𑐬𑐵𑐲𑑂𑐚𑑂𑐬𑐶𑐫 𑐖𑑂𑐘𑐵𑐣𑐩𑐵𑐮𑐵𑐫𑐵 𑐥𑐡𑐵𑐢𑐶𑐎𑐵𑐬𑐷𑐥𑐶𑑄𑐟 𑐴𑐣𑐵𑐮𑐶𑐳𑐾𑑄 𑐎𑑂𑐲𑐾𑐟𑑂𑐬𑐷𑐫 𑐄𑐥𑐳𑐩𑐶𑐟𑐶 𑐐𑐛𑐣
𑐫𑐮 – 𑐱𑑂𑐬𑐷 𑐧𑐔𑑂𑐕 𑐩𑐴𑐵𑐰𑐶𑐴𑐵𑐬 𑐱𑑂𑐬𑐷𑐧𑐴𑐵𑑅𑐥𑐵𑐏𑐾𑑄 𑐣𑐾𑐥𑐵𑐮 𑐬𑐵𑐲𑑂𑐚𑑂𑐬𑐶𑐫 𑐖𑑂𑐘𑐵𑐣𑐩𑐵𑐮𑐵 𑐳𑐩𑐶𑐟𑐶𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵𑐟 𑐨𑐶𑑄𑐟𑐸𑐣𑐵 𑐡𑐾𑐕𑐵𑐳𑐾 𑐴𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐮𑐶𑐳𑐾𑑄 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐄𑐥𑐳𑐩𑐶𑐟𑐶𑐫𑐵 𑐫𑐮 𑐖𑐶𑐮𑑂𑐮𑐵 𑐎𑑂𑐲𑐾𑐟𑑂𑐬𑐷𑐫 𑐄𑐥𑐳𑐩𑐶𑐟𑐶 𑐣𑑄 𑐐𑐛𑐣 𑐫𑐵𑑅𑐐𑐸 𑐏𑑅 𑑋 𑐩𑐴𑐵𑐰𑐶𑐴𑐵𑐬𑐫𑐵 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐖𑐶𑐮𑑂𑐮𑐵𑐫𑐵 𑐳𑑂𑐰𑐷𑐣𑑂𑐫𑐵𑐐𑐹 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑑅𑐫𑐵𑐥𑐵𑐏𑐾𑑄 𑐐𑐸𑐩𑑂𑐴𑐾𑐳𑐶𑐫𑐵𑐐𑐸 𑐣𑐾𑐥𑐵𑐮 𑐬𑐵𑐲𑑂𑐚𑑂𑐬𑐶𑐫 𑐖𑑂𑐘𑐵𑐣𑐩𑐵𑐮𑐵 𑐳𑐩𑐶𑐟𑐶 𑐫𑐮 𑐖𑐶𑐮𑑂𑐮𑐵 𑐎𑑂𑐲𑐾𑐟𑑂𑐬𑐷𑐫 𑐄𑐥𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐏𑑅 𑑋 𑐱𑑂𑐬𑐷 𑐧𑐔𑑂𑐕 𑐩𑐴𑐵𑐰𑐶𑐴𑐵𑐬 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑑅𑐫𑐵 𑐣𑐵𑐫𑑅 𑐬𑐟𑑂𑐣𑐧𑐴𑐵𑐡𑐸𑐬 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐳𑐩𑐵𑐖𑐳𑐾𑐰𑐷 𑐣𑐵𑐥𑑄 𑐥𑐸𑐮𑐵𑑄𑐩𑑂𑐴 𑐩𑐣𑑂𑐟𑑂𑐬𑐷 𑐧𑐸𑐡𑑂𑐢𑐶𑐬𑐵𑐖 𑐰𑐖𑑂𑐬𑐵𑐔𑐵𑐬𑑂𑐫𑑄 𑐬𑐵𑐖𑐣𑐷𑐟𑐶𑐎 𑐥𑐬𑐶𑐰𑐬𑑂𑐟𑐣 𑐴𑐫𑐵𑑅 𑐖𑐣𑐟𑐵𑐫𑐵𑐟 𑐳𑑂𑐰𑐟𑐣𑑂𑐟𑑂𑐬𑐟𑐵 𑐧𑐷𑐟 𑑒𑑐𑑐𑑗 𑐳𑐵𑐮𑐫𑑂 𑐖𑐹𑐐𑐸 𑐎𑑂𑐬𑐵𑐣𑑂𑐟𑐶 𑐳𑐦𑐮 𑐫𑐵𑐫𑐾𑐟 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣𑑄 𑐣𑑄 𑐟𑐶𑐧𑑅 𑐧𑐶𑐄𑐐𑐸 𑐏𑑃 𑐮𑐸𑐩𑑄𑐎𑐵𑐡𑐶𑐮 𑑋 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐬𑐩𑐣𑐵 𑐱𑑂𑐬𑐾𑐲𑑂𑐛𑑄 𑐳𑑄𑐐𑐛𑐣𑐫𑐵𑐟 𑐎𑑂𑐰𑐵𑐟𑐸𑐎𑐵 𑐫𑑄𑐎𑐾𑐟 𑐫𑐮𑐫𑑂 𑐎𑑂𑐲𑐾𑐟𑑂𑐬𑐷𑐫 𑐄𑐥𑐳𑐩𑐶𑐟𑐶 𑐐𑐛𑐣 𑐖𑐹𑐠𑐾𑑄 𑐁𑑅 𑐩𑐾𑐩𑐾𑐐𑐸 𑐠𑐵𑐳𑐫𑑂 𑐣𑑄 𑐄𑐎𑐠𑑄 𑐴𑐾 𑐄𑐥𑐳𑐩𑐶𑐟𑐶 𑐐𑐛𑐣 𑐫𑐵𑐣𑐵 𑐰𑐣𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋
𑐳𑐩𑐶𑐟𑐶𑐫𑐵 𑐳𑑄𑐬𑐎𑑂𑐲𑐎 𑐥𑑂𑐬𑐵. 𑐳𑐸𑐰𑐬𑑂𑐞 𑐱𑐵𑐎𑑂𑐫𑑄 𑐧𑐸𑐡𑑂𑐢𑑄 𑐱𑐶𑐎𑑂𑐲𑐵𑐫𑐵 𑐐𑐸𑐞𑐐𑐵𑐣 𑐫𑐵𑐫𑐾𑐐𑐸 𑐰 𑐔𑐶𑐟 𑐱𑐸𑐡𑑂𑐢 𑐫𑐵𑐣𑐵𑑅 𑐱𑐷𑐮 𑐥𑐵𑐮𑐣𑐵 𑐫𑐵𑐫𑐾𑐐𑐸 𑐴𑐾 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑑅 𑐢𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐩𑐶𑐟𑐶𑐫𑐵 𑐩𑐴𑐵𑐳𑐔𑐶𑐰 𑐂𑐣𑑂𑐡𑑂𑐬𑐩𑐸𑐣𑐶 𑐱𑐵𑐎𑑂𑐫𑑄 𑐎𑑂𑐲𑐾𑐟𑑂𑐬𑐷𑐫 𑐄𑐥𑐳𑐩𑐶𑐟𑐶𑐫𑐵 𑐣𑐷𑐟𑐶, 𑐣𑐶𑐫𑐩 𑐎𑐣𑐵𑐡𑐷𑐐𑐸 𑐏𑑅 𑑋
𑐳𑐩𑐶𑐟𑐶𑐫𑐵 𑐫𑐮 𑐖𑐶𑐮𑑂𑐮𑐵 𑐎𑑂𑐲𑐾𑐟𑑂𑐬𑐷𑐫 𑐄𑐥𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎𑐫𑑂 𑐮𑐎𑑂𑐲𑑂𑐩𑐷𑐧𑐴𑐵𑐡𑐸 𑐩𑐴𑐬𑑂𑐖𑐣 (𑐳𑐶𑐡𑑂𑐢𑐵𑐬𑑂𑐠 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑑅) 𑐰 𑐳𑐴𑐳𑑄𑐫𑑀𑐖𑐎𑐫𑑂 𑐎𑐸𑐩𑐵𑐬 𑐩𑐴𑐬𑑂𑐖𑐣–𑐳𑐸𑐰𑐬𑑂𑐞 𑐕𑐟𑑂𑐬𑐥𑐸𑐬 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑑅) 𑐔𑑂𑐰𑐣𑐵𑐡𑐷𑐐𑐸 𑐡𑐸𑐳𑐵 𑐡𑐸𑐖𑐮𑐫𑑂 𑐬𑐵𑐩𑐐𑑀𑐥𑐵𑐮 𑐱𑑂𑐬𑐾𑐲𑑂𑐛, 𑐣𑐣𑑂𑐡𑐐𑑀𑐥𑐵𑐮 𑐩𑐴𑐬𑑂𑐖𑐣, 𑐨𑐷𑐩𑐰𑐖𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐖𑐫𑐵 𑐟𑐵𑐩𑑂𑐬𑐵𑐎𑐵𑐬, 𑐬𑐩𑐾𑐱 𑐩𑐴𑐬𑑂𑐖𑐣, 𑐎𑐵𑐖𑐷𑐬𑐟𑑂𑐣 𑐱𑐵𑐎𑑂𑐫 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐣𑐐𑐵𑑄 𑐰 𑐱𑑂𑐬𑐷 𑐧𑐔𑑂𑐕 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐏𑐮𑑅𑐥𑐵𑐏𑐾𑑄 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐸𑐣𑐵𑐨𑐹𑐲𑐞 𑐱𑐵𑐎𑑂𑐫𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS