Read news in NepalBhasa text-- www.hamroschool.com BACK 𑐎𑐶𑐥𑐸𑐮𑐷 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐟𑐵𑐮𑐶𑐩 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐎𑐶𑐥𑐸𑐮𑐷 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐟𑐵𑐮𑐶𑐩

𑐎𑐶𑐥𑐹- 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑑄 𑐠𑑅 𑐩𑐵𑐟𑐴𑐟 𑐮𑐵𑑅𑐐𑐸 𑐦𑐸𑐎𑑂𑐎𑑄 𑐳𑑂𑐎𑐸𑐮𑐫𑑂 𑐠𑑂𑐰𑐴𑐾 𑐱𑐿𑐎𑑂𑐲𑐶𑐎 𑐳𑐟𑑂𑐬𑑄𑐣𑐶𑐳𑐾𑑄 𑐱𑐸𑐬𑐸 𑐫𑐵𑐫𑐾𑐟𑑂𑐫𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐧𑑂𑐰𑑄𑐎𑐷𑐥𑐶𑑄 𑐱𑐶𑐎𑑂𑐲𑐎𑐟𑐫𑑂𑐟 𑐟𑐵𑐮𑐶𑐩 𑐧𑐶𑐄𑐐𑐸 𑐡𑐸 𑑋 𑐩𑑂𑐴𑐶𑐐𑑅– 𑐣𑐶𑐳𑐾𑑄 𑐠𑑂𑐰 𑐟𑐵𑐮𑐶𑐩 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋

𑐩𑑂𑐴𑐶𑐐𑑅 𑐠𑐣𑐫𑐵 𑐩𑑄𑐐𑐮 𑐩𑐵𑐰𑐶𑐂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐄𑐐𑐸 𑐟𑐵𑐮𑐶𑐩𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐄𑐮𑐾𑐖𑑂𑐫𑐵 𑐳𑐩𑐵𑐬𑑀𑐴𑐫𑑂 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑐮𑐶𑐳𑐾𑑄 𑐄𑐥𑐥𑑂𑐬𑐩𑐸𑐏 𑐳𑐬𑐳𑑂𑐰𑐟𑐷 𑐏𑐜𑑂𑐎𑐵, 𑐱𑐶𑐎𑑂𑐲𑐵 𑐰𑐶𑐨𑐵𑐐 𑐥𑑂𑐬𑐩𑐸𑐏 𑐚𑑄𑐎𑐮𑐵𑐮 𑐐𑐿𑐬𑐾 𑐁𑐡𑐶𑐥𑐶𑑄𑐳𑑄 𑐣𑐸𑐐𑑅𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑑄 𑐠𑑅𑐐𑐸 𑐣𑐥𑐵 𑐡𑐸𑐣𑐾 𑐮𑐵𑑅𑐐𑐸 𑐳𑐬𑐎𑐵𑐬𑐷 𑐰 𑐣𑐶𑐖𑐷 𑐫𑐵𑐣𑐵𑑅 𑐦𑐸𑐎𑑂𑐎𑑄 𑐳𑑂𑐎𑐸𑐮𑐫𑑂 𑐎𑐎𑑂𑐲𑐵 𑑑 𑐣𑐶𑐳𑐾𑑄 𑑓 𑐟𑐎 𑐳𑑂𑐠𑐵𑐣𑐷𑐫 𑐰𑐶𑐲𑐫𑐫𑐵 𑐬𑐸𑐥𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋

𑐩𑑂𑐴𑐶𑐐𑑅𑐣𑐶𑐳𑐾𑑄 𑐱𑐸𑐬𑐸 𑐖𑐹𑐐𑐸 𑐟𑐵𑐮𑐶𑐩𑐫𑑂 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾 𑐮𑐵𑑅𑐐𑐸 𑑒𑑘 𑐐𑐹 𑐳𑑂𑐎𑐸𑐮𑐫𑐵 𑑒𑑘 𑐩𑑂𑐴 𑐴𑐾 𑐱𑐶𑐎𑑂𑐲𑐎𑐟𑐫𑑂𑐳𑑄 𑐧𑑂𑐰𑐟𑐶 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐷 𑐣𑐶𑐩𑑂𑐴 𑐐𑐿𑐬 𑐣𑐾𑐰𑐵𑑅 𑐱𑐶𑐎𑑂𑐲𑐎𑐥𑐶𑑄 𑐣𑑄 𑐡𑐸𑐠𑑂𑐫𑐵𑑅 𑑋 𑐟𑐵𑐮𑐶𑐩 𑐣𑑂𑐫𑐵𑐣𑑂𑐴𑐸 𑐟𑐎 𑐣𑑂𑐴𑑂𑐫𑐵𑐂𑐐𑐸 𑐏𑑃 𑐟𑐵𑐮𑐶𑐩 𑐳𑑄𑐫𑑀𑐖𑐎 𑐖𑐸𑐖𑐸𑐨𑐵𑐃 𑐩𑐴𑐬𑑂𑐖𑐣𑑄 𑐎𑐣𑐵𑐡𑐶𑐮 𑑋 𑐩𑐴𑐬𑑂𑐖𑐣𑑄 𑐎𑐣𑐵𑐡𑐷𑐎𑐠𑑄 𑐠𑑂𑐰 𑐟𑐵𑐮𑐶𑐩 𑐎𑐶𑐥𑐹 𑐡𑐸𑐣𑐾𑐫𑐵 𑑔𑑐 𑐐𑐹 𑐳𑑂𑐎𑐸𑐮𑐫𑐵 𑐱𑐶𑐎𑑂𑐲𑐎𑐟𑐫𑑂𑐟 𑐧𑐷𑐐𑐸 𑐟𑐵𑑅 𑐟𑐫𑐵𑐟𑑅𑐐𑐸 𑐡𑐸 𑑋

𑐠𑑂𑐰 𑐟𑐵𑐮𑐶𑐩𑐫𑑂 𑐣𑐾𑐥𑐵𑐮𑐨𑐵𑐲𑐵, 𑐱𑐶𑐎𑑂𑐲𑐞 𑐰𑐶𑐢𑐶, 𑐎𑐶𑐥𑐹𑐫𑐵 𑐱𑐿𑐎𑑂𑐲𑐶𑐎 𑐀𑐰𑐳𑑂𑐠𑐵, 𑐣𑐾𑐰𑐵𑑅 𑐎𑐵𑐳𑐵, 𑐳𑑄𑐳𑑂𑐎𑐺𑐟𑐶, 𑐳𑐩𑑂𑐥𑐡𑐵, 𑐥𑐬𑑂𑐫𑐚𑐣, 𑐮𑐳𑐎 𑐰 𑐳𑑂𑐰𑐵𑐳𑑂𑐠𑑂𑐫 𑐁𑐡𑐶 𑐰𑐶𑐲𑐫𑐫𑐵 𑐟𑐵𑐮𑐶𑐩 𑐧𑐷𑐐𑐸 𑐏𑑃 𑐣𑑄 𑐩𑐴𑐬𑑂𑐖𑐣𑑄 𑐎𑐣𑐵𑐡𑐶𑐮 𑑋 𑐎𑐶𑐥𑐸𑐮𑐷 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑐵 𑐥𑐵𑐛𑑂𑐫𑐎𑑂𑐬𑐩 𑐰 𑐳𑐦𑐹 𑐣𑑄 𑐟𑐫𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐫𑐾𑑃𑐫𑑂 𑐣𑑄 𑐟𑐵𑐮𑐶𑐩
𑐫𑐾𑑃 – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐮𑐵𑐐𑐶𑑄 𑐣𑐶𑐖𑐷 𑐳𑑂𑐎𑐸𑐮𑐫𑐵 𑐱𑐶𑐎𑑂𑐲𑐎𑐟𑐫𑑂𑐟 𑐟𑐵𑐮𑐶𑐩 𑐧𑐷𑐐𑐸 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐫𑐾𑑃𑐫𑐵 𑐎𑑀𑐚–𑐱𑑂𑐰𑐬 𑐮𑐵𑐐𑐵𑐫𑑂 𑐔𑑂𑐰𑑄𑐐𑐸 𑐣𑐶𑐖𑐷 𑐳𑑂𑐎𑐸𑐮𑐫𑐵 𑐱𑐶𑐎𑑂𑐲𑐎𑐟𑐫𑑂𑐟 𑐠𑑂𑐰 𑐟𑐵𑐮𑐶𑐩 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐠𑐸𑐎𑐷 𑐄𑐐𑐸 𑐨𑐾𑐐𑐫𑐵 𑑒𑑖 𑐐𑐹 𑐳𑑂𑐎𑐸𑐮𑐫𑐵 𑐱𑐶𑐎𑑂𑐲𑐎𑐟𑐫𑑂𑐳𑑄 𑐧𑑂𑐰𑐟𑐶 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑑄 𑐧𑐶𑐄𑐐𑐸 𑐠𑑂𑐰 𑐟𑐵𑐮𑐶𑐩𑐫𑑂 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐡𑐧𑐹𑐥𑐵𑐏𑐾𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐣𑐫𑐵 𑐖𑐐𑐟 𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐷 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐠𑑂𑐰 𑐟𑐵𑐮𑐶𑐩 𑐣𑑂𑐴𑐫𑑂𑐣𑑂𑐴𑐸 𑐟𑐎 𑐳𑐘𑑂𑐔𑐵𑐮𑐣 𑐖𑐸𑐂 𑑋

𑐟𑐵𑐮𑐶𑐩𑐫𑐵 𑐳𑑄𑐫𑑀𑐖𑐎 𑐰𑐬𑐸𑐞𑐥𑑂𑐬𑐳𑐵𑐡 𑐰𑐿𑐡𑑂𑐫𑑄 𑐎𑐣𑐵𑐡𑐷 𑐎𑐠𑑄 𑐠𑑂𑐰 𑐟𑐵𑐮𑐶𑐩 𑐳𑐶𑐢𑐫𑐾𑐰𑑄 𑐴𑐾 𑐄𑐐𑐸 𑐴𑐾 𑐨𑐾𑐐𑐫𑐵 𑐴𑐵𑐣𑑄 𑐩𑐾𑐐𑐸 𑐣𑐶𑐖𑐷 𑐎𑑂𑐲𑐾𑐟𑑂𑐬𑐫𑐵 𑐳𑑂𑐎𑐸𑐮𑐫𑐵 𑐱𑐶𑐎𑑂𑐲𑐎𑐟𑐫𑑂𑐟 𑐣𑑄 𑐟𑐵𑐮𑐶𑐩 𑐧𑐷𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS