Read news in NepalBhasa text-- www.hamroschool.com BACK 𑐎𑐶𑐩 𑐣𑐵𑐥𑐮𑐵𑐫𑐾𑐟 𑐚𑑂𑐬𑐩𑑂𑐥 𑐄𑐟𑑂𑐳𑐸𑐎 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐎𑐶𑐩 𑐣𑐵𑐥𑐮𑐵𑐫𑐾𑐟 𑐚𑑂𑐬𑐩𑑂𑐥 𑐄𑐟𑑂𑐳𑐸𑐎

𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐜𑑀𑐣𑐵𑐮𑑂𑐜 𑐚𑑂𑐬𑐩𑑂𑐥𑑄 𑐄𑐟𑑂𑐟𑐬 𑐎𑑀𑐬𑐶𑐫𑐵𑐫𑐵 𑐳𑐬𑑂𑐰𑑀𑐔𑑂𑐔 𑐣𑐾𑐟𑐵 𑐎𑐶𑐩 𑐖𑐒 𑐀𑐣𑐫𑐵𑐟 𑐣𑐵𑐥𑐮𑐵𑐫𑐾𑐟 𑐠𑑅 𑐄𑐟𑑂𑐳𑐸𑐎 𑐖𑐹𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐎𑐶𑐩𑐫𑐵 𑐔𑐷𑐣 𑐨𑑂𑐬𑐩𑐞 𑐟𑐳𑐎𑑄 𑐳𑐦𑐮 𑐖𑐹𑐐𑐸 𑐢𑐫𑐵𑐐𑐸 𑐚𑑂𑐬𑐩𑑂𑐥𑐫𑐵𑐟 𑐖𑐵𑐣𑐎𑐵𑐬𑐷 𑐧𑐷𑐢𑐸𑑄𑐎𑐵𑑅 𑐠𑑂𑐰 𑐚𑑂𑐬𑐩𑑂𑐥𑐫𑐵 𑐠𑑂𑐰 𑐢𑐵𑐥𑐹 𑐰𑑅𑐐𑐸 𑐏𑑅 𑑋 𑐟𑐬 𑐚𑑂𑐬𑐩𑑂𑐥𑑄 𑐰𑐵𑐬𑑂𑐟𑐵 𑐣𑑂𑐴𑑂𑐫𑑅 𑐣𑑄 𑐄𑐟𑑂𑐟𑐬 𑐎𑑀𑐬𑐶𑐫𑐵 𑐰𑐶𑐬𑐸𑐡𑑂𑐢 𑐟𑐫𑐵𑐟𑑅𑐐𑐸 𑐣𑐵𑐎𑐵𑐧𑐣𑑂𑐡𑐷 𑐰 𑐡𑐧𑐵𑐧 𑐢𑐵𑑅𑐳𑐵 𑐖𑐵𑐬𑐷 𑐴𑐾 𑐖𑐸𑐫𑐵𑐔𑑂𑐰𑐣𑐷𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐠𑑂𑐰 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐥𑑂𑐬𑐵𑐫𑐡𑑂𑐰𑐷𑐥𑐫 𑐣𑐶𑐳𑐱𑐳𑑂𑐟𑑂𑐬𑐷𑐎𑐬𑐞 𑐁𑑅 𑐳𑐩𑑂𑐨𑐰 𑐖𑐹𑐐𑐸 𑐚𑐶𑐥𑑂𑐥𑐞𑐷 𑐣𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐳𑑀𑐩𑐰𑐵𑑅 𑐧𑐾𑐂𑐖𑐶𑐒 𑐨𑑂𑐬𑐩𑐞𑐫𑑂 𑐰𑑄𑐐𑐸 𑐏𑑅 𑑋 𑐎𑐶𑐩 𑐰 𑐰𑐫𑑂𑐎𑑅𑐫𑐵 𑐎𑐮𑐵𑑅𑐫𑐵𑐟 𑐧𑐾𑐂𑐖𑐶𑐒 𑐐𑐵𑐬𑑂𑐜 𑐀𑐦 𑐀𑐣𑐬 𑐧𑐶𑐫𑐵𑑅 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋 𑐠𑑂𑐰 𑐨𑑂𑐬𑐩𑐞𑐫𑐵 𑐗𑑂𑐰𑐮𑐫𑑂 𑐎𑐶𑐩𑑄 𑐠𑑅 𑐣𑐶𑐳𑐱𑐳𑑂𑐟𑑂𑐬𑐷𑐎𑐬𑐞𑐫𑐵 𑐣𑐶𑑄𑐟𑐶𑑄 𑐥𑑂𑐬𑐟𑐶𑐧𑐡𑑂𑐢 𑐡𑐸 𑐢𑐫𑐵𑐡𑐷𑐐𑐸 𑐏𑑃 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐧𑐾𑐂𑐖𑐶𑐒𑐫𑑂 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐰 𑐔𑐶𑐣𑐶𑐫𑐵 𑐣𑐾𑐟𑐵 𑐡𑐠𑐸𑐂 𑐖𑐹𑐐𑐸 𑐰𑐵𑐬𑑂𑐟𑐵𑐫𑐵𑐟 𑐎𑐫𑐵𑑅 𑐧𑐵𑑄𑐮𑐵𑑅𑐐𑐸 𑐰 𑐥𑑂𑐬𑐐𑐟𑐶𑐫𑐵 𑐏𑑃 𑐥𑐶𑐴𑐵𑑄 𑐰𑐫𑐾𑐰𑑄 𑐧𑐸𑐢𑐰𑐵𑑅 𑐚𑑂𑐬𑐩𑑂𑐥𑑄 𑐠𑐸𑐎𑐶𑐫𑐵𑐟 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋𑐚𑑂𑐬𑐩𑑂𑐥𑑄 𑐚𑑂𑐰𑐶𑐚 𑐫𑐵𑐳𑐾𑑄 𑐢𑐵𑑅𑐐𑐸 𑐡𑐸, ‘𑐎𑐶𑐩 𑐖𑐒 𑐀𑐣𑐫𑐵𑐟 𑐠𑑅 𑐖𑐣𑐟𑐵 𑐰 𑐩𑐵𑐣𑐰𑐟𑐵𑐫𑐵 𑐣𑐶𑑄𑐟𑐶𑑄 𑐧𑐵𑑄𑐮𑐵𑑅𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐀𑐰𑐳𑐬 𑐰𑑅𑐐𑐸 𑐡𑐸 𑑋’ 𑐀𑐠𑐾𑐴𑐾 𑐩𑐾𑐐𑐸 𑐚𑑂𑐰𑐶𑐚𑐫𑑂 𑐎𑐶𑐩 𑐠𑑅𑐮𑐶𑐳𑐾 𑐣𑐵𑐥𑐮𑐵𑐫𑐾𑐐𑐸 𑐃 𑐥𑐶𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐏𑑅 𑑋 𑐚𑑂𑐬𑐩𑑂𑐥 𑐰 𑐎𑐶𑐩 𑐡𑐠𑐸𑐂 𑐰𑐂𑐐𑐸 𑐩𑐾 𑐩𑐴𑐶𑐣𑐵𑐫𑑂 𑐰𑐵𑐬𑑂𑐟𑐵 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐚𑑂𑐬𑐩𑑂𑐥𑑄 𑐀𑐥𑑂𑐬𑐟𑑂𑐫𑐵𑐱𑐶𑐟 𑐬𑐸𑐥𑑄 𑐎𑐶𑐩𑐫𑐵𑐟 𑐣𑐵𑐥𑐮𑐵𑐫𑐾𑐟 𑐟𑐫𑐵𑐬 𑐖𑐹𑐐𑐸 𑐏𑑃𑐫𑑂 𑐫𑐎𑑂𑐰 𑐰𑐶𑐱𑑂𑐮𑐾𑐲𑐎𑐟 𑐁𑐱𑑂𑐔𑐬𑑂𑐫𑐔𑐎𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐡𑐶 𑐠𑑂𑐰 𑐨𑐾𑐚𑐰𑐵𑐬𑑂𑐟𑐵 𑐖𑐸𑐮 𑐢𑐵𑑅𑐳𑐵 𑐚𑑂𑐬𑐩𑑂𑐥 𑐳𑐸𑑄 𑐣𑑄 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐳𑐬𑑂𑐰𑑀𑐔𑑂𑐔 𑐣𑐾𑐟𑐵 𑐣𑐵𑐥𑐮𑐵𑑅𑐩𑑂𑐴 𑐣𑑂𑐴𑐵𑐥𑐵𑑄𑐩𑑂𑐴 𑐧𑐴𑐵𑐮𑐰𑐵𑐮𑐵 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐖𑐸𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS