𑐣𑑂𑐴𑐵𑐥𑐵𑑄𑐐𑐸 𑐄𑐡𑐵𑐫𑑂 𑐦𑐸𑐜 𑐦𑐾𑐳𑑂𑐚𑐶𑐨𑐮
𑐫𑐾𑑃 – 𑐄𑐡𑐵𑐫𑑂 𑐳𑐩𑐵𑐖𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐄𑐡𑐵𑐫𑑂 𑐦𑐸𑐜 𑐦𑐾𑐳𑑂𑐚𑐶𑐨𑐮 𑐰𑑄𑐐𑐸 𑐱𑐣𑐶𑐰𑐵𑑅 𑐖𑐸𑐮 𑑋 𑐠𑐣𑐫𑐵 𑐱𑐵𑐣𑑂𑐟𑐶 𑐣𑐶𑐎𑐸𑐘𑑂𑐖 𑐩𑐵.𑐰𑐶.𑐫𑐵 𑐥𑑂𑐬𑐵𑑄𑐐𑐞𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐄𑐡𑐵𑐫 𑐳𑐩𑐵𑐖𑐫𑐵 𑐣𑐵𑐫𑑅 𑐜𑐵. 𑐬𑐸𑐥𑐖𑑂𑐫𑑀𑐟𑐶 𑐎𑐳𑐵𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋𑐁𑐥𑐵𑐮𑑄 𑐄𑐡𑐵𑐳𑐟𑐫𑑂 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐦𑐾𑐳𑑂𑐚𑐶𑐨𑐮𑐫𑑂 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐨𑐷𑐩 𑐟𑐸𑐮𑐵𑐢𑐬, 𑐥𑐰𑐶𑐟𑑂𑐬 𑐎𑐳𑐵𑑅,𑐳𑐮𑐶𑐮𑐳𑐸𑐣𑑂𑐡𑐬 𑐟𑐸𑐮𑐵𑐢𑐬, 𑐬𑐵𑐖𑐸 𑐳𑐶𑐏𑑂𑐬𑐵𑐎𑐵𑐬, 𑐬𑑀𑐱𑐣𑐵 𑐟𑐸𑐮𑐵𑐢𑐬, 𑐳𑐸𑐩𑐶𑐫𑐵 𑐳𑑂𑐠𑐵𑐥𑐶𑐟, 𑐮𑐶𑐬𑐶𑐱𑐵 𑐟𑐸𑐮𑐵𑐢𑐬 𑐰 𑐰𑐶𑐢𑐵𑐣 𑐟𑐸𑐮𑐵𑐢𑐬𑑄 𑐩𑑂𑐫𑐾𑑃 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑑀𑐜𑐬𑑂𑐣 𑐣𑐾𑐰𑐵𑑅 𑐂𑑄𑐐𑑂𑐮𑐶𑐱 𑐳𑑂𑐎𑐸𑐮𑐫𑐵 𑐩𑐳𑑂𑐟𑐫𑑂𑐳𑑄 𑐩𑑄𑐎𑐵𑑅 𑐩𑐔𑐵 𑐴𑐸𑐮𑐵𑐥𑑂𑐫𑐵𑐏𑑄 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋
𑐦𑐾𑐳𑑂𑐚𑐶𑐨𑐮𑐫𑑂 𑐠𑐷𑐠𑐷 𑐣𑐾𑐰𑐵𑑅 𑐣𑐳𑐵𑐖𑑂𑐰𑐮𑑄𑐫𑐵 𑐥𑐬𑐶𑐎𑐵𑐬𑐫𑐵 𑐳𑐰𑐵𑑅 𑐧𑐷𑐐𑐸 𑐮𑑂𑐫𑐵𑐏𑑄 𑐳𑑂𑐚𑐮𑐫𑐵 𑐣𑑄 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅𑐫𑐵𑐟 𑐠𑐥 𑐩𑐣𑑀𑐬𑐘𑑂𑐖𑐣 𑐧𑐷𑐎𑐠𑑄 𑐑𑑅𑐔𑐵𑑅 𑐧𑑂𑐰𑐵𑐎𑐾𑐐𑐸, 𑐢𑐩𑑂𑐥 𑐟𑐕𑑂𑐫𑐵𑐫𑐾𑐐𑐸, 𑐩𑐩𑑅 𑐣𑐫𑐾𑐐𑐸 𑐰 𑐨𑐮𑐶𑐧𑐮 𑐩𑑂𑐴𑐶𑐟𑐾𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐎𑐵𑐳𑐵 𑐣𑑄 𑐖𑐹𑐐𑐸 𑐏𑑅 𑑋
𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐠𑑅𑐠𑑅𑐐𑐸 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐥𑐶𑑄 𑐎𑐮𑐵𑐎𑐵𑐬𑐣𑐵𑐥𑑄 𑐠𑐷𑐠𑐷 𑐎𑐵𑐳𑐵𑐫𑑂 𑐧𑑂𑐰𑐟𑐶 𑐎𑐫𑐵𑑅 𑐟𑑂𑐫𑐵𑐎𑐵𑐡𑐷𑐥𑐶𑑄𑐟 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐎𑐖𑐶 𑐜𑐵. 𑐖𑑂𑐘𑐵𑐣𑐾𑐣𑑂𑐡𑑂𑐬𑐬𑐟𑑂𑐣 𑐟𑐸𑐮𑐵𑐢𑐬𑑄 𑐩𑐟𑐶𑐣𑐵𑐫𑐵 𑐔𑐶𑑄 𑐰 𑐦𑐾𑐳𑑂𑐚𑐶𑐨𑐮𑐫𑐵 𑐎𑐖𑐶 𑐄𑐡𑐫𑐬𑐟𑑂𑐣 𑐎𑐳𑐵𑐮𑑄 𑐮𑐸𑐏𑐵 𑐳𑐶𑐬𑐥𑐵𑑅 𑐟𑑂𑐫𑐵𑐎𑐵𑐡𑐷𑐥𑐶𑑄𑐟 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐩𑐵𑐖𑐫𑐵 𑐕𑑂𑐫𑐵𑑄𑐖𑐾 𑐳𑑂𑐰𑐫𑐩𑑂𑐨𑐹𑐬𑐟𑑂𑐣 𑐟𑐸𑐮𑐵𑐢𑐬𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS