Read news in NepalBhasa text-- www.hamroschool.com BACK 𑐎𑐸𑐴𑐵𑑄 𑐰𑐮 𑐳𑑂𑐠𑐵𑐣𑐷𑐫 𑐳𑐩𑐸𑐡𑐵𑐫 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐎𑐸𑐴𑐵𑑄 𑐰𑐮 𑐳𑑂𑐠𑐵𑐣𑐷𑐫 𑐳𑐩𑐸𑐡𑐵𑐫

𑐫𑐾𑑃 – 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑐫𑐵 𑐂𑐮𑐫𑑂 𑐰𑐶𑐬𑐵𑐩𑐷 𑐨𑐬𑑂𑐣𑐵 𑐫𑐵𑐫𑐾𑐟 𑐀𑐳𑑂𑐥𑐟𑐵𑐮𑐫𑑂 𑐧𑐾𑐜 𑐟𑐎𑑄 𑐎𑐵𑐫𑐾 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐏𑑃𑐫𑐵𑐟 𑐢𑑂𑐫𑐵𑐣𑐫𑑂 𑐟𑐫𑐵𑑅 𑐳𑑂𑐰𑐣𑐶𑐐𑑅𑐫𑐵 𑐳𑑂𑐠𑐵𑐣𑐷𑐫 𑐳𑐩𑐸𑐡𑐵𑐫 𑐠𑑅𑐥𑐶𑑄 𑐴𑐾 𑐀𑐎𑑂𑐳𑐶𑐖𑐣 𑐳𑐴𑐶𑐟𑐫𑐵 𑐁𑐂𑐳𑑀𑐮𑐾𑐱𑐣 𑐳𑐾𑐣𑑂𑐚𑐬 𑐔𑐵𑐫𑐾𑐎𑐾𑐐𑐸 𑐖𑑂𑐫𑐵𑐫𑑂 𑐎𑐸𑐴𑐵𑑄 𑐰𑑅𑐐𑐸 𑐡𑐸 𑑋 𑐠𑑂𑐰 𑐗𑑂𑐰𑐮𑐫𑑂 𑐫𑐾𑑃 𑐰 𑐫𑐮𑐫𑐵 𑐳𑑂𑐠𑐵𑐣𑐷𑐫 𑐖𑐣𑐟𑐵𑑄 𑐀𑐖𑑂𑐫𑐵𑑅𑐐𑐸 𑐳𑐾𑐣𑑂𑐚𑐬 𑐔𑐵𑐫𑐾𑐎𑐾𑐐𑐸 𑐱𑐸𑐬𑐸 𑐫𑐵𑐣𑐵 𑐴𑑅𑐐𑐸 𑐏𑑅 𑑋

𑐫𑐮𑐫𑐵 𑐔𑑂𑐫𑐵𑐳𑑅 𑐟𑑂𑐰𑐵𑐮𑐫𑑂 𑐔𑑂𑐰𑑄𑐐𑐸 𑐳𑑂𑐠𑐵𑐣𑐷𑐫 𑐎𑑂𑐮𑐧𑐟𑐫𑑂𑐳𑑄 𑐠𑑅𑐐𑐸 𑐴𑐾 𑐮𑐵𑐐𑐵𑐫𑑂 𑐕𑐐𑐹 𑐔𑐷𑐢𑑄𑐐𑐸 𑐁𑐂𑐳𑑀𑐮𑐾𑐱𑐣 𑐳𑐾𑐣𑑂𑐚𑐬 𑐔𑐵𑐫𑐾𑐎𑐵𑑅 𑐳𑐘𑑂𑐔𑐵𑐮𑐣 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐣𑐫𑐵 𑐔𑑂𑐫𑐵𑐳𑑅 𑐩𑑄𑐎𑐵𑑅 𑐏𑐮𑑅, 𑐔𑑂𑐫𑐵𑐳𑐮 𑐫𑐸𑐰𑐵 𑐎𑑂𑐮𑐧 𑐁𑐡𑐶 𑐳𑑂𑐠𑐵𑐣𑐷𑐫 𑐳𑑄𑐳𑑂𑐠𑐵𑐟 𑐖𑐵𑐣𑐵𑑅 𑐄𑐐𑐸 𑐁𑐂𑐳𑑀𑐮𑐾𑐱𑐣 𑐳𑐾𑐣𑑂𑐚𑐬 𑐔𑐵𑐫𑐾𑐎𑐹𑐐𑐸 𑐏𑑅 𑑋 𑐀𑐣 𑐴𑐾 𑐔𑑂𑐰𑑄𑐐𑐸 𑐕𑐐𑐹 𑐐𑐸𑐠𑐶𑐫𑐵 𑐕𑐾𑑃𑐫𑑂 𑐀𑐎𑑂𑐳𑐶𑐖𑐣 𑐳𑐴𑐶𑐟𑐫𑐵 𑐧𑐾𑐜 𑐟𑐫𑐵𑑅 𑐰𑐶𑐬𑐵𑐩𑐷𑐫𑐵𑐟 𑐳𑐾𑐰𑐵 𑐧𑐷𑐐𑐸 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐮𑐵𑐐𑐶𑑄 𑐀𑐣 𑐳𑑂𑐠𑐵𑐣𑐷𑐫 𑐮𑐵𑐐𑐵𑐫𑑂 𑐔𑑂𑐰𑑄𑐥𑐶𑑄 𑐜𑐵𑐎𑑂𑐚𑐬 𑐰 𑐣𑐬𑑂𑐳𑐟 𑐥𑐬𑐶𑐔𑐵𑐮𑐣 𑐫𑐵𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐫𑐾𑑃𑐫𑑂 𑐣𑑄 𑐣𑐾𑐰𑐵𑑅 𑐐𑑂𑐰𑐵𑐴𑐵𑐮𑐶 𑐥𑐸𑐔𑑅𑐫𑐵 𑐣𑐾𑐰𑐵𑑅 𑐎𑐵𑐬𑑂𑐫𑐎𑐬𑑂𑐟𑐵𑐟 𑐖𑐵𑐣𑐵𑑅 𑐔𑐷𑐢𑑄𑐐𑐸 𑐁𑐂𑐳𑑀𑐮𑐾𑐱𑐣 𑐳𑐾𑐣𑑂𑐚𑐬 𑐔𑐵𑐫𑐾𑐎𑐾𑐐𑐸 𑐟𑐫𑐵𑐬𑐷 𑐫𑐵𑑅𑐐𑐸 𑐡𑐸 𑑋 𑐣𑐾𑐰𑐵𑑅 𑐐𑑂𑐰𑐵𑐴𑐵𑐮𑐶 𑐥𑐸𑐔𑑅𑐫𑐵 𑐎𑐵𑐩𑐥𑐵 𑐰𑐜𑐵 𑐣𑑄. 𑑑𑑗 𑐰 𑐰𑐜𑐵 𑐣𑑄. 𑑒𑑖 𑐫𑐵 𑐎𑐵𑐬𑑂𑐫𑐎𑐬𑑂𑐟𑐵𑐟 𑐖𑐵𑐣𑐵𑑅 𑐐𑑂𑐰𑑄𑐐𑑅𑐧𑐸𑑃𑐫𑐵 𑐕𑐐𑐹 𑐜𑐵𑐫𑐮𑐵𑐳𑐶𑐳 𑐎𑐾𑐣𑑂𑐡𑑂𑐬𑐫𑑂 𑐠𑑂𑐰 𑐁𑐂𑐳𑑀𑐮𑐾𑐳𑐱𑐣 𑐳𑐾𑐣𑑂𑐚𑐬 𑐔𑐵𑐫𑐾𑐎𑐹𑐐𑐸 𑐏𑑅 𑑋 𑑒𑑐 𑐧𑐾𑐜 𑐖𑐎 𑐡𑐸𑐐𑐸 𑐄𑐐𑐸 𑐳𑐾𑐣𑑂𑐚𑐬𑐫𑑂 𑐀𑐎𑑂𑐳𑐶𑐖𑐣 𑐳𑐩𑐾𑐟 𑐡𑐸𑐐𑐸 𑐖𑐸𑐫𑐵𑑅 𑐠𑐸𑐎𑐶𑐫𑐵 𑐳𑐘𑑂𑐔𑐵𑐮𑐣 𑐮𑐶𑐥𑐵 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐟 𑐀𑑅𑐥𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐠𑐖𑑂𑐫𑐵𑑅𑐐𑐸 𑐁𑐂𑐳𑑀𑐮𑐾𑐱𑐣 𑐳𑐾𑐣𑑂𑐚𑐬𑐫𑑂 𑐟𑐔𑑂𑐰𑑅𑐥𑐶𑑄 𑐰𑐶𑐬𑐵𑐩𑐷 𑐟𑐂𑐐𑐸 𑐩𑐏𑐸𑐳𑐾𑑄 𑐕𑐾𑑃𑐫𑑂 𑐀𑐮𑐐𑑂𑐐 𑐔𑑂𑐰𑐣𑐾𑐐𑐸 𑐰𑑂𑐫𑐰𑐳𑑂𑐠𑐵 𑐩𑐡𑐸𑐥𑐶𑑄 𑐰 𑐏𑐵𑐳 𑐫𑐵𑐣𑐵𑑅 𑐀𑐎𑑂𑐳𑐶𑐖𑐣 𑐠𑐣𑐾𑐩𑐵𑑅𑐥𑐶𑑄 𑐰𑐶𑐬𑐵𑐩𑐷𑐟𑐫𑑂𑐟 𑐟𑐫𑐾𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐎𑑀𑐬𑑀𑐣𑐵𑐫𑐵 𑐩𑐴𑐵𑐩𑐵𑐬𑐷 𑐳𑑂𑐠𑐵𑐣𑐷𑐫 𑐳𑐩𑐸𑐡𑐵𑐫𑐳𑑂𑐟𑐬𑐫𑑂 𑐴𑐾 𑐡𑐸𑐴𑐵𑑄 𑐰𑐣𑐾𑐢𑐸𑑄𑐎𑐹𑐐𑐸 𑐖𑐸𑐫𑐵𑑅 𑐠𑐸𑐎𑐶𑐫𑐵𑐟 𑐥𑐣𑐾𑐐𑐸 𑐮𑐵𑐐𑐶𑑄 𑐳𑑂𑐠𑐵𑐣𑐷𑐫 𑐳𑐩𑐸𑐡𑐵𑐫𑑄 𑐳𑐩𑐾𑐟 𑐥𑐴𑐮 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑐵𑐟 𑐩𑐴𑐳𑐸𑐳 𑐫𑐵𑐳𑐾𑑄 𑐁𑑅 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐴𑐾 𑐔𑐶𑐔𑐷𑐢𑑄𑐐𑐸 𑐁𑐂𑐳𑑀𑐮𑐾𑐱𑐣 𑐳𑐾𑐣𑑂𑐚𑐬 𑐔𑐵𑐫𑐾𑐎𑐾𑐩𑐵𑑅𑐐𑐸 𑐧𑐶𑐔𑐵𑑅 𑐟𑐫𑐵 𑐴𑑅𑐐𑐸 𑐡𑐸 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐫𑐾𑑃𑐫𑐵 𑐩𑐵𑐬𑐰𑐵𑐜𑐷 𑐳𑐩𑐸𑐡𑐵𑐫𑐫𑐵 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐳𑑄 𑐣𑑄 𑐀𑐎𑑂𑐳𑐶𑐖𑐣 𑐀𑐨𑐵𑐰𑐫𑐵 𑐂𑐮𑐫𑑂 𑐠𑑅𑐐𑐸 𑐳𑐎𑑂𑐬𑐶𑐫𑐟𑐵 𑐎𑑂𑐫𑐣𑐵 𑐴𑑅𑐐𑐸 𑐡𑐸 𑑋 𑐩𑐵𑐬𑐰𑐵𑐜𑐷 𑐫𑐸𑐰𑐵 𑐩𑐘𑑂𑐔𑐥𑐵𑐏𑐾𑑄 𑐳𑐸𑐫𑐵𑑄 𑐕𑐾𑑃𑐫𑑂 𑐀𑐎𑑂𑐳𑐶𑐖𑐣𑐫𑐵 𑐳𑐶𑐮𑐶𑐞𑑂𑐜𑐬 𑐀𑐠𑐾𑑄 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐕𑐸𑑄 𑐃𑐫𑐵 𑐮𑐵𑐐𑐶𑑄 𑐥𑑂𑐬𑐫𑑀𑐐 𑐫𑐵𑐫𑐾𑐟 𑐧𑐶𑐫𑐵𑐡𑐶𑐳𑑃 𑐢𑐎𑐵𑑅 𑐕𑐾𑑃𑐫𑑂 𑐕𑐾𑑃𑐫𑑂 𑐴𑐾 𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐧𑐖𑐵𑐬𑐫𑑂 𑐀𑐎𑑂𑐳𑐶𑐖𑐣 𑐡𑐸𑐳𑐵𑑄 𑐳𑐶𑐮𑐶𑐞𑑂𑐜𑐬𑐫𑐵 𑐀𑐨𑐵𑐰 𑐖𑐸𑐫𑐵𑐔𑑂𑐰𑐣 𑐢𑐂𑐐𑐸 𑐏𑑃 𑐰𑑅𑐐𑐸𑐮𑐶𑑄 𑐩𑐵𑐬𑐰𑐵𑐜𑐷 𑐳𑐩𑐸𑐡𑐵𑐫𑑄 𑐠𑑂𑐰 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐣𑐾𑐥𑐵𑐮 𑐳𑐬𑐎𑐵𑐬𑑄 𑐬𑐵𑐖𑐢𑐵𑐣𑐷 𑐫𑐾𑑃𑐫𑑂 𑐎𑐵𑐬𑑀𑐣𑐵 𑐰𑐶𑐬𑐵𑐩𑐷𑐫𑐵 𑐮𑐵𑐐𑐶𑑄 𑐡𑑂𑐰𑑅𑐕𑐶𑐐𑐹 𑐧𑐾𑐜 𑐠𑐥𑐾 𑐫𑐵𑐫𑐾𑐐𑐸 𑐢𑐎𑐵𑑅 𑐫𑐵𑑅𑐐𑐸 𑐑𑑀𑐲𑐞𑐵 𑐎𑐠𑑄 𑐟𑐷𑐰𑑂𑐬 𑐬𑐸𑐥𑑄 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐡𑑂𑐰𑑅𑐕𑐶𑐐𑐹 𑐧𑐾𑐜 𑐠𑐥𑐾 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐫𑐾𑑃𑐫𑑂 𑐔𑑂𑐰𑑄𑐐𑐸 𑐠𑐷𑐠𑐷 𑐀𑐳𑑂𑐥𑐟𑐵𑐮𑐮𑐶𑐳𑐾 𑐳𑐩𑐣𑑂𑐰𑐫 𑐫𑐵𑐣𑐵𑑅 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋 𑐠𑑂𑐰 𑐖𑑂𑐫𑐵 𑐳𑐬𑐎𑐵𑐬𑑄 𑐣𑐾𑐥𑐵𑐮𑐷 𑐳𑐾𑐣𑐵𑐫𑐵𑐟 𑐖𑐶𑐩𑑂𑐩𑐵 𑐧𑐶𑐄𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS