𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫
𑐫𑐮 -𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐣𑑄 𑐠𑑂𑐰𑐴𑐾 𑐡𑑃𑐣𑐶𑐳𑐾𑑄 𑐩𑐴𑐵– 𑐣𑐐𑐬 𑐩𑐵𑐟𑐴𑐟 𑐮𑐵𑑅𑐐𑐸 𑐦𑐸𑐎𑑂𑐎𑑄 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 (𑐣𑐶𑐖𑐷) 𑐳𑑂𑐎𑐸𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑑂𑐴𑐷𑐐 𑐔𑑂𑐰𑑄𑐐𑐸 𑐧𑑀𑐬𑑂𑐜 𑐧𑐿𑐛𑐎𑑄 𑐠𑑂𑐰 𑐳𑐩𑑂𑐧𑐣𑑂𑐢𑐷 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋
𑐧𑑀𑐬𑑂𑐜𑑄 𑐫𑐵𑑅𑐐𑐸 𑐣𑐶𑐬𑑂𑐞𑐫𑐫𑑂 𑐢𑐫𑐵𑐟𑑅𑐐𑐸 𑐡𑐸– ‘𑐩𑐵𑐟𑐺𑐨𑐵𑐲𑐵𑐫𑐵𑐟 𑐀𑐣𑐶𑐰𑐵𑐬𑑂𑐫 𑐫𑐵𑐳𑐾𑑄 𑐳𑑂𑐠𑐵𑐣𑐷𑐫 𑐰𑐶𑐎𑐵𑐫 𑐳𑐩𑐵𑐰𑐾𑐱𑐷 𑐫𑐵𑐣𑐵𑑅 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩÷𑐥𑐵𑐛𑑂𑐫𑐥𑐸𑐳𑑂𑐟𑐎 𑐟𑐫𑐵𑐬 𑐫𑐵𑐣𑐵𑑅 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐖𑐸𑐂 𑑋 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐛𑐣𑐥𑐵𑐛𑐣 𑐳𑐘𑑂𑐔𑐵𑐮𑐣 𑐫𑐵𑐫𑐾𑐟 𑐠𑑂𑐰𑐴𑐾 𑐁.𑐰. 𑐣𑐶𑐳𑐾𑑄 𑐱𑐶𑐎𑑂𑐲𑐎 𑐖𑐣𑐱𑐎𑑂𑐟𑐶𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 (𑐥𑑂𑐬𑐱𑐶𑐎𑑂𑐲𑐎 𑐟𑐠𑐵 𑐳𑐴𑐵𑐫𑐎 𑐥𑑂𑐬𑐱𑐶𑐎𑑂𑐲𑐎) 𑐥𑑂𑐬𑐧𑐣𑑂𑐢 𑐫𑐵𑐫𑐾𑐐𑐸 𑐖𑐸𑐂 𑑋’
𑐫𑐮 𑐩𑐣𑐥𑐵𑐫𑐵 𑐧𑑀𑐬𑑂𑐜𑑄 𑐫𑐵𑑅𑐐𑐸 𑐠𑑂𑐰 𑐣𑐶𑐬𑑂𑐞𑐫𑐫𑐵𑐟 𑐁𑑅 𑐣𑐐𑐬𑐳𑐨𑐵𑐫𑐵 𑐧𑐿𑐛𑐎𑐫𑑂 𑐥𑐾𑐱 𑐫𑐵𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐠𑑂𑐰𑐴𑐾 𑐩𑐴𑐶𑐣𑐵𑐫𑑂 𑐣𑐐𑐬 𑐳𑐨𑐵𑐫𑐵 𑐧𑐿𑐛𑐎 𑐣𑑄 𑐔𑑂𑐰𑐣𑐾𑐟𑑂𑐫𑑄𑐐𑐸 𑐡𑐸 𑑋 𑐣𑐐𑐬 𑐳𑐨𑐵𑑄 𑐥𑐵𑐬𑐶𑐟 𑐫𑐵𑐫𑐾𑐰𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐀𑐣𑑂𑐟𑐬𑑂𑐐𑐟 𑐮𑐵𑑅𑐐𑐸 𑐦𑐸𑐎𑑂𑐎𑑄 𑐳𑑂𑐎𑐸𑐮𑐫𑑂 𑐳𑑂𑐠𑐵𑐣𑐷𑐫 𑐰𑐶𑐲𑐫𑐫𑐵 𑐬𑐸𑐥𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐖𑐸𑐂 𑑋
𑐫𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐮𑐵𑐐𑐶𑑄 𑐳𑑂𑐠𑐵𑐣𑐷𑐫 𑐖𑑂𑐫𑐵𑐥𑐸 𑐳𑐩𑐵𑐖 𑐮𑐶𑐳𑐾𑑄 𑐠𑐷𑐠𑐷 𑐏𑐮𑑅 𑐥𑐸𑐔𑑅𑐟𑐫𑑂𑐳𑑄 𑐥𑐴𑐮 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑐾𑐥𑐵𑐮– 𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐖𑐹 𑐠𑐾𑑄 𑐫𑐮 𑐖𑐶𑐮𑑂𑐮𑐵𑐫𑑂 𑐮𑐵𑑅𑐐𑐸 𑐩𑐾𑐩𑐾𑐐𑐸 𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑑄 𑐠𑑅𑐠𑑅𑐐𑐸 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋
𑐠𑑂𑐰𑐴𑐾 𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑑄 𑐠𑑅 𑐩𑐵𑐟𑐴𑐟 𑐮𑐵𑑅𑐐𑐸 𑐦𑐸𑐎𑑂𑐎𑑄 𑐳𑑂𑐎𑐸𑐮𑐫𑑂 𑐥𑑁 𑐕𑑂𑐰𑐫𑐵𑑅 𑐠𑐸𑐐𑐸 𑐡𑑃𑐣𑐶𑐳𑐾𑑄 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐎𑐠𑑄 ‘𑐫𑐾𑑃 𑐡𑐾𑐫𑑂 𑐩𑑂𑐴𑐳𑐷𑐎𑐾’ 𑐳𑐦𑐹 𑐧𑑂𑐰𑑄𑐎𑐾𑐟 𑐥𑐬𑐶𑐥𑐟𑑂𑐬 𑐖𑐵𑐬𑐷 𑐫𑐵𑑅𑐐𑐸 𑐡𑐸 𑑋
LEAVE YOUR COMMENTS