Read news in NepalBhasa text-- www.hamroschool.com BACK 𑐥𑐣𑑂𑐟𑐶𑐂 𑐩𑐎𑐬 𑐩𑐾𑐮𑐵𑐫𑐵 𑐟𑐫𑐵𑐬𑐷 𑐱𑐸𑐬𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐥𑐣𑑂𑐟𑐶𑐂 𑐩𑐎𑐬 𑐩𑐾𑐮𑐵𑐫𑐵 𑐟𑐫𑐵𑐬𑐷 𑐱𑐸𑐬𑐸

𑐎𑐵𑐨𑑂𑐬𑐾 – 𑐠𑐣𑐫𑐵 𑐋𑐟𑐶𑐴𑐵𑐳𑐶𑐎 𑐰𑐳𑑂𑐟𑐷 𑐥𑐣𑑂𑐟𑐶𑐂 𑐠𑐸𑐐𑐸𑐳𑐷 ‘𑐩𑐎𑐬 𑐩𑐾𑐮𑐵’ 𑐣𑑂𑐫𑐵𑐫𑐾𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐩𑐾𑐮𑐵𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐟𑐫𑐵𑐬𑐷 𑐣𑑄 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐥𑑂𑐬𑐟𑑂𑐫𑐾𑐎 𑐗𑐶𑑄𑐣𑐶𑐡𑑃𑐫𑑂 𑐕𑐎𑑂𑐰𑑅 𑐖𑐸𑐂𑐐𑐸 𑐠𑐣𑐫𑐵 𑐋𑐟𑐶𑐴𑐵𑐳𑐶𑐎 𑐰 𑐢𑐵𑐬𑑂𑐩𑐶𑐎 𑐩𑐴𑐟𑑂𑐰𑐫𑐵 ‘𑐩𑐎𑐬 𑐩𑐾𑐮𑐵’𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑐵 𑐎𑐵𑐬𑐞𑑄 𑐠𑐐𑐸𑐣𑐾 𑐔𑐿𑐟𑐣𑐶𑐳𑐾𑑄 𑐠𑐷𑐠𑐷 𑐣𑐏𑑅𑐔𑐏𑑅, 𑐖𑐵𑐟𑑂𑐬𑐵, 𑐥𑐬𑑂𑐰 𑐳𑑄𑐳𑑂𑐎𑐺𑐟𑐶 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐰𑑄𑐐𑐸 𑐔𑐿𑐟 𑐧𑐿𑐱𑐵𑐏𑐥𑐵𑐏𑐾 𑐖𑐣𑐧𑐴𑐵𑑅 𑐡𑑂𑐫𑑅, 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 𑐳𑐴𑐖 𑐬𑐸𑐥𑑄 𑐳𑑄𑐔𑐵𑐮𑐣 𑐖𑐹𑐳𑐵𑑄 𑐩𑐾𑐩𑐾𑐐𑐸 𑐖𑐵𑐟𑑂𑐬𑐵 𑐥𑐬𑑂𑐰 𑐢𑐵𑑅𑐳𑐵 𑐀𑐗𑑄 𑐥𑑂𑐬𑐨𑐵𑐰𑐶𑐟 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑐳𑐣𑑄 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐶𑐟𑐫𑐵 𑐮𑑂𑐫𑐵𑑅 𑐴𑐵𑐎𑐣𑑄 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐥𑐣𑑂𑐟𑐶𑐂 𑐢𑐵𑑅𑐳𑐵 𑐩𑐾𑐮𑐵𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐟𑐫𑐵𑐬𑐷 𑐱𑐸𑐬𑐸 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋

𑐎𑐵𑐨𑐾𑑂𑐬𑐫𑐵 𑐋𑐟𑐶𑐴𑐵𑐳𑐶𑐎, 𑐢𑐵𑐬𑑂𑐩𑐶𑐎, 𑐳𑐵𑑄𑐳𑑂𑐎𑐺𑐟𑐎 𑐰 𑐥𑐸𑐬𑐵𑐟𑐵𑐟𑑂𑐰𑐶𑐎 𑐩𑐴𑐟𑑂𑐰𑐫𑐵 𑐥𑐣𑑂𑐟𑐶𑐂 𑐎𑐬𑐶𑐧 𑐣𑑂𑐫𑐵𑐮𑐵 𑐮𑐶𑐥𑐵 𑐩𑐎𑐬 𑐩𑐾𑐮𑐵 𑐖𑐹 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑑑𑑒 𑐡𑑃𑐫𑑂 𑐕𑐎𑑂𑐰𑑅 𑐖𑐸𑐂𑐐𑐸 𑐩𑐾𑐮𑐵𑐫𑐵 𑐟𑐫𑐵𑐬𑐷 𑐫𑐵𑐫𑐾𑐎𑐠𑑄 𑐩𑐾𑐮𑐵𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐥𑐹𑐬𑑂𑐰𑐵𑐢𑐵𑐬 𑐟𑐫𑐵𑐬 𑐫𑐵𑐫𑐾𑐐𑐸 𑐣𑐵𑐥𑐣𑐵𑐥𑑄 𑐩𑐾𑐮𑐵𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐖𑑂𑐫𑐵𑐗𑑂𑐰𑑅𑐟 𑐣𑑄 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐏𑐟𑐸𑑄 𑐩𑐾𑐮𑐵𑐫𑐵 𑐟𑐫𑐵𑐬𑐷 𑐢𑐵𑑅𑐳𑐵 𑐡𑐕𑐶 𑐣𑑂𑐴𑑂𑐫𑑅 𑐴𑐾 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋 𑐠𑐣𑐶𑑄 𑐡𑐕𑐶 𑐣𑑂𑐴𑑂𑐫𑑅 𑐥𑐣𑑂𑐟𑐶 𑐣𑐐𑐬𑐥𑐵𑐮𑐶𑐎𑐵𑑄 𑐩𑐾𑐮𑐵𑐫𑐵 𑐁𑐰𑐱𑑂𑐫𑐎 𑐟𑐫𑐵𑐬𑐷 𑐫𑐵𑐫𑐾𑐎𑐠𑑄 𑐠𑐣𑐫𑐵 𑐣𑐵𑑄𑐖𑐵𑑅𑐐𑐸 𑐟𑑂𑐬𑐶𑐰𑐾𑐞𑐷𑐑𑐵𑐚 𑐮𑐐𑐵𑐫𑐟𑐫𑐵 𑐠𑐵𑐳𑐫𑑂 𑐁𑐰𑐱𑑂𑐫𑐎 𑐨𑑁𑐟𑐶𑐎 𑐥𑐹𑐬𑑂𑐰𑐵𑐢𑐵𑐬𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐠𑑂𑐰 𑐡𑐠𑐸𑐂 𑐁𑑅 𑐰𑐫𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐵𑐩𑐵𑐖𑐶𑐎 𑐳𑑄𑐳𑑂𑐠𑐵 𑐬𑑀𑐚𑐬𑐷 𑐎𑑂𑐧𑐮 𑐀𑐦 𑐥𑐣𑑂𑐟𑐶𑑄 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐩𑐾𑐮𑐵𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐎𑐠𑑄𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋 𑐩𑐎𑐬 𑐳𑑄𑐎𑑂𑐬𑐵𑐣𑑂𑐟𑐶 𑐀𑐬𑑂𑐠𑐵𑐟 𑐩𑐵𑐑 𑐮𑐕𑐶𑐫𑑄𑐎𑑄 𑐣𑑂𑐴𑑂𑐫𑐵𑐂𑐐𑐸 𑐩𑐾𑐮𑐵𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐎𑐠𑑄 𑐬𑑀𑐚𑐬𑐷 𑐎𑑂𑐮𑐧𑑄 𑐩𑐾𑐮𑐵𑐫𑐵 𑐎𑐶𑐥𑐵 𑐀𑑄𑐎𑐶𑐟 𑐠𑐷𑐠𑐷 𑐖𑑂𑐰𑐮𑑄𑐟 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐡𑐸 𑑋

𑐣𑐐𑐬𑐥𑐵𑐮𑐶𑐎𑐵𑑄 𑐩𑐾𑐮𑐵𑐫𑑂 𑐰𑐶𑐱𑐾𑐲 𑐁𑐎𑐬𑑂𑐲𑐞𑐫𑐵 𑐎𑐾𑐣𑑂𑐡𑑂𑐬𑐰𑐶𑐣𑑂𑐡𑐸 𑐟𑑂𑐬𑐶𑐰𑐾𑐞𑐷𑐑𑐵𑐚𑐫𑑂 𑐨𑑁𑐟𑐶𑐎 𑐳𑑄𑐬𑐔𑐣𑐵𑐮𑐶𑐳𑐾𑑄 𑐩𑐾𑐮𑐵 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐟 𑐠𑐷𑐠𑐷𑐎𑐠𑑄𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐴𑐾 𑐩𑐾𑐮𑐵𑐫𑑂 𑐰𑐂𑐥𑐶𑑄𑐟 𑐳𑐴𑐖 𑐖𑐸𑐂𑐩𑐵 𑐢𑐂𑐐𑐸 𑐮𑑂𑐫𑐵𑐏𑑄 𑐩𑐾𑐮𑐵𑐳𑑂𑐠𑐮𑐟𑐎 𑐰𑐣𑐾𑐐𑐸 𑐠𑐷𑐠𑐷 𑐮𑑃𑐥𑐸 𑐰 𑐳𑐟𑐎 𑐣𑐶𑐬𑑂𑐩𑐵𑐞 𑐰 𑐳𑑂𑐟𑐬𑑀𑐣𑑂𑐣𑐟𑐶 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑑂𑐫𑐰𑐳𑑂𑐠𑐶𑐟 𑐬𑐸𑐥𑑄 𑐩𑐾𑐮𑐵 𑐳𑑄𑐔𑐵𑐮𑐣 𑐫𑐵𑐫𑐾𑐟 𑐠𑐷𑐠𑐷 𑐳𑐩𑐶𑐟𑐶 𑐟𑐎𑑄 𑐐𑐛𑐣 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐣𑐐𑐬𑐥𑐵𑐮𑐶𑐎𑐵𑑄 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 𑐩𑐾𑐮𑐵𑐫𑐵 𑐣𑐶𑑄𑐟𑐶𑑄 𑐕𑐐𑐹 𑐡𑐬𑑂𑐖𑐣𑑄 𑐩𑐮𑑂𑐫𑐵𑐎 𑐠𑐷𑐠𑐷 𑐳𑐩𑐶𑐟𑐶 𑐐𑐛𑐣 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐩𑐾𑐮𑐵𑐫𑐵 𑐩𑐹𑐮 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑑄 𑐠𑐸𑐐𑐸𑐳𑐷 𑐟𑑂𑐬𑐶𑐰𑐾𑐞𑐷𑐑𑐵𑐚 𑐖𑐎 𑐩𑐏𑐳𑐾 𑐩𑐸𑐎𑑂𑐎𑑄 𑐥𑐣𑑂𑐟𑐶 𑐡𑐾𑐫𑑂𑐫𑐵𑐟 𑐴𑐾 𑐗𑑅 𑐗𑑅 𑐢𑐵𑐫𑐾𑐎 𑐳𑐩𑐵𑑅 𑐫𑐵𑐫𑐾𑐐𑐸 𑐎𑐠𑑄 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐳𑐷𑐡𑐸𑐐𑐸 𑐡𑐸 𑑋

𑐣𑐐𑐬𑐥𑐵𑐮𑐶𑐎𑐵𑑄 𑐩𑐾𑐮𑐵𑐫𑐵𑐟 𑐴𑐾 𑐢𑑂𑐫𑐵𑐣𑐫𑑂 𑐟𑐫𑐵𑑅 𑐳𑐟𑐎, 𑐀𑐳𑑂𑐠𑐵𑐫𑐷 𑐟𑐵𑑃, 𑐨𑐎𑑂𑐟𑐖𑐣𑐟𑐫𑑂 𑐳𑐸𑐰𑐶𑐢𑐵𑐫𑐵 𑐣𑐶𑑄𑐟𑐶𑑄 𑐰𑐶𑐱𑑂𑐬𑐵𑐩𑐳𑑂𑐠𑐮 𑐣𑐶𑐬𑑂𑐩𑐵𑐞 𑐮𑐐𑐵𑐫𑐟 𑐨𑑁𑐟𑐶𑐎 𑐥𑐹𑐬𑑂𑐰𑐵𑐢𑐵𑐬 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐠𑐐𑐸𑐣𑐾 𑑓 𑐐𑐹 𑐎𑐬𑑀𑐜 𑐟𑐎𑐵 𑐧𑐖𑐾𑐚 𑐰𑐶𑐣𑐶𑐫𑑀𑐖𑐣 𑐫𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS