𑐳𑐾𑑄 𑐰𑐜𑐵 𑐡𑐸𑐣𑐾𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐩𑐴𑐟𑑂𑐰𑐫𑐵 𑐣𑑂𑐫𑐵𑐏𑐵𑐔𑐸𑐎 𑐰 𑐂𑐮𑐵𑐣𑐣𑐶𑐫𑐵 𑐣𑑄 𑐫𑐵𑐎𑐣𑑄 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐡𑐸𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐥𑐸𑐣𑑅𑐣𑐶𑐬𑑂𑐩𑐵𑐞 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎𑐮𑐶𑐳𑐾𑑄 𑐣𑐵𑐐𑐧𑐴𑐵𑐮 𑐚𑑀𑐮 𑐳𑐸𑐢𑐵𑐬 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐬𑐰𑐶𑐣𑑂𑐡𑑂𑐬 𑐱𑐵𑐎𑑂𑐫𑑄 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵𑐫𑑂 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐥𑐶𑐣𑐶𑐐𑐸 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐎𑐮𑐵𑐎𑐵𑐬 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐳𑐩𑐶𑐟𑐶𑐥𑐵𑐏𑐾𑑄 𑐐𑑂𑐰𑐳𑐵𑑅 𑐐𑑂𑐰𑐫𑐾𑐟𑑂𑐫𑑄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋