Read news in NepalBhasa text-- www.hamroschool.com BACK 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐳𑐸𑐫𑐵𑐎𑐾 𑐐𑐸𑐮𑐶 𑐡𑐸 ? – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐳𑐸𑐫𑐵𑐎𑐾 𑐐𑐸𑐮𑐶 𑐡𑐸 ?

𑐳𑑂𑐰𑐷𑐜𑐾𑐣𑐫𑐵 𑐠𑐶𑑄𑐎 𑐚𑑂𑐫𑐵𑑄𑐎 𑐢𑐵𑐂𑐐𑐸 ‘𑐳𑑂𑐚𑐎𑐴𑑀𑐩 𑐂𑐣𑑂𑐚𑐬𑐣𑐾𑐱𑐣𑐮 𑐥𑐷𑐳 𑐬𑐶𑐳𑐬𑑂𑐔 𑐂𑐣𑑂𑐲𑑂𑐚𑐶𑐔𑑂𑐫𑐹𑐚’ 𑐳𑐶𑐥𑑂𑐬𑐷𑑄 𑐰𑑄𑐐𑐸 𑐳𑑀𑐩𑐰𑐵𑑅 𑐥𑐶𑐎𑐵𑑅𑐐𑐸 𑐕𑐐𑐹 𑐰𑐵𑐬𑑂𑐲𑐶𑐎 𑐬𑐶𑐥𑑀𑐬𑑂𑐚 𑐎𑐠𑑄 𑐰𑐶𑐱𑑂𑐰𑐫𑑂 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑑅𑐐𑐸 𑐡𑐸 𑑋 𑐬𑐶𑐥𑑀𑐬𑑂𑐚 𑐎𑐠𑑄 𑐳𑐣𑑂 𑑒𑑐𑑒𑑑 𑐫𑐵 𑐳𑐸𑐬𑐸𑐥𑐵𑐏𑐾 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐢𑐵𑐬𑐎 𑐐𑐸𑑄𑐐𑐹 𑐡𑐾𑐫𑑂𑐟𑐫𑑂𑐎𑐾 𑐫𑐵𑐣𑐵𑑅 𑐩𑐸𑐎𑑂𑐎𑑄 𑑑𑑓 𑐴𑐖𑐵𑐬 𑑘𑑐 𑐐𑐹 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐸 𑑋 𑐰𑐶𑐱𑑂𑐰𑐫𑐵 𑐀𑐩𑐾𑐬𑐶𑐎𑐵, 𑐬𑐸𑐳, 𑐔𑐷𑐣, 𑐧𑐾𑐮𑐵𑐫𑐟, 𑐦𑑂𑐬𑐵𑐣𑑂𑐳, 𑐂𑐖𑐬𑐵𑐫𑐮, 𑐥𑐵𑐎𑐶𑐳𑑂𑐟𑐵𑐣, 𑐨𑐵𑐬𑐟 𑐰 𑐄𑐟𑑂𑐟𑐬 𑐎𑑀𑐬𑐶𑐫𑐵𑐫𑐵𑐎𑐾 𑐖𑐎 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐸 𑑋 𑐠𑐸𑐥𑐶𑑄 𑐡𑐾𑐫𑑂𑐟𑐫𑑂𑐎𑐾 𑐡𑐸𑐐𑐸 𑐴𑐟𑐶𑐫𑐵𑐬 𑐩𑐢𑑂𑐫𑐾 𑑓 𑐴𑐖𑐵𑐬 𑑘𑑒𑑕 𑐐𑐹 𑐴𑐟𑐶𑐫𑐵𑐬 𑐟𑐸𑐬𑐸𑐣𑑂𑐟 𑐥𑑂𑐬𑐴𑐵𑐬 𑐫𑐵𑐫𑐾𑐦𑐂 𑐎𑐠𑑄 𑐟𑐫𑐵𑐬𑐷 𑐀𑐰𑐳𑑂𑐠𑐵𑐫𑑂 𑐟𑐫𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐩𑐢𑑂𑐫𑐾 𑐀𑐩𑐾𑐬𑐶𑐎𑐵 𑐰 𑐬𑐸𑐳𑑄 𑐖𑐎 𑐣𑐶𑐡𑑂𑐰𑑅𑐐𑐹 𑐴𑐟𑐶𑐫𑐵𑐬 𑐴𑐵𑐂 𑐀𑐮𑐬𑑂𑐚 𑐩𑑀𑐜𑐫𑑂 𑐟𑐫𑐵𑐟𑑅𑐐𑐸 𑐡𑐸 𑑋

𑐐𑐸𑑄𑐐𑐹 𑐡𑐾𑐫𑑂 𑐩𑐢𑑂𑐫𑐾 𑐡𑐎𑐮𑐫𑑂 𑐀𑐥𑑂𑐰𑑅 𑐬𑐸𑐳𑐫𑐵𑐎𑐾 𑑖 𑐴𑐖𑐵𑐬 𑑒𑑕𑑕 𑐐𑐹 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐸𑐳𑐵 𑐀𑐩𑐾𑐬𑐶𑐎𑐵𑐫𑐵𑐎𑐾 𑑕 𑐴𑐖𑐵𑐬 𑑕𑑕𑑐 𑐐𑐹 𑐴𑐟𑐶𑐫𑐵𑐬 𑐡𑐸 𑑋 𑐬𑐸𑐳 𑐰 𑐀𑐩𑐾𑐬𑐶𑐎𑐵 𑐢𑐸𑑄𑐎𑐵𑑅 𑐡𑐎𑐮𑐫𑑂 𑐀𑐥𑑂𑐰𑑅 𑐔𑐷𑐣𑐫𑐵𑐎𑐾 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐸, 𑐟𑐬 𑐬𑐸𑐳 𑐰 𑐀𑐩𑐾𑐬𑐶𑐎𑐵𑐫𑐵 𑐮𑑂𑐫𑐵𑐏𑐫𑑂 𑐢𑐵𑑅𑐳𑐵 𑐟𑐳𑐎𑑄 𑐴𑐾 𑐩𑑂𑐴𑑀 𑐖𑐎 𑐡𑐸 𑑋 𑐔𑐷𑐣𑐫𑐵𑐎𑐾 𑐠𑑁𑑄𑐎𑐣𑑂𑐴𑐫𑑂 𑑓𑑕𑑐 𑐐𑐹 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐸 𑑋

𑐳𑐣𑑂 𑑒𑑐𑑒𑑐 𑐰 𑑒𑑐𑑒𑑑 𑐫𑐵 𑐟𑐸𑐮𑐣𑐵 𑐫𑐵𑐣𑐵 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐬𑐸𑐳 𑐰 𑐀𑐩𑐾𑐬𑐶𑐎𑐵𑐫𑐵 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐩𑑂𑐴𑑀 𑐖𑐹𑐐𑐸 𑐡𑐸𑐳𑐵 𑐔𑐷𑐣, 𑐨𑐵𑐬𑐟 𑐰 𑐥𑐵𑐎𑐶𑐳𑑂𑐟𑐵𑐣𑐫𑐵 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐢𑐵𑑅𑐳𑐵 𑐀𑐥𑑂𑐰𑑅𑐐𑐸 𑐡𑐸 𑑋 𑐬𑐸𑐳𑐫𑐵 𑐠𑐐𑐸𑐣𑐾 𑐳𑑂𑐰𑐫𑐵𑑄 𑑑𑑒𑑐 𑐐𑐹 𑐴𑐟𑐶𑐫𑐵𑐬 𑐩𑑂𑐴𑑀 𑐖𑐹𑐐𑐸 𑐡𑐸𑐳𑐵 𑐀𑐩𑐾𑐬𑐶𑐎𑐵𑐫𑐵 𑑒𑑕𑑐 𑐐𑐹 𑐴𑐟𑐶𑐫𑐵𑐬 𑐩𑑂𑐴𑑀 𑐖𑐹𑐐𑐸 𑐡𑐸 𑑋

𑐟𑐬 𑐠𑑂𑐰 𑐡𑐕𑐶𑐫𑐵 𑐡𑐸𑐣𑐾 𑐔𑐷𑐣𑐫𑑂 𑐳𑑂𑐰𑐷𑐐𑐹 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐠𑐥 𑐖𑐹𑐐𑐸 𑐡𑐸𑐳𑐵 𑐨𑐵𑐬𑐟𑐫𑐵 𑐏𑐸𑐐𑐹 𑐰 𑐥𑐵𑐎𑐶𑐳𑑂𑐟𑐵𑐣𑐫𑐵 𑐣𑑂𑐫𑐵𑐐𑐹 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐠𑐥 𑐖𑐹𑐐𑐸 𑐡𑐸 𑑋 𑐄𑐟𑑂𑐟𑐬 𑐎𑑀𑐬𑐶𑐫𑐵𑐫𑐵𑐎𑐾 𑐡𑐸𑐐𑐸 𑐴𑐟𑐶𑐫𑐵𑐬𑐫𑐵 𑐠𑑂𑐫𑐵𑐎𑑂𑐎 𑐟𑐠𑑂𑐫𑐵𑑄𑐎 𑐢𑐵𑑅𑐳𑐵 𑐩𑐡𑐸 𑑋 𑐟𑐬 𑐰𑐫𑐵𑐎𑐾 𑑔𑑐 𑐣𑐶𑐳𑐾𑑄 𑑕𑑐 𑐐𑐹 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐸𑐐𑐸 𑐀𑐣𑐸𑐩𑐵𑐣 𑐡𑐸 𑑋 𑐠𑑂𑐰 𑐡𑐕𑐶𑐫𑐵 𑐡𑐸𑐣𑐾 𑐖𑐎 𑐰𑑄 𑐗𑐶𑐐𑐹 𑐠𑐥 𑐴𑐟𑐶𑐫𑐵𑐬 𑐡𑐫𑐾𑐎𑐹𑐐𑐸 𑐀𑐣𑐸𑐩𑐵𑐣 𑐡𑐸 𑑋
𑐦𑑂𑐬𑐵𑐣𑑂𑐳𑐫𑐵𑐎𑐾 𑑒𑑖𑑐 𑐐𑐹 𑐰 𑐂𑐖𑐬𑐵𑐫𑐮𑐫𑐵𑐎𑐾 𑑙𑑐 𑐐𑐹 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐸 𑑋

𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐩𑐏𑐸
𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐟𑐳𑐎𑑄 𑐰𑐶𑐢𑑂𑐰𑑄𑐱𑐎 𑐴𑐟𑐶𑐫𑐵𑐬 𑐏𑑅 𑑋 𑑗𑑕 𑐡𑑃 𑐣𑑂𑐴𑑂𑐫𑑅 𑐖𑐵𑐥𑐵𑐣𑐫𑐵 𑐴𑐶𑐬𑑀𑐱𑐶𑐩𑐵 𑐰 𑐣𑐵𑐐𑐵𑐳𑐵𑐎𑐶𑐂 𑐀𑐩𑐾𑐬𑐶𑐎𑐵𑑄 𑐫𑐵𑑅𑐐𑐸 𑐥𑐬𑐩𑐵𑐞𑐸 𑐁𑐎𑑂𑐬𑐩𑐞𑐫𑐵 𑐑𑐵𑑅 𑐁𑑅𑐟𑐎 𑐣𑑄 𑐮𑑄𑐐𑐸 𑐩𑐡𑐸𑐣𑐶 𑑋 𑐄𑐧𑐮𑐫𑑂𑐫𑐵 𑐎𑐣𑑂𑐣𑐵𑐔𑐵𑐫𑐵𑐥𑐸𑐐𑐸 𑐡𑐺𑐱𑑂𑐫𑑄 𑐁𑑅𑐟𑐎 𑐣𑑄 𑐩𑐣𑐹𑐟𑐫𑑂𑐟 𑐔𑐶𑑄𑐎 𑐩𑐶𑑄𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐠𑑁𑑄𑐎𑐣𑑂𑐴𑐫𑑂 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐫𑐾𑐎𑐾𑐐𑐸 𑐴𑑀𑐜 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐔𑐶𑐣𑑂𑐟𑐵 𑐥𑑂𑐰𑑄𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐩𑐾𑐏𑐾 𑐥𑐬𑐩𑐵𑐞𑐸 𑐰𑐶𑐖𑑂𑐘𑐟𑐫𑑂𑐳𑑄 𑐢𑐵𑑅𑐳𑐵 𑐠𑑂𑐰 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐀𑐥𑑂𑐰𑐫𑐵 𑐔𑑂𑐰𑑄𑐐𑐸 𑐕𑐸𑑄 𑐴𑐟𑐶𑐫𑐵𑐬 𑐡𑐫𑐾𑐎𑐾𑐐𑐸 𑐢𑐾𑑄𑐢𑐾𑑄𑐧𑐮𑑂𑐮𑐵𑑅𑐫𑐵 𑐎𑐵𑐬𑐞𑑄 𑐩𑐏𑐸𑐎𑐶 𑐣𑐶𑐫𑐩𑐶𑐟 𑐥𑑂𑐬𑐎𑑂𑐬𑐶𑐫𑐵 𑐎𑐠𑑄 𑐖𑐎 𑐏𑑅 𑐢𑐵𑑅𑐐𑐸 𑐡𑐸 𑑋 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐫𑐾𑐎𑐾𑐐𑐸 𑐕𑐐𑐹 𑐳𑑄𑐫𑐣𑑂𑐟𑑂𑐬 𑐡𑐫𑐾𑐢𑐸𑑄𑐎𑐵𑑅 𑐄𑐎𑐶𑐫𑐵𑐟 𑐁𑐎𑐵𑐗𑐵𑐎𑐵𑑄 𑐡𑐶𑐎𑐵𑑅, 𑐮𑐶𑐥𑐵 𑐴𑐵𑐎𑐣𑑄 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐖𑐸𑐂𑐩𑐏𑐸 𑑋 𑐠𑑂𑐰 𑐳𑑄𑐫𑐣𑑂𑐟𑑂𑐬𑐫𑑂 𑐣𑐶𑐫𑐩𑐶𑐟 𑐖𑑂𑐫𑐵 𑐖𑐸𑐫𑐵𑐔𑑂𑐰𑐣𑐾𑐩𑐵𑑅, 𑐠𑑂𑐰 𑐴𑐾 𑐎𑐵𑐬𑐞𑑄 𑐖𑐎 𑐴𑐟𑐶𑐫𑐵𑐬 𑐀𑐥𑑂𑐰𑑅𑐐𑐸 𑐏𑑅 𑐢𑐫𑐵𑐐𑐸 𑐄𑐩𑐶𑐐𑐸 𑐢𑐵𑐥𑐹 𑐡𑐸 𑑋

𑐀𑐬𑑂𑐧𑑁𑑄 𑐜𑐮𑐬 𑐏𑐬𑑂𑐔
𑐠𑑁𑑄𑐎𑐣𑑂𑐴𑐫𑑂 𑐰𑐶𑐱𑑂𑐰 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑑄 𑐫𑐵𑐣𑐵𑑅 𑐁𑐎𑑂𑐬𑐵𑐣𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐩𑐴𑐵𑐩𑐵𑐬𑐷𑑄 𑐫𑐵𑐣𑐵𑑅 𑐰𑐶𑐱𑑂𑐰𑐫𑐵 𑐫𑐎𑑂𑐰 𑐴𑐾 𑐡𑐾𑐫𑑂𑐫𑐵 𑐀𑐬𑑂𑐠𑐟𑐣𑑂𑐟𑑂𑐬 𑐳𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐣𑑄 𑐠𑑂𑐰 𑐐𑐸𑑄𑐐𑐹 𑐡𑐾𑐫𑑂𑐟𑐫𑑂𑐳𑑄 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑐫𑐵 𑐣𑐶𑑄𑐟𑐶𑑄 𑐀𑐬𑑂𑐧𑑁 𑐜𑐮𑐬 𑐏𑐬𑑂𑐔 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑑀𑐧𑐾𑐮 𑐱𑐵𑐣𑑂𑐟𑐶 𑐥𑐸𑐬𑐳𑑂𑐎𑐵𑐬𑑄 𑐳𑐩𑑂𑐩𑐵𑐣𑐶𑐟 𑐖𑐸𑐫𑐢𑐸𑑄𑐎𑐹𑐐𑐸 𑐕𑐐𑐹 𑐳𑑄𑐳𑑂𑐠𑐵 𑐂𑐣𑑂𑐚𑐬𑐣𑐾𑐱𑐣𑐮 𑐎𑑂𑐫𑐵𑐩𑑂𑐥𑐾𑐣 𑐚𑐸 𑐊𑐧𑑀𑐮𑐶𑐳 𑐣𑑂𑐫𑐹𑐎𑑂𑐮𑐶𑐫𑐬 𑐰𑐾𑐥𑐣𑑂𑐳 (𑐁𑐂𑐳𑐶𑐊𑐊𑐣𑑄) 𑐕𑐸𑑄 𑐃 𑐣𑑂𑐴𑑂𑐫𑑅 𑐥𑐶𑐟𑐧𑐶𑐄𑐐𑐸 𑐬𑐶𑐥𑑀𑐬𑑂𑐚 𑐎𑐠𑑄 𑐳𑐣𑑂 𑑒𑑐𑑒𑑐 𑐫𑑂 𑐖𑐎 𑐠𑑂𑐰 𑐡𑐾𑐫𑑂𑐟𑐫𑑂𑐳𑑄 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑐫𑐵 𑐣𑐶𑑄𑐟𑐶𑑄 𑑗𑑒 𑐀𑐬𑑂𑐧 𑑖𑑐 𑐎𑐬𑑀𑐜 𑐜𑐮𑐬 𑐏𑐬𑑂𑐔 𑐫𑐵𑑅𑐐𑐸 𑐡𑐸 𑑋 𑐠𑑂𑐰 𑐢𑑂𑐫𑐧𑐵 𑐳𑐣𑑂 𑑒𑑐𑑑𑑙 𑐫𑐵 𑐳𑑂𑐰𑐫𑐵𑑄 𑑑 𑐀𑐬𑑂𑐧 𑑔𑑐 𑐎𑐬𑑀𑐜 𑐜𑐮𑐬𑐫𑐵 𑐮𑑂𑐫𑐵𑐏𑑄 𑐀𑐥𑑂𑐰𑑅 𑐏𑑅 𑑋 𑐬𑐶𑐥𑑀𑐬𑑂𑐚 𑐎𑐠𑑄 𑐠𑑂𑐰 𑐩𑐴𑐵𑐩𑐵𑐬𑐷𑐫𑐵 𑐂𑐮𑐫𑑂 𑐣𑑄 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑑄 𑐡𑐎𑐮𑐫𑑂 𑐀𑐥𑑂𑐰𑑅 𑐏𑐬𑑂𑐔 𑐫𑐵𑑅𑐐𑐸 𑐡𑐾𑐱𑐫𑑂 𑐀𑐩𑐾𑐬𑐶𑐎𑐵 𑐡𑐎𑐮𑐫𑑂 𑐣𑑂𑐴𑑂𑐫𑑅𑐣𑐾 𑐡𑐸𑐳𑐵 𑐠𑑂𑐰𑐫𑐵𑑄 𑐮𑐶𑐥𑐵 𑐔𑐷𑐣 𑐡𑐸 𑑋
𑐀𑐩𑐾𑐬𑐶𑐎𑐵𑑄 𑐡𑐕𑐶𑐫𑐵 𑐡𑐸𑐣𑐾 𑑓𑑗 𑐀𑐬𑑂𑐧 𑑔𑑐 𑐎𑐬𑑀𑐜 𑐜𑐮𑐬 𑐏𑐬𑑂𑐔 𑐫𑐵𑑅𑐐𑐸 𑐡𑐸𑐳𑐵 𑐔𑐷𑐣𑑄 𑑑𑑐 𑐀𑐬𑑂𑐧 𑑑𑑐 𑐎𑐬𑑀𑐜 𑐜𑐮𑐬, 𑐬𑐸𑐳𑑄 𑑘 𑐀𑐬𑑂𑐧 𑐜𑐮𑐬, 𑐧𑐾𑐮𑐵𑐫𑐟𑑄 𑑖 𑐀𑐬𑑂𑐧 𑑒𑑐 𑐎𑐬𑑀𑐜 𑐜𑐮𑐬, 𑐦𑑂𑐬𑐵𑐣𑑂𑐳𑑄 𑑕 𑐀𑐬𑑂𑐧 𑑗𑑐 𑐎𑐬𑑀𑐜 𑐜𑐮𑐬, 𑐨𑐵𑐬𑐟𑑄 𑑒 𑐀𑐬𑑂𑐧 𑑔𑑐 𑐎𑐬𑑀𑐜 𑐜𑐮𑐬, 𑐥𑐵𑐎𑐶𑐳𑑂𑐟𑐵𑐣𑑄 𑑑 𑐀𑐬𑑂𑐧 𑐜𑐮𑐬 𑐰 𑐄𑐟𑑂𑐟𑐬 𑐎𑑀𑐬𑐶𑐫𑐵𑑄 𑑖𑑖 𑐎𑐬𑑀𑐜 𑑗𑑐 𑐮𑐵𑐏 𑐜𑐮𑐬 𑐏𑐬𑑂𑐔 𑐫𑐵𑑅𑐐𑐸 𑐡𑐸 𑑋

𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 : 𑐱𑐵𑐣𑑂𑐟𑐶𑐫𑐵 𑐴𑐟𑐶𑐫𑐵𑐬
𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐟𑐳𑐎𑑄 𑐰𑐶𑐢𑑂𑐰𑑄𑐱𑐎 𑐴𑐟𑐶𑐫𑐵𑐬 𑐏𑑅𑐳𑐵𑑄 𑐠𑐸𑐎𑐶𑐫𑐵𑐟 𑐥𑐬𑐩𑐵𑐞𑐸 𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐢𑐵𑑅𑐳𑐵 ‘𑐱𑐵𑐣𑑂𑐟𑐶𑐫𑐵 𑐴𑐟𑐶𑐫𑐵𑐬’ 𑐰𑐵 ‘𑐰𑐾𑐥𑐣𑑂𑐳 𑐀𑐦 𑐜𑐾𑐚𑐬𑐾𑐣𑑂𑐳’ (𑐫𑐸𑐡𑑂𑐢 𑐥𑐣𑐶𑐐𑐸 𑐴𑐟𑐶𑐫𑐵𑐬) 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐨𑐵𑐬𑐟𑐫𑐵 ‘𑐩𑐶𑐳𑐵𑐂𑐮 𑐩𑑂𑐫𑐵𑐣’ 𑐢𑐵𑐂𑐩𑑂𑐴 𑐰𑐿𑐖𑑂𑐘𑐵𑐣𑐶𑐎 𑐰 𑐥𑐸𑐮𑐵𑑄𑐩𑑂𑐴 𑐬𑐵𑐲𑑂𑐚𑑂𑐬𑐥𑐟𑐶 𑐀𑐧𑑂𑐡𑐸𑐮 𑐖𑐾 𑐎𑐮𑐵𑐩 𑐎𑐠𑑄 𑐠𑑅𑐥𑐶𑑄𑐎𑐾 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐡𑐟 𑐢𑐵𑑅𑐳𑐵 𑐩𑐾𑐐𑐸 𑐡𑐾𑐱𑑄 𑐁𑐎𑑂𑐬𑐩𑐞 𑐫𑐵𑐂𑐩𑐏𑐸, 𑐄𑐎𑐶𑑄 𑐠𑑂𑐰 ‘𑐱𑐵𑐣𑑂𑐟𑐶𑐫𑐵 𑐴𑐟𑐶𑐫𑐵𑐬’ 𑐏𑑅 𑑋 𑐟𑑅𑐢𑑄𑐐𑐸 𑐫𑐸𑐡𑑂𑐢 𑐖𑐸𑐮 𑐢𑐵𑑅𑐳𑐵 𑐠𑑅𑐐𑐸 𑐡𑐾𑐱𑐫𑑂 𑐥𑐬𑐩𑐵𑐞𑐸 𑐁𑐎𑑂𑐬𑐩𑐞 𑐫𑐵𑐫𑐾𑐦𑐸 𑐢𑐫𑐵𑐐𑐸 𑐐𑑂𑐫𑐵𑑅𑐔𑐶𑐎𑐸𑑄 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑐢𑐵𑐬𑐷 𑐡𑐾𑐫𑑂𑐟𑐫𑑂𑐟 𑐎𑐵𑐔𑐵𑐎𑑂𑐎 𑐳𑐸𑐣𑐵𑑄 𑐣𑑄 𑐁𑐎𑑂𑐬𑐩𑐞 𑐫𑐵𑐂𑐩𑐏𑐸, 𑐀𑐠𑐾 𑐖𑐹𑐐𑐸𑐮𑐶𑑄 𑐠𑑂𑐰 𑐴𑐟𑐶𑐫𑐵𑐬𑐫𑐵𑐟 𑐰𑐾𑐥𑐣𑑂𑐳 𑐀𑐦 𑐜𑐾𑐚𑐬𑐾𑐣𑑂𑐳 𑐢𑐵𑐂𑐐𑐸 𑐰𑐶𑐖𑑂𑐘𑐟𑐫𑑂 𑐢𑐵𑐥𑐹 𑐡𑐸 𑑋

𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑐫𑐵𑐟 𑐎𑐫𑐵𑑅 𑐨𑐵𑐬𑐟 𑐰 𑐔𑐷𑐣𑐫𑐵 ‘𑐣𑑀 𑐦𑐳𑑂𑐬𑑂𑐚 𑐫𑐸𑐖’ 𑐣𑐷𑐟𑐶 𑐡𑐸 𑑋 𑐠𑑂𑐰 𑐣𑐷𑐟𑐶 𑐢𑐫𑐵𑐐𑐸 𑐠𑑅𑐩𑑂𑐴𑑄 𑐣𑑂𑐴𑐵𑐥𑐵𑑄 𑐥𑑂𑐬𑐴𑐵𑐬 𑐩𑐫𑐵𑐫𑐾𑐐𑐸 𑐣𑐷𑐟𑐶 𑐏𑑅 𑑋 𑐀𑐩𑐾𑐬𑐶𑐎𑐵, 𑐬𑐸𑐳, 𑐧𑐾𑐮𑐵𑐫𑐟, 𑐦𑑂𑐬𑐵𑐣𑑂𑐳, 𑐄𑐟𑑂𑐟𑐬 𑐎𑑀𑐬𑐶𑐫𑐵 𑐢𑐵𑑅𑐳𑐵 𑐁𑑅𑐟𑐎 𑐣𑑄 𑐠𑑂𑐰 𑐣𑐷𑐟𑐶 𑐡𑐸𑐣𑐾 𑐰𑑅𑐐𑐸 𑐩𑐡𑐸𑐣𑐶𑐳𑐵 𑐥𑐵𑐎𑐶𑐳𑑂𑐟𑐵𑐣 𑐰 𑐂𑐖𑐬𑐵𑐫𑐮 𑐢𑐵𑑅𑐳𑐵 𑐠𑑂𑐰 𑐣𑐷𑐟𑐶𑐂 𑐀𑐳𑑂𑐥𑐲𑑂𑐚 𑐴𑐾 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐶𑐱𑑂𑐰𑐫𑐵 𑐣𑐶𑑄𑐟𑐶𑑄 𑐏𑐟𑐬𑐵

𑐠𑑁𑑄𑐎𑐣𑑂𑐴𑐫𑑂 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑐫𑐵𑐟 𑐎𑐫𑐵𑑅 𑐩𑐹𑐏𑑂𑐫 𑐔𑐶𑐣𑑂𑐟𑐵 𑐢𑐫𑐵𑐐𑐸 𑐥𑐱𑑂𑐔𑐶𑐩𑐷 𑐡𑐾𑐫𑑂𑐟𑐫𑑂𑐳𑑄 𑐣𑑀 𑐦𑐳𑑂𑐬𑑂𑐚 𑐫𑐸𑐖 𑐣𑐷𑐟𑐶𑐫𑐵𑐟 𑐣𑐵𑐮𑐵𑐩𑐔𑑂𑐰𑑄𑐐𑐸𑐮𑐶𑑄 𑐏𑑅 𑑋 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐫𑐎𑑂𑐰 𑐡𑐸 𑐰𑐵 𑐩𑑂𑐴𑑀 𑐡𑐸 𑐢𑐫𑐵𑐐𑐸 𑐏𑑄 𑐕𑐸𑑄 𑐥𑐵𑐎𑐷 𑐩𑐏𑐸 𑑋 𑐩𑐸𑐏𑑂𑐫 𑐏𑑃 𑐠𑐸𑐎𑐶𑐫𑐵𑐟 𑐕𑑂𑐫𑐮𑐷𑐐𑐸 𑐣𑐷𑐟𑐶𑐫𑐵 𑐏𑑅 𑑋 𑐕𑐵𑐫𑑂𑐢𑐵𑑅𑐳𑐵𑑄 𑐥𑐬𑐩𑐵𑐞𑐸 𑐴𑐟𑐶𑐫𑐵𑐬 𑐕𑐐𑐹 𑐴𑐾 𑐰𑐶𑐣𑐵𑐱𑐫𑐵 𑐣𑐶𑑄𑐟𑐶𑑄 𑐎𑐸𑐐𑐵𑑅, 𑐄𑐎𑐶𑑄 𑐴𑐟𑐶𑐫𑐵𑐬𑐫𑐵 𑐮𑑂𑐫𑐵𑑅 𑐄𑐮𑐶 𑐩𑐴𑐟𑑂𑐰𑐥𑐹𑐬𑑂𑐞 𑐩𑐏𑐸, 𑐩𑐴𑐟𑑂𑐰𑐥𑐹𑐬𑑂𑐞 𑐠𑑂𑐰 𑐴𑐟𑐶𑐫𑐵𑐬 𑐕𑑂𑐫𑐮𑐾𑐐𑐸 𑐣𑐷𑐟𑐶𑐫𑐵 𑐏𑑅 𑑋

𑐥𑐬𑐩𑐵𑐞𑐸 𑐴𑐟𑐶𑐫𑐵𑐬𑐫𑐵𑐟 𑐰𑐾𑐥𑐾𑐣𑑂𑐳 𑐀𑐦 𑐜𑐾𑐚𑐬𑐾𑐣𑑂𑐳 𑐢𑐵𑑅𑐳𑐵𑑄 𑐰𑐶𑐱𑑂𑐰𑐫𑐵 𑐣𑐶𑑄𑐟𑐶𑑄 𑐢𑐵𑑅𑐳𑐵 𑐏𑐟𑐬𑐵𑐫𑐵 𑐴𑐾 𑐡𑐸𑐐𑐸 𑐰𑐶𑐖𑑂𑐘𑐟𑐫𑑂 𑐢𑐵𑐥𑐸 𑐡𑐸 𑑋 𑐖𑐵𑐥𑐵𑐣 𑐣𑐾𑐟𑐵 𑐰 𑐴𑐶𑐬𑑀𑐱𑐶𑐩𑐵𑐫𑐵 𑐐𑐨𑐬𑑂𑐣𑐬 𑐴𑐶𑐡𑐾𑐫𑐶𑐎𑑀 𑐫𑐸𑐖𑐵𑐎𑐷𑑄 𑐠𑑅𑐐𑐸 𑐕𑐐𑐹 𑐮𑐾𑐏 ‘𑐊 𑐩𑐾𑐳𑐾𑐖 𑐦𑑂𑐬𑐩 𑐴𑐶𑐬𑑀𑐱𑐶𑐩𑐵 𑐀𑐣 𑐡 𑐬𑐶𑐫𑐵𑐮𑐶𑐚𑐷 𑐀𑐦 𑐊𑐚𑑀𑐩𑐶𑐎 𑐧𑐩𑑂𑐧𑐶𑐒’𑐫𑑂 𑐠𑑂𑐰 𑐀𑐥𑑂𑐬𑐱𑐵𑑄𑐐𑐶𑐎 𑐖𑐸𑐂𑐢𑐸𑑄𑐎𑐹𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑑅𑐫𑐵 𑐎𑐠𑑄 𑐠𑑂𑐰 𑐳𑐶𑐡𑑂𑐢𑐵𑐣𑑂𑐟 𑐀𑐩𑐾𑐬𑐶𑐎𑐵 𑐰 𑐳𑑀𑐨𑐶𑐫𑐟 𑐳𑑄𑐑 𑐡𑐠𑐸𑐂 𑐖𑐸𑐫𑐵𑐔𑑂𑐰𑑄𑐐𑐸 𑐱𑐷𑐟𑐫𑐸𑐡𑑂𑐢𑐫𑐵 𑐃𑐫𑐵 𑐏𑑅 𑑋 𑐠𑑂𑐰 𑐳𑐶𑐡𑑂𑐢𑐵𑐣𑑂𑐟 𑐥𑐹𑐰𑑄𑐎 𑐀𑐣𑐶𑐱𑑂𑐔𑐶𑐟 𑐥𑐹𑐬𑑂𑐰𑐵𑐣𑐸𑐩𑐵𑐣𑐫𑑂 𑐁𑐢𑐵𑐬𑐶𑐟 𑐏𑑅 𑑋 𑐰𑐬𑑂𑐟𑐩𑐵𑐣 𑐀𑐰𑐳𑑂𑐠𑐵𑐫𑑂 𑐰𑐶𑐎𑐳𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐣𑑂𑐴𑐹𑐐𑐸 𑐥𑑂𑐬𑐰𑐶𑐢𑐶 𑐰 𑐨𑑁𑐐𑑀𑐎𑐶𑐮 𑐬𑐵𑐖𑐣𑐷𑐟𑐶𑐎 𑐥𑐬𑐶𑐳𑑂𑐠𑐶𑐟𑐶𑐫𑐵𑐟 𑐳𑑂𑐰𑐫𑐾𑐧𑐮𑐫𑑂 𑐣𑑂𑐫𑐹𑐎𑑂𑐮𑐶𑐫𑐬 𑐜𑐾𑐚𑐬𑐾𑐣𑑂𑐳𑐫𑐵 𑐳𑐶𑐡𑑂𑐢𑐵𑐣𑑂𑐟𑑄 𑐨𑐰𑐶𑐲𑑂𑐫𑐫𑑂 𑐥𑐬𑐩𑐵𑐞𑐸 𑐫𑐸𑐡𑑂𑐢 𑐖𑐸𑐂𑐩𑐏𑐸 𑐢𑐫𑐵𑐐𑐸 𑐢𑐵𑐫𑐾𑐦𑐂𑐩𑐏𑐸 𑑋

𑐀𑐠𑐾𑐴𑐾 𑐧𑐾𑐮𑐵𑐫𑐟𑐷 𑐠𑐶𑑄𑐎 𑐚𑑂𑐫𑐵𑑄𑐎 𑐂𑐣𑑂𑐚𑐬𑐣𑐾𑐱𑐣𑐮 𑐂𑐣𑑂𑐲𑑂𑐚𑐶𑐔𑑂𑐫𑐹𑐚 𑐦𑐬 𑐳𑑂𑐚𑐾«𑐚𑐾𑐖𑐶𑐎 𑐳𑑂𑐚𑐜𑐷𑐖𑑄 𑐥𑐶𑐴𑐵𑑄𑐰𑑅𑐐𑐸 𑐕𑐐𑐹 𑐬𑐶𑐥𑑀𑐬𑑂𑐚𑐫𑑂 𑐣𑑄 𑐳𑐣𑑂 𑑒𑑐𑑑𑑙 𑐫𑐵 𑐦𑐾𑐧𑑂𑐬𑐸𑐀𑐬𑐷𑐂 𑐥𑐸𑐮𑐰𑐵𑐩𑐵𑐫𑑂 𑐖𑐹𑐐𑐸 𑐁𑐎𑑂𑐬𑐩𑐞 𑐮𑐶𑐥𑐵 𑐨𑐵𑐬𑐟 𑐰 𑐥𑐵𑐎𑐶𑐳𑑂𑐟𑐵𑐣 𑐡𑐠𑐸𑐫𑐵 𑐟𑐣𑐵𑐰 𑐐𑐸𑐐𑐸 𑐳𑑂𑐟𑐬𑐫𑑂 𑐠𑑂𑐫𑐣 𑐰 𑐳𑑂𑐰𑐫𑐾𑐧𑐮𑑂 𑐣𑐶𑐐𑐹 𑐡𑐾𑐫𑑂 𑐡𑐠𑐸𑐂 𑐥𑐬𑐩𑐵𑐞𑐸 𑐫𑐸𑐡𑑂𑐢 𑐩𑐖𑐸𑐂 𑐢𑐵𑐫𑐾𑐦𑐂𑐩𑐏𑐸 𑐢𑐎𑐵𑑅 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐧𑐶𑐧𑐶𑐳𑐷

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS