𑐁𑑅 𑐟𑐵𑐮𑐶𑐰𑐵𑐣𑐮𑐶𑐳𑐾 𑐣𑐾𑐥𑐵𑑅𑐫𑐵 𑐳𑑂𑐰𑐵𑐥𑐹 𑐐𑐖𑑂𑐫𑐵𑑅𑐐𑐸 ?
𑐫𑐾𑑃 – 𑐀𑐦𑐐𑐵𑐣𑐶𑐳𑑂𑐟𑐵𑐣𑐫𑐵 𑐨𑐹𑐩𑐶𑑄 𑐀𑐩𑐾𑐬𑐶𑐎𑐵 𑐥𑐹𑐰𑑄𑐎 𑐴𑐾 𑐥𑐶𑐴𑐵𑑄 𑐰𑐣𑐾𑐢𑐸𑑄𑐎𑐹𑐐𑐸𑐮𑐶𑑄 𑐁𑑅 𑐀𑐣 𑐟𑐵𑐮𑐶𑐰𑐵𑐣𑐫𑐵 𑐫𑐎𑑅𑐟𑐶 𑐱𑐵𑐳𑐣 𑐳𑐘𑑂𑐔𑐵𑐮𑐣 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐀𑐦𑐐𑐵𑐣𑐶𑐳𑑂𑐟𑐵𑐣𑐫𑑂 𑐟𑐵𑐮𑐶𑐰𑐵𑐣𑐫𑐵 𑐫𑐎𑑅𑐟𑐶 𑐱𑐵𑐳𑐣 𑐱𑐸𑐬𑐸 𑐖𑐸𑐂𑐢𑐸𑑄𑐎𑐮 𑐎𑐶 𑐟𑐵𑐮𑐶𑐰𑐵𑐣 𑐳𑐬𑐎𑐵𑐬𑐮𑐶𑐳𑐾 𑐣𑐾𑐥𑐵𑑅𑐫𑐵 𑐳𑑂𑐰𑐵𑐥𑐹 𑐐𑐖𑑂𑐫𑐵𑑅𑐐𑐸 𑐖𑐸𑐂 ? 𑐠𑑁𑑄𑐎𑐣𑑂𑐴𑐫𑑂 𑐡𑐾𑐫𑑂𑐫𑐵 𑐎𑐸𑐚𑐣𑐷𑐟𑐶𑐎 𑐏𑑂𑐫𑐮𑐫𑑂 𑐠𑐸𑐎𑐶𑐫𑐵 𑐧𑐵𑐬𑐾 𑐔𑐬𑑂𑐔𑐵 𑐱𑐸𑐬𑐸 𑐖𑐹𑐐𑐸 𑐡𑐸 𑑋
𑐀𑐦𑐐𑐵𑐣𑐶𑐳𑑂𑐟𑐵𑐣𑐫𑑂 𑐀𑐗 𑐣𑑄 𑐁𑐥𑐵𑐮𑑄 𑐣𑐾𑐥𑐵𑑅𑐩𑐶𑐟 𑐦𑑃𑐳𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐁𑑅 𑐟𑐎 𑐣𑐾𑐥𑐵𑐮𑑄 𑐀𑐣 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐥𑐶𑑄 𑑘𑑒𑑘 𑐩𑑂𑐴 𑐣𑐾𑐥𑐵𑑅𑐩𑐶𑐟𑐫𑑂 𑐄𑐡𑑂𑐢𑐵𑐬 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑑂𑐰 𑐄𑐡𑑂𑐢𑐵𑐬𑐫𑐵 𑐖𑑂𑐫𑐵𑐫𑑂 𑐀𑐩𑐾𑐬𑐶𑐎𑐵𑑄 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐏𑑅𑐳𑐵 𑐁𑑅 𑐀𑐩𑐾𑐬𑐶𑐎𑐵𑑄 𑐄𑐡𑑂𑐢𑐵𑐬 𑐖𑑂𑐫𑐵 𑐣𑑄 𑐧𑐣𑑂𑐡 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑑂𑐰 𑐀𑐰𑐳𑑂𑐠𑐵𑐫𑑂 𑐠𑑅 𑐣𑐵𑐐𑐬𑐶𑐎𑐫𑐵𑐟 𑐠𑑅𑐥𑐶𑑄𑐳𑑄 𑐴𑐾 𑐄𑐡𑑂𑐢𑐵𑐬 𑐫𑐵𑐫𑐾 𑐩𑐵𑐮𑐷𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐄𑐎𑐶𑐫𑐵 𑐮𑐵𑐐𑐶𑑄 𑐀𑐦𑐐𑐵𑐣𑐶𑐳𑑂𑐟𑐵𑐣𑐫𑐵 𑐟𑐵𑐮𑐶𑐰𑐵𑐣 𑐥𑐸𑐔𑑅𑐮𑐶𑐳𑐾 𑐳𑐩𑑂𑐥𑐬𑑂𑐎 𑐩𑐟𑐳𑐾𑑄 𑐐𑐵𑐂 𑐩𑐏𑐸 𑑋 𑐟𑐬 𑐣𑐾𑐥𑐵𑐮𑑄 𑐁𑑅 𑐟𑐎 𑐟𑐵𑐮𑐶𑐰𑐵𑐣 𑐳𑑄𑐐𑐛𑐣𑐮𑐶𑐳𑐾 𑐳𑑂𑐰𑐵𑐥𑐹 𑐟𑐫𑐾𑐐𑐸 𑐮𑐵 𑐏𑑃 𑐴𑐾 𑐟𑑂𑐰𑑅𑐟𑐾, 𑐳𑑂𑐰𑐵𑐥𑐹 𑐟𑐫𑐾𑐐𑐸 𑐮𑐵𑐎𑐶 𑐩𑐟𑐫𑐾𑐐𑐸 𑐢𑐎𑐵𑑅 𑐣𑑄 𑐣𑐶𑐬𑑂𑐞𑐫 𑐫𑐵𑐫𑐾 𑐩𑐦𑐸𑐣𑐶𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐨𑐵𑐬𑐟𑐫𑐵 𑐬𑐵𑐖𑐡𑐹𑐟 𑐣𑐶𑐮𑐵𑐩𑑂𑐧𑐬 𑐁𑐔𑐵𑐬𑑂𑐫𑑄 𑐩𑐵𑐮 𑐢𑐵𑑅𑐳𑐵 𑐟𑐵𑐮𑐶𑐰𑐵𑐣𑐮𑐶𑐳𑐾 𑐣𑐾𑐥𑐵𑑅 𑐳𑐬𑐎𑐵𑐬𑑄 𑐳𑑂𑐰𑐵𑐥𑐹 𑐟𑐫𑐾 𑐩𑐵𑐮𑐾𑐦𑐸𑐐𑐸 𑐳𑑄𑐎𑐾𑐟 𑐧𑐶𑐫𑐵𑐡𑐷𑐸 𑐡𑐸 𑑋
𑐎𑐸𑐚𑐣𑐷𑐟𑐶𑐎 𑐳𑐹𑐟𑑂𑐬𑑄 𑐢𑐵𑑅𑐳𑐵 𑐟𑐵𑐮𑐶𑐰𑐵𑐣𑐮𑐶𑐳𑐾 𑐁𑑅 𑐳𑑂𑐰𑐵𑐥𑐹 𑐩𑐟𑑅𑐳𑐵𑑄 𑐖𑐧 𑐄𑐩𑐶𑐳𑑄 𑐀𑐣 𑐳𑐬𑐎𑐵𑐬 𑐐𑐛𑐣 𑐫𑐵𑐂, 𑐰𑐫𑐵𑑄 𑐮𑐶𑐥𑐵 𑐳𑑂𑐰𑐵𑐥𑐹 𑐩𑐟𑐳𑐾𑑄 𑐐𑐵𑐂 𑐩𑐏𑐸 𑑋 𑐠𑑅 𑐣𑐵𑐐𑐬𑐶𑐎𑐫𑐵 𑐄𑐡𑑂𑐢𑐵𑐬 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐣𑑄 𑐟𑐵𑐮𑐶𑐰𑐵𑐣𑐮𑐶𑐳𑐾 𑐏𑑃 𑐩𑐮𑑂𑐴𑐵𑐳𑐾𑑄 𑐐𑐵𑐂 𑐩𑐏𑐸 𑑋
𑐀𑐦𑐐𑐵𑐣𑐶𑐳𑑂𑐟𑐵𑐣𑐫𑑂 𑐁𑑅 𑐟𑐎 𑐣𑐾𑐥𑐵𑑅𑐫𑐵 𑐳𑐩𑑂𑐥𑐬𑑂𑐎𑐫𑑂 𑐰𑐫𑐵𑑅 𑐣𑑄 𑐦𑑃𑐳𑐾 𑐖𑐸𑐫𑐵𑐔𑑂𑐰𑐥𑐶𑑄 𑐣𑐾𑐥𑐵𑑅𑐩𑐶𑐫𑐵 𑐮𑑂𑐫𑐵𑑅 𑑓𑑔 𑐩𑑂𑐴 𑐡𑐸 𑑋 𑐄𑐩𑐶𑐟 𑐄𑐡𑑂𑐢𑐵𑐬 𑐫𑐵𑐫𑐾𑐢𑐸𑑄𑐎𑐮 𑐎𑐶 𑐀𑐣 𑐣𑐾𑐥𑐵𑑅𑐩𑐶𑐟 𑐡𑐂 𑐩𑐏𑐸𑐟 𑐢𑐵𑑅𑐳𑐵𑑄 𑐣𑑄 𑐳𑐩𑑂𑐥𑐬𑑂𑐎𑐫𑑂 𑐩𑐰𑐳𑐾 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐥𑐵𑑅𑐩𑐶𑐟 𑐢𑐵𑑅𑐳𑐵 𑐀𑐗𑑄 𑐡𑐫𑐾𑐦𑐸 𑐢𑐵𑑅𑐐𑐸 𑐡𑐸 𑑋
𑐟𑐵𑐮𑐶𑐰𑐵𑐣𑑄 𑐀𑐦𑐐𑐵𑐣𑐶𑐳𑑂𑐟𑐵𑐣 𑐎𑐧𑑂𑐖𑐵 𑐫𑐵𑐫𑐾𑐢𑐸𑑄𑐎𑐵𑑅 𑐄𑐥𑐶𑑄𑐮𑐶𑐳𑐾 𑐔𑐷𑐣 𑐰 𑐬𑐸𑐳 𑐧𑐵𑐴𑐾𑐎 𑐩𑐾𑐐𑐸 𑐡𑐾𑐳𑑄 𑐳𑑂𑐰𑐵𑐥𑐹 𑐟𑑅𑐐𑐸 𑐩𑐡𑐸𑐣𑐶 𑑋 𑐄𑐎𑐷 𑐣𑐾𑐥𑐵𑐮𑑄 𑐣𑑄 𑐳𑑂𑐰𑐵𑐥𑐹 𑐩𑐟𑑅𑐣𑐶 𑑋 𑐟𑐵𑐮𑐶𑐰𑐵𑐣 𑐰𑐫𑐾𑐢𑐸𑑄𑐎𑐵𑑅 𑐟𑐵𑐮𑐶𑐰𑐵𑐣 𑐳𑑄𑐐𑐛𑐣 𑐰 𑐀𑐦𑐐𑐵𑐣 𑐳𑐬𑐎𑐵𑐬 𑐧𑐵𑐬𑐾 𑐣𑐾𑐥𑐵𑑅𑐫𑐵 𑐐𑐖𑑂𑐫𑐵𑑅𑐐𑐸 𑐳𑑂𑐰𑐵𑐥𑐹 𑐖𑐸𑐂 𑐢𑐂𑐐𑐸 𑐏𑑃𑐫𑑂 𑐣𑐾𑐥𑐵𑑅𑐫𑐵 𑐳𑐸𑑄 𑐣𑑄 𑐎𑐸𑐚𑐣𑐷𑐟𑐶𑐖𑑂𑐘𑑄 𑐳𑑂𑐥𑐲𑑂𑐚 𑐣𑑂𑐰𑐰𑐵𑑅𑐐𑐸 𑐩𑐡𑐸𑐣𑐶 𑑋
LEAVE YOUR COMMENTS