𑐩𑑄𑐎𑐵𑑅 𑐏𑐮𑑅𑐫𑐵 𑐡𑐧𑐹𑐕𑐾𑑃 𑐡𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐟

𑐫𑐾𑑃 – 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐡𑐧𑐹𑐕𑐾𑑃 𑐡𑐣𑐾𑐐𑐸 𑐖𑑂𑐫𑐵 𑐩𑑂𑐴𑐶𑐐𑑅𑐣𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐛𑐾𑐎𑐾𑐡𑐵𑐬 𑐎𑐩𑑂𑐥𑐣𑐷𑐫𑐵 𑐜𑑀𑐖𑐬 𑐴𑐫𑐵𑑅 𑐀𑐣 𑐐𑐵𑑅 𑐩𑑂𑐴𑐸𑐂𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐩𑑄𑐎𑐵𑑅 𑐏𑐮𑑅𑐫𑐵 𑐕𑐾𑑃 𑐡𑐣𑐾𑐐𑐸 𑐮𑐵𑐐𑐶𑑄 𑐕𑐸𑑄 𑐃 𑐣𑑂𑐴𑑂𑐫𑑅 𑐴𑐾 𑐖𑐐 𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵𑑄 𑐎𑑀𑐨𑐶𑐜–𑑑𑑙 𑐩𑐴𑐵𑐩𑐵𑐬𑐷 𑐰 𑐮𑐎𑐜𑐵𑐄𑐣𑑄 𑐫𑐵𑐣𑐵𑑅 𑐖𑑂𑐫𑐵 𑐱𑐸𑐬𑐸 𑐫𑐵𑐫𑐾 𑐩𑐦𑐸𑐐𑐸 𑐏𑑅 𑑋 𑐕𑐸𑑄 𑐃 𑐡𑐶𑐣𑐵𑐔𑑂𑐰𑑄𑐐𑐸 𑐖𑑂𑐫𑐵 𑐩𑑂𑐴𑐶𑐐𑑅𑐣𑐶𑐳𑐾𑑄 𑐴𑐵𑐣𑑄 𑐱𑐸𑐬𑐸 𑐖𑐹𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶𑑄 𑐩𑑄𑐎𑐵𑑅 𑐏𑐮𑑅𑐫𑐵 𑐠𑐸𑐐𑐸 𑐡𑐧𑐹𑐕𑐾𑑃 𑐡𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐩𑐣𑐥𑐵𑐫𑐵 𑐥𑑂𑐬𑐩𑐸𑐏 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐴𑐾 𑐩𑑄𑐎𑐵𑑅 𑐏𑐮𑑅𑐫𑐵 𑐖𑐐 𑐳𑑂𑐰𑐣𑐵𑐡𑐷𑐐𑐸 𑐏𑑅 𑑋 𑐠𑑂𑐰 𑐡𑐧𑐹𑐕𑐾𑑃𑐫𑐵 𑐣𑐶𑐬𑑂𑐩𑐵𑐞 𑐖𑑂𑐫𑐵 𑐨𑐵𑐖𑐸 𑐱𑐵𑐎𑑂𑐫𑐫𑐵 𑐴𑐾 𑐎𑐵𑐬𑑂𑐫𑐎𑐵𑐮𑐫𑑂 𑐎𑑂𑐰𑐔𑐵𑐫𑐾𑐎𑐾𑐐𑐸 𑐟𑐵𑑅 𑐟𑐫𑐵𑑅 𑐣𑐶𑐬𑑂𑐩𑐵𑐞 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑑂𑐴𑐶𑐐𑑅𑐣𑐶𑐳𑐾𑑄 𑐖𑑂𑐫𑐵 𑐱𑐸𑐬𑐸 𑐫𑐵𑑅𑐩𑑂𑐴 𑐛𑐾𑐎𑐾𑐡𑐵𑐬 𑐎𑐩𑑂𑐥𑐣𑐷𑑄 𑐣𑑄 𑐡𑐧𑐹𑐕𑐾𑑃 𑐣𑐶𑐬𑑂𑐩𑐵𑐞 𑐩𑐾𑐫𑐬 𑐱𑐵𑐎𑑂𑐫𑐫𑐵 𑐴𑐾 𑐎𑐵𑐬𑑂𑐫𑐎𑐵𑐮𑐫𑑂 𑐳𑐩𑑂𑐥𑐣𑑂𑐣 𑐫𑐵𑐣𑐵 𑐧𑐷 𑐢𑐎𑐵𑑅 𑐧𑐔𑑄 𑐧𑐶𑐄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐡𑐧𑐹𑐕𑐾𑑃 𑐣𑐶𑐬𑑂𑐩𑐵𑐞 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐴𑐾 𑐕𑐐𑐹 𑐩𑐹 𑐩𑐵𑐐 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑐸𑐎𑐶𑐫𑐵𑐟 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶 𑐩𑑂𑐴𑐐𑐳𑐫𑐵 𑐬𑐸𑐥𑐫𑑂 𑐳𑐩𑐾𑐟 𑐳𑑂𑐰𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸𑐸𑐳𑐷 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐠𑑂𑐰 𑐩𑑂𑐴𑐐𑐳 𑐥𑐹𑐰𑑄𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐧𑐷𑐟𑑂𑐫𑑄𑐐𑐸 𑐏𑑅 𑑋 𑐡𑐧𑐹𑐕𑐾𑑃 𑐡𑐣𑐾𑐐𑐸 𑐴𑐾 𑐳𑐣𑑂𑐡𑐬𑑂𑐨𑐫𑑂 𑐩𑑄𑐎𑐵𑑅 𑐏𑐮𑑅 𑐣𑑂𑐴𑐹𑐢𑐵𑑅 𑐫𑐵𑐣𑐵𑑅 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐮𑑂𑐫𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋