Read news in NepalBhasa text-- www.hamroschool.com BACK 𑐫𑐮 𑐩𑐴𑐵𑐣𑐐𑐬𑐫𑐵𑐟 𑐦𑑀𑐐 𑐩𑐾𑐱𑐶𑐣 𑐐𑑂𑐰𑐵𑐴𑐵𑐮𑐶 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐮 𑐩𑐴𑐵𑐣𑐐𑐬𑐫𑐵𑐟 𑐦𑑀𑐐 𑐩𑐾𑐱𑐶𑐣 𑐐𑑂𑐰𑐵𑐴𑐵𑐮𑐶

𑐫𑐮- 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵𑐟 𑐀𑐟𑑂𑐫𑐵𑐢𑐸𑐣𑐶𑐎 𑐦𑑀𑐐 𑐩𑐾𑐱𑐶𑐣 𑐐𑑂𑐰𑐵𑐴𑐵𑐮𑐶 𑐧𑐶𑐄𑐐𑐸 𑐡𑐸 𑑋 𑐫𑐮 𑐩𑐴𑐵𑐣𑐐𑐬𑐫𑐵𑐟 𑐥𑑂𑐮𑐾𑐂𑐒 𑐦𑐬 𑐔𑐾𑐘𑑂𑐖 𑐣𑐾𑐥𑐵𑐮 𑐦𑐵𑐄𑐞𑑂𑐜𑐾𑐳𑐣𑑄 𑐀𑐟𑑂𑐫𑐵𑐢𑐸𑐣𑐶𑐎 𑐦𑑀𑐐 𑐩𑐾𑐱𑐶𑐣 𑐣𑐶𑐐𑑅 𑐐𑑂𑐰𑐵𑐴𑐵𑐮𑐶𑐎𑐠𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋
𑐫𑐮 𑐩𑐣𑐥𑐵𑐥𑐵𑐏𑐾𑑄 𑐳𑑄𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐣𑐶𑐐𑐹 𑐁𑐂𑐳𑑀𑐮𑐾𑐳𑐣 𑐳𑐾𑐣𑑂𑐚𑐬𑐫𑐵 𑐣𑐶𑑄𑐟𑐶𑑄 𑐦𑐵𑐄𑐞𑑂𑐜𑐾𑐳𑐣𑑄 𑐄𑐐𑐸 𑐩𑐾𑐱𑐶𑐣 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐏𑑅 𑑋 𑐩𑐾𑐱𑐶𑐣 𑐮𑑅𑐮𑑂𑐴𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐮𑐶𑐥𑐵 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐎𑑀𑐬𑑀𑐣𑐵

𑐳𑑄𑐎𑑂𑐬𑐩𑐞𑐫𑐵 𑐎𑐵𑐬𑐞𑑄 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐩𑐴𑐵𑐩𑐵𑐬𑐷𑐫𑐵 𑐠𑐸𑐐𑐸 𑐂𑐮𑐫𑑂 𑐩𑐴𑐵𑐣𑐐𑐬𑐫𑐵 𑐖𑑂𑐫𑐵𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐎𑐠𑑄 𑐴𑑁𑐳𑐮𑐵 𑐧𑐶𑐫𑐵𑐡𑐷𑐐𑐸𑐮𑐶𑑄 𑐳𑐸𑐨𑐵𑐫𑑂 𑐡𑐾𑐕𑐵𑐳𑐾 𑐩𑐴𑐵𑐣𑐐𑐬𑐫𑐵𑐟 𑐥𑑂𑐬𑐵𑐥𑑂𑐟 𑐦𑑀𑐐 𑐩𑐾𑐱𑐶𑐣𑐥𑐵𑐏𑐾𑑄 𑐎𑑀𑐬𑑀𑐣𑐵 𑐣𑐶𑑅𑐳𑑄𑐎𑑂𑐬𑐩𑐞 𑐫𑐵𑐫𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋

𑐮𑐶𑐳𑐾𑑄 𑐰𑐫𑑂𑐎𑐮𑑄 𑐫𑐮 𑐩𑐴𑐵𑐣𑐐𑐬 𑐡𑐸𑐣𑐾 𑐖𑐎 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑐵 𑐎𑐵𑐬𑐞𑑄 𑐁𑐟𑐎 𑑑𑑑𑑙 𑐩𑑂𑐴 𑐳𑐷𑐢𑐸𑑄𑐎𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐥𑐵𑐏𑐾𑑄 𑐳𑐷𑐥𑐶𑑄, 𑐄𑐥𑐔𑐵𑐬 𑐖𑐸𑐫𑐵𑐔𑑂𑐰𑑄𑐥𑐶𑑄 𑐰 𑐁𑐂𑐳𑑀𑐮𑐾𑐳𑐣𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄𑐟 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶𑐫𑐵 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐐𑐸 𑐰 𑐁m 𑐠𑐸𑐎𑐶𑐫𑐵𑐟 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐩𑐵𑐥𑐡𑐞𑑂𑐜 𑐡𑐫𑐾𑐎𑐵𑑅 𑐫𑐵𑐎𑐣𑑄 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋

𑐦𑐵𑐄𑐞𑑂𑐜𑐾𑐳𑐣𑐫𑐵 𑐀𑐢𑑂𑐫𑐎𑑂𑐲 𑐃𑐱𑑂𑐰𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐩𑐴𑐵𑐩𑐵𑐬𑐷𑐫𑐵 𑐂𑐮𑐫𑑂 𑐁𑐂𑐳𑑀𑐮𑐾𑐳𑐣 𑐩𑐡𑐫𑐵𑑅 𑐳𑑄𑐎𑑂𑐬𑐩𑐶𑐟𑐟𑐫𑑂𑐳𑑄 𑐦𑐫𑐾 𑐩𑐵𑐮𑐵𑐔𑑂𑐰𑑄𑐐𑐸𑑂 𑐳𑐩𑐳𑑂𑐫𑐵𑐫𑐵𑐟 𑐢𑑂𑐫𑐵𑐣𑐫𑑂 𑐟𑐫𑐵𑑅 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐁𑐂𑐳𑑀𑐮𑐾𑐳𑐣 𑐳𑑄𑐔𑐵𑐮𑐣 𑐫𑐵𑐣𑐵𑑅 𑐔𑑂𑐰𑐕𑐵𑐫𑐾𑐧𑐴𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐰 𑐄𑐎𑐷 𑐠𑑅𑐥𑐶𑑄𑐳𑑄 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾 𑐏𑑄𑐐𑐸𑐮𑐶𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐳𑑄𑐳𑑂𑐠𑐵𑐫𑐵 𑐳𑐮𑑂𑐮𑐵𑐴𑐎𑐵𑐬 𑐰𑐶𑐳𑐣𑑂𑐟𑐬 𑐱𑐵𑐎𑑂𑐫𑑄 𑐠𑐸𑐎𑐠𑑄𑐫𑐵 𑐩𑐾𑐱𑐶𑐣 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑑑𑑖 𑐰𑐜𑐵𑐫𑐵𑐟 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐢𑐸𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞 𑐥𑐣𑐾𑐟 𑐳𑑂𑐫𑐵𑐣𑐶𑐚𑐵𑐂𑐖 𑐫𑐵𑐫𑐾𑐩𑐵𑑅𑐐𑐸 𑐀𑐟𑐶𑐎𑑄 𑐁𑐰𑐱𑑂𑐫𑐎 𑐖𑐹 𑐢𑐵𑐳𑐾𑑄 𑐔𑐷𑐣𑐫𑑂 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐠𑐸𑐎𑐠𑑄𑐫𑐵 𑐩𑐾𑐱𑐶𑐣 𑐣𑑂𑐴𑐵𑐥𑐵𑑄𑐏𑐸𑐳𑐷 𑐣𑐾𑐥𑐵𑐮𑐫𑑂 𑐳𑑂𑐫𑐵𑐣𑐶𑐚𑐵𑐂𑐖 𑐫𑐵𑐫𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾 𑐏𑑄𑐐𑐸𑐮𑐶𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐦𑐵𑐄𑐞𑑂𑐜𑐾𑐳𑐣𑐥𑐵𑐏𑐾𑑄 𑐥𑑂𑐬𑐵𑐥𑑂𑐟 𑐄𑐐𑐸 𑐩𑐾𑐱𑐶𑐣 𑐖𑑂𑐫𑐵𑐥𑐸 𑐳𑐩𑐵𑐖𑐫𑐵 𑐰𑐺𑐡𑑂𑐢𑐵𑐱𑑂𑐬𑐩 𑐰 𑐏𑑂𑐰𑐣𑐵𑐫𑑂 𑐳𑑄𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐁𑐂𑐳𑑀𑐮𑐾𑐳𑐣 𑐎𑐾𑐣𑑂𑐡𑑂𑐬𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS