Read news in NepalBhasa text-- www.hamroschool.com BACK 𑐡𑐾𑐄𑐰𑐵𑐫𑐵 𑐳𑐬𑐎𑐵𑐬𑐫𑑂 𑐩𑐣𑑂𑐟𑑂𑐬𑐷 𑐮𑑂𑐫𑐫𑐾𑐟 𑐳𑐎𑐳 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐡𑐾𑐄𑐰𑐵𑐫𑐵 𑐳𑐬𑐎𑐵𑐬𑐫𑑂 𑐩𑐣𑑂𑐟𑑂𑐬𑐷 𑐮𑑂𑐫𑐫𑐾𑐟 𑐳𑐎𑐳

𑐫𑐾𑑃 – 𑐳𑐟𑑂𑐟𑐵𑐬𑐸𑐝 𑐐𑐛𑐧𑐣𑑂𑐢𑐣𑑄 𑐩𑐣𑑂𑐟𑑂𑐬𑐵𑐮𑐫𑐫𑐵 𑐨𑐵𑐐𑐧𑐣𑑂𑐜𑐵 𑐫𑐵𑐫𑐾𑐐𑐸 𑐖𑐶𑐩𑑂𑐩𑐵 𑐱𑐷𑐬𑑂𑐲 𑐟𑐴𑐫𑐵 𑐣𑐾𑐟𑐵𑐥𑐶𑑄𑐟 𑐧𑐶𑐄𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐰𑐵𑐮𑐸𑐰𑐵𑐚𑐵𑐬𑐫𑑂 𑐔𑑂𑐰𑑄𑐐𑐸 𑐧𑐿𑐛𑐎𑑄 𑐩𑐣𑑂𑐟𑑂𑐬𑐵𑐮𑐫𑐫𑐵 𑐨𑐵𑐐𑐧𑐣𑑂𑐜𑐵 𑐎𑑂𑐰𑑅𑐕𑐷𑐐𑐸 𑐖𑐶𑐩𑑂𑐩𑐵 𑐱𑐷𑐬𑑂𑐲 𑐣𑐾𑐟𑐵𑐥𑐶𑑄𑐟 𑐧𑐶𑐄𑐐𑐸 𑐏𑑅 𑑋 𑐧𑐿𑐛𑐎𑑄 𑐣𑑂𑐫𑐹𑐣𑐟𑐩 𑐩𑑄𑐎𑐵𑑅 𑐖𑑂𑐫𑐵𑐗𑑂𑐰𑑅 𑐫𑐵𑐎𑐣𑑄 𑐟𑐫𑐵𑐬 𑐫𑐵𑐫𑐾𑐟 𑐥𑐹𑐬𑑂𑐞𑐧𑐴𑐵𑐡𑐸𑐬 𑐏𑐜𑑂𑐎𑐵𑐫𑐵 𑐣𑐾𑐟𑐺𑐟𑑂𑐰𑐫𑐵 𑐎𑐵𑐬𑑂𑐫𑐡𑐮𑐫𑐵𑐟 𑐣𑐶𑐬𑑂𑐡𑐾𑐱𑐣 𑐣𑑄 𑐧𑐶𑐄𑐐𑐸 𑐡𑐸 𑑋

𑐩𑑂𑐴𑐶𑐐𑑅𑐫𑐵 𑐧𑐿𑐛𑐎𑐫𑑂 𑐎𑐵𑑄𑐐𑑂𑐬𑐾𑐳𑐥𑐵𑐏𑐾𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐟𑐠𑐵 𑐳𑐨𑐵𑐥𑐟𑐶 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵, 𑐰𑐬𑐶𑐲𑑂𑐛 𑐣𑐾𑐟𑐵 𑐬𑐵𑐩𑐔𑐣𑑂𑐡𑑂𑐬 𑐥𑑁𑐜𑐾𑐮, 𑐩𑐴𑐵𑐩𑐣𑑂𑐟𑑂𑐬𑐷 𑐥𑐹𑐬𑑂𑐞𑐧𑐴𑐵𑐡𑐸𑐬 𑐏𑐜𑑂𑐎𑐵 𑐰 𑐎𑐺𑐲𑑂𑐞𑐥𑑂𑐬𑐳𑐵𑐡 𑐳𑐶𑐚𑑁𑐮𑐵 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅𑐳𑐵 𑐩𑐵𑐌𑐰𑐵𑐡𑐷 𑐎𑐾𑐣𑑂𑐡𑑂𑐬𑐥𑐵𑐏𑐾𑑄 𑐀𑐢𑑂𑐫𑐎𑑂𑐲 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 𑐰 𑐣𑐵𑐬𑐵𑐫𑐞𑐎𑐵𑐖𑐷 𑐱𑑂𑐬𑐾𑐲𑑂𑐛𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋

𑐄𑐎𑐠𑑄 𑐴𑐾 𑐖𑐣𑐟𑐵 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑐥𑐵𑐏𑐾𑑄 𑐳𑑄𑐑𑐷𑐫 𑐥𑐬𑐶𑐲𑐡𑑂𑐫𑐵 𑐀𑐢𑑂𑐫𑐎𑑂𑐲 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃, 𑐀𑐢𑑂𑐫𑐎𑑂𑐲 𑐄𑐥𑐾𑐣𑑂𑐡𑑂𑐬 𑐫𑐵𑐡𑐰 𑐰 𑐀𑐱𑑀𑐎 𑐬𑐵𑐃𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅𑐳𑐵 𑐬𑐵𑐲𑑂𑐚𑑂𑐬𑐶𑐫 𑐖𑐣𑐩𑑀𑐬𑑂𑐔𑐵𑐥𑐵𑐏𑐾𑑄 𑐀𑐢𑑂𑐫𑐎𑑂𑐲 𑐔𑐶𑐟𑑂𑐬𑐧𑐴𑐵𑐡𑐸𑐬 𑐎𑐾𑐳𑐷 𑐰 𑐡𑐸𑐬𑑂𑐐𑐵 𑐥𑑁𑐜𑐾𑐮𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋 𑐧𑐿𑐛𑐎𑐫𑑂 𑐩𑐵𑐢𑐰 𑐣𑐾𑐥𑐵𑐮𑐥𑐵𑐏𑐾𑑄 𑐰𑐶𑐖𑐫 𑐥𑑁𑐜𑐾𑐮𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋

𑐧𑐿𑐛𑐎𑐫𑑂 𑐣𑐾𑐥𑐵𑐮 𑐥𑐸𑐔𑐮𑑄 𑐠𑑁𑑄𑐎𑐣𑑂𑐴𑐫𑑂 𑐥𑐵𑐬𑑂𑐚𑐷 𑐊𑐎𑐟𑐵𑐫𑐵 𑐣𑐶𑑄𑐟𑐶𑑄 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐟𑐟𑑂𑐎𑐵𑐮 𑐳𑐬𑐎𑐵𑐬𑐫𑑂 𑐧𑑂𑐰𑐟𑐶 𑐩𑐎𑐵𑐫𑐾𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋 𑐰𑑄𑐐𑐸 𑐀𑐳𑐵𑐬 𑑒𑑙 𑐐𑐟𑐾 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐣𑐶𑐫𑐸𑐎𑑂𑐟 𑐖𑐸𑐂𑐢𑐸𑑄𑐎𑐵𑑅 𑐥𑑂𑐬𑐩 𑐡𑐾𑐄𑐰𑐵𑑄 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑂𑐫𑐵𑐟 𑐥𑐹𑐬𑑂𑐞𑐟 𑐧𑐷 𑐩𑐦𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐖𑐳𑐥𑐵𑐫𑐵 𑐁𑐢𑐶𑐎𑐵𑐬𑐶𑐎𑐟𑐵𑐫𑐵 𑐰𑐶𑐰𑐵𑐡 𑐖𑑂𑐫𑐣𑐾𑐰𑑄 𑐁𑑅 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑄 𑐥𑐹𑐬𑑂𑐞𑐟𑐵 𑐎𑐵𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐧𑐿𑐛𑐎𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵𑑄 𑐐𑐛𑐧𑐣𑑂𑐢𑐣𑐫𑐵 𑐣𑐾𑐟𑐺𑐟𑑂𑐰𑐫𑐵𑐟 𑐫𑐵𑐎𑐣𑑄 𑐴𑐾 𑐩𑐣𑑂𑐟𑑂𑐬𑐷 𑐖𑐸𑐂𑐥𑐶𑐣𑐶𑐐𑐸 𑐣𑐵𑑄 𑐢𑐮𑑅 𑐧𑐷𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐩𑐣𑑂𑐟𑑂𑐬𑐶𑐩𑐞𑑂𑐜𑐮 𑐥𑐹𑐬𑑂𑐞𑐟𑐵 𑐧𑐷𑐟 𑐠𑐵𑐎𑐸𑐐𑐸𑐮𑐶𑑄 𑐠𑑅𑐥𑑂𑐬𑐟𑐶 𑐣𑑂𑐴𑑂𑐫𑐳𑑅 𑐧𑑂𑐰𑐮𑑄𑐐𑐸 𑐢𑐵𑐳𑐾𑑄 𑐫𑐵𑐎𑐣𑑄 𑐣𑐵𑑄 𑐎𑑂𑐰𑑅𑐕𑐷𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑃 𑐳𑐹𑐟𑑂𑐬𑑄 𑐢𑐵𑑅𑐐𑐸 𑐡𑐸 𑑋 𑐮𑐶𑐳𑐮𑐫𑑂 𑐐𑐛𑐧𑐣𑑂𑐢𑐣𑐫𑐵 𑐣𑐾𑐟𑐺𑐟𑑂𑐰𑐥𑐶𑑄𑐳𑑄 𑐕𑐣𑑂𑐴𑐸 𑐣𑐶𑐣𑑂𑐴𑐸𑐫𑐵 𑐡𑐸𑐣𑐾 𑐩𑐣𑑂𑐟𑑂𑐬𑐷 𑐖𑐸𑐂𑐥𑐶𑐣𑐶𑐐𑐸 𑐣𑐵𑑄 𑐢𑐮𑑅 𑐧𑐷𑐐𑐸 𑐧𑐔𑑄 𑐧𑐶𑐄𑐐𑐸 𑐳𑐷𑐡𑐸𑐐𑐸 𑐡𑐸 𑑋

𑐐𑐛𑐧𑐣𑑂𑐢𑐣𑐥𑐵𑐏𑐾𑑄 𑐡𑐾𑐄𑐰𑐵𑐫𑐵 𑐁𑐮𑑀𑐔𑐣𑐵
𑐳𑐟𑑂𑐟𑐵 𑐐𑐛𑐧𑐣𑑂𑐢𑐣𑐫𑐵 𑐩𑑂𑐴𑐶𑐐𑑅 𑐔𑑂𑐰𑑄𑐐𑐸 𑐧𑐿𑐛𑐎𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐾𑐄𑐰𑐵𑐫𑐵 𑐖𑑂𑐫𑐵𑐫𑐵𑐟 𑐎𑐫𑐵𑑅 𑐁𑐮𑑀𑐔𑐣𑐵 𑐖𑐹𑐐𑐸 𑐡𑐸 𑑋 𑐏𑐵𑐳 𑐫𑐵𑐣𑐵𑑅 𑐥𑑂𑐬𑐩 𑐡𑐾𑐄𑐰𑐵𑑄 𑐰𑑂𑐫𑐰𑐳𑐵𑐫𑐷 𑐄𑐩𑐾𑐱 𑐱𑑂𑐬𑐾𑐲𑑂𑐛𑐫𑐵𑐟 𑐳𑑂𑐰𑐵𑐳𑑂𑐠𑑂𑐫 𑐬𑐵𑐖𑑂𑐫𑐩𑐣𑑂𑐟𑑂𑐬𑐷 𑐡𑐫𑐾𑐎𑐹𑐐𑐸 𑐏𑑃𑐫𑑂 𑐣𑐾𑐟𑐵𑐟𑐫𑑂𑐳𑑄 𑐀𑐳𑐣𑑂𑐟𑐸𑐲𑑂𑐚𑐷 𑐥𑑂𑐰𑑄𑐎𑐹𑐐𑐸 𑐏𑑅 𑑋 𑐱𑑂𑐬𑐾𑐲𑑂𑐛𑐫𑐵𑐟 𑐐𑐛𑐧𑐣𑑂𑐢𑐣𑐫𑐵 𑐣𑐾𑐟𑐵𑐟𑐮𑐶𑐳𑐾 𑐳𑐮𑑂𑐮𑐵𑐴 𑐩𑐫𑐵𑐳𑐾 𑐬𑐵𑐖𑑂𑐫𑐩𑐣𑑂𑐟𑑂𑐬𑐷 𑐡𑐫𑐾𑐎𑐹𑐐𑐸 𑐢𑐵𑐳𑐾𑑄 𑐣𑐾𑐟𑐵𑐟𑐫𑑂𑐳𑑄 𑐀𑐳𑐣𑑂𑐟𑐸𑐲𑑂𑐚𑐶 𑐥𑑂𑐰𑑄𑐎𑐹𑐐𑐸 𑐏𑑅 𑑋 𑐬𑐵𑐲𑑂𑐚𑑂𑐬𑐶𑐫 𑐖𑐣𑐩𑑀𑐬𑑂𑐔𑐵𑐫𑐵 𑐀𑐢𑑂𑐫𑐎𑑂𑐲 𑐔𑐶𑐟𑑂𑐬𑐧𑐴𑐵𑐡𑐸𑐬 𑐎𑐾𑐳𑐷 𑐡𑐾𑐄𑐰𑐵𑑄 𑐳𑐬𑐎𑐵𑐬𑐫𑑂 𑐰𑐣𑐾𑐰𑑄 𑐐𑐮𑑂𑐟𑐷 𑐫𑐵𑑅𑐐𑐸 𑐢𑐵𑐳𑐾𑑄 𑐁𑐥𑐟𑑂𑐟𑐶 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋 𑐎𑐾𑐳𑐷𑐫𑐵 𑐢𑐵𑐥𑐹𑐫𑐵𑐟 𑐳𑐩𑐬𑑂𑐠𑐣 𑐫𑐵𑐳𑐾𑑄 𑐩𑐵𑐌𑐰𑐵𑐡𑐷 𑐄𑐥𑐵𑐢𑑂𑐫𑐎𑑂𑐲 𑐣𑐵𑐬𑐵𑐫𑐞𑐎𑐵𑐖𑐷 𑐱𑑂𑐬𑐾𑐲𑑂𑐛𑑄 𑐣𑑄 𑐳𑐬𑐎𑐵𑐬𑐫𑐵𑐟 𑐐𑐸𑐐𑐸𑑄 𑐎𑐠𑑄𑐫𑐵 𑐐𑐮𑑂𑐟𑐷 𑐫𑐵𑐫𑐾𑐐𑐸 𑐕𑐸𑐚 𑐩𑐡𑐸 𑐢𑐵𑐳𑐾𑑄 𑐢𑐫𑐵𑐡𑐶𑐮 𑑋 𑐣𑐾𑐟𑐵𑐥𑐶𑐣𑐶𑐐𑐸 𑐁𑐎𑑂𑐬𑑀𑐱 𑐰 𑐳𑐸𑐗𑐵𑐰 𑐣𑑂𑐫𑐣𑐾𑐢𑐸𑑄𑐎𑐵𑑅 𑐥𑑂𑐬𑐩 𑐡𑐾𑐄𑐰𑐵𑑄 𑐠𑐩𑑂𑐴𑑄 𑐠𑐥 𑐐𑐮𑑂𑐟𑐷 𑐩𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐸𑐳𑐾𑑄 𑐢𑐫𑐵𑐡𑐶𑐮, ‘𑐐𑐮𑑂𑐟𑐷 𑐖𑐸𑐂𑐢𑐸𑑄𑐎𑐮, 𑐁𑐰𑑄𑐣𑐶𑐳𑐾𑑄 𑐀𑐖𑑂𑐫𑐵𑑅𑐐𑐸 𑐐𑐮𑑂𑐟𑐷 𑐩𑐫𑐵𑐫𑐾𑐐𑐸 𑐖𑐸𑐂, 𑐖𑐶𑑄 𑐧𑐶𑐔𑐵𑑅 𑐫𑐵𑐫𑐾 𑑋’

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS