Read news in NepalBhasa text-- www.hamroschool.com BACK 𑐫𑐸𑐡𑑂𑐢𑐫𑐵 𑐎𑐶𑐔𑐮𑐫𑑂 𑐂𑐬𑐵𑐣 𑐰 𑐂𑐖𑐬𑐵𑐫𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐸𑐡𑑂𑐢𑐫𑐵 𑐎𑐶𑐔𑐮𑐫𑑂 𑐂𑐬𑐵𑐣 𑐰 𑐂𑐖𑐬𑐵𑐫𑐮

𑐦𑑂𑐫𑑂𑐬𑐵𑑄𑐎 𑐐𑐵𑐬𑑂𑐜𑐣𑐬, 𑐧𑐶𑐧𑐶𑐳𑐷

𑐰𑑄𑐐𑐸 𑐰𑐵𑐮𑐫𑑂 𑐂𑐖𑐬𑐵𑐫𑐮𑐷 𑐔𑐶𑐎𑑄 𑐚𑑂𑐫𑐵𑑄𑐎𑐬 𑐖𑐴𑐵𑐖 ‘𑐩𑐬𑑂𑐳𑐬 𑐳𑑂𑐚𑑂𑐬𑐶𑐚’𑐫𑑂 𑐜𑑂𑐬𑑀𑐣 𑐁𑐎𑑂𑐬𑐩𑐞 𑐖𑐸𑐂𑐰𑑄 𑐂𑐬𑐵𑐣 𑐰 𑐂𑐖𑐬𑐵𑐫𑐮 𑐡𑐠𑐸𑐂 𑐁𑐬𑑀𑐥 𑐥𑑂𑐬𑐟𑑂𑐫𑐵𑐬𑑀𑐥 𑐟𑐔𑑂𑐰𑐮 𑑋 𑐣𑐶𑐐𑐸𑐮𑐶𑑄 𑐡𑐾𑐱𑑄 𑐬𑐵𑐖𑐡𑐹𑐟𑐟𑐫𑑂𑐟 𑐴𑐵𑐖𑐶𑐬𑐷 𑐟𑐮𑐧 𑐫𑐵𑐎𑐮, 𑐀𑐮𑐾 𑐠𑐸𑐎𑐶𑐫𑐵 𑐧𑑂𑐰𑐮𑐵 𑐳𑐵𑐫𑐾𑐐𑐸 𑐏𑑂𑐫𑐵𑐔𑑂𑐰𑑅 𑐣𑑄 𑐧𑐶𑐮 𑑋 𑐠𑑂𑐰 𑐑𑐚𑐣𑐵𑐫𑑂 𑐀𑐩𑐾𑐬𑐶𑐎𑐵 𑐰 𑐧𑐾𑐮𑐵𑐫𑐟 𑐣𑑄 𑐂𑐖𑐬𑐵𑐫𑐮𑐫𑐵 𑐥𑐎𑑂𑐲𑐫𑑂 𑐎𑐸𑐴𑐵𑑄 𑐰𑐮 𑑋 𑐂𑐖𑐬𑐵𑐫𑐮, 𑐧𑐾𑐮𑐵𑐫𑐟 𑐰 𑐀𑐩𑐾𑐬𑐶𑐎𑐵𑑄 𑐩𑐬𑑂𑐳𑐬 𑐳𑑂𑐚𑑂𑐬𑐶𑐚𑐫𑑂 𑐂𑐬𑐵𑐣𑑄 𑐴𑐾 𑐁𑐎𑑂𑐬𑐩𑐞 𑐫𑐵𑑅𑐐𑐸 𑐥𑑄 𑐧𑐶𑐮 𑑋 𑐟𑐬 𑐟𑐾𑐴𑐬𑐵𑐣𑑄 𑐢𑐵𑑅𑐳𑐵 𑐠𑐸𑐎𑐶𑐫𑐵 𑐎𑐜𑐵 𑐏𑐣𑑂𑐜𑐣 𑐫𑐵𑐣𑐵 𑐴𑐾 𑐔𑑂𑐰𑐣 𑑋 𑐮𑐶𑐳𑐾𑑄 𑐠𑑂𑐰 𑐑𑐚𑐣𑐵𑐫𑐵𑐟 𑐎𑐫𑐵𑑅 𑐫𑐡𑐶 𑐠𑑅𑐥𑐶𑑄 𑐰𑐶𑐬𑐸𑐡𑑂𑐢 𑐕𑐸𑑄 𑐎𑐵𑐬𑐰𑐵𑐴𑐷 𑐖𑐸𑐮 𑐢𑐵𑑅𑐳𑐵 𑐄𑐎𑐶𑐫𑐵 𑐎𑐜𑐵 𑐮𑐶𑐳𑑅 𑐧𑐷𑐐𑐸 𑐏𑑃 𑐣𑑄 𑐂𑐬𑐵𑐣𑑄 𑐢𑐵𑐮 𑑋

𑐠𑐖𑑂𑐫𑐵𑑅𑐐𑐸 𑐁𑐬𑑀𑐥 𑐥𑑂𑐬𑐟𑑂𑐫𑐵𑐬𑑀𑐥𑐫𑐵 𑐡𑐠𑐸𑐂 𑐢𑐵𑐠𑐾𑑄 𑐠𑑂𑐰 𑐳𑐸𑐣𑐵 𑐫𑐵𑑅𑐐𑐸, 𑐠𑑂𑐰 𑐁𑐎𑑂𑐬𑐩𑐞𑐫𑐵 𑐮𑐶𑐄𑐣𑐾 𑐕𑐸 𑐏𑑃 𑐡𑐸 𑐢𑐫𑐵𑐐𑐸 𑐳𑐎𑐳𑐶𑐫𑐵 𑐄𑐟𑑂𑐳𑐸𑐎𑐫𑐵 𑐰𑐶𑐲𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑑄𑐐𑐸 𑐧𑐶𑐴𑐶𑐰𑐵𑑅 𑑒𑑙 𑐖𑐸𑐮𑐵𑐂 𑐎𑐸𑐣𑑂𑐴𑐸 𑐩𑐢𑑂𑐫𑐩 𑐁𑐎𑐵𑐬𑐫𑐵 𑐔𑐶𑐎𑑄 𑐚𑑂𑐫𑐵𑑄𑐎𑐬 ‘𑐊𑐩𑐰𑐷 𑐩𑐬𑑂𑐳𑐬 𑐳𑑂𑐚𑑂𑐬𑐶𑐚’ 𑐟𑐵𑑄𑐣𑑂𑐖𑐵𑐣𑐶𑐫𑐵𑐫𑐵 𑐡𑐵𑐬 𑐊𑐳 𑐳𑐮𑐵𑐩𑑄 𑐌𑐩𑐵𑐣𑐫𑐵 𑐏𑐵𑐜𑐷𑐂 𑐳𑑄𑐫𑐸𑐎𑑂𑐟 𑐀𑐬𑐧 𑐂𑐩𑐶𑐬𑐾𑐚𑑂𑐳𑐫𑐵 𑐦𑐸𑐖𑐂𑐬𑐵𑐴 𑐧𑐣𑑂𑐡𑐬𑐐𑐵𑐴𑐫𑑂 𑐔𑐶𑐎𑑄 𑐖𑐵𑐫𑐾𑐎𑐾𑐟 𑐰𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐠𑑂𑐰 𑐖𑐴𑐵𑐖𑐫𑑂 𑐮𑐵𑐂𑐧𑐾𑐬𑐶𑐫𑐵𑐫𑐵 𑐢𑑂𑐰𑐵𑑃𑐫𑑂 𑐧𑑂𑐰𑐫𑐾𑐎𑐵𑐟𑑅𑐐𑐸 𑐏𑑅𑐳𑐵𑑄 𑐖𑐴𑐵𑐫𑐵 𑐠𑐸𑐰𑐵𑑅 𑐢𑐵𑑅𑐳𑐵 𑐕𑐐𑐹 𑐖𑐵𑐥𑐵𑐣𑐷 𑐎𑐩𑑂𑐥𑐣𑐷 𑐏𑑅 𑑋 𑐟𑐬 𑐠𑑂𑐰 𑐖𑐴𑐵𑐖𑐫𑐵 𑐳𑑄𑐔𑐵𑐮𑐣 𑐢𑐵𑑅𑐳𑐵 𑐂𑐖𑐬𑐵𑐫𑐮𑐷 𑐎𑐩𑑂𑐥𑐣𑐷 𑐖𑑀𑐜𑐶𑐫𑐵𑐎 𑐩𑐾𑐬𑐶𑐚𑐵𑐂𑐩𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐄𑐎𑐸𑐣𑑂𑐴𑐸 𑐠𑑂𑐰 𑐚𑑂𑐫𑐵𑑄𑐎𑐬𑐫𑑂 𑐜𑑂𑐬𑑀𑐣 𑐁𑐎𑑂𑐬𑐩𑐞 𑐖𑐸𑐮, 𑐐𑐸𑐎𑐷 𑐮𑐵𑐣𑐵𑑅 𑐔𑐵𑐮𑐎 𑐡𑐮𑐫𑐵 𑐣𑐶𑐩𑑂𑐴 𑐡𑐸𑐖𑑅𑐥𑐶𑐣𑐶 𑐖𑑂𑐫𑐵𑐣 𑐰𑐣 𑑋 𑐳𑐷𑐥𑐶𑑄 𑐩𑐢𑑂𑐫𑐾 𑐕𑐩𑑂𑐴 𑐬𑑀𑐩𑐵𑐣𑐶𑐫𑐵𑐫𑐵 𑐣𑐵𑐐𑐬𑐶𑐎 𑐏𑑅𑐳𑐵 𑐕𑐩𑑂𑐴 𑐧𑐾𑐮𑐵𑐫𑐟𑐷 𑐣𑐵𑐐𑐬𑐶𑐎 𑐏𑑅 𑑋 𑐁𑐎𑑂𑐬𑐩𑐞 𑐖𑐸𑐂𑐰𑑄 𑐚𑑂𑐫𑐵𑑄𑐎𑐬 𑐏𑐟𑐬𑐵𑐫𑐵 𑐳𑑄𑐎𑐾𑐟 𑐕𑑂𑐰𑐮, 𑐀𑐮𑐾 𑐀𑐩𑐾𑐬𑐶𑐎𑐷 𑐣𑑁𑐳𑐾𑐣𑐵𑐫𑐵 𑐣𑐶𑐐𑑅 𑐫𑐸𑐡𑑂𑐢𑐥𑑀𑐟 𑐖𑐴𑐵𑐖 𑐰𑐫𑐵𑑅 𑐠𑑂𑐰 𑐔𑐶𑐎𑑄 𑐚𑑂𑐫𑐵𑑄𑐎𑐬𑐫𑐵𑐟 𑐳𑐸𑐬𑐎𑑂𑐲𑐶𑐟 𑐠𑐵𑐳𑐫𑑂 𑐫𑑄𑐎𑐮 𑑋

𑐠𑑂𑐰 𑐡𑑃𑐫𑑂 𑐖𑐎 𑐂𑐖𑐬𑐵𑐫𑐮𑐫𑐵 𑐟𑑅𑐐𑑅 𑐴𑐾 𑐰𑑂𑐫𑐵𑐥𑐵𑐬𑐶𑐎 𑐖𑐴𑐵𑐖𑐫𑑂 𑐠𑐸𑐎𑐠𑑄 𑐣𑐶𑐱𑐵𑐣𑐵 𑐡𑐫𑐾𑐎𑐹𑐐𑐸 𑐡𑐸 𑑋 𑐀𑐮𑐾 𑐠𑑂𑐰 𑐦𑐸𑐎𑑂𑐎𑑄𑐫𑐵 𑐖𑐶𑐩𑑂𑐩𑐾𑐰𑐵𑐬 𑐂𑐬𑐵𑐣 𑐖𑐹𑐐𑐸 𑐡𑑂𑐰𑐥𑑄 𑐂𑐖𑐬𑐵𑐫𑐮𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐂𑐬𑐵𑐣𑑄 𑐢𑐵𑑅𑐳𑐵 𑐠𑐸𑐎𑐷𑐫𑐵 𑐎𑐜𑐵 𑐏𑐞𑑂𑐜𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐴𑐾 𑐡𑑃𑐫𑐵 𑐀𑐥𑑂𑐬𑐶𑐮𑐫𑑂 𑐮𑐵𑐮 𑐳𑐵𑐐𑐬𑐫𑑂 𑐂𑐬𑐵𑐣𑐷 𑐳𑐾𑐣𑐵𑐫𑐵 𑐕𑐐𑑅 𑐖𑐴𑐵𑐖 ‘𑐳𑐵𑐰𑐶𑐖’ 𑐕𑐐𑐹 𑐬𑐴𑐳𑑂𑐫𑐩𑐫𑐷 𑐰𑐶𑐳𑑂𑐦𑑀𑐚 𑐖𑐸𑐮, 𑐂𑐬𑐵𑐣𑑄 𑐠𑐸𑐎𑐷 𑐂𑐖𑐬𑐵𑐫𑐮𑐫𑐵 𑐮𑑂𑐴𑐵𑑅 𑐡𑐸𑐐𑐸 𑐱𑑄𑐎𑐵 𑐫𑐵𑐟 𑑋 𑐂𑐖𑐬𑐵𑐫𑐮 𑐰 𑐂𑐬𑐵𑐣 𑐡𑐠𑐸𑐂 𑐠𑑁𑑄𑐎𑐣𑑂𑐴𑐫𑑂 𑐐𑐸𑐐𑐸 𑐫𑐸𑐡𑑂𑐢𑐫𑐵 𑐳𑐩𑑂𑐨𑐵𑐰𑐣𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸, 𑐠𑑂𑐰 𑐦𑐸𑐎𑑂𑐎𑑄 𑐄𑐎𑐶𑐫𑐵 𑐴𑐾 𑐧𑑂𑐰 𑐏𑑅 𑑋

𑐧𑑂𑐰𑐮𑐵 𑐳𑐵𑐫𑐾𑐐𑐸 𑐨𑐵𑐰𑐣𑐵𑑄 𑐖𑐸𑐫𑐵𑐔𑑂𑐰𑑄𑐐𑐸 𑐠𑑂𑐰 𑐎𑐵𑐳𑐵𑐫𑑂 𑐂𑐬𑐵𑐣𑐫𑐵 𑐥𑐬𑐩𑐵𑐞𑐸 𑐰𑐿𑐖𑑂𑐘𑐵𑐣𑐶𑐎𑐟𑐫𑑂 𑐴𑐟𑑂𑐫𑐵 𑐣𑐶𑐳𑐾𑑄 𑐂𑐬𑐵𑐣𑐫𑐵 𑐥𑐬𑐩𑐵𑐞𑐸 𑐳𑑄𑐫𑐣𑑂𑐟𑑂𑐬 𑐧𑐬𑑂𑐧𑐵𑐡 𑐫𑐵𑐫𑐾𑐟 𑐖𑐸𑐫𑐵𑐔𑑂𑐰𑑄𑐐𑐸 𑐎𑐸𑐟𑑅 𑐣𑑄 𑐡𑐸𑐠𑑂𑐫𑐵𑑅, 𑐀𑐮𑐾 𑐠𑐸𑐎𑐶𑐫𑐵 𑐮𑐶𑐄𑐣𑐾 𑐂𑐖𑐬𑐵𑐫𑐮𑐫𑐵 𑐮𑑂𑐴𑐵𑑅 𑐡𑐸𑐐𑐸 𑐱𑑄𑐎𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐩𑐬𑑂𑐳𑐬 𑐳𑑂𑐚𑑂𑐬𑐶𑐚𑐫𑐵 𑐑𑐚𑐣𑐵 𑐣𑑂𑐴𑑂𑐫𑑅 𑐕𑐸𑑄 𑐣𑑄 𑐰𑑂𑐫𑐵𑐥𑐵𑐬𑐶𑐎 𑐖𑐴𑐵𑐖𑐫𑑂 𑐖𑐹𑐐𑐸 𑐁𑐎𑑂𑐬𑐩𑐞𑐫𑑂 𑐳𑐸𑐫𑐵𑑄 𑐖𑑂𑐫𑐵𑐣 𑐢𑐵𑑅𑐳𑐵 𑐩𑐰𑑄𑐣𑐶𑐐𑐸 𑐏𑑅 𑑋

𑐟𑐬 𑐠𑑂𑐰 𑐥𑐵𑐮𑐫𑑂 𑐕𑐩𑑂𑐴 𑐧𑐾𑐮𑐵𑐫𑐟𑐷 𑐰 𑐕𑐩𑑂𑐴 𑐬𑑀𑐩𑐵𑐣𑐶𑐫𑐵𑐮𑐷 𑐣𑐵𑐐𑐬𑐶𑐎𑐫𑐵 𑐖𑑂𑐫𑐵𑐣 𑐰𑑄𑐐𑐸 𑐡𑐸 𑑋 𑐠𑑂𑐰 𑐁𑐎𑑂𑐬𑐩𑐞 𑐂𑐬𑐵𑐣𑑄 𑐫𑐵𑑅𑐐𑐸 𑐡𑑂𑐰𑐥𑑄 𑐧𑑀𑐮𑐫𑐟, 𑐀𑐩𑐾𑐬𑐶𑐎𑐵 𑐰 𑐂𑐖𑐬𑐵𑐫𑐮𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐡𑐶 𑐢𑐵𑐠𑐾𑑄 𑐠𑑂𑐰 𑐡𑑂𑐰𑐥𑑄 𑐳𑐟𑑂𑐫 𑐖𑐸𑐮 𑐢𑐵𑑅𑐳𑐵 𑐠𑑂𑐰 𑐂𑐬𑐵𑐣𑐫𑐵 𑐐𑐸𑐥𑑂𑐟𑐔𑐬𑐷 𑐖𑑂𑐫𑐵𑐫𑐵 𑐕𑐐𑐹 𑐟𑑅𑐢𑑄𑐐𑐸 𑐎𑐩𑐖𑑀𑐬𑐷 𑐖𑐹𑐰𑐣𑐷 𑑋

𑐂𑐬𑐵𑐣𑐫𑐵 𑐮𑑂𑐰𑐵𑐥𑐸 𑐮𑐵 𑐂𑐖𑐬𑐵𑐫𑐮 𑐮𑐶𑐳𑐾 𑐖𑐎 𑐡𑐸𑐐𑐸 𑐏𑑅, 𑐟𑐬 𑐠𑑂𑐰 𑐁𑐎𑑂𑐬𑐩𑐞 𑐧𑐾𑐮𑐵𑐫𑐟𑐷 𑐣𑐵𑐐𑐬𑐶𑐎𑐫𑐵 𑐖𑑂𑐫𑐵𑐣 𑐰𑐣𑐾𑐰𑑄 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑 𑐳𑐸𑐬𑐎𑑂𑐲𑐵 𑐥𑐬𑐶𑐲𑐡𑐫𑐵 𑐕𑐐𑐹 𑐳𑑂𑐠𑐵𑐫𑐷 𑐡𑐸𑐖𑑅 𑐡𑐾𑐫𑑂 𑐧𑐾𑐮𑐵𑐫𑐟𑐫𑐵𑐟 𑐣𑑄 𑐠𑑂𑐰 𑐮𑑂𑐰𑐵𑐥𑐸 𑐳𑐵𑐮𑐵𑐴𑑅𑐐𑐸 𑐡𑐸 𑑋 𑐂𑐬𑐵𑐣𑐫𑐵 𑐣𑐶𑑄𑐟𑐶𑑄 𑐠𑑂𑐰 𑐟𑑅𑐢𑑄𑐐𑐸 𑐑𑐵𑐚𑐵𑐫𑐵 𑐖𑑂𑐫𑐵 𑐖𑐹𑐰𑑄𑐐𑐸 𑐡𑐸 𑑋 𑐠𑑂𑐰 𑐑𑐚𑐣𑐵𑐫𑐵 𑐣𑑂𑐴𑑂𑐫𑑅 𑐧𑐾𑐮𑐵𑐫𑐟, 𑐂𑐖𑐬𑐵𑐫𑐮 𑐰 𑐀𑐩𑐾𑐬𑐶𑐎𑐵𑐫𑐵 𑐂𑐬𑐵𑐣𑐫𑐵𑐟 𑐎𑐫𑐵𑑅 𑐠𑑅𑐠𑑅𑐐𑐸 𑐴𑐾 𑐎𑐠𑑄𑐫𑐵 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐊𑐖𑐾𑐣𑑂𑐜𑐵 𑐡𑐸𑐐𑐸 𑐏𑑅𑐳𑐵𑑄 𑐠𑑂𑐰 𑐑𑐚𑐣𑐵 𑐮𑐶𑐥𑐵 𑐳𑑂𑐰𑑄𑐐𑐸𑐮𑐶𑑄 𑐡𑐾𑐫𑑂𑐫𑐵𑐟 𑐕𑐠𑐵𑐫𑑂 𑐴𑑅𑐐𑐸 𑐡𑐸, 𑐐𑐸𑐐𑐸 𑐂𑐬𑐵𑐣𑐫𑐵 𑐣𑐶𑑄𑐟𑐶𑑄 𑐏𑐟𑐬𑐵𑐫𑐵 𑐑𑐞𑑂𑐚𑐷 𑐣𑑄 𑐏𑑅 𑑋

𑐧𑐾𑐮𑐵𑐫𑐟𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐧𑑀𑐬𑐶𑐳 𑐖𑑀𑐣𑐳𑐣𑑄 𑐩𑐬𑑂𑐳𑐬 𑐳𑑂𑐚𑑂𑐬𑐶𑐚𑐫𑑂 𑐖𑐹𑐐𑐸 𑐁𑐎𑑂𑐬𑐩𑐞𑐫𑐵𑐟 ‘𑐮𑐖𑑂𑐖𑐵𑐳𑑂𑐥𑐡 𑐰 𑐀𑐳𑑂𑐰𑐷𑐎𑐵𑐬𑑂𑐫’ 𑐢𑐵𑐳𑐾𑑄 𑐂𑐬𑐵𑐣𑑄 𑐠𑐸𑐎𑐶𑐫𑐵 𑐮𑐶𑐔𑑂𑐰𑑅 𑐦𑐫𑐾𑐩𑐵𑐮𑐷 𑐏𑑃 𑐢𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐂𑐬𑐵𑐣𑐫𑐵 𑐬𑐵𑐖𑐡𑐹𑐟 𑐩𑑀𑐴𑐳𑐶𑐣 𑐧𑐴𑐬𑐵𑐰𑐵𑑄𑐡𑐫𑐵 𑐴𑐵𑐖𑐶𑐬𑐷 𑐟𑐮𑐧 𑐫𑐵𑐎𑐸𑐳𑐾𑑄 𑐧𑐾𑐮𑐵𑐫𑐟𑐷 𑐰𑐶𑐡𑐾𑐱 𑐩𑐣𑑂𑐟𑑂𑐬𑐵𑐮𑐫𑑄 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐖𑐴𑐵𑐖𑐫𑐵𑐟 𑐏𑐟𑐬𑐵𑐫𑑂 𑐮𑐵𑐎𑐷𑐐𑐸 𑐐𑐟𑐶𑐰𑐶𑐢𑐶 𑐟𑐾𑐴𑐬𑐵𑐣𑑄 𑐟𑐸𑐬𑐸𑐣𑑂𑐟 𑐡𑐶𑐎𑐾𑐩𑐵𑑅 𑐢𑐵𑑅𑐐𑐸 𑐡𑐸 𑑋

𑐩𑐾𑐏𑐾 𑐧𑐾𑐮𑐵𑐫𑐟𑑄 𑐠𑑅 𑐬𑐵𑐖𑐡𑐹𑐟𑐫𑐵𑐟 𑐳𑑅𑐟𑐾𑐰𑑄 𑐂𑐬𑐵𑐣𑑄 𑐠𑐸𑐎𑐶𑐫𑐵 𑐟𑑅𑐢𑑄𑐐𑐸 𑐁𑐮𑑀𑐔𑐣𑐵 𑐫𑐵𑐳𑐾𑑄 𑐧𑐾𑐮𑐵𑐫𑐟𑐷 𑐬𑐵𑐖𑐡𑐹𑐟𑐫𑐵𑐟 𑐣𑑄 𑐴𑐵𑐖𑐶𑐬𑐷 𑐟𑐮𑐧 𑐫𑐵𑐎𑐹𑐐𑐸 𑐡𑐸 𑑋 𑐀𑐮𑐾 𑐧𑐾𑐮𑐵𑐫𑐟𑐫𑐵 𑐠𑑂𑐰 𑐖𑑂𑐫𑐵𑐫𑐵 𑐎𑐜𑐵 𑐁𑐮𑑀𑐔𑐣𑐵 𑐫𑐵𑐳𑐾𑑄 𑐥𑑂𑐬𑐩𑐵𑐞 𑐎𑑂𑐫𑐣𑐾𑐟 𑐢𑐵𑑅𑐐𑐸 𑐡𑐸 𑑋 𑐂𑐬𑐵𑐣𑑄 𑐧𑐾𑐮𑐵𑐫𑐟, 𑐂𑐖𑐬𑐵𑐫𑐮 𑐰 𑐀𑐩𑐾𑐬𑐶𑐎𑐵𑑄 𑐩𑑂𑐰𑐵𑑅𑐩𑐡𑐸𑐐𑐸 𑐥𑑂𑐬𑐵𑐥𑑀𑐐𑐣𑑂𑐜𑐵 𑐖𑐎 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐧𑐾𑐮𑐵𑐫𑐟 𑐰 𑐀𑐩𑐾𑐬𑐶𑐎𑐵 𑐳𑐣𑑂 𑑒𑑐𑑑𑑕 𑐫𑑂 𑐖𑐹𑐐𑐸 𑐥𑐬𑐩𑐵𑐞𑐸 𑐳𑐩𑑂𑐗𑑁𑐟𑐵𑐫𑐵𑐟 𑐴𑐵𑐎𑐣𑑄 𑐣𑑂𑐴𑑂𑐫𑐵𑐎𑐾𑐐𑐸 𑐥𑐎𑑂𑐲𑐫𑑂 𑐡𑐸 𑑋 𑐠𑑂𑐰 𑐳𑐩𑑂𑐗𑑁𑐟𑐵 𑐎𑐠𑑄 𑐂𑐬𑐵𑐣𑐫𑐵𑐟 𑐟𑐫𑐵𑐟𑑅𑐐𑐸 𑐁𑐬𑑂𑐠𑐶𑐎 𑐥𑑂𑐬𑐟𑐶𑐧𑐣𑑂𑐢 𑐔𑐶𑐂𑐎𑐵𑑅 𑐥𑐬𑐩𑐵𑐞𑐸 𑐎𑐵𑐬𑑂𑐫𑐎𑑂𑐬𑐩𑐫𑐵𑐟 𑐎𑐜𑐵 𑐥𑑂𑐬𑐟𑐶𑐧𑐣𑑂𑐢 𑐟𑑅𑐐𑐸 𑐏𑑅 𑑋 𑐟𑐬 𑐬𑐵𑐲𑑂𑐚𑑂𑐬𑐥𑐟𑐶 𑐜𑑀𑐣𑐵𑐮𑑂𑐜 𑐚𑑂𑐬𑐩𑑂𑐥𑑄 𑐳𑐣𑑂 𑑒𑑐𑑑𑑘 𑐫𑑂 𑐊𑐎𑐥𑐎𑑂𑐲𑐷𑐫 𑐬𑐸𑐥𑑄 𑐠𑑂𑐰 𑐳𑐩𑑂𑐗𑑁𑐟𑐵 𑐏𑐵𑐬𑐾𑐖 𑐫𑐵𑐣𑐵𑐧𑐶𑐄𑐐𑐸 𑐏𑑅 𑑋

𑐁𑑅 𑐀𑐩𑐾𑐬𑐶𑐎𑐵𑐫𑑂 𑐖𑑀 𑐧𑐵𑐂𑐜𑐾𑐣𑐫𑐵 𑐳𑐬𑐎𑐵𑐬 𑐰𑐫𑐾𑐢𑐸𑑄𑐎𑐵𑑅 𑐀𑐩𑐾𑐬𑐶𑐎𑐵 𑐴𑐵𑐎𑐣𑑄 𑐠𑑂𑐰 𑐳𑐩𑑂𑐗𑑁𑐟𑐵𑐫𑐵𑐟 𑐖𑐵𑐬𑐷 𑐫𑐵𑐫𑐾𑐐𑐸 𑐥𑐎𑑂𑐲𑐫𑑂 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵𑐟 𑐎𑐫𑐵𑑅 𑐰𑐵𑐬𑑂𑐟𑐵 𑐣𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐂𑐖𑐬𑐵𑐫𑐮 𑐢𑐵𑑅𑐳𑐵 𑐂𑐬𑐵𑐣 𑐠𑑅𑐥𑐶𑐣𑐶𑐐𑐸 𑐱𑑄𑐎𑐵𑐳𑑂𑐥𑐡 𑐥𑐬𑐩𑐵𑐞𑐸 𑐬𑐶𑐳𑐬𑑂𑐔𑐫𑐵𑐟 𑐳𑐸𑐔𑐸𑐎𑐾𑐐𑐸 𑐣𑐶𑑄𑐟𑐶𑑄 𑐰𑐵𑐬𑑂𑐟𑐵𑐫𑑂 𑐰𑐫𑐵𑐔𑑂𑐰𑑄𑐐𑐸 𑐟𑐵𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐂𑐖𑐬𑐵𑐫𑐮𑑄 𑐢𑐵𑑅𑐐𑐸 𑐣𑑄 𑐡𑐸, ‘𑐁𑑅 𑐂𑐬𑐵𑐣𑑄 𑐠𑐸𑐂𑐐𑐸 𑐎𑐠𑑄𑐫𑐵 𑐳𑐣𑑂𑐡𑐾𑐱 𑐧𑐷𑐩𑐵𑑅𑐐𑐸 𑐁𑐰𑐱𑑂𑐫𑐎 𑐡𑐸’ 𑐢𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐬𑑂𑐳𑐬 𑐳𑑂𑐚𑑂𑐬𑐶𑐚𑐫𑑂 𑐖𑐹𑐐𑐸 𑐁𑐎𑑂𑐬𑐩𑐞 𑐮𑐶𑐥𑐵 𑐧𑐾𑐮𑐵𑐫𑐟 𑐰 𑐀𑐩𑐾𑐬𑐶𑐎𑐵𑐫𑐵 𑐳𑑅 𑐣𑑄 𑐀𑐖𑑂𑐫𑐵𑑅𑐐𑐸 𑐴𑐾 𑐥𑐶𑐴𑐵𑑄 𑐰𑐮 𑐢𑐵𑑅𑐳𑐵 𑐳𑐩𑐳𑑂𑐫𑐵 𑐗𑐣 𑐟𑐔𑑂𑐰𑐂𑐐𑐸 𑐖𑐸𑐂 𑑋

𑐂𑐖𑐬𑐵𑐫𑐮𑐫𑐵 𑐐𑐸𑐥𑑂𑐟𑐔𑐬 𑐣𑐶𑐎𑐵𑐫 𑐩𑑀𑐳𑐵𑐡𑐫𑐵 𑐂𑐬𑐵𑐣𑐫𑐵 𑐳𑐸𑐬𑐎𑑂𑐲𑐵 𑐥𑑂𑐬𑐟𑐶𑐲𑑂𑐛𑐵𑐣𑑄 𑐟𑑅𑐢𑑄𑐐𑐸 𑐑𑐸𑐳𑐥𑐿𑐛 𑐡𑐸 𑑋 𑐄𑐎𑐶𑑄 𑐂𑐖𑐬𑐵𑐫𑐮𑐫𑐵 𑐏𑑂𑐫𑐵𑐔𑑂𑐰𑑅𑐫𑐵𑐟 𑐂𑐬𑐵𑐣𑑄 𑐟𑐳𑐎𑑄 𑐐𑐩𑑂𑐨𑐷𑐬𑐎𑐠𑑄 𑐎𑐵𑐂𑐐𑐸 𑐖𑐸𑐂 𑑋

𑐩𑐾𑐏𑐾 𑐩𑐬𑑂𑐳𑐬 𑐳𑑂𑐚𑑂𑐬𑐶𑐚𑐫𑑂 𑐖𑐹𑐐𑐸 𑐁𑐎𑑂𑐬𑐩𑐞𑐫𑑂 𑐂𑐬𑐵𑐣𑐫𑐵 𑐮𑑂𑐴𑐵𑑅 𑐡𑐸𑐐𑐸 𑐐𑐸𑐐𑐸 𑐥𑑂𑐬𑐩𑐵𑐞 𑐡𑐸 𑐢𑐫𑐵𑐔𑑂𑐰𑑄𑐐𑐸 𑐠𑑂𑐰 𑐥𑑂𑐬𑐩𑐵𑐞 𑐳𑐵𑐬𑑂𑐰𑐖𑐣𑐶𑐎 𑐫𑐵𑐫𑐾𑐐𑐸 𑐏𑑃𑐫𑑂 𑐢𑐵𑑅𑐳𑐵 𑐠𑐸𑐥𑐶𑑄 𑐡𑐾𑐫𑑂 𑐡𑐸𑐰𑐶𑐢𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐂𑐬𑐵𑐣𑑄 𑐠𑑅𑐥𑐶𑑄𑐟 𑐧𑐶𑐄𑐐𑐸 𑐡𑑂𑐰𑐥𑑄𑐫𑐵 𑐥𑑂𑐬𑐩𑐵𑐞 𑐎𑑂𑐫𑑃 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐐𑐸𑐐𑐸 𑐥𑑂𑐬𑐩𑐵𑐞 𑐢𑐫𑐵𑐔𑑂𑐰𑑄𑐐𑐸 𑐏𑑅, 𑐰 𑐥𑑂𑐬𑐩𑐵𑐞 𑐠𑐸𑐥𑐶𑑄 𑐡𑐾𑐫𑑂𑐟𑐫𑑂𑐳𑑄 𑐟𑐳𑐎𑑄 𑐐𑑀𑐥𑑂𑐫 𑐝𑑄𑐐𑑄 𑐔𑐹𑐮𑐵𑐎𑐹𑐐𑐸 𑐖𑐸𑐂, 𑐀𑐮𑐾 𑐠𑑂𑐰 𑐟𑐳𑐎𑑄 𑐳𑑄𑐰𑐾𑐡𑐣𑐱𑐷𑐮 𑐣𑑄 𑐖𑐸𑐂 𑑋

𑐧𑐾𑐮𑐵𑐫𑐟, 𑐀𑐩𑐾𑐬𑐶𑐎𑐵 𑐰 𑐂𑐖𑐬𑐵𑐫𑐮𑐫𑐵 𑐐𑐸𑐥𑑂𑐟𑐔𑐬 𑐣𑐶𑐎𑐵𑐫 𑐠𑑂𑐰 𑐥𑑂𑐬𑐩𑐵𑐞 𑐕𑐸 𑐏𑑅 𑐢𑐫𑐵𑐐𑐸 𑐂𑐬𑐵𑐣𑑄 𑐩𑐳𑐶𑐩𑐵 𑐢𑐫𑐵𑐐𑐸 𑐴𑐾 𑐔𑐵𑐴𑐾 𑐖𑐸𑐂 𑑋 𑐟𑐬 𑐥𑑂𑐬𑐩𑐵𑐞 𑐳𑐵𑐬𑑂𑐰𑐖𑐣𑐶𑐎 𑐩𑐖𑐸𑐮 𑐢𑐵𑑅𑐳𑐵 𑐴𑐵𑐎𑐣𑑄 𑐠𑐸𑐥𑐶𑑄 𑐳𑑂𑐰𑑄𑐐𑐸𑐮𑐶𑑄 𑐡𑐾𑐱𑑄 𑐂𑐬𑐵𑐣𑑄 𑐫𑐵 𑐴𑐾 𑐩𑐫𑐵𑑅𑐐𑐸 𑐀𑐥𑐬𑐵𑐢𑐫𑐵 𑐳𑐖𑐵𑐫 𑐧𑐷𑐟𑑂𑐫𑐣 𑐢𑐫𑐵𑐐𑐸 𑐔𑐬𑑂𑐔𑐵 𑐖𑐸𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS