Read news in NepalBhasa text-- www.hamroschool.com BACK 𑐔𑐶𑐟𑑂𑐟𑐢𑐬𑐮𑐶𑐳𑐾 𑐕𑐗𑐵𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐔𑐶𑐟𑑂𑐟𑐢𑐬𑐮𑐶𑐳𑐾 𑐕𑐗𑐵𑑅

𑐳𑐬𑑂𑐰𑐖𑑂𑐘 𑐬𑐟𑑂𑐣 𑐟𑐸𑐮𑐵𑐢𑐬

𑐣𑐾.𑐳𑑄. 𑑑𑑐𑑙𑑙 𑐔𑐅𑐮𑐵𑐐𑐵 𑑑𑑔 𑐧𑐸𑐡𑑂𑐢𑐰𑐵𑑅, 25 April 1979 (𑑒𑑐𑑓𑑖÷𑑑÷𑑑𑑒)

𑐩𑑂𑐴𑐶𑐐𑑅 𑐣𑐵𑐟𑐶𑐡𑐵𑐂 (𑐣𑐵𑐟𑐶 𑐧𑐖𑑂𑐬 𑐧𑐖𑑂𑐬𑐵𑐔𑐵𑐬𑑂𑐫) 𑐫𑐵𑐎𑐾 𑐃 𑐎𑐫𑐵 𑐠𑐾𑑄 𑐖𑐶𑐥𑐶𑑄 𑑑𑑐𑑅𑑓𑑐 𑐟𑐵𑑅 𑐂𑐮𑐫𑑂 𑐣𑐵𑐟𑐶𑐡𑐵𑐂𑐫𑐵 𑐕𑐾𑑃𑐫𑑂 𑐡𑐐𑐸𑐧𑐴𑐵𑐮𑐫𑑂 𑐣𑐵𑐥𑐮𑐵𑑅 𑐰𑐣𑐵 𑑋 𑐣𑐵𑐟𑐶𑐡𑐵𑐂𑐫𑐵 𑐨𑐔𑐵 𑐩𑑂𑐴 𑐳𑐸𑐏 𑐩𑐡𑐸 𑐢𑐎𑐵𑑅 𑐫𑐖𑑂𑐘𑐮𑐵𑐮𑐡𑐵𑐂 (𑐨𑑀𑐟𑐵𑐴𑐶𑐟𑐶𑐂 𑐔𑑂𑐰𑑄𑐩𑑂𑐴 𑐎𑐩𑑂𑐥𑐵𑐄𑐣𑑂𑐜𑐬 𑐜𑐵𑐎𑑂𑐚𑐬) 𑐫𑐵𑐠𑐵𑐫 𑐎𑑂𑐫𑑄 𑐗𑐵𑐫𑐵𑐔𑑂𑐰𑐣 𑐢𑐫𑐵𑐴𑐮 𑑋 𑐎𑐵 𑐠𑑂𑐰 𑐨𑐶𑑄𑐐𑐸 𑐖𑑂𑐫𑐵𑐫𑑂 𑐮𑐶𑐧𑐵𑐎𑐾 𑐩𑐖𑐶𑐮 𑐢𑐎𑐵𑑅 𑐖𑐶𑐥𑐶𑑄 𑐥𑑂𑐫𑐩𑑂𑐴 𑐖𑐹𑐳𑐵𑑄 (𑐳𑐬𑑂𑐰𑐖𑑂𑐘, 𑐣𑐬𑐾𑐱, 𑐩𑐢𑑂𑐫𑐵𑐣 𑐰 𑐄𑐟𑑂𑐟𑐩) 𑐰𑐣𑐵 𑐕𑑂𑐰𑐫𑐵 𑑋 𑐕𑐾𑑃 𑐳𑐸𑐣𑐵𑑄 𑐣𑑄 𑐳𑑂𑐫𑐹𑐐𑐸 𑐩𑐏𑐸 𑑋 𑐟𑐸𑑄𑐕𑐾𑑃 𑐐𑐮𑑂𑐮𑐶𑐂 𑐢𑐵𑑅𑐐𑐸 𑐣𑑂𑐫𑐣𑐵𑐟𑐫𑐵𑐐𑐸 𑑋 𑐖𑐶𑐥𑐶𑑄 𑐟𑐸𑑄𑐕𑐾𑑃 𑐐𑐮𑑂𑐮𑐶𑐂 𑐠𑑂𑐫𑐣 𑑋 𑐣𑑂𑐫𑐣𑐾–𑐎𑐣𑐾 𑐫𑐵𑐣𑐵𑑅 𑐳𑐶𑐮 𑐔𑐶𑐔𑐢𑐬 ‘𑐴𑐺𑐡𑐫’𑐫𑐵 𑐕𑐾𑑃 𑐬𑐎𑑂𑐟𑐎𑐵𑐮𑐶𑑄 𑐥𑐔𑑂𑐕𑐶𑐩 𑐳𑑂𑐰𑐫𑐵𑑅 𑐟𑐥𑑂𑐫𑑄𑐎 𑐰𑐣𑐵 𑐎𑐠𑑄 𑐟𑐸𑑄𑐕𑐾𑑃 𑐐𑐮𑑂𑐮𑐶𑐂 𑐰𑐣𑐾𑐐𑐸 𑐖𑐰 𑐎𑐸𑐣𑐫𑑂 𑐔𑑂𑐰𑑄𑐐𑐸 𑐏𑐣𑐷 𑑋 𑐖𑐶𑐩𑐶𑐳𑑄 𑐕𑐾𑑃 𑐠𑑂𑐰 𑐴𑐾 𑐏𑑅 𑐢𑐫𑐵𑐐𑐸 𑐳𑐶𑐂𑐰𑑄 𑐕𑐾𑑃𑐫𑑂 𑐳𑑅 𑐧𑐶𑐫𑐵𑑅 𑐥𑐶𑐫𑐵𑐔𑑂𑐰𑐣𑐵 𑑋 𑐰𑐫𑑂𑐎𑑅 𑐩𑑂𑐰𑑅𑐮𑑂𑐴𑐸𑐫𑐵 𑐔𑑂𑐰𑐣𑐵𑐡𑐶𑐮 𑐢𑐵𑑅𑐐𑐸𑐮𑐶 𑐖𑐶Þ𑑄𑐥𑐶𑑄 𑐨𑐔𑐵 𑐥𑐶𑐫𑐵 𑐔𑑂𑐰𑐣𑐾𑐩𑐵𑐮 𑑋 𑐕𑐩𑑂𑐴 𑐨𑐵𑐖𑐸 𑐖𑐶𑐩𑐶𑐐𑐸 𑐣𑑂𑐴𑑂𑐫𑑅𑐣𑐾 𑐡𑑄 𑐗𑐵𑐮 𑑋 𑐳𑐸 𑐮𑐵𑐟 𑐖𑐶𑐩𑐶𑐳𑑄 𑐰𑐫𑑂𑐎𑑅𑐫𑐵𑐟 𑐩𑑂𑐴𑐳𑐶𑐎𑐾 𑐩𑐦𑐸𑐟 𑑋 𑐀𑐫𑑂𑐳𑐵𑑄 𑐰𑐫𑐎𑑅 𑐣𑐵𑐥 𑐕𑐟𑑂𑐰𑐵𑑅𑐔𑐵 𑐏𑑃 𑐖𑐸𑐮 𑑋 𑐖𑐶𑐩𑐶𑐐𑐸 𑐥𑐬𑐶𑐔𑐫 𑐖𑐸𑐮 𑑋 𑐖𑐶𑐥𑐶𑑄 𑐀𑐳𑐣𑑄 𑐴𑑅𑐥𑐵𑑅 𑐐𑐸𑐠𑐶 𑐢𑐫𑐵𑐐𑐸 𑐕𑐐𑐹 𑐳𑑄𑐳𑑂𑐠𑐵𑑄 𑐰𑐫𑐵𑐐𑐸, 𑐕𑐾𑑃 𑐩𑐳𑐶𑐫𑐵𑑅 𑐣𑑂𑐫𑐣𑐾𑐎𑐣𑐾 𑐫𑐵𑐣𑐵𑑅 𑐟𑐶𑐣𑐶 𑐳𑐶𑐮 𑐢𑐫𑐵 𑑋 𑐖𑐶𑑄𑐥𑐶𑑄 𑐀𑐳𑐣𑑄 𑐰𑐫𑐵𑐐𑐸 𑐢𑐵𑐫𑐾𑐰𑑄 𑐀𑐣𑐳𑑄 𑐡𑐷𑐩𑑂𑐴 𑐔𑐶𑐟𑑂𑐟𑐢𑐬𑐖𑐸𑐫𑐵 𑐎𑐾𑑃𑐴𑐾 𑐩𑐫𑑂𑐖𑐸 𑐩𑑀𑐟𑐶𑐮𑐎𑑂𑐲𑑂𑐩𑐷 𑐟𑐟𑐵𑑄 𑐣𑑂𑐴𑐶𑐮𑐵𑑅 𑐢𑐫𑐵𑐡𑐶𑐮 𑐀𑐳𑐣𑐫𑑂 𑐔𑑂𑐰𑑄𑐥𑐶𑑄𑐳𑑄 𑐴𑐾 𑐔𑐶𑐟𑑂𑐟𑐢𑐬𑐫𑐵 𑐕𑐾𑑃 𑐩𑐳𑑂𑐫𑐹𑐳𑐵 𑐳𑐸𑐣𑐵𑑄 𑐐𑐫𑑂 𑐫𑐵𑐣𑐵𑑅 𑐳𑐶𑐂 𑐠𑐾𑑄 ?

𑐕𑐾𑑃 𑐥𑐹𑐰𑑄𑐎 𑐴𑐾 𑐣𑐾𑐰𑐵𑑅 𑐥𑐴𑑅 𑐰𑐫𑐵𑑅 𑐥𑐸𑐮𑐵𑑄𑐥𑐶𑑄 𑐮𑑂𑐴𑐵𑐳𑐵 𑐳𑐵𑐴𑐸𑐥𑐶𑐣𑐶 𑐕𑐾𑑃 𑐠𑐾𑑄 𑐔𑑂𑐰𑑄 𑑋 𑐖𑐶𑐥𑐶𑑄 𑐳𑑂𑐰𑐵𑐴𑐵𑐣𑐾𑑄 𑐠𑐴𑐵𑑄 𑐰𑐣𑐵𑑅 𑐔𑐶𑐟𑑂𑐟𑐢𑐬 𑐡𑐵𑐂𑐫𑐵 𑐎𑑂𑐰𑐠𑐵𑐫𑑂 𑐠𑑂𑐫𑐣 𑑋 𑐖𑐶Þ𑐥𑐶𑑄 𑐔𑐶𑐟𑐢𑐬𑐡𑐵𑐂 𑐣𑐵𑐥𑐮𑐵𑑅 𑐰𑐫𑐵𑐐𑐸 𑐎𑐵𑐬𑐞 𑐩𑑀𑐟𑐶𑐮𑐎𑑂𑐲𑑂𑐩𑐷 𑐟𑐟𑐵𑐫𑐵𑐟 𑐎𑐣𑐾 𑐢𑐸𑐣𑐾𑐰𑑄 𑐩𑐾𑐩𑐾𑐐𑐸 𑐏𑑃 𑐣𑑄 𑐧𑐵𑑄𑐮𑐵𑐎 𑐴𑐾 𑐖𑐸𑐫𑐵𑐔𑑂𑐰𑐣 𑑋

𑐏𑑃 𑐮𑑂𑐴𑐵𑐣𑐵𑑅 𑐨𑐔𑐵 𑐖𑐵𑐫𑐾𑐰𑑄 𑐔𑐶𑐟𑑂𑐟𑐢𑐬 𑐡𑐵𑐂 𑐡𑐸𑐴𑐵𑑄 𑐗𑐵𑐮 𑑋 𑐰𑐫𑑂𑐎𑑅 𑐮𑐶𑐳𑐾 𑐳𑐦𑐹 𑐥𑐶𑐠𑐣𑐾𑐐𑐸 𑐏𑑃 𑐖𑐸𑐮 𑑋 𑐰𑐫𑑂𑐎𑑅𑐫𑐵𑐐𑐸 𑐳𑐦𑐹 𑐩𑐢𑑂𑐫𑐾 𑐧𑑂𑐰𑐣𑐾𑐎𑐸𑐠𑐶𑐂 𑐡𑐸𑐠𑑂𑐫𑐵𑐣𑐵𑑅 𑐣𑑄 𑐣𑑂𑐫𑐵𑐫𑐾 𑐩𑐡𑐫𑐵𑐰𑑄𑐐𑐸 𑐳𑐦𑐹 ‘𑐳𑐸𑐐𑐟 𑐳𑑁𑐬𑐨’ 𑐩𑐴𑐵𑐎𑐵𑐰𑑂𑐫 𑐥𑐶𑐎𑐵𑐫𑐾𑐐𑐸 𑐖𑐶𑐩𑐶𑐐𑐸 𑐂𑐔𑑂𑐕𑐵 𑐡𑐸𑐐𑐸 𑐏𑑃 𑐖𑐶𑐩𑐶𑐳𑑄 𑐔𑐶𑐟𑑂𑐟𑐢𑐬 𑐡𑐵𑐂𑐫𑐵𑐟 𑐣𑑂𑐴𑑂𑐫𑐠𑐣𑐵 𑑋 𑐏𑑃 𑐣𑑂𑐫𑐣𑐵𑑅 𑐔𑐶𑐟𑑂𑐟𑐢𑐬 𑐡𑐵𑐂 𑐮𑐫𑐟𑐵𑐫𑐵𑐡𑐶𑐮, 𑐟𑐬 𑐏𑑂𑐰𑐵𑐮𑑄 𑐩𑐾𑐐𑐸 𑐴𑐾 𑐕𑐸𑑄 𑐢𑐫𑐵𑐔𑑂𑐰𑑄 𑐠𑐾𑑄 𑐖𑐶𑐟𑑅 𑐟𑐵𑐮 𑑋

𑐰𑐫𑑂𑐎𑑅 𑐖𑐰𑑅𑐐𑐸 𑐮𑑂𑐴𑐵𑑅 𑐰𑐵𑐫𑐾 𑐩𑐦𑐸𑐳𑐵𑑄 𑐏𑐰𑑅𑐐𑐸 𑐮𑑂𑐴𑐵𑐟𑐶𑑄 𑐔𑑂𑐰𑐫𑐵𑑅 𑐨𑐵𑐲𑐵 𑐳𑐾𑐰𑐵 𑐫𑐵𑐣𑐵 𑐔𑑂𑐰𑐣𑐵𑐡𑐷𑐩𑑂𑐴 𑐏𑑅 𑑋 𑐖𑐶𑑄 𑐩𑐣𑐩𑐣𑑄 𑐰𑐫𑑂𑐎𑑅𑐫𑐵 𑐳𑐸𑐳𑑂𑐰𑐵𑐳𑑂𑐠𑑂𑐫 𑐰 𑐟𑐵𑑅 𑐁𑐫𑐸𑐫𑐵 𑐎𑐵𑐩𑐣𑐵 𑐫𑐵𑐣𑐵 𑐔𑑂𑐰𑐣𑐵 𑑋 (𑐰𑐫𑑂𑐎𑑅𑐫𑐵𑐟 𑐣𑐾.𑐳𑑄. 𑑑𑑐𑑙𑑑 𑐳 𑐎𑐣𑑂𑐫𑐵𑐩𑐣𑑂𑐡𑐶𑐬 𑐴𑐵𑐃 𑐳𑑂𑐎𑐹𑐮𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐎𑐾𑐡𑐵𑐬𑐩𑐵𑐣 𑐣𑑂𑐫𑑁𑐥𑐵𑐣𑐾𑐫𑐵 𑐱𑑀𑐎 𑐳𑐨𑐵𑐫𑑂 𑐣𑑂𑐰𑐰𑐵𑐣𑐵 𑐔𑑂𑐰𑑃𑐔𑑂𑐰𑑄 𑐴𑐾 𑐁𑐔𑐵𑐎𑐵𑐮𑐶𑑄 (𑐥𑐎𑑂𑐲𑐑𑐵𑐟) 𑐐𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋)

𑐰𑐫𑑂𑐎𑑅 𑐎𑑂𑐰𑐠𑐵𑐫𑑂 𑐡𑐸𑐴𑐵𑑄 𑐗𑐵𑐫𑐵𑑅 𑐠𑑅𑐐𑐸 𑐠𑐵𑐳𑐫𑑂 𑐦𑑂𑐫𑐟𑐸𑐟𑐸𑑄 𑐥𑐸𑐮𑐵𑑄𑐐𑐸 𑐥𑑄𑐫𑐵𑐐𑐸 𑐎𑐎𑐷𑐔𑐵 𑐏𑐰 𑐮𑑂𑐴𑐵𑐟𑐶𑑄 𑐖𑑂𑐰𑐣𑐵 𑐠𑑅𑐐𑐸 𑐳𑑃 𑐕𑑂𑐫𑐕𑑂𑐫𑑄 𑐏𑑃 𑐕𑐸𑐣𑐵𑐡𑐶𑐮– 𑐥𑐶𑐎𑐵𑐫𑐾 𑐩𑐵𑑅𑐐𑐸 𑐳𑐦𑐹𑐟 𑐮𑐵 𑐫𑐎𑑂𑐰 𑐡𑐸 𑑋 𑐠𑐠𑐾 𑐢𑐵𑐢𑐵𑑄 𑐮𑑂𑐫𑐹𑐣𑐾 𑐳𑑃 𑐡𑐾𑐥𑐵𑑄 𑐕𑑂𑐫𑐣𑐵 𑐔𑑂𑐰𑐣𑐵𑐡𑐶𑐮 𑑋 𑐟𑐵𑐟𑐵𑐴𑐵𑐎𑑅𑐐𑐸 𑐳𑑃 𑐟𑐸𑐂𑐳𑐾 𑐔𑑂𑐰𑑄𑐐𑐸 𑐡𑐵𑐬𑐶 𑑋 𑐟𑐸𑐫𑐸𑐐𑐸 𑐡𑐵𑐬𑐶 𑐣𑑄 𑐫𑐔𑐸𑐎 𑐥𑐶𑐔𑐸𑐎 𑐕𑑂𑐫𑐣𑐵𑐡𑐶𑐮 𑑋 𑐟𑐵𑐴𑐵𑐎𑑅𑐐𑐸 𑐡𑐵𑐬𑐶 𑐣𑑄 𑐫𑐎𑑂𑐰 𑐴𑐾 𑐎𑑂𑐰𑐫𑑂 𑐴𑐵𑐫𑐵𑐔𑑂𑐰𑐣 𑑋

𑐡𑐵𑐂𑐣𑑄 𑐴𑐵𑐣𑑄 𑐳𑐦𑐹 𑐥𑐶𑐠𑐣𑐾𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐠𑑂𑐰 𑐳𑐦𑐹 (𑐳𑐸𑐐𑐟 𑐳𑑁𑐬𑐨) 𑐥𑐶𑐠𑑃𑐳𑐵𑑄 𑑒𑑕÷– 𑐟𑐎𑐵 𑐟𑐸𑐂 𑐖𑐸𑐂 𑑋 𑑕𑑐𑑐 𑐐𑐹 𑐥𑐶𑐎𑐵𑑅𑐳𑐵𑑄 𑐳𑐔𑑂𑐕𑐶 𑐮𑐵 𑐩𑐶𑐂 𑐎𑐵, 𑐩𑐾𑐐𑐸 𑑔𑑐𑑐 𑐐𑐹 𑐩𑐶𑐂𑐟 𑐥𑑂𑐫𑐡𑑃 𑐣𑑂𑐫𑐵𑐡𑑃 𑐩𑐵𑐮𑐶 𑑋 𑐰 𑐣𑑄 𑐠𑐣 𑐥𑑂𑐬𑐾𑐳𑑄 𑐕𑐸 𑐢𑐵𑐂𑐐𑐸 𑐏𑑅 𑐩𑐳𑑂𑐫𑐹 𑑋

𑐥𑐶𑐎𑐵𑐫𑐾 𑐮𑐵 𑐴𑐠𑐵𑐫𑐾 𑐖𑐸𑐂 𑐢𑐸𑑄𑐎𑐹𑐐𑐸 𑐏𑑅 𑑋 𑐄𑐧𑐮𑐾 𑐎𑐮𑐎𑐟𑑂𑐟𑐵𑐫𑑂 𑐴𑐾 𑐥𑑂𑐬𑐾𑐳𑐟 𑐩𑐵𑐣𑐾 𑐩𑐖𑐹 𑑋 𑐠𑐸𑐐𑐸 𑐳𑐦𑐹𑐫𑐵 𑐦𑑀𑐚𑑀 𑐦𑐸𑐎𑑂𑐎𑐫𑐵 𑐧𑑂𑐮𑐎𑐟 𑐧𑐩𑑂𑐧𑐂𑐫𑐵𑐐𑐸 𑑋 𑐩𑑂𑐴𑐳𑑂𑐫𑐹𑐩𑑂𑐴 𑐕𑐩𑑂𑐴 𑐩𑐣𑐹 𑐣𑐵𑐥𑐮𑐵𑐣𑐵𑑅 𑐟𑐶𑐣𑐶 𑐣𑐶𑐐𑐹 𑐳𑑂𑐰𑑄𑐐𑐹 𑐥𑑂𑐬𑐾𑐳 𑐩𑐶𑐮𑐾 𑐫𑐵𑐣𑐵𑑅 𑐕𑐵𑐥𑐫𑑂 𑐫𑐵𑑅𑐐𑐸 𑐏𑑅 𑑋 𑐠𑐣 𑐗𑐷𑐠𑐵𑐫𑑂 𑐐𑐫𑑂 𑐏𑑅 ? 𑐕𑐸 𑐏𑑅 ? (𑐳𑐸𑐐𑐟 𑐳𑑁𑐬𑐨 𑐩𑐴𑐵𑐎𑐵𑐰𑑂𑐫 𑐣𑐾.𑐳𑑄. 𑑑𑑐𑑖𑑖 𑐳𑑂𑐰𑐵𑑄𑐫𑐵𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐔𑑂𑐰𑐫𑐾 𑐳𑐶𑐢𑑅𑐐𑐸 𑐏𑑅𑐳𑐵, 𑐣𑐾.𑐳𑑄. 𑑑𑑐𑑖𑑙 𑐔𑐄𑐮𑐵𑐐𑐵 𑑓𑑐 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐎𑐸𑐣𑑂𑐴𑐸 𑐳𑐦𑐹 𑐠𑐵𑐫𑑂 𑐳𑐶𑐢𑑅𑐐𑐸, 𑐀𑐮𑐾 𑐣𑐾.𑐳𑑄. 𑑑𑑐𑑖𑑙 𑐳𑑂𑐰𑐵𑑄𑐫𑐵𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐣𑑂𑐴𑐵𑐥𑐵𑑄 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋 𑐄𑐧𑐮𑐾 𑐳𑐦𑐹𑐫𑐵 𑐩𑐹 𑐣𑑂𑐫𑐵𑐟𑐎𑐵 𑐖𑐎 𑐏𑑅 𑑋)

𑐏𑑃𑐫𑐵 𑐏𑑃𑐫𑑂 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐄𑐏𑐸𑐣𑑂𑐴𑐸 𑐳𑑂𑐰𑐵𑑄𑐫𑐵𑐥𑐸𑐣𑑂𑐴𑐶, 𑐩𑑂𑐴𑐥𑐹𑐖𑐵𑐧𑐮𑐫𑑂 𑐥𑐶𑐴𑐵𑑄 𑐰𑑅𑐐𑐹 𑐣𑑂𑐴𑐫𑑂𑐐𑐹 𑐔𑑂𑐫𑐵𑐐𑐹 𑐥𑐟𑑂𑐬𑐶𑐎𑐵 𑐩𑐸𑑄𑐎𑐵𑑅 𑐣𑐵𑐟𑐶𑐧𑐖𑑂𑐬𑑄 𑐎𑐵 𑐠𑐸𑐮𑐶 𑐴𑐾 𑐎𑐵 𑐠𑐸𑐐𑐸𑐳𑐶𑐫𑐵 𑐥𑐟𑑂𑐬𑐶𑐎𑐵 𑐢𑐎𑐵𑑅 𑐧𑐶𑐂 𑐴𑐮 𑑋 𑐖𑐶‌𑑄 𑐣𑑄 𑐥𑐟𑑂𑐬𑐶𑐎𑐵 𑐕𑐐𑐹–𑐕𑐐𑐹 𑐫𑐵𑐣𑐵𑑅 𑐧𑐵𑑄𑐮𑐵𑐎 𑐳𑑂𑐰𑐫𑐵 𑐢𑐎𑐵𑑅 𑐔𑐶𑐟𑑂𑐟𑐢𑐬 𑐡𑐵𑐂𑐣 𑐏𑑃 𑐳𑑂𑐰𑐵𑐎𑐵 𑐫𑑄𑐎𑐵𑐡𑐶𑐮 𑑋 ‘𑐳𑐸𑐐𑐟 𑐳𑑁𑐬𑐨’ 𑐥𑐶𑐎𑐵𑐫𑐾𑐟 𑐖𑐶 𑐠𑐩𑑂𑐴𑑄 𑐴𑐾 𑐳𑑂𑐰𑐎𑑅 𑐳𑑂𑐰𑐎𑑅𑐮𑐵 𑐥𑑂𑐬𑐸𑐦 𑐳𑑂𑐰𑐫𑐵, 𑐐𑐸𑐧𑐮𑐾𑑄 𑐠𑑅 𑐴𑐾 𑐖𑐴𑐵𑐣𑐫𑐵𑐟 𑐧𑑂𑐰𑑄𑐎𑐾 𑐧𑐶𑐫𑐵 (𑐰𑐫𑑂𑐎𑑅𑐫𑐵 𑐖𑐴𑐵𑐣 𑐣𑐾. 𑐳𑑄. 𑑑𑑐𑑘𑑐 𑐳 𑐩𑐡𑐸𑐐𑐸 𑐖𑐸𑐮 𑑋) 𑐐𑐸𑐧𑐮𑐾𑑄 𑐧𑐣𑑂𑐖𑐵𑐟𑐫𑑂𑐟 𑐧𑑂𑐰𑑄𑐎𑐾 𑐧𑐶𑐂𑐐𑐸 𑐳𑐵 𑐐𑐸𑐧𑐮𑐾𑑄 𑐀𑐣 𑐰𑐫𑐵𑐔𑑂𑐰𑑄𑐥𑐶𑑄 𑐳𑐸𑐂𑐟𑑄 𑐧𑑂𑐰𑑄𑐎𑐾 𑐧𑐶𑐂𑐐𑐸, 𑐄𑐩𑐶𑐳𑑄 𑐧𑑂𑐰𑐣𑐷𑐐𑐸 𑐗𑐣 𑐖𑐶𑐄 𑑋 𑐣𑐣 𑐟𑐟 𑐫𑐵𑐣𑐵𑑅 𑐧𑑂𑐰𑐣𑐷𑐐𑐸, 𑐣𑐣 𑐟𑐟 𑐖𑐸𑐂𑐐𑐸 𑐀𑐮𑐾 𑐖𑐶𑑄 𑐁𑐳𑐾 𑐁𑐳𑐾 𑐢𑐎𑐵𑑅 𑐡𑐶𑐎𑐾 𑐧𑐶𑐂𑐐𑐸, 𑐕𑐸 𑐔𑑂𑐰𑐫𑐵𑐟𑑅𑐐𑐸 𑐢𑐎𑐵 𑐠𑐫𑑂𑐎 𑐳𑑂𑐰𑐫𑐾𑐧𑐮𑐫𑑂 𑐠𑑂𑐫𑐵𑐎𑑂𑐎 𑐴𑐾 𑐡𑑂𑐰𑐣𑐵𑐔𑑂𑐰𑑄𑐐𑐸 𑐮𑐸𑐂𑐐𑐸 𑑋 𑐠𑑁𑑄𑐎𑐣𑑂𑐴𑐫𑑂 𑐥𑑂𑐬𑐸𑐦 𑐳𑑂𑐰𑐂𑐥𑐶𑑄 𑐴𑐾 𑐩𑐡𑐸 𑑋’ 𑐰𑐫𑑂𑐎𑐮𑑄 𑐴𑐵𑐎𑐣𑑄 𑐏𑑃 𑐟𑐣𑐵 𑐡𑐶𑐮, ‘𑐡𑐂𑐐𑐸 𑐣𑑄 𑐐𑐣𑑄 ? 𑐴𑐶𑐣𑑂𑐡𑐷 𑐐𑑂𑐬𑐵𑐩𑐬 𑐖𑐎 𑐴𑐾 𑐳𑑂𑐰𑐡𑑃 𑐧𑑂𑐰𑐣𑐾𑐩𑐵𑑅 𑐢𑐵𑑅𑐳𑐵 𑐗𑐷𑐠𑐵𑐫𑑂 𑐖𑐸𑐮𑑄 𑐣 𑐧𑑂𑐰𑑄𑐎𑐵 𑐟𑑅𑐐𑐸 𑐡𑐸 𑐣 𑐧𑑂𑐰𑐣𑐵 𑐴𑐾 𑐟𑑅𑐐𑐸 𑐡𑐸 𑑋’

𑐳𑐸𑐐𑐟 𑐳𑑁𑐬𑐨𑐫𑑂 𑐰𑐫𑑂𑐎𑐮𑑄 ‘𑐡𑑀𑐲 𑐳𑑂𑐰𑐷𑐎𑐵𑐬’ 𑐢𑐎𑐵 𑐠𑐠𑐾 𑐣𑑂𑐴𑑂𑐫𑐠𑐣𑐵 𑐟𑐫𑐵𑐡𑐷𑐐𑐸 𑐡𑐸 – ‘𑐖𑑂𑐫𑐵 𑐫𑐵𑑅𑐥𑐶𑐣𑐶 𑐡𑑂𑐰𑐣𑐷 𑐀𑐰𑐱𑑂𑐫 𑑋 𑐄𑐎𑐶𑑄 𑐠𑑂𑐰 𑐥𑑂𑐬𑐸𑐦 𑐳𑑂𑐰𑐫𑐾𑐐𑐸 𑐨𑐹𑐮𑐫𑐵 𑐳𑐩𑐸𑐡𑑂𑐬𑑄 𑐖𑐶 𑐥𑐵𑐬 𑐰𑐣𑐾 𑐩𑐦𑐸𑐐𑐸𑐮𑐶𑐂 𑐣𑑄 𑐕𑐸𑑄 𑐁𑐱𑑂𑐔𑐬𑑂𑐫 𑐩𑐡𑐸 𑑋 𑐳𑑂𑐰𑐫𑐵, 𑐳𑑂𑐰𑐾𑐟 𑐖𑐶𑑄 𑐳𑐵𑐥 𑐴𑐾 𑐎𑐸𑐟𑑅 𑐫𑐵𑐣𑐵𑑅 𑐳𑑂𑐰𑐫𑐵, 𑐟𑐬 𑐴𑑀 𑐚𑐰𑐩𑐶𑐏𑐵 𑐴𑐾 𑐩𑐏𑐵𑑅 𑐕𑐸 𑐣𑑄 𑐕𑐸𑑄 𑐀𑐰𑐱𑑂𑐫 𑐡𑑂𑐰𑑄𑐎𑐮 𑐖𑑂𑐰𑐷 𑑋’ 𑐠𑐠𑐾 𑐴𑐾 𑐴𑐵𑐎𑐣𑑄 𑐳𑑂𑐰𑐵𑐎𑐵𑐡𑐷 ‘𑐠𑐩𑑄 𑐴𑐾 𑐔𑑂𑐰𑐫𑐵, 𑐠𑐩𑑂𑐴𑑄 𑐴𑐾 𑐥𑑂𑐬𑐸𑐦 𑐳𑑂𑐰𑐫𑐵𑑅 𑐠𑐩𑑂𑐴𑑄 𑐴𑐾 𑐡𑑂𑐰𑑄𑐎𑐵 𑐩𑐾𑐥𑐶𑑄𑐟 𑐡𑑀𑐲 𑐕𑐵𑐫𑑂, 𑐄𑐎𑐶𑑄 𑐰𑐶𑐡𑑂𑐰𑐵𑐣𑐰𑐬𑑂𑐐𑑄 𑐳𑑂𑐰𑐫𑐵𑑅 𑐡𑑀𑐲 𑐧𑐷 𑐩𑐵𑐎𑑂𑐰 𑐖𑐶𑐟𑑅 𑐴𑐾 𑐧𑐶𑐫𑐵𑐡𑐶𑐳𑑃, 𑐴𑐵𑐣𑑄 𑐀𑐳𑐸𑐡𑑂𑐢 𑐠𑐵𑐫𑑂 𑐱𑐸𑐡𑑂𑐢 𑐫𑐵𑐣𑐵𑑅 𑐣𑑄 𑐧𑑂𑐰𑐣𑐵𑐡𑐶𑐳𑑃 𑑋 𑐀𑐠𑐰𑐵 𑐕𑐸𑑄 𑐐𑐸𑐞 𑐡𑑅𑐳𑐵 𑐴𑑃𑐳𑑄 𑐡𑐸𑐬𑐸 𑐮𑑂𑐫𑐫𑐵𑑅 𑐟𑑂𑐰𑐣𑐷 𑐠𑐾𑑄 𑐐𑐸𑐞 𑐡𑐎𑑂𑐰 𑐮𑑂𑐫𑐫𑐵𑑅 𑐡𑑀𑐲 𑐖𑐸𑐎𑑂𑐰 𑐰𑐵𑑄 𑐕𑑂𑐰𑐫𑐵𑐡𑐶𑐳𑑃 𑑋’

𑐀𑑃 𑐕𑐐𑐹 ‘𑐳𑐦𑐹’ 𑐱𑐧𑑂𑐡 𑐳𑐦𑐸𑐮𑐶𑑄/𑐳𑐦𑐸𑐟𑐶𑑄 – 𑐮𑐶𑑄‍/𑐟𑐶𑑄 𑐮𑑀𑐥 𑐖𑐸𑐫𑐵𑑅 𑐳𑐦𑐹 𑐫𑐵 ‘𑐦𑐹’ 𑐡𑐶𑐬𑑂𑐑 𑐖𑐹𑐐𑐸 𑐏𑑅 𑑋 𑐄𑐎𑐶𑑄 𑐳𑐦𑐹𑐫𑐵𑐟 𑐟𑐺𑐟𑐶𑐫𑐵 𑐰 𑐳𑐥𑑂𑐟𑐩𑐶 𑐰𑐶𑐨𑐎𑑂𑐟𑐶𑐂 𑐫𑑄𑐎𑐾𑐧𑐮𑐾 𑐳𑐦𑐸𑐮𑐶𑑄/𑐳𑐦𑐸𑐟𑐶𑑄 𑐰 𑐳𑐦𑐸𑐮𑐶𑐂/𑐳𑐦𑐸𑐟𑐶𑐂 𑐖𑑂𑐰𑐷 𑑋 𑐄𑐎𑐸𑐣𑑂𑐴𑐸 𑐥𑐶𑐴𑐵𑑄𑐰𑑅𑐐𑐸 𑐣𑑂𑐴𑐹𑐐𑐸 𑐥𑐟𑑂𑐬𑐶𑐎𑐵𑐫𑑂 𑐫𑐵𑐄𑑃𑐎 𑐴𑐾 𑐳𑐦𑐸𑐣𑑄 𑐔𑑂𑐰𑐫𑐵𑐟𑐮 𑑋 𑐂𑐮𑐫𑑂 𑐧𑑂𑐫𑐮𑐫𑑂 𑐩𑑀𑐟𑐶𑐟𑐟𑐵𑑄 𑐣𑑄 𑐏𑑅 𑐢𑐎𑐵 𑐕𑑂𑐫𑑄 𑐎𑑂𑐰𑐵𑐣𑐵 𑐔𑑂𑐰𑐣𑐵𑐡𑐶𑐮 𑑋 𑐠𑐣 𑐴𑐵𑐣𑑄 𑐂𑐎𑐵𑐬 𑐖𑐸𑐮𑐎𑐶 𑐴𑑂𑐬𑐳𑑂𑐰 𑐔𑑂𑐰𑐂𑐐𑐸 𑐄𑐎𑐵𑐬 𑐖𑐸𑐮𑐸𑐎𑐶 𑐡𑐶𑐬𑑂𑐑 𑐀𑐠𑐾𑐮𑐵 𑐩𑐏𑐸𑐣𑐶 𑑋 𑐣𑐾𑐥𑐵𑐮𑐨𑐵𑐲𑐵𑐫𑑂 𑐣𑑄 𑐎𑐩𑑂𑐟𑐶 𑐮𑐵 𑐡𑐕𑐶 𑐧𑑂𑐫𑐵𑐎𑐬𑐞 𑐧𑑂𑐰𑐣𑐾𑐐𑐸 𑐡𑐿 𑑋

𑐏𑑃𑐫𑐵 𑐏𑑃𑐫𑑂 𑐳𑐶𑐥𑐹, 𑐳𑐶𑑃𑐐𑑂𑐰𑑅, 𑐴𑐵𑐎𑑅 𑐧𑑂𑐫𑐵, 𑐦𑐵, 𑐦𑐶 𑐁𑐡𑐶 𑐂𑐟𑑂𑐫𑐵𑐡𑐶𑐫𑐵 𑐏𑑃 𑐰𑐮 𑑋 𑐏𑑃𑐮𑑂𑐴𑐵𑐮𑑂𑐴𑐵𑑄 𑐀𑐣𑑂𑐟𑐫𑑂 𑐔𑐶𑐟𑑂𑐟𑐢𑐬 𑐡𑐵𑐂𑐣𑑄 𑐢𑐫𑐵𑐡𑐶𑐮 ‘𑐖𑐶 𑐩𑑂𑐰𑐵𑐟𑐮𑐾 𑐦𑐸𑐳𑐵 𑐖𑐶𑑄 𑐴𑐾 𑐥𑐶𑐎𑐵𑐫𑐾 𑐩𑐏𑐸𑐮𑐵 𑐢𑐿𑐳𑐵 𑐖𑐶 𑐩𑐡𑐫𑐾 𑐢𑐸𑑄𑐎𑐵 𑐫𑑀𑐩𑑂𑐴𑐾𑐳𑑂𑐫𑐵𑑄 …𑐥𑐶𑐎𑐵 𑑋’
𑐟𑑃𑐳𑐵 – 𑐰𑐫𑑂𑐎𑑅 𑐔𑐶𑐟𑑂𑐟𑐢𑐬 ‘𑐴𑐺𑐡𑐫’ 𑐣𑐾.𑐳𑑄. 𑑑𑑑𑑐𑑒 𑐟𑐕𑐮𑐵𑐐𑐵 𑑓 𑐎𑐸𑐣𑑂𑐴𑐸 𑐗𑐷𑐟 𑐟𑑂𑐰𑑅𑐟𑐵𑑅 𑐗𑐵𑐮 𑑋 𑐰𑐫𑑂𑐎𑐮𑑄 𑐐𑐠𑐾 𑐔𑑂𑐰𑐫𑐵 𑐠𑐎𑐹𑐐𑐸 𑐏𑑅 𑐀𑐠𑐾 𑐴𑐾 𑐖𑐸𑐮 𑑋 𑐰𑐫𑑂𑐎𑑅 𑐩𑐡𑐫𑐾 𑐣𑑂𑐴𑑂𑐫𑑅 𑐴𑐾 𑐰𑐫𑑂𑐎𑐮𑑄 𑐠𑑅𑐐𑐸 𑐩𑐣𑐫𑐵 𑐏𑑃 𑐩𑐹 𑐳𑐦𑐹 ‘𑐳𑐸𑐐𑐟 𑐳𑑁𑐬𑐨’𑐫𑑂 𑐠𑐠𑐾 𑐔𑑂𑐰𑐫𑐵𑐠𑐎𑐹𑐐𑐸 𑐖𑐸𑐫𑐵𑐔𑑂𑐰𑐣, 𑐥𑐶𑐎𑐵𑑅𑐩𑑂𑐴– 𑐩𑑀𑐟𑐶 𑐮𑐎𑑂𑐲𑑂𑐩𑐶, 𑐣𑐶𑐎𑑀 𑐏𑐸𑐳𑐷 𑑑𑑑𑑐𑑒 𑑋 𑐰 𑐴𑐾 𑐎𑐠𑑄 𑐠𑑅 𑐳𑐣𑑂𑐟𑐵𑐣 𑐨𑐵𑑅𑐥𑐶𑐫𑐵𑐟𑑅𑐐𑐸 ‘𑐳𑐸𑐐𑐟 𑐳𑑁𑐬𑐨’𑐫𑐵 𑐣𑐶𑐎𑑂𑐰𑑅𑐐𑐸 𑐥𑐶𑐠𑐣𑐵 𑑑𑑑𑑐𑑒 𑐳 𑐩𑑀𑐟𑐶𑐮𑐎𑑂𑐲𑑂𑐩𑐶 𑐥𑐶𑐎𑐵𑑅𑐩𑑂𑐴 𑐖𑐸𑐫𑐵𑑅 𑐗𑐷𑐐𑐸 𑐣𑑂𑐴𑑂𑐫𑑅𑐣𑐾 𑐥𑐶𑐮𑐹𑐰𑐮 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS