Read news in NepalBhasa text-- www.hamroschool.com BACK 𑐔𑑂𑐫𑐵𑐐𑐹 𑐐𑑀𑐮 𑐖𑐹𑐐𑐸 𑐳𑐣𑐳𑐣𑐷𑐥𑐹𑐬𑑂𑐞 𑐎𑐵𑐳𑐵 𑐟𑑂𑐫𑐵𑐎𑐵𑑅 𑐳𑑂𑐥𑐾𑐣 𑐎𑑂𑐰𑐵𑐬𑑂𑐚𑐬𑐦𑐵𑐂𑐣𑐮𑐫𑑂 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐔𑑂𑐫𑐵𑐐𑐹 𑐐𑑀𑐮 𑐖𑐹𑐐𑐸 𑐳𑐣𑐳𑐣𑐷𑐥𑐹𑐬𑑂𑐞 𑐎𑐵𑐳𑐵 𑐟𑑂𑐫𑐵𑐎𑐵𑑅 𑐳𑑂𑐥𑐾𑐣 𑐎𑑂𑐰𑐵𑐬𑑂𑐚𑐬𑐦𑐵𑐂𑐣𑐮𑐫𑑂

𑐫𑐾𑑃– 𑐀𑐮𑑂𑐨𑐵𑐬𑑀 𑐩𑑀𑐬𑐵𑐚𑐵 𑐰 𑐌𑐬𑐵𑐊𑐖𑐧𑐮 𑐣𑐵𑐫𑐎 𑐳𑐵𑐰𑐶𑐟 𑐖𑐹𑐐𑐸 𑐎𑐵𑐳𑐵𑐫𑑂 𑐳𑑂𑐥𑐾𑐣𑑄 𑐎𑑂𑐬𑑀𑐳𑐶𑐫𑐵𑐫𑐵𑐟 𑑕–𑑓 𑐐𑑀𑐮𑑄 𑐧𑐸𑑄𑐎𑐵𑑅 𑐳𑑂𑐥𑐾𑐣 𑐫𑐸𑐬𑑀 𑐎𑐥𑐫𑐵 𑐎𑑂𑐰𑐵𑐬𑑂𑐚𑐬𑐦𑐵𑐂𑐣𑐮𑐫𑑂 𑐡𑐸𑐴𑐵𑑄 𑐰𑐣𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐎𑐵𑐳𑐵𑐫𑐵 𑐳𑐸𑐬𑐸 𑐥𑐵𑐏𑐾 𑐴𑐾 𑐳𑑂𑐥𑐾𑐣𑐫𑐵 𑐐𑑀𑐮𑐎𑐶𑐥𑐬 𑐫𑐸𑐣𑐵𑐂 𑐳𑐶𑐩𑑀𑐣 𑐨𑐶𑐮𑐾𑐣 𑐳𑐵𑐰𑐶𑐟 𑐖𑐹𑐐𑐸 𑐎𑐵𑐳𑐵𑐫𑑂 𑐩𑑀𑐬𑐵𑐚𑐵 𑐰 𑐁𑐬𑐵𑐊𑐖𑐧𑐮 𑐊𑐎𑑂𑐳𑑂𑐚𑑂𑐬𑐵 𑐂𑐮𑐫𑑂 𑐰𑐶𑐖𑐫𑐫𑐵 𑐣𑐶𑑄𑐟𑐶𑑄 𑐣𑐵𑐫𑐎 𑐳𑐵𑐰𑐶𑐟 𑐖𑐹𑐐𑐸 𑐏𑑅 𑑋

𑐠𑑂𑐰𑐫𑐵𑑄 𑐣𑑂𑐴𑑂𑐫𑑅𑐫𑐵 𑐎𑐵𑐳𑐵𑐫𑑂 𑐐𑑀𑐮 𑐫𑐵𑐫𑐾 𑐩𑐦𑐫𑐾𑐰𑑄 𑐁𑐮𑑀𑐔𑐣𑐵 𑐦𑐫𑐵𑐔𑑂𑐰𑑄𑐩𑑂𑐴 𑐩𑑀𑐬𑐵𑐚𑐵𑑄 𑑓–𑑓 𑐐𑑀𑐮𑐫𑐵 𑐧𑐬𑐵𑐧𑐬𑐷𑐂 𑐖𑐸𑐫𑐵𑑅 𑐎𑐵𑐳𑐵 𑐊𑐎𑑂𑐳𑑂𑐚𑑂𑐬𑐵 𑐂𑐮𑐫𑑂 𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐣𑑂𑐴𑐵𑐥𑐵𑑄 𑐐𑑀𑐮 𑐫𑐵𑐳𑐾𑑄 𑐳𑑂𑐥𑐾𑐣𑐫𑐵𑐟 𑐰𑐶𑐖𑐫𑐫𑐵 𑐮𑑃𑐫𑑂 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐎𑐵𑐳𑐵𑐫𑐵 𑐳𑐫𑑁𑑄 𑐩𑐶𑐣𑐾𑐚𑐫𑑂 𑐩𑑀𑐬𑑀𑐚𑐵𑑄 𑐰 𑑑𑑐𑑓 𑐍𑑄 𑐩𑐶𑐣𑐾𑐚𑐫𑑂 𑐁𑐬𑐵𑐊𑐖𑑂𑐧𑐮𑑄 𑐕𑐐𑐹 𑐕𑐐𑐹 𑐐𑑀𑐮 𑐫𑐵𑑅𑐐𑐸 𑐏𑑅 𑑋 𑐊𑐎𑑂𑐳𑑂𑐚𑑂𑐬𑐵 𑐃 𑐣𑐶𑐐𑐹 𑐐𑑀𑐮 𑐳𑐴𑐶𑐟 𑐠𑑂𑐰 𑐕𑐐𑐹 𑐎𑐵𑐳𑐵𑐫𑑂 𑐔𑑂𑐫𑐵𑐐𑐹 𑐐𑑀𑐮 𑐖𑐹𑐐𑐸 𑐏𑑅 𑑋 𑐠𑐸𑐐𑐸𑐳𑐷𑐫𑐵 𑐫𑐸𑐬𑑀 𑐎𑐥𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐐𑑀𑐮 𑐖𑐹𑐐𑐸 𑐠𑑂𑐰 𑐴𑐾 𑐎𑐵𑐳𑐵 𑐏𑑅 𑑋

𑐎𑐵𑐳𑐵𑐫𑐵 𑑒𑑐 𑐍𑑄 𑐩𑐶𑐣𑐾𑐚𑐫𑑂 𑐰𑐶𑐥𑐎𑑂𑐲𑐷𑐫𑐵 𑐡𑐧𑐵𑐧 𑐩𑐡𑐸𑐐𑐸 𑐀𑐰𑐳𑑂𑐠𑐵𑐫𑑂 𑐠𑑅𑐐𑐸 𑐴𑐾 𑐚𑐶𑐩𑐫𑐵 𑐜𑐶𑐦𑐾𑐣𑑂𑐜𑐬𑑄 𑐧𑐶𑐄𑐐𑐸 𑐳𑐵𑐩𑐵𑐣𑑂𑐫 𑐥𑐵𑐳 𑐧𑐮 𑐐𑑀𑐮𑐎𑐶𑐥𑐬 𑐳𑐶𑐩𑑀𑐣 𑐠𑑅𑐐𑐸 𑐟𑐸𑐟𑐶𑑄 𑐡𑐶𑐎𑐾𑐟 𑐳𑑂𑐰𑑅𑐐𑐸 𑐏𑑅, 𑐟𑐬 𑐦𑑂𑐮𑐶𑐎 𑐖𑐸𑐫𑐵𑑅 𑐠𑑅𑐐𑐸 𑐴𑐾 𑐥𑑀𑐳𑑂𑐚𑐫𑑂 𑐡𑐸𑐴𑐵𑑄 𑐰𑐣𑐾𑐰𑑄 𑐳𑑂𑐥𑐾𑐣 𑐕𑐐𑐹 𑐐𑑀𑐮𑑄 𑐮𑐶𑐄𑐣𑐾 𑐮𑐵𑑅𑐰𑑄𑐐𑐸 𑐏𑑅 𑑋 𑐟𑐬𑑓𑑘 𑐍𑑄 𑐩𑐶𑐣𑐾𑐚𑐫𑑂 𑐳𑐬𑐵𑐧𑐶𑐫𑐵𑑄 𑐐𑑀𑐮 𑐫𑐵𑐳𑐾𑑄 𑐎𑐵𑐳𑐵 𑐧𑐬𑐵𑐧𑐬𑐷𑐂 𑐴𑐫𑐵𑐧𑐶𑐮 𑑋 𑐣𑐶𑐐𑐹𑐐𑐸 𑐴𑐵𑐦 𑐳𑐸𑐬𑐸 𑐖𑐹𑐐𑐸 𑑑𑑒 𑐩𑐶𑐣𑐾𑐚 𑐮𑐶𑐥𑐵 𑐴𑐾 𑐊𑐖𑑂𑐥𑑂𑐮𑐶𑐎𑑂𑐰𑐾𑐚𑐵𑑄 𑐐𑑀𑐮 𑐫𑐵𑐳𑐾𑑄 𑐳𑑂𑐥𑐾𑐣𑐫𑐵𑐟 𑐀𑐐𑑂𑐬𑐟𑐵 𑐧𑐶𑐮𑐳𑐵 𑑗𑑖 𑐍𑑄 𑐩𑐶𑐣𑐾𑐚𑐫𑑂 𑐦𑐬𑐵𑐣 𑐚𑑀𑐬𑐾𑐳𑑄 𑐐𑑀𑐮 𑐫𑐵𑐳𑐾𑑄 𑐳𑑂𑐥𑐾𑐣𑐫𑐵𑐟 𑐠𑑂𑐫𑑄𑐩𑐠𑑂𑐫𑑄 𑐰𑐶𑐖𑐫𑐫𑐵 𑐮𑑃𑐫𑑂 𑐫𑑄𑐎𑐹𑐐𑐸 𑐏𑑅 𑑋 𑐟𑐬 𑐮𑐶𑐥𑐵𑑄𑐐𑐸 𑑒𑑐 𑐩𑐶𑐣𑐾𑐚 𑐎𑑂𑐬𑑀𑐳𑐶𑐫𑐵𑐫𑐵𑐟 𑐥𑐣𑐾 𑐩𑐦𑐫𑐾𑐰𑑄 𑐣𑐶𑐫𑐩𑐶𑐟 𑑙𑑐 𑐩𑐶𑐣𑐾𑐚𑐫𑐵 𑐎𑐵𑐳𑐵 𑑓–𑑓 𑐫𑐵 𑐧𑐬𑐵𑐧𑐬𑐷 𑐖𑐹𑐰𑑄𑐐𑐸 𑐏𑑅 𑑋

𑐎𑑂𑐬𑑀𑐳𑐶𑐫𑐵𑐫𑐵 𑐣𑐶𑑄𑐟𑐶𑑄 𑐎𑐵𑐳𑐵𑐫𑐵 𑑘𑑕 𑐍𑑄 𑐩𑐶𑐣𑐾𑐚𑐫𑑂 𑐌𑐬𑐳𑐶𑐎𑑄 𑐰 𑐂𑐣𑑂𑐖𑐸𑐬𑐷 𑐃𑐫𑐵 𑐣𑐶𑐐𑐹𑐐𑐸 𑐩𑐶𑐣𑐾𑐚𑐫𑑂 𑐥𑐵𑐳𑐵𑐮𑐶𑐎𑑄 𑐕𑐐𑐹 𑐐𑑀𑐮 𑐫𑐵𑐳𑐾𑑄 𑐎𑐵𑐳𑐵 𑐧𑐬𑐵𑐧𑐬𑐷𑐂 𑐫𑑄𑐎𑐹𑐐𑐸 𑐏𑑅 𑑋 𑐌𑐬𑐳𑐶𑐎𑐫𑐵 𑐐𑑀𑐮𑐫𑐵𑐟 𑐐𑑀𑐮𑐮𑐵𑐂𑐣 𑐚𑐾𑐎𑑂𑐣𑑀𑐮𑑀𑐖𑐶 𑐥𑐵𑐏𑐾𑑄 𑐳𑑂𑐰𑐫𑐵𑑅 𑐐𑑀𑐮 𑐧𑐶𑐄𑐐𑐸 𑐏𑑅 𑑋 𑐳𑑂𑐥𑐾𑐣𑐫𑐵 𑐥𑑀𑐳𑑂𑐚𑐫𑑂 𑐑𑐵𑐬𑐵𑐑𑐸𑐬𑐸𑐫𑐵 𑐡𑐠𑐸𑐂 𑐧𑐮 𑐐𑑀𑐮𑐥𑑀𑐳𑑂𑐚𑐫𑐵 𑐮𑐵𑐂𑐣𑑄 𑐡𑐸𑐣𑐾 𑐡𑐸𑐴𑐵𑑄 𑐰𑑄𑐐𑐸 𑐏𑑅, 𑐟𑐬 𑐐𑑀𑐮 𑐏𑑅𑐎𑐶 𑐩𑐏𑐸 𑐢𑐵𑐫𑐾𑐩𑐦𑐸𑐐𑐸 𑐀𑐰𑐳𑑂𑐠𑐵𑐫𑑂 𑐐𑑀𑐮𑐮𑐵𑐂𑐣 𑐥𑑂𑐬𑐰𑐶𑐢𑐶 𑐥𑐵𑐏𑐾𑑄 𑐐𑑀𑐮 𑐧𑐶𑐄𑐐𑐸 𑐏𑑅 𑑋 𑐠𑑂𑐰 𑐥𑑂𑐬𑐰𑐶𑐢𑐶 𑐎𑐠𑑄 𑐫𑐡𑐶 𑐧𑐮 𑐐𑑀𑐮𑐮𑐵𑐂𑐣 𑐥𑐵𑐬 𑐫𑐵𑐣𑐵𑑅 𑐡𑐸𑐴𑐵𑑄 𑐰𑐣 𑐢𑐵𑑅𑐳𑐵 𑐬𑐾𑐦𑑂𑐬𑐷𑐫𑐵 𑐑𑐜𑐷 𑐨𑐵𑐂𑐧𑑂𑐬𑐾𑐚 𑐖𑐸𑐂 𑑋 𑐬𑐾𑐦𑑂𑐬𑐷𑑄 𑐠𑑅𑐐𑐸 𑐑𑐜𑐷 𑐨𑐵𑐂𑐧𑑂𑐬𑐾𑐚 𑐖𑐹𑐐𑐸 𑐳𑑄𑐎𑐾𑐟 𑐧𑐶𑐳𑐾𑑄 𑐐𑑀𑐮 𑐧𑐶𑐄𑐐𑐸 𑐏𑑅 𑑋

𑐁𑐟𑑂𑐩𑐑𑐵𑐟𑐷 𑐐𑑀𑐮 𑐫𑐵𑐳𑐾𑑄 𑐨𑐶𑐮𑐾𑐣𑐫𑐵 𑐕𑐰𑐶 𑐡𑐫𑐾𑐎𑐹𑐩𑑂𑐴 𑐐𑑀𑐮𑐎𑐶𑐥𑐬 𑐳𑐶𑐩𑐵𑐣𑑄 𑐠𑑁𑑄𑐫𑐵 𑐎𑐵𑐳𑐵𑐫𑑂 𑐳𑑂𑐰𑑄𑐐𑐹 𑐥𑑂𑐫𑑄𑐐𑐹 𑐄𑐟𑑂𑐎𑐺𑐲𑑂𑐚 𑐧𑐔𑐵𑐄 𑐣𑑄 𑐫𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS