Read news in NepalBhasa text-- www.hamroschool.com BACK 𑐖𑑂𑐫𑐵𑐥𑐸 𑐳𑐩𑐵𑐖𑐫𑐵 𑐰𑐺𑐡𑑂𑐢𑐵𑐱𑑂𑐬𑐩 𑐄𑐮𑐾𑐖𑑂𑐫𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐖𑑂𑐫𑐵𑐥𑐸 𑐳𑐩𑐵𑐖𑐫𑐵 𑐰𑐺𑐡𑑂𑐢𑐵𑐱𑑂𑐬𑐩 𑐄𑐮𑐾𑐖𑑂𑐫𑐵

𑐫𑐮- 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵𑑅 𑐖𑑂𑐫𑐵𑐥𑐸 𑐳𑐩𑐵𑐖𑐫𑐵 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎 𑐨𑐰𑐣𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐥𑑂𑐬𑐩 𑐡𑐾𑐄𑐰𑐵𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑔 𑐧𑐵𑐐𑐜𑑀𑐮𑐫𑑂 𑐔𑑂𑐰𑑄𑐐𑐸 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎 𑐁𑐣𑐣𑑂𑐡 𑐣𑐶𑐎𑐾𑐟𑐣 𑐨𑐰𑐣𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐨𑐰𑐣 𑐄𑐮𑐾𑐖𑑂𑐫𑐵 𑐮𑐶𑐥𑐵 𑐥𑑂𑐬𑐩 𑐡𑐾𑐄𑐰𑐵𑑄 𑐳𑐸𑑄 𑐣𑑄 𑐖𑑂𑐫𑐵𑐠𑐖𑐶𑐠𑐶𑐥𑐶𑑄 𑐰𑐺𑐡𑑂𑐢𑐵𑐱𑑂𑐬𑐩𑐫𑑂 𑐔𑑂𑐰𑐣𑐾𑐐𑐸 𑐥𑐬𑐶𑐳𑑂𑐠𑐶𑐟𑐶 𑐩𑐰𑐫𑐾𑐩𑐵 𑐢𑐵𑐳𑐾𑑄 𑐫𑐡𑐶 𑐀𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵 𑐰 𑐴𑐾 𑐰𑐮 𑐢𑐵𑑅𑐳𑐵𑑄 𑐣𑑄 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎𑐫𑐵 𑐣𑐶𑑄𑐟𑐶𑑄 𑐄𑐔𑐶𑐟 𑐳𑐸𑐰𑐶𑐢𑐵𑐳𑐴𑐶𑐟𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐳𑐬𑐎𑐵𑐬𑑄 𑐦𑐎𑑂𑐰 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋

𑐳𑑂𑐰𑑄𑐐𑐸𑐮𑐶𑑄 𑐟𑐴𑐫𑐵 𑐳𑐬𑐎𑐵𑐬, 𑐳𑑂𑐠𑐵𑐣𑐷𑐫𑐰𑐵𑐳𑐷 𑐰 𑐨𑐵𑐬𑐟 𑐳𑐬𑐎𑐵𑐬𑐫𑐵 𑐐𑑂𑐰𑐵𑐴𑐵𑐮𑐶𑑄 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐳𑐸𑐰𑐶𑐢𑐵 𑐳𑐩𑑂𑐥𑐣𑑂𑐣 𑐨𑐰𑐣𑐫𑐵 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐳𑐬𑐎𑐵𑐬𑑄 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐣𑑄 𑐰𑐫𑑂𑐎𑐮𑑄 𑐥𑑂𑐰𑑄𑐎𑐵𑐡𑐶𑐮 𑑋

𑐐𑐺𑐴𑐩𑐣𑑂𑐟𑑂𑐬𑐷 𑐧𑐵𑐮𑐎𑐺𑐲𑑂𑐞 𑐏𑐵𑐞𑑄 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎𑐫𑐵 𑐳𑐸𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐨𑐰𑐣 𑐣𑐶𑐬𑑂𑐩𑐵𑐞𑑄 𑐡𑐾𑐫𑑂𑐫𑐵 𑐁𑐥𑐵𑐮𑑄 𑐩𑐣𑐹𑐟𑐫𑑂𑐟 𑐄𑐬𑑂𑐖𑐵 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐡𑐸 𑐢𑐵𑐳𑐾𑑄 𑐠𑐸𑐎𑐠𑑄𑐫𑐵 𑐨𑐰𑐣𑐫𑑂 𑐕𑐾𑑃𑐖𑑅𑐥𑐶𑑄 𑐩𑐡𑐫𑐾𑐎𑐵𑑅 𑐔𑑂𑐰𑐣𑐾𑐩𑐵𑑅𑐥𑐶𑑄 𑐖𑑂𑐫𑐵𑐠𑐖𑐶𑐠𑐶𑐥𑐶𑑄𑐟 𑐳𑐸𑐳𑐵𑑅𑐎𑐸𑐳𑐵𑑅 𑐰 𑐳𑐩𑑂𑐩𑐵𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐫𑐾 𑐦𑐫𑐾𑐩𑐵 𑐢𑐫𑐵𑐡𑐶𑐮 𑑋

𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐀𑐲𑑂𑐚𑐮𑐎𑑂𑐲𑑂𑐩𑐷 𑐱𑐵𑐎𑑂𑐫𑑄 𑐖𑐷𑐰𑐶𑐟 𑐂𑐟𑐶𑐴𑐵𑐳𑐫𑐵 𑐢𑐬𑑀𑐴𑐬𑐫𑐵 𑐬𑐸𑐥𑐫𑑂 𑐡𑐫𑐵𑐔𑑂𑐰𑑄𑐥𑐶𑑄 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎𑐫𑐵 𑐣𑐶𑑄𑐟𑐶𑑄 𑐠𑐸𑐎𑐠𑑄𑐫𑐵 𑐨𑐰𑐣𑐥𑐵𑐏𑐾𑑄 𑐧𑐵𑑄𑐮𑐵𑑅𑐐𑐸 𑐳𑐸𑐰𑐶𑐢𑐵 𑐥𑑂𑐬𑐵𑐥𑑂𑐟 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐨𑐵𑐬𑐟𑐷𑐫 𑐬𑐵𑐖𑐡𑐹𑐟 𑐰𑐶𑐣𑐫𑐩𑑀𑐴𑐣 𑐎𑑂𑐰𑐵𑐟𑑂𑐬𑐵, 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣, 𑐳𑐩𑐵𑐖𑐫𑐵 𑐣𑐵𑐫𑑅 𑐔𑐣𑑂𑐡𑑂𑐬 𑐩𑐴𑐬𑑂𑐖𑐣, 𑐄𑐥𑐵𑐢𑑂𑐫𑐎𑑂𑐲 𑐳𑐣𑑂𑐟𑐩𑐵𑐣 𑐩𑐴𑐬𑑂𑐖𑐣𑑄 𑐣𑑄 𑐣𑐸𑐐𑑅𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

𑐳𑑂𑐠𑐵𑐣𑐷𑐫𑐰𑐵𑐳𑐷 𑐩𑐡𑐸𑐩𑑂𑐴 𑐀𑐲𑑂𑐚𑐩𑐵𑐣 𑐩𑐴𑐬𑑂𑐖𑐣𑑄 𑐡𑐵𑐣 𑐧𑐶𑐫𑐵𑐡𑐷𑐐𑐸 𑑑 𑐬𑑀𑐥𑐣𑐷 𑑑𑑓 𑐁𑐣𑐵 𑐖𑐐𑑂𑐐𑐵 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐨𑐰𑐣 𑑘 𑐡𑐱𑐩𑐮𑐰 𑑕 𑐬𑐾𑐎𑑂𑐚𑐬 𑐳𑑂𑐎𑐾𑐮 𑐟𑐎𑐫𑐵 𑐨𑐸𑐏𑐵𑐔𑑄 𑐕𑐸𑑄 𑐩𑐖𑐸𑐂𑐎𑐠𑑄 𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐖𑐐𑑂𑐐𑐵 𑐡𑐵𑐟𑐵 𑐩𑐴𑐬𑑂𑐖𑐣𑐫𑐵 𑐗𑑂𑐰𑐵𑐟𑐵 𑐣𑑄 𑐀𑐣𑐵𑐰𑐬𑐞 𑐫𑐵𑑅𑐐𑐸 𑐏𑑅𑐳𑐵 𑐡𑐵𑐟𑐵𑐫𑐵 𑐩𑐴𑐬𑑂𑐖𑐣𑐫𑐵 𑐖𑐴𑐵𑐣 𑐣𑑂𑐴𑐸𑐕𑐾𑐩𑐵𑐫𑐵, 𑐎𑐵𑐫 𑐎𑐶𑐬𑐞 𑐩𑐴𑐬𑑂𑐖𑐣𑐫𑐵𑐟 𑐡𑑀𑐳𑐮𑑂𑐮𑐵𑑄 𑐣𑑂𑐫𑐫𑐾𑐎𑐵𑑅 𑐴𑐣𑐾𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS