Read news in NepalBhasa text-- www.hamroschool.com BACK 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑐵𑐴𑐶𑐟𑑂𑐫𑐎𑐵𑐬𑐫𑐵 𑐣𑐾𑐰𑐵𑑅 𑐬𑐵𑐖𑑂𑐫 𑐳𑐩𑐶𑐟𑐶 𑐑𑑀𑐲𑐞𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑐵𑐴𑐶𑐟𑑂𑐫𑐎𑐵𑐬𑐫𑐵 𑐣𑐾𑐰𑐵𑑅 𑐬𑐵𑐖𑑂𑐫 𑐳𑐩𑐶𑐟𑐶 𑐑𑑀𑐲𑐞𑐵

𑐫𑐮- 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑐵𑐴𑐶𑐟𑑂𑐫𑐎𑐵𑐬 𑐩𑐴𑐵𑐳𑑄𑐑 𑐀𑐣𑑂𑐟𑐬𑑂𑐐𑐟𑐫𑐵 𑐣𑐾𑐰𑐵𑑅 𑐬𑐵𑐖𑑂𑐫 𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐡𑐸 𑑋 𑐰𑑄𑐐𑐸 𑐧𑐸𑐢𑐰𑐵𑑅 𑐠𑐣𑐫𑐵 𑐳𑐵𑐟𑑀𑐁𑐎𑐷 𑐨𑐰𑐣𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑐵𑐴𑐶𑐟𑑂𑐫𑐎𑐵𑐬 𑐩𑐴𑐵𑐳𑑄𑐑𑐫𑐵 𑐣𑐾𑐰𑐵𑑅 𑐬𑐵𑐖𑑂𑐫 𑐟𑐡𑐬𑑂𑐠 𑐳𑐩𑐶𑐟𑐶𑐫𑐵 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑑋

𑐣𑐾𑐰𑐵𑑅 𑐬𑐵𑐖𑑂𑐫 𑐟𑐡𑐬𑑂𑐠 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐱𑐵𑐎𑑂𑐫 𑐳𑐸𑐬𑐾𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐩𑐴𑐵𑐳𑑄𑐑𑐫𑐵 𑐟𑐡𑐬𑑂𑐠 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐬𑐵𑐖𑐣 𑐩𑐸𑐎𑐵𑐬𑐸𑐒 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐣𑐬𑐾𑐱 𑐟𑐵𑐩𑑂𑐬𑐵𑐎𑐵𑐬 𑐰𑐶𑐱𑐾𑐲 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐴𑐵𑐳𑑄𑐑𑐫𑐵 𑐟𑐡𑐬𑑂𑐠 𑐳𑐩𑐶𑐟𑐶𑐫𑐵 𑐎𑐾𑐣𑑂𑐡𑑂𑐬𑐷𑐫 𑐡𑐸𑐖𑑅 𑐎𑐰𑐫𑐶𑐟𑑂𑐬𑐷 𑐬𑐖𑐣𑐷 𑐩𑐶𑐮𑐵 𑐩𑐴𑐬𑑂𑐖𑐣, 𑐥𑐸𑐮𑐵𑑄𑐩𑑂𑐴 𑐳𑐵𑑄𑐳𑐡 𑐖𑐷𑐟𑐰𑐷𑐬 𑐮𑐵𑐩𑐵, 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐣𑐵𑐥𑑄 𑐳𑐵𑐴𑐶𑐟𑑂𑐫𑐎𑐵𑐬 𑐳𑐩𑐵𑐮𑑀𑐔𑐎 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐜𑐵. 𑐩𑐴𑐾𑐱𑐩𑐵𑐣 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮 𑐟𑐵𑐩𑐵𑐒 𑐑𑐾𑐡𑐸𑐒𑐫𑐵 𑐄𑐥𑐵𑐢𑑂𑐫𑐎𑑂𑐲 𑐀𑐖𑐶𑐟𑐩𑐵𑐣 𑐟𑐵𑐩𑐵𑐒 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐣𑐵𑐫𑑅 𑐱𑐵𑐎𑑂𑐫 𑐳𑐸𑐬𑐾𑐣𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐩𑐸𑐎𑐵𑐬𑐸𑐒𑑄 𑐣𑐾𑐰𑐵𑑅 𑐬𑐵𑐖𑑂𑐫 𑐟𑐡𑐬𑑂𑐠 𑐳𑐩𑐶𑐟𑐶𑐫𑐵 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐰𑐫𑑂𑐎𑑅𑐥𑐶𑑄𑐟 𑐰𑐶𑐱𑐾𑐲 𑐥𑐵𑐴𑐵𑑄 𑐡𑐧𑐹𑐫𑐵 𑐣𑐵𑐫𑑅 𑐟𑐵𑐩𑑂𑐬𑐵𑐎𑐵𑐬 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵𑐡𑐷𑐐𑐸 𑐏𑑅 𑑋 𑐑𑑀𑐲𑐶𑐟 𑐟𑐡𑐬𑑂𑐠 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎𑐫𑑂 𑐱𑐵𑐎𑑂𑐫 𑐳𑐸𑐬𑐾𑐣, 𑐳𑐴 𑐳𑑄𑐫𑑀𑐖𑐎𑐫𑑂 𑐳𑐸𑐢𑐶𑐬 𑐏𑑂𑐰𑐧𑐶, 𑐳𑐔𑐶𑐰𑐫𑑂 𑐣𑐰𑐷𑐣𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛, 𑐎𑑀𑐲𑐵𑐢𑑂𑐫𑐎𑑂𑐲𑐫𑑂 𑐎𑐰𑐶𑐣𑑂𑐡𑑂𑐬𑐮𑐵𑐮 𑐥𑑂𑐬𑐢𑐵𑐣 𑐔𑑂𑐰𑐣𑐵𑐡𑐷𑐐𑐸 𑐡𑐸𑐳𑐵 𑐡𑐸𑐖𑐮𑐫𑑂 𑐰𑐶𑐩𑐮𑐥𑑂𑐬𑐨𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐡𑐶𑐰𑑂𑐫𑐵 𑐟𑐵𑐩𑑂𑐬𑐵𑐎𑐵𑐬, 𑐱𑐶𑐮𑐵 𑐳𑐵𑐫𑑂𑐩𑐶, 𑐀𑐬𑑂𑐖𑐸𑐣 𑐩𑐴𑐬𑑂𑐖𑐣, 𑐩𑐶𑐣𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐬𑐵𑐖𑐸𑐬𑐵𑐩 𑐩𑐸𑐣𑑄𑐎𑑅𑐩𑐶 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐩𑐸𑐎𑐵𑐬𑐸𑐒𑑄 𑐩𑐴𑐵𑐳𑑄𑐑 𑐀𑐣𑑂𑐟𑐬𑑂𑐐𑐟𑐫𑐵 𑐔𑑂𑐫𑐵𑐐𑐹 𑐠𑐷𑐠𑐷 𑐖𑐵𑐟𑐷𑐫 𑐬𑐵𑐖𑑂𑐫 𑐳𑐩𑐶𑐟𑐶 𑐐𑐛𑐣 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐣𑐶𑐮𑐵𑐫𑐵 𑐡𑐸𑐣𑐾 𑐔𑑂𑐫𑐵𑐐𑐹 𑐬𑐵𑐖𑑂𑐫 𑐳𑐩𑐶𑐟𑐶 𑐐𑐛𑐣 𑐫𑐵𑐫𑐾𑐐𑐸 𑐮𑐎𑑂𑐲𑑂𑐫 𑐡𑐸𑐐𑐸 𑐰 𑐣𑐾𑐰𑐵𑑅 𑐬𑐵𑐖𑑂𑐫 𑐳𑐩𑐶𑐟𑐶 𑐣𑑂𑐴𑐫𑑂𑐐𑐹𑐐𑐸 𑐖𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂 𑐮𑐶𑐩𑑂𑐧𑐸𑐰𑐵𑐣, 𑐩𑐐𑐬𑐵𑐟, 𑐟𑐩𑐸𑐰𑐵𑐣, 𑐠𑐬𑐸𑐴𑐚, 𑐟𑐵𑐩𑑂𑐳𑐵𑐮𑐶𑐒 𑐬𑐵𑐖𑑂𑐫 𑐳𑐩𑐶𑐟𑐶 𑐐𑐛𑐣 𑐖𑐸𑐂𑐢𑐸𑑄𑐎𑐹𑐐𑐸 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐮𑐶𑐳𑐾𑑄 𑐠𑑂𑐰 𑐀𑐰𑐢𑐶 𑐡𑐸𑐣𑐾 𑐗𑐶𑑄𑐥𑑂𑐫𑑄𑐐𑐹 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐩𑐶𑐟𑐶 𑐣𑑄 𑐐𑐛𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂𑐢𑐸𑑄𑐎𑐹𑐐𑐸 𑐢𑐵𑐳𑐾𑑄 𑐔𑐿𑐟 𑑗 𑐰 𑑘 𑐐𑐟𑐾 𑐣𑐶𑐣𑑂𑐴𑐸𑐫𑑄𑐎𑑄 𑐬𑐵𑐲𑑂𑐚𑑂𑐬𑐶𑐫𑐳𑑂𑐟𑐬𑐫𑐵 𑐨𑐾𑐮𑐵 𑐫𑐵𑐫𑐾𑐟𑑂𑐫𑐣𑐵𑐐𑐸 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐨𑐶𑑄𑐟𑐸𑐣𑐵 𑐣𑑂𑐰𑐔𑐸 𑐧𑐶𑐫𑐵𑐡𑐶𑐳𑐾𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐜𑐵. 𑐱𑑂𑐬𑐾𑐲𑑂𑐛𑑄 𑐣𑐾𑐰𑐵𑑅 𑐳𑐩𑐵𑐖𑐫𑐵𑐟 𑐮𑑃 𑐎𑑂𑐫𑐣𑐷𑐐𑐸 𑐎𑐠𑑄𑐫𑐵 𑐳𑐵𑐴𑐶𑐟𑑂𑐫𑐫𑐵 𑐬𑐔𑐣𑐵 𑐖𑐹𑐐𑐸 𑐏𑐣𑐾 𑐩𑐡𑐸 𑐢𑐫𑐵𑐡𑐶𑐮 𑑋 𑐐𑐸𑐮𑐶 𑐣𑑄 𑐳𑐵𑐴𑐶𑐟𑑂𑐫𑐫𑐵 𑐳𑐺𑐖𑐣𑐵 𑐖𑐸𑐮 𑐄𑐎𑐶𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐟𑐶𑐧𑑅 𑐧𑐷𑐐𑐸 𑐖𑑂𑐫𑐵 𑐩𑐖𑐹 𑐢𑐵𑐳𑐾𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐟𑐶𑐧𑑅 𑐖𑐸𑐂𑐐𑐸 𑐰 𑐣𑐾𑐰𑐵𑑅 𑐳𑐩𑐵𑐖𑐫𑐵𑐟 𑐮𑑃 𑐎𑑂𑐫𑐣𑐷𑐎𑐠𑑄𑐫𑐵 𑐳𑐵𑐴𑐶𑐟𑑂𑐫 𑐳𑐶𑐬𑑂𑐖𑐣𑐵 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐕𑐐𑐹 𑐥𑑂𑐬𑐳𑑄𑐐𑐫𑑂 𑐖𑐣𑐳𑑄𑐏𑑂𑐫𑐵𑐫𑐵 𑐮𑑂𑐫𑐵𑐏𑑄 𑐣𑐾𑐰𑐵𑑅𑐟 𑐀𑐥𑑂𑐰𑑅 𑐡𑐸𑐳𑐵𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐩𑐢𑑂𑐫𑐾 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐀𑐳𑑂𑐟𑐶𑐟𑑂𑐰 𑐮𑑀𑐥 𑐖𑐸𑐂𑐐𑐸 𑐢𑐮𑐏𑐫𑑂 𑐣𑑄 𑐠𑑂𑐰 𑐴𑐾 𑐖𑐵𑐟𑐶 𑐮𑐵𑐣𑐵𑐔𑑂𑐰𑑄𑐐𑐸 𑐰 𑐣𑐾𑐰𑐵𑑅 𑐨𑐵𑐫𑑂 𑐣𑑄 𑐳𑐷𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐴𑐵𑐎𑐠𑑄 𑐗𑐵𑐫𑐵𑐡𑐷𑐥𑐶𑑄 𑐳𑐎𑐳𑐶𑐣𑑄 𑐨𑐶𑑄𑐟𑐸𑐣𑐵 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐳𑐴𑐳𑑄𑐫𑑀𑐖𑐎 𑐏𑑂𑐰𑐧𑐶𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS