Read news in NepalBhasa text-- www.hamroschool.com BACK 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣𑐫𑑂 𑐗𑐶𑑄𑐣𑑂𑐫𑐵𑐐𑐹 𑐡𑐾𑐫𑑂𑐫𑐵 𑐧𑑂𑐰𑐟𑐶 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣𑐫𑑂 𑐗𑐶𑑄𑐣𑑂𑐫𑐵𑐐𑐹 𑐡𑐾𑐫𑑂𑐫𑐵 𑐧𑑂𑐰𑐟𑐶

𑐫𑐾𑑃 – 𑐱𑐸𑐎𑑂𑐬𑐰𑐵𑑅 𑐣𑐶𑐳𑐾𑑄 𑐫𑐾𑑃𑐫𑑂 𑐖𑐸𑐂𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣𑐫𑑂 𑐣𑐾𑐥𑐵𑑅 𑐮𑐐𑐵𑐫𑐟 𑑑𑑕 𑐐𑐹 𑐡𑐾𑐫𑑂𑐫𑐵 𑐣𑐾𑐰𑐵𑑅 𑐥𑑂𑐬𑐟𑐶𑐣𑐶𑐢𑐶𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐳𑐩𑑂𑐩𑐾𑐮𑐣𑐫𑑂 𑐧𑑂𑐰𑐟𑐶 𑐎𑐵𑐫𑐾𑐐𑐸 𑐮𑐵𑐐𑐶𑑄 𑐠𑐷𑐠𑐷 𑐡𑐾𑐫𑑂𑐫𑐵 𑐣𑐾𑐰𑐵𑑅 𑐥𑑂𑐬𑐟𑐶𑐣𑐶𑐢𑐶𑐥𑐶𑑄 𑐫𑐾𑑃𑐫𑑂 𑐠𑑂𑐫𑑄𑐎𑑅 𑐰𑐫𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐐𑐸𑐮𑐶𑑄 𑐮𑑃𑐫𑑂 𑐴𑐾 𑐮𑐵𑐣𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋
𑐁𑑅 𑐟𑐎 𑐳𑐷𑐡𑐸 𑐎𑐠𑑄 𑐳𑐩𑑂𑐩𑐾𑐮𑐣𑐫𑑂 𑐣𑐾𑐥𑐵𑑅 𑐮𑐐𑐵𑐫𑐟 𑐨𑐵𑐬𑐟, 𑐧𑑄𑐐𑐮𑐵𑐡𑐾𑐱, 𑐫𑐹𑐊𑐃, 𑐴𑑄𑐐𑐎𑑄𑐐, 𑐖𑐵𑐥𑐵𑐣, 𑐧𑐾𑐮𑐵𑐫𑐟, 𑐳𑑂𑐥𑐾𑐣, 𑐥𑑀𑐬𑑂𑐔𑐸𑐐𑐮, 𑐀𑐩𑐾𑐬𑐶𑐎𑐵, 𑐎𑑂𑐫𑐵𑐣𑐵𑐜𑐵, 𑐣𑐾𑐡𑐬𑐮𑑂𑐫𑐵𑐞𑑂𑐜, 𑐰𑐬𑑂𑐩𑐵 𑐰 𑐠𑐵𑐂𑐮𑑂𑐫𑐵𑐞𑑂𑐜𑐫𑐵 𑐥𑑂𑐬𑐟𑐶𑐣𑐶𑐢𑐶𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐀𑐠𑐾 𑐴𑐾 𑐫𑐾𑑃𑐫𑑂 𑐣𑐾𑐰𑐵𑑅 𑐡𑐶𑐰𑐳 𑐴𑐣𑐷𑐐𑐸 𑐴𑐾 𑐣𑑂𑐴𑐶 𑐎𑐸𑐣𑑂𑐴𑐸 𑐰𑐶𑐱𑑂𑐰𑐫𑐵 𑐎𑐬𑐶𑐧 𑑒𑑐 𑐐𑐹 𑐠𑐵𑐳𑐫𑑂 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐣𑐾𑐰𑐵𑑅 𑐡𑐶𑐰𑐳 𑐴𑐣𑐷𑐐𑐸 𑐏𑑃 𑐣𑑄 𑐳𑐷𑐡𑐸𑐐𑐸 𑐡𑐸 𑑋 𑐠𑐸𑐎𑐷 𑐩𑐢𑑂𑐫𑐾 𑐀𑐥𑑂𑐰𑑅 𑐢𑐂𑐠𑐾𑑄 𑐡𑐾𑐱𑐫𑑂 𑐣𑐾𑐰𑐵𑑅 𑐩𑐸𑐣𑐵 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐣𑐾𑐰𑐵𑑅 𑐡𑐶𑐰𑐳 𑐴𑐣𑐷𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐠𑐸𑐎𑐷 𑐩𑐢𑑂𑐫𑐾 𑐀𑐩𑐾𑐬𑐶𑐎𑐵𑐫𑐵 𑐱𑐶𑐫𑐵𑐚𑐮𑐫𑑂 ‘𑐡 𑐮𑐶𑐖𑐾𑐞𑑂𑐜 𑐀𑐦 𑐱𑑄𑐏𑐢𑐬’ 𑐳𑑄𑐎𑐶𑐥𑐵 𑐎𑑂𑐫𑐣𑐵𑑅 𑐠𑑂𑐰 𑐡𑐶𑐰𑐳 𑐴𑐣𑐾𑐐𑐸 𑐐𑑂𑐰𑐳𑐵𑑅 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐐𑐣𑑄 𑐳𑐦𑐹 𑐰𑐶𑐩𑑀𑐔𑐣 𑐰 𑐐𑐣𑑄 𑐥𑐶𑐎𑐣𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐣𑑄 𑐣𑐾𑐰𑐵𑑅 𑐡𑐶𑐰𑐳 𑐴𑐣𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐳𑐷𑐡𑐸𑐐𑐸 𑐡𑐸 𑑋 𑐫𑐾𑑃 𑐱𑐸𑐎𑑂𑐬𑐰𑐵𑑅 𑐖𑐸𑐂𑐐𑐸 𑐳𑐩𑑂𑐩𑐾𑐮𑐣𑐫𑐵 𑐄𑐮𑐾𑐖𑑂𑐫𑐵 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑑄 𑐫𑐵𑐣𑐵𑐡𑐷𑐐𑐸 𑐖𑐹𑐐𑐸 𑐡𑐸 𑑋 𑐣𑐶𑐣𑑂𑐴𑐸𑐫𑑄𑐎𑑄 𑐖𑐸𑐂𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅 𑐮𑐶𑐳𑐾𑑄 𑐠𑐷𑐠𑐷 𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐰𑐶𑐖𑑂𑐘𑐥𑐶𑑄𑐳𑑄 𑑑𑑘 𑐐𑐹 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐂𑐐𑐸 𑐣𑐶𑐱𑑂𑐔𑐶𑐟 𑐖𑐹𑐐𑐸 𑐡𑐸 𑑋 𑐠𑐸𑐎𑐷 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶, 𑐥𑐟𑑂𑐬𑐎𑐵𑐬𑐶𑐟𑐵, 𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵𑐫𑐵 𑐀𑐢𑐶𑐎𑐵𑐬, 𑐣𑐾𑐰𑐵𑑅 𑐳𑑄𑐐𑐛𑐣 𑐁𑐡𑐶 𑐰𑐶𑐲𑐫𑐫𑐵 𑐖𑑂𑐫𑐵𑐥𑑁𑐟 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋𑐳𑐩𑑂𑐩𑐾𑐮𑐣 𑐱𑐸𑐬𑐸 𑐖𑐸𑐂 𑐕𑐣𑑂𑐴𑐸 𑐣𑑂𑐴𑑂𑐫𑑅 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑑄 𑐣𑐾𑐥𑐵𑑅 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐳𑑂𑐰𑐣𑑂𑐴𑐸𑐫𑑄𑐎𑑄 𑐣𑐾𑐥𑐵𑐮𑐨𑐵𑐲𑐵 𑐳𑐦𑐹 𑐧𑑂𑐰𑐖𑑂𑐫𑐵 𑐣𑑄 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS