𑐰𑐶𑐬𑐵𑐚𑑄 𑐎𑐰𑐶 𑐥𑐹𑐬𑑂𑐞 𑐰𑐿𑐡𑑂𑐫 𑐮𑐸𑐩𑑄𑐎𑐮
𑐏𑑂𑐰𑐥- 𑐰𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐐𑐸𑐠𑐶𑑄 𑐩𑐡𑐸𑐩𑑂𑐴 𑐎𑐰𑐶 𑐥𑐹𑐬𑑂𑐞 𑐰𑐿𑐡𑑂𑐫𑐫𑐵 𑐮𑐩𑐸𑐣𑑂𑐟𑐶𑐂 𑐕𑐐𑐹 𑐰𑐶𑐔𑐵𑑅 𑐩𑐸𑑃𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐐𑐸𑐠𑐶𑑄 𑐠𑑅 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅𑐮𑐶𑐳𑐾𑑄 𑐳𑐮𑑂𑐮𑐵𑐴𑐎𑐵𑐬 𑐩𑐡𑐸𑐩𑑂𑐴 𑐎𑐰𑐶 𑐰𑐿𑐡𑑂𑐫𑐫𑐵 𑐮𑐸𑐩𑐣𑑂𑐟𑐶𑐂 𑐄𑐐𑐸 𑐰𑐶𑐔𑐵𑑅 𑐩𑐸𑑃𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋
𑐰𑐶𑐬𑐵𑐚𑐫𑐵 𑐣𑐵𑐫𑑅 𑐩𑐴𑐾𑐣𑑂𑐡𑑂𑐬𑐐𑑀𑐥𑐵𑐮 𑐎𑐬𑑂𑐩𑐵𑐔𑐵𑐬𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐬𑐵𑐚𑐫𑐵 𑐳𑑄𑐳𑑂𑐠𑐵𑐥𑐎 𑐮𑐶𑐳𑐾𑑄 𑐳𑐮𑑂𑐮𑐵𑐴𑐎𑐵𑐬 𑐳𑐵𑐴𑐶𑐟𑑂𑐫𑐎𑐵𑐬 𑐜𑐵. 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑑄 𑐩𑐡𑐸𑐩𑑂𑐴 𑐎𑐰𑐶 𑐰𑐿𑐡𑑂𑐫 𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑐮𑐫𑑂 𑐕𑐩𑑂𑐴 𑐖𑑂𑐰𑑅𑐩𑐡𑑂𑐸𑐩𑑂𑐴 𑐰𑑂𑐫𑐎𑑂𑐟𑐶𑐟𑑂𑐰 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐎𑐰𑐶 𑐰𑐿𑐡𑑂𑐫𑑄 𑐬𑐵𑐖𑐎𑐷𑐫 𑐩𑐵𑐣𑑂𑐫𑐟𑐵 𑐔𑐹𑐮𑐵𑐎𑐾 𑐩𑐦𑐸𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐰𑐫𑑂𑐎𑑅𑐫𑐵 𑐳𑑂𑐟𑐬𑐫𑐵 𑐳𑐵𑐴𑐶𑐟𑑂𑐫 𑐫𑐡𑐶 𑐏𑐳𑑂 𑐣𑐾𑐥𑐵𑐮𑐷 𑐰𑐵 𑐀𑑄𑐐𑐾𑑂𑐬𑐖𑐷 𑐨𑐵𑐳𑑄 𑐥𑐶𑐴𑐵𑑄 𑐰𑑅𑐐𑐸 𑐏𑑅𑐳𑐵 𑐳𑐵𑐴𑐶𑐟𑑂𑐫𑐫𑑂 𑐣𑑀𑐧𑐾𑐮 𑐳𑐶𑐬𑐥𑐵𑑅𑐫𑐵 𑐣𑐶𑑄𑐟𑐶𑑄 𑐣𑑄 𑐡𑐵𑐰𑐷 𑐫𑐵𑐫𑐾 𑐦𑐂𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐣𑐬𑐾𑐣𑑂𑐡𑑂𑐬𑐨𑐎𑑂𑐟 𑐴𑐵𑐜𑐵, 𑐐𑑀𑐰𑐶𑐣𑑂𑐡𑐩𑐵𑐣 𑐱𑑂𑐬𑐾𑐲𑑂𑐛, 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫, 𑐥𑑂𑐬𑐡𑐷𑐥𑐬𑐟𑑂𑐣 𑐱𑐵𑐎𑑂𑐫, 𑐥𑐱𑐸𑐥𑐟𑐶𑐩𑐵𑐣 𑐥𑑅𑐩𑐵𑑄, 𑐱𑑁𑐬𑐨 𑐱𑐵𑐎𑑂𑐫, 𑐡𑐸𑐬𑑂𑐐𑐵𑐩𑑀𑐴𑐣 𑐱𑑂𑐬𑐾𑐲𑑂𑐛, 𑐰𑐶𑐩𑐮 𑐟𑐵𑐩𑑂𑐬𑐵𑐎𑐵𑐬 𑐮𑐐𑐵𑐫𑐟𑑄 𑐩𑐡𑐸𑐩𑑂𑐴 𑐎𑐰𑐶 𑐰𑐿𑐡𑑂𑐫𑑅𑐫𑐵 𑐰𑑂𑐫𑐎𑑂𑐟𑐶𑐟𑑂𑐰 𑐰 𑐎𑐺𑐟𑐶𑐟𑑂𑐰𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋
𑐣𑐾𑐥𑐵𑐮𑐨𑐵𑐲𑐵 𑐁𑐢𑐸𑐣𑐶𑐎 𑐎𑐵𑐧𑑂𑐫 𑐰𑐶𑐢𑐵𑐫𑐵 𑐣𑑂𑐴𑑂𑐫𑐸𑐮𑐰𑐵 𑐎𑐰𑐶 𑐰𑐿𑐡𑑂𑐫 𑐰𑑄𑐐𑐸 𑐐𑐸𑑄𑐮𑐵𑐐𑐵 𑐔𑑁𑐠𑐶𑐎𑐸𑐣𑑂𑐴𑐸 𑑘𑑑 𑐡𑑃𑐫𑐵 𑐄𑐩𑐾𑐬𑐫𑑂 𑐡𑐶𑐰𑑄𑐐𑐟 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐎𑐧𑑂𑐖𑐶𑐫𑐟 𑐖𑐸𑐫𑐵𑑅 𑐣𑐶𑐡𑐵𑐣 𑐀𑐳𑑂𑐥𑐟𑐵𑐮𑐫𑑂 𑐨𑐬𑑂𑐣𑐵 𑐖𑐸𑐫𑐵𑐡𑐷𑐩𑑂𑐴 𑐰𑐫𑑂𑐎𑑅 𑐰𑐵𑐳𑑅 𑐫𑐵𑐎𑐸 𑐫𑐵𑐎𑐸𑑄 𑐩𑐡𑐸𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵𑐟 𑐣𑐾𑐥𑐵𑐮𑐨𑐵𑐲𑐵 𑐎𑐵𑐧𑑂𑐫 𑐏𑑂𑐫𑐮𑐫𑑂 𑐁𑐢𑐸𑐣𑐶𑐎 𑐎𑐰𑐶𑐟𑐵 𑐱𑐸𑐬𑐸 𑐫𑐵𑑅𑐩𑑂𑐴 𑐣𑑂𑐴𑑂𑐫𑐮𑐸𑐰𑐵 𑐎𑐰𑐶 𑐎𑐠𑑄 𑐎𑐵𑐫𑐾 𑐫𑐵𑑅 𑑋
𑐰𑐫𑑂𑐎𑑅𑐫𑐵 ‘𑐮𑑅𑐮𑑅𑐏𑑅’ 𑐎𑐰𑐶𑐟𑐵 𑐩𑐸𑐣𑐵 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐖𑐎 𑐩𑐏𑐸 𑐏𑐫𑑂 𑐨𑐵𑐫𑑂𑐫𑐵 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐟𑐎𑑄 𑐀𑐟𑐶𑐎𑑄 𑐔𑐬𑑂𑐔𑐶𑐟 𑐎𑐺𑐟𑐶 𑐏𑑅𑐳𑐵 𑐠𑐸𑐐𑐸 𑐎𑐺𑐟𑐶 ‘𑐜𑑂𑐬𑐥 𑐀𑐦 𑐰𑐵𑐚𑐬’𑐫𑐵 𑐣𑐵𑐩𑑄 𑐀𑑄𑐐𑑂𑐬𑐾𑐖𑐷 𑐀𑐣𑐸𑐰𑐵𑐡 𑐖𑐸𑐫𑐵𑑅 𑐣𑑄 𑐥𑐶𑐴𑐵𑑄 𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋
LEAVE YOUR COMMENTS