Read news in NepalBhasa text-- www.hamroschool.com BACK 𑐂𑐖𑐮𑐵𑐳𑐫𑐵 𑐣𑑂𑐫𑐵𑐫𑐵𑐢𑐷𑐱𑐟 𑐰𑐶𑐰𑐵𑐡𑐫𑑂 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐂𑐖𑐮𑐵𑐳𑐫𑐵 𑐣𑑂𑐫𑐵𑐫𑐵𑐢𑐷𑐱𑐟 𑐰𑐶𑐰𑐵𑐡𑐫𑑂

𑐫𑐾𑑃 – 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐰𑐶𑐑𑐚𑐣 𑐧𑐵𑐬𑐾 𑐳𑐸𑐣𑐸𑐰𑐵𑐃 𑐫𑐵𑐫𑐾𑐟 𑐐𑐛𑐣 𑐖𑐹𑐐𑐸 𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳𑐫𑐵 𑐳𑑄𑐬𑐔𑐣𑐵𑐫𑐵𑐟 𑐎𑐫𑐵𑑅 𑐰𑐶𑐰𑐵𑐡 𑐧𑑂𑐰𑐮𑑄𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐧𑐴𑐳 𑐱𑐸𑐬𑐸 𑐖𑐸𑐂𑐰𑑄 𑐴𑐾 𑐀𑐢𑐶𑐰𑐎𑑂𑐟𑐵 𑐐𑑀𑐰𑐶𑐣𑑂𑐡 𑐧𑐣𑑂𑐡𑐷𑑄 𑐦𑐵𑐐𑐸𑐣 𑑒𑑓 𑐐𑐟𑐾 𑐣𑐾𑐎𑐥𑐵𑐫𑐵𑐟 𑐊𑐩𑐵𑐮𑐾 𑐰 𑐩𑐵𑐌𑐰𑐵𑐡𑐷𑐫𑐵 𑐴𑐾 𑐀𑐰𑐳𑑂𑐠𑐵𑐫𑑂 𑐮𑐶𑐟 𑐕𑑂𑐰𑑅𑐩𑑂𑐴 𑐣𑑂𑐫𑐵𑐫𑐵𑐢𑐷𑐱 𑐧𑐩𑐎𑐸𑐩𑐵𑐬 𑐱𑑂𑐬𑐾𑐲𑑂𑐛 𑐰 𑐄𑐐𑐸 𑐦𑐿𑐳𑐮𑐵𑐫𑐵 𑐥𑐸𑐣𑐬𑐵𑐰𑐾𑐡𑐣 𑐫𑐵𑐎𑐾 𑐩𑐧𑐶𑐄𑐩𑑂𑐴 𑐣𑑂𑐫𑐵𑐫𑐵𑐢𑐷𑐱 𑐟𑐾𑐖𑐧𑐴𑐵𑐡𑐸𑐬 𑐎𑐾𑐳𑐷𑐫𑐵 𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳𑐫𑑂 𑐟𑐫𑐾 𑐩𑐖𑐶𑐄 𑐢𑐂𑐐𑐸 𑐧𑐶𑐔𑐵𑑅 𑐟𑐫𑐵𑐡𑐷𑐰𑑄 𑐠𑑂𑐰 𑐰𑐶𑐰𑐵𑐡 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋
𑐦𑐵𑐐𑐸𑐣 𑑒𑑓 𑐐𑐟𑐾𑐫𑐵 𑐦𑐿𑐳𑐮𑐵 𑐩𑐵𑐐 𑐡𑐵𑐧𑐷 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐖𑐹𑐐𑐸 𑐰 𑐫𑐡𑐶 𑐀𑐠𑐾 𑐩𑐖𑐹𑐐𑐸 𑐏𑑅𑐳𑐵 𑐁𑑅𑐫𑐵 𑐬𑐵𑐖𑐣𑐷𑐟𑐶𑐎 𑐳𑑂𑐠𑐶𑐟𑐶 𑐩𑐖𑐸𑐂𑐐𑐸 𑐏𑐂 𑐢𑐵𑐳𑐾𑑄 𑐀𑐢𑐶𑐰𑐎𑑂𑐟𑐵 𑐧𑐣𑑂𑐡𑐷𑑄 𑐄𑐥𑐶𑑄 𑐣𑐶𑐩𑑂𑐴𑐾𑐳𑐶𑐟 𑐂𑐖𑐮𑐵𑐳𑐫𑑂 𑐟𑐫𑐾 𑐩𑐖𑐶𑐄𑐐𑐸 𑐟𑐬𑑂𑐎 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐧𑐣𑑂𑐡𑐷𑐫𑐵 𑐀𑐖𑑂𑐫𑐵𑑅𑐐𑐸 𑐟𑐬𑑂𑐎 𑐰𑐫𑐾𑐰𑑄 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱 𑐔𑑀𑐮𑐾𑐣𑑂𑐡𑑂𑐬𑐱𑐩𑑂𑐱𑐾𑐬 𑐖𑐧𑐬𑐵𑑄 𑐄𑐐𑐸 𑐦𑐿𑐳𑐮𑐵 𑐰 𑐁𑑅𑐫𑐵 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐰𑐶𑐑𑐚𑐣𑐫𑐵 𑐩𑐸𑐡𑑂𑐡𑐵 𑐡𑐠𑐸𑐂 𑐕𑐸 𑐳𑑂𑐰𑐵𑐥𑐹 𑐡𑐸 𑐢𑐎𑐵𑑅 𑐣𑑂𑐴𑑂𑐫𑐳𑑅 𑐟𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐄𑐐𑐸 𑐦𑐿𑐳𑐮𑐵 𑐥𑐵𑐫𑑂𑐕𑐶 𑐏𑑅 𑐎𑐶 𑐩𑐏𑐸 𑐢𑐎𑐵𑑅 𑐕𑐶𑑄 𑐠𑐣 𑐢𑐵𑐫𑐾 𑐡𑐂𑐩𑐏𑐸, 𑐄𑐐𑐸 𑐩𑐸𑐡𑑂𑐡𑐵𑐣𑐵𑐥 𑐠𑐸𑐐𑐸 𑐩𑐸𑐡𑑂𑐡𑐵𑐫𑐵 𑐕𑐸 𑐳𑑂𑐰𑐵𑐥𑐹 𑐡𑐸 ?’
𑐟𑐬 𑐀𑐢𑐶𑐰𑐎𑑂𑐟𑐵 𑐧𑐣𑑂𑐡𑐷𑑄 𑐢𑐵𑑅𑐳𑐵 𑐱𑑂𑐬𑐾𑐲𑑂𑐛 𑐰 𑐎𑐾𑐳𑐷 𑐧𑐵𑐴𑐾𑐎𑐫𑐵 𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳 𑐐𑐛𑐣 𑐫𑐵𑐫𑐾𑐟 𑐩𑐵𑐐 𑐫𑐵𑐣𑐵𑐡𑐶𑐮 𑑋

𑐄𑐎𑐠𑑄 𑐴𑐾 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐧𑐡𑑂𑐬𑐷𑐧𑐴𑐵𑐡𑐸𑐬 𑐎𑐵𑐬𑑂𑐎𑐷𑑄 𑐣𑑄 𑐁𑑅 𑐣𑑂𑐴𑑂𑐫𑐳𑑅 𑐧𑑂𑐰𑐮𑑄𑐥𑐶𑑄 𑐣𑑂𑐫𑐵𑐫𑐵𑐢𑐷𑐱𑐥𑐶𑑄 𑐠𑑅𑐥𑐶𑑄𑐳𑑄 𑐴𑐾 𑐂𑐖𑐮𑐵𑐳 𑐟𑑂𑐰𑑅𑐟𑐾𑐩𑐵𑑅𑐐𑐸 𑐳𑐸𑐗𑐵𑐰 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐖𑐹𑐐𑐸 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐰𑐶𑐑𑐚𑐣𑐫𑐵 𑐩𑐸𑐡𑑂𑐡𑐵𑐫𑑂 𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳𑐫𑐵 𑐣𑑂𑐫𑐵𑐫𑐵𑐢𑐷𑐱 𑐴𑐬𑐶𑐎𑐺𑐲𑑂𑐞 𑐎𑐵𑐬𑑂𑐎𑐷 𑐂𑐖𑐮𑐵𑐳𑐫𑑂 𑐩𑐔𑑂𑐰𑑄𑐐𑐸 𑐡𑐳𑐸 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱 𑐖𑐧𑐬𑐵𑑄 𑐢𑐵𑑅𑐳𑐵 𑐣𑐾𑐎𑐥𑐵𑐫𑐵 𑐣𑐵𑑄 𑐳𑐩𑑂𑐧𑐣𑑂𑐢𑐷 𑐄𑐐𑐸 𑐩𑐸𑐡𑑂𑐡𑐵 𑐰 𑐁𑑅𑐫𑐵 𑐩𑐸𑐡𑑂𑐡𑐵𑐫𑐵 𑐡𑐠𑐸𑐂 𑐕𑐸 𑐳𑑂𑐰𑐵𑐥𑐹 𑐡𑐸 𑐢𑐎𑐵𑑅 𑐴𑐵𑐣𑑄 𑐟𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐠𑑂𑐰 𑐣𑐶𑐐𑐹 𑐩𑐸𑐡𑑂𑐡𑐵𑐫𑐵 𑐳𑐩𑑂𑐧𑐣𑑂𑐢 𑐕𑐸 𑐏𑑅 ? 𑐄𑐐𑐸 𑐩𑐸𑐡𑑂𑐡𑐵𑑄 𑐟𑐵𑐟𑑂𑐰𑐶𑐎 𑐳𑑂𑐰𑐵𑐥𑐹 𑐟𑐂𑐮𑐵 ? 𑐟𑐵𑐟𑑂𑐰𑐶𑐎 𑐳𑑂𑐰𑐵𑐥𑐹 𑐟𑐂 𑐎𑐶 𑐟𑐂 𑐩𑐏𑐸 ?’

𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱 𑐖𑐧𑐬𑐵𑐫𑐵𑐟 𑐮𑐶𑐳𑑅 𑐧𑐶𑐳𑐾𑑄 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐎𑐵𑐬𑑂𑐎𑐷𑑄 𑐢𑐫𑐵𑐡𑐶𑐮, ‘𑐕𑐩𑑂𑐴𑐾𑐳𑑂𑐫𑐵𑑄 𑐖𑐎 𑐣𑑂𑐴𑑂𑐫𑐳𑑅 𑐠𑑄𑐐𑐸 𑐀𑐰𑐳𑑂𑐠𑐵𑐫𑑂 𑐣𑑄 𑐣𑑂𑐫𑐵𑐫𑐵𑐢𑐷𑐱 𑐠𑑅 𑐴𑐾 𑐂𑐖𑐮𑐵𑐳𑐫𑑂 𑐔𑑂𑐰𑐣𑐾𑐩𑐖𑐶𑐄 𑑋’

𑐮𑐶𑐳𑐮𑐫𑑂 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱 𑐖𑐧𑐬𑐵𑑄 𑐠𑑅 𑐣𑑄 𑐥𑐸𑐣𑐬𑐵𑐰𑐮𑑀𑐎𑐣 𑐩𑐧𑐷𑐐𑐸 𑐂𑐖𑐮𑐵𑐳𑐫𑑂 𑐡𑐸, 𑐄𑐎𑐶𑑄 𑐁𑑅 𑐠𑑅𑐐𑐸 𑐧𑐵𑐬𑐾 𑐣𑑄 𑐣𑑂𑐴𑑂𑐫𑐳𑑅 𑐡𑐣𑐷 𑐎𑐶 𑐡𑐣𑐷 𑐩𑐏𑐸 𑐢𑐎𑐵𑑅 𑐣𑑂𑐫𑐣𑐵𑐡𑐶𑐮 𑑋 𑐄𑐎𑐶𑐫𑐵 𑐮𑐶𑐳𑐮𑐫𑑂 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐎𑐵𑐬𑑂𑐎𑐷𑑄 𑐢𑐫𑐵𑐡𑐶𑐮, ‘𑐠𑑂𑐰 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱 𑐠𑐩𑑂𑐴𑑄 𑐴𑐾 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐏𑑅 𑑋’

𑐰𑐫𑐵𑑄 𑐮𑐶𑐥𑐵 𑐧𑐴𑐳 𑐫𑐵𑐣𑐵𑐡𑐷𑐩𑑂𑐴 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐱𑐩𑑂𑐨𑐸 𑐠𑐵𑐥𑐵𑑄 𑐠𑐸𑐎𑐶𑐫𑐵𑐟 𑐳𑑂𑐥𑐲𑑂𑐚 𑐫𑐵𑐳𑐾𑑄 𑐢𑐫𑐵𑐡𑐶𑐮, ‘𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱𑐫𑐵 𑐴𑐾 𑐀𑐢𑑂𑐫𑐎𑑂𑐲𑐟𑐵𑐫𑑂 𑐐𑐛𑐣 𑐫𑐵𑐫𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸𑐐𑐸𑐮𑐶𑑄 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱𑐫𑐵 𑐴𑐎𑐫𑑂 𑐩𑐾𑐐𑐸 𑐴𑐾 𑐏𑑃 𑐖𑐸𑐮 𑑋’

𑐀𑐢𑐶𑐰𑐎𑑂𑐟𑐵 𑐠𑐵𑐥𑐵𑑄 𑐳𑑂𑐥𑐲𑑂𑐚𑑄 𑐢𑐫𑐵𑐡𑐶𑐮, ‘𑐰𑑄𑐐𑐸 𑐦𑐵𑐐𑐸𑐣 𑑑𑑑 𑐐𑐟𑐾𑐫𑐵 𑐦𑐿𑐳𑐮𑐵𑑄 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐥𑐸𑐣𑐳𑑂𑐬𑑂𑐠𑐵𑐥𑐣𑐵 𑐫𑐵𑐣𑐵𑑅 𑐡𑐮𑐫𑐵𑐟 𑐳𑑄𑐳𑐡 𑐔𑐮𑐾 𑐫𑐵𑐫𑐾𑐟 𑐁𑐡𑐾𑐱 𑐧𑐶𑐄𑐐𑐸 𑐏𑑅𑐳𑐵 𑑒𑑓 𑐐𑐟𑐾𑐫𑐵 𑐦𑐿𑐳𑐮𑐵𑑄 𑐟𑑅𑐢𑑄𑐐𑐸 𑐡𑐮𑐫𑐵𑐟 𑐰𑐶𑐨𑐵𑐖𑐣 𑐫𑐵𑐣𑐵𑐧𑐶𑐄𑐐𑐸 𑐏𑑅 𑑋 𑐣𑑂𑐴𑐵𑐥𑐵 𑐣𑑂𑐫𑐵𑐩𑑂𑐴 𑐣𑑂𑐫𑐵𑐫𑐵𑐢𑐷𑐱𑐫𑐵 𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳𑑄 𑐐𑐸𑐐𑐸 𑐟𑑅𑐢𑑄𑐐𑐸 𑐥𑐵𑐬𑑂𑐚𑐷𑐫𑐵𑐟 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐣𑑂𑐴𑑂𑐫𑐵𑐎𑐶 𑐢𑐎𑐵𑑅 𑐁𑐡𑐾𑐱 𑐧𑐶𑐄𑐐𑐸 𑐏𑑅𑐳𑐵 𑐮𑐶𑐥𑐵𑐫𑐵 𑐦𑐿𑐳𑐮𑐵𑑄 𑐰𑐴𑐾 𑐥𑐵𑐬𑑂𑐚𑐷𑐫𑐵𑐟 𑐰𑐶𑐨𑐵𑐖𑐣 𑐫𑐵𑐣𑐵𑐧𑐶𑐮, 𑐄𑐐𑐸 𑐣𑐶𑐬𑑂𑐞𑐫 𑐳𑐩𑑂𑐩𑐵𑐣𑐶𑐟 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐏𑑅 𑑋’

𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱 𑐖𑐧𑐬𑐵𑑄 𑐄𑐐𑐸 𑐩𑐸𑐡𑑂𑐡𑐵𑐫𑐵𑐟 𑐥𑐸𑐣𑐬𑐵𑐰𑐮𑑀𑐎𑐣 𑐫𑐵𑐎𑐾 𑐩𑐧𑐷𑐐𑐸 𑐂𑐖𑐮𑐵𑐳𑐫𑑂 𑐠𑑅 𑐣𑑄 𑐡𑐸𑐐𑐸 𑐥𑑂𑐬𑐳𑑄𑐐 𑐴𑐵𑐣𑑄 𑐴𑐫𑐾𑐰𑑄 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐠𑐵𑐥𑐵𑑄 𑐄𑐎𑐶𑐫𑐵 𑐣𑑄 𑐰𑐶𑐎𑐮𑑂𑐥 𑐡𑐸 𑐢𑐵𑐳𑐾𑑄 𑐢𑐫𑐵𑐡𑐶𑐮, ‘𑐀𑐠𑐾 𑐏𑑅𑐳𑐵 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐷𑐱 𑐧𑐶𑐡𑐵𑐫𑑂 𑐔𑑂𑐰𑐣𑐵𑐡𑐶𑐳𑑃 𑑋’

𑐳𑐬𑐎𑐵𑐬𑐫𑐵 𑐥𑑂𑐬𑐟𑐶𑐬𑐎𑑂𑐲𑐵 𑐫𑐵𑐫𑐾𑐟 𑐧𑐴𑐳 𑐫𑐵𑐣𑐵𑐡𑐷𑐩𑑂𑐴 𑐩𑐴𑐵𑐣𑑂𑐫𑐵𑐫𑐵𑐢𑐶𑐰𑐎𑑂𑐟𑐵 𑐬𑐩𑐾𑐱 𑐧𑐜𑐵𑐮𑑄 𑐢𑐵𑑅𑐳𑐵 𑐣𑑂𑐴𑐵𑐥𑐵𑐫𑐵 𑐩𑐸𑐡𑑂𑐡𑐵𑐫𑐵𑐟 𑐎𑐫𑐵𑑅 𑐀𑐡𑐵𑐮𑐟𑐫𑐵𑐟 𑐡𑐧𑐵𑐧𑐫𑑂 𑐟𑐫𑐾𑐟 𑐠𑐖𑑂𑐫𑐵𑑅𑐐𑐸 𑐏𑑃 𑐥𑐶𑐟 𑐴𑑅𑐐𑐸 𑐡𑑂𑐰𑐥𑑄 𑐧𑐶𑐫𑐵𑐡𑐶𑐮 𑑋 𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳𑐫𑑂 𑐡𑐸𑐥𑐶𑑄 𑐣𑑂𑐫𑐵𑐫𑐵𑐢𑐷𑐱𑐟𑐫𑑂𑐐𑐸 𑐧𑐵𑐬𑐾 𑐣𑑂𑐴𑑂𑐫𑐳𑑅 𑐔𑐶𑑄 𑐠𑐣𑐾𑐐𑐸 𑐏𑑅𑐳𑐵 𑐠𑐩𑑂𑐴𑑄 𑐣𑑄 𑐄𑐎𑐠𑑄 𑐴𑐾 𑐣𑑂𑐴𑑂𑐫𑐳𑑅𑐔𑐶𑑄 𑐠𑐣𑐵𑑅 𑐁𑑅 𑐡𑐸𑐥𑐶𑑄 𑐦𑐸𑐎𑑂𑐎𑑄 𑐣𑑂𑐫𑐵𑐫𑐵𑐢𑐷𑐱𑐫𑐵 𑐂𑐖𑐮𑐵𑐳𑐫𑐵𑐟 𑐴𑐾 𑐔𑐷𑐎𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐰𑐫 𑐦𑐂𑐐𑐸 𑐏𑑂𑐫𑐵𑐔𑑂𑐰𑑅 𑐣𑑄 𑐰𑐫𑑂𑐎𑐮𑑄 𑐧𑐶𑐫𑐵𑐡𑐶𑐮 𑑋

𑐳𑑄𑐰𑐿𑐢𑐵𑐣𑐶𑐎 𑐂𑐖𑐮𑐵𑐳𑐫𑐵 𑐣𑐶𑐩𑑂𑐴 𑐣𑑂𑐫𑐵𑐫𑐵𑐢𑐷𑐱𑐥𑐶𑐣𑐶 𑐧𑐵𑐬𑐾 𑐰𑐶𑐰𑐵𑐡 𑐥𑐶𑐴𑐵𑑄 𑐰𑐫𑐾𑐰𑑄 𑐁𑑅 𑐰𑐫𑑂𑐎𑑅𑐥𑐶𑑄 𑐠𑐸𑐎𑐷 𑐔𑑂𑐰𑐣𑐾 𑐖𑐶𑐄 𑐮𑐵𑐎𑐶 𑐩𑐖𑐶𑐄 𑐢𑐎𑐵𑑅 𑐎𑐣𑑂𑐴𑐫𑑂 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐰 𑐰𑐫𑐵𑑄 𑐮𑐶𑐥𑐵 𑐖𑐎 𑐳𑑄𑐳𑐡 𑐰𑐶𑐑𑐚𑐣 𑐳𑐩𑑂𑐧𑐣𑑂𑐢𑐷 𑐳𑐸𑐣𑐸𑐰𑐵𑐃 𑐣𑑂𑐴𑑂𑐫𑐵𑐎𑐷𑐐𑐸 𑐖𑐹𑐐𑐸 𑐡𑐸 𑑋

 

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS